رواية الشيهانة والعاصوف الفصل التاسغ 9 بقلم ياسمين
ايامكم سعيدة يارب وكل عام وانتم بالف الف خير وان شاء الله يارب اشوفكم حجاج عد جبل عرفة راضين مرضيين عند الله بالنسبة للبارت كلش اعتذر عالتاخير ايام مفترجة الطاعة وحوسة بيت هذا الي كدرت اكتبه تعويضي الكم بعد العيد ان شاء الله ببارت كافي ووافي يروي فضولكم بمشيئة الله وتعرفوني من اوعد انفذ اكرر اعتذاري منكم 🧡
لاتنسوني بتصويت من اناملكم وتعليق عالفقرات
#ملاحظة_مهمة لاحداث الي تقروها كل موضوع اطرحه وتشوفوه ممل هو حدث مهم يربط الاحداث بالمستقبل يعني طولوا بالكم علية شوية لاتقرون بين سطر وسطر حبايبي جايتكم احداث نار ترة
لسان حال كيناز يگول :
عيش ولاتـــــــــــــــضل
تمشي ورة جروحــــــك
واذا موجوع دبرـــــ،ـها !
ترة شما سولفت ع بيـك
تبقى التوجعك روحـــك
بيوم العرس حاولت وية نفسي مااطلع من الغرفة
ماحبيت نفسي بنص ناس مااعرفها وكل الي تدخل من كرايبهم تبقى صافنة علينا وتسال منين انتم ومن تعرف بسالفتنا اسمعهن ترس اذني يكولن
يااا همة ذولة دخيل الحجي حاتم ويصير الهمز واللمز من جوة لجوة
دور احنا ماشاء الله بنات عمتي كميلة اربعة واحنا تلاثة وخطارهم رغم وسع البيت وضخامته بس انملى ملي اول مرة بحياتي اشوف هيج عرس ضخم
بوقتها عرفت من زيوني ذابحين عجول للمناسبة واجاني يسولفلي بيده وحلگه وملامحه كلهن من كد مامتعجب اول مرة يشوف العجل بعينه
بعدها ماكدرت اسيطر عليه يريد يطلع يمهم واني اخاف عليه ليتعور تالي شلون اخاف رحنا بوحدة نجي باثنين
قنعته ورشيته بفلوس واكل ماكو قافل يريد يلعب برة لو يفحط من البجي والنسوان من تشوفه تبقى تانبني ليش حابسته وخليه يطلع ومن هالحجي البارد واني روحي نار من القلق
اضطريت اطلعه بيد الولد تقي خلف الله على غنوة البنية حبابة كالتله انتبهله واخذه يگود بيه وكعده كدام عيني واني ورة باب المطبخ عيني منه تراقبه
المطبخ صار يروش ببناتنا ونسوان كبار مشيلة تلاثة اجن يشتغلن وية عمة كميلة يساعدنها ومبينات هاي مو اول مرة يجن ويخدمن لان لاحظتهن يندلن مكان الغراض ويعرفن كرايب بيت الحجي كلهم وحتى سلمن عليهن
بيومها العروس اخذوها للصالون سبحان الله رغم سمارها شوية بس تنطي لملامح غنى بالنعومة نزلت وية امها واختها وراحت لغير بيت تنزف مناك
ومن شافنها كرايبهم مدمعة وسالنها ليش باجية تعذرت امهن والحجية ام شهم لان راح تفارك اهلها وابوها متعلقة بيهم، بيهن صدكن وبيهن صارن يواسنها والظاهر اجتها حجة من السما صارت دموعها تنزل عشرة عشرة تالي عاطن بيها كاللها
_ مايصلح تبجين تفاولين على اهلج ورجلج واستغفري ربج مو اول البنات انتي تفاركين اهلج وان شاء الله همة مو بعاد عنكم شمرة عصا وتلوحيهم
سكتت مغصوبة يقنعن بيها امها واختها من طلعن منا اجن نسوان بيهن تلاثة لو اربعة وحدة منهن ماشاء الله كلش حلوة وصلهن حارث لباب المطبخ عبرهن الزلم والهوسة وصاح لغنى ووالدته بصوت عالي اجن يركضن
استقبلن النسوان بوس واحضان والبنية الصغيرة وياهن حتى الي بوستني ضليت مفهية اكلتني بالسلام اكل
من دخلن اني واكفة بصف الباب لازمة حراسة لزيوني لمحته اشر لغنى كاللها
_ مااوصيج بعد على حمامة اخيج ديري بالج عليها
وضحك
هزت راسها تعضله شفتها وهو رجع يم الزلم
لحظات ورجع اشتغل الديجي باغاني ساجدة عبيد
البنية الحلوة طلعت من الغرفة الكدامي لابسة فستان طويل بناتي ومستور وشالها على شعرها شامرته شمر مبين شعرها طويل نازل لخصرها ماشاء الله ابتسمت الي وعبرت وية غنى لمجلس النسوان
بقيت اباوع لزيوني شفته اجاني يركض وتعثر بالكاع حسيت كلبي وكع فتحت الباب ناوية اطلعله شفت رجال ركض شاله يقنع بيه ماقنع مفرفح
كتله من بعيد
_ عمو نزله خليه يجي يمي
نزله وعينه ما نزلت مني اكلني اكل انحرجت منه متجاهلته بگلبي الگبر لهيج زلم ماتستحي اليكول ماشايف نسوان
فتحت ايدي لزيوني رجليه متعورات يبجي اجاني شلته ودخلت ناوية اغسله رجليه بالحمام واني اعبر لمحت بنص مجلس النسوان
جوانا ونورس ونهى يركصن بالنص كالبات المجلس ملهى على اغنية ساجدة.... اتصنمت مصدومة ذني شيسون عزة بعيني..... عزة بعيني
دور كلمن لافة وصلة بخصرها وتهز
وكفت منزلة زيوني من ايدي مفهية هاي من يمته تعرف تركص اشوو ماادري بيها
سون حركات بديهن يتمايلن وشعرهن يفرن بيه فر فتحت عيني بوسعها على حركاتهن
هاي صدك يحجن !!!
اباوع النسوان مثلي مصدومات على ركصهن الكارثة لسة ماشفت ببناتهن وحدة ركصت غير النسوان الكبار ويدبجن دبج
البنية غنى طول الفترة المتواجدة بيها اشوفها بس تصفك وتضحك مبينة ماتعرف وبنات عمتها رازقية عرفتني عليهن سبعة ماشاء الله اكبرهن بكد جيهان واصغرهن عمرها 10 سنين
وكلهن فقيرات لسان وخدومات ماشفت عليهن شي
اباوع لنهى ونورس ذبن لحم خو نهى كعدت بالكاع وركصت ماعرف شلون تهز خلت النسوان تتخبل عليها
لزمني زيوني انتبهله واشيله شلته واني مسطورة بيهن اليكول عرس اخوهن وذبن لحم شكد مايستحن وقليلات ذوق
تركتهن ودخلت للحمام الوضع ماعجبني ابد وبس احصل فرصة اروح لبابا يشوفلنا حل عالسىريع اختي راح تضيع من وراهن
غسلتله عالسريع وطلعت اوصيه
_ بعد لاتطلع زيوني حتى لتتعور
_ ايي شيليني
_ميخالف اشيلج بس لتطلع شلعت كلبي
رجعت للمجلس لكيت النسوان يتوسلن الهن يكملن ركص ويهوسن وياهن عالواهس هزيت ايدي طالعة روحي شغلة واجتهن بلاش شكد طايحات حظ لعد
اشرت لجوانا جم مرة حتى تشوفني ما انتبهت حسيت روحي بودي الزمها اكطعها تكطع شعرفت من العالم وهزت خصرها... لو احنا بيا حال وهية تتصرف
احس النسوان نفسهن اليصفكن الها نقدنها على تصرفها كلبي اشتعل نار كلما اشوفها مامهتمة وتركص تضحك
من شفت روحي ماتحمل بعد طلعت من المجلس كله
وصعدت لفوك شاردة بروحي وزيوني من الدنيا
باخر درجة شفت غنى والبنية وياها كاعدات يسولفن استحيت ودخلت بهدومي من الحرج شيكولن هسة علية وشسوي اني الثولة صاعدة لفوك
ردت انزل ماخلني صاحلي يتوسلن ماانزل كلتهن ابرر موقفي
_ اسفة والله صعدت اكعد هنا شاردة من الهوسة والهي زيوني شلع كلبي يريد يطلع
البنية ابتسمت باريحية وحجت
_ عادي عمري حتى احنا شردنا من الهوسة هههه تعاي اكعدي يمنا وصاحت لزين بيدها تناغيله..
اشوو هذا راحلها ركض وكعد بحضنها كامت تبوسه من خدوده وتكله
_ صدقة لله حبيبي شنوو هذا الجمال منين ماخذة انته من ماما لو بابا
ابتسمت وغنى كلتلها منحرجة مني
_ والدتهم متوفية الله يرحمها مالحك عليها خطية
باوعتلي وحجت
_ اسفة يروحي الله يرحمها برحمته الواسعة... لعد اكيد طالع حلو على بابا موو صحيح،
اشرلها بيده علية كاللها يرتل بلسانه
_ لااا كنوو حلوة
بوسته من خدوده تضحك
_ يمة فدوة للطالع على اخته حلوين
كالتلها غنى مبتسمة
_ اكيد حلوة كنوو غير 24 ساعة مخليته على كلبها
ماينزل من حضنها ابد
باوعلي يبتسمن استحيت منهن كالتلها البنية مغيرة الموضوع مستغربة
_ اكلج صدك شجاها رؤى شافتنا واحنا نازلين من السيارة ماسلمت علينا تالي امها استحت وردت السلام بدلها
كامت لثلاجة موجودة بالصالة طلعت عصاير وكيك خلتهن كدامنا وماعون كدام زيوني تلعب بشعره وحجت
_ تفضلن عيوني لاتستحن هههه هاي من ضيافة العروس
ترددت اكوم واتركهن يسولفن بينهن ماحبيت اسمع لخصوصياتهم بس حسيت من نظراتهن وجودي عادي بينهن سكتت
_ ولج خيتوو ماعرف شبيها تخبلت علينا من جنا بعجمان بس تبجي وامها تكرص بيها من جوة لجوة
وصلنا لهنا لو ماتت تفرفح امي سالتها جم مرة شبيج ماتحجي يابة تشتكين من شي هم متحجي دور سكنت الغرفة ماتقبل تطلع وعماتي منو التجي بيهن يسالن عليها وينها ساعة امها تعتذر نايمة وساعة راسها يوجعها لثاني يوم هنة يلزكن بالاعذار وهية قافلة ما تطلع
كالتلها البنية
_ وماعرفتوا شبيها..؟!! شجاريلها وهيج منعزلة
_ ماحبيت اسال والوضع مكركب مبين مايردن واحد يعرف لان ماجان قفلن الغرفة كلما يدخلن ويطلعن عليها خو اختها سكنت يمها تاخذ الاكل والشرب يمها عالساكت حتى الوضع ينرفز صار
من اجن عماتي كلهن صار الوضع مايستحمل بعد صاحن لامي فاطمة تتصرف وعينج ماتشوف غير النور دخلت يمها غسلت شراعها غسل بس خطية صوت بجيها يفطر الگلب اسمعه
_ عززة......... ليش هيج شصار غير نفتهم
باوعتلي وحجت مبتسمة تبررلي
_ لاتنصدمين من سوالفنا كنوو ولتاخذين علينا غير نظرة بس تدرين بالفضول وفصوله مانكدر كلما نتجمع اني ودرة هاي سوالفنا
ابتسمت منحرجة منهن وبداخلي كلت
_ شوف الذوق والادب فوكاها تبررلي واني كاعدة بنصهن شمعة فگر....... كتلها مستحية
_ لا والله عادي اصلا اني مستحية كاعدة وياجن اخذن راحتجن اني راح انزل
ماخلني اكمل وحجن اثنينهن فرد صوت
_ والله ما تكومين.... واصلا وينها سوالفنا حتى تكومين اكعدي عليج الله... وكملت تحجيلها
_ مو كتلج درة محد بيهن تقبل تحجي وامي جانت تسال شكو وليش وبعدين فجاة سكتت وكامت بس تبجي سكتة حتى سمعتها تكل لامي فاطمة
"الحجي ورط ولدنا وراح تجينا ايام سود من وراه"
_ صخام وعزة اسود بيش مفاولات الولد بهالفال الاگشر
هزت جتفها ببرود وكلتلها
_ لو شايفتها لرؤى جان كلتي اكو مصيبة من صدك
بواجيها مال عزة بدون ميت بس بعدين سكتت وعبرنها على عماتي مريضة ومالها خلك محد شكت
لان شافنها صدك مالها خلك
٠
٠
خلصن سوالف وسحبني وياهن عالواهس دخلنا لغرفة العريس ماشاء الله كلش حلوة وواسعة اكتفيت اوكف بالباب لازمة زيوني بيدي لايكسر غرض بيها
وهنة افترن عليها شافن التجهيزات وراها نزلنا قبل ليصعدون يزفوه
قبل لندخل المطبخ سمعنا شي تكسر وصوت واحد صاح
_ كتلجن لتفتحن الباب وتوصلن لهنا اكووو زلم حيوانات انتن لو بشر ماتفتهمتن
درة باوعت لغنى وكلتلها مستغربة
_ هذا مو صوت الحارث !!! ويامن يحجي هيج
تمشينا بسرعة نشوف شكو شفناه طبك الباب بقوة رج الباب رج ونهى مسافة عنه مختضة اكو تحفية بزاوية المطبخ متكسرة شفنا النسوان كاعدات يلمن بيه ونورس وجوانا يكنسن بمكناسة الناعم
گلبي نغزني ليكون مسويات مصيبة سالتهن غنى شصاير وليش الحارث منفعل ويصيح كالتلها وحدة من الحجيات
_ ماكو شي خالة عدت.. هاي البنات جانن يساعدني
مايدرن بالزلم برة وثار عليهن حارث لان مايقبل احد يطلع
باوعت لنهى شفتها تنظف بالحوض مامهتمة بس المرية من كامت جانت تستغفر بصوت ناصي
غنى ودرة طلعن من المطبخ للمجلس سمعن صوت الهلاهل والدبج علساس العريس صعد يبدل ملابسه وياه ربعه كلهم
واني بقيت بالمطبخ اباوع عليهن وضعهن مو راحة علما كملن شغلهن طلعن للمجلس وتصرفن طبيعي كأن شي لم يكن ردت اطلع وياهن لمحت المرية سحبت عمة كميلة للمنور من ايدها كالتلها بصوت ناصي
_ لمي بناتج كميلة قبل لايسون مصيبة ماتكدرين تلميها بعدين .. وترة بتج الصغيرة خفيفة وحذرتها لاتطلع برة مايقبلون واصرت تشيل باقي الضيافة تطلعه للحجي ابراهيم بنفسها وصوت الضحك والشقى وية الرجال وصل لسابع جار...... ومن سالتها تكلي شكو بيها بگد ابويه واشاقيت وياه
كتمت صوتي مصدومة هاي شنو الكوارث الاسمعها
باذني فوكاها عمتي كميلة تناقشها بگواة عين تكلها
_ معليج بيهن ام عادل والي تشوفيه بعينج سوي نفسج متعرفيه وترة بناتي مايسون المصايب ويعرفن يتصرفن لو انتي عندج غاية تردين تشوفين نسوان الحجي بس انتي تخدمين وتشتغلين صح واحنا كخة......... لاحبيبة نجوم السما اقربلج ترة وهالمرة حجيتي هالحجي على بناتي مرة الثانية ااندمج والله
تركتها وطلعت تدردم عليها والمرية ام عادل طلعت تهز براسها وتستغفر تدعي بالستر لبناتها
ردت اطلع من المكان كله اختنكت ردت بس الزم جوانا احذرها منهن تبتعد عنهن ماحصلتها دورتها حتى بالغرفة ماهية كلهن اختفن مدري وين راحن
راسي افتر وزيوني دوخني يلح يريد يطلع برة ضاج اخذته اقنعه الهيه صار يبجي مايريد
صدفة شفتها لجوانا جاية تنزع بجبتها وشالها ونهى ونورس وياها يضحكن ويسولفن صفنت وين جانن ذني لحكتهن بنص الهوسة حصلتهن دخلن للغرفة يضحكن ونهى تكلها
_ شفتيه للمحروس شلون ضاج يمة گلبي ماي بارد واتسرسح لان استفزيته
من شافني صافنة عليهن انصدمن ماعبالهن اني وراهن كتلهن
_ والله ماخذات راحتجن عالاخير هنااا.... وين جنتن بلة هواانم
جاوبتني اختي بدل عنهن
_ مالج دخل ومن تحجين وياي تحجين باحترام خاف ناسية نفسج اذكرج ترة اني اختج الجبيرة مو انتي
_ لا والله اني ماناسية احتمال انتي نسيتي نفسج واجيت اذكرج..... شايفة روحج انتي لو لا ركص وهز وعربدة محسستني ماعلى كلبج هم واحنا واكعين بمصيبة بس رب العالمين يطلعنا منها
غمتني نورس وراحت كعدت عالفراش بيدها عنگود عنب تاكل منه وحجت
_ شكد شايفة غثة بحياتي بس مثلج ماشفت يعني اذا انتم بمصيبة قابل تموت روحها وراكم لو مثلا شتسوي يعني
بعدين احنا شسوينا كلها جم هزة خصر وفرة شعر هههههههه مو بلة بنات.......كالتلها جوانا تضحك
_ اي والله لاعاب حلكج خليها هاي جنها بومة تركض ورة الهم ركض اليشوفها على حالتها هاي يكول شايلة عمر اكبر من عمرها..... يمعودة انسيييي هو منو مات واخذها وياه........ وكعدت وياها ياكلن عنب ويسولفن عالشباب الحاضرة العرس
هاي تكلها شفتي كرم واسر عمي ياخذون شبه من قيصر ابن عمهم طبق الاصل منه وجوانا تكللهن بحماس ذكرني بيهم منو بيهم كرم واسر ترة بس قيصر شفته والحارث واكثم اعرفهم
صفنت عليهن مصدومة معقولة اني صدك غثة لو هنة وضعهن مو طبيعي تركتهن وطلعت مامحصلة منهن لا حق ولاباطل
بنص صفنتي تذكرت زيوني ماهوة ركضت للمطبخ لكيته طالع والمصيبة مكابل صواني المفطح وكاعد
عزززة بعيني انفضحنا ااشرله بيدي يسويلي مااجي جوعان كمت الطم سكتة شلون الزمه
تالي شفت العريس اكثم اجه شاله بوسه وياشرون عليه حسيت روحي صخنت من القهر
وكملت من وصله يمي كالي عشيه ترة جوعان اخذته والفشلة تقرة الف
كدامه شيكول هسة علينا.......... ماشايفين اكيد
خلص العرس وزفوا العرسان صاحلنا بابا نروح نشوفه مشتاقلنا رحنا لبيت عمي لكيناه منتظرنا برة خطية هو وعمي جواد حضنته اني وزيوني بوسناه وبقينا كاعدين يمه سوالف ونقاشات
وهالمرة بسام جان كاعد ويانا يسمع عالساكت
ماتاخرنا هواي ورجعنا ماقبل نبات يمهم خاف علينا ورجع وصاني على زيوني انتبهله وهالمرة ضاف جوانا عالوصية كانما عايزة قلق وهم حتى تصعب علية الامانة اكثر
بصباحية العرس كعدنا جانت الاجواء طبيعية واستمرت للعصر انصدمنا بالكل يرجعون لبيوتهم
ومرة الحجي الثانية اسمها ام شهم كالت لام اكثم
_لازم هسة نرجع لعجمان عدهم مشكلة تريد حل ومايردون هوسة النسوان تضل، والديجي مايقبل الحجي يشتغل ويكول العرس فض بخير لازم نرد لبيوتنا وهناك اليريد يكمل خلي يكمل
كالتلها الحجية زهرة وحدة من اخوات الحجي
_ يااا جاا عليمن نكملها وهمة خصموها دخيل بختهم
كالتلهن حجية ام ظاهر
_ عرس وفض والعريس وانزف بعد شوراجن انتن والزلم هناا تدرن بيهم مايرضون بالصوت العالي
يلة كلمن تلف عباتها وتروح ... كالتلها حجية رزاقية يصيحولها ام صابرين ماعجبها الحجي مبين
_ هذا الحجي مايعجب جاا غير عرس وليدنا واول فتشت العين هيج لملموه بسرعة بسرعة جااا مااجلوها لبعدين لمن تفض طلابتهم
واني عود حالفة اركص بعرسه شهر زمان
ردت عليها ام ظاهر ببرود
_ لاحكة ان شاء الله وراج اعراس بگد شليف الصوف
وافرحي بيهم بس هسة فضنها وروحن الوادم بليل تجي
غطت وجهها بشيلتها وبجت ماراضية بكلامها ساعة تنعى مواويل وساعة تعتب عليهم.....؟!!
ضليت مفهية عليهن معقولة هية هيج دراما لو اني خبلة مستغربة تصرفات الكل
وفعلا لحد المغرب قبل الصلاة البيت فض من الناس والبنية درة وامهاتها هم راحن والحلو بالموضوع
هية وغنى قبل ليروحن سلمن علية وودعني،
شكد حبيت اخلاقهن متواضعات لابعد درجة
بقت بالبيت ويانا الحجية ام ظاهر بداخلي جنت معجبة بشكلها كلش جانت داكة الحاجب وهمزات بالحنج وخدودها هم داكتهن شكل وردة صغيرة وهية ماشاء الله بيضة اكثر من اخواتها كلهن سمر الا هية سبحان الله حنطية
طالعة حجية تنكرط صار عندي فضول عن شكلها بشبابها
المهم استلمت مهمة طلباتها بالصدفة صاحت لوحدة من البنات يجيبلها مي وتاخرن عليها مريت من يمها امشط لزيوني وكالتلي حجاية ضحكت عليها
_ حبوبة جيبيلي وياج مي ذني البرابيگ حايرات
بالسوالف والهرجة
رحت اجيبلها الماي وركضت جبتلها طشت صغير تتوضى بيه وجبتلها سجادتها امدها الها
وزيوني صار يركض مثلي لطلباتها
بقينا تلث ايام احنا وياها واني بديهي قمت بخدمتها جانت اوقات تشتهي گهوة جايبتها وياها بـ صرة
"جيس صغير" تكول اذا وجعني راسي مايهدئ غير عليها تسويها الها عمة كميلة مضبوطة
ومرات تطلع يم الزلم بعوجيتها يفترون بالحوش لو قريب المضيف وتاخذ زيوني وياها يلزم ايدها لاتوكع
تاخذ الدرب تسمع لسوالفه هية تكلي "يرطن" تكعد يمهم سوالف وضحك كلساع صوتهم يعلى وينصى ماعرف شتحجي وياهم بس مرات الاحظ الاكثم يضحك وياها ويسد اذان زيوني ليسمع
اشوفهم من جام المجلس مسلط عالحوش زيوني مايروح غير للاكثم يشيله ويبقون يسولفون وباقي الشباب يلاشوه بسوالفهم بس هو بايع عليهم ثگل
ومن يصيحوله مايروحلهم يبقى كاعد بحضنه يلعب بسبحته بس مايخليه يبقى هواي مثل قبل بسرعة يدخله لجوة استلمه حتى لو بجى يگلي ممنوع يطلع
الظاهر للاحتراز لان كلهم مسلحين وناس داخلة عليهم وناس طالعة
بيومها وية صلاة المغرب صار ضرب نار تكسرت بيها جام الطابق الثاني ورشگ عالي طرش مسامعنا من الخوف كمنا نصارخ ندور ختلة نضم نفسنا بيها ماكو هرجنا الدنيا هرج وبس احنا النسوان داخل البيت والزلم كلها برة متحزمة
الحجية ام ظاهر دفعتنا دفع جوة الدرج حصرتنا وصاحت بعمة كميلة كالتلها بتحذير،
_ الزمي البنات وامنعيهن يا ويلج اذا طلعت بيهن وحدة برة
حضنت زيوني لصدري ونور وراي خاتلة هية ورقية وباقي بناتنا وعمتي تصيح
ياا علي يا ابو الشدات احضرنا وتردد بيها تشد بربطتها
غمضت عيني اسمع رشگ الطلق مستمر وزيوني يبجي ضام وجهه بصدري مغطية اذانه من الخوف
دقايق صارن دهر علينا صار تكسير الجام حتى جوة
وراها سمعنا صوت الاكثم صاح
_ عمة لحد تطلع بيكم ماكو شي عدت
اسمعها تحجي وياه وتساله برزانة كانما متعودة على هذا الوضع كاللها يطمنها
_ ماكو شي والله بس الحارث تصوب واخذوه الولد للمستشفى لاتخافين وطمني البنات ماكو شي راحوا
وفضت
رجعت علينا صاحت بينا نبطل بجي وصاحت بعمة كميلة تجيبلها "طاسة الخضة" راحت واجت بيدها طاسة نحاس منقوش بيها اية الكرسي وايات ثانية وكلتلها جيبي قارورة مي زمزم موجودة بالمخزن جابتها الها صبت بيها وشربت زيوني اول واحد
وراها انطتنا منها شوية شوية
خنسنا وبطلنا بجي بس بقى بالي يم بابا وبسام خاف تاذوا شاورت جوانا كلتلي روحها طالعة
_ شمدريني شصار عليهم ادعي ربج مايرجعون علينا لمن يصفونا عالاخير
حجايتها رعبتني كلش كمت للمطبخ ابجي وعيوني تحوم عالبرة منو يطمني على بابا هسة
بالصدفة شفت الاستاد اكثم اجه من بعيد لجهة تجمعهم بيده موبايل يحجي بصوت عالي فتحت الباب شوية متاملة يلمحني استحيت ااشرله بيدي
واعرفهم متشددين مايقبلون وحدة تطلع برة
وهو يحجي لاحظني واكفة سديت الباب وبقيت واكفة وراه منتظرته يجي خلص اتصاله واجه جانت بيده جكارة شمرها وتقرب من الباب منطيني ظهره حجى
_ خيرج ابوية محتاجة شي
_ استاد الله يخليك بابا وينه وبسام همين شصار عليهم
_ ماعليهم شي كاعدين بالمضيف وية الوالد وعمامي
مسحت دموعي وكتله
_ زين صيحلي لبابا احاجيه حتى گلبي يطمن
ابتسم وحجى
_ يعني مامصدگة بيه قصدج !!
_ لا موهذا قصدي العفو منك بس اريد اشوف بابا عندي حجاية وياه
_ ماترهم اصيحله هسة اكو ناس راح تجي تحجي وياه واخذيها مني حجاية بس يفضى احاجيه عليج بعد شتردين
_ تمام...... بس لاتنساني لان مراح انام والله
_ صار وتدللين ..... ردت اروح تحمحم وحجى
_زيوني وينه خو ماانفجع من الرشگ
_ لاا غطيت اذانه زين بس هو خاف من صياحنا العالي بجى شوية وسكت
هز راسه وحجى
_ سباعية والله...... الله يستر عليج اخذي راحتج بوية عطلتج
ردت ادخل لجوة شفت جوانا واكفة بطرف زاوية من المطبخ منتظرتني ورافعة حاجبها تستهزي كالت
_ لاا وفوكاها تسولفين وياه وماخذة راحتج واني مسوية علية حصار حتى بالضحكة......
مسحت دموعي مستغربة لهجتها وكتلها
_ هاي شبيج جوان؟؟ وشنوو قصدج بهذا الكلام؟!!
_ ماقصدي شي عيوني بس مرة ثانية لاتبيعين مثاليات علية... وزيوني خوش درب باقية تتخشخشين بيه منا وهيج مالج دخل بيه اني اراعيه وممنوع بعد تحجين وية اكثم وغيره افتهمتي لولا
عافتني ودخلت يم البنات خلتني صافنة عليها.. احسها متغيرة كلش.. بعدين شنو قصدها اتخشخش بزيوني مافهمت معناها لهاي الكلمة
تجاهلت اسلوبها المستفز ماعقبت وراها.... متعودة عليها كلساع بحال ومود وحكم عمري وزاويتي الضيكة بهيج امور ماخلاني افهم معنى نظراتها شنوو او حتى تبسمر كلامها.... كل بالي جان مشغول بوقتها ببابا وبسام وبينا كلنا خايفة عليه ليصعد ضغطه ويموت تالي منو النا
هذا الهاجس الوحيد الي جان ياكل ويشرب وياي واحنا ماعدنا غيره عامود نستند عليه
بوقتها الحجية ام ظاهر حرجت على عمة تصب العشى والبنات كامن وياها يساعدنها كالتلها
_ الزلم كطعها الجوع واحنا مثلهم لو تردين نصوم حبيبة وانتي كاعدة رجل على رجل
كامت عمتي بسرعة تتعذر وراحت للمطبخ تجهز العشى صاحتلي نهى اجي وياهن اساعد كالتلهن الحجية
_ مالجن شغل بيها اريدها تساعدني للصلاة لو بيجن خير جان خدمتني مثلها
ابتسمت شلون استلمتهن اكس مربع كمت جبتلها الطشت اخذه مني زيوني شاله عني واني اخذت الها الماي اول ماتغسل رجليها وتنشفها الا تتوضى عادة عدها كلما تتوضى هيح تسوي بعدني اصب الها وهو يسولف وياها وتجاوبه تماشي عقله
سمعنا صوت يا الله عرفته استاد اكثم يريد يدخل عدلت شالي وكعدت مكرفصة اصبلها دخل سلم عليها
ماباوعت لجهته وزيوني ركض اله لمحته شاله انطاه سبحته وجوانا ركضت قدمتله ماي... تشكر منها بدون ميخلي عينه بعينها وكال للحجية يطمنها
_ عمة ردت اطمنج على حارث ترة بخير والرصاصة طلعوها
سبقتها جوانا بالكلام
_ الحمدلله على سلامته يارب.... والله خفنا موت من الصوت لو شايفنا متنا بدمنا
مارد عليها كالتله الحجية وهية تغسل وجهها
_ خو مامغزرة بيه الطلقة يبعد عمتك وين محط صوابها صار
_ بين صدره وجتفه بس من حرارتها طالعة من ظهره الحمدلله مامتاثرة فقراته وهسة حجى وياي وتطمنت عليه
_ الحمد لله والشكر وليدي لعد ابوك وعمامك وينهم
تبعوه لو بالمضيف متحرزين
شلت الطشت والمي لمحته يبوس بزيوني ونزله سوالي طريق اعبر وخليت جوانا مفهية عليه لو بيدي اكرصها توعى لنفسها فضحتنا مدري شبيها متخبلة
علما رحت ورجعت لكيت الحجية تصلي يمها زيوني يلعب بالسبحة ردت انهره ليش اخذها
لمحت جوانا واكفة وياه بالمطبخ تحجي وهو منطيها ظهره وكفت بالممر اشوفها شعدها وياه سمعتها تگله
_ اييي والله طمنا وياك عليه ادري ضايقناكم بس شنسوي مابيدنا شي نسويه...... كاللها وايده عالباب يريد يطلع
_ ان شاء الله بس تفض العالم انطيه خبر
تركها وطلع شكله مستعجل
خليت ورجعت يم الحجية توضيت وصليت بصفها دعيت بذيج الليلة تفض على خير وترجيت رب العالمين يحلها بخير شرط مايموت واحد من بيت الحجي ونسببلهم اذية وترجع حياتنا تستقر ونرتاح بعيد عن عد بيت عمي المهم يصير عدنا بيت وسگف يجمعنا من جديد
٠
٠
شهم
كاعد ادخن والنفاضة يمي اهز برجلي منفعل اشوفها تتصل ومتجاهلها، عقلها المتحجر ماجاي يفهم هية حرمت علية اكثر من قبل وورقتها احتركت بالنسبة الي بس مجاي تفهم مجاي تستوعب الوضع الصرنا بيه
ما تحملت تركت الموبايل يرن وكمت للحمام خايف انجرف واجاوبها مثل كل مرة تحاول تتصل بيه وتحجي وياي فتحت الدوش ماي بارد وكعدت جواه خليته يصب على راسي نزلت دموعي ضايعة وية مجرى المي
جانت اكو نار بگلبي مشتعلة هايجة جواي مثل بركان نار شكد حاولت اقنع نفسي هية مو نصيبي بس گلبي رافض يستوعب رافض لدرجة اتمنى اقلعه من مكانه واشمره اخلص منه.
بقيت جوة الدوش ماعرف شكد مر بيه الوقت لحد ماحسيت روحي خوت كمت طالع بملابسي للغرفة بدلت وشمرت روحي عالجرباية اتوسل النوم
اريد اريح عقلي من التفكير.... تعبت وانهد حيلي
صحيت ثاني يوم متكسر وحرارة بجسمي احس ع
