رواية الأرملة السوداء الفصل الأول
القصه حقيقيه من ملفات الشرطه
..........
اني هشام مواليد مواليد ٩٥ واخوي الاكبر مني همام مواليد ٩٠
احنا فقط ثنيين اولاد بلعائله
ابوي محمد عامر الذهبي
اكبر تاجر ذهب بلمنصور
عدنا محل ذهب جبير
بالاضافه إلى معمل ذهب خاص بينا
هذا المعمل نعيد بي تصنيع الذهب المستعمل
اكثر الذهب الي نستورد من تركيا
أيضا نستورد من الامارات
بس اكثر شي نستورد من تركيا
ودائما اخوي يسافر التركيا
اذا ردنا نستورد كميات جبيره
ومرات يدزولنا الدزاينات والتصاميم الجديده واحنا نختار
ويصممون لنا عليهن
عدنا أملاك خير من الله
طبعا شغلت صياغة الذهب متوارثينه اب عن جد
عمي عندا محل ذهب بلكاضميه
امي تربويه قدمت على التقاعد المبكر
راحت مرتين حج وأربع مرات عمره
امي بيه صفه كلش حلووه
ذكيه جداا ومستحيل نكدر نعبر عليه شغله
بابا دائما يضحك ويكووول اني عايش وياها ٣٠ سنه
وماكدرت عليها
انتم تكدرين تقشمرونها
بيتنا كلش جبير بلمنصور بيت ملك
مساحته حوالي ٦٠٠ متر
بناءه شبه الفله كلش حلووووو
والحقيقه كلش جبيره
وزارعين بيه كل أنواع الزرع والاشجار حتى نباتات مستورده
حياتنا مستقر وعايشين بسلام والحمد لله
همام خريج كلية تربيه
واني خريج معهد فني
اني شكلي حلووو حنطاوي رشيق شعري اسود
طولي ١٧٥
شكلي كلش مرتب
شغلنا ماشي وعدنا هواي زباين
لان محلنا قديم ومعروف من زمان
جمانه السعيدي
بدت حياتنا تتغير لمن وكع ابوي مريض
ماخلينا دكتور ولا مستشفى تعتب علينا
عندا مي صاعد على الرئه
حتى للخارج اخذنا وماكو اي تحسن عندا
بقينا سنه كامله نعالج بي بس بدون اي فائده
إلى ان الله سبحانه وتعالى اخذ امانته
كانت أكبر فاجعه مرينا بيها
علاقتنا بي كانت اكثر من علاقة اب باولاده
بعمره ما زعل احد من عدنا
كان صديق قبل لايكون اب
اخر شي وصانه علي نكون متماسكين وما نفترق ابد
ونحافظ على حلالنا
مستحيل نفترق اني وهمام
لان خوتنا حلوووه ومتفاهمين حيل
جمانه السعيدي
ايام الفاتحه انكلبت علينا الناس كلاب
شهر كامل واحنا كاعدين بلبيت والناس تروح وترجع علينا
بعد الأربعين يله كدرنا نرجع للمحل
ونفتحه مره ثانيه
بس المحل كان موحش مكان ابوي فارغ
صحيح احنا كبار مو زغار
بس وجوده يفرق هواي بحياتنا
كنا نحس بلامان بوجوده
واي مشكله تواجهنا مهما كانت صعبه
يلكالها حل بسرعه
عندا خبره
ومتمرس بلشغل
بصعوبه يله كدرنا نتاقلم ويه الوضع
امي ماكدرت تتخلص من حزنها بسرعه
رغم احنا كنا ما مقصرين باي شي وياها
ونحاول نكعد اكبر وقت وياها
ونسليها
رجعنا الشغلنا وكدرنا نطور نفسنا وماعدنا اي مشاكل من اي نوع ابد
بلعكس كلش متفاهمين اني وهمام
سنة ٢٠١٧ هي السنه الي توفه بيها بابا
واحنا لزمنا الشغل
بدينا نفكر نطور شغلنا خصوصا الوضع جان زين
والناس عدها إقبال مو طبيعي على شراء الذهب
وكانت اسعار الذهب معقوله
والرواتب زينه
اجت ابالي فكره
نجيب بنيه تلزم الاستقبال
ويكون شكلها حلو
حتى تجذب الزباين
همام ماكان مقتنع بلفكره
بس اني كدرت أقنعه بهاي الفكره
كنوع من التغير حتى نجذب الزباين
جمانه السعيدي
على العموم كدام ملحتي على هذا الموضوع وافق همام
نشرنا اعلان بلفيس
على صفحة المحل
وانطينا المواصفات الي نريدها
وحددنا موعد نستقبل بي البنات
بعد يومين اجانا عدد موطبيعي من البنات الي تقدمن الهاي المهنه
كل الاشكال والموديلات وحايرات شلابسات
وشنو مسويات بنفسهن
حتى نقبل بيهن
بدينا ناخذ بيانات كل وحده منهن
حتى نختار الانسب
طبعا من شروطنا للقبول
تكون رشيقه وحلوه وما متزوجه واسلوبها بلحديث
حلو وراقي
راح تكولون ليش ما مزوجه
لان المزوجه يعني عدها ارتباط واحنا ما نريد وحده مرتبطه ابد
يعني المرتبطة احتمال تتاخر على الدوام
لو حامل لو جايبه لو ابني مريض
انريده ما عدها اي ارتباط حتى تتفرغ للمحل
بدينا ناخذ البيانات الحد ما وحده وكعت عيني عليها
مو بنيه ضيم
كلشي بيها حلوووو
موصفات فووول
سبحان الخالق المبدع
ماكدرت اشيل عيني من عليها
ندست همام هاي هاي
همام شبيك خل نشوف البقيه
هشام هاي يعني هاي عجبتني بشرفك اخذ بياناته
اشرتله اتقدمت
هشام اسمج
... رواء
...عمرج
...٢٠
....دراستج
....اعداديه ضروفي ما سمحتي اكمل
....مرتبطه
...لا
...زين ممكن تجين باجر احنا نفتح المحل الساعه ١٠ الصبح
وراح تكونيين تحت الاختبار لمدت
اسبوع وبعدها نقرر تشتغلين عدنا لو لا
تفضلي تكدرين تروحين
همام خل نشوف البقيه يجوز وحده عدها موهلات احسن منها
هشام ولك يا موهلات ماتشوف جنها صاروخ تخبل
همام ولو هذا محل ذهب لازم ندقق بلناس الي تشتغل عدنا
هشام اي راح نختبرها ونشوف ولو اني متأكد راح
تنجح بلامتحان
همام وشلون اتاكدت بله
هشام حتلو كلشي ما تعرف اني راح اعلمه المهم
تشتغل هنا واشوفها كدام عيني طول الوقت
همام الله يستر منك
جمانه السعيدي
من رجعنا للبيت وحجينا الامي
امي اعترضت
ماقبلت بنيه تشتغل ويانه بس اني صممت على هذا الموضوع
جنت مصر بشكل مو طبيعي
اخذت كلبي وعقلي مني
بليلتها جنت كلش فرحان وبلكوه يله نمت صورتها
ماتفارك بالي
ثاني يوم كعدت وكلي نشاط اريد بس اروح للمحل واشوفها اجت لو لا
طلعت قبل همام وصلت وفعلا لكيت العمال فاتحين المحل
وهي جايه وكاعده
لابسه ملابس عاديه بس غير يخبلن عليها
لابسه بنطرون جينز وقميص ابيض
شعرها اسود النص ضهرها
فاتحته ونازل على اكتافها
عيونها بيهن سحر عجيب
عدها كميت جاذبيه مو طبيعيه
بس شافتني جانت كاعده على الكرسي وكفت
رواء صباح الخير استاذ
هشام ياصباح الخيرات
اشرتلها تعاي افهمج على الشغل
اجت تمشي مثل الغزال
حبيت كل تفاصيلها ماكانت لابسه شي اوفر بلعكس لبسها كلش بسيط
ومكياجها هادء حيل
حسيتها بسيطه مو مصطنعه
اول مره اشوف وحده وهيج تشدني عليها حيل
دخلت عقلي وتمركزت من اول لحضه
بديت اعلمها شغلها
بسرعه تحفظ كلشي وابد ما تعبتني
كنت بقمة السعاده واني واكف بصفها واعلمها
تمنيت هاي اللحضات بينا ماتخلص ابد
ما اعرف ساعته شجاني مثل المسحور
رغم اني تعاملي اكثر شي ويه النساء
وشايف وعايف
بس ما اعرف ليش هيج صار وياي....
