رواية مأوي الزهور الفصل الثامن 8 بقلم ياسه

رواية مأوي الزهور الفصل الثامن 8 بقلم ياسه
 

أنكسر مجذاف عمري بزحمة الروج 

 و وگف بيـه الزمـن يــم اليـكرهـون 

خفت همي تكشفــه أسرار العيـون

خيطت النظـر عن لا يشــوفون 

........................... 

إمتنان :- رجعت من عندهم واني الدنيا ما مكفية فرحتي راح اخلص والبنات يخلصون وكُل شيء صعب عشنا هنا راح يروح بيومها للصبح نغني ونهوس ونرجع ساعة نلعب محيبس ساعة نلعب جماد حيوان نبات من گد الفرح ما نعرف شنو نسوي كُل شوية اني ومَرح نطلع شغلة للبنات طبعاً باقي البنات مجانوا يعرف بالموضوع ولا يعرفون راح ينتقلون بغير مكان بس اني ومَرح عندنا علم بالموضوع خلص ربع الليل وأني افكر وين اروح وين اعيش وشلون ارجع واوگف بوجه عمي واگعد بيتنا غصباً عليه لحد ما نمت على أمل يجي الصبح واتحرر من قاسم وايامة الصعبة

گعدنا الصبح البنات بالمدرسة واني و وباقي البنات اللي ما يدامون رتبنا القاعة مالتنا والمطبخ وباقي اجزاء المأوى ميخلوني اسوي شيء من إيدي بس اني عندي نشاط وحماس ما اگدر اگعد اريد اي شيء اخلص بيه وقتي هذا وابدي وقتت جديد وايام جديدة 

بيومها لا شفنا زكيــة ولا الحارس ولا شيماء اللي موجودات فقط حنان وسلامة ومثل كُل مرة حنان طبخت الغده واحنا نساعدها منتظرين البنات يجون من المدرسة حتى نتغده و قبل جيت البنات بساعة تقريباً جنت گاعدة على سريري ولازمه واحد من دفاتري ارسم بيه سمعت صوت بين رياجيل عالي ركزت بالصوت زين تأكدت هذا صوته 

گمت من مكاني مرعوبة والدفتر بعده بـ إيدي دخل بداخل القاعة وتبعه مهيب وحيان تقدم عليه سريع ودفرني وگعت بالگاع متألمة رجع رفعني من شعري وضربني راشدي سحبه مهيب من عندي قوي ودفعه بعيد عني 

قاسم :- مهيييب وخرر عوفني اعيد تربيتها 

مهيب :- حيووان عديم الضمير ربي نفسك اول 

قاسم :- گلت لك وخر اذا ما طريتها نصين ما اطلع ابن ابوي 

مهيب :- إذا انتَ ابن ابوك اوصل يمها

حيان :- بالله العظيم ما تستحي 

قاسم :- اكل (...) انتَ لا اطيح حظك 

دفعه مهيب قوي على الباب وراها سحبوا اثنينهم وطلعوا برى القاعة اريد اسيطر على جسمي اريد اثبت نفسي وابطل رجف ماكو ما گدرت انتهيت رجليه أحسهم وحدة تضرب بوحدة گعدت گعدة واني دم ما بقى بيه حنان وسلامة وباقي البنات دخلن بحالة صدمة محد بيهن حجت كلمة بس يباوعن وعلامات الذهول واضحة بملامحهن ليش هيج صار وشنو السبب ما يعرفن 

چنت اسمع صوتهم قريب صوت اخوانه وهم يحجون عليه ويحاولون يطلعوا وصوته هو اللي جان متخبل على الآخر دقايق واختفى الصوت والهدوء رجع بالمكان اجوا البنات يسألون ما اجاوب شيء بس دموعي تنزل شسوي وشنو اللي راح يصير ما ادري حنان وسلامة اجن گعدن يمي ويسأل 

حنان :- شكو إمتنان شنو الموضوع ليش أستاذ قاسم ضربج 

سلامة :- وست زكية صار يومين ماكو شنو اللي صاير فهمينا 

إمتنان :- الرب يحميكم ساعدوني 

حنان :- غير نفتهم الموضوع حتى نساعدج

-- ما اگدر احچي فدوة خالة حسبيني بنتج سوي لي طريق انهزم منا 

سلامة :- ام محمد الشغلة صارت واضحة واعتقد اللي جنه شاكين بيه طلع صحيح

حنان حطت إيدها على خدها وتباوع لي وترجع تباوع السلامة وتگول 

-- هسه اني شسوي شلون اساعدها 

سلامة :- عوفيها تنهزم وهي تدبر نفسها 

-- شلون اعوفها تضيع بالشارع الدنيا غابة

إمتنان :- خالة أني هنا ضايعة اكثر الشارع ارحم فدوة خالة طلعيني منا

-- وين ترحين يا خالة وعمج چلب 

-- عسى ما انام بالشارع بس عوفيني اطلع منا حبابة

گامت طلعت من المكان وسلامة گامت وراها البنات يباوعن عليه ويبچن وياي وكُل شوية يسألن شكو وشبيج وليش تردين تنهزمين وين تروحين ليش ضربج .. ما ارد لان بالاصل ما اعرف شنو احچي لهم ولا شلون افتح الموضوع وياهم ما اعرف شنو اگول لهم بس دموعي تنزل هاي كُل قوتي جانت لحد ما رجعت دخلت حنان وگالت

حنان :- يلا گومي بسرعة قبل لا يرجعون 

إمتنان :- يعني وافقتِ اطلع

حنان :- اي يلا بسرعة خلصي روحج استعجلي 

وگعت دموعي واني اسمع كلامها باوعت للبنات ورجعت اباوع لها ما مصدگه اللي جاي اسمعه رجعت هي گالت .. فضيها مو وكت صفنة قبل لا يرجعون ... 

تقدمت على البنات وحدة وحدة ابوس بيهم وابچي وهم يبچوني وياي 

إمتنان :-أمانة تبوسوا لي باقي البنات من يرجعون من المدرسة وسلموا لي عليهم وحدة وحدة أمانة وصلوا سلامي المَرح گولوا لها إمتنان تحبج كُلش هواية و ديروا بالكم على سما وعلى أنفسكم 

درت وجهي على حنان وسلامة بستهم وأني اتشكر منهم وراها طلعت من القاعة والبنات يمشن وراي وحنان تگول لهن إذا رجعوا وسألو گولوا ما ندري ولا شفناها شوكت طلعت ،، لحد ما وصلت الباب الشارع وهن يمشن وراي وراها باوعت لهم بنظرة أخيرة ايام وليالي صار وياهم تشاركنا الحزن والفرح والاكل والشرب والگعدة والنومة أخواتي وصديقاتي اللي عوضتني الدنيا بيهم 

بس طلعت بالشارع دخلت حنان باقي البنات وسدت الباب وراي باوعت يمين ويسار وين اروح وين امشي بعدني على وگفتي ورجع الباب انفتح وتقدمت عليه حنان بـ أيدها فلوس قدمتهم الي وگالت

حنان :- لا تصفنين گاع الله كبيرة والشارع ارحم من هذا المكان گولي يارب و رجعي البيت أهلج واذا حاولوا يجون عليج حشمي الناس عليهم والله يحميج ويحفظج ما اگدر اساعدج بغير طريقة

إمتنان :- الرب يحفظج فضلج ما راح انسى طول عمري ممنونة منج خالة

حنان :- الله وياج 

لزمت الفلوس بـ إيدي قوي ومشيت بكُل سرعتي امشي والخوف گاطع نفسي و ماخذ كُل قوتي وصلت النهاية الشارع سيارات تفوت وناس تمشي صح قليلاً بس اكو حركة بالشارع أطمأن بالي وگفت على الشارع اريد أأجر سيارة بعدني حتى ما مادة إيدي للسيارات اللي تفوت وانسحبت من إيدي قوي درت وجهي شفت حيان نشف دمي وإني اباوع له 

حيان :- وين رايحة 

إمتنان :- مو شغلك هذا 

-- شنو مو شغلي وانتِ شاردة من المأوى وين تردين تروحين والدنيا تخوف مو أمان  

-- بس عوفني مالك شغل بيه عوفني بحالي الشارع أأمن و أرحم من المأوى مالتكم 

-- مهيب وعدج يخلصج من كُل هذا الوضع ويوفر لج مكان أمن تعيشين بيه 

-- ما اريد منكم شيء معليكم بيه أني ادبر نفسي عسى ما انام على الرصيف بس لا ارجع الاخوكم

-- ما ترجعين الاخوي محد بينا راح يسكت عليه بس رجعي هسه للمأوى منا لمن انفض الموضوع هذا وياه 

-- گلت لك وخرر من عندي معليك بيه ما ارجع ما ارجع 

-- مو بكيفج ترجعين للمأوى وغصباً عليج مهما يصير بعدج بذمة اخوي من كُل عقلج انهدج بالشارع قابل ناقصين عرض ونعوف عرضنا بالشارع

-- لك اخوك لا ذمة ولا ضمير شـدا تحچي انتَ مصدك وعايش اللحظة يا عرض اللي تحچي عنه هذا

بدون ما يرد عليه سحبني من إيدي قوي ومشى بيه سحبت إيدي من عنده وركضت ما ركض وراي عافني اركض وحدي لحد ما مشيت مسافة وراها اخذت تكسي اريد ارجع البيتنا خلصت الطريق كله ابچي منهارة والسايق رجال كبير بالعمر كُل شوية وگال منو وياج بابا ليش طالعة وحدج والوضع خطر والدنيا تخوف ليش تبچين شنو سالفتج ما چنت ارد بس ابچي لحد ما وصلنا النص الطريق حسيت على صوت هورنات تندگ لنا باوع السايق من المرايـة وحچى وهو مرتبك 

-- يا ستار استر شنو هاي شيردون هذول من عندي

باوعت ليورى على السيارات الورانا ورجعت احچي ويا السايق 

-- لا توگف عمو فدوة لا توگف 

-- منو هذول وشيردون منج 

-- ما اعرفهم ما اعرفهم 

ما لحگ يمشي اكثر الرجال وطوقوا السيارة وگف وهو دم ما باقي بيه كُل جسمة يرجف رجال كبير والوضع جان جداً خطر التسليب والخطف والقتل بكُل مكان بحيث اللي يطلع من بيته ما يعرف اذا يرجع سالم لو راح يروح بتفجير لو يروح بخطف 

نزل من السيارات قاســم ويا أخوانه ثنينهم وبعد اكو ثنين شباب ما شايفتهم من قبل 

تقدم قاسم على السيارة فتح الباب ونزلني وسحبني من شعري وگعت بالگاع من قوة السحبة رجع هو لف شعري على إيده وگومني غصباً عني صعدني بوحدة من السيارات جان بيها حيان گاعد بالصدر و ولد يسوق وقاسم گعد يمي بالمقعد الخلفي 

قاسم :- بنت الكلب اني اعلمج 

حيان :- امير على بيتنا روح 

قاسم :- يا بيتك انتَ تردون تفضخوني شنو

حيان :- مهيب گال تعالوا للبيت 

-- ولك تخبل هذا شنو ليلى والجهال هناك 

-- ما ادري بعد والله خابره وشوف 

طلع التليفون من جيبه واتصل بـ أخو واني عيوني على الشارع كومة ناس شافت الموقف بس محد حاول يسأل وين ماخذينها وين تردون بيها لا أمن ولا أمان لا رحمة ولا أنسانية بهذا البلد ولكم غابة عايشين بغابة القوي ياكل الضعيف ،، بعدني عيوني على الشارع ورد مهيب على قاسم ما جنت اسمع كلام مهيب بس جواب قاسم جنت اسمعه

-- وين اجي للبيت مهيب نسيت ليلى هناك 

-- يا اخي انفضح گدام جهالي

-- مو وكت هذا الحچي هسه 

-- شلووون ارجع شلوون 

-- اي ايي ايي مو جاي اگول اي 

-- مو هسه انطيني مجال ارتب وضعي 

-- مهيب امي مريضة تنجلط والله 

وراها مهيب اقفل الخط بوجه دار عليه هو وبحركة سريعة ضربني على وجهي صارت الضربه بخشمي احسه انكسر بقيت اشيل روحي واركعها من الالم 

قاسم :- ولج اوصل لو ما اوصل اني الج بنت الكلب بنت الشوارع بسسسسيطة 

خلص الطريق كُله يضرب بيه ساعة يگرصني ساعة قفل كف إيده ويضربني على خاصرتي ساعة يضربني على رأسي حيان جان يسمع الضربات وي كُل ضربه يدور وجه عليه آخر شيئ گال له 

-- كافي حرام عليك والله العظيم حرام موتتها مجرم انتِ مجررم 

-- انجب واسكت لا أذب حرگتي بيك لو باقي ساد حلگ وما حاچي الاخوك الشريف چا ما وصلنا الهاي الحالة 

-- اي والشوكت تبقى بهاي سوالفك ويومية وحدة منتحرة من وراك احمد ربك لحد الآن ما شامرك بالسجن و وگفوا بعينه جهالك وروح ابوي يسجنك

-- انعل حتى ابوك ادب سزز 

حيان دار وجه من عندنا وقاسم سكت بعد ما سوى شي لحد ما وصلنا البيت جان عادي والبناء مالته لا جديد ولا قديم نزلني لازمني من إيدي قوي ودخلني للبيت و حيان ورانا يمشي اول ما دخلنا لگينا مهيب واصل قبلنا ومنتظرنا بالطرمة واگفات وياه ثلاث نسوان وياهن مرة عجوز باوعت عليهن هذني الاثنين اعرفهن شايفتهن من قبل نفسهن اجن للمأوى وياهن هاي العجوز بس هاي المرة الثالثة ما شايفتها بس دخلنا حچت وحدة من النسوان نفسها اللي خبصتنا بـ ابو حسام بوقت اللي اجت للمأوى 

ليلى :- وجاي وتمشي على طولك وعادي الموضوع عندك

قاسم :- ليش المفروض اجيج زحف يعني 

ليلى :- وتصنف فوكاها تخبلت انتَ تزوج عليه وتجيبها وتجي بلا مستحى

مهيب :- ام حسام نصي صوتج منا الجيران وانطينا صبر نفهمج الموضوع  

ليلى :- يا موضوع وهو جايب وحدة بگد بنته وجاي متباهي بيها 

حيان :- كلش متابهي حتى شوفي شكلها شمسوي بيه من البهاء ماله 

ليلى :- يطبها مرض فوگ مرض فوگاها جايب عليه بنت الشوارع حتى مو بنت اوادم لك لو ماخذ بنت عالم وناس ما انقهر هيج لا والله ما انقهر هنتني مرتين مرة بعرسك عليه ومرة من اخذت وحدة مثل هاي بنت حرام 

ما اتحمل اسمع اكثر ولا اتحمل اسكت ولا اتحمل اوگف بعد احس الدنيا افترت بيه وتوازني اختل رجعت ليورة دايخة رجع گال مهيب 

مهيب :- طبب مرتك وطب فضحتنا گدام الناس من الله يفضحك كون إن شآء الله يا (...) 

سحبني قاسم من إيدي يريد يدخلني هجمت عليه ليلى لزموها حيان ومهيب مانعيها توصل يمي بيومها ليلى تخبلت بقت تعيط بكُل صوتها وتريد بس تلوحني حتى تموتني تمنيتها تموتني وتخلصني بس مهيب و حيان صاروا بوجهها وما خلوها توصل يمي 

دخلني بداخل الصالة وراها فتح باب وحدة من الغرف ودخلني بيها اول ما دخلنا دخلت ورانا المرة العجوز جانت فد مره تعبانة وتمشي وهي تستند على عكازتها باوعت على أبنها وحچت

بـ أسف  

ام مهيب :- يا حسافة الترباية بيك يا حسافة عمري الفنيته بتربيتكم ولك شگلت الروح من دنت روحم على وحدة بگد بنتك يتيمة لا أب ولا أم 

قاسم :- انطيني مجال افهمج 

-- شفتهم يا چلب شتفهم هجمت بيتك وكسرت ظهر الجاهلة وياك ما فكرت بجهالك ما فكرت بـبنتك ما فكرت بيه بـ اخواتك بـ اخوتك ولك ما فكرت بـ بربك امشي اطلع منا لا تشوفني وجهك بالبيت كله مالك طبه بعد بهذا البيت وحتى بجنازتي ما اريدك تجي وتوگف يا چلب 

ما حچى شيء بسرعة طلع من الغرفة رجعت هي گعدت على جرباية الحديد وتباوع لي واني ما خذة الزاوية وعيوني ما بطلن بچي وجسمي مثل السعفة يرجف 

أم مهيب :- عليمن تبچين ها عليمن على حظج لو على اهلج لو على شهيرتج لو على هضيمتج گولي عليمن تبچي يمصخمه يا مظلومة 

إمتنان :- على كُلهم .. حچيتها وانهاريت 

-- تعاي احچي الي كُل السالفة وخليني اعرف راسي من رجليه تعاي يبيبي سولفي خليني افهم مصيبتي هاي 

تقدمت عليها وبقيت واگفه بمكاني رجعت گالت گعدي هنا حچت هيج وأشرت على المكان اللي بصفها گعدت بصفها وبديت أحچي ما عفت موضوع ما حچيته لها لحد هي تعبت وأني تعبت وراها صاحت بصوت يرجف

-- زهرة ولج زهور وينج 

دخلت البنية الثالثة اللي ما اجت وياهم وگالت 

زهور :- ها يمة

-- اخوتج وين راحوا 

-- بالاستقبال گاعدين 

-- وليلى وين 

-- صعدت الغرفتها 

-- فرشي المرت اخوج فراش خليها تنام شوية 

تقدمت البنية على بوفية تصير صغير مصفط عليها فراش ليفوگ وبالوسط اكو خانات صغار بيهم مواعين وكاسات وگلاصات فرفوري وجوى خانات بيهم بيبان وقفالة سحبت دوش ومخدة وبطانية فرشتهم بالگاع 

أم مهيب :- نامي ارتاحي خويتي من البچي يمظلومة

إمتنان :- لا ما اريد اريد ارجع البيتنا 

-- ناميلج ساعة ومن تگعدين يحلها الف حلال 

-- لا بيبي ما اريد فدوة خليهم يرجعوني البيت أهلي لو يعوفني اروح للدار الجديدة اللي راح ينتقلون بيها البنات

-- گتلج نامي هسه وارتاحي ومن تگعدين يصير خير 

طلعت من الغرفة وسدت الباب وراها واني گعدت بالگاع وراسي بين رجليه وابچي بدون صوت جسمي يوجعني من گد ما ضربني وگلبي يوجعني من الخوف والقهر وروحي توجعني من التفكير والقلق كُل شيء بهاي الدنيا يوجعني ما صدگت اخلص منه ومن زكيـة تالي يجيبوني بيتهم لا وهذا الكلب اخو عبالي براسة حظ ويخاف ربه راح انطاه خبر وجابة واجى وراي يدور عرض براسي 

بچيت لحد ما تعبت مر وقت واني بالغرفة وحدي وكل شويـة أسمع صوت عياط برى ساعة صوت اخوهم الكبير مهيب ساعـة صوت أمهم وساعة صوته أحس صوته مثل الطلقات بگلبي يـأذيني ويرعبني... من بعد نقاشات طويـلة أستمرت بينهم انفتح الباب ودخلت الحجيـة أمهم گعدت على جربايتها وعكازتها بـ إيدها سكتت ثواني وراها گالت

أم مهيب :- أمج وأبوج ميتين مو 

إمتنان :- أيي بابا توفى بحادث وماما توفت بالكانسر

أم مهيب :- الله يرحمهم 

-- شكراً 

-- شوفي بيبي حبيبتي حسبيني امج وبيبيتج وسمعي هاي الكلمتين من عندي 

-- تفضلي 

-- اول شيء اريد تنطيني وعد ما تستعجلين وتفكرين على راحتج وراها احچي وياج 

-- وعد أيش مدا افهم 

-- تفكرين عدل وما تستعجلين 

-- ماشي 

-- الدنيا من تفتر على أبن أدم تحير شنو تسوي بيه وشلون تعاقبه وشلون تكسره وتبچيه وانتِ يا بيبي الدنيا افترت عليج وبدأتها بـ أبوج وانوب أمج وتالي جابتج الهذا الدار وشمرتج بنص ناس ما ادري شگول عليهم لان أبني واحد منهم 

سكتت شويـة وراها گملت كلامها 

-- صح غلط بحقج وجبرج وكسرج وفوگاها هو كبير ولا من ثوبج ولا من دينج ولا حتى يستاهلج بس بعد هاي قسمتج انكتبت عليج من ربج  

-- لا لا ربي مكتب عليج هذا العذاب همّ اللي كتبوا وهمّ اللي اختاروا الرب خلقني معززة مكرمة اللي أني بيه من صنع البشر مو من الرب الرب بري من هذه الافعال 

-- عاش اللسانج فدوة الكلامج الدررة الله ما يعذب احد ولا يظلم أحد البشر هو الظلم وهو الحقير والطاغي ، باعي بيبي هسه من حچينا وياه قاسم وعاركنا اعترف بغلطه وخطأ ويحلف ندمان وسبحان من لا يخطأ وهسه دگ كتاب الله بعد ما يأذيج ولا يضربج ولا يسوي الغلط وياج ويعاملج بما يرضي الله 

-- يعني شنو 

-- أبني يريدج وميت عليج ما يرضا يطلگج يگول مرتي واريدها 

-- شنو مرته ويريدني چذب الچذبه وصدگها 

-- لا مو چذبه هو عقد عليج على سنة الله ورسوله ودخل عليج وصرتي مرته بكل الاحوال 

-- كُل هذا صار غصب عني اني ما اريده ولا احبه اكرهه دمرني 

-- حقج بكل شيء تحچينه حقج بس هو رايدج ويحبج حتى لو غلط بحقج هسه حس على روحه واعترف بغلطه 

-- لا ما اريده طلعوني منا

-- اني يمج ما اخليه يغلط بحقج بعد 

-- ما اريد بيبي مو جبر كُل ظني حــ تخلصوني من عنده تالي تقشمروني وتجيبوني هنا 

-- بس فكري زين وشوفي الدنيا صعبه وانتِ يتيمة ومالج احد وعمج نذل وشمرج عاد رجال يحميج ويحافظ عليج 

-- هم حاسبته رجال هذا نكره وشيء مُقرف 

-- لا تنسين هذا رجلج وابني اذا ما تحترمينه احترميني ولا تحچين عليه هيج گدامي 

درت وجهي من عندها جايه تحچي بالاحترام وابنها لا تربية ولا اخلاق ولا احترام 

إمتنان:- بيبي الرب يحميكم ويحفظكم اني ما اريدة انسان لا احبه ولا من ديني ولا من اخلاقي ولا من عاداتي وتقاليدي صح اني يتيمة والدنيا ظلمتني وعمي نذل وشمرني بس ابنج مو انسان محترم ولا انسان گد الامانة اني اكرهه تعرفين شنو اكرهه بيبي ابنج موتني دمرني خسرني شبابي ومستقبلي وحتى ماضيي اترجاج تركيني اطلع منا اذا بگلبج شوية رحمة أرحمي حالتي 

سكتت ما ردت شيء رجعت طلعت من الغرفة اول ما طلعت فتحت ليلى الباب ودخلت عليه هي كبيرة وضخمه وطويلة بگد امي تقريباً يعني اني حالي حال اطفالها ما اگدر احمي نفسي منها 

لزمتني من شعري وبقت تضرب بيه بكُل حرگه گلب موتتني موت على صوت عياطي اجوا يركضون 

الولد والبنات سحبوها من عندي طلعوها برى الغرفة وهي ما بقت غلط ما غلطته ما بقت فشار ما فشرته اشكال الكلام عليه وعلى أهلي من غير الدعاوي جانت تدعي عليه بكُل صوت ولا الثاني 

مهيب :- الله لا يوفقك يا قاسم لك فضحتنا گدام الناس الله لا ينطيك ولك شكلت الروحك من عملت هاي العملة 

ام مهيب :- طلگ البنية وخليها تروح بحال سبيلها كافي بعد احترم روحك البنية ما تريدك 

هو ساكت ما يرد رجع مهيب گال 

-- هسه تطلگها لهنا وكافي قاسم وروح ابوي احط طلقه بگلبك ولا اعترف بـ أخو ولا اعترف بـ أهل 

قاسم :- شــ طلگ يابة مرتي واريدها 

مهيب :- مصدگ روحك ولك عار يا مرة هاي هااا يا مرة نذل حيوان انتَ مسوي جريمة احمد ربك سكتت عنك الخاطر جهالك 

حيان :- قاسم بيتك انهجم جهالك يبچون ومرتك متخبلة وفوگاها هيّ ما تريدك انتَ مو صغير عيب عليك احترم عمرك عاد 

قاسم :- اشو انجب انتَ انجب 

مهيب :- محد ينجب غيرك ادب سزز

حچى هيج وضربه جلاق وگفت امهم وحيان بيناتهم ومهيب تخبل على قاسم يغلط وينعل بيه وهو ساكت ما يرد آخر شيء واحنا واگفين نشاهد المسرحية التعبانة هاي نزلت ليلى بـ إيدها جنطتها وياها اطفالها الولد والبنية 

قاسم :- وين إن شآء الله ست ليالي عازي اني رعنان 

ليلى :- مالك شغل بينا مو اختاريت حياتك وفضلت بنت الشوارع علينا من هاي الساعة انتَ بمكان واني وجهالي بمكان 

-- أرجعي الغرفتج احسلج

-- والله ولا ارجع عبالك ابقى تحت رحمتك واسكت واقبل لا عيني غلطان اني بنت أبوي وعندي اخوان ياخذون حقي من خشمك عبالك مثل هاي دايحـه بلا اهل تجيبها منا وتوديها منا 

مشى عليها بهدوء وصل يمها ضربها على حلگها قوي دفعته من يمها قوي هيّ دفعته لو هو تخبل عليها ضربها ضرب موتاها موت يردون يخلصونها من عنده ماكو كلمة مجرم قليلة بحقه .. رجعت ليورى خايفة صح يضربني ويأذيني بس مو هيج ضرب لا هذا الضرب حتى ما سامعة عنه ولا اريد اسمع بيه واشوفه 

سحبوها مهيب وحيان من جوى ايده ما بيها غير النفس دخلنها البنات الوحده من الغرف وابنها وبنتها دخلوا وراها يبچون ... رجع ضربه مهيب راشدي لو هو تخبل خبال هنا شفت الوجه اللي كُل مرة يهددني بيه الوجه اللي جان يخوفني بيه بكُل وقته وياي واحد خبل لا يحترم ولا يفكر ارعن لدرجـة اخوانـة عافوا يكمل رعونة وخبال على راحتـه كُل واحد بيهم راح على جهة عايفينه مجنون على الاخير 

هجم على البيت كسر البيبان كسر الشبابيك دفر الثلاجة جر التفزيون وگعه بالگاع إيده انضربت بالجام بقت تصب دم وهو مكمل بالتكسير واشكال الغلط اشكال السب اشكال الفشار گام يكفر بالرب وبالاديان كُلها احس معدتي تقلصت وبطني تلويني وجسمي يرجف الخوف دمرني والوضع اللي جاي اشوفه ما بقى بيه كُل قوة بس شفته اجى بتجاهي انهزمت مرعوبة ختلت ورى مهيب حاول يسحبني من وراه دفعة من عندي مهيب 

قاسم :- وخررر لا تتدخل 

مهيب :- عفتك تاكل خـ... على راحتك بس توصل يمها اكسر إيديك والله 

-- لا تتدخل انطينياها 

-- ولي منا لا تخليني اروح احچي للدولة كُل شيء 

-- طززز بيك وبالدولـة 

-- كافي احترم نفسك 

-- وحق هذا الله اذا ما انطتنياها هسه احط طلقه براسها وبراسي واموت گدام عينك

-- يطبك مرض موتت الجلاب 

عافني وصعد الدرج يركض مهيب دار عليه وگال دخلي جوى وأشر على غرفة أمه رحت اركض دخلت للغرفة وسديت الباب وبس دخلت سمعت صوت ركضهم وصوت الولد يحجون وياه يعوف الاسلاح وراها ثارت طلقه وگعت بالگاع من الرعبه اريد اگوم ما اگدر رجلية احسهم انشلوا من الخوف ،، خلص متت ما ادري هو مات ما ادري وين انهزم ما ادري شنو حياتي ما ادري ليش هيج جاي اعيش ، بعدني على وگعتي ودخل مهيب عليه وگــال 

-- باعي والله العظبم ما اعوفج اني يمه و راح اطلگج واخلصج بس شفتي شلون مسودن ويكتلج و يكتل روحه ما عنده مانع ابقي هاليومين هنا واني وعد ارجعج البيت اهلج بـ إيدي 

ما ارد بس ابچي كُل هذا يصير بيه واني عمري 16 سنه شلون اعرف أتصرف وشلون اعرف انقذ نفسي لا اكو أب يحميني ولا أم تساعدني ولا حتى قانون ياخذ حقي الوضع جان مخربط والناس تنقتل يومية بالشارع وگدام الكُل بدون ما احد يحاسب مو عادي اني بنص بيتهم اسهل شيء يمكن قتلي 

رجعت دخلت أمه ما اعرف شلون بعد بيها قوة وتمشي على رجليها من بعد اللي صار گدامها هو اني متت شحالها هيّ باوعت لي وحچت برجاء

-- فدوة رحتلج يمه صبري علينا واحنا نطلگج ونرجعج البيت اهلج ونتكفل بيج وبكُل شيء يخصج بس عوفي يهدئ راح يكتل روحه ويروحن يتيتمون هذول الجهال 

-- الرب ياخذكم الرب ياخذه ويخلصني من عنده اني شذنبي شذنبيي حرام عليكم 

محد بيهم رد عافوني وطلعوا ساعة كاملة نفسي احسه انگطع من گد ما بچيت روحي احسها بدأت تطلع من عندي من گد ما انهاريت وراها دخل هو عليه بس شفته فزيت وگمت وگفت وگفه باوع لي وگال 

-- لمي شعرج وطلعي گدامي 

رديت واني كلماتي جانت متقطعه واسناني تضرب وحدة بوحدة من الخوف 

-- وين 

-- الجهنم تعرفينها لو محد حاجي لج عنها 

-- لا تأذيني والرب بعد ما انهزم 

-- صار أطلعي يلا 

-- وين نروح عوفني هنا يم بيبي ما احچي شيء بعد

-- هاا بيبي هههه أطلعيي گلت 

دخلت امه وراه وگالت 

-- روحي وياه اني ساعة واجيب غراضي واجي يمج 

وگعت دمعتي رفعت ايدي مسحتها ولميت شعري الجان منفوش من گد ما جرتني من عنده مرته طلع من الغرفه گدامي واني مشيت واباوع الامه 

بس وصلت يمها حچيت 

-- لا تعوفيتي وحدي حبابـة لا يضربني 

-- هسه اجي وراج بس اجيب غراضي واجي ما يحاچيج لا تخافين 

طلعت من الغرفة لگيته واگف يستمع لنا ما رايح باوع لي وهز إيده ورجع طلع واني امشي وراه وصلنا للطرمة شفت حيان ومهيب واگفين ثنينهم محد بيهم حچى شيء بس اني من وصلت يم حيان گتله 

-- لا سامحك الرب 

نزل راسه ما رد ومهيب گال 

-- روحي بابا اني شوية واجيكم 

مشيت للسيارة فتحت الباب الخلفي اريد اصعد عاط بيه بصوت عالي 

-- سايق مال الخلفج وصاعدتلي ورى تعااالي هنااا

سديت الباب وصعدت بصفه شغل ومشى هو يمشي واني عيوني عليهم بلكي يصير بگلبهم رحمة ويرجعون ينزلوني بس ماكو اي رحمة واي إنسانية 

بس طلعنا الفرع مالتهم باوع وگال 

-- منين نبدي اليوم 

ما ارد بس ابچي رجع ضرب الستيرن قوي فزيت وخليت إيدي على وجهي خفت يضربني 

قاسم :- هههه والله عمي انتِ محظوظه بساعة وحدة صار عندج بيت وهاي المسكينة ليلى صار سنين ادگ وتلطم على 50 متر وما طالع بـ إيدها 

-- وين ماخذني 

-- البيتنا 

............ 

الدنيا تگص من البرد والهواء العالي يحرك شكو غصن بالشجرة سديت الباب وشغلت الصوبـة النفطية وگعدت بصفها أحمي إديـة الصاروا قطعة ثلج رجعت سندت رأسي على الحايط و اخذت نفس طويل وگعت دمـوعي وإني أسمع صوتها الطالع من الغرفـة صوت نعاويـها اللي أطر الگلب نصين لازم كل يوم تگعد هاي الگعدة وتنعـى بهذا الصوت وتعاتبــه وتگــول 

-- گلبــه صلب ما نشـد عنــي 

ولا گــال ويــن الوالدة أمــي  

--ثلـث ونات بـ الليل أونن ثـلث ونـات 

ولو ثـكل حمـلي وين أبات 

-- يمـه أعاتبـك وأعتب عليك 

و ساعـة ساعـة الكبـرتي 

             الفصل التاسع من هنا 

لمتابعة باقي الرواية زوروا قناتنا على التليجرام من هنا