رواية مأوي الزهور الفصل التاسع 9 بقلم ياسه

رواية مأوي الزهور الفصل التاسع 9 بقلم ياسه

بــ فنجــانـي تقرأ و قرأت 

ضـيـم و مـأسـي وتـعـب 

گـلـت الـهـا هـذا الـمضـى 

گـالـت الـي هـذا الـجـاي 

مرغمون على العيش بــ واقع

 لا يتناسب مع مشاعرنا

لأن هذه الأيام تتطلب الكثير من الصبر 

................................ 

 إمتنان :- البيت يبعد عن بيت أهله شارعين تقريباً 

ويصير ركن طبك السيارة بـالباب وطلب من عندي انزل فتح الباب الي دخلت للطرمة ومن بعدها باب ثاني يربط كُل البيت ... 

دخلت بداخل البيت واني متفاجأة من كبره واثاثـة اللي اشبه بأثاث الملوك دخلت بخطوات بطيئة واني اردد بداخل نفسي واگــول 

-- هنا راح اعيش واكمل باقي حياتي من هاي اللحظة لازم انسى كُل اللي عشته يا ترى شنو راح اشوف هنا معقولة راح اشوف مثل الشفته بهذاك المكان لو راح اشوف الاسوء ؟ 

زين راح اعيش مثل الدلال اللي عشته بـبيت أهلي مثل دلال أمي وأبـوي لو لا ، يا ترى راح يوفي بـالوعود اللي جان يسردها الي لليل نهار لو كُل شيء راح يتبخر من بعد اللي سويته وياه معقولة راح اشوف وجهه الثاني اللي جان يهددني بيه من جنت اعترض على اوامره 

عيوني تروح وترجع على المكان وگلبي دگاته عبرت الالف من الخوف اللي مخوفني شلون راح يصير أسلوبة وياي شلون راح يكون معاملته الي من بعد ما انفرد بيه بمكان خالي من الناس يا ترى شلون اعيش وشلون اكمل وياه من بعد ما فضحته گدام الكُل وانجبر يعترف بيه شلون راح ينتقم مني وشلون ايام راح اعيش هنا راح ابقى اردد شلون وشلون وشلون الى ان احصل جواب على كُل مخاوفي 

حطيت ايدي على گلبي وغمضت عيوني قوي الرب يحميني ويخلصني من عنده بـ أقرب وقت مثل ما خلصني من هذاك المكان 

فزز صفنتي صوت الباب وهو ينقفل درت وجهي عليه جان يقفل بـالباب بحركة سريعة وهو يباوع لي بحقد تقدم على الشباك نزل الستارة ورجع تقدم عليـة وبدأ يهمس قريب من مسامعي 

-- اي عيني ست گلتِ لي ما عجبتج الغرفة الصغيرة و ما أحب ديكورها وتفاصيلها هاج باعي شلون جبتج بهذا القصر باعي بعيونج هاي الحلوة وشوفي المكان شگد كبير .. شفتِ مو اي اكيد شفتِ

--هسه سمعيني زين وأحفظي كلامي عدل وهذا وعد بكُل زاوية بهذا المكان راح اخليلج ذكرى وين ما تدورين وجهج راح تذكريني هنا و فوگ و على الدرج و بـالمطبخ و بـالحمام اذا ما ربيتج من جديد وعلمتج شلون توگفين بوجهي وتفضحيني

 ما اسمه قاسم بسيطة مو من عيوني

-- مو قصدي احجي شيء انتَ تعرفني كُلش زين مو قصدي افضح الموضوع لا تأذيني الرب يحميك

-- والرب اللي تحلفين بيه إذا ما طلعت حليب امج من خشمج وخليتج بكُل ثانيـة تصيحين التوبه وأستغفر الله والرب اللي تحلفين بيه اذا ما خليتج تشاهدين بكُل دقيقة هذا شاربي مو عليــة

نزلت راسي من عنده الخوف موتني مستحيل يتركني جنيت على نفسي ومن بعد اللي شفته اليوم والخبال اللي سواه بيت أهله تأكدت من عنده مجرم ما يرحم بحالي لو يشوفني أموت گدامه 

مشى خطوات بطيئة بتجاهي وكُل خطوة يخطيها احس روحي تطلع من عندي لحد ما وصل يمي 

دخل سحبني من شعري قوي من قوة السحبه رجع راسي بـ إيده ليوره 

قاسم :- ما عاجبتج غرفة الحارس مو 

إمتنان :- لا لا شوكت حچيت هيج اني 

-- توقعت ما حبيتيها لان صغيرة وتردين مكان واسع 

-- شعري حرام عليك دا تأذيني بشنو اذيتك اني

-- ابد ولا مسوية شيء كلج أخلاق 

-- فدوة راسي بس عوف شعري 

-- بس اريد افتهم من حچيتِ المهيب والحيان وفضحتيني گدام امي واخواتي وخبلتي مرتي عليه شــ حصلتِ شـ ستفاديتِ هااا 

-- بعد ما احچي شيء

-- ليش هو اكو شيء بعد حتى بعد ما تحچين 

حچى هيج ودفعني قوي رجعت على القنفه انضربت رجلي بيها احس روحي طلعت من عندي 

قاسم :- گدامي فوگ يلااا 

اخذني للطابق الثاني فتح وحدو من الغرف دخلني بيها وهنا بدأ اول انتقام صعب اشرح وصعب اذكر وصعب انسى اللي عشته بهاي الغرفة واللي شفته بهذا البيت باليوم هذا عشت اصعب أيام حياتي الحيوان صعب يعيش هيج اشياء مقززة ومقرف ومؤذيــة تعبـت وتقززت وانقرفت لدرجــة تقيأت بداخل الغرفـة و ما لحگت اطلع للحمام 

لحد لليل اني كُل شويـة اركض للحمام أتقيأ وهو ولا اهتم الوضعي ولا اهتزت الإنسانيـة والرحمـة بگلبة إنسان مجرد من الإنسانيـة والرحمـة من گد ما تقيأت أحس بلاعيمي گامت تجرحني ودايخـة عيونه ما اگدر افتحهم أخر شيء طلعت من الحمام وسندت راسي على باب الحمام وغمضت عيوني الدنيا تفتر بيه ومعدتي تأذيني واعصابي تلفانه سمعت صوت الجرس طلع هو على الصوت لگاني بهذا الوضع گال

قاسم :- گومي لبسي اجوا امي والولد 

-- بس ساعدني اوصل للغرفة ما اگدر 

-- گومي لج مصدكة روحج وعايشة اللحظة يلاا فضيها اللبسي وأنزلني بسرعة 

نزل يفتح الباب الاهله واني لزمت الحايط اسند نفسي بيه و اگوم لحد ما وصلت للغرفه سحبت ملابسي ولبستهم وتمددت على السرير ما باقي نفس بيه اسمع صوتهم جوى يحچون وياه واسمع امه تسأل عليه وهو يرد نايمة هسه اگعدها بقوا سـاعـة تقريباً وراها صعد 

قاسم :- اني مو گلت أنزلي 

ما رديت بس ساكته وعيوني معلگه بـالسگف تصب اجى گعد بصفي وسحبني من إيدي گعدني

قاسم :- أمي جوى جابت ملابسها واجت راح تبقى هنا گومي أنزلي تريدج واكيد ما اوصيح روحي واحچي اللي صار لها وخلِ المره تنحرف وهي بلا رجال 

باوعت له مشمئزه من عنده و رديت 

--شگد مقرف 

-- ما تنكسر عينج ولج 

-- الرب ياخذك 

-- وين ياخذني 

-- الجهنم 

-- تعرفون جهنم أنتوا 

-- نعرفها اكثر منك ونخاف من اللي خلقها اكثر منك 

-- دگومي أنزلي لا اشمرج منا گبل بحظنها 

-- ما اگدر انتَ شنو من بشر متحس مترحم لك ما اگدر اتحرك 

-- اشيلج على گلبي هذا الحنون وانزلج 

ما رديت عليه لميت شعري وسندت نفسي ونزلت لها لگيتها گاعدة بـالصاله بس شافتني هزت راسها ما قابله على أبنها 

ام مهيب :- طگج مو 

-- لا وياريت لو ضاربني ولا هذا القرف 

-- تعالي اسولف لج سالفه تعالي هنا يمي 

تقدمت گعدت يمها باوعت لي من فوك ليجوه ورجعت گالت 

-- الدنيا ما تهوى الفقير وتدوس عليه وتساوية وي الگاع اذا ما قوة عودج وگمتِ وگفتِ بوجهه الدنيا راح تضلين مدمغه بـ إيد قاسم طول عمرج شوفي

يا بيبي هو ابني وطالع من روحي واني عاجتنه وخابزته لان شافج فقيرة أستفحل عليج لا تضلين مدمغه بين إيديه يطگج طگي يغلط عليج أغلطي عليه يسبج سبيه ابني واعرفه اذا احد يسكت له ياكله 

أبتسمت مقهورة على نفسي هي ابتسمت ورجعت تگول صار شگد من ازوجج هذا الما يستحي

-- سنه ونص يمكن 

-- ما عرفتِ طبعه بهاي السنه ونص شـ يحب

 وشـ يكرها

-- لا ولا اريد اعرف اي شي عنه 

-- لا غلط لو انتِ مرة معدلة تعرفينه وتعرفين اطباعه حتى لو ما تردينه وما تحبينه وكل شيء بيه غلط بس بعد هاي قسمتج وهو مجلب بيج وما يهدج عاد كسبي الج وخلِ يحط لج بيت ويبني لج عائلة ويصيرون عندج جهال احسن ما تبقين بدار الايتام 

-- بيبي يا بيت يا عائله يا حب يا اطفال من كُل عقلج تردين تقنعيني بهذا الكلام واني الهاي اللحظة منظر وصال مدا يروح من بالي 

-- يا وصال 

بعدني ما راده واجاني صوته من فوگ وراها نزل من الدرج سريع گمت من مكاني واني اشوفه شلون نازل بعصبيه 

قاسم :- شـ جاي تخربطين هيييي 

ام مهيب :- شكو يا وصال شبيك نزلت تركض

قاسم :- ماكو شيء يمه هاي تعبانه وگامت تخربط بـالحچي وانتِ هيي امشي للمطبخ سوي لناا زقنبوت 

رحت للمطبخ وگفت بنص المطبخ واني اگول زقنبوت بگلبك وبگلب الخلفوك اللي ما ربوك يا كلب يا حقير دخل وراي رجعت ليوره خايفة من عنده 

قاسم :- إمتنان وروح أبوي و روح الميتين كلهم اللسانج اگصه اذا فتحتِ حلگج وحچيتِ كلمة وحدة على قندرة وصال گبال أمي 

غمضت عيوني واگول بگلبي محد غيرك قندرة

 يا قندرة تروح لها فدوة رجع گال 

-- سمعتِ مووو

-- سمعت 

-- يلاا سوي سمم 

-- ما اعرف 

-- ليش عيني هناك ما علومج تطبخين 

-- مع الاسف علموني بس على السوالف التعبانة والقذارة محد علمني اطبخ 

-- يلا انعم الله عليهم خوش تعلوم عاشت ايدهم

عفته ومشيت يم أمه لگيتها حاطه ايدها على خدها وصافنه اجيت گعدت يمها لا هي تحچي ولا اني احچي وهو صعد فوگ يخابر بـحيان اسمعه يگوله جيب زهور وتعال نص ساعة واندگ الباب راح فتحه ورجع وياه حيان و زهور  

حيان ما حط عينه بعيني وبس شافني گاعدة بـالصالة نزل الغراض من إيده واستأذن وراح

 و زهور نزعت عباتها ونقلت المسواك للمطبخ 

قاسم :- عيني مدام اذا متصير زحمة على حضرتج گومي ويا زهور حظري العشاء لان اختي مو خدامة عند الخلفوج 

إمتنان :- ولا اني خدامة عند الخلفوك 

گام من مكانه گمت اني ختلت وره امه 

قاسم :- بنت الكلب 

إمتنان :- محد غيرك ابن الكلب 

فتح عيونه مصدومة والمرة دارت عليه ضربتني بـالعكازة مالتها على راسي 

ام مهيب :- ولج شو ما تحترمين 

إمتنان :- مو انتِ گلتِ يغلط عليج أغلطي يطگج طگي 

ضحكت وغمتني وهو اجى جرني من وره امه وضغط على رگبتي قوي 

-- امك هي گالت لي والرب امك گالت اني معلية

-- اجيبج واجيب امي هسه للمطبخ يلااا 

رحت للمطبخ لگيت زهور واگفه ترتب المسواك بـالثلاجة اول ما دخلت يمها اسمعه يگول لامه 

-- شــ تعلمينها حجيه دخيل بختج صدگ چذب

-- يطبك مرض تستاهل 

-- يمه الرحمه الروح ابوج بعد لا تحچين وياها هيج اذا بقيتِ تحچين وياها هيج حچي أسبوع واحد تسممني واموت يمه ترى هاي وكحه لا عبالج فقيرة ترى لليل ونهار باقية تحفظ وتسجل والله العظيم اعرفها كلش زين عاجنها وخابزة لا تخاف ولا ترد واذا شافتج وياها تحطني وتكتلني حبابة لا توزين بيها ما عايزه ترى عوفيني اقمشر بيها منا لمن تصير ادميـة 

-- موتت اهلي الماتوا بـ ليلة سودة ولك يا نذل شمسوي بيها مو حرام عليك ما تخاف من ربك مو عندك بنية لا ربك يعابيك بيها بعدين هو هيج اللي يقشمر ثول الثولك كون إن شآء الله

-- مرتي يعني شمسوي قابل عيب لو حرام يمه لا تتدخلين مو اجيتِ هنا حتى تگعدين فوگ راسي عوفيني رحمة الروح ابوج  

-- ظل يا ناقص الشرف ظل اذا ما ربك عابك وخلاك ما تندل طريقك اني مو أمك الجابتك 

وتف على بطني الجابتك ورطت العالم بيك

ما سمعته رد عليها ولا سمعتها حچت شيء بعد باوعت الزهور اللي جانت تسمع بس ما مهتمه للموضوع اصلاً و سألتها 

إمتنان :- بيت منو هذا 

أزهار :- بيت مهيب 

-- لعد ليش گعدنا بيه إحنا

-- لان قاسم ما عنده بيت عايش ويانا ومرته اذا لزمتج تطلع حليب امج من خشمج جابوج هنا

-- لعد وين زوجة مهيب و وبنته 

-- مرته ميته صار خمس سنين ما ادري سته وفيروز بـــبيت جدها اهل امها ما تجينا غير زيارة بـالشهر مرة لان ابوها مسافر برى 

-- حقها 

-- شنو قصدج 

-- البيت اللي بيه قاسم منو يحبه ويحب اهله

-- ديري بالج لا يسمعج 

-- ويسمعني شنو قابل خايفة منه يمة 

-- هااا والله سباعية ومسيطرة

-- اي كُلش سباعية مدا تشوفين صرت جنتكم ودخلت بنصكم واخذت بيت ابنكم الكبير 

-- تدرين شنو اللي مفاجأني بـالموضوع 

-- لا ما ادري مع الاسف 

سكتت ما ردت بس باوعت لي بنظرة إستحقار ما عجبها كلامي رجعت اني سألتها 

-- شنو اللي فاجأج بلا 

-- شعجبه بيج اخوي شو مرته احلى منج وارتب منج وتحبه تموت عليه شعجبه بوحدة مثلج لا اهل ولا حسب ولا نسب عايشة بدار ايتام وفوگاها سودة ما ادري بنفسجيه ولسانج شطولـة 

-- شوف منو يحچي على الحسب والنسب والجمال ليش عيني انتوا شنو حسبكم ونسبكم اشو عائلة مجرمة عايشة بـالحرام متعرف العيب والخجل 

-- احترمي نفسج نشرفج ونشرف عشيرتج 

-- باعي صح اني يتيمة وعشت بدار ايتام بس مترباية احسن منكم وبنت خير اكثر منكم اذا انتم حديثين نعمة فـ أني فتحت عيوني وبحلگي خاشوكة من ذهب واعرف العيب والحرام والصح والخطأ اما انتم كُلكم مجرمين تعرفون بـ أخوكم وبسوالفه وساكتين عنه بعد وين الأخلاق اللي جايه تعيرني بيها واذا على الجمال فشوفي وجهج اول مرة وراها تعالي احچي عليه 

عفتها وطلعت اول مرة ارد هيج رد اول مرة احس بنفسي قويـة و اگدر ارد وادافع على نفسي يمكن كلام امهم زحزح الخوف من گلبي وانطاني دافع للقوة لو اني اتجردت من اخلاقي وگمت اتجاوز وارد بعدائية ما اعرف ، بس طلعت من المطبخ شفت قاسم گاعد يم امه بس شافني صاح وووين 

-- انام 

-- أرجعي كملي العشاء ويا زهور 

-- اني ما اشتهي وما مجبورة اوگف اسوي لك اكل وهذا الموجود عاجبك عاجبك ما عاجبك عوفني اولي للشوارع اللي اجيت منه

المرة باوعت لي ودارت وجهها على بنتها الواگف بــباب المطبخ تباوع وقاسم نفس الشيء باوع الاخته وسكت ما رد عليه عافني اصعد الظاهر عرفوا اكو كلام صار بيناتنا 

صعدت للغرفه شمرت الفراش المفروش على الجرباية وفتحت الكنتور ادور غيره لگيت جرجف طلعته تغطيت بيه ساعة او اقل الساعة وصعد جايب ماعون بيه كباب عروگ وصمونة وخيارة 

خلاهن على الميز وسحب الغطاء من عندي 

قاسم :- أگعدي تزقنبي 

اجيت اگول زقنبوت بگلبك بس اذكرت وحدنا بـالغرفة واذا حچيت هيج محد يحميني من عنده گعدت اخذت الماعون واكلت ميته من الجوع

 و غصباً عليه اكل اذا ما اكل جسمي يبقى يرجف 

هو تمدد على الجرباية وبـ إيده التليفون خلصت اكل وطلعت للحمام اغسل اسمع زهور وامها يحچن جذب انتباهي اسمي جان موجود اثناء حديثهم وگفت على المحجر وبقيت استمع لهم 

زهور :- منين جابها بنت الشوارع هاي 

ام مهيب :- محد ابن شوارع غير اخوج

-- يمه الله يخليح اني ما مقتنعه بكلام مهيب يعني شلون يگول يتيمة وما لها احد وقاسم انقهر عليها وتزوجها وشلون قاسم يگول احبها وشلون هي ما تريده وتغلط عليه وانتِ طابگه وياها ومايدتها على الغلط هذا يمه ليلى حبابة وما تستاهل وحدة مثل هاي تنزل على راسها شريچه 

-- اخوج اختار وهو يتجازى بـ أختياره بعد تغلط عليه تطگه مالنا غرض وليلى يطبها مرض لو مرة معدلة ما مشى الماي من جوى رجليها وين جانت عن رجلها من يبات برى غرفته وين جانت عنه من يرجع ماله نفس بيها هاا

-- قابل تشم ايدها 

-- اي تشم إيديها وجهه وگفى وتفتح عيونها سته على سته مو تسلم الجمل بما حمل وتنام مأمنه هو الزلمة اله امان 

-- يعني هسه ليلى غلطانة

-- اي غلطانة لان تدري ومغلسة عبالها يبطل

-- شلون تدري يمه لا تخبليني يعني تدري بيه مزوج عليها 

-- بعد تدري مزوج ما تدري هاي ما ادري بيها بس تدري عنده غيرها وتدري يروح لها ومغلسة شگلك وين تاليته يمي بفراشي وبغرفتي دخل تفيدها الغرفة هسه هي وكل وحدة غمة مثل تفكيرها

-- كون ادري شعجبه بيها هاي الزرگة ام اللسان متر 

-- ما عجبه بيها شيء كله لعب بلعب بـالاول لحد ما الله عاقبه وخلاه يطيح حظه وتنكسر رگبته وشوفي حوبتها شتسوي بيه بعد وبعد 

رجعت للغرفة واني ادعي بداخلي واگول 

-- بسم الرب اشوف بيك يوم بسم الصليب اشوف بيك يوم يا قاسم اخ يابـة هم يجي هذا اليوم ما اصدگ

دخلت للغرفه لگيته بعده لازم التليفون اجيت اتمددت اريد انام وهو بعده مشغول بـالتليفون ما اعرف شلون عيني صار على التليفون ولمحت اسم زكيــة .. احس گلبي خمشني من طاريها شرايدة شنو من مصيبة جديدة مسويتها بـالبنات حاولت اشوف شنو يكتب وشنو ترد بس ما شفت لحد ما خلص من الكلام وياها اباوع له انطى حذف للرسائل ودار وجه عليه لگاني اباوع له 

قاسم :- ها شكو 

إمتنان :- شـ داتخططون انتِ والمجرمة 

قاسم :- نفتح دار جديدة ونجيب حوريات مثلج 

-- تعرف شگد اكرهك وتلعب نفسي منك 

-- انطمري مو عبالج امي هنا وما اسوي لج شي ترى اصلبج هسه وداعت هذا الصليب اللي لابسه

حچى هيج وجر السنسلة من رگبتي وشمرها بـالگاع قوي .. هاي السنسلة من اعز ممتلكاتي والشيء الوحيد اللي بقالي من اهلي هاي الذكرى الوحيدة البقت عندي جابها الي بابا قبل لا يتوفى بشهرين تقريباً ومن يومها اني لابستها وما نازعتها من رگبتي

 هو گطعها لو احس گطع گلبي وشمره فزيت من مكاني متخبلة ادور عليها لگيتها مشمورة بـالزاوية يم الستار اني شفتها مگطوعة واني جنيت رسمي بقيت اعيط واضرب بنفسي وملخ بشعري خلص بعد تعبت ما اتحمل اكثر ما بقى عندي اي شيء نهوني قضوا عليه دمروني ضيعوني لا عافوا لي ماضي ولا حاضر ولا مستقبل 

گام متفاجئ من ردة فعلي لزمني من إيدي ما نعني اضرب نفسي خرمشته بخده سحب وجهة من عندي بقيت ادفر برجليه بيه 

قاسم :- شبيبج تخبلتِ شبيج كافي 

إمتنان :- وخررر مني وخرر 

اعيط وادفر بيه برجليه وامه من جوى اصيح ولك قاسم شبيكم ولك قاسم شبيك وياهااا وهو يرجع يرد ما مسوي شي مابينا شي صعدت زهور فتحت الباب ودخلت لگتني منهارة على الاخير باوعت الاخوها وگالت 

-- امي راح تموت كل جسمها يرجف ناوي تموتها اذا ما تهمك وما تريدها ترى احنا نريدها 

ما رد عليها رجعت گالت 

-- تريدك روح انزل لها 

گام من عندي نزل الامه و زهور باوعت لي ما تعرف شتحچي كل اللي حچته شسوا لج شبيج 

عفتها وگمت ركضت وصلت للمحجر ردت اشمر نفسي من عنده اموت واخلص بس ما لحگت لزمتني زهور بـ ثنين إيديها وبقت تعيط صعد هو يركض سحبني من المحجر قوي وضربني راشدي ورجع دفرني واخذني سحب للغرفه وقفل الباب ضرب راسي بالجربايـة وسبني وفشر عليه رجع سحبني من شعري ويحچي وياي 

-- تخبلتِ شبيجج هيوو بس كافي يلااا ولا نفس 

-- هيوو بعينك وبعين الخلفك يا كلب يا حقير يا نذل تف عليك وعلى تربيتك عديم الاخلاق عديم الرجولة 

اني حچيت هيج وهو حار منين يبدي ومنين ينتهي تفنن بيه بـالضرب لحد ما تعبت إيديه ورجليه يلا عافني وگعت بـالگاع ما اگدر اتنفس ولا اگدر اتحرك بيني وبين الموت شعرة وحدة امه تخبلت بس تصيح عليه وتغلط ما تگدر تصعد فوگ مرة كبيرة ومريضة و زهور دگت بـالباب وتوسلت بيه بس يفتح لحد ما ملت اخر شي خابرن على مهيب اجى وهو بس سمع اخوانه اجو نزل لهم

بيومها صارت مشكلة كبيرة بينهم مهيب ضربه وهو تجاوز على مهيب وبـالختام وگعت امهم فاقدة بنصهم ركضوا بيها للمستشفى محد بقى يمي بالبيت حتى زهور راحت وياهم 

زحفت زحوف لحد ما وصلت للدرج ونزلت واني گاعدة گعدة جنت اريد استغل الوضع وانهزم من البيت بس الباب جان مقفول حاولت افتحه اكسرة بس ما گدرت لان اني بـالاصل ما بقي بيه شيء صاحي ولا عندي قوة احرك جسمي تمددت بـالگاع وغمصت عيوني مستسلمة هذا حدي انتهت كُل قوتي وراها نمت من گد ما تعبانة ومتأذية 

و الصبح من گعدت بعده ما جاي بيه ما بيه گمت استند على الحايط وامشي دخلت للحمام صارت عيني على المرايـة رجعت على الباب واني مرعوبة من منظري وراها فتحت البوري غسلت وجهي المي احسه يدخل بداخل الكدمات الموجودة بوجهي ويأذيني .. طلعت من الحمام وتمددت بـالصالة على القنفة وراها رجعت غفيت من جديد 

ما اعرف شگد مر وقت وسمعت صوت الكاونتر انفتح والمي يجري بـالسنك فتحت عيوني دايخة ومعدتي تأذيني وكُل جسمي يأذيني ويحرگني مكسرة تكسر .. شفته طلع من المطبخ واجى عليه 

قاسم :- تدرين لو امي صاير بيها شي شـ أسوي بيج

غمضت بدون ما ارد رجع گال 

-- گولي الحمد لله عدت على خير وما ماتت 

ساكته ما اجاوب رجع هو طلع كم ساعة ورجع جايب ملابس الي صعدهن فوگ ورجع يصيح عليه من فوگ 

-- تصعدي ترتبين غراضي لو انزل لج ارتب وجهج من جديد 

گمت من مكاني صعدت للغرفة اسحل بنفسي جبت الملابس طلعتهم من العلاليگ وشمرتهم بـالكنتور بدون ترتيب ورجعت على الجرباية تغطيت ونمت وهو كُل شوية يا طالع من الغرفه يا داخل ما ادري شيسوي لحد العصر طلع من البيت وقفل الباب وراه گمت نزلت جوى حاولت افتح الباب بس ما اگدر مقفول يعني حتى للطرمـة ما اگدر اطلع باب المدخل مقفول عليه رجعت للمطبخ ميته من الجوع فتحت الثلاجة طلعت طماطا وخيار سويتهم زلاطة وخليت فوگاهم ملح اكو صمون باقي من العشاء سويت بيه لفة واكلت

لليل واجى انطاني السنسلة بدون ما يحچي اخدتها من عنده لگيته مسويها لاحمها يمكن لان راجعه مثل قبل ما بيها گطع لبستهم واني ابچي بدون صوت وهو يباوع لي ويدور وجهة

وهيج خلص هذا اليوم واليوم الثاني والثالث والاسبوع والشهر وضعي كُل ما جاله يتعقد اكثر لا اطيقه ولا اطيق صوته حياتي وياه اشباه بـالمرار إنسان مريض ساعة ساكت وساعة يحاول يشاقيني ساعة يتخبل ويلزمني يضربني ضرب افقد بـ إيده 

وساعة يعاملني اسوء من معاملات بنات الليل الباب كُل ما جاله مقفول ما اگدر انهزم وامه وضعها الصحي تعبان وما اجت بعد واخوانه ما شفتهم وكُل وعودهم تبخرت باقين حايرين

بـ أمهم هنا حطيت عليهم اكس واخذت عليهم نظرة حالهم من حاله ما يختلفون عنه بشيء بقوا ساكتين عليه وما خلصوني من عنده 

البنات ما عرفت وين راحوا وشلون وضعهم سألته اكثر من مرة ما يرد عليه واذا رد يرد بجواب واحد ... مرض ما يطگهم عايشات احسن مني ومنج فكري بروحج... 

زوجته ما اعرف عنها شيء اذا بقت زعلانة من عنده لو رضت وشنو الحل اللي صار وياها كُل اللي اعرفه هي بيت اهله وهذا هو  

بقيت بهذا الوضع تقريباً ثلاث اشهر ونص وراها الحچيه امه تعبت فد مرة وطلبت تشوفني اجى اخذني لها وهاي اول مرة اطلع من بعد ثلاث شهور كاملات . طول الطريق يهدد بيه ديري بالج تحچين وديري بالج تگولين وديري بالج تشكين واذا حچيت اسوي كذا وكذا وكذا لحد ما وصلنا الاهله اول ما دخلت لگيت حيان و مهيب گاعدين 

فتت بدون ما اسالم عليهم مهيب سألني شلونج ما رديت عليه .. مسوي نفسه حنون وهو نفس اخو وكُل اللي صار بيه بسببه المأوى جان ارحم لي من هاي العيشه جابني مناك وشمرني بيت فارغ من الناس وعافني وحدي اواجة مصيري 

هو خجل من اخوانه لان ما سلمت عليهم وحاول يدارك الموضوع بسرعة سأل على امه ردت زهور بـالغرفه نايمـة دخلنا للغرفـه مالتها بس حست علينا فزت من نومها 

ام مهيب :- هلا بـ إمتنان شلونج 

إمتنان :- هلاو بيبي الحمد لله على السلامه 

رحت عليها بستها وگعدت بصفها وهو گعد بـالگاع والمخده وره ظهره ويباوع لنا

ام مهيب :- شلونج 

-- بخير 

-- جنت ناوية اگعد يمج وما اعوفج وحدج بس شوفت عينج طحت وما گدرت بعد وانتِ ما تگدرين عليه طلباتي هواي واتعبج

-- تعبج راحة لا يظل بالج المهم انتِ تصيرين زينه 

-- شلونه قاسم وياج 

باوعت له رفع لي حاجبة منتظرني ارد 

إمتنان :- زين 

-- ما صار عندج شي تفرحينا بيه 

-- شي مثل شنو 

هو ضحك وهي أبتسمت وردت 

-- اقصد ما صرتِ حامل 

باوعت لها من كُل عقلها تسال هيج سؤال وتريدني اخلف من ابنها هذا المريض واني حتى بـالمحكمة ما عاقدة يعني اجيب طفل لا نسب ولا شيء يضمن حقه بهاي الحياة واحتمال ياخذه ويسجله بـ أسم زوجته ما جاوبتها بقيت ساكته 

جاوب هو بمكاني 

-- بعد وكت عوفينا متونسين بدون الجهال وتعبهم 

-- لا يمه ماكو احسن من الخلفة والجاهل من يجي يجيب كل الخير وياه وبلكي على وجه الله يفتحها عليكم ويحنن گلوبكم واحد على الثاني 

-- الله كريم إن شآء الله خير 

حچى هيج وگام طلع من الغرفة بقيت يمها لحد المغرب وطول الوقت تحچي وياي وتنصح بيه اقبل بالوضع واتقبله واحاول افتح گلبي له واحبه لحد ما رجعنا للبيت هي توصي بيه شلون اكسبه واحافظ عليه ما تعرف هذا الإنسان حقير وجشع 

ومريض وقذر مستحيل اتقبله بيوم من الايام 

مرت الايام ومشت الاسابيع واليوم صار ست أشهر اني وياه بهذا البيت بيومها جنت متمددة بـالصاله راسي يأذيني و معدتي احسها تفور وهو جان نايم فوك بـالغرفة بوقتها جان هسه راجع من المستشفى لان امه جانت نايمة مستشفى وهو يروح ويرجع عليها إيدي فوگ راسي اضغط عليه قوي اريد اخفف الالم صار كم يوم مشكل وياي بسب السهر والقهر فزيت من شفته نزل يركض من الدرج ويلبس بـالدشداشة مالته وهو على بايات الدرج وگفت وگفه من ركضته مرعبة وحچيت بقلق 

إمتنان :- شكو 

قاسم :- أمي ماتت

         الفصل العاشر من هنا