رواية كشف المستور الفصل الثامن 8 بقلم جمانه السعيدي
ابو هبه شصار شكو
دخلت وشمرت الجنطه بلكاع وكعدت وكمت اصرخ واطلم
واصيح اي هبه
هبه الي ماترضى الدنيا تفك منها ياخه
هبه الي كل يوم تموت موته
هذا مو بشر هذا حيوان لاولله حاش الحيوان احسن منه الف مره
بابا انت ماتريدني كول احجي هاي جنطتي واطلع وبعد ماتشوف وجهي ابد
بس لاتضل كلساع تبعيني الحيوان يدمرني
كتلك ما اريد زواج
اريد اعيش وحدي تعرف شنو وحدي
شنو اذا ما ازوجت نهاية العالم منو كال الي ماتتزوج تموت
يوميه مصيبه ويوميه خيبة امل
ويوميه الدنيا مكفختني
معقوله كل الزلم حقراء معقوله ماكو واحد شهم
ماكو واحد مثلك بابا
الاول دمر امي علمود غريزته وثنينهم تخلو عني
والثاني طلكني بدون ذنب وشمرني
وهسه اجا هذا الثالث كمل المسلسل خاف جان عايز حلقه
اخيره من الخسه والنذاله
جمانه السعيدي
ابو هبه اهدي بابا ومايصير خاطرج اله طيب امشي ادخلي جوه ونعلي الشيطان كل مشكله والها حل انشاء الله
هبه ما ادخل اله تحلف بعد شغلت الزواج تشيله من راسك
اني اريد اعيش وحدي تعرف شنو وحدي
واله ولله قسما انتحر واخلص واخلصك مني
ابو هبه...لاحبيبتي الي تريدي يصير وبعد ما ادخل بحياتج ابد بس كلليلي اشصار
سكتت ماهان عليه احجي الصار خفت بابا يضوج
هبه طلعنا مخدوعين بي وهمزين الله كشفه على حقيقته
لو ماخذني ومسافر ابد ما اسامحك بابا
هذا موبشر شيطان الله نقذني منه لو رايحه بديرة الغربه شسوي بروحي
دخلت جوه بدلت ونمت كعدت الضهر على صوت حجي وصياح بلاستقبال اثاري الشفيه جاي وراي
اسمع بابا يكول بعد مالك كل مره يمنا كلشي صرفته رجع الك ومثل مادخلنا بلمعروف نطلع بلمعروف
حاول كم مره واعتذر ورجع ودا ناس بس اني قررت ماارجع ابد
شهر كامل وهو يعتذر ويدز ناس
ويكول مااعرف شنو صار بينا كنت سكران وابد مو بوعيي
شكد حاول يرجعني بس ابد ماقبلت
اصلا ماطلعت اله ولاشافني ولاشفته
واخيرا اطلكت وخلصت منه
بطلاكي الاول نهاريت ونصدمت بس طلاكي الثاني اعتبرته انتصار اليه وحمدت ربي وشكرته اني اكتشفت شنو معدنه قبل لا اسافر ويا
جمانه السعيدي
قررت من يوم اطلكت اكون انسانه ثانيه قويه محد ياخذ
اي قرار يخصني غيري
موضوع الزواج اشيله من قاموس حياتي
اريد اصنع ذاتي اكون قويه احدد اهدافي بلحياة واصنعها
واحارب الدنيا واصير شي مهم
شديت حيلي واقرا ليل نهار كل سنه متفوقه ماعندي صديقات هواي صديقه وحدا وعلاقتي بيها سطحيه كلش
صديقي الاول والاخير بابا اكعد ويا واحجيله كلشي بيومي
وصلت للسادس وموتت روحي بلقرايه وبابا خطيه يطبخ ويخلي كدامي ويجيب حلويات ويكوم
اسمعه بلصلا شلون يدعلي وتجيني راحه نفسيه عجيبه
كلش يهتم بيه ومداريني
امتحنت وكملت ورحنا للزياره اني وبابا يومين بكربلا
ويومين بلنجف ويومين بلكاظم
شكد دعيت الله ايسر اموري ويسهل حياتي ويبعد عني ولد الحرام
جمانه السعيدي
طلعت النتائج ونقبلت قانون جامعة بغداد
اهنا لازم اكون قويه اكثر لان الجامعه مختلطه وما اريد اي خرابيط وعلاقات تخرب حياتي
اشتريت ملابس جديده وتحضرت
تدرون شنو اكتشفت
الانسان يزيد جماله كلما اتزيد ثقته بنفسه
يشوف نفسه احلى واحد بلعالم
داومت وشديت حيلي وما اختلط هواي لا بلبنات ولا بلولد
عندي صديقه وحده
جانو يسموني المعقده
اني ما اعتبر نفسي معقده يعني لو اشاقه وتمضحك واسولف ويه الرايح والجاي اصير مو معقده
واذا احترمت نفسي وعرفت حدودي اصير معقده
خلي يكولون عليه اي شي مايهمني المهم اني ما اسوي شي غلط واتندم علي كافي الي مريت بي
حاول كم واحد يصارحني واني ارفض واكو مجموعه شباب تراهنو عليه الي الي يكدر يصارحني ويكون حبيبي
بس ولله عجزو ما انطي مجال ابد
جمانه السعيدي
كملن اربع سنوات وتخرجت بس ولله صرت انسانه ثانيه
قويه كلش وما اخاف ابد
ولا اسمح الاي احد ياذيني ولابكلمه وحده
طلعت هويه المحاميه وبديت اداوم بلمحكمه
خوب المحمكه عالم ثاني يعني انتي يوميه تشوفين المجرم
والقاضي والمحامي
من غير الناس العاديه وكل واحد مشكلته شكل
احنا اربع محاميات اثنيين قديمات واحنا ثنيين جدد
اني اشتغلت ويه محامي جبير تقريبا عمرا ٦٥ كله يصيحلي بابا صدك انسان محترم بشكل
جمانه السعيدي
هذا ما يمنع بعض المحامين يحاولون يتحرشون بس اني ما انطي مجال ابد
عكس المحاميه الثانيه الجديده مخلصته ضحك وشقه ويه الكل
واكو محامي ويانه تقريبا عمرا ٤٠ سنه اسمه ياسر هذا كارثه بلشقه والضحك يصيحلي ست الكل
ومرات يحرجني كدامهم ويكول ( ماتزوجني خايبه شمالج)
ولله اني خوش ولد وادللج دلال
المهم حيل التزمت بعملي وتعجب ابو مصطفى مني ( المحامي الي ادرب جوه ايده)
وبد يسلمني قضايه وحدي وخاصة القضايه النسويه بشكل خاص
بديت احصل فلوس وطلبت من بابا يترك العمل لان خطيه تعب حيل وكام يلبس نضاره
نضره ضعف حيل
بس هو ما قبل ايكول اشتغل مو علمود الفلوس
اطلع شويه من البيت واشوف اصدقائي واتونس
اضوج ابقا كاعد بلبيت وحدي
وكدرت اشتري سياره بلقسط وتعلمت سياقه
كنت كل يوم ااكد النفسي اني اكدر اعيش بدون رجال
ولحياة مو رجال وبس
مر سنه على دوامي بلمحكمه وصرت معروفه كلش وتجيني قضايه هواي وكدرت اثبت نجاحي
الا ان اجا اليوم الي رب العالمين رجعلي اعتباري
وكال انتي صبرتي
خل اشوفج حوبتج شسوت بلناس الي ضلمتج
صدك الدنيا دواره وكما تدين تدان
شكرا التفاعلكم الجميل
عفت البيت اسبوع رجعت لكيت كلشي مخربط
مجاي الحك اعذروني اذا اتاخرت عليكم
