رواية عذابي الأزلي الفصل السابع 7 بقلم الزهيرية
بعض الدروس تؤلمنا لكنها تعلمنا
ان لا نكون طيبين اكثر من اللازم
....
مينا/ من يكون عدنه شي نخاف منه نصور انه كل الناس تعرفه ونصير نتحسس من اي شي ومن لاشي لهذا من بلغنه أبويه أنه العرس يوم الخميس الخوف صار يزيد عندي وتجيني احلام وكوابيس وبطل الكوابيس چان السحار اضافةً إلى عياط تقى لسى بأذني يوم وجودنه يم السحار يعني حالتي النفسية بس الله اليعلم بيها وجوانا مو نفسيتها احسن من نفسيتي
وچان بعد على العرس 5 ايام واجتي فرح جايبه وياها كومه شيرة وبخاخات وبودرة مال اطفال حتى تشتغل اجسامنه بشيرة واني صارت بيه حالة نفسية من نزع الملابس بسرعة يجي بمخيلتي السحار لهذا من گالت
فرح / يله مينا نزعي خلي ابدي بيچ
مينا/ ما آريد خليني هيچ
فرح/ ياااا ولچ الرجال ينتظر يوم عرسه حتى تروحين مصوفه لا حبيبتي لا تخافين تعالي خلي نبدي برجلچ
وجوانا هم ما قبلت تشتغل جسمها بشيرة
فرح / بس اريد اعرف انتن راح تعرسن لو ماخذيچن للمگبره بابا افرحن حتى لنفسچن مو إلا تفرحن لرجال
واتقربت عليه فرح ورفعت دشداشتي وخلت بودرة مال أطفال على رجلي وبدت تخلي الشيرة وتشلع بحيث روحي تطلع للخالقها ودخلت امي وبعد ما عرفت جوانا ما تقبل تسوي شيرة بدت بجوانا بالغصب وبدينه من الصبح وللظهر واحنه بعدنه ما مخلصين واجه ابويه على الغدة
أنوار/ يله گومن اسبحن وعلى باچر نكمل وهاي البخاخات وبعد السباحه ادهن بجسمچن بهذا زيت النمل يوميه لمدة اسبوع يأخر نمو الشعر كلش ومن ينمو مرة ثانيه خفيف وإذا كل ما تشتغلن بشيرة تخلن من زيت النمل بعد 6 اشهر يختفي الشعر وبعد ما يطلع
جوانا/ زين الشعر يختفي بعد 6 اشهر والشاذي العندي شوكت يختفي
وفرح ماتت من الضحك وگامت حضنت جوانا وتگللها/حبيبتي جوانا ميمو ما عنده مدة صلاحية وينتهي هذا باقي وياچ طول لهذا تعودي تصبحين وتمسين على الشاذي
جوانا/ اگللچن تدرن اني ما متعجبة غير على مصطفى يعني حلو وموظف
فرح / يمعوده وينها الوظيفة هو زبال
جوانا/ المهم عنده راتب ليش يزوج بهاي الطريقة معقوله ماكو بنيه يمهم من أقاربهم يخطبها ما شوفوها عجيبه
مينا/ هذا الشي هم خطر على بالي هسه ميمو عرفنه شبي مصطفى شبي
فرح / عليمن مستعجلين بكره نگعد جنب الحيطه ونسمع الزيطه هسه مينا الورد توصلنه وترد هسه مينا جيبلنه الأخبار كلها
اني اول وحدة رحت على الحمام سبحت وطلعت دهنت نفسي وبعدني ما مخلصه دهن اجتي جوانا
وتگول / بله هسه احنه مخابيل عقال ندهن جسمنه بدهن الدود هو احنه مدودات
ضحكت وگتلها / يمعوده هاي نظافه لنفسنه مو الاحد وطلعنه لصاله وياهم على الغدة واثناء الغده
قيس / الزفه مصطفى راح يجي من وكت ياخذ مينا لان هذا راح يروح للفندق وثاني يوم الصبح راح يطلع لدهوك يبقون اسبوع ويجون أما جوانا يجون عليها المغرب لان ماكو لا فندق ولا سفره بس يفترون بالشوارع وصور وتروح لبيته
تخبلت جوانا وجاوبت أبويه / وليش اني لا شنو اني مو من حقي مثل البنات ابسطها هاي مينا راح تروح سفرة لدهوك
قيس / احنه ما نحكم الرجال يريد يطلعچ او ما يريد يطلعچ هذا شي راجع الچ جوانا لسانچ گصري فهمتي اخذن بالچن ما اريد اي وحدة منجن يشكي منها زوجها وحق ربچن اموتچن فهمتن
وطبعاً لازم يسود السكوت لانه احنه نخاف من ابويه وبعد الغده انتقلنه للمطبخ وفرح ظلت تهدي بجوانا وانه هي كذلك ما طلعت سفرة ابد واقوى طلعة الها ويه زيد يزورون الإمام كاظم عليه السلام
صح سكتت جوانا بس مقهورة ومكبوته بس لازم تسكت لانه الخوف من أبويه غصبن علينه يخلينه نسكت
وعلى ثاني يوم عدنه نفس الشيرة ونظفنه جسمنه وما ننسى زيت الدود على گولة جوانا والثلاثاء رحنه لصالون صبغنه وخصلنه وتنظيف وجه وشمرت حاجب وكملنه كل شي وصلنه ليوم الخميس بس شنو اني منتهيه من الخوف ومن ساعه 12 تغدينه وسبحنه ونظفنه اسنانه وطلعنه لصالون وهم يأجرون بدلات واني وجوانا كل وحدة بينه اختارت بدلة
ولبسنه البدلات وبلشت ام الصالون بالمكياج بالبدايه وبعدها بالتسريحة كملت اني وگعدت على جهة وبدت بجوانا وچانت الساعه صارت 4 وربع واحنه من رحنه اجتي ويانه فرح ودخلت امي لصالون تعجبنه وگالت لفرح
أنوار/ فرح اني راح آخذ مينا واروح لأن مصطفى اتصل على ابوچ وگله الزفه توصل بعد نص ساعة
وگومتني امي بس شنو أنتهيت نزلت دموعي واجتي أم الصالون تمسح بدموعي وتگلي يمعودة المكياج راح يخرب وفرح وجوانا هم دموعهن نزلن واحنه الثلاثة وحدة حضنت الثانية وگوه أمي طلعتني وتگلي ولچ يله مينا آبو التكسي واگف بره
وطلعت من الصالون واني ميته قهر لان راح اعوف جوانا وفرح بصالون وراح ارجع وحدي وخصوصاً احتاج فرح لان هي شجعني وترفع من معنوياتي
وصلت للبيت ودخلت لصالة لگيت أبويه گاعد وهو من شافني گام وباسني من گصتي
قيس / بنتي اليوم راح تطلعين من عندي راسچ أريده مرفوع في بيت عيالچ وبنتي العيال عياله والچنه حماله ذولاك بعد اهلچ احنه مو اهلچ حتى من تجين يمنه انتي خطار ذولاك اهلچ ومصطفى زوجچ شيگول تنفذين فهمتي بنتي بعد شويه راح تطلعين منا الله ومحمد وعلي وياچ والله يهنيچ
بعد ما تحملت حضنته لابويه وهو هم حضني ورجع باسني من گصتي وطلع من الصاله واني گعدت انتظر يجي مصطفى وشافتني امي ارجف اجتي گعدت يمي وتقرا ايات قرانيه على راسي وما مر وقت هوايه حتى سمعت صوت الهورنات مال السيارات والمزيقه دگ والله جسمي كله يرجف والباب أصلاً چان مفتوح ودخلوا الزفافة وياهم مصطفى ومن اتقرب عليه مصطفى اخذ باقة الورد مني وانطاها لامي وانطاني باقة ورد هو جايبها ويا وبقوا شويه دگ المزيقه ويرگصون امه وأخواته ونسوان گرايبهم وبعدها امه گالت /يله كافي خلي نطلع بعد ورانه المصور ونزفكم للفندق
وگام مصطفى وگومني ويا وامي چانت واگفه قريب عليه لزمت ايدها وظليت مچلبه بيها بحيث طلعنه للگراج وصعدني لسيارة واني لازمه ايد امي وهو سحب ايد امي من ايدي ويگلي / لا تخافين اني يمچ
وبعد امي من السيارة وسد باب السيارة وظل شويه واگف يم آمي وبعدها اجى صعد يمي بالسيارة وطلعت بينه السيارة من الگراج بيتنه وتمشي بينه بالفرع واني عيني على بيتنه وامي واخواني الچانوا واگفين بالباب وعبرنه الفرع حسيت نفسي غريبه بنصهم ومصطفى شاف ايدي ترجف
سحب ايدي وباسها والتفت عليه نظرات عيونه يشع حنيه وقرب حلگه يم اذني
مصطفى/ لا تخافين حبيبتي اني يمچ ليش الخوف
وابتعد عني وبقى لازم ايدي لما وصلنه يم المصور ونزلنه اخذنه صور وبعدها رجعوا زفونه للفندق والفندق چان قريب على الإمام الكاظم عليه السلام
وما قبلوا بالفندق بس واحد يصعد ويانه للسويت وصعدت عمتي ويانه ودخلنه للسويت
وعمتي ويانه وتهلهل وتصفگ وتجيب وتوصي بمصطفى اريدك ذيب هاي الليله اني راح اروح واعوفك ويه عروستك واريد بعدني ما واصله للبيت تخابرني وتگلي دخلت بيها فهمت يله ابني لا تفشلنه والصبح اريد من اجي اخذ البدلة اخذ نيشانها وهااا وصيتهم شويه ويجيبون العشا الكم
وطلعت عمتي ومصطفى قفل وراها الباب واجى يمي گعد
مصطفى/ شوفي مينا هاي اول ليله بينه اي شي يصير بينه هذا الشي يصير خاص ما أريده ينقل لا لأهلچ ولا لأهلي وما أريد تخافين مني ابد واي شي يصير وياچ تگليلي الشي تريدي گوليلي عليه وإني اسوي الچ والشي الما تريدي هم گليلي عليه حتى ما اسوي فهمتي اريد نكون ستر وغطا على بعضنه وما ندخل اي احد بينه
واني بس هزيت راسي وهو قرب شفته يم رگبتي وبده يبوس بيها بصراحة تقززت منه گبل دفعته وگمت وصرت بعيد عنه وهو ظل متفاجىء مني اجى اتقرب عليه وهو يگلي / شبيچ حبيبتي انتي حلالي
ورجع يكرر سالفة البوس وچان هذا حدي ويا گمت ابچي وگعدت بالگاع وگتله / الله يخليك لا تتقرب عليه والله ما اگدر
ريان/ اني احب اهلي واحب ملاذ بنفس الوقت وشگد ردت أوفق بينهم يشهد عليه ربي بس اهلي قافلين ما يقبلون بملاذ عكس ملاذ هي ما عدها اي مشكلة بأهلي
وكل ما يقرب يوم الخميس يوم العقد اهلي يزيد بعدهم عني الف ميل وحتى بدور الي اجتي ويايه بعدها بطلت صارت ما تقبل تجي ويايه بيوم عرسي
والتجهيزات قائمة على قدم وساق جبت غرفة نوم جديدة وفرشتها هذا كله وحدي اهلي ابد ما اجوي ويايه او رتبوا وحتى المخزن سويته غرفة جلوس والعمال فلشوا الستارة مال السطح ونصبوا درج حديد على الحديقة حتى الصعود والنزول والشغل ما يصير من داخل البيت
وبدوا يبنون بالمطبخ والصحيات وما قهرني هو ما دى يسدون البيني وبين اهلي من ناحية البيتونه بحايط وبوقتها چانوا يبنون بطابوگ من صعد كمال وظل واگف يباوع على العمال وهمه يبنون إلى ما بنوا كله وصار جدار من طابوگ وسمنت ورمل بيني وبين اهلي وإذا اريد أشوفهم لازم أنزل من الدرج الحديد وادخل لو من باب الصالة أو باب المطبخ يله اشوفهم
وبيوم العرس مالتي احتاجيتهم يجون ويايه احتاجيت اخويه كمال يجي ويايه للحلاق نزلت للحديقة وصلت يم باب الصاله مقفول رجعت على باب المطبخ هم مقفول دگيت باب المطبخ فتحته امي شافتني عافت الباب مفتوح ورجعت على الجدور مخليتهن على الطباخ وريحة أكلها تخبل اجيت وگفت يمها وبست راسها ونزلت دموعي
ريان / يمه اروح فدوه الچ اليوم عرسي والله احتاج وجودكم والله واني بعيد عنكم غصة بگلبي اريد احس انتوا موجودين ويايه اريد كمال اريدچ انتي وبدور ونور وجنى ليش ما موجودات ويايه بأسعد يوم بحياتي
إبتسام/ ابني ريان روح أزوج وافرح بعرسك احنه نتمنالك خير والسعادة وما حاقدين عليك بس خليها ترچيه باذنك ولا تنساها ريان الما اله خير باهله ما اله خير بأحد ابد واذكر احنه نصحناك بس انت اختاريت ويجي يوم تندم على اختيارك لكن وقت الندم يكون فات الله يتمملك على خير
وعافتني امي وراحت لصالة طلعت من المطبخ ورجعت فوگ وحسيت روحي مخنوگ من شوكت صارت بين وبين اهلي أبواب تتقفل وانتبهت على الساعة چانت 2 إلا ربع رحت للحلاق حلقت وحضرت نفسي ورجعت للبيت بدلت وچانت الساعة 4 ونص واتصلت بملاذ وعرفت هي رجعت من الصالون
وحضرت جنطتي ونزلت ومن دى اطلع كمال چان راجع من شغله وصرنه اني ويا وجه بوجهه بس هو تجاهلني وفات من يمي ودخل للبيت
واني طلعت للشارع اجرت تكسي ورحت بالبدايه على السيد اخذته ويايه وطلعنه لبيت ملاذ ومن دگيت الباب طلع آبوها وهو دخلنه للبيت وگعدنه والسيد ظل يتلفت يمنه ويسره وهو يگول / شنو ماكو شهود شلون راح نعقد
ابو ملاذ/ هسه نجيب 2 من الشارع ويشهدون
السيد / بلا زحمه شو العريس وحده وأهل العروس ماكو آحد عدهم شنو الولد ناهب البنيه ودى يعقدون بدون علم اهلهم
ابو ملاذ/ سيدنا البنيه ابن عمها يريدها وهي ما تريد ابن عمها وخفت لا ينهي عليها زوجتها بدون علم احد والعريس اهله يريدون يزوجوا بنت گرابتهم وهو ما يقبل وشوف زواجهم تلزگ
والسيد هم سكت وطلع آبو ملاذ ما اعرف منين جاب شباب 2 وبدا العقد وملاذ چانت گاعده قريب على الباب من سالها السيد موافقه على عليه وجاوبت بنعم وتم العقد وسمعت صوت هلاهل أمها ولشهود راحوا وبقى السيد يم ابو ملاذ واني رحت يم ملاذ ولو أريد اوصف جمالها وهي بدلة العرس ما يتوصف
وأبو ملاذ يصيح تعال جيب تكسي للسيد واني جبت 2 تكسي واحد لسيد واحد الي ولعروستي وطلعنه اني وملاذ وصلنه للفندق وچانت من السعاده بحيث ما اشوف شي گدامي بس ملاذ
ومن دخلنه بسويت صرنه اني وياها وجه بوجهه ما حچينه شي بس نظراتنه چانت تعبر عن كل حبنه وشوقنه لبعضنه وقربت شفتي لشفتها وبقيت أبوس بيها بلهفة وسحبتها لسرير بس طلبت مني شوية وقت بس تدخل للحمام وترجع وطلبت مني افتح الها السحابة مال البدلة وفتحتها الها واخذت جنطتها وراحت للحمام
واني نفسي گمت بدلت ملابسي وانتظرتها تطلع من الحمام ومن طلعت لابسه ثوب نوم اسود يجنن صدگ عقلي طار بيها ورجعت آخذتها لسرير ومن دخلت بيها هوايه تأذت بحيث صار عدها نزيف قوي وبطنها دى توجعها جرت ايدي وهي تبوس بيها
ملاذ / ريان راح اموت عليك الله أخذني للمستشفى
ظليت ابوس بيدها واگللها / هسه حبيبتي بس گليلي ملابس وين حتى اساعدچ تلبسين
جبت جنطتها وگوه سحبت ملابس الها حتى فوط نسائية هم خلت واني بدلت واخذتها ونزلت وبتكسي وردت اوديها مستشفى اهلي بس ما قبلت رادت مستشفى العلوية ومن وصلنه اخذوها للطوارئ واني ما قبلوا ادخل لان مستشفى مال ولادة وطلبوا لازم وياها مره وما عندي احد أخابر عليه غير بس امها ومن اتصلت بيها تليفونها مغلق وآبوها اصلا ما عندي رقمه وظليت الوب على ملاذ واتصل على رقم ملاذ وما ترد
ومر تقريباً ساعتين يله جاوبتني ملاذ انه ضربوها ابر وحمدلله وگف النزيف وبعد شويه يطلعوها ولساعة 2 بالليل يله طلعت ملاذ بس شنو وجهه اصفر وصلتها إليّ الممرضة بالكرسي المتحرك
اجرنه تكسي من باب المستشفى للفندق وچان السرير عليه شرشف ابيض وبي هواي من دم ملاذ اني طبگته وضميته بعلاگة وخليته بالجنطه مالتي أخاف اهلي يشككون بيها هذا دم الدخلة مالتنه وهي گبل نامت خطية گد ما نزفت تعبت واني نومي چان متقطع للفجر يله ثگل نومي وما حسيت غير على صوت مي بالحمام رفعت راسي ملاذ مو يمي گمت دگيت عليها الباب
ريان / حبيبتي ملاذ شلون صرتي اليوم
ملاذ / آني حمدلله بخير احسن
ورجعت انتظرتها لما طلعت من الحمام واحنه چان لازم الساعة 11 ونص بالمطار لآن الطايره لأربيل تقلع الساعة ب 12 الظهر وبسرعة بدلنه ملابسنه وجمعنه اغراضنه ونزلنه لردهة الفندق سلمت المفتاح واخذت العقد والمستمسكات مالتنه وطلعنه بالمطار بوجهنه وبين اختم الجواز وروح تعال ما اقلعت الطائرة غير الساعه 1 ونص ومن گعدنه بأماكنه بالطائرة
ريان / اگلچ مينا هذا الجواز إصدار جديد لان ما عليه آي تاشيره وتاريخ إصداره جديد
ملاذ / اي حبيبي من عرفتك قبل اشهر يله طلعته لكونك گتلي كل سنه نسافر نغير جو
ريان/ اگلچ ملاذ اخوانچ ذوله بالمستشفى من شفتج اول مره ليش من جيت خطبت وعقدت وعرسنه ما شفتهم ويه ابوچ
لمتابعة باقي الرواية زوروا قناتنا على التليجرام من هنا
بدل ماتدور وتبحث علي الروايات خليها علي تليفونك وحمل تطبيقنا
