رواية حب بعد الطلاق الفصل الأول
اني اسمي سما ويدلعوني سمسم مواليد ٩٣ هاي اخر سنه معهد محاسبه عندي اخوان اثنيين واخوات اثنيين
سحر اختي الجبيره وبعدين علي وبعدين سجاد واني وازغر وحده نور
بابا موظف بدائرة الري وامي ربت بيت
سحر مزوجه وعدها ولد وعلي مزوج رنا بنيه تعرف عليها بلكليه وينتضرون بيبي جاي بلطريق
علي مدرس
وسجاد ازغر مني بسنه هاي ثاني سنه يعيد السادس
امي عدها اربع اخوان وامها وابوها اخوانها الكبار مزوجين وباقي بس اخر واحد عماد
خلص جامعه ومتعين بعقد بدائرة الكهرباء عمرا ٢٧سنه
يلح على ماما يريد يزوج ويريدها هي تختارله زوجه على ذوقها
ايريدها مؤدبه وبت ناس بس مايريدها داخله جامعه
بس شني ما اسولفلكم سابينا سبي
يتغدا ويتعشى عدنا وكلما تختار وحده يطلع عيوب الدنيا بيها لو نروح وماترهم
الحد مايوم وصفولنا بنيه واهلها ناس محترمين البنيه مخلصه متوسطه
وقررت ماما تروح تشوفها صادفت عطلة نص السنه واني لزكت اله اروح وياها
سما...ماما عفيه اروح وياج
ماما...شسوين رايحه
سما...ماما اتفحص العروس يجوز معيوبه
ماما...يله تعاي وياي هم انتي تنتبهين احسن مني
خالي كلساع يخابر يله رحتو شفتوها اريد صوره
اريدها حلوه تخبل
وفعلا العصر بدلنا ورحنا ماما لبست جبه وشال واني بنطرون ثلجي وبدي بصلي طبعا اني مو محجبه
طلعنا اجرنا سياره ورحنا
وصلنا بيتهم حلو مرتب طبعا عدهم خبر
احنا راح نجي
استقبلتنا امهم ودخلتنا للصاله ورحبت بينا
طبعا امهم بس تشوفيها تحسين ترتاحين الها
حلوه واسلوبها حلو بلحديث
بدينا نتعرف عليهم واشويه واجت العروس اسمها نورهان
سلمت وكعدت
حلوه جسمها عبالك منحوت نحت
طويله حنطاويه عدها خصر وخلفيه حواجبها وعيونها حلوات اصابع اديها عبالك اقلام
شعرها الحد متنها
امها كامت تحجي تكول احجي عليها طولي شعرج
كل يوم وكاصته تكول ما احب الشعر الطويل
اني عود صرت شاطره واريدها تحجي واسمع صوتها
سما...انتي شمخلصه دراسه
نورهان....ثالث متوسط
سما...وليش تركتي المدرسه
نورهان...اني طويله صرت اطول وحده بلصف خلصت ثالث وكعدت
سما...اذا تجيج فرصه ترجعين
نورهان...اي ولله تندمت لان عفت المدرسه
جمانه السعيدي
ام نورهان....اكثر شي شاطره بي نورهان المعجنات تسويها تخبل
سما...اي ولله خالو عماد يحب المعجنات حيل
ماما...احنا جايين على نورهان والاهم احنا تعرفنا عليكم
ويبقى الرائي الاول والاخير للعرسان وهي قسمه ونصيب
ام نورهان...اكيد الراءي الهم هم راح يزوجون مو احنا
ماما...تنطينا صوره للمحروسه يشوفها عماد
ام نورهان...لا خل يجي ويشوفها وتشوفا وهذا الشي مو حرام
ويقررون همه ويصير خير
ماما...زين هذا رقمي واي وكت يعجبكم خابروني ونجي اني ويا ويصير خير انشاء الله
سلمنا عليهم وطلعنا بس اني وماما حيل عجبتنا البنيه وامها
طبعا خالي كل شويه يتصل وانطي رفض
خبلنا نريد نحجي ماينطينا مجال ابد
بعدين اخر شي قفلت الجهاز لان مللنا مستعجل على العرس
من طلعنا يله فتحت الجهاز وهو استلمني غلط وتحلفلفلي
عماد...سما..اكيد انتي الي قفلتي الجهاز بسيطه اني اعلمج اله انفش كفشتج العوبه مسويه روحها خطابه
منو عتب عليج تخطبين شعدج حاشره روحج
حته اسكته وهو يغلط ويحجي سريع كلت
سما...شني تخبل اطك بلكاع طك من الجمال نورهان واسمها عليها
عماد...صدك الله عليج حبيبة خالو اموت عليج
سما...لعد منو العوبه وام كفشه والحاشره نفسها حشر
عماد...مو انتي اني مو عليج اصلا انتي احلى وحده بلشرق الاوسط
الله عليج حلوه
سما...تخبل اتجنن وابشرك يكولون خل يجي يشوفها
عماد...الله عليج طبعا اذا طلعت مثل ما اريد الج ٢٥ الف هديه
سما...خالو مو تبدل عليه اذا ماتنطيني اروح واطلع كل عيوب الدنيا بيك كدامها
عماد...اذا تعجبني حتى اشتريلج فستان للعرس
طبعا خالو عماد صح يداوم بعقد بدائرة الكهرباء بس عندا محل كهربائيات العصر يكعد بي
وبيني وبينكم عندا فلوس خير من الله
جمانه السعيدي
ثاني يوم خابرونا وحددنا موعد حتى خالي يروح يشوفها
اني لزكت وياهم حتى اطلع ال ٢٥
رحنا اني وماما وهلمره راحت ويانا بيبي
استقبلونا وجان موجود ابوها وعمها واخوها تقريبا عمرا ١٣
كعدنا شويه وكمنا نسوالف
جان تجي هي وتدخل وتكعد اكباله
لابسه فستان جريجت مقلم اسود وابيض ومشسوره شعرها ومكياج خفيف
طالعه تخبل
بدت امي تسوالف ويه ابوها وامها حتى تنطي مجال يشوفها زين
واشوفلك خالي فتح عيونا عليه وهي تباوع من جوه ليجوه
بقينا اكثر من نص ساعه وهو هم حجه عن نفسه شويه
بعدين اني اشرتله هاااا
هو اشرلي اوكي
دزيتله رساله عجبتك
عماد...اي عجبتني حلوه
سما..حضر ٢٥ على اتفاقنا
عماد...ومرض من نطلع انطيج
سما...اذا ماتنطيني افضحك شفت شلون كصتي خير عليك
عماد...اصبري شويه خل اباوع زين
سما...راح احجي وياها واضحكها بلكت تزود الفلوس شويه
وفعلا قربت عليها وكمت اسولف واضحك وياها
طلعنا منهم واحنا محددين موعد المهر وخالي طلع والضحكه شاكه وجها شك
وماعفته اله اخذت ال٢٥ من عندا
حددنا يوم المهر وشتريت فستان اسود وفضي ورحت للصالون وياهم وخالي دفعلي فلوس الصالون
جمانه السعيدي
هسه راح اوصف نفسي الكم
كل الي يشوفني يكول تشبهين ايناس طالب بس اني رشيقه
يعني مو مليانه مثلها وشعري اسود يخبل
كملنا مكياج وشعرا ورحنا البيت العروسه اجا ابوها واخذنا البيتهم اني والعروس وامها
لكيناهم محضرين الكوشه والدجي يشتغل وكمنا نركص اني وخواتي وبنات خوالي طبعا ازغار مو بعمرنا
جان اشوف وحده اكلتني اكل بعيونها وحده متوسطه بلعمر
بس تباوع عليه
وبعدين راحت كعدت يم ماما وكامت تحجي وياها
طبعا اني ما اهتميت لان صدك فرحانه ومااخذتني الاجواء الحلوه وكاعده اركص
كملت الحفله وخالي عماد ما احجيلكم لزك لزكه للعروس
وكلساع يكول مو مرتي انطونيها اخذها وياي
واحنا بس نضحك
سما...قربت على خالو فضحتنا اصبر هي اللك وين تروح
رجعنا للبيت وخالي بقه يم عروسته
بدل ماتدور وتبحث علي الروايات خليها علي تليفونك وحمل تطبيقنا
