رواية مابين النسر والشيخه الفصل السابع 7 بقلم زهراء العراقية
يقين
خابرني محسن بالليل
جنت ماخذتلي زوية بغرفة بنات عمي
هلو يقين اشلونج
ممم زينة احس صوتك بيه ملامة
ليش رفصتوا اخوية !؟
قابل اني اللي رفضته ..... عمتي رافضة الزواج ولو انت متكرم وكايل الي مجان انحطيتوا بهذا الموقف .....
ليش عود ما كلت الي هااا ؟
ها ....... ما صار وكت مناسب
شنو محسن البارحة اني مخابرتك كولت الي ع جية اهلك ليش ما كلت الي السبب ؟؟
الاهل ما قبلوا ....خاف اتكولين الهم ...واحنه نريد ندخل بالموضوع من غير بدايات ....
المهم عمتي ترة هي ما اتريد تزوج ... وماتدري اشلون صارت اجواء البيت ..من عرف جدي بالموضوع ورفضها المسرع
عاتبها وزعل ....
ها ما ردنا نسبب الكم مشاكل
اووف محسن لو كايل الي الله يسلمك جان ما نحطت عمتي بهذا الموقف
زين ليش ما تتزوج شو بعدها صغيرة ...
ما ترضى حيل اتحب زوجها المرحوم
***
حسين
من كال الي محسن سبب رفض جواهر اللي حسيت بقالب ثلج وانكفخ بيه وجهي ...... تحب زوجها .... يا زوجها وهي حرة .... معقولة اكو مرة تقيد نفسها وتوفي لواحد ميت .... ؟؟ جان وفت الي مايا واني عايش حتى انت توفين لواحد ميت ....
ادري شطلعج بطريقي يا جواهر اني من صعدتي وياي بالسيارة قررت اجنبج عرفت طريقج وعر ...ليش طلعتي انت بت الشيخ لو هو الحظ رافض يكمل ..
بعد رفضها الي قبلت بعرض عمل و رجعت سافرت لأن حفيت من كل الجوانب .. إذا اروح هسة افاتح ابوها بالشراكة اكيد راح يعرف سبب طلبي لبته وما اريد اصغر بنظر اي احد ...
خابت احلامي جنت مخطط لمشروع دور سكنية كبير لكن السيولة اللي عندي اكيد ما تكفي هيج مشروع كبير الا بدخول شريك وياي .......
واني بالمطار كاعد يمي محسن .. خابرني قحطان ... سلم عليه... سديت الخط و اجه بالي وجه اخته وكته خابر وذكرني بيها ...... حيل حاز بنفسي سبب رفضها
خلاني احس بالنقص من ورة سواية مايا
حسين اكلك اول ما توصل خابرني ...
ها اي ميخالف
باوعت اله .... ياترى يا حسين اذا عرف اخوك بأحد اسباب رجعتك للعراق راح يضل هيج محترمك ....!
سافرت حتى بس اشوف الموقع ..يعني سفرة قصيرة اسبوع وراجع للعراق ....
**
ليان
صارلة حسين يومين من سافر ....حيل ضجت علية .... ما اعرف حسيت عليه اتأثر حيل من انرفض وسفرة هذا بهيج وكت مو بس شغل هو هروب ....
جنت ملتهية اثرم باللحم بالمثرامة دسوي كباب عروك .... و اندك الباب .... دكات قوية ...... ختام راحت فتحت ...
رحت اشوف اشبيها رغد تبجي وجاية وكت الغروب النا ...؟؟
دخلت للهول شفتها حاضنه امي وتشكي وتبجي
طلعت متعاركة وية زوجها و ضاربها ..وهي طلعت من البيت وهو نبه عليها لا تطلع مخليته يطلع وجاية النا ...
يا يمة والله ما يصير ...هيج اتطلعين
اكلج ضربني يمه كسرلي اسنوني ....
وتبجي
كلت الها
شو اشوفج
لزمت وجهه شو ماكو اثار ضرب ولا بيها شي غير وجهه مغسول بالدموع واعيونها حمر بسبب البجي ...
يمة فهميني ليش ضربج
والله كلشي ما مسوية ....كله منها هاي اخته الحية ...
تبجي واتصيح ما ارجع الا اعزل ...
اجه محسن ضاج حيل من تصرفها ...
كللها لازم اترجعين ...
كالت اله اترجعني وهو ضربني وغلط سبكم !
اني جانت نظرتي لقحطان غير شي ... رجل صاحب اخلاق وشاب معدل ...استغربت حيل وضجت على حال اختي بعدها ما صار الها اهواي من تزوجت لو هي ماعدها حظ مثلي ..
سولفت النا سبب المشكلة ان جواهر مصخرتها ومن متأخرة اشوية غالطه عليها وهي رايحه كايله لقحطان وهو سابها وضاربها ماقابل على اخته....عافها محسن وراح لغرفته
***
محسن
راجع تعبان واتلكتني رغدة بمشكلتها ..
ومناك طالعه روحي وقلقان على حسين من سافر لليوم ما خابر وما احصلة ع خطة الدولي ... ؟
كعدت على الكاع من التعب وطلعت تلفوني ..... دكيت على يقين
يقين شصاير بيتكم .....ليش رغده جاية زعلانه ...
هااا منو زعلانه ؟!!!
يقين اختي منو يعني ...
ها شو ما ادري
اشلون ماتدرين مو صايرة عركة بينها وبين عمتج ؟؟
عمتي ؟؟؟ دقيقة دقيقة والله مدا افهم شي ترة اني ما شفت لا عركه ولا غيرها
وشنو رغده يمكم ..مو بغرفتها
يا غرفتها اكلج اهنا عمج ضاربها ...
صدووووك؟؟؟؟؟
***
يقين
رحت اركض طلعت من غرفة جدو وصعدت للطابق الثاني ....عمي ادري بيه طالع شفته ...
دكيت الباب .. ودخلت من محد رد
محد ماكو والكنتور مفتوح ..يا هاي عود صدوك طالعة
نزلت بلغت عمتي . تعجبت خابرت زوجها ......كال الها لا ما وديتها اني عفتها وحلفتها لا تطلع
اجه للبيت خطية ابسرعه .... يكول ادك عليها ماترد ....
بالمطبخ عمتي كاعده كدام ميز الطعام هي ورسل وحوراء وسمر . يلفن كبة و بت حوراء و اني ناخذ منهن ونكلي بنفس الوقت ...
اجه عمي وكف يمنا
اي قحطان ليش مرتك طلعت من غير علمك ؟؟؟
جنها زعلت ..
حتى الزعل يا اخي اله اصول مايصير تغافل كل اللي بالبيت وتطلع ...
سمر
مو كافي من وراهه أتأخرنا بالكبة ..
باوعت الها عمتي بمعنى اسكتي ..
سألته
قحطان شصار بينكم ليش زعلت ؟؟
سكت
مو مهم اذا ما اتريد اتكول ..
جانت تشتغل على السريع لان حيل متاخرين .... رغده حركت التمن وخلتنا نتاخر ....
قحطان جاوب بعد سكوت مطول منه لأنه ضايج حيل ...
غلطت واجاوزت علية ... صرت عصبي وضربتها راشدي
لا اراديا عمتي سمر كالت حيييييل
باوع الها عمي وراح صعد فوك وعمتي وراه ....
عرفنا ان رغده متعاركه وية قحطان لان من راجع من الشغل اتلكته بالنكد وتحجي على أخته وهو اصلا ما مهتم .. .
سبب شكوتها اليوم من عمتي لأن كالت الها شغلج لا تتاخرين بيه ولا تنسين
شغلج ع النص لأن حاركه التمن هاي العبارة اني سمعتها كالتها بهدوء عمتي ..
المهم عمي عاند لان خجلته كدام اهلة
بطلعتها ...وفاتت ايام وهي اهناك ....
شار جدي كله عوفهه تجي وحدها ...
نفس راي عمتي كالت اله لا تخطي هسة اي خطوة او مبادرة ........
اما محسن واكع بيها لا يكدر عليها وهي اتبالغ ما ترضى تعترف بغلطها حتى اتعارك وياها ...
***
محسن
واكف وحاير شسوي الها هاي
كدامي تبجي واتصيح
اتريدني ارجع بس لخاطر همه اهل خطيبتك ما تفكر بيه
وامي ساعه وياها ساعه وياي ....واني رحت حاجيت قحطان الرجل كلمته معدلة خلاني اخجل من نفسي من كال ترضاها اختك تكلي انت مو رجال زين شواربك !!!
اجيت اضربها و صدك ضجت من تصرفها بس امي وكفت بينا وهم كسرت خاطري تبقى اختي ...
ما كدرت احله للموضوع و حسين راح وماكو خبر عنه
***
حسين
ضيعت خطي الدولي وما همني اخابر هو اسبوع .... خلصت قطعت تذكرة للبنان و مناك رجعت للعراق ..تعبان اريد انام وبعد وما اصحى من تعبي وارهاقي النفسي ...المبنى مراح اشتغل بيه يرادلة كعده هناك سنة كاملة واني ما اطيق اكعد اهناك وهم امي واكفة بعيني ..
وصلت للبيت ما اشوف الكدامي من التعب .......
ليان
حسين .... حمدلله على سلامتك ...
الله يسلمج
والله قلقتنا عليك ...
ليش قابل هي جديده عليكم سفراتي ..وين امي
سلمت على الاهل وجانت رغدة مسيرة يمنا من سلمت علية .....فقدت شعوري الا اشوية واجيت أسألها عن جواهر ااااخ يا جواهر سبب رفضج خلاني اتعلق بيج اكثر .. رحت نمت وكلت الهم لا يصحوني
***
ليان
اجه حسين تعبان ...ما كلنا اله على زعلة رغدة .... للعصر الا صحى من النوم ..كال اريد غدة
كعد بالهول .... جان مشتاق النا هم زين تعود علينا ....
محسن
هلا والله حسين
سلم عليه وعاتبة كله خطي ضاع وانشغلت ...
كعد محسن ياكل وياه جان يريد يروح للسنتر ...
طلعت رغده ...
ليان ما شفتي تلفوني ..
لا
حسين
ها رغدة اشلونج وية زوجج واهلة ...
جان مدنك ياكل ....
ما ردت اصلا ارتبكت
بس هو ما مركز وياها
زوجج اشلونه اهلة اشلونهم
***
حسين
.. لحيت على اهلة واني اتخيل جواهر ...
محسن
يا خويي شيل الهم عني ...اختك زعلانه ..
رفعت راسي ودنيت الصينية عني انسدت نفسي
ليش ؟
ابسرعه كالت
ضربني وغلط علية وسب اهلي ..
ليش
هيج والله كلشي ممسوية !!!!!!.
جنيت وصرت نار تاكل اللي كدامها ....
***
يقين
اووف عمي اليوم كال ع الغده راح ارجعها بعد ما اكدر اخاف تكبر السالفه اليوم اروح الها وماسمع نصيحة عمتي من كالت اله غلط اتروح وهي طلعت من وحدها .... وكال ميخالف اني اعرف اصرف وياها من اجيبها .... جدي كله بكيفك بس ترة إذا رحت راح انت اللي تخضع ومو بعيد تشرط عليك...سكت عمي ما رد ..بس العصر كال اروح الها واشوف
وصار العصر
اجتنا خالة رباب ... هي و ولدها ..
وين جوهرة ؟؟؟
كلت الها خاله هسة على جية بعدها بالدرس ....
جان ديوانه فارغ وجدي بالغرفة مالته هو والحجية ...
ها لعد تعاي خل اروح لهلج انسلم ع امج ما طول اجيت
رحت لبست عباية واي شال من شالاتي
طلعنا من البيت وصلنا للحديقة ... اندكت الباب .........
جان عمي قحطان يباوع لنفسه بمراية سيارته اللي بالكراج ويريد يروح لمرته
ركض ابن رباب فتحها كلها سحبها هي سلايت ....
وجان محسن وحسين يصيرون اكبالنا
ووراهم عباية واكفة ....اجتني الابتسامة
ومحسن هم ابتسم ...
يبووو اني لافة الشال بطريقه مخربطة وبلا جواريب وطالعه بجامتي الزركه واخرب ضحك ....
عمي ابسرعه راح الهم ..
يا اهلا وسهلا ...
حسين حمدلله على سلامتك اشوكت وصلت
رباب بهمس
ولج ذولي منو ... هذا المصروع الاثرول المهرول خطيبج اعرفة
الثاني منووو منو
خالة هذا اخوه
عززززززه
اشوية العزة مالتها اظن سمعوها لأن حسين اشوية انتبه النا وهو يسلم ...
طلعت رغده من وراهم ...
رباب سبحان من خلى هذا اخو هاااي الك ارادة يخالق الجرادة واشرت على رغده
احنه بوسط سلامهم سلموا علينا بشكل عابر ...
عمي سد الباب
حسين
ادخلي انتي ليش واكفة اهنا روحي لغرفتج .....
راحت رغده من غير كلام وهي اتباوع لزوجها .....اللي ممصدك نفسة
حسين
عدنا كلمتين وياك ...
بصراحة ....صدك شخصية حيل عجبني ... كلامة ورزانته حتى نظراته مال واحد عنده خبرة بالحياة ....
رباب
يلا يقينة امشينا ....
فتح النا الباب ابنها واهنا دخلت عمتي جواهر
وية ما الولد رادوا يدخلون ...
السلام عليكم ...
من سلمت داروا وجوهم عليها ...
هي باوعت النا ..اشرت بأيدها ارجعن ...
و رجعت التفتت على محسن اللي وكف يريد يسلم عليها
وقحطان هم كأنه يريد يكول الها رجعت مرتي وحدها ممصدك نفسة
فحسين هم وكف
اشلونك محسن اشلون صحتك
سلمت عليه سلام قوي وهو رد
التفتت بجانبية للاخوه اللي يمه
اشلونك خوية
الحمدلله
رد عليها من غير ما يرفع عينه وعمي دخلهم للاستقبال الداخلي .....
دخلنا من ممر المطبخ ورباب اتهفي بعبايتها
ولج يقين هذا حماااج
يالثولة ولج هذا يسوة خطيبج عشر مرات
خالة شنو هاي والله محسن هم ما قاصر
كعدت على الكرسي وكابلت عمتي اللي نزعت عبايتها وهم كعدت
بالله انتي زعطوطة شفهمج ... عتبي على عمتج ... جواهر هذا يرفض هذا
اكول شنو قحطان جابهم وياه؟
لا عمة همه اجووو و جابوا اختهم وياهم
اهاا
بهذا الوقت راسلت محسن كلت اله شنو جد؟ اشعجب اجيتوا
رد
حسين بس اجه من السفر وعرف جابها واجه ......
نزلت التلفون وقاطعت عمه ورباب جانن يسولفن ..
عمة عمة ...هذا حسين بس رجع من السفر سحلها وجابها لرغده .
صدوك ؟؟ ليش خطيبج ما سوة هاي الخطوة ؟؟؟مايعرف بالاصول
رباب
هي هاي رغيده يفيد وياها الفاهي خطيب هاي الفاهية ..... لا يعيني ما اجيبها الا الزلم المعدلة .....ولجن دخيلة اشلون شخصية والله حرامات
لايك الج حيل گلبي انفتح اله دخذيه لخاطري
حل سكوت واتبادلن النظرات اللي ما افهمها ابد ...
قطعت السكوت عمتي
طلع بالفعل ابن اصول
اني نطقت بعفوية
ويخبل و معضل اووي فدوة
رباب هم ما سكتت وعبرتها
اي ناقصهن عضلاته بس جواهر تمرغهن اله
باوعت لعمتي شالت عبايتها وهزت ايدها بسخرية وراحت .....
جدي و عمي علوان وعايد هم طلعوا الهم ...
صاحوا لرغده ..... دخلت عليهم ومدري شصار ..
بعدين عرفنا اخوها جابها ومعتذر عن
تصرفها
اجانه عمي علوان
كال حضرن عشا مرتب
سالته عمتي
ها ابو ايمن شصار ..
هذا حسين فشلنا ....خلانا جوة اهدومنا
من ورة قحطان
مرت جدي .... شسوووة جا هو مو عود رد اخته
ردها بس فشلنا من كال احنه نفهم بالاصول وخلاها تنزل تعتذر لرجلها
بس بالمقابل كال المرة ما تعرف اشلون تحجي تبقى مرة كلمتها ما ينمشي بيها بس ما اترجيتها منك تسب اللي رباها وهو بگبرة ......
عمتي .... اخوك ما قصده الواحد ساعة عصبية كلشي يطلع منه ....بعدين اخته من ساسها لراسها غلط ..هم غلطت على رجلها وهم طلعت من بيته وظلت ايام اهناك ....
اي هو جابها ورجعها وسوة بأصلة
راح عمي علوان وحضرنا الهم العشا .
***
حسين
اصروا نظل ع العشا واني احس روحي تعبان اريد ارتاح بس ماكدرت اروح الحاحهم خجلني .....
وهذا محسن مكيف .... راح كعد بالهول وية خطيبته واني يم جدها
رجعت للبيت ... لكيت امي كاعده بالهول اتلكتني
هايمة شصار ويه اختك
شصار رجعتها
خو ما يأذوها
يوم وين موديها اني غير لبيت رجلها
بكلبي كلت اشلون سالفة طلعتها الي بتج اني ما صدكت انسى شكلها توديني الها برجلية ... يلعن الحظ هي وسبحتها كدامي انطبعت صورتها بالي من دخلت ..
هسة عوفني من جواهر كون رغدة ما اتغير من طباعها و تعقل
***
ليان
رجع حسين رغدة لان ابد ما اقتنع بكلامها ومن محسن سولف اله الاسباب اخذها غصب ورجعها
***
يقين
رباب شسوت بجواهر بس اشوفها اكوم تحجي بسيرة حسين
***
حسين
دكيت بابها ..
فتحت استغربت جيتي
واكف ساند ايدي ع الباب . و لازم جاكيتي بيدي والجكارة مورثة
حسين !!!!
اي حسين ادخل لو الا اعقد شيخ ....
عقدت اديها على صدرها وكالت
وين تلكه هسة ..المهم
الشوك جابك لو جاي تنسى همومك يمي
تفرق عندج
اي تفرق
تنهدت
الشوك
جرتني من ايدي وكالت
دتعال طب وباجر جيب الشيخ
وامج ؟
نايمة بسابع نومة دتعال شصاير بحالك ..
دخلتني نغم ...
ما اعرف اشجابني الها ...بس بليلتها بس دخلت غرفتها ذبيت نفسي على السرير ونمت .!
ثاني يوم كعدتني هي
دكعد حسين روح لا امي تصحى
...
رحت والضخى التقينا وعقدنا مثل المرة السابقة بس شيخ و دبرت اشهود من يمة
....
باحد الليالي
دفعتني عنها
اصحى حسين اني مو جواهر ..
وخرت عني ولبست روبها
مسحت جبيني ...ما اعرف اشبيه ما اذكر اني ذكرت اسم جواهر ... طلعت باكيت الجكاير وطلعت يبلكونة شقتي ادخن بقهر
واهنا سمعت صوت اذان الفجر
رجعت اراضي نغم واخذتها بين احضاني
***
يقين نايمة واسمع تسبحيات عمتي دخلت لحلمي فززتني
فاتحه الضوة وكدامها قرأنها اتسبح .. والاذان اذن
كومي يقين كومي صلي وارجعي نامي كامت هي وكبرت اتصلي ....
٠٠٠
ثاني جان عندي عطلة حايرة شسوي اريد اشوف حسونه بس كال استحي اجيكم قبل يومين جنت يمكم ..
واهنا الله رحمني من الملل ودخلت علينا رباب
صعدنا اثنينا لعمتي .. اليوم هم معدها دوام والساعه ب٤ العصر
جانت تقرة دعاء القدح لأن اليوم خميس
جوهيران خل نطلع اليوم
مجاوبت عمتي خلصت الدعاء الا سلمت عليها .... اخر جية لخالة رباب قبل فترة بيوم رجعت رغدة ...
اكلج عمتي اليوم بناتها يمها وانه اريدن اشتري لجهالي والي هم ملابس و شغلات روحي وياي
لزكت رباب لعمتي وقبلت واني هم لزكت ورحت ... دنطلع عمتي سبقتنا وكعدت بالسيارة ..وكفتني رباب
اكلج اليوم اذا نمر بمحل مدري سنتر خطيبج نلكة اخوه يمه ؟؟
اي هو كال العصريات حسين يمر بيه يكعد يمه بس ماله علاقة بالشغل اهناك هو
ها خوووش والله لعد
....
حسين
خابرتني نغم
ها حسوني اني وصلت كولت الي شسم المجمع ؟؟؟
كلت الها
يلا تعاي لا تتأخرين محضر الج هدية ..
***
يقين عرفت رباب مسوية كمين لعمتي
من اشترينا كم غرض نفذت الخطة وياها والله يستر من العواقب
كلت الها محسن جايب الي خوش مجموعة عطور
رفضت انروح وكالت
هو يجيبهن
لا عمة فدوة خل انروح نتونس
رباب
اخاف اخوه اهناك وعيب يعني خطية عمتج رفضته لا نخليه بموقف محرج
عمتي
هم صدك
لا عمة ماهو بمكتبة
رباب بتمثيل
ها اذا هيج يلا بينا ..رجعنا للسيارة واتوجهنا الهم بس عمتي مو كلش مقتنعة ما حابه الروحة ...
دخلنا .... وشفنا نسوان وبنات بيه الحمدلله محسن مرزوق ..
ومحسن كاعد على المحاسبة لان عليهم لود العمال ..
دورت بعيوني على حسين .....واخيرا شفته .....اي شفته منطينا ضهرة و اكف ويه بنية هم ما شفت شكلها بس هي سافرة وشعرها اصفر قصير ورشيقه ..
صعد للطابق الثاني وما شافنا حتى عمتي ما شافته .....
رباب
ولج يقينه هاي منهو وياه
طلعت رباب مثلي شايفته
ما ادري خاله
طبعا احنه سلمنا على محسن ومثل اللي انشده من شافنا .. بس ما فارغ النا التهى يمشي الناس واني رباب سحلتني لفوك ورة الوسيم
عمتي ما قبلت كالت روحن واني وراكم .. ظلت ادور گلادات بلون ملابسها
خالة ليش مهتمة هلكد
وثول الج يقين اني اريد عمتج تنسعد ما اظل هيج لا رجال ولا جهال ...
وهذا انسب واحد ليش لأن اخو محسن راح اظلن سوة بس اااخ من عنادها لعمتج
صدوك اني هم انقهرت جان ما فاركتها لو قابلة ...
صعدنا و شفنا واكف يم قسم الالبسة الداخلية
لا هسة تاكدت تخصة ليش يرافقها من دون الزبونات ....
***
محسن
لا والحظ اليوم حسين كال مواعد نغم تجي لهنا يراضيها اضاهر مزعلها
تجي يقين واهلها خرب اشلون صدفة ...
***
حسين
دختار الها ثوب
حسين اريد هذا الوردي واني حنطاوية يطلع علية جنان
غمزت
وانسيك ام جواهر هم
***
يقين
خالة شو ذولة يتهامسون
اشمدريني اضاهر العصفور طار ..من يومها عمتج حظها عثر
صعدت اهنا النا جواهر
ها عيني شسون بقسم الالبسة ال ال ها
تباوع الي وتحجي كأنو ذنب عليه اذا اباوع لملابس النوم
رباب
اريدن اشتري واحد تعاي شيريني
***
حسين
هم رجعنا لهاي السالفة
ممم نسيت انت هذا الاسم سبب زعلتي
كال جواهر كال
وية جملتها وعيني اتصيدها وكفت كدام الميز وكلمت العاملة ...
هذا كم سعرة
جاوبتها ...
جانت تاشر على ثوب نوم اسود ...
واجتها قريبتها وسولفن سوة
اااااخ يا قدر
نغم
وين صفنت ...
باوعت لوين ما اباوع ...
***
يقين
عمتي ولا انتبهت اله لان اهواي زبائن ... و حجت وية العاملة بس الثوب وين يصير لرباب ...
انوب بس المرة اللي وياه تفصل بينهم وهي ما التفتت عليه ... لا ظلت تدور ثوب قياس رباب ...
رفعت راسها وكالت وهذا ما بيه قياسات لو سايد واحد
كملت عبارتها بخجل قووي
من لمحته يمكن عبالها عامل مجانت مهتمة ... نزلت راسها و عافت العاملة اسولف .... وراحت شاردة من الطابق كله ... واني ورباب وراها .
وصلنا للدرج رادت تصعد تعثرت ولوت رجلها كالت ااخ
اشبيج عمة
رجلي ..
رباب
اوكفي اوكفي ياا رجلج لا تمشين
اكعدي اكعدي
كعدت ع الدرج اظاهر رجلها من يم القدم حيل توجعها ...رباب راحت ...
واني يمها ..
اشو رجعت ست رباب وياها الرجال
باوع لعمتي وكال سلامات سلامات
عمتي غطست بعباتها غطت نص وجهه
رباب
اشلون هسة خوية ...عاد عدكم ماي بس تشرب
اتقربت يمنا رباب وعمتي همست الها
الله ياخذج شسويتي
رغم الوجع ووجهه صار احمر ...كامت هو راح جاب من البراد ماي واجه ويه وكفتها
اتفضلي ...
مشكو مشكورة ..
زين اكدرين تمشين عليها ؟؟
اجتنا ام شعر الاصفر
عمتي
اي خوية مشكورة
روح لشغلك لا نعطلك ...اشوية وانزل
رباب
لا يا جوواهر انت مو بخير
***
حسين
نغم اجت وراية من صاحتني قريبة جواهر اني فقدت ورحت الها راكض
شفتها اشلون هالهيبة والوقار كاعده وتتألم ودي اخفيها عن الانظار و محد يشوفها وهي كاعدة هاي الكعدة مو من مقامها شيخة گلبي اللي ماخذة فكري .. ما اعرف شسوي الها .. جبت الماي وسط انظار نغم ..... بس من ذكرت صديقتها اسمها ... وكعت الاكياس من ايد نغم ونزلت ابسرعة ....!
وجواهر هم كابرت ومشت على رجلها وهي تتألم ...اني رجعت للعاملة وكلت الها تنزل الي الثوب الاسود !!!!!!!!
لمتابعة باقي الرواية زوروا قناتنا على التليجرام من هنا
