رواية في حجر الافعي الفصل التاسع 9 بقلم شمس العراقيه

 

رواية في حجر الافعي الفصل التاسع 9 بقلم شمس العراقيه

مساء الخيرات والحب والسعاده البارت مطول لعيونكم الحلوة قراءه ممتعه أحبائي 🤍

نمارق 

ـ أستغربت طريقة كلامه المستفززه وجاوبته الجحر مالتك ليش شنو شايفني ليكون عبالك اني وحده من اللي مربيهن يا عديم الرحمه شنو هالحجي 

ـ وشدعواچ عود خايفه وأنتِ عرامتج ماكو منها بين النسوان من صوتج الشايل العرب 

ـ ترة اللي صار مو قليل الحية خطيره ومضره من كل عقلك تربيهن لا أبداً أنت مو طبيعي خالي من الرحمه والأنسانيه وعجيب إمرك 

ـ بقيت الأنسانيه لزلمتج المخربط وأمثاله بعدين منو انطاه الأوامر يخليج تصولين وتجولين بالحوش وبكيفج و؏ حل شعرج يلة ولي أنكلعي لخرابتج كوليله حناش يكولك ضبني زززززين يلة راويني مكفاج يلةة 

ـ صرخ بوجهيي فززني ، جاوبته ايييي فهمنااا لاتصرخ منو أنت حتى تتحكم بيه وبطلعتي ما عندك سلطه عليه مشيت وصاح 

ـ هاااا والله عاااال لازم زلمتج الخنثه خوش متسلط عليج امشي ولي لخرابتج واذا شفت طولج بالحوش اكسر رجليج واحملهن الج يلة بلا لغوه زايده 

نمارق ـ عفته لن مبين عليه واحد شراني وواحد مستفزز ويخوف من شكله وتصرفاته الما تنطاق دخلت الغرفه ركعت الباب خرب مزاجي النذل كعدت وصفنت ماطول سالفتي وكعدتي مطوله لازم اسايره مو معقوله اضل محبوسه بهل الغرفه ليل بنهار وتذكرت كلمته من كال الجحر مالتي شيقصد هذا الخبل ابد مو صاحي

" ماشي يا حناش أني وياك والدرب طويل اجيبك لدرب وأتنفش ريشاتك ريشه ريشه شايف نفسك شوفه ومتصلط ؏ الكل وأولهم رجلي كرة عيني مبين عليه بارد بكلشي وما اله الكلمه بينهم لن كلمه وثانيه يغلط عليه  

" 

اجه سلم ورديت وعليكم السلام اخذ ملابسه ومشه الحمام وطلع وگال 

إشهاب ـ بس ملابسي عود انطيهن لـ رحمه تنشرهن عالحبل 

نمارق ـ ليش تغسلهن انت مو عندك أخوات 

ـ ميحتاج 

ـ شنو ما يحتاج ترى هذا شغل نسوان مو شغلك أنت باوعلي بحده اي شبيك ترى ما حجيت شيء 

ـ لاتدخلين بإشياء متخصج 

ـ ليش اني مو زوجتك ليش متخصني 

ـ زين شايفه نفسج حرمتي 

ـ اي مو انت هيج تكول وبعدين مصيري اتقبل مصيري شسوي مجبوره ماكو واحد اخو خيته ويساعدني وينقذني من هالعيشه 

ـ هذا الموجود، اي ما جوعانه 

ـ أنت همك شنو اكلت وشربت هاي هي بس هذن يهمك 

ـ شتردين نمارق وين تردين توصلين بكلامج 

ـ لأااا سلامتك ما اريد شيء روح اتعشى بيت اهلك ما جوعانه وما يحتاج تجيبلي وياك وتنقص من قيمتك كدام اهلك وأخوانك 

                                          

              

                    

ـ نماااااارق احترمي نفسج وأحجي عدل، وبعدين اليجيب أكل لحرمته تنقص من قيمته عجيب امرج يا مره الظاهر طلعتج اليوم انفر عقلج وصرتي تخربطين بسوالفج 

نمارق ـ ما جاوبته طلع وخلصت منه طلعت وكفت يم الباب واجه حناش يمشي بدون ما يباوعلي شدعوه عليك السلام لله واحنه هم ننعد على البشر 

حناش ـ لج شنو حجيت وياج شو ما تسمعين الكلام ومتأخذين حجاية احد، عينج كواينه ومستوكحه 

ـ شبيك يا حناش أنت هم حسبة أخوي ومبين عليك خوش زلمه وشهم وسبع وشخصيتك رزنه ليش هيج تحاجيني وأنت زين تعرف أني ما الي ذنب باللي صار 

ـ هاا اي يلة لازم اروح ينتظروني ؏ العشه 

ـ بالسلامه والف عافيات ؏ كلبك مشه ما رد عليه باوعت باب الحوش مضروب قفل من هذا الزين هفف وشوي واجه بيده صينية الاكل تأففت ودخلت وخلاها كدامي مووكلت ما أريد ما رد عليه رجع باوعلي 

ـ شمطلعج من الغرفه وفواكاها وتحجين ويه حناش أنه مو كلت ما الج شغل بإحد ليش تجيبين الحجايه لنفسج واللي 

ـ ليش ممنوع لو حرام ترى هذا أخوك مو غريب 

ـ حتى لوووووو ممنوع فاهمه 

ـ اهوووو شطلعت هاي ترة أختنكت من الوضع وطلعت اشم هوا وهو جان موجود وسلمت عليه وبعدين التحجي عنه اخوك ومبين عليه خوش رجال وسبع ما شفت شيء موزين منه مثل ما تكول 

ـ خوش رجال شوفي يا بنت الناس ما تحترمين نفسج وجودج بهل البيت ما يجرالج خير وانه كلتلج بس مبين عليج رأسج يابس وخشم، لهذا انجبحي بغرفتج وطلعه ماكو بعد 

ـ مو ؏ كيفك 

ـ لعد ؏ كيف منو !! 

ـ كالها وتقرب وأبتعدت شبيك اقصد هاي هم حياتي مو كيفك تأمر وتنهي 

ـ لا شو كيفي وامر وأنهي وطلعه ما تطلعين والله اكسر رجليج لن الظاهر العين والاغاتي مو الج 

نمارق ـ طلع مزعوج دفعت الصينية وفرشت فراشي وتمددت مقهوره بدال ما يحس بيه وبوحدتي يكول خطيه طلعت تشم هوا يرجع يحاجيني وهو الما راضي ويحاسبني لن حجيت ويه اخوه ادري حاجيه ويه يهودي لما اخوك ودمكم واحد اي يا أشهاب مبين عليك تشلع كلبي بإطباعك واني اشلع كلبك بإطباعي وأثنينا ما متفقين وما نتراهم كل واحد منا عقله شكل 

__________________

إشهاب 

ـ طلعت مزعوج منها ومن تصرفاتها يوم عن يوم اكتشف صفه جديده بيها عنوديه وكحه وتصرفاتها طفوليه ما عدها تحكم بشخصيتها كل ساع اصدار شكل ساعه فقيره ودمعتها تشفع الها وساعه تخليني اغير اطباعي الزينه وياها 

كاعد برة واجه اسماعيل شجابك هيج وكت شنو ما تعشيت 

أسماعيل ـ تعشيت وشبعت عمي، انت شلونك شبيك مهموم عمي وشلونها الزيجه وياك ان شاءلله مرتاح 

            

              

                    

ـ مرتاح مرتاح يا أسماعيل 

ـ ما مبين عليك ياعمي وجهك مغندب ليكون لحد الان معنده 

ـ شسالفه أسماعيل اخذت بالحجي زايد 

ـ لا السموحه منك عمي واترخص منك اخافن جفصت بسالفه حقك عليه 

ـ لا يا أسماعيل واخذ راحتك حاب ابقى لوحدي راح واجه مناف كعد بصفي وفتح الباكيت وناوشني جكاره 

مناف ـ شمكعدك لوحدك خير  

ـ ماكو علوم من يومي احب اجالس لحالي 

ـ شلونك مرتاح 

ـ الحمد لله ، وأنت علومك شرواك شكدامك سمعت طشار حجي امي عسلة تريد تزوجك وحده من العرب غريبه لن الكرايب ما يردن الزيجه منك على سالفتك ويه بنت الناس من بعد ما طشت وانثترت علومها وصار اللي صار 

ـ تحجي بكيفها انه مو أبالي الزيجه ولا برأسي لا من بعيد ولا من كريب لو اريدن اتزوج جان خذيت بنت عمها وأفتكيت من هالسالفه كلها 

ـ المكدر ومكتوب ما منه مهروب 

ـ أي بالله أصبت، اكول ؏ طاري علومك دريت امي ما مرتضيه على زيجتك من بنت عمها ولا راضيه بكل قرارت ابوي وتحجي عليك رغم احاجيها وادافع الك وتعرفها بعد 

ـ لا ما عندي علم وتكول اللي تكوله وكلمة ابوي مشت والبنت محشومه بغرفتها ما عليها بإحد 

ـ صدك شلون كاظها وجارعها لن مبين عليها عرصه من ساعة الجبناها صوتها شايل العرب بويه طرت روسنا وليلة اللي خذتها بيها فضحتنا بهرجها ما عبالي هيج تطلع وكحه لن ؏ حد علمي اعرفن عنها فقيره وكل ظنتي مثل بنت عمها. 

ـ حقها الله يعينها ؏ ما أبتلاها، اي ؏ طاري بنت العم

الله يدري بيها وين صفى بيها الوكت  

ً ـ والله يخوي ضاعت علومها وتبخرت كاعها ما الها أخبار والله يجمعني بيها ساعة وحده بس ساعة !!. 

ـ شتحجي أنت ليكون بعدك هاويها لو ابالك غير نية احجيلي ولاتضل تلوص بحجيك البنت ولت لغير كاع من ضيمها واللي جره عليها مو قليل 

ـ اشهاب لا ادافع عليها انت ما اعرف شلون تحجي لن قسم برب الكون الگلب شايل عليها خيرات الله شردت وخلتني دم بيد ابوها حلكها ما فكته يا هاويها يا للكن انه كليبي ينثر دم عليها 

ـ بسبتك مو سبتها البنت لا حول ولا قوه وعقلها صغير ومشت ورة رغبة هالگلب المصخم الملطم انت شبلاك مو رجال شكبرك بس شسويلك حجيت وما خذيت بحجايتي

ـ صار اللي صار شيفيد الحجي بعد والكاها ان شاءالله 

ـ وين تلكاها يمعود، مناف اركد على عقلك ودك وزنك بكاعك اهجع بويه هذا مو حجي البنت شردت والله يسرلها عوفها ولاتضل تبحوش وراها والسالفه انسدت ليش ترجع تفتحها وتهيج المواجيع وتنثر الشر من جد وجديد 

            

              

                    

ـ اذا انه عفتها حنااااش ما يعوفها ناوي عليها نية كشرة يجيبها ويكسر ركبتها ويريدني اولي لبيت ماجد بالولايه مناك ادور عليها وكالي هالايام يجيبلي عناوين اهل أمها لازم عدها صلة كرابه بالولايه وتولي يمهم 

ـ وأنت ملاحك حناش واللي يخرطه حناش لو كل حجايه يكولها ونمشي وراها جان المصايب تركع ورانا من كل صوب حناش ما وراه بس الشر يهبهب 

"عوفه عمي واللي يخرطه هذا ناوي على بلايه سود مثل الحيايا اللي مرييهن 

وبعدين كل عقلك كرابيهم يلفونها ببيوتهم وراها سالفه شكدها شكبرها منو يتحمل بالعار والهزيمه لن ؏ حد علمي اهل ابوها متبرين منها وخوالها نفس اللحظه تبروا منها ومن أمها وشالوا وهجوا من العرب كلها يا كرايب تحجي عنهم عمي الناس تخاف وتحسب الف حساب لسمعه مو مثلك ركضتي ورة عشكك وطيحت الدم بين العربين وشلت كومة خطايا خلني ساكت مناف يرحم العزيز بترابه جوز من هاالسالفه وعوفوا البنت بحالها 

ـ خوية فهم حناش هالحجي يكول ما اجوز من ثاري وكلبي ما برد من هالسالفه كلها ويكول السالفه صارت كسرت خشم النا ومو احنه تنكسر خشومنا والبنت اجيبها اجيبها وهي وامها بعد 

ـ وإبوها المات باب بيتنا شبي مو زلمه مو ابوها لو يعتبره لعطه بتوالي الماعون  

ـ يكول ما جتلننا بثأر ومات هيج لن دفاع عن النفس هد ؏ ديارنا والزلم انجبروا يجتلونه لن ماكو حل غير ينجتل لن اذا ضال يرمي يمطل كل أهل البيت بكاعهم ما يحسه ثأر ولا نتأخذ بثارنا 

ـ بالله عليك هذا حجي ينحجي بي بويه الزلمه انجتل وصارت كعدة عشائر ولزلم معكله وروح وتعال وعمي وخالي والطرفين تنازلوا وكلمن وله لدياره ولفت ولت وبعدين بنت عمها مو اخذتوها بمكانها شنو هالحجي هذا

ـ ما معتبرها ضمن الثأر 

ـ وليش بالله 

ـ لن أنت خذيتها زوجة الك أسكت يكول عليك جان هاويها من زمان وجت لرجليها وتزوجها ههه

ـ والله حناش فلا يجني عقل بابا هذا شيخرط بسوالفه اذا يضل يحجي يفني عرب كامله موتوا السالفه بكاعها وبسكم عاد واحد منكم يشغل هالعقل المركبينه شتحجون انتوا 

ـ وشلون وياه معند يريدني اولي لـ الولايه راكبه جنيتها عليها 

ـ وأنت هم هبهب گلبك عليها وتريد تعاتبها بس اكولها الك بس تشوفها تبلع لسانك الحجي ما ينكال بوكته ما ينكال بعد والبنت شردت ومحد يعرف شنو مر عليها اركد على عقلك وعوف سالفة الولايه والسالفه كلها من اساسها اكلعها من رأسك وعقلك المتبن ما يفكر بس بالعوجات 

عفته ومشيت وانه راجع تلكاني حناش تعديته ولزمني من ذراعي خيرك حناش شنو طيب علومك 

حناش ـ علومي كل الخير وين مولي 

            

              

                    

إشهاب ـ معود لغرفتي 

ـ عاود منو لازمك غرگان بالعسل ومتمع بالترف شكوو عليك بختك عمي هم حظوظ حظك منكع بالماي الصافي 

ـ الزمك حدودك وياي وكظ لسانك وفكني منك ومن شرك 

ـ وأنت هم كظ روحك عن أخواني وما تكرب صوب واحد بيهم لن كبل كربت صوب مناف ولعبت بعقله وفريته فر وبنيتله صورة بعقله عربهم مظلومين وعربنا الظالمه والولد مشه ورى مشاعره وخليته يمشي بدرب الأعوج وطاح العزيز وهسه مدفون بترابه وأنت عايش ومتريش ويه البنت اللي عمها جتال اخوي 

ـ الظاهر فاهم السالفه من كراعينها انه بري من اللي صار مناف أنه اكثر واحد حاجيته ونصحته بس متاخذ بحجايتي ودومكم حجايتي تغثكم والتحجي عنه اخوي مثل ماهو اخوك وكلبي وجعني عليه مثلك وازود 

ـ لا مبين گلبك هواي وجعك عليه والخوه الشايف نفسك بيها علينا احنا ما شايفينك من كاعك واذا گلبك محروك ؏ عزيز الدار لاتحبلها خلك زلمه حوگ !!  

لن من هسه اكولنها الك اذا حبلتها امطله بصفه وامطل امه هم واذا صحت بيدي امطلك هم لن من بعد وفاته انشالت الرحمه من كلبي و؏ الرضيع ما يرفلي، يلة سلام وعاود الخرابتك وفكر باللي كلته الك دربالك تحبلها ضبك رويحتك لن اعرفك رهيف 

نمارق ـ سمعت كل كلامهم واللي قهرني اكثر عدم رده وبروده تجاهه هيج مواضيع حساسه ياربي راح يجلطني هالرجال بتصرفاته طبعا هو سامح اله يتعدى حدوده وياه لهل الدرجه وخلاه توصل بي المواصيل اذا صارله طفل يقتله عجيب امره شلون سكت وما رده !! 

تجاهلت سالفة الطفل ودخل مزعوج شمر الشماغ وكتفت ايديه وكفت كدامه وجاوبته ليش بقيت ساكتت ليش ما رديته ليش تخلي يتمادى وياك ويعبر حدوده 

إشهاب ـ وأنتِ شگوو وشعليج بهيج مواضيع 

نمارق ـ شُـــنو شعليه مو أني زوجتك 

ـ دام معتبره نفسج حرمتي تعلمي الأحترام وكصري حسج ولا تتتدخلين بمواضيع تخصني تعلمي تعلمي 

ـ الحمدلله متعلمه الأحترام بيت ابويه ما يحتاج تعلمني 

ـ وهسه منو معلمج 

ـ بس كولي أنت ليش هيج شخصيتك ما رد عليه وتمدد بفراشه مو أحاجيك 

ـ الوكت تأخر مو وكت حجي بتوالي الليل يلة نامي 

ـ لا وكته وهسه تكعد وتكابلني ونحجي انطاني ظهره ونام احاجيك تجاوبنيييي مو تجاهلنيي واذا ؏ النوم شبعانه نوم وطكت روحي منك ومن هالوضعيه الخايسه والتعبانه لا معامله بيها خير لا احد يسمعني وياهو يجي ويتهدد عليه 

ـ كعدي بمكانج ياهو يتهدد عليج بس اذا تضلين تبحوشين ورى السالفه رأسج يوجعج 

ـ أني مو مثلك يجفصون بطني واسكت مستحيل اكون مثلك ما رد عليه إشهااااااب احاجيك تجاوبنيييي عاد 

            

              

                    

" بقيت كاعده وهو نام ومبين غرك بالنوم فتحت البرده بقيت أباوع لبرا شفت حناش كاعد لوحده ويدخن دار عينه عليه مُباشرةً رديتها بسرعه وباوعت لـ إشهاب نايم وتالي تمددت بعيده عنه وبقيت كاعده وأباوع السقف هاي يوميه اراقب السقف بالف ويلاه يلة انام مثل البشر

للصبح كعدت قبله وهو كعد مزعوج وطلع يستغفر هذا شبي الظاهر حتى بالحلم متعارك هو واخوه حنااش يستاهلون عسى نارهم تأكل حطبهم بالجحيم وبئس المصير اشوف بيكم يوم اسود ان شاء الله 

" دخل ينشف وجهه وعلك الخاولي بالعاده الزلم ومن ضمنهم بابا الخاولي والحاجه بيدهم يشمرونها هذا شعجب مرتب. 

فرش سجادة وكام يصلي وبقيت صافنه عليه ملتزم بصلاته وما يفوت فرض ويقرأ قرأن بس مو دائماً اشوفه يقرأ وما يرد ولا يتجاوز ؏ احد وحجيت ويه نفسي بصوت ناصي مع ذلك ما تعجبني شخصيته، سامح الهم ييهنون بي وحناش يتجاوز ومتمادي عليه وهو ولا ابالي عجيب امرك يا رجال 

" كمل واندار عليه صفن شوي وكام ودخلت رحمه بيدها الريوك جاوبتها منو كلج نريد ريوك ما جوعانين بعدنا بسم الله تونا كعدنا جاوبها بإبتسامه 

اشهاب ـ مشكوره خيتي يلة روحي تريكي 

رحمه ـ تدلل خويه وعليك بالف عافيه 

نمارق ـ طلعت ورد الباب وراها وكعد يتريك وباوعلي 

إشهاب ـ تعالي مدي إيدج من امس ما مأكله و؏ لحم بطنج ما يصير بويه 

ـ هواي يهمك ما اريد ما جوعانه

ـ يهمني ما يهمني، النعمه ما ينزعل عليها والطناكير مالتج عوفيهن لغير وكت مو بصباحية الله يلة كربي صوبي 

ـ كتلك ما أريد عفيه شكد تلح 

ـ طبج مرض 

ـ انزعجت من كالها ودرت وجهي عنه وكمل ريوكه وكام غسل وغير ملابسه لبس شماغه وطلع الباب جان مفتوح كمت وراه باوعت عبالي يحاجيني وجه الدب ولو هو وجهه رفيع واسمر شجابه على الدب واني واكفه طلع مناف لابس افندي وكاشخ وبيده جنطه وما حسيت غير اشهاب وكف بطريقه وصوتهم جان قريب عليه

اشهاب ـ وين وين وين مولي 

مناف ـ أدور عليها واجيبهها عوفنيييي خويه 

ـ مناف عاود البيت وبلة تصرفات الرعونيه يلة كدامي 

ـ اشهاب عوفنيييي يرحم عزيزك ما الك شغل بيه نجيبها وناخذ بثارنا 

ـ الثأر واخذتوا شكووو بعد المن جايبنها شنو تيهانه هي

ـ ماكو ثأر أتأخذ أنت عايش حياتك حسب الأوصول ومن احسنها هم يا ثأر تحجي عنه عوفنيييي اولي بدربي 

نمارق ـ ضحكت على كلمة الثأر وجانت ضحكتي مستفززه ومفاجئه مو وكتها والصراحه نسيت نفسي وتصرفاتي مو متحكمه بيها باوعلي ونزلت رأسي وتهربت من نظرته ورديت الباب بسرعه شوي أندك الباب 

منو 

            

              

                    

اشهاب ـ فتحي الباب بالطيب أحسن إلچ

نمارق ـ فتحت الباب ودخل وقفله وراه وتقدم واني ارجع ليورا لزمني من متن ايدي وضغط عليها بقوة نبتت اظافره بلحمي اشهااااب توجعنيييي اشهاب عوفنيييي فدوه تأذينيييييي عوفنيييي شبيك شصارلك عوفنيييي 

إشهاب ـ أنتِ شتردين بالضبط 

نمارق ـ ما أريد شيء بس عفيه عوفنيييي توجعني 

ـ شمطلعج وراي وتسمعين ؏ كل سالفه بهل البيت شنو هالذاربه الوسخه البيچ

ـ جاوبته بوجع مكتوم ودمعتي بطارف عيني شنو هالحجي ترى طلعت صدفه مو قصدي اتسمع الكم والله شبيك عفيه عوفنيييي انت مو هيج 

ـ وتتمضحكين وصوت ضحكتج واصل لعندي تستهزئين حضرة جنابج يعني وفواكاها زين مني امنع الشر و أكف الدم حضرتج يالمزيونه ما عاجبج الوضع تردين وضع ثاني ووجه ثاني ومعاملة الحيوانات مو بشر، شتردين بالضبط لن بالطيب ما ينفع وياج ومنين ما اجيج تهفين عليه بلسانج اليهلهل خير شر جاوبينيييي شتردين أنتِ 

ـ عوفنيييي ما اريد منك شيء بس اعتقني ايدي فصختها والله تأذيني يمااااا كمت ابجي ولواها وقربني عليه وكال 

ـ من جانوا يكفخون بيج وشابعينج دك نعل وكلام طالع نازل ويسبون جدج السابع عشر ساكته وبالعه لسانج وما الج حس ولا نفس بس من أشهاب حاشمج ومحترمج وجاي احاول اصلح الوضع ومتحمل الكلام والأذيه وبالع موس وساكت ما عاجبج اشهاب ولا اطباعه شنو يعجبج أنتِ تردين معامله بيها ذل واهانه هيج اريحلج مو. 

ـ نزلت دموعي ما جاوبته بس شفايفي يرجفون واحس كلبي يبجي دم مو بس عيوني اذاني بكلامه وبفعله نفض ايدي بقوة وعافني وطلع باوعت ايدي مكان اظافره تجري دم واحس الاورده تملخت داخل الجلد لزمت ايدي متوجعه ما جنت متوقعه منه يقسى عليه لهل الدرجه 

كرهته فوك كرهيي اله صار عدودي حقييررررررر

الله يأخذكم كلكم دمرتونييييييي سلبتوا حريتييييي حقراء انذال وسخييييييين كسرت الغرفه والكنتور ونثرت ملابسه كلبت الغرفه كلاب بقيت كاعده بصف الحايط وابجييييي دم بدال الدموع 

" بقيت كاعده وفاتحه عيوني ؏ وسعهن بعمري محد مد ايده عليه ما عدا الفترة الاخيرة تزاعلنا بيها اني وبابا ضربني وهذا الغريب بدال ما يرد اخوه اللي جافص عليه ويهيين بي يرجع عليه ويحاسبني هاي كل قوته يطلعها على مره ما عندي احد بظهري الظاهر اسند نفسي بنفسي وما اعتمد على الاحد وكلهم نفس الشيء واحد انكس من الثاني ما بيهم واحد شريف 

" انفتح الباب ودخل وقفله مزعوج وتخصر وضل صافن ؏ الغرفه 

أشهاب ـ ما هناك خلاص شمسويه بالغرفه 

نمارق ـ ما جاوبته تجاهلته مثل ما هو يتجاهلني 

ـ مو احاجيج 

            

              

                    

ـ بقيت ساكته ضل صافن ويتعثر بالملابس ويحير شيسوي بيهن رجع صفن عليه وجاوبني بقساوه 

ـ ما راح اكولج كومي رتبيهن لن عرفت طبعج نفس طبع المطايا المربوطه جنب الحلال اكوله هوش ينهض اجي بالطيب يزومل ويكوم يزاكط وأنتِ طبعج نفسه بالضبط جافص عليج وكايم 

ـ أحترم نفسك ولاتجاوز عليه ترة ساكته لن أنت رجال وأني مره 

ـ ما محترم منتظرج أنتِ تعلميني الأحترام والاصول منج نتعلم أبويه 

ـ واحد مستفزز وأناني 

ـ من زمان من الله خلقني زين هسه عرفتيني. 

ـ عرفت لابس وجه واقنعه خلف هالشخصيه العندك 

ـ وياج اتكبع بوجوه ماني راضي بيها لن الطيب بهل الوكت عدو لـ البشريه تصير كبحي كلها تقدرك وتهابك 

نمارق ـ ما جاوبته كام يرتب بملابسه ورتب الغرفه حتى الفراش رجعه لمكانه واخذ ملابسه وراح الحمام وبقينا ؏ هالحال أسبو؏ ما يحجي وياي متأخذ الصمت وحالتة غريبه عجيبه تعبتني شخصيته ما ينحزر شنو هو 

" اجت رحمه شالت الصينيه بعد ما راح هو والريوك باقي مثل ما هو، اني ما اكلت وهو اكل لكمه وحده وطلع بدون ما يحجي كمت وراها وكفت يم الباب وشفت حناش واكف بطريقها ويحجي عليها 

حناش ـ شعندج رايحه جايه تودين بهل الصياني شنو مشغلينج خدامه للخلفوهم وانعل شيب اهاليتهم وأنتِ رجلج اكسرها واخليج عرجه اذا شفتج تخدمينهم 

رحمه ـ خويه اني ما اخدمها اني من يومي اسوي هل الشيء لخوي شعليه منها 

ـ انجبي ورجلج ما تخطي خرابتهم يردون يتزقنبون يجون ياخذون وجع يوجعهم وبلغي الكل محد اله شغل بيها ولا حتى اشهاب يلة انكلعي 

نمارق ـ صوته جان عالي وطلع ابوهم ؏ صوته وكام يحجي عليه الظاهر ما يقبلون احد يوصل غرفتنا 

صكبان ـ شعندك من صباحية الله هارجنا هرج بصوتك 

حناش ـ ماكو شي بويه انه والبنات حلينا السالفه تريح انت لاتشغل بالك 

ـ حناش لاتخلي رأسك برأس اخواتك خلهن براحتهن ترة ما تشوف مني خير اذا ضايقت وحده من اخياتك عوفهن بحالهن يلة بويه رحمه امشي ؏ شغلج 

رحمه ـ تأمر بويه. 

نمارق ـ رجعت لغرفتي واخذت ملابس سبحت وغسلت ملابسي وشفت ملابسه معلكات بالحايط ضلن وراك ان شاء الله عفتهن وطلعت خليت ملابسي يم الباب كل عقلي رحمه تجي تاخذهن تنشرهن لن ما اندل وهما ما يخلون احد يفتر بالحوش ولا اعرف وين ينشرن ملابسهن بقيت كاعده وانتظر بيها وحل الظهر وهي ما بينت واجه هو شافني عبرني بدون سلام اخذ ملابسه ودخل يسبح وباوع لملابسي وما حجه شيء. 

            

              

                    

" السالفه مطوله وحناش حقه يمنع اخته من عندي كمت شلت ملابسي ومشيت ورى البيت ما اندل بيتهم عبالك سرب مال قطار الحلال بناءه وحد والدجاج والطيور هم بناءه لوحد دخت بزماني تالي عفت الملابس بصف الحوض وتمشيت ناحيتهم وصلت الطرمه وبقيت متردده ادخل واني واكفه طلعت وحده منهن تقربت سبحتني من ايدي بعصبيه 

سعاد ـ شمطلعج من خرابتج يمصخمه وشجايبج لهنا 

نمارق ـ اريد وحده ادليني وين انشر الملابس غسلت ملابسي وما اندل 

ـ اي بالعاده رحمه خادمتكم وحناش منعها وما جان تسألين زلمتج هو يدليج بلحكج عظم شكوو جايه للخرايب تردين تورثيين النار على الحطب مو تعرفينهم يثردون بدمج لو رأسج كوي 

ـ وين اسأله هو رجال شمدري 

ـ لا يدري يدري زلمتج كلشي يعرف مو مثل زلمنا ايدهم والتكفخ، امشي ادليج ووين ملابسج شو ايدج ويهف بيها الهوا 

ـ عفتهن يم الحوض هسه اجيبهن انتظريني 

ـ يلة روحي وفضيني مبين روحج طويله تخطي بساع هسه حناش يعيط ويندهني 

نمارق ـ رجعت لحوض وافر برأسي مو بيت قلعه الواحد يحير شلون يندل طريقه لكيتهن توني اريد اشيلهن سمعت صوته 

اشهاب ـ وين رايحه 

نمارق ـ وين قابل انشر ملابسي لن رحمه بعد متوصل النا حناش منعها خوما اضل انتظرها وملابسي يعفنن 

ـ خوش تندلين 

ـ اي اندليت وحده من نسوانكم تتنظرني مشيت وكال 

ـ دامج رايحه اخذي هدومي وياج اوكفي هسه اجي 

ـ راح ينام فضني عاد انوب احير بملابسك لا هاي العايزه اني روحي كوه مدبرتها اجه خلاهن وراح شلتهن ويه ملابسي ولكيتها معصبه اسفه تأخرت 

ـ يلة تمشي عاد 

ـ مشيت وراها وفتحت باب صغير حوش بي حبال هواي وكلمن وحبلها وملابسها لوحدها اشرلتي على الحبل 

ـ يلة كملي شغلج ورجعي وهاا لاتحاولين تنهزمين ورى البيت اكو جلاب ياكلن البشر وتلكاج صحراء جوله ما بيها جنس البشر خاف ابالج تشردين كلتلج علمود لاتورطين نفسج وتخبصين زلمنا وتاليج تشبعين تكفخ وترجعين لخرابتج 

ـ ماشي راحت ونشرتهن كلهن وضلن ملابسه صفنت عليه غاسلهن احسن من غسلي لملابسي هذا الظاهر متعلم من زمان يغسل ملابسه لوحده وليش عازلينه بغرفة لوحده 

كملت باوعت الحايط عالي حيل وكله عليه سيم استحكام ضليت صافنه على عيشتهم وافتر بالحوش وتالي رجعت الغرفه لكيته متمدد ونايم دخلت ورديت الباب وكال 

اشهاب ـ تغديتي 

نمارق ـ لا 

ـ اكعدي هسه اجيبلج 

            

              

                    

ـ مشه وكلت ميحتاج تجيبلي شكراً ما رد عليه وفعلاً راح تغدى واجه ما جايب شيء وياه واني جنت جوعانه بس جذبت عليه تمدد ويطوي بجسمه شكله تعبان كلش 

" مر وقت وهو غرك بالنوم واني جعت على العشه مال البارحه كمت فتحت الباب ؏ كيف وطلعت لخرايبهم هدوء مبين ناموا 

المشكله استحي شلون ادخل مديت رأسي المجمع فارغ بس نعالات كومه يم الباب دخلت بالختله ودخت ما اعرف المطبخ وين وانفتح باب كبالي طلعت بنيه صغيره لازمه بطنها شكلها متوجعه وكالت 

ايه ـ شجايبج لهنا طلعي لا ابوي يشوفج ويضل بس يصيح علينا وعليج 

سعاد ـ ايه ابوج دزج ؏ الماي نمتي يا يمه، نمارق شعندج اهنا ولج امشي طلعي لا احد يشوفج وتكب العيطه 

نمارق ـ رادت تطلعني وتأشر لبنتها تروح يم ابوها لايحس علينا عوفيني حبابه اجيت ادور على المطبخ وين ما اندل

سعاد ـ اوكفي هنا هسه خل ادز ايه على ابوها لايحس علينا والله ما يرحمني ولا يرحمج ايه يمه اخذي الماي لابوج وروحي وتخطي بساع واذا سألج عني كوليله راحت تجيب الملابس من الحبل يلة يمه 

أيه ـ ان شاءلله ادبرها تعرفين ابوي شيطان مو مثله وبعدين هاي شتريد جايه لهنا 

سعاد ـ شعليج أنتِ بيها شتريد يلة ولي عاد 

نمارق ـ دزت بنتها بيدها دولكه ماي واخذتني وين رايحيين 

سعاد ـ للمطبخ غير اكيد تت

                الفصل العاشر من هنا 

لمتابعة باقي الرواية زوروا قناتنا على التليجرام من هنا 

بدل ماتدور وتبحث علي الروايات خليها علي تليفونك وحمل تطبيقنا

تعديل المقال