رواية في حجر الافعي الفصل السابع 7 بقلم شمس العراقيه

نمارق

ـ المكان صار اظلم وموحش عرفت أجه الليل بديت أخاف رغم اصواتهم برى وهوستهم واصوات الناس اللي تجيهم لن عدهم فاتحه لأبنهم

" يا ترة اهلي سوه فاتحة عمي صباح الله يرحمك ياعمي بجيت بقهر واني أذكر شكله مرسوم بعقلي ما يفاركني ولا ثانيه قتلوا الحقراء الانذال بدم بارد صحت مجرمييييين قتله مجرمييييين قتلتوااااا عمي مجرمين الله يأخذكممم واحد ورى الثانيييي مجرمييييين قتلتوا عمي جان أنسان طيب وما عنده اذيه ؏ احد ليش قتلتوا ليش ليش اخ يا عمييييي أشسويت بروحك وبيه بنت أخوك دفعت ثمن أغلاط بنتك يا عمييييي، نزلت دموعي بقهرررر وحزينه وگلبي نار تلهب بي الله يرحمك برحمته الواسعه

وتذكرت هاجر وتذكرتهم من كالوا منهزمه هي وإمها لعد شكد نذله وحقيره أنكشفت وانفضحت بحبها وكعت الدم وعافوا عمي صباح كبش فداء وانهزموا بكل برود،وحده مثلج عود الجنت شايفتج فقيره و؏ نياتج طلعتي حيه تلدغين وتضمين رأسج عشكتي وتمعشكتي وكعتي دم بين العربين وفلتي بريشج بحقارتج مستحيل أشوف او تمر عليه الله ينتقم منج أنتِ وأمج ودم عمي صباح برقبتج ومستحيل أسامح أي احد تسببه بموته مستحيل

" مر وقت وأني ابجي ؏ عمي و؏ حالي وتذكرت أهليي

هم تذكروني بابا هم يسأل عني ميته لو عايشه ليش لحد الان ولا واحد من أهلي وصل ليش معقوله تخلوا عني بهل السهوله لا مستحيل أهلي ما يعوفوني ما يتخلون عني مهما يكون اني بنتهم حتى لو مو بابا وماما اكيد بيبي راح توسل بيهم يرجعوني وينكم يا أهليي وينكم

" مر يومين وهذا يوم الثالث راح يخلص وأني عايشه بالظلام وخوف ووحده بدون لا اكل ولا شرب والهوسه مالتهم هي هي، رأسي منفوخ ويوجعني من كثر الضرب ولطخات وريكيي يابس عطشانه حيل بالكوة ابلع ريكي وحيل ما ضل بجسمي راح اموت من العطش يموتوني على بطيء ليش اهلي ما يسألون عني ليش تخلواااا عني وينكم يا اهلي وينكم

" خليت رأسي بين رجليه حاولت أنام وفزيت ؏ صوت الباب ينفتح ودخل نفسه اللي يضرب بس ؏ رأسي والله سوه ارتجاج بالدماغ من ضرباته اليه وجهه لايت ؏ وجهي غمضت عيني من شده الأضاءه وابتعدت ولميت روحي

مصلح ـ ما عطشانه جوعانه

نمارق ـ ما جاوبته اعرف يستلذذ بإذيتي شايل بطل ماي وبلش يقطر بالكاع لما خلص وشمر البطل ورجع جاب سطل ماي وشمره عليه وشمر الثاني واني اشهك اشهك عوفونيييييي الله يخليكم عوفونيييييي رحموا حالي

اندفع الباب ودخل واحد منهم وكام يحجي عليه

إشهاب ـ شجابك من سمحلك تدخل ابوي مو منع أي احد يوصل الها شعندك هنااا

مصلح ـ كيفييييي كيفيييي اللي أنقتل يكون أخوي وكلبي محترك عليه وأنت مدخلك باللي اسوي بيها اعذبها اتفنن بتعذيبها محد يتدخل فاهمممممم

ـ لا مو فاهممممم لان مو ؏ كيفك البنت ما الها دخل بالصار، وابوي انطه الاوامر ولازم كلنا أنفذها وكال تخلص سالفتها بكعدة يعني تخلص الفاتحه ونسلم البنت لاهلها ف اكلوا تبن واطلع وعوف البنت

ـ لا مو ؏ كيفكم شوف اني نار مشتعله بصدري ساعة خليت تراب عليه ودفنته وهو بعز شبابه اجينا وعفنا امجد وحده بالمكبره.

نمارق ـ تقرب رفعني من كاع بلش يضرب بيه راشديات ويصرخ بعلوا صوته ما اعرف الضرب منين يجيني

ـ شلون تريد مني اعوفها شلوووووون وعمهااااا ذبح اخوووووي شلوووون هذا اخوييييي مو اخوك اخويي هذا امجدددددد امجددددد

نمارق ـ بالكوه اخذه وطلعه برا ويدفع بي ويكوله

مصلح ـ هسه يجي حناش ونخلص عليها اثنينا وأنت تبقى ساكت لن المات اخونا مو أخوك لن كلبك ما محترك عليه وطول الوقت ساكت وما عاجبك اللي نسوي وتريد تخلص البنت من عدنا لن ادري بيك كلبك طيب وفاهييي من يومك يجفصونك بالنعل تبقى ساكت.

إشهاب ـ دام امجد مو اخوي وكلبي ما محترك عليه مثل ما تفضلت سوا اللي تسونه مالي دخل وابوي انتوا تفاهموا وياه

" طلعت وعفته وتلكاني حنااااش وجهه محتم تعداني وراح الها دخلوا أثنيهم عليها واسمعها تصرخ مشيت واجتني رحمه وكالت

رحمه ـ أبوي سألني عنك وعن البنت شكوله وانه اشوف حناش مخلي الشر بين عيونه عليها وشفته راح الها والله يكلب البيت لن كال لامي اذا ولدج وصلوا البنت ما الج كعده بالبيت، ابويه غير رأيه ما يريدها تموت ابويه يفكر بينا وبيكم وما يريد النار تكبر بس المن تحجي والكل يردونها تموت

أشهاب ـ روحي ؏ أبوي كوليله راحوا الها هزت رأسها ومشت كعدت على حافة الحوض وطلع حناش يسحل بيها وهي مالها صوت خلاها نفس مكان أمجد وجهه السلاح عليها وطلع ابوي

صكبان ـ اذا ضربتها اغضب عليك ليوم الدين واتبرى منك ومن أخوك وما الكم كعدة بيتي لا انتوا ولا أمكم

حناش ـ بصياااااح شتحجي بويه اللي مات أمجد اخونا شنووو دمه رخيص عندك هيج ماله قيمه عندك هذا امجد عزيز الدار صغيرنا بويه

صكبان ـ اللي مات يكون أبني طالع من ظهري قطعه من كلبي من ساعة المات اخذ روحي وياه طفت دنيتي ساعة دفنته واللي صار مقدر ومكتوب والبنت ما تتأخذ بذنب غيرها وأنه عندي بنات عوفوها وذب السلاح من ايدك انه اعرف شغلي وياها أنه صاحب الرأي وانه اللي أقرر عوفه

رحمه رسل وديان وينجن بويه

رسل ـ تامر بويه

صكبان ـ أخذن البنت خلنها بغرفة إشهاب وانطنها اكل وشرب ومحد يتكرب صوبها يلة بويه شوفن شغلجن

نمارق ـ اجن رفعني من الكاع ما بيه امشي اسحل برجليه فتحن الباب دخلني عليها ذبيت روحي على الفراش بتعب واسمعهن يحجن بينهم

رسل ـ تشرب وتأكل سم الهاري يهري بطنها ان شاءالله ياريت حناش خلص عليها وخلصنا منها وبرد نار كلوبنه

وديان ـ عمي بسلامته مدري شبي شنو محد يكرب صوبها ولا فوكها دخلنها بغرفة إشهاب فراش وغطا وراحه شتريد الخاتون بعد خلاها بغرفة إشهاب بس عايزه نزوجها اله

رحمه ـ كافي تلغن اظن سمعتن ابوي شكال بخصوصها ولاتضلن تفتتن من كيفجن سون اللي عليجن وخل نولي

رسل ـ كلبج رجيج مثل أخوج الفاهي أشهاب كلوبكم كلوب دجاج اخ يا خويه يا امجد عمت عيني عليك صارلك ثلاث ايام من اندفنت بالتراب وهاي عايشه الله يأخذج ونخلص منج على اهون سبب تف على شكلج الوسخ يا قذره

نمارق ـ ضرربتني برجلها بطني بكل قوتها انيت بوجع

رحمه ـ عوفونها يلة خل نطلع لاتسويلنا طلابه يله امشن

وأنتِ اكلج ومشربج يم رأسج يلة نطلع امشن

نمارق ـ طلعن وعافن الباب مفتوح شوي وأجه شغل الفانوس وقفل الباب بقيت متمدده ما بيه ارفع راسي باوعت الماي كمت ملهوفه اشرب بخبال حضنت الدولكه خلصتها كلها بس الاكل ما مديت ايدي عليه بس شربت ماي وخليت رأسي على المخده واريد انام وما اكعد تعبت وقهر كلبي اهلي ليش ما يسألون عني ليش تخلواااا عني

_____________

إشهاب ـ مجموعين بالحوش وحناش كاعد ؏ البلوكه ويهز برجله بغضب ومصلح يضرب بيده بالحايط وامي عسله تبجي يم الباب وابوي كاعد ومحتار صافن وصفنته طولت باوعلي وهزلي رأسه

صكبان ـ أشهاب الحكني للمضيف !!

أشهاب ـ مشه وأخواني باوعوا اليه بكل غضب كمت وحناش صار بوجهي

حناش ـ شيريد منك وشمعنى أنت بالخصوص دز عليك اكيد عندك علم احجييي شيريد منك ابوي

اشهاب ـ علمي علمك رايح اشوفه مشيت وتعديته وكال

حناش ـ ماكو شي ينضم علينا انه ومصلح هم جايين وراك

أشهاب ـ كيفكم مشيت المضيف وهما وراي دخلت وابوي اشرلي اكعد يمه بس من شافهمم اشرلهم يطلعون

صكبان ـ انه ما دزيت عليكم شجابكم يلة اطلعوا

حناش ـ ماكو شيء ينضم اللي تكوله لـ إشهاب تكوله النا هم لن اشك السالفه بيها النا وتخص البنت اللي عمها كتل اخونا

صكبان ـ كعدوا يلة وسدوا الباب وراكم

مصلح ـ بويه مناف مو لازم يكون موجود

صكبان ـ حاجيته قبلكم عوفوا يرتاح شيلة كعدوا

أشهاب ـ كعدوا وابوي عاين لي وكال

صكبان ـ البنت ما تطلع من هالبيت

حناش ـ واخيراً حجي قررت، ولا يهمك الصبح نأحذها على المكبره

صكبان ـ مجيد خلني اكمل كلامي انطم بمكانك واسمع وانت ساكت البنت قررت بخصوصها واحد منكم يتزوجها وقبل كعدة العشائر ازوجها لواحد منكم

حناش ـ شنوووو شنوووو تفضلت بويه لا مو من كل عقلك لا مستحيل شلون تريد من عدنا نتزوج وحده عمها كتال اخونا هاي بدال ما تكول النا اخذوها وطموها بصف كبر اخوكم جامعنا كلنا علمود تزوجها لواحد من عنده

صكبان ـ مجيييييييد كتلك اسمع وانت ساكت خلني اكمل كلامي ترى ريكي يابس بالكوه احاجيكم

حناش ـ خل مناف يتزوجها هو السبب وخل يتحمل أغلاطه

صكبان ـ حاجيته ماله نيه بالزواج وانه فكرت منو يتزوجها !!!

حناش ـ خوش انه اكيد لن محد يأخذ الثأر غيري وانه الجبير واولى بيها ميحتاج تفكير الشغله منتهين منها دام هيج توصلت لهل القرار ما نكدر نغير قرارك ولا نشور عليك انت ابونا وانت الجبير واللي تامر بي يتنفد وهسه اروح اجيب الشيخ ونعقد وادخل عليها

إشهاب ـ مشه راد يطلع وصاح وراه ابوي

صكبان ـ أنت ما يحق الك تتزوجهاا

حناش ـ ليش بويه ليش

صكبان ـ شنو نسيت نفسك متزوج أربع نسوان وحدك بشرع الله حد الأربعة شنو ناوي تخلف الشرع بويه

حناش ـ وشدخل بويه هذا ثأر والبنت محد غيري يتزوجها وياخذها محد يكسر عينها غيري انه

صكبان ـ لا ما تتزوجها اكعد ؏ عقلك لاتصير جاهل اكعدوا وخل نتفاهم بسالفتها لاتعلون كلبي

مصلح ـ بويه اكدر استرخص منك واكولك اني مستحيل اوافق أتزوجها ولا اليه نيه بالزواج تعرفني من يومي اعز حرمتي وعندي منها كومة بنات وما فكرت اتزوج حرمه عليها لهذا طلعني من الموضوع

حناش ـ لك عار الزلم هذا ثأر والبنت محد غيرنا يأخذها لك اكسر عينها وذلها بدنيتها لك عمها جتال اخويي بهيمه تخاف من حرمتك من اسحك شورابك بقندرتي احد يكولي ليششسش

صكبان ـ مجيييييييد اذا تبقى هيج اتفضل اطلع برا

حناش ـ لا بويه باقي والسموحه منك اي شنو قرارك دام اني ما توافق اتزوجها منو السبع اليأخذها

صكبان ـ أخوكم إشهاب

بضحك ـ لا بويه صدك تحجي ما لكيت الا أشهاب هذا رجل دجاجه ما يربط مو عاد زواج وثأر شلون يدبرها بالله هاا اشهاب شو ساكت

صكبان ـ مجيييييييد اطلع برا

اشهاب ـ تقدم ابوي وضربه كف وطرده ومصلح طلع وراه مزعوج واني كمت اريد اطلع وصار بوجهي ابوي، بويه السموحه منك لاتطلب مني هيج طلب ما اريد اتحمل خطيتها واتحمل بذنبها تعرفني ما حاجه احجيلك عني شوف مناف خل هو يتزوجها انه اعتذر منك رافض الزواج منها والاحسن ردها لأهلها وشوف الشيوخ بالكعده شنو يشورون عليك

صكبان ـ أنه لن اعرفك شنو من طينه طينتك وما عندك أذيه ؏ نمله، أنت زلمه شهم وسبع واني من الأول اختاريتك انت تتزوجها لن ما اريد ادخل بخطيتها واتحمل بذنبها وانه عندي بنات والبنت مالها ذنب بس دم اخوك عزيز ولا عبالك نار گلبي طفت لا من ناحيتها ولامن ناحية اللي تسببوا بموت ابني لهذا البنت مستحيل اخليها تطلع من هالبيت مستحيل لهذا يا بويه اريدك انت تتزوجها ولا ترد ابوك يا بعد عيني

ـ بس بويه

ـ اشهاب من يومك مطيع وما تردني شنو تريد تعصي امر ابوك

ـ لا بويه أستغفر الله

ـ خلص راح ادز ؏ الشيخ وهسه تعقد عليها قبل لاتخلص فاتحة اخوك اريد اشوف النيشان تدخل عليها وتجيبه بيدك يلة سبعي

ـ بويه

ـ أشهاب خلص كلت العندي.

إشهاب ـ خله وطلع خلاني حاير ومحتار بزماني ودايخ فركتت وجهي وطلعت وحناش يباوعلي بغضب تقدم عليه

حناش ـ أنت راح تدخل عليها ان شاءلله ادبرها

إشهاب ـ ما جاوبته وتعديته وما اسمع بس يكسر شكوو شيء يمه ما اهتميت اله طلعت برى وبقيت حاير بهل السالفه اللي خلاها برأسي ابوي دخت حيل

" ابوي دزوا عليه زلم ما اعرف يبلغهم يبلغ اهلها ما عندي علم ولا سألته واجه من يمهم والشيخ اسماعيل جابه ومشوا للمضيف وطلع ابويه من غرفتي الظاهر جان يحجي وياها وهي وراه اخواتي لازماتها ما بيها تمشي شافني اشرلي مشيت بصعوبه ودخلت المضيف غمضت عيوني واني اشوفها ادفع بيهن وتصرخ بعلوا صوتها وتتوسل بالشيخ

نمارق ـ ابوس ايدك يا شيخنا انت صايم ومصلي وتخاف الله خلصنييي منهم اخذني لبيت بابا اكيد هسه كلبه محترك على بنته اكيد عندك بنات احسبني وحده من بناتك خلصنييييي منهم ساعدني ابوس شيباتك يا شيخنا

صكبان ـ اخذوها الغرفه ودزوا ؏ الحجيه لطيفه خل تكعد وتحجي وياها يلة مصلح روح جيب الحجيه لطيفه بساع بويه

مصلح ـ تامر بويه

نمارق ـ ساعدونيييي فدوة ساعدونييييي الله اكبر وانت شيخ متخاف الله تطلع بناتك عوفونيييييي عوفونيييييي

احد يساعدنييييي محد عنده ذرة رحمه ما عدكم اخوات

إشهاب ـ احس اريد اكسر الدنيا بس ايديه مربطات طلعت برى بقيت صافن خلاني بوسط هالدوخه ركبها برأسي وصراخها يرن بإذاني وهي تتوسل بالكل

عليل وفوگ علتي علعلونيييي 😞!

" اجت الحجيه لطيفه وابتسمت وهي تكولي

الحجيه ـ انت راح تتزوجها لو حناش الميخاف الله ياهو منكم يتحمل خطيتها كولي ابني لن اخوك مصلح اسأله ما يجاوبني علمود اذا حاجيتها افهمها واخليها تقتنع بواحد يخاف عليها بيها من بين ظلم العادات والتقاليد والعشائر

أشهاب ـ انه حجيه

الحجيه ـ الحمدلله والشكر لك ربي، أستبشر بيك كل الخير أنت طيب و؏ نياتك رايحه احاجيها

إشهاب ـ أتفضلي حجيه منا الدرب وصلتها الغرفتي وامي عسله كاعده وتضرب بعوجيتها وحناش يفتر ومصلح كاعد وصافن والجناين يسكتن بجهالهن وكلها تباوعلي ومنتظرين هالعقد يتم والكل يردون الثأر مني ثأر من حرمه !!!!

" بقيت كاعد بعد مسافه عنهم ومرت ساعة كامله وانفتح الباب وطلعت الحجيه وصاحتلي هاا حجيه

الحجيه لطيفه ـ صيحيلي وحده من أخواتك أريد لبنيه ملابس

حناش ـ خير حجيتنا شتأمرين بي

الحجيه لطيفه ـ كلت لأخوك

إشهاب ـ هسه اصيحلج وحده منهن، عفتها ورحت صحت رحمه وأجت رسل وياها وكفن يمها

الحجيه لطيفه ـ أريد ملابس كامله اريدن أسبحها وتصلي وتستغفر ربها قبل لا يعقد عليها يلة تحركن

رسل ـ صدك تحجين خاله شنو تسبحينا لا هاي العايزه ترى لو تصح فرصه نذبحها ونخلص منها بس ابوي واكف بعينه ماكو لا ملابس ولا غيره يلة امشي رحمه

الحجيه لطيفه ـ وليش ما تتسبح تردن اخوجن يدخل عليها وهي سابحه بدمها الله وعباده ما يرضون بهل العمل لو لن اخوجن ما عنده لا ام ولا اخت عينها عليه

رسل ـ شجاب هاي ؏ هاي لاتخبطين بحجيج خاله وترى عمها جتال اخوي مو بالهين وناره تسعر بكلوبنه وأنتِ مدري شتطلبين.

الحجيه لطيفه ـ ترضين اللي صار بيها يصير بيج

رسل ـ اني مو بعرامتهن انه ترباية زلم عليها العتب انه مخليه اهلي بين عيوني مو اعشك واتمعشك واطيح دم وانهزم خليني ساكته خاله

رحمه ـ رسل كافي عيب عليج، حجيه هسه اجيبلج طلبج وأنتِ امشي ابوي اذا يسمعج تحجين يزلف لسانج الزلم سكتها انتِ شكوو حاشره عصج خلص ابوي قرر وهذا هو

نمارق ـ يحجون بينهم وشوي واجت الحجيه بعد كلامها والمحاولات كدرت تقنعني ورضخت لامر الواقع وسكتت

اخذتني سبحتني بيدها ورجعت الغرفه لمت شعري بإهمال ذبت الشال وطلعت وياها كامت تحجي وياهم اخذتني الهم ودار الحديث يخص العقد جاوبت بهدوء قاتل موافقه وهو كذلك وخلص الحديث وتم الزواج من شخص ما اعرفه ولا حتى شايفته

بس جان احساس فضيع من خلال الاصوات بس حسيت ابوي موجود !!؟؟

ريحة اهلي بالبيت طلعت واتلفت وراي مثل اليتيمه اهلي اهنا احد يجابوني احد من اهلي اهنا حسيتهم توتروا وتغيرت ملامح وجوهم وطلع رجال جبير وكال

صكبان ـ اخذوها الغرفه اشهاب تعال بويه

نمارق ـ باباااااا باباااا تسمعنيييي بابااااا لاتعوفنيييي الله يخليك اخذنييي وياك بابا ليش تخليت عني بابااااااااااا

ليش يا بابااا ليش عفت بنيتك ليش باباااا ليش .

" قيدوا حركتي واخذوني الغرفه وقفلوا الباب وضليت اصرخ فتحوا الباب اريد بابا خلوني اشوفه بابا لاترووح فدوه الله يخليك اخذنيييي وياك بابا اخاف منهم بابا اخاف لوحدي بابا سامحنييي ولاتضل زعلان لاتخلي الزعل يعمي كلبك عني بابا ليش تعوفني يمهم وتروح ليش بعتني الهم ليش يا بابا ليش خذلتني بابااااااااااااا

" وكعت بالكاع وابجي واعاتب بي متأكده سمعت صوته والله جان موجود وحضر العقد مالتي يمكن علمود الحلال والحرام ليش بعتني الهم ليش تخليت عني معقوله ما ضلت بكلبك ذرة حب لبنتك نمارق ليش كسرتني وظلمتني فوك ظلم الدنيا اليه ليش بابا ليش حبيبي

" مسحت دموعي وانه اسمع صوت يم الباب يحجون بينهم والصوت جان يخصني

صكبان ـ اخذها وادخل عليها واريد منك النيشان يلة بويه

اشهاب ـ بويه

صكبان ـ يلة بويه انتظرك

نمارق ـ سمعت صوت الباب ينفتح أبتعدت صرت بصف الحايط دخل وقفل الباب ذب الشماغ على جهه ونصه حركه الفانوس وصل لعندي شتسوي مستحيل اخليك تتقربي مستحيل اني مو لعبه عدكم شوف وافقت بس مو معناها اخليك تتقربي والله اموت روحي وما اخليك تلمسني بعد عننييي والله اشهرك وافضحك بعلوا صوتي عوفنيييي الله يخليك عوفنيييي ورجعني لبيت اهلي

" طفة ضوء نهائي الغرفة صارت ظلمه كلش كمت ما اشوفه وصل لعندي دفعني على الفراش لا فدوه لااااااا

ما خلاني اصرخ سد حلكي بقوة بيده الخشنه وبدأ يتقربلي

واني انازع بين ايديه وارفس برجليه بادت محاولاتي بالفشل بعد نزاع اني وياه تعبت وعجزت انقذ روحي منه

بحكم هو رجال اقوى واضخم مني تقربلي وأخذني وسلبني اعز ما املك ما اعتبرها علاقة بين رجال ومرته مستحيل تكون علاقه لن صارت بالأجبار أعتبر هالشيء أغتصاب أغتصبني وسلب روحي بقطعه قماش بيضه الكل منتظرها وثبت رجولته بهل الشيء كرهته ولو يموت كلبي ما يرف عليه حقدت حقد عليه بهل الليله للموت هل الحقد ما ينزاح من گلبي

" ابتعد وشغل الفانوس ولبس ملابسه واني غطيت نفسي اتهرب منه ومن نفسي شلون سمحت اله ياخذني شلون خليته يسلب اعز ما املك نفضني مثل الريشه وشال الوصله وطلع وخلاني اصرخ بكلبي وكل خليه بجسمي تصرخ بوجع مكتوم ليش بابا ليش عفتنيييي ليشششش

" سمعت صوت اطلاق الرصاص اكيد بعد ما انطاهم الوصله اصوت شك طبلة اذاني يضربون بقوة خليت رأسي على المخده ولفيت نفسي بالغطا وابجي حزينه علة نفسي علنت حداد لن فقدت اعز ما املك ريشه وطارت

" للصبح كعدت والشمس عاليه جسمي ما بيه ارفعه من الفراش رأسي يوجعني بشكل فضيع من الضرب اللي شفته منهم باوعت ايده من الضوء الداخل من البرده من الخارج كلها كدمات مخلوا ايدي وجهي احسه مورم خاصرتي تأذيني انيت بوجع ومسحت وجهي.

" بعدت البرده لونها جوزي طوخ شفت الحوش والجهال يلعبون كبالي يلعبون دعبل ضليت صافنه عليهم وأتذكر طفولتي رجعت البرده من شفت احد جايي رجعت بصف الحايط وانفتح الباب دخلت عليه بنيه مخمره رفعت الخمار خلت ملابس يم رأسي وكالت

رحمه ـ الحمام بصف الغرفه مو بعيد كومي تسبحي الحجيه وصتني بيج وكالت لازم تسبح

نمارق ـ وأنتِ منو والحجيه شنو تقربلج

ـ ما تقربلي مجرد مره جبيره معروفه بعربنا وانه اكون اختهم اخت اشهاب شوفي مو وكت حجي ما اكدر اطول يلة كومي

ـ مشت وصحت وراها ليش تساعديني دام انتِ اختهم

ـ مو علمودج علمود اخوي إشهاب يلة

نمارق ـ طلعت عافت الباب مفتوح وراها نهضت بتعب وطلعت وشفت زلم اثتين يم الباب بيتهم واكو خيم يم بابهم بس الناس ما تبين لن حايطهم عالي حيل يعني مخلين حراسه خرب بحظي اي والله لازم انهزم لازم مستحيل ابقى عايشه يمهم مستحيل احاول احجي ويه هاي البنيه بلكي تساعدني مبينه طيبوبه وفقيره

" شوي الباب أنقفل ما عرفت منو قفله واسمع صياح ويحجون بينهم

حناش ـ منو كلج تفتحين الباب وتدخلين عليها

رحمه ـ الحجيه لطيفه وصتني بيها

حناش ـ أنعل ابوج لابو الحجيه لطيفه وياج يلة انكلعي ويا ويلها تكربن يمها يلة ولييييي

نمارق ـ خفت منه لن صوته جان خشن بي حديه ورهبه تسكن المكان المتواجد بي بقيت كاعده وعيني ؏ الملابس الجابتهن وتذكرت شصار البارحه بالليل وبلحظتها أنفتح الباب ما باوعت بقيت منزله رأسي

" مشه ناحية الكنتور طلع ملابسه ومنشفة وطلع خارج الغرفه مع الأسف قفلها يعني هذا اللي تقربلي البارحه الله ياخذك يا حقيرررر

" بقيت صافنه وانفتح الباب وحسيته وصل لعندي ابتعدت اكثر بدون ما أباوعله

أشهاب ـ أخذي ملابسج كومي تسبحي

نمارق ـ وأنت شعليك بيه

ـ عليه ونص واللي صار غصب عني وعنج السالفه مو مال عناد ومجادله جسمج وسخ كومي تنظفي

ـ باوعتله بغضب الله يلعنكم

ـ ماشي يلة كوميي

ـ كمت واخذت الملابس بقوة وعثرت بالمخده وهو لزمني عوفني لاتتقربلي ولاتفكر تلمسنييي دربالك

ـ عايفج وما اتقربلج يلة امشي للحمام

ـ طلعت وهو وراي دخلت الحمام وقفلته اكيد برة يخاف أنهزم هذول يبقون مثل ظلي وراي وراي شلون ورطة

" فتحت البوري بالنجانه وبلشت اسبح وسبحت اكثر من مره بقيت كاعده بالحمام واقارن حياتي بين قبل وبين واقعي المرير التعيس مر وقت شفت ماكو نهاية لبست ملابسي وطلعت الباب مفتوح هو جان يصلي هاي فرصتي لبست شحاطته وافتريت ورى الغرفه جان اكو سياج بس كله سناجيل وسيم أستحكام صعب اطفر من الحايط شفت باب صغير الباب من حديد والزنجار كاتله وصلت لعنده وفتحته !!!

الفصل الثامن من هنا

لمتابعة باقي الرواية زوروا قناتنا على التليجرام من هنا