رواية سمرة الفصل الثامن 8 بقلم وسام الفراجي
سديت حلكي وكلت ما احجي شي الا هو يحجي بعناده ..
بعدين سألني كلي فهميني القصة بإختصار اكو شي مجاي افهمه بي نقص ..
حجيتله المختصر بالكامل حدما وصلنا المحكمة وكف السيارة ونزل خالد من السيارة
رفعت راسي اشوف المحكمة كبل ما انزل
لكيت عباس واكف ورى ايناس وشافنه سوة بس اني منقبة فمو متأكد اني سهام المنقبة ..
تحرك علينه ولزمته ايناس ..
دفع ايد ايناس يكلها وخري وحجه وياها مدري شنو
اجه وعيونه بكصته ..
خالد تحرك شوي شوي حدما وصل باب السيارة من الجهة الي كاعدة بيها ..
صرت اني بظهره ..
وعباس تمشه لعنده .. وكف خالد كدامه وهو ديحاول يبعد عن خالد ويفتح باب السيارة ويشوف وين سهام هاي المنقبة لو غيرها ..
بصراحة اني بوكتها أيست كلت عباس راح يسحل بيه المحكمة بس ظليت هادئة ماسويت ردة فعل لان منقبة وكلت ميكدر يمد ايده الا يتأكد اني منو ..
راد يفتح الباب ..
مد خالد ايده ع ايد عباس وكله شتريد ؟
ـ اختي هنا
ـ لو اختك تعتبرها متخلي مرتك تشيخ عليها وتزوجها حودي بس لأن اخوها لمرتك !
ـ مشاكل عائلية انتَ ما خصك بيها
ـ خصني ونص اصلا من شفتك واكف ورى مرتك عرفتك تمشي ورا كلام النسوان وغسلت ايدي بتيزاب منك
ـ مرتي لتجيب طاريها تسواك وتسوه اخواتي كلهن والعيلة شلع شمستفاد من عيلتي
ـ هههه مايفيد الحجي جان حجيت ..
ـ احجي احجي اطربني
ـ روح مرتك تصيحك لا تنكتل
ـ تستهزأ ؟
ـ عباس اختك مبيوعة بيع لحودي والمفروض منك انتَ توكف هالنصيب هذا وتوكف ويا اختك مو تخلي الغربة توكفلها
ـ اختي هي رايدته و قبلانة بي وكالت لمرتي شي احسن من شي .. اتزوج حودي احسن ما اعنس ومحد يكلبني
ـ هههههه و انتَ مصدك هالحجي ؟ اكلك عود ديربالك ع مرتك لا يشيلوها
ـ منو يكدر يشيلها ؟
ـ الصبح شفتهم جاي يسوون حملة ع الحياية وخاف يلاكوها
.. اني من كال يشيلوها صفنت كلت شبي خالد وهو مايضحك كلامه كله جدي وحقيقي بس من كمل سالفة الحياية رغم الوضع الي بي والخوف متت ضحك بكلبي ..
باوعلي خالد كلي ارفعي الجامة مالت الباب ..
ما رفعتها .. فتحت الباب ونزلت ورفعت النقاب ..
باوعلي عباس وكلي
ـ لازم مكيفة ع العيشة ببيت عمي رباح ومربينج خوش تربية بحيث كبل نقاب ..
ـ غير اشوف متبرين مني ومو معتبريني بنتكم ..
ـ سمرة بس اكلج سالفة من تطلكين منو ياخذج بعد ؟ هو انتِ جنت بكر ومحد يكلبج ولو بيج خير مانطوج لحودي
ـ اعتقد هاي الحياة تخصني واني اقرر بيها الي اريده ولو ابوية بعده بحيلة ماصار كل هالشي بس ابوية صار ميكدر يسولف ويتحرك وطلعت حقيقتكم اتجاهي ..
ـ انزعي نقابج وتعالي وياي للبيت و خلي نعيد العرس
ـ هاي كل قوتك ؟ والله عيب حتى اكول عندي اخ لأنك بس تريد ترضي مرتك حتلو ع حساب حياة اختك ..
لزمني من نقابي وسحبه ونزعه وراد يخنكني ضربني ع وجهي ووحدة من ضرباته ع عيني بحيث شوشت عيني ما شوف بيها ..
خالد ركض ودفع عباس صار صياح والامن الي بباب المحكمة اجوا اخذوهم وحاجزوهم ..
ولزمت النقاب حطيته ع راسي ورجعت صعدت بالسيارة بس شنو عيني احسها طفت ماشوف بيها ..
نص ساعة واجت ام حودي ولازمة بيدها حودي وشايل بيده بطل شربت اكياس ويباوعله خطية
هذا الانسان الفقير الي ميعرف شصاير وشنو جاي يسووله اهله وهو انسان طيب اطيب خلق الله بس بعد امه واخته هيج عقلياتهم ..
باوعت عليه بالبداية ماعرفتني بس وصلت ايناس واشرت عليه والظاهر كالت الها هاي سمرة المنقبة ..
اجت تمشي تكول #بطريق يمشي وخطية ساحلة هالولد وياها الفقير الي كلشي ميعرف شنو جاي يصير ..
كلتلي الفلوس الي حصلتها تعويض تسوة راسج و راس الخلفوج
كلت الها ادفع روحي وما اصير جنة ببيتج
بهاللحظة اجه خالد من عند الامن الظاهر حجوا وياهم ومنعوهم هيج تصرفات تصير بباب المحكمة
ومن شاف ام حودي يمي اسرع بالمشي وكلي ها خالة اكو شي ..
كالت لا سلمت عليه
ـ يلا خالة خلي يشمر يمين الطلاك والشهود موجودة ومشوا هالامر بسرعة وفلوسكم يم ابوية كاملة تعويض عن كلشي
ـ ام حودي : اني ما اعرف الاجراءات الي تسووها حتى يثبت الطلاك وليش جايين بالمحكمة
ـ ميحتاج تعرفين شغلهم لمي عائلة سهومة وانت وخلي الجميع يسمع الطلاك ويصير شاهد على الطلاك
ـ منو سهومة ؟
ـ هاي سهومة "أشر عليه"
باوعتلي و سوت بحلكها حركة هيج وهيج معاجبها يعني
ـ ايييي الله يديييمكم لعد وينه عمج الي خايف عليج بحيث مطلعج من المستشفى ومحد يدري بيج صاير سبايدرمان
ـ خالد : تكدرين تحترمين نفسج انتِ ما ظال بيج بس نص جتف يعني اذا اعلي صوتي عليج تموتين وابتلي بيج ويحسبونج عليه بنت اربعطعش
.. ام حودي صاحت ايناس وايناس صاحب عباس وعباس اجه والتموا ..
وكعدوا يعلمون حودي يكول #طالك !
يعلمون بي يكول طالك طالك طالك وهذا مو يم الموضوع ميقبل يفتح حلكه ..
هو خطية ارتبك الشلة كلها فوكاه وميعرف شنو القصة ومستحي منه ..
حاولت امه وياه ..
يا ابني كول طالك و اشر ع هاي البنية .. هو يضحك ومو يم الموضوع ..
انحرك كلبي شلون هيج براءة تدخلوه بهيج قصة ما صايرة ولا دايرة بس حظي الفكر الي خله هيج قصة تصير بية اني غير عن كل بنات العراق ..
ايناس كالت لامها شو ابعدي شوي اني اخلي يطلك ..
و رادت منه الما بزعت وهو يضحك ويحجي مدري شنو ويشرب شربت ..
ونوبات يريد يمشي مايظل واكف بمكانه ..
اخير شي خالد كاللهم شو ابعدوا انطوني مجال ..
ظلت ايناس كاعدة كلها
خالد: شو ابعد شوي من رخصتك
ايناس : احجي وياي بصيغة بنت اني بنت
خالد : ها توهمت عبالي زلمة يلا المهم ابعدي
ايناس : لا بله عبالك ولد ششايفني شاربي شطوله
خالد : لا والله شايف مرة تحجي ولسانها متر وزلمتها ساكت يرجف
عباس : شنو قصدك ؟
خالد : لا سلامتك ظل نايم انتَ ولا تزعج نفسك
شاور دوحي .. وابعد راسه وبعدين شاوره ..
وصار يضحك دوحي ويباوع لخالد .. وخالد يشاوره
الكل مستغرب شنو جاي يسوي حتى اني صار عندي فضول شنو يكله..
دوحي ضحك وكاللي طالك بس لسانه شوي ثكيل ..
خالد : سمعتوه كلكم ؟
ايناس : ماسمعت اني
خالد : اذانج السالفة الزينة ماتسمعها الا الي بيها هجام بيوت
ايناس : اعتقد تجاوزت حدودك هواي
خالد : مشغول هسة بدوحي ماعندي وكت اردلك ..
و رجع شاوره انوب وهو يضحكله ..
وكال طالك .. والكل سمع ..
صار النا الدور بالمحكمة وراح خالد والعيلة كلها ودوحي كلهم كملوا اجراءات الطلاك كلها وجانت سهلة وسريعة لان بالاصل طلك قبل مانطب المحكمة وتنازلت عن حقوقي كلهن ..
كملنا كلشي .. و طلعت على سيارة خالد حتى اروح وياه ..
صاحني عباس : وين وييين ؟ ماعندج اهل تباتين ببيوت العالم!
ـ والله عندي اهل بس مو معترفين بية ويهددوني اذا اجي يخلصون ع حياتي
ـ عباس : محد يهددج هسة اني موجود ماخلي احد يمسج بشي
خالد : مفتاح التبن ما عندك حتى تكدر ع اهلك
عباس : ما تشوف نفسك لحيت هواي ياخي اختي وحر بيها ماعليك انتَ
خالد : سهومة تريدين تروحين او تظلين وياي اني ما اجبرج ع شي ..
ـ ايناس : شلنا بيها ناقصنا ظيم عوفها خلصانين منها صار كم يوم
خالد : اسمع مرتك من تكدرلها عود صير زلمة وتعال اخذ اختك .. امشي سهومة اصعدي بالسيارة ابوي هسة ينتظرنا ..
عباس : سممممرة كتلج امشي وياي محد يمسج بشي اسمعي كلام اخوج
ايناس : لو اني لو هي بالبيت
خالد : هه يلا صير زلمة وكول لسهومة تعالي بالبيت هسة
عباس : انتَ ماعليك عقلكم صغير تحسبون الي يسمع كلام مرته بلا شخصية تحسبونهن عبيد تأمروهن وينفذن
خالد : اذا مرتك كالتلك ماريد امك تسمع كلامها !
عباس : ياخي ليش تلح اختي واريد اخذها
خالد : اخذها اذا كالت اروح وياك
عباس : ها سمرة تروحين وياي ؟
ـ ما ادري حيرتوني بزماني صرت ما اعرف شسوي مع ذلك مرتك ماتحبني وماتريدني وهسة كدامك سمعت سوالفها و امي ما تطيقني لذلك اختار اروح لبيت عمو رباح
عباس : هههه كولي اروح ويا خالد ليش لبيت عمو رباح اللواكة عندج صايرة ألف و انتِ الخسرانة ردت اخفف الوضع واصالحكم ونرجع نعيش كلنا عيلة بعيدة عن المشاكل بس انتِ عاجبج تظلين ببيت عمج رباح ظلي خلي يفيدج رباح
خالد : اعتقد تأخرنا والشمس شوتنا شوي يلا سهومة اصعدي بالسيارة ارجعج للبيت ..
صعدت وراسي مليان اسئلة وتفكير ومدري الي سويته صح لو غلط ومترددة وافكر ومااعرف شصار وشنو راح يصير ..
بصراحة حسيت شوي ندم ليش مارحت ويا عباس يجوز نية مالته صحيحة يصافينا ومرة اكول لا هذني مايحبني طول عمرهن واحسن شي بعدت عنهن ..
/قصة خاصة ب #وسام_الفراجي
حاطة ايدي ع خدي واباوع من جامة الباب وماخذة صفنة كل حيلي ..
خالد: اني حاس بيج سهومة و رب الخُنصر مالتج لتحسبين اني مو حاس بالموقف الي عشتي قبل شوي
ـ شنو فايدة حاس بي يا خالد ومحد جاي يدفع الثمن غيري
ـ ليش ضايجة وانت هسة ببيتنا معززة مكرمة
ـ اوف اووف مهما كان مو ببيتنا والناس تحجي اشكال الوان
ـ بكيفج سهومة اذا تكولين اريد اهلي ارجعج
ـ لا خلص رحت وياك بعد
ـ ترى اني رايدلج الخير ولو اهلج زينين جان عفتج يمهم ليش حتى اخذج مع ذلك حاسج مترددة
ـ عمو رباح ليش ما اجه هسة وكته يصير مو زين
ـ الشغلة مو قصة مو زين بس من عنده سهرة ويا جماعته يتحجج بأي شي حتى يروح يسهر
ـ زين وعمتي !
- عمتج ماتكدر مريضة ورادت منه كم مرة يترك هالشغلة ومافاد بي تعود
- زين زوجوه
- ياريت بس ما يريد .. تدرين خايف شي يوم تجينه سالفة من وراه لان جماعته كلهم كبسلجية
- والله ما ادري هم حيرة
وصلنا بيت عمو رباح وفتنا ولكينه عمو نايم بسابع نومة مبين سهران الليل كله البارحة ..
رحت ع عمتي كعدت وياها شوي ..
سويتلها ريوك ولو متأخر بس مبين جوعانة وماكو احد يسويلها ..
وسويت جاي زين مرتب وصبيت كلاص ل خالد ورحت لكيته متمدد وحاط ايده ع راسه ..
كتله تريد جاي كال اي والله اجه بوكته اشتهيته واستحيت اكلج ..
كتله
ـ هذا حال الاعزب .. تزوج واشبع طلبات ..
ـ لا يبو اكو واحد يشيل مصيبة من بيت ناس ويشمرها ببيته
ـ ايباه ع اساس انتو مساكين
ـ انطيني الجاي انطيني
ـ هاك احلى ما عليك الموضوع الما يعجبك تسده بسرعة وتفر لغير موضوع اريد مرة تكول اني غلطان
ـ حتى الغلط مالتي احسن من صحيح الكل بنظري
ـ ايباه النرجسية جاي تنكط منك
ـ الجاي برد
ـ لتطرد ردت اكلك ع شغلة وبس
ـ كولي اسمعج و حك رب الخنصر مالتج
ـ بس لو اعرف منين جايب هالحلفان هذا جان ارتاحيت
ـ عوفينه من الحلفان هذا كولي شتريدين تكولين
ـ فضول صار عندك لو متوهمة ؟ اول مرة اشوفك فضولي
ـ لتحجين خلص سممتيني ع هالجايات الگُشر هاي
ـ لا راح احجي بصراحة بصراحة اني فكرت زين وكلت ما الي غير اهلي ولازم اقبل بكلام عباس واروحلهم واشوف بلكي تندموا او استعدلوا
" عصّب خالد من عيونه ظل ساكت وياخذ نفس ساكت وياخذ نفس ويكلب بعيونه هنا وهنا جان يكول" ..
ـ يكعد ابوية وكوليله واذا قبل خلي ياخذج
ـ و انتَ ليش ما تاخذني ؟
ـ ليش اني احسن من ابوي يعني ؟
ـ لا مو هيج بس حبيت انتَ توديني
ـ خلي ابوية بعد مالي اي شغل بهالقصة لحالي مدوخ راسي
ـ اهاا .. تبريت مني بسرعة
ـ سهومة شبيج ؟ روحي انتظري ابوية وخلي ياخذج اريد انام راسي يوجعني من رخصتج يعني
ـ تمام رايحة بلكي الله سيارة تدعمني واموت واخلصكم من همي
ـ كلنا نموت محد يخلد بهالدنيا. /خاص ب #وسام_الفراجي
عصبني هواي شنو احجيله يرد شنو احجيله يرد ببرود
باااااااارد شلع كلبي انوب ما كال اسم الله بعيد الشر يكول كلنا نموت بالله هذا حجي ..
عفته ورحت وانتظرت عمو رباح يكعد ..
سويت الغدة لان هم بالعادة ياخذون من برا لان عمتي مو زينة وكملته الغدة وعمو و خالد نايمين بس عمتي متمددة وتسبح ..
كعدت عمو رباح وكتله يلا صلاة الظهر اذن وعمتي ضحكت ع سالفتي و تكلي هو البارحة الليل كله سكران ..
ورحت كعدت خالد كتله ..
اكعد تغدة سويت غدة بيدي خوش بامية ثخينة مركتها وبعد الغدة اودعك حتى اروح للبيت ..
احرك بي بيدي ميقبل يكعد ..
حركت اقوى رفع راسه وكلي ماريد تغدوا وحط مخدة فوك راسه ورجع نام ..
انقهرت كلش لان لو اهمه جان كعد وودعني ع الاقل يسلم عليه من اروح ..
كعد عمو وسبح واجه سلم عليه وباسني من راسي وصار يسولفلي سوالف حلوة ويغازل بية ..
وكعدت يمه وسولفتله كلشي ونصحني كلي يابنتي هذولي مايفيد بيهم كتله اجرب ميخالف ..
كلي براحتج انتِ قرري واني اسوي الي يعجبج خوما خالد مضوجج شي ؟
كتله لا والله صح هو نفسية بس مازعلني
تغدينا كملنا شغل عمو سيارته ولبست نقابي وطلعت وياه وجنت اتمنى اصعد ويا خالد ..
وصلني لبيتنه لكيت امي جاي ترش مي بباب البيت وتنظف وشافتني شمرت الممسحة من ايدها وكالت ..
من طوّل الغيبات جاب الغنايم !
بعدني بالسيارة وكلي عمو رباح اذا تريدين ترجعين كولي لتستحين مني اني مثل ابوج
كتله لا عمو اريد اشوف نصيبي من هالدنيا هاي وين يوكف وعباس وعدني اذا اجي يتغير كلشي
كلي ان شاء الله بنتي اذا ضاكت عليج اني لو خالد كل يوم يومين نجي بأي بحجة اذا شفتي نفسج متكدرين تظلين يمهم رغم ما مرتاح لسالفة عباس بس الرأي رايج انتِ
نزلت .. وهو راح بسيارته وكالتلي امي ..
ماينزل يسلم ع اخوه يشوفه
ـ سلمي عليه اني بنتج اقرب
ـ وين رايحة حتى اسلم تعالي نظفي الشارع و اكنسيه
ـ ليش تنظفين انتِ لعد البنات وين ؟
ـ نايمات ومتخليهن يطلعن عالباب ينظفن هيج اخاف عليهن
ـ ههه تمام يمة فوتي اني اكملهن ..
كملتهن وفتت محد استقبلني اصلا نايمين ضحاوي ومحد دايرلي بال ..
طبيت جوة واحس نفسي غريبة بيناتهم قسما بالله جان تشوفني ايناس وهي واكفة ع باب غرفتها
تأشرلي بيدها هيج بمعنى تعالي بدون صوت ..
طبعا متفاجئة اييييناس هيج تكلي تعالي وهي غرفتها ماطبيتها من اول اسبوع زفت بيها وجانت عاروس
اجيت وتحط اصبعها ع حلكها يعني بدون صوت تعالي شوي شوي ..
اني مشيت ع كيفي ووصلت الى يمها مديت ايدي حتى اسلم عليها لزمت ايدي من زندي وكلتلي بصوت خافت وناصي كلش ..
ـ مو وكت سلام هسة هذيج سطل الزبالة بنهاية المراية اخذي واشمري برا بالحاوية وتعالي عالسريع
ـ خاف ماتشتهين كل عقلج يعني
ـ هسسسس صوتج عباس نايم يلا عيني يلا بلا حجي زايد
ـ انتِ بس اريد افهم منين جايبة كل هالحقد هذا ؟ ليش شمسويتلج
ـ احجي هالحجي لرشا تكدرين ؟
ـ رشا اختي الجبيرة واكبر مني بعشر سنين ومثل امي
ـ اهوو هسة جاية من حبيب الگلب خلودي لهنا حتى تحجين هالحجاية
ـ احترمي نفسج مو كل الناس مثل تربيتج
ـ عباس : يعني الواحد ميكدر ينام ساعة زمان بهالبيت شهالصوت هذا لخاطر الكائنات
ايناس : شرفت الخانم سمرة
كعد كعود عباس ويفرك بعينه ويرتب بشعره جان يباوعلي زين ..
عباس : ليش فضلتي عليه ورحتي وياه والله لأعلمج شلون تختارين وتفضلين احد ع اخوج
ظليت ساكتة وباوعت لإيناس مكيفة وبس تريد تركص من الفرح ..
اجت امي شافتني واكفة وياهم وجان تكلي
نظفي البيت كله اليوم العصر جايين ناس مشاية ع اختج رشا اريد البيت يلمع ومعطر جو وكلشي حطي مفهوم ؟
ـ ماشي يمه ..
سمعت صوتي اختي منى واجت عليه باستني وحضنتني شلونج سمرة ؟ كتلها زينة صدك يجون خطابة لرشا ؟ كالت اي والله خطية كبرت والعمر جاي يمشي وهي رفضت هواي حدما شوي شوي كبرت صاروا قليلين الي يتقدمولها وهسة الحمد لله جايين عليها خطابة ..
نزعت النقاب لبست دشداشة و لزمت البيت كله شطف مسح غسيل طشيت معطر جو رتبته ع الاخر ..
عاونتني منى وسوت الغدة وكملته
اذن الظهر كعدت رشا وشافتني عبرت من يمي وما سلمت ولا حجت ولا كأنما اني موجودة ..
ماحجيت وياها هي طلعت ملابسها راحت تسبح واني رحت اكمل شغلي ..
بينما سبحت كملت كعدت تدور غدة
صبيت الغدة اني ومنى وسمعت ايناس تكول لمنى خاف سمرة تاكل ويانه اذا تاكل اكوم اني ..
حسبي الله بيها غثتني وصاحتني منى وكتلها مو مشتهية شبعانة سويتلهم جاي وشربوا وصارت امي تحضر ب رشا وتعدل بوجهها وتختارلها اللبسة
جان تجي عليه كالتلي من يجون لتطلعين ويشوفونج ظلي بالغرفة ماريد من عندج شي ..
ـ ههه هالكد اخزي وتسوين هيج حرام عليج والله
ـ لا بس انتِ فگر وخاف تفگرين رشا وهي جاي تكبر والعمر يمشي
ـ ههه ماشي ماشي ..
اخ كلبي معقولة ام هاي ؟ معقولة اكو ام تستحي من وجه بنتها لا يشوفوها العالم ؟ رغم اني بس سمرة والله
المهم صار العصر وراح شوي منه واندك الباب واجن النسوان صرت اباوعلهن من الشباك لان امي متقبل اطلع الهن ..
كعدن بالاستقبال .. باب الاستقبال مفتوح واني واكفة ورا الاستقبال بس اسمع ..
سويت جاي وماخلوني اطب اقدمه
قدموه وطبت رشا وكعدن البنات كلهن كاشخات واني بس اباوعلهن ..
راحن النسوان وطلعن البنات ورشا مكيفة كلش وموافقة لان بصراحة صارت تخاف تعنس لان ظلت ترفض وتدور مواصفات وهسة كبرت والبنية كلما تكبر يقل الناس الي يتقدمون الها وهسة تركت هواي من مواصفات الي تريدها في سبيل تتزوج وقبلت بشخص اقل بهواي من الي تقدمولها قبل سنة وسنتين وثلاثة ..
طلعت رشا وكلت الها
ـ مبروك حبيبتي الله يقدملج البي خير
ـ الله يباركلج ويجيبلج زلمة اعمى عين ومفتح گلب حتى ياخذج
ضحكت ايناس وراحت امي تكول لابوية بالموضوع ولو هو لا يقدم ولا يأخر اذا امي رضت ..
وحجوا لعباس اكو ناس اجوا لرشا من العشيرة الفلانية ..
وطبعا رشا موافقة الف بالمية طايرة بهالشغلة بس مايحجون كدامي .. القصة خاصة ب #وسام_الفراجي
صار الليل وسمعت امي تكلي سوي جاي عمج رباح هنا يم ابوج ولتروحين انتِ تقدمين الجاي خلي وحدة من البنات ماريده يشوفج ابد ..
كتلها تمام وسويت جاي واخذوه وسأل عني منى وكالتله زينة وراح ..
بعد 3 ايام صارت موافقة من الطرفين وقبلوا ببعض وجانت رشا موافقة بدون شروط واي شي ..
بلغوا امي مستعجلين والحنة تصير يوم الاثنين الجاي ..
اتفقوا ع هاليوم والبيت صاير ناس تروح وناس تجي
جابوا سيد وعقدوا وكملوا و اني متخليني امي اطب او اتدخل حتى بفرحهم حدما صار يوم الاحد لكيت امي لابسة ومتحضرة تريد تاخذ منى ورشا وايناس للسوك حتى يشترن ملابس وفساتين ويتجهزن للحنة
كلت لامي واني ؟
كالت البسي من ملابسج الي عندج حلوات ماعندي فلوس تكفي
ـ ههه تمام
ـ نسيت عود باجر شغلج تجيبين عصاير وكيك وممنوع منعا باتا تكولين اني بنتهم للناس الجديدة الي ماتعرف ..
ـ هههه تمام تمام بعد اكو اوامر
اغسلي الحديقة نظفيها زين بينما نجي ..
اجت كل واحد شايلة علاگة هالكدها وهالاحذية الماركة والفساتين الي تخبل ويقيسن بي ويلبسن حدما صار الليل اندك الباب كلت الهن وحدة تطلع للباب عباس مو هنا
كالت امي اطلعي انتِ مشغولين احنه ..
فتحت الباب لكيت خالد عالباب !
باوعتله. القصة بقلم #وسام_الفراجي
ـ خالد !
- سهومة
ـ شبيج متفاجئة اظل عالباب ههه
ـ لا طب حياك الله
ـ وين عمو شلون صار ؟ ابوي كال عنه مريض
ـ اي زين الحمد لله
ـ صوت اغاني عدكم ؟ لو متوهم
ـ اي فرحانين رشا باجر حنتها
ـ اها اي مبارك عليها و انتِ ليش مبولزة ؟
استغليت ملتهين وكتله ع الي سوته امي وما اشترتلي ..
وكلي ميخالف انتِ بكل الاحوال حلوة انسي الي صار وافرحي لاختج حاولي تغضين نظر ..
فات كعد ويا ابوية شوي وراح ..
ثاني يوم الصبح اجه عمو رباح جايب مسواك كامل كيك وعصاير وتحضيرات الحنة ع حسابه وطببهن للبيت وامي فرحانة خلصت من فلوس الحنة
وصاحني كلي هاج هاي العلاكة افتحيها وحدج وشوفيها ..
فوتنا الغراض وكلشي وامي توصي بية ما اطب لان ماعندي شي البسه مرتب وخليني مثل الخدامة وتلح عليه جدا ما اكللهم اني بنتهم ..
فتت جوة البيت والبنات يركصن جوة ورحت للغرفة وفتحت العلاكة ولكيت بي فستان يخبل يخبل وحذاء كعب رقم 37 وورقة مكتوب بيها تونّسي زين ولتاكلين هم
لزمت الورقة شككتها لان خاف يقروها وسديت الباب بهدوء حتى البسه بعدين كلت خلي لوكتها و الي يصير يصير ..
صارت ورا الظهر وكل وحدة لازمة مراية وترتب بنفسها والمكياج والاحذية واني بعدني بملابس البيت
وكل شوي تذكرني امي لا تكولين اني بنتهم لتنسين اذا سألج احد ميعرفنه
والتمت النسوان وصارت هوسة وركص وكل وحدة تطب شكل وبنات جيرانة وصارت خوش لمة ..
واشتغلت الاغاني والناس مندمجة .. صعدت اني واستغليت الكل منشغل والبس الفستان والحذاء واحط مكياج الوان هادئة لان سمرة مناسبة ويا وجهي وافتح شعري ..
جان انزل والزم صينية بيها عصاير واخذها وافوت عليهم ..
فتت بالفستان والحذاء والمكياج الهادئ وانصدموا الكل بية وامي وايناس ملتهيات يضحكن ويا رشا جان يشوفني وهنا صارت الصدمة ..
لمتابعة باقي الرواية زوروا قناتنا على التليجرام من هنا
