رواية مأوي الزهور الفصل السابع 7 بقلم ياسه

رواية مأوي الزهور الفصل السابع 7 بقلم ياسه

أن الله يسمعك وأن أثقلك التكمان يوماً

ثق بـه سيمنح للفؤاد ما تتمنى 

وأصبر أن الله مع الصابرين 

......................................... 

فتحت عيوني الدنيا احسها غواش والمكان يفتر بيه عبالك السكف يريد يوگع عليه إيدي تأذيني رجعت غمضت وفتحت مرة ثانية زكيــة واگفة وياها رجال اول مرة اشوفه لابس تراك مال بيت ما محلق شعرة خفيف وطويل بعده شاب وشكــلة حيل مرتب اول ما شافني فتحت اجى عليه 

حيان :- الحمدلله على السلامة 

ما جاوبت شيء بس اباوع له رجع گال 

حيان :- توجعج لو ماكو وجع 

نفس الشيء ما ارد باوع لي ورجع يباوع على زكيـة 

حيان :- شنو خرسة البنية

زكيــة :- لا ما بيها شيء 

حيان :- ليش هيج سويتِ بنفسج مبين عليج بنية حبابة ومرتبـة متعرفين قتل النفس حرام 

إمتنان :- ههههه

حيان :- ليش الضحك اكو شيء يضحك بكلامي مهما كان الموضوع اللي مضوجج ميوصلج للأنتحار إذا مو النفسج فــ الربج ما تخافين يزعل منج 

إمتنان :- ربي ؟ ليش وانتوا تخافون من ربي تعرفون ربي حتى جاي تحجي بيه 

حيان :- ليش منعرف ربج ربج هو ربنا واكيد الحرام عندكم نفسه حرام عندنا وقتل النفس حرام عندكم مو صح

-- ليش هو بس الإنتحار يعتبر قتل للنفس زين اللي جاي تسووا ويانا شنوو هاا شنووو يعتبر مو قتل مو اجرام

صفن بوجهي مستغرب وراها باوع الزكــية وسألها بحديــة 

حيان :- شجاي تحجي شنوو الموضوع

زكيــة :- ما ادري يجوز تقصد عمها لأن عافها هنا

إمتنان :- أنتِ بالذات ما تختلفين عن عمي نفس الحقارة ونفس النذالة صدكيني راح احاسبج وعد راح اخذ حقي من عيونج 

باوع الزكــية وگال 

حيان :- طلعي برى زكيـة

زكيـة :- وين اطلع من كُل عقلك تريد تكعد ويا هاي وتسمع الكلامها السخيف ترى هاي وحدة طالعة من الطريق وعمها مل من عندها وشمرها علينا وحتى مرات تهلوس بشغلات ما موجودة يعني تتخايل مريضه بعقلها

إمتنان :- محد طالع من الطريق وسخيف غيرج ومحد مريض ومقرف وبلا عقل غيرج 

تقدمت عليه تريد تضربني وگف هو مقابيلها ما نعها ورجع باوع لي و سأل 

حيان :- شبيها وياج احجي لا تخافين 

إمتنان :- شنو الما بيها وشنو اللي ما سوته وياي من اجيت لليوم ما بقت عندي شيء سلبت كُل عمري وكُل حياتي خسرتني كُل شيء واخذت كُل احلامي وكُل حياتي  

-- برى زكيــة برى وانتِ احجي حتى افتهم الموضوع واساعدج 

-- واذا طلعت زكية وطردتها يا ترى راح تگدر تحميني منها ورى ما تختلي بيه يا ترى راح تمنع جيت قاسم يا ترى راح توكف بوجهم وترجعني الدوامي اللي بطلوني من عنده ماكو شيء اخسر اكثر من اللي خسرته راح اجرب حظي واخسر اخر كارت عندي واگول الك هاي زكية باعتني الواحد وهذا الواحد سلب من عندي كُل حياتي وصرت عنده حالي حال بنات الليل وبالاخير اتفقوا عليه وبطلوني من مدرستي يلاا ساعدني هاي حجيت لك يلا خلصني منهم وخلص باقي البنات منهم 

فتح عيون على وسعها مصدومة يباوع لي ما مصدك الكلام اللي حجيته رجع باوع الزكيـة 

بس شافته يباوع لها بسرعة گالت

زكيـة :- هاي وحدة جذابة ومريضة تتخايل حتى اسأل قاسم 

إمتنان :- محد جذاب غيرج والرب لو اعرف اموت اليوم افضحكم خلص بعد ماكو شيء اخسره واخاف منه خسرت بما في الكفاية 

حيان :- شبيه قاسم وياج فهميني وحدة وحدة

إمتنان :- بختصار قاسم اشتراني من هاي ويومية جاي ياخذوني سحل وجيبوني الهاي الغرفه وانتَ اعرف بـباقي التفاصيل 

باوع الزكيـة فاتح عيونه ما مستوعب الكلام هي بسرعه گالت 

زكيـة :- اني معلية والله هذا أستاذ قاسم وبعدين جذابة لا بعناها ولا شيء هي مرته على سنة الله ورسولة 

جر الكرسي وگعد عليه بدون ما ينطق حرف واحد إيده على راسه ما مستوعبة اللي سمعه ورى دقايق من الصمت سحب تليفونة من جيبة واتصل بهاي الاثناء زكيـة اكلت اضافرها كلها وهي واگفه واني غمضت عيوني ما عندي كُل أمل بالخلاص احتمال زدت الطين بله وراح اتعاقب ميه بالميه 

حيان :- الله يساعدك ابو فيروز

-- اني بالمأوى تگدر تجي 

-- اي لازم تجي ضروري الله يخليك لا تتأخر 

-- ماشي ماشي منتظرك 

سده وگام وگف لزم زكيـة من راسها وجرها عليه قوي 

زكيـة :- والله اني معلية هذا قاسم فدوة رحت لك لا تكول المُهيب اني ادري بالموضوع ما عندة مانع يسجني والله

حيان :- ليش انتِ تستاهلين تشمين هواء

زكيـة :- اني شدخلني بالموضوع جنت عبد مأمور الصوج صوج اخوكم شعلية بعد 

حيان :- إذا ما صلبتج بــباب المأوى وخليتج عبرة لمن اعتبر ما اطلع حيان بس صبر منا لمن يجي مُهيب 

سحبها وطلعوا من الغرفة گعدت أني وسندت ظهري على الجرباية بلكي ويطلع ابن اوادم ويخلصني منهم زين منو هذا ومنو هذا ابو فيروز زكية جاي تگول اخوكم معقولة قاسم اخوهم ؟ 

وزكــية شنو قرابتها منهم زين هي تتوسل بيه ميكول المُهيب منو مُهيب معقولة نفسه ابن هاي المرة العجوز اللي اجت راسي حينفجر يعني قاسم ابنها هماات مستحيل مستحيل 

ردت اگوم بس ما اگدر دايخة والمغذي بـ إيدي وجسمي يرجف سديت المغذي ولزمت اطار الجرباية وگمت استند على الحايط وامشي لحد ما وصلت للباب فتحته ماكو احد المكان فارغ والهدوء بكُل المكان انهزم منا واخلص منهم لو انتظر هذول يخلصوني شنو راح يصير من بعد ما عرفوا اخوانه بسوالف راح يعاقبونه لو اني اللي راح اتعاقب ... الگاع احسها تفتر بيه ولعبان نفس عندي قوي بنفس الطريقة اللي وصلت بيها للباب رجعت بيها للجربايـة گعدت عليها واني الف فكرة وفكرة اجت بـبالي لحد ما مر الوقت وانفتح الباب ودخل نفس الولد اللي حجيت له وي رجال يطلع عمره بـالاربعينات تقريباً بس شفتهم دخلوا بسرعة وگفت 

مُهيب :- أگعدي ارتاحي

گعدت بمكاني واني احس بكلبي راح يطلع من صدري من گد ما يدگ قوي جسمي كُله يرجف 

اسناني واحد يضرب بواحد حتى هم انتبهوا عليه 

مُهيب :- لا تخافين بابا هدي شوية أگعدي ارتاحي 

إمتنان :- منو انتم شتردون من عندي 

مُهيب :- لا تخافين باباتي أگعدي بس نحجي وياج شوية

حيان :- هذا مُهيب ابو فيروز اخو قاسم الكبير وأني حيان اخو الصغير أگعدي بمكانج واحچي لنا 

الموضوع حتى نعرف شلون نساعدج 

گلبي احسه راح يطلع من صدري جسمي يرجف عيوني گامت تحركني خوف على الالم على فرح على حزن كلهم انجمعوا بنفس الوقت ما اعرف اذا صح راح يساعدوني لو چذب راح يعاقبوني ويعذبوني 

مُهيب :- شتعرفين عن قاسم شنو نوع العلاقة اللي بينكم احجي لا تخافين 

إمتنان :- اذا حجيت راح تساعدوني مو 

-- اكيد وعد راح اساعدج بس فهميني الموضوع كُل شيء صار وكُل شيء تعرفي احچي 

-- قبل سنتين اجيت هنا من بعد ما توفوا أهلي عمي جابني الهذا المأوى من اول يوم اجيت شفت بيه بنية اسمها وصال جانت تجي عليها زكيـة تاخذها بالليل وترجع وجه الصبح البنية ما تقبل تروح وتضربها وتاخذها غصباً عليها ومن ترجع تخلصها بس تبچي اكثر من مرة حاولت افتهم من عندها الموضوع شبيها وين تروح وليش تنضرب وليش هذا البچي ما تقبل تحچي ولا تقبل اتقرب منها لحد ما بيوم من الايام اجتني بالليل وحذرتني من زكيـة ومن جماعتها وصتني على نفسي وعلى البنات مافهمت منو جماعتها ولا فهمت ليش هيج دا توصيني وتحذرني گالت لي هذول مجرمين ديري بالج منهم ولا تقبلين احد يتقرب من البنات لو تعرفين تقتلينهم لا تخليهم يتقربون من عندكم وراها گامت من عندي وراحت بمكانها تنتظر زكية تجيها مثل العادة شوية واجت اخذتها ومثل كل مرة قبل الفجر بشوية اجت بچت بچت لحد ما تعبت خفت بيومها اگوم واشوفها من بعد الكلام اللي حجته وياية خفت اتقرب منها ومن اي احد موجود بـالمأوى وراها نمت من گد ما خايفة وتعبانة من التفكير بكلامها ومن صحيت صحيت على أنتحارها فتحت عيوني واني اشوفها شانقه نفسها ومنتحرة 

واحد باوع على الثاني ودخلوا بحاله صدمة مو گادرين يصدكون اللي احجيه محد منهم فتح حلگة وحجى مر وقت اني ابچي وهم ساكتين من بعد صمتهم الطويل سأل الاخ الاكبر 

مُهيب :- يعني وصال أنتحرت من وراهم 

إمتنان :- اي واني جنت شاهدة على كُل عذابها وهي حذرتني منهم 

حيان :- ليش ما حجيتِ للشرطة مو اجوا بالتحقيق 

إمتنان :- خفت ، حجيتها وبچيت بصوت عالي 

حيان :- من منو خفتِ 

-- خفت يقتلوني مثلها لو يسجوني مثل ما سجنوا مَرح لأن مَرح جانت تعرف وبيومها تعاركت ويا زكية گدام الشرطة وتهمتها هي السبب والشرطة اخذوا زكية و اخذوا مَرح 

حيان :- صح اكو بنية بوقتها گالت زكية هي السبب مُهيب تذكر مو 

مُهيب :- اي اذكر وبوقتها جاب قاسم تقريرها الطبي عندها مشكلة بعقلها وبيها حاله نفسية 

و واحد من الضباط جان مستقتل على القضية يريد بس يثبت براءة زكية وخبال مَرح  

حيان :- وبعدين كملي 

إمتنان :- مروا كم شهر من بعد وفاة وصال الوضع هدوء محد بيهم يتقرب من عندنا ولا احد يحجي ويانا عايشين ايامنا و بسلام لحد ما بيوم اجت زكية وفتحت وياية موضوع الزوج رفضت وعاركتها هددتني وضربتني حاولت انهزم بس لزموني وبيومها انضربت ضرب بس الرب يعلم بيه وغصب عني اخذتني وعقدوا لي على قاسم ومن هذاك اليوم الهذا اليوم اني متحمله كُل انواع العذاب كُل يوم والثاني انضرب كُل يوم والثاني اتعاقب اشكال العذاب اشكال الكلام حاولت انهزم حاولت اعترض حاولت اتعارك واتجاوز عليهم وكُل مرة جنت انضرب حالي حال الحيوان لحد ما اخذت قرار اتقبل الوضع واسكت لحد ما يجي الوقت المناسب اللي انهزم بيه منا وفعلاً سكتت وتحملت كُل شيء عسى ولعل اخلص بـ اقرب فرصة بس اللي صار فجأة بين ليلة وضحاها قرروا يبطلوني من المدرسة مالتي وصار شهر وكم يوم ما مداومة ومن انتهت بيه كُل السبل قررت اخلص نفسي من هاي الحياة واموت بــ اي طريقة 

من بعد ما خلصت كلامي گام مُهيب طلع من الغرفة وتبعه حيان وسد الباب وراه ساعة ساعتين ثلاث ساعات واني وحدي لا گدرت انام ولا گدرت ارتاح ولا احد منهم اجى عليه ولا عرفت شنو اللي صار خارج هاي الغرفة من بعد هذا الوقت انفتح الباب ودخلوا اثنينهم گمت من مكاني بسرعة

مُهيب :- أگعدي احجي وياج 

گعدت وگلبي يدگ بكُل سرعتة وعيوني تترقبهم وتترقب الحل اللي راح يخلصني من كُل هذا العذاب

مَهيب :- اللي صار وياج مو سهل وحقج بكُل شيء تسوي حقج تنهزمين وحقج تتجاوزين على اكبر واحد بيهم وحقج توگفين بوجهم وتاخذين حق كُل ساعة راحت من عمرج بس مو حقج تنتحرين روحج مو ملكج روحج ملك ربج روحج وجسدج امانة عندج وانتِ ملزمة تحافظين على هاي الأمانة .. سمعي يا إمتنان انتِ صح ما عندج اهل واستغلوج وأذوج بس من اليوم اني اهلج اني ابوج واخوج وعمج وخالج وكُل عشيرتج وحقك راح اخذه من عيونهم وشنو اللي تأمرين بيه هاي ركبتي سداده الج 

حجى هيج وحط أيده على رگبته بچيت واني اسمع كلامة وأخيراً اكو أنسان شريف بهاي الدنيا

مُهيب :- من هاي الساعة ما راح تبقى هاي بـالمأوى والبنات راح يرحن المكان بيه ناس تخاف الله وتحترم وتقدر اليتيم اما انتِ هسه بذمة أخوي واخوي مسؤول عنج امام الله وامام المجتمع 

هو مسافر صار فوگ شهر برى العراق بشغل وهسه خابرته راح يرجع لو باجر لو عگب باجر يگول مرتي و اريدها واني احبها واريدها والقرار الج تبقين وياه ويحط لج بيت ويعترف بيج گدام الناس كُلها وتعيشين معززة مكرمة لو تتطلگين من عنده وهاا حتى لو اطلكتِ ما راح اعوفج راح احط لج بيت بعيد عن المأوى وعن كُل هذا العالم واجباتج واحتياجاتج توصل لج واني خادم 

--اني سمعت كلامة و اني اريد احچي اريد اكول ما اگدر متت بچي خلصت يا امنا العذراء خلصت راح اتحرر من الكُل واعيش بسلام بعيدة عن هذا عالم القذر 

مُهيب :- القرار الج اختاري واني انفذ لج تبقين وياه لو تتطلگين من عنده 

إمتنان :- اكيد يطلگني ما اريده الرب يخليك خلصني من عنده 

-- هذا هو بعد ما يوصل يمج ومن هاي الساعة انتِ حُرة واني مسؤول منج 

-- الرب يحفظك بس البنات وين يروحون 

-- البنات راح يروحون الغير مكان لا تخافين عليهم واذا تردين تبقين يمهن بنفس المكان بكيفج بعد 

ما رديت شيء بس دموعي تنزل من الفرح وراها طلب من عندي ما احجي عن الموضوع للبنات حتى لا يخافون لو يرحون ينهزمون ويضيعون بالشوارع لحد ما ينتقلون المكانهم الجديد اخذوني من الغرفة للقاعة مالتنا اول ما دخلت اجوا البنات يركضون عليه وحدة تبوسني وحدة تحضني وحدة تلزم إيدي جانو اثنينهم واگفين ويباوعون علينا وراها طلعوا والبنات نوموني بمكاني بيومها نمت نومة ما نايمتها صار سنتين من صدك نمت مرتاحة خلص خلصت وانتهى كُل اللي عشته خلصت من زكيـة ومن شيماء ومن قاسم مدا اصدگ إحساس الفرح بگلبي اتمنى اشاركة ويا الكُل 

ثاني يوم من صحيت نشطة وگلبي احسه يرگص من الفرح البنات يرحون ويجون عليه و أني الضحكة ما فارگت وجهي مَرح تباوع لي وتبتسم وراها اجت يمي وسألتني 

مَرح :- يتنهى الضحك هذا الوجه وخلانا نشوف هاي الاسنان الحلوة 

إمتنان :- مدا اصدگ مَرح حنخلص منهم 

-- من منو نخلص ومنو اللي يخلصنه بعدين البارحه ما سألتج منو هذول اللي اجوا وياج البنات جانوا يمج وبعدين نمتِ وما هان عليه اگعدج 

-- راح احجي لج بس لا تحچين 

--احچي بالعجل اسمع 

-- هذول يصيرون اخوان قاسم وقاسم نفسه يصير أبن الحجيه اللي اجت بيوم زواج حنين 

-- عزااا عزاا لا مستحيل هاي المرة الحبابة هيج تخلف 

-- هاي بعد شفتِ الدنيا شلون غريبة 

-- سبحان الله يخلق من ظهر العالم الفاسد بس هم ما نحكم عليها عاشر وشوف احنا ما عشنا وياها حتى نعرفها حق المعرف كٌل اللقاء ساعة  

-- هسه مو هذا الموضوع لج وين راحتِ انتِ

-- هههه اي صح اني وين والسالفه وين كملي لج شلون عرفيتهم شلون اجوا وشلون حنخلص 

-- من بعد الانتحار زكية خافت تاخذني للمستشفى وقاسم حسب ما سمعت مسافر برى العراق متصله بـ اخو الصغير يصير اسمه حيان ومن اجى وشافني بقى يسأل ويستفسر ليش هيج سويت بنفسي وشنو السبب وهي تتهرب من الاجابة لحد ما اني حجيت كُل شيء وبس سمع تخبل واتصل بـ اخوهم الكبير وگعدو وياية حجيت لهم كُل الموضوع حتى على وصال مُهيب وعدني راح يخلصني من قاسم ويطلگني من عنده واني حُره اذا ابقى وياكم لو اطلع بغير مكان اعيش وهو حيتكفل كُل مصاريفي وبنفس الوقت گال راح يسد المأوى وياخذكم بغير مكان 

-- يارب معقولة لج ما اصدگ

-- ولا اني دا اصدگ بس فرحانة فرحانة 

-- يارب تكمل الفرحة ونخلص من زكية وشلتها والاهم أنتِ تخلصين من هذا الكلب 

-- اخوانه مبين عليهم اوادم ومن سمعوا بسوالف اخوهم جنو 

-- احس كلامهم صح لان من اجن المرة والبنات جانت وياهن بنية بعمرنا يجوز هذا اخو الكبير شاف بنته بينا 

--يجوز هي شنو جان اسمها بنته فيروز مو 

-- لا منى حسب ما اذكر ويصحولها نمنم

-- لعد ليش اخو يسميه ابو فيروز 

-- يعني قصدج هذه مو زوجته 

-- دقيقه اني هذا الموضوع ما فكرت بيه هنّ من اجن المرة جانت اسمها ام حسام والبنية اسمها منى ما اجت فيروز وياهم 

-- يجوز بقت بالبيت بس ليش هي تسمي زوجها ابو حسام مو ابو فيروز 

-- ههههه لج خلص همنا وگعدنا نفكر هيج افكار هسه ابو حسام ابو فيروز ابو نمنم المهم هذا الرجال هو المُنقذ مالتنا وطوق النجاة

-- حلوو عجبني اسميه ابو نجاة 

-- هههه سمي اللي يعجبج بس كون يطلع كلامه صح ونخلص 

-- يارب ، تدرين اليوم زكيــة ماكو ما بينت معقولة طردوها 

-- اكيد من بعد ما عرفوا بسوالفها يطردونها 

-- درب الصد لا رد بس حرامات هيج تروح بدون ما تتحاسب 

-- راح تتحاسب وداعتج راح اخذ حقي من عيونها هي وكُل واحد شارك بهاي القذارة بس خلِ احط رجلي على اول باية واطلع منا وراها راح احاسبهم كُلهم حتى عمي 

-- وبيبيتج العجوز الشمطاء لا تنسينها 

-- هههههه لج حطير من الفرح 

-- كومي وياي نحتفل كومييي 

حجت هيج وگومتني راحت للمطبخ تركض ورجعت جايبه معجانه جمعت كُل البنات يمها وگعدت تدگ على المعجانه وتغني والبنات يصفكون وياها ميعرفون شنو الموضوع بس فرحوا على فرحنا 

مَرح :- خلصت والله خلصت هلااا خلصت والله خلصت هلااا وخلصنا يا ربع وزكيــة طردوها خلصنا ياربع وزكيـة طردوها

البنات من سمعن اسم زكيـة بطلن يصفكن خافن رجعت هي وگفت وگفة ورفعت معجانتها وتهوس بيها وتگول 

-- لا تخافن رگصن رگصن طردوهاا زكية طردوها 

كللووووووووش ... وزكية ودعت روحة بلا رجعة زكية ودعت روحة بلا رجعاا 

جنت اباوع لها وميت ضحك والبنات صافنات مستغربات الموضوع عبالهم تخبلت بين ما هي تغني وترگص ومندمجهةو بكُل حواسها دخل علينا حيان بسرعة وگفنا و هي نزلت معجانتها ورجعت وگفت على جهة خجلت هو أبتسم على المنظر اللي شافة ونزل راسـه وراها باوع لنا وسلم ردينا السلام وكُل احنا منحرجين من سوالف مَرح وهو يباوع لنا وگوة لازم ضحكته وراها گال إمتنان تعالي شويـة 

رحت وياه الغرفة زكيـة لگيت مُهيب گاعد على المكتب بس شافني دخلت ابتسم وطلب من عندي اگعد .. اجيت گعدت على الكرسي واباوع له 

مُهيب :- من بعد السقوط كثرت الانفجارات والحروب والموت واكثر الناس الماتت تركت وراها ايتام واني ربي امكني قررت افتح هاي الدار في سبيل الله ومن فتحتها ربي زاد خيري وفتحها بوجهي من اول يوم قررت بيه اخطي هاي الخطوة وعلى وجهها اجاني شغل استثمار برى البلد بيه ربح خير من الله ولازم سافر واشتغل برى

فــ الدار سلمتها بـ إيد قاسم كُل يوم اتصل اشوف شنو ناقصهم وشنو يحتاجون ما يوم سمعت احد شكى اذا جان من الموظفين اللي هنا او من البنات العايشات هنا لحد ما وصلني خبر انتحار هاي البنية الله يرحمها

بوقتها تخبلت شنو السبب وليش وشنو صار بعيد عنكم وبس روحي هنا صار انتم امانة برگبتي شلون هيج وحدة منكم تنتحر ردت ارجع بس للأسف ما گدر الظروف هناك جانت صعبة عليه ورجعتِ بيها مخاطرة على شغلي انجبرت ابقى بس بقيت اتواصل طول الوقت ويا زكيـة و قاسم وحتى حيان جنت كُل ساعة ادگ له كُل اللي وصلني البنية جانت عندها علاقة ويا شخص قبل لا تدخل للمأوى وهذا الشخص معتدي عليها ومسبب لها انهيارات عصبيه وبين فترة وفترة تحاول تنتحر وينقذونها المشكلة ما سمعت هذا الكلام بس من قاسم وزكية لا الحارس وشيماء وسلامة و حنان وحتى الضابط اللي استلم القضية ثبتلي هذا الكلام من حچيت وياه وحيان گال اكو وحدة من البنات هيج وهيج گالت على زكيـة وتهمت هي السبب ومن سألت عن الموضوع دزوا لي تقارير تخص مَرح تقارير تثبت مَرح عندها مشكلة بعقلها 

--جنت اسمع له واني عيوني احسهم يحرگوني ما اگدر بعد اريد ابچي مستحيل اقاوم وابقى ساكته شنو من بشر هذول وشنو من عالم هذا عايشين بيه رجع هو يكمل كلامه ويگول 

-- مر الوقت وانتهي موضع وصال وضاع حقها علينا من بعد ما ثبتوا بـالتقاير مَرح مختلة وصال عندها انهيارات عصبيه سببت الانتحار واني صدگت هذا الكلام لان كُل شيء وصلني جان موثق 

رجعت اوفر احتياج المأوى وكُل الموجودين بيه وقاسم هو المسؤول هنا كُل الشغل هو مسؤول عنه وزكيـة ايده اليمنى معتمد عليها بكُل شيء لحد قبل أسبوع تقريباً رجعت للعراق اجيت اشوف والدتي لان تعبانة اجيت هنا مرتين وبهاي المرتين حاولت اشوفكم بس ما اعرف ليش ما دخلت عليكم وشفتكم ما گدرت جنت ما اريدكم تخجلون من عندي بحكم انتم بنات واني رجال واكيد راح تخجلون وتنقهرون لحد ما البارحه اتصل بيه حيان وسمعت وراها سمعت كلامج وشفت بيه العجايب 

-- بقيت ساكته ما اعرف ارد شيء ولا اعرف الومه لو الوم الدنيا لو الوم أهالينا اللي شمرونا هيج شمرة وراها باوعت الحيان اللي جان گاعد بالجهه المقابيلي وسألته 

-- انتَ وين جنت طول هذا الوقت اذا اخوك جان عايش برى وما يجي هنا ويشوفنا انتَ وين جنت ليش ما تجي تسأل عن الامانة العندكم 

باوع لي متفاجى سؤالي وراها رد وهو خجلان من عندي 

حيان :- كُل اسبوع اجي بس ما ادخل عليكم جنت اجي وادخل هنا بهاي الغرفة واشوف كُل الموظفين بس انتم ما ادخل عليكم 

إمتنان :- ليش شنو السبب ليش ما جربت تدخل وتشوف حالنا بلكي محتاجين شيء لو نريد شيء

مَهيب :- اني جنت ما نعهم يدخلون عليجن اثنينهم ممنوع يفوتون الجن اذا منتبها زكية هي القايمة بكُل الواجبات ومحد غيرها وغير الموظفات يدخلن عليجن 

سكتت ما رديت صح كلامه قاسم ابد ما يدخل علينا ولا شايفينه كُل البنات ميعرفونه مرة وحدة بس دخل من ضربتني زكية وطلع بسرعة 

مُهيب :- اتمنى ما تحمليني ذنبج وتسامحيني لان قصرت بحقج وبسبب اهمالي وصلتِ الهذا الحال 

-- انتَ مالك ذنب اصلاً مشكور على كُل يوم عشنا بيه هنا دفيانين وشبعانين شكراً لان جنت تحاول تحمينا من الشارع وما تعرف الناس اللي هنا احقر من الشارع انتَ سويت اللي عليك وما قصرت مشكور ما قصرت والرب يجازي اللي جانوا السبب بـ أذيتنا 

-- ذنبج يبقى برگبتي طول العمر 

-- مالك ذنب الذنب ذنب أخوك

-- انتظري بس اليوم و باجر قاسم يرجع

وإن شآء الله راح يخلص كُل شيء

            الفصل الثامن من هنا

لمتابعة باقي الرواية زوروا قناتنا على التليجرام من هنا