رواية عذابي الأزلي الفصل التاسع 9 بقلم الزهيرية
لا شي يعود كالسابق
احفظ هذه الجملة جيداً
قبل أن تكسر شيئاً جميلاً
مينا/ اي شي يصير بالماضي يصير بي تاثير على حياتنه وخصوصاً من احنه اطفال من يصير شي ويانه نذكره ونبقى للموت نذكره بأدق تفاصيله واني طول الفتره ما قبل الزواج چنت خايفه ومرعوبه وليل ونهار الحادثه مال السحار تاكل وتشرب ويايه لهذا چنت ما متهيئه انه ازوج ودخول مصطفى بحياتي ما مستعده اله ابد وكل ما يقرب العرس احس گلبي راح يطلع من صدري والى ما آجى يوم العرس التوتر صار يقرأ الف والزاد التوتر عندي هو لكون فرح وجوانا بقن بصالون واني بقيت وحدي
يعني النفسيه زفت لهذا من دخلنه لسويت بالفندق واني ارجف لهذا مصطفى من باسني ويحچي ويايه بهمس بصراحه چنت أتقزز منه لهذا گبل طفرت منه وانهزمت بعيد وهو تعجب وترجيته يعوفني وما يتقرب مني
مصطفى/ شبيچ حبيبتي لا تخافين إذا تعبانه ما اتقرب منج نزعي البدلة وسبحي وتعالي تعشي وعادي حتى إذا ما دخلنه هاي الليله بعد گدامنه ايام وليالي هوايه
مينا / بصراحه اني من گلي هيچ عبالك چنت مسجونه واجاني إفراج گبل رحت على الجنطه وطلعت شامبو وغسول وملابس الي ورحت ركضت للحمام ونزعت البدلة خليتها على التعلاگه وفتحت التسريحة وسبحت وغسلت وجهي بالغسول هواية إلى ما راح المكياج چنت احسه طابوگه على وجهي وبدلت تراكسود وطلعت
ومصطفى من شافني مات من الضحك ظليت صافنه عليه شبي يضحك
مصطفى/ حبيبتي ويا اي فريق راح تلعبين گتلچ الدخله مو هاي الليلة بس مو معناها ما تلبسين ملابس نوم وتلبسين تراكسود
مينا/ الله يخليك خليني لابسه تراكسود هيج مرتاحة
مصطفى/ براحتج حبيبتي لكن سامح بس هاي الليله اما من باچر اريد دائماً من احنه وحدنه كله تلبسين ملابس شفافه يعني بين قوسين ملابس نوم
مينا/ اني ظليت ساكته ما جاوبته وهو اخذ ملابسه وراح ودخل للحمام وبقيت انتظر هسه يطلع وبعد شويه يطلع ماكو المي اسمعه مفتوح بس ماكو ما طلع بعدها گد ما تعبت من الانتظار نمت وما حسيت غير على صوت
مصطفى/ حبيبتي نمتي گومي تعشي شنو تنامين من غير عشى
رفعت راسي اباوع عليه توه طالع من الحمام تعجبت وسألته / ليش هلگد تأخرت بالحمام گد ما انتظرتك نمت
مصطفى/ حبيبتي اني بشر مو جماد دخلت للحمام افضل ما اغتصبچ
مينا / ما فهمت شنو تقصد
مصطفى/ مو مهم تفهمين بس تدرين مينا اني احسد ميمو هسه ميمو زلمه حوك دخل بجوانا واني هنا بعدني يم المدرب حكيم شاكر
مينا/ أني التزمت الصمت كالعادة لان ما فهمت شنو يقصد و بعد حدود 10 دقائق اندگت الباب وراح هو فتحها وآخذ الاكل منهم ورجع خله الاكل وصاحني على العشا وبصراحه چنت جوعانه بس استحي اكل وهو عبالك قرأ افكاري لان جرني من ايدي وگعدني يمه واستحيت آكل وهو كل شويه يخلي كباب بحلگي ويگلي
مصطفى/ حبيبتي اي وحدة تگلچ اضعفي دخلي الكلمه من اذن اليمين وطلعيها من اذن اليسار اني احبچ سمينه واذا تسمنين بعد اكثر تكونين احلى
وهو يشوفني ساكته رجع كمل كلامه
مصطفى/ حبيبتي ترى أجلت الدخله مو أجلت الكلام ليش ذابتها على الصامت احچي
مينا/ما عندي شي اگوله لهذا بس أسمعك
مصطفى/ اني مقدر انه اول ليله الچ وانتي بعدچ مستحيه مني بس متاكد بالأيام الجاية راح تتغيرين
مينا بقينه ذاك الليل كل ما اغفي يگعدني مصطفى ويگلي حكيم شاكر گوم درب التشكيلة مال اللاعبين
ولما نام مصطفى يله گدرت انام وما حسينه غير على دگ الباب گام مصطفى فتحها دخلت عمتي امه لمصطفى اقتحام وبيدها صينيه أنطت الصينيه لمصطفى وهي تهلهل وتهوس بعبايتهاوتگول / اليوم نيشانها بيدينه
واني گمت وهي ظلت تباوع عليه وتگول / بشر مصطفى سبع ضبع
مصطفى/ روحي مينا غسلي وتعالي تريگي ورانه بعد طريق لشمال
واني هم رحت للحمام واسمع مصطفى يگللها / نمت يمه ما حسيت غير هسه من دگيتي الباب گد ما جنت تعبان
ام مصطفى/ ولك انت اغبر هسه وكت نوم هسه تگول لانوار وهذيج نويره دگلنه طبل على ابنچ مو رجال
مصطفى/ يمه شنو القضيه من اول يوم اشهر بينه اليوم ان شاءالله من نوصل لاربيل نكمل دخلتنه هناك
وطبعاً هي ما سكتت ظلت تحچي على مصطفى وحتى گعدت ويانه على الريوگ وتاكل وتحچي اكلت گلب مصطفى ومن خلصنه الريوگ اخذت البدلة مالتي واگول هسه شيخلصني من نويره
واحنه بعدها بدلنه واخذنه جنطنه وتوجهنه لشركة سفر وسياحة ولما انجمع الگروب إلى ساعة 3 العصر يله انطلقت بينه السيارة لدهوك والوقت بين بغداد واربيل للمشي المستمر 5ساعات ونص تقريباً بس ويه السيطرات والتدقيق على الگروب كله دخلنه للفندق ساعة 10 ونص بالليل ومن وصلنه تعبانين اثنينه من گعدت السياره وبس سبحنه نمنه وما گعدنه غير على ثاني يوم حدود 10 الصبح
وبصراحه مصطفى انسان بغاية الرقة والأدب ودائماً كلامه ويايه يشاقى ويضحك ونطلع نتونس والشمال يجنن واكون صريحه اني ابد ما شايفه مناطق سياحيه ولا اكو احد يهتم بيه مثل ما مهتم بيه مصطفى بقت بس الدخله وهو طول الايام كل ما يتقرب مني اتوسل بي يعوفني ومر على زواجنه اسبوع وبعد يومين ونرجع
وهم كرر محاولة يتقرب مني وهم صديته وگمت أبتعدت منه وگفت بعيد عنه بس هنا چانت اله ردت فعل غير متوقعه وهي اتقرب جرني قوي وقيدني بيده قوي
وسحبني واني شگد سمينه وزني ثگيل بس هو اقوى مني حسيت نفسي ريشه بيده
وصلني لسرير دفعني وصار فوگايه ومخلي حلگه يم اذني
مصطفى/ اگلچ هاي مال مستحيه وخايفه فلم ما يعبر عليه خاف معيوبه وتكربستي براسي
مينا/ وصار ويايه نفس الموقف بالضبط مال السحار وهو نايمه على بطني من السحار نزعني وهسه هم نايمه على بطني ومصطفى ينزع بيه گبل رجعلي الخوف من صار حادث السحار وگمت اعيط بعلو صوتي وهو خله ايده على حلگي يريد يسكتني أنوب احس ايده تخنگ بيه وهو نزعني اكثر ملابسي بيد وحده والثانيه على حلگي وبعد ايده عن حلگي حتى يغير وضعية نومتي يريد ينيمني على ظهري
مينا / الله يخليك مصطفى بس عوفني والله واحچيلك كل شي
وهو تفاجأ بس بعدها عافني وگعد على الجهة الثانية من السرير وبقى يباوع عليه واني گمت عدلت نفسي وتغطيت ودموعي صب
مصطفى/ شنو تردين تحچين احچي خلي افهم قبل ما أحلف عليج بس ارجع لبغداد گبل اخذچ لأهلچ واطلگچ
مينا/ مصطفى انت حقك بكل شي تفكر بي بس ربي يشهد عليه كل الصار ما الي ذنب بي وچنت صغيره
اتقرب عليه مصطفى ونظرات الشك بعيونه ولزم فكي قوي وگال
مصطفى/ هو شنو جنتي صغيره فهميني لا وحق ربچ يصير الما يخطر على بالج
مينا/ وحچيت كل شي صار ويايه ويه تقى اختي الله يرحمها بأدق تفاصيله وحتى طلبت منه يتأكد من كل الكلام السمعه مني وهو ظل صافن بوجهي
ريان/ حبنه لشريك حياتنه تعمي عيونه عن كل عيوبه وحتى الأشخاص المحيطين بيك يشوفون عيوب شريك حياتك ويحذروك بس تبقى انت تغمض عيونك عن عيوبه حتى تبقى ويا واني من شدة حبي لملاذ اكو هواي اشياء ما دققت بيها ابد ويه ملاذ وفي ليلة عرسنه
وبعد ما صار نزيف عند ملاذ في وقتها امها اتصلت عليها ما ردت ابد ومن سافرنه واحنه بعدنه بالطيارة سالت ملاذ على اخوانها
ملاذ / اخواني يطلعون محافظات يشتغلون لان حالتنه الماديه ما تسمح وهمه بالأصل ابويه ما گاللهم لان من يعرفون ما يقبلون وحتى بنفس الوقت عمامي ما يعرفون انه ازوجت لان ابن عمي رايدني وناهي عليه
ريان / همزين حبيبتي ازوجنه چان هسه انتي مزوجه ابن عمچ وأني ميت بحسرتي عليج
بس هي مبين عليها التعب مال الليل والنزف مخلي وجهه اصفر وصلنه وبس خلت راسها على كتفي نامت وصلنه للمطار يله گعدتها ونزلنه وبعد ما دققوا جوازاتنه رحنه للفندق ومن دخلنه لسويت هي بسرعه اخذت ملابس وبدلت گدامي وراحت على السرير تريد بس تنام
اجيت بدلت ملابسي واجيت نمت يمها وبديت ابوس بيها وحضنتها جاوبت بصوت اقرب لنايمه
ملاذ / عوفني ريان الدكتوره منعتني من العلاقه الزوجيه اسبوعين
ريان / صدگ تخبلت يمعوده اسبوعين شنو رحمه للكائنات هاي نرجع لبغداد واحنه ما تونسنه بشهر العسل
گامت على حيلها ملاذ بس بصوت اشبه بالصياح
ملاذ / ريان ترى الصار بيه من وراك انت هامتك النومه بالفراش وغريزتك ومو مهم الجرح الصار بيه من دخلت بيه
ريان / حسيت بالغلط لان خطيه صدگ الصار مو شويه حضنتها وظليت ابوس بيها واعتذر منها يله شويه هدئت ورجعت نامت واني ظليت اگلب بالموبايل وانتبهت ولا واحد من اهلي اتصل يسأل عني وظليت متردد بس بعدها حسمت امري واتصلت
ببدور / هلو ريان
ريان / شلونچ بدور امي شلونها كمال ونور و جنى ان شاءالله بخير
بدور / احنه كلنه بخير بس امي من البارحة صعد عدها الضغط وكمال وجاب الها علاج ومغذي وهسه حمد لله احسن
ريان / من شنو هيج صار بيها
بدور / ريان انت تغشم نفسك يعني هين عليها انت تزوج وماكو كل احد وياك لو البنيه ما نعرف هي منو ما منو
ريان / ترى بدور انتوا مكبرين الموضوع اني تزوجتها بعلم اهلها وما مسوي شي حرام بنيه حبيتها وتزوجتها على سنة الله ورسوله
بدور /انت بعد حر ريان اذا اشوف نفسك ما غلطان بعد بكيفك
وغلقت الخط ويايه بدور واني منا ملاذ مريضة ومنا امي شنو هذا الزواج المنحوس وبقينه بأربيل مدة عشرة ايام وچنت خلالها اتصل على بدور اطمئن على آمي واني ملاذ گضيناها نطلع ونتونس بالمناظر الطبيعية وهي دائماً على اتصال بأمها وآبوها وخلص ايام العسل واجى دور انه آرجع لبغداد
ومن مطار اربيل الى مطار بغداد ومن المطار الى بيتنه ومن نزلت من التكسي وهي نزلت ونزلنه الجنط وبس فتحت الباب صارت امي گدامي بالگراج دى تغسله وردت اروح عليها وبيدي جريت ملاذ ويايه حتى بس نسلم عليها هي كأنه حزرت تصرفي گبل دخلت للمطبخ وسدت الباب بوجهنه
وهنا ملاذ تخبلت على شنو هاي سدت الباب بوجهنه والسلام لله وإياك وبالك تجبرني على واحد منهم هذا كله واحنه واكفين بالگراج بس ظهرنه للباب من سمعنه صوت گال بنتر
كمال / بلعي لسانچ احسلنچ فهمتي ويا غريب كون أديب وهنا ماكو واحد يعلى صوته غير بس امي فهمتي وهذا البيت لامي وعندي استعداد هسه اطلعچ انتي ورجلچ ما آدري انتي الرجال بالشارع فهمتي يله على السريع اختفي من گدام وجهي
ريان / هنا صرت بموقف لا احسد عليه جريتها ومن الدرج مالتنه بالحديقة وصعدتها وبس دخلنه للمشتمل مالتنه گبل دفعتها قوي وگتلها / اگلچ انتي شنو هاي القباحة العندچ تحچين على اهلي گدامي شوفي اگلچ ملاذ انتي تعرفين اهلي ما يردوچ شنو بعد تفاجأتي مسويه روحچ
ملاذ / انوب هو الزعلان ما شفت اخوك شلون حچى عليه ما عرفت ترده
ريان / شوفي ملاذ عبالچ بيوم اوگف بوجهه اخويه علمود أدافع عنچ تحلمين وهذا الوضع يعجبچ اهلاً وسهلا ما يعجبچ گليلي حتى اوصلچ لأهلچ وكلمن يگعد بمكانه
وعفتها وبدلت ملابسي ولبست برموده وفانيله وچانوا العمال مخلصين وباقي المخلفات مال البناء وبديت ألم بيهن وشكو من مواد البناء الباقي نزلته جوه ذبيته بالباب ورجعت اخذت الصونده مال اهلي فوگ وشغلت الماطور من جوه وبديت اغسل المطبخ والسطح والصحيات والدرج وهي نظفت جوه غرفتنه وغرفة الجلوس الچانت سابقاً مخزن وبعد بس بقى اجهز المطبخ وأجهز شنو نحتاج بالصحيات من غسالة وغسول
وكملت نزلت الصونده ومن دى اصعد شفت كمال شغل سيارته وطلعت امي ويا بالسياره ولكون ما يحچون ويايه ينعصر گلبي عليهم وصعدت اول ما دخلت اجتي عليه ملاذ وخلت ايدها على صدري
ملاذ / سامحني حبيبي والله ما چان قصدي بس انقهرت يا ريت والدتك تعاملني مثل بنتها والله كل شي ما اريد
ريان / ملاذ اصبري مو من اول يوم ترديهم يتقبلوچ طبيعي
وبعدها ظلت تتعذر مني وعدتني انه راح تصبر عليهم ولليل وصيت على عشا من بره وچان عبرت 10ايام ورجعت تقربت من ملاذ وهم نفس الوضع ينزل عليها دم
ريان / ملاذ راجعي دكتورة مو زين ترى هاي ثاني مره اتقرب عليچ المفروض ما ينزل دم
ملاذ / حبيبي غير بعدني جديدة على هذا الوضع وسالت امي تگول لا تخلين الدكتورات يلعبن بيچ هاي بعده رحمج ما متعود على العلاقة الجنسيه وانت الأسبوعين ما كملن واتقربت عليه
ريان / بعد بكيفچ حبيبتي بس اني من خوفي عليچ لا أكثر اريدچ تراجعين دكتوره
والى ساعة متاخرة من الليل ظلينه گاعدين بس ملاذ من اكون وياها آنسى الدنيا كلها وللفجر يله نمت وگعدت ساعه 7 إلا ربع وسبحت وبدلت واخذت سيارتي ورحت لشغلي ومن دخلت لگيت ولد شاب جديد وفلاح منقول وباقي موسى ومن شافوني الولد الجديد اسمه احمد وموسى باركلي وبوسني وأحمد ويا على الواهس هم باركلي وبوقتها موسى طلع على قضيه يرفع بصمات
اما احمد شكله يوحي بالراحه وهو من النوع الفطن كلش لان فاجئني من گال
احمد / شبي العريس شو ما مرتاح
ريان رفعت حاجبي وجاوبته / شلون عرفت
احمد/ اول ما دخلت وشفتك عرفت حتى بدون ما تحچي في حين انت عريس المفروض تجي وجهك يشع راحة
ريان / بصراحه احمد اني من شفتك ارتاحيت شكلك يوحي بالراحة واني اريد أسرك سر ويا ريت يبقى بيني وبينك
احمد/ عيوني تدلل وربي يشهد عليه اي كلمه تأمني عليها ما تطلع مني لو على گص رگبتي وعد رجال
ريان / احمد راح اعتبرك مثل اخويه كمال واحچيلك كل شي وما خليت شي بگلبي كله حچيته
آحمد/ شوف اني ما آريد أخوفك او أقلقك بس السالفه عجيبه غريبه يعني البنيه واهلها يعرفون انه اهلك ما يريدون بنتهم شلون ينطوك بنتهم لان احنه بالعراق عامة اهل البنيه يحبون الكشخه لازم من تجي تخطب اجيب العشيرة كلها بحيث الفرع مالتهم ينسد من الطول لطول زلم وهاي يعتبرون انه جايبين الناس كلها حتى ابوها يوافق أما بموضوعك العجيب انه رحت بس انت وانطوها الك والله البايره هم تطلب يجون خطابه وياك
ريان/ هي تحبني وأني احبها وسوينه المستحيل حتى نصير لبعضنه
احمد / حبيبي اعرف كل كلام الحبچيات ولو كفيلك الله اني ابد ما حبيت نهائياً وامي زوجتني بنت خالتي بس اكو شي غلط بالموضوع
ريان / بشنو تنصحني احمد
آحمد/ اول نصيحة الك انه ما تعوف اهلك وحاول الف مرة حتى صالحهم حتى زوجتك لا شوفك وحدك وتصتصغرك اخذها مني المره تنظر بعين الصغيره لرجال من يكون وحده بس من بظهره اهله ما تگدر تفك حلگها وتحسب الف حساب اله
ريان / والله احمد حاولت بكل الطرق بس ما يقبلون واخويه كمال تبرأ مني من زوجتها
احمد / هذا كله خلي وره ظهرك وأبدي من جديد وركز على والدتك وصدگ الام گلبها ما يتحمل واحد من اولادها يبتعد عنها واما النصيحة الثانية وهي وظل استجوب زوجتك عن اهلها وأقاربها لازم تعرف كل شي عنها قبل زواجها گرايبها ماضيهم شنو البنيه بعد فتره صير أم اطفالك وصدگ العرج نداس يندس لسابع جد واذا تريد ابن خالتي ضابط تحقيق وهو اخو زوجتي تريد تنطي المعلومات التعرفهن وهو يطلعلك كافة المعلومات عنها
لمتابعة باقي الرواية زوروا قناتنا على التليجرام من هنا
بدل ماتدور وتبحث علي الروايات خليها علي تليفونك وحمل تطبيقنا
