رواية الشيهانة والعاصوف الفصل السابع 7 بقلم ياسمين
﷽
العجز : هو نتيجة اخيرة لفوات الفرص، وكتم صوت الذات، والكف عن المحاولة
العجز : عبارة عن شخص آثر الموت بيده، واتهام الحياة بالتقصير معه.
حتى ادركت ان هذا العالم منصف جدا لدرجة ان كل شيء فيه متاح الا الشيء الذي تريده
٠
٠
_ نزلي السجينة من ايدج وبطلي رعونية واذا عندج حجاية تحجيها كوليها بدون حركات المزعطة هاي
حجاها ببرود عينه بالمراية ينزع بخواتمه وساعته
نزلتها ارجف من كد مااغلي وكتله
_ اني ماردت اتزوجك وماراغبة الزواج من اساسه فـ ياريت تحترم قراري وتطلكني
صرفن ردان دشداشته وفتح قفل الباب بهدوء تركني وطلع بدون كلام شفته توجه لجهة الحمام موجود بنفس الطابق مشترك بين الغرف ومفرغيه النا
مسحت دموعي استجمع قوتي مقتنعة بقرارة نفسي لازم الليلة يطلكني مابيها مجال بعد لحظات ورجع متوضي دور على سجادة صلاة بالملحقات اخذها فرشها وحجى قبل ليصلي
_ بدلي قبل ليجيبون العشى وراها نتفاهم
_ واني ماريد نتفاهم
تجاهلني وكبر تكبيرة الاحرام
عاندت مااغير ملابسي وبقيت كاعدة منتظرته يكمل صلاته من خلص ورتبها سحب موبايله اتصل بحارث كاله
_ صعد صينية العشى اخوك هلك من الجوع من الصبح لسة مماكل......... هههههه انجب ويلة ولي كافي هتالة
من ضحك خزرته اني وين وهو ويين غلق موبايله وباوعلي بنظرات جامدة
_ من يندك الباب صيري على صفحة خاف وحدة من عماتي تصعد العشى ويشتغل عدها الفضول تشوف شكو بالغرفة مـا.........
قاطعته اغلي اريد اخلص وكتله
_ وانيييي ميهمني............ مصيرنا نتطلك مااريد ابقى بذمتك افهم هالشيي
هز راسه وحجى
_ مو مشكلة نحلها وحدة وحدة بس اسمعي كلامي وخلي هالليلة تعدي على خير
صفنت بوجهه محتقنة حسيته ماخذني على گد عقلي اندك الباب راد يفتحه وخزرني بنظرة لان معاندة تحركت بزاوية ماانشاف منها وضغطت على بدلتي لاتبين.. الا فتحه ومثل ماخمن صار
اسمعه يكللهن مستغرب
_ شنقصة عمة ليش كلجن صاعدات
_ هههههه بعد عمتك ماكو شي هههههه اني طلبت منهن يعاونني بالصواني والخبز وشوفة عينك هاي صينية للسهرة الكم تنغرشون بيها هههههههه
لمحته اخذ منهن الصواني وكاللهن
_ عاشت اديجن والله يسلمجن توكلن يابة ماكو شي بعد
كالتله عمتي الثانية اسمها زهرة
_ يااا ههههه جنك مستعجل بعد عمتك لعد مريتك وين
نهرها...
_ عمممة.......... ناخذ راحتنا لو شلون وياكم
جاوبته عمتي الاولى رازقية
_ ايي ايي بعد عمتك اخذوا راحتكم لعد شلون ماتاخذ راحتكم يبعد رويحتي مهنى يبعد عمتك..... اسمعها طكته ببوسة وطلعت تهلهل وتهوس
بكلبي شكد حشريات استغفر الله عماتي اغلبهن هيج رغم حنونات بس هالصفة الگشرة بيهن يتدخلن بكلشي
من سد الباب طلعت اباوعله رتب صينية العشى وسمى وكعد گالي قبل ليبلش
_ تتعشين لو مالج نفس
_ مالي نفس وياريت تخلصني خلي نفضها لان الغرفة وجوها خانكني ماريد اعيد الحجي كلساع عليك
مارد علية كعد ياكل لمن شبع وكام غسل ايده طلع الاكل برة الغرفة وسد الباب قفله نشف ايده ووجهه
بالمنشفة وشمرها عالجرباية وحجى بجدية ونبرة ثابتة
_ نحجي عالمكشوف لحد مانوصل لحل يرضيج ويرضيني لو تبقين بهذا وضعج بدون نتيجة
_ مافهمت؟؟ شنو قصدك عالمكشوف
_ يعني تكليلي اسباب رفضج شنوو وليش معترضة وراها الترديه يجرالج
ارتبكت بفوضى افكار نهشت عقلي نهش، وشي بداخلي يكلي احجيله كلشي وخلي وين تصير خلي تصير بلكت وراها نرجع اني وشهم لبعض وبنفس اللحظة خفت ليكون يستدرجني بالكلام مثل ماخوفتني جيهان منه تالي تصير من وراي دموم وكلشي ماحصل
كتله متشجعة
_ ماعندي اسباب بس اني رافضة اتزوج وهالشي من حقي مثل ما اختك هم رفضت قيصر وتفركش كلشي مثل ماتريد وترغب لو من يمي حرام ومن يمكم حلال
خزرني على حجايتي ماهتميت گال
_ منين عرفتي غنى ماتريده ومنو يعرف غيرج بهذا الحجي
_ لاتخاف محد يدري من الكبار امي عرفت منه وكلتلي لاتطلعيها
هز راسه يحك بلحيته وابتسم
_ وانتي نفذتي كلامها بالحرف هسة
_ هذا مو موضوعنا هسة وانت سالت واني جاوبت
اعتبرني مثل غنوة وحل الموضوع من يمك وخلي كلمن يكعد بمكانه اني ماريد استمر وياك
_ ماترهم بعد تنحل تاخرتي هواي
_ ليييش ماترهم ترة اسهل منها ماكو كللهم ماريدها وهم يسكتون غصبا عنهم عااد هم مايشترون حجينا احنا البنات بس كلامكم انتم ماينزل الكاع عدهم بالذات انته عد عمي وابوي يقدروك كلش
_ واني كتلج ماترهم بعد افتهمييي.. غبية انتي لو تثوليها شلون اكلهم ماريدج واني كل عذر ماعندي كدامهم اذا سالوني شنو السبب ست رؤى شحجي وشگول اكيد راح يشوفون الخلل بيج.....
ساعتها شتحجين
بعدين احنا من يمته عدنا مرة تتطلك ووين جنتي هسة الا حجيتي
جان عندج فرصة بالعقد ترفضين او عالاقل جان خليتي اختج توصلني تنطيني خبر انتي رافضة واني اتصرف بدل عنج ليش وصلتينا لهنا وهسة نطقتي
ابتسمت استهزي حلوله وكتله
_ تحسسني عايش بعيد عن اهلك وعمامك وانته تدري بيهم كلش زين شنوو همة وتعرفهم وحافظهم عالغيب لمن يكولون حجاية تتنفذ لو موتنا بسببها
المن بعد احجي واكول فهمنيي انتته بلة
حجيت واختنكت مدمعة عيوني تذكرت شلون كلهم تخلوا عني بالذات الاسمه شهم خسف روحي خسف وراح خلاني افرفح لوحدي كتله مخنوكة
_ بعدين همة منو ذولة التحجي عنهم ترة همة نفسهم الغصبوني عليك واختي نفسها سحبت مني موبايلي لا اسويها واراسلك بعد شلون اوصلك وهنة حاكماتني من كل جهة حتى النفس يعدنه الية هنا
فرك وجهه محتقن اسمعه يستغفر مرة ورة مرة گال
بس فهميني نقطة وحدة لان اني هسة دخت من وراج
_ انتي رافضتني الي شخصيا لو رافضة صيغة الزواج لو قصتج من النهاية شنوو كليلي اذا ضامة عني شي صارحيني واني احلها الج ؟؟
هناا تاكدت هو يريد يختبرني خاف بحياتي شخص ويريد اصارحه........ خفت اجازف والاكثم شكد ماادري بيه هادئ وما عنده عصبية مثل اخوته بس يخوف شخصيته واسلوبه طاغي عليه ماتنحرز تصرفاته هذا الشي دائما اسمعه من اخوتي من يحجون عنه ....
بالنهاية هو رجال تحكمه تقاليد وتربى عالعيب قبل الحرام مستحيل يخليني عايشة بس انطق كلمة وحدة تخص غيره موعاد احب اخوه
واصلا احنا حياتنا محكومة حد كتم النفس بمجتمعنا مايحقلنا نتنفس بدون رضاهم
_ واني كتلك من قبل رافضة الزواج مثلي مثل غنى شنو فرقي عنها وماارفض هم اخوي قيصر زينة الشباب ومابيه تقصير ليش رفضتوه انته واختك
صفن عليه رافع حاجبه گال
_ يعني هسة اني افهم منج جاية تاخذين ثار اخوج بينه وتسويها وحدة بوحدة لو اني مفتهم الوضع غلط ترة سالفة انجبرتي عالزواج وية هذا لسانج الطويل ماعتقد صدكتي راح تكليلي شلون واني اجاوبج
قويت خامة صوتي وكتله
_ مافهمت؟؟شتقصد
خزرني وعاط بيه
_ الاقصده هو تصرفاتج الغبية من تحجين هالكلام الي اكبر من راسج لازم اكو دوافع وراه لرفضج صح كلامي لو اني غلطان
_ اييي اكو دوافع هنة نفسهن الذكرتهن الك ماكو داعي كلساع تحقق وياي ونعيد ونسقل بالحجي
اني رافضتك مثلي مثل غنى وهالشي من حقي مو مصيبة ترة
نتر بيه روحه طالعة وحجى
_يااا بت الناس ووين جنتي هسة الا حجيتي جان سحبتي رقمي من اخوتج ودزيلي رسالة اعرف وضعج شنوو بيه مابيه جان تفاهمت وية اخوج عالاقل وحليتها بالتي هية احسن لييش هسة الا نطقتي ليييش
نزلت دموعي طافحة مرارتي كتله
_ لان ماخلووني احجيي ماااا خلووني امي هددتني تحجي لقيصر وبكر.... كالتلي بس يسمعون بيج ينهوج ومايرفلهم جفن عليج انجبييت وسكتت لان ماعندي حل ثاني
ابتسم يغلي مني وهو يفتح دكم دشداشته بعصبيته
_ وهسة ماراح يخلوج عايشة ثقي بالله العلي العظيم بس انزل بدون بياضج ماتطولين خمس دقايق والنايمين جوة من اخوتج وولد عمج ينحروج عالقبلة وشرط باقرب مزبلة يشمروج تصيرين عبرة لغيرج
شهكت مخنوكة گلبي يوجعني يعني ماراح اخلص هاي هية انتهى كلشي معقولة هاي نهايتي انغصب بشخص ماجان بيوم على بالي واني جنت متاملة بيه يسمعني وينفذ مراح تهون عليه كرامته ينرفض مني
نزع دشداشته ولبس گلبية غيرها وحجى
_ الحجي مامنه فايدة بعد مدام دخلتي هالغرفة وتسميتي مرة الي يعني انتهى كلشي..
انطي لنفسج فرصة ثانية احتمال نظرتج بالزواج تتغير اذا عاشرتيني بالطيب والاسلوب الحلو ثقي واعتقدي ماراح تشوفين مني غير كل الخير بس اسمعي مني واخذي كلامي
من حجى هيج عرفته يريد يضيع عليه مطلبي وانساه كتله منفعلة
_ هذا الحجي مايصرف عندي واني كتلك ماريد نستمر ولا اريد اتزوجك من الاساس وهسة تطلگني فهمت لو....
ماخلاني اكمل حجايتي عاط بيه رافع اصبعه
_اششششش........... صوووتج ولسااااانج لااااا اكصه الجججج انتييي شنوو ماعندج عقل يفكر رادع يردعج الي يطخ هنااا تحجيه وتسويه....
ضربني بطرف اصبعه على دماغي
ودفعني من جتفي وراح للجرباية يزيح بفرشة العرس بعصبية وحجى يتوعد ويتهدد
_ بختج بالناس الجوة جان علمتج شلون ترفعين صوتج علية شاهد الله وقسم بداحي خيبر اذا ما ربيتج من جديد على هاي جسارتج ما اطلع الاكثم بس انطيني مجال اعدي هالليلة وراها اني اربيج
وخلي اكلجياها من هسة بس انزل الصبح وانتي هذا حالج عماتج ماراح يسكتن وراح يوصل الحجي للزلم ساعتها منين اخلصج وولد عمج اتعس من اخوتج بس يعرفون بيج وبسوالفج
مارديت عليه لحد الان متاملة يطخ من يشوفني معاندة...... من شافني متصنمة نتر بيه
_ طفي الضوة خلي انخمد وراي كعدة من غبشة
اشوف حل لهاي المصيبة
تمشيت للضوة اسحل بدلتي سحل طفيته واحس حايط طبك على صدري لدرجة ضاع علية الهوى كعدت بالكاع كاتمة صوتي ابجي واني اشوف احلامي وية شهم توكع ورقة ورة ورقة
عقلي جان مصورلي بذيج الليلة امال مو امل واحد مدام اكو فرصة مالمسني بيها الاكثم يعني اكو مجال انفصل وارجع اتزوج شهم رغم ماكو عدنا حالات طلاك صارت بس تاملت لان اعرفه انسان عقلاني
ورغم ادري ان الرجال بمجتمعنا يحقله يتزوج اثنين وتلاثة وهية تسكت ممنوع تعترض فقررت انتفض لنفسي من البداية واخلص نفسي من هالزواج بسكتة وبينا بدون محد يعرف
واحتمال عمري بذاك الوقت وجلادة لساني وطيشي خلاني اشوف الامور بميزان عقلي اني المسيطرة واني المتحكمة اخلي الاكثم يطلكني وورة فترة تعدي حتى لو بالسنين ميهمني ونرجع اني وشهم سوية ماكو شي بتفكيري خارج عن الشرع والحرام
بس نسيت كومة امور خلفتها وراي نسيت اكو اعراف واكو تقاليد وان اني طلعت لوحدي وواجهت لوحدي وحاربت لوحدي علمود انسان خلصت وياه علاقة حب نظيفة لخمس سنين شفت بيه الدنيا..... شفت بيه سند وامان وتعلقت بيه مثل ماهو تعلق بيه
لسة اتذكر اول شوفة ونظرة اله من كعدت اغسل گدور العزيمة بالحديقة وية جيهان وخدامتنا وادردم على كثرتها وهو جان جاي بالصدفة ياخذ جكايره عباله محد متواجدة بينا
صارت عينه بعيني ثواني عدلت حجابي شعري جان طالع متخردلة لان سمعني شكد عيب اندار منطينا ظهره وطلع ماتاخر دقايق ودخل علينا مناف اخوي يتكرضم
_ ادخلن جوة احنا راح نظفهن. من وراجن شهم كام يحجي علينا لان مخلين الشغل كله عليجن
وكفت داخلة اسمع جيهان تكله
_ الله يوفقه بجاه الحسين من تحركت غيرته علينا لو نبقى وراكم كلشي ماتسوون
دخلت وصورته بقت محفورة بدماغي سمعت صوته يزمخ بمناف لان يدردم مايشتغل انداريت من جهة المجلس مسلط عالحديقة من فتحة البردة اباوعله سوالهم واهس بالسوالف والضحك خلصوهن بسرعة
بسرعة ايده بالگدور وجكارته بين شفايفه يضحك وياهم
من يومها احتل تفكيري وبقيت اتصيد المناسبات والعزايم الي تصير كل فترة بينا واتامل المحه من بعيد لبعيد لحد اليوم الي انعزمنا بيه ببيتهم ورحنا
بيومها تجاسرت نفسي وصعدت لغرفته بحجة اعدل حجابي واخذت وياي غنى وجيهان حتى اضيع ارتباكي كدامهن بالعادة احنا البنات مانطلع كدامهم الا ماندر بالصدفة فحسيتها مجازفة مني قوية
بحيث من صعدنا لغرفته خفت وكلبي يركض ركض
تقليد ماشي عدنا مجلس الزلم وحد ومجلس النسوان وحد وقت جمعاتنا واصلا احنا البنات كلنا على بعض تلاثة والباقي كلهم ولد فـ نستحي نطلع كدام احد منهم
اشرتلهن على غرفته باعتبار هية الاقرب وكتلهن خلي ندخل نرتب نفسنا بيها...... ندري بيهم بالمجلس بوقت جمعة العوائل مايبقى نفر منهم بالبيت
خليتهن وكفن كدام المراية وغنى ترتب ملابسه واني عيني ضاعت بتفاصيلها عطوره ملابسه جربايته احذيته كله حفظته عالغيب
صدگوني ماجانت نظرة عابرة واختفت حسيته دخل وتغلغل بكلبي وذيج النظرة منه وهو يسحب باكيته من الميز صافن علية حسيت عيونه تغازلت بيه باحلى اعتراف وغزل فطري، مشاعر مراهقة جانت توها تفتح گلبها لانغام الحب والعشق
تخيلته بيها وتخيلت نفسي شريكته بهذا المكان واحنا نتسامر مسامر حب وغزل ابتسمت لحد ما طلعتني جيهان من صفنتي وخلتني اعدل حجابي بطريقة عابثة ونزلنا بسرعة
بيومها طلعنا واني ماشفت حتى ظله وبقى تفكيري محصور بزاوية تدور الفرص لشوفته
ومشت الايام والشهور وكدرت احصل رقمه بوحدة من مداهماتي لموبايلات اخوتي وجنت احسه
قنبلة موقوته كد ماخايفة حفظته عالغيب بسرعة
وانتظرت اللحظة الحاسمة الي اتصل بيه واعترفله بمشاعري ومااجت هاللحظة خفت وكلما اقنع نفسي واكلها جازفي وهية لو بالهدف لو بالنجف انرعب واتراجع لياخذ عني نظرة مو حلوة وعباله اني مو راحة..
لحد يوم من الايام طلعنا لبيت عمي حاتم جانت عمة ام اكثم عازمتنا على عصرونية نغير جو
وجانت محضرة الجلسة بالحديقة وعازمة خالة ام شهم ومرة عمي عبد المجيد ام القاسم ونسوان عمي ابراهيم اثنينهن صايرة لمة حبايب
احنا الثلاثة جيهان وغنى اخذنا زاوية وامي ونسوان عمامي اخذن زاوية مرة عمي ابراهيم الثانية سمية لزكت روحها ويانا
وهاي كل مرة هيج تسوي اذا نگلها شعندج ويانا واحنا بنات وانتي متزوجة ماكو عدنا وياج قواسم مشتركة تزعل، واذا بقت لازكة بينا ماناخذ راحتنا بالسوالف تستلمنا هية سالفة ورة سالفة لمن تلعب نفسنا من الرد عليها عمرها اكبر من جيهان بست سنين بس هية تحاول تبين نفسها صغيرة تكول ماارغب كعدة العجايز شجايبني يمهن وتخلصها علينا سوالف تافهة
بالاخير خلصت سالفتين براسنا غمزتلي جيهان وطفرت كالت لغنوة
_ كومي غنوة اريد للحمام انحصرت....كالتلها غنى
بفهاوة
_ اي عيني روحي قابل ماتندلينه التواليت
شلعتها من ايدها وكالتلها تضحك جذب
_ دكووومي شكد صايرة عجوزية كشرة بعدين خاف اخوتج موجودين استحي منهم عاد انتي ويانا اهون
طفرت وياهن من شفتها فرصة نشرد من لزكتها
دخلنا لجوة وخليناها تباوع ورانا رادت غنوة تاخذنا لجهة الحمامات عطنا بيها نضحك فهمتها مسوين مقلب حتى ناخذ راحتنا تالي اخذتنا للمطبخ كعدنا بيه وضيفتنا مليكا خادمتهم عصاير ضلينا نشاقة ونضحك وراها عزمتنا نصعد لغرفتها هناك اخذنا راحتنا بعد اكثر نزعنا الشالات والجبب وبقينا لليل ماخذتنا السوالف ماحسينا بالوقت وحتى امي نسيناها
لمن صاحت عمتي ناهد ام اكثم من جوة علينا طلعنا نلبس بشالاتنا كالت تضحك
_ يلة امي ابوجن استعجل امجن ماقبل تتعشون يمنا عبالي اعطلكم اكثر، انزلن شهم راح يوصلجن مدام اجه صدفة بسيارته
حسيت گلبي طار مني راح اشوف شهم وهم يوصلنا هوة كلش هواي على گلبي
لبسنا جببنا وعدلت نفسي على اخر حبة واني گلبي يركض ركض نزلنا لكينا
نسوان عمامي كلهن رايحات والحديقة ترتب بيها مليكا وتنظف الثيل
طلعنا للباب شفنا الاكثم وهو واكف وياه يسولفون جيهان تلثمت تستحي منهم سلمت وعبرتهم للسيارة امي صاعدة قبلنا واني سلمت وتبعتها صارت كعدتي بالطرف من جهته هوة
ماتاخر ثواني لمحته سلم على عمة ناهد والاكثم وصعد وهو مدنك حجى
_ يالله....... مساكم الله بالخير عمة
_ مساك الله بالخير والعافية بعد طولي طولك شلونك انته ابوك شلونه عبالي اليوم اشوفه اسلم عليه بس ماحضيت بيه
شغل السيارة ورفع عينه يجاوبها صارت عينه بعيني بالمراية دنك وحجى
_ الحمد لله بخير رحم الله والديج، الوالد تدرين بيه هذا اسبوع الوالدة واستحقاقها الاسبوعي منه صارله تلث ايام يمنا.... حجاها وابتسم
كالتله تضحك
_ حقها والله ونسيت اسالها اليوم عنه اخذتنا السوالف وراح عن بالي سمعت بيه من ابو قيصر ماله خلك هالفترة من ورة فصول ابراهيم الله يهديه هالرجال مادري يمته يعقل ويركز تفكيره
_ الحمدلله على كل حال همزين من سمعتي هالطراطيش عنه من عمي احنا الله وكيلج كلشي مايحجي اليكول ناكله لاخوه اذا فضفض يمنا
_ هو هذا ابوك يمه....... من يوم يومه هيج.... وحتى اخوته تعلموا منه هالاسلوب وصاروا كتومين مثله
بعدين على شنو يتكتمون ومرته سمية بكعدة وحدة تكت الاول والتالي لو ما صفية تلزم حلگها بكل سالفة جان كتت الخمير والفطير عوود يردن يسترله
مايدرن هو مفضوح بيهن وبلاهن من عمايله
دار السيارة للفرع مالت بيتنا وركنها على صفحة خلى جهتي لزك بحايط الجيران حشرها حشر من اريد انزل لازم من جهة امي الا اكدر انزل كاللها مرتبك
_ احمم الله كريم شنسوي بعد تعودنا عليهم بس عمة بلا زحمة عليج بطل ماي وياج نسيت انزل واشتري اذا متصير زحمة عليكم
نزلت وكلتله
_ هسة وليدي جنك على ماي صبر اجيبلك
نزلت جيهان جم خطوة واني وراها قبل لا انزل تحمحم وحجى
_ انطي صبر يابة لاتنزلين
ضليت مفهية شسوي من الصدمة باوعتله متخردلة
كال
_ الليلة ساعة 12 راح اتصل بيج على رقمج اريد تجاوبيني عندي كلام اريد احجيه وياج ضروري ترة
فتحت عيني مفهية وجسمي صار يختض من شافني فهيت فاتحة حلكي حجى مبتسم
_ انزلي لاتفضحينا واحنا بعدنا ماگلنا بسم الله ترة
حسيته لطمني بعيني نزلت عالسريع ركض لغرفتي اريد اسيطر على جسمي ماكدرت كلما اباوع لايدي الكاها ترعش وكلبي دكاته الف... فرحة على نشوة وفوضى مشاعر ماتخيلت بيوم اعيشها وحتى بيومها المفاجات جانت بسباق وياي ماعبالي كلشي يصير بسرعة بسرعة
٠
٠
الاكثم
كعدت الفجر عيني مااخذت نوم غير لحظات شسوي لهاي المصيبة الكاعدة بالزاوية وتغفي
وكلما اتذكر توصيتي للوالدة والحارث ممنوع يندك الباب علينا بازعاج وتلزم فضول عماتي عنا احمد ربي واشكره الف مرة جان فضيحتي وية هاي الرعنة صارت علني
اخذتها تجربة من زواج عمي ابراهيم الاخير اهلها فضحوهم فضيحة لان تاخر ربع ساعة وطالبوا ببياضها من لحظة دخوله عليها لسة اتذكر الموقف شلون زلمهن حركوا الموبايلات على امهاتها يردون البشارة وما تركن الباب لحد ما طلع
الكلام نصا عن والدتي ذكرته الحدث كدامنا مستغربة هيج عادات عد بعض الناس
لهيج سبب رفضت اساليب الهمجية بهيج امور خاصة
ورغم هددتها لرؤى تخويف ، متامل مسالة عنادها لان اخوها رفضته غنوة وتريدها وحدة بوحدة
واعرف رؤى من لسان الوالدة عدها شوية رعونية متركب وية هالصفة عناد طايش ذكرتني بعمي ابراهيم سبحان الله نفس الصفات الي مطيحات حظه
نزلت من الجرباية لكيتها نايمة ببدلتها عالفراش
جريت نفس واني متاكد بهاي اللحظة هية ماشايلة بس صفة العناد والرعونية وحتى الخبال اضيفه وياهن
والا شنو الي جابرها تعاند تنام بهاي الكوشة شكبرها
كعدتها بيدي طفرت متخردلة بس استوعبت وضعها حجت بنتر
_ شتريد اكثم ترة حجايتي ماتنازل عنها واريد تطلكني واذا جبرتني اسوي الي براسك احط السجينة بكلبي واخلص من هالعيشة
وكفت وجاوبتها بنفس اسلوبها
_ واني ما ميت عليج... وثقي وآمني بالله بس راح تنطقين هاي الكلمة كدام اهلنا واخوتج راح يسحلوج مثل الحيوانة من يسحلوها للمصلخ لان ماعندج سبب لو مبرر للطلاك
هاي وحدة نجي للنقطة الثانية
كعدت بيني وبينها سانتيمات جدحت عينها لتصرفي كتلها بتحذير
_اني راح اكبر عقلي وياج ونستر هاي الليلة بعذر شرعي تضبطين الدور عدل من جانبج لان ساعتها اذا انكشف المستور وحجيتي الصار بينا ساعتها راح
اشيل عقلي واخلي مكانه حاوية زبالة معفنة وشيجي ببالج اسويه راح انفذه عليج
لان مستحيل اسمح لبشر يقلل من رجولتي كدامي ووراي وبسبب وحدة رعنة مثلج
نقطة ثالثة والاخيرة خلي اوضحها الج حتى تعرفين عقلج وين ترسيه
_ طلاك ماراح يصير لو شكد ما راح تحاولين محد راح يخليج تنطقين هالكلمة بحرف
دمعت عيونها ومسحتهن بعصبية كملت على مسامعها تحذيري
_ راح اخليج تفكرين بوضعج عدل بس لتتوقعين اسمح بهذا استهتارج كدامي وكدام غيري مرة ثانية،
خلال هالمدة عيدي برمجة عقلج وشغليه صحيح وشوفي مصلحتج وين تصب فهمتي عليه اعيد
وكفت اريد اطلع للحمام كالت بحشرجة مخنوكة
_ واذا كدرت وقنعتهم يطلكوني منك راح تطلك؟؟
صفنت على سؤالها مستغرب لاي درجة لعد ماطايقتني واني جنت اشوفها مرات بالصدفة حتى ماتذكر مسويلها شي لو ماذيها بكلمة
معقولة سامعة عني شي مخل واني مايوم طلعت مني العايبة؟؟لووووو......... فركت وجهي انعل الشيطان استغفر الله ياالهي واتوب اليك استغفر الله
بناتنا تربيتنا ماعدهن سوالف التخشخش ابد وسمعتهن ذهب مستحيل الي يجي بالي اصدكه بيوم
_ اذا كدرتي تاخذين الامان من اخوتج مايضروج ساعتها اني راح اطلك، مامجبور اخليج بذمتي وانتي مغصوبة عالزواج
تركتها وطلعت اتوضى صليت بالصالة علما كملت دخلت اخذ غفوة للصبح الدنيا بعدها ظلمة
لكيتها مبدلة ملابسها وتحاول تخلي البدلة بالجيس مالتها
شفتها تراسل باختها ماتاخرت لحظات اندكت الباب فتحته الها اسمعها كالتلها
_ بشري شلون صارت بطنج
_ مووتتني من الوجع جيهان حتى علاج دورت مالكيت وضليت ممغوصة من الالم
_ ديلة هاج اشربي هذا الشراب بلكت تصيرين زينة بسس اكلج هية احممم يمته اجتج
_ ورة العشى حسيت بالم ولنص الليل الا صار اقوة
متت من الوجع تالي فكرت اراسلج تشوفيلي حل
_ تمام لعد اني راح ابلغ امي حتى الصبح محد يسالج من عماتي
_ تمام.........سدت الباب ودخلت خليتها تحوم بالغرفة مثل المضيعتلها ضيعة ماحسيت بعد لحد ماكعدتني هية من بعيد مرتبكة واسمع الباب يندك كالتلي
_ اكعد افتح الباب شوف منو وانزل لجوة طلبوك
فركت وجهي ونزلت افتح الباب باوعت للغرفة لكيتها مرتبة كتلها
_ راح ادخل للحمام اغسل حضريلي دشداشتي ولوازمها
ماسمعت منها حتى كلمة حاضر
فتحت الباب وطلعت لكيت امي برة بوستها براسها واديها وباركتلي مدمعة
_ بالمبارك حبيبي شايف كل الخير يارب
_ الله يبارك بيج يمة وجهج من اهل الخير ان شاء الله
خلت ايدها على صدري تتطمن وحجت
_ شلونها ليلتك وية عروستك خو ماشلعت كلبك بسوالفها
_ احمم لا الحمد لله وردة رؤى بس اذا قصدج غير شي ترة مثل ماكلتي عدها عذر شرعي فعلا
جاوبتني مصدومة
_يااا واني عبالي تجذب علية من كالتلي جايتها وخابرتك واني مامصدكتها..... اووف منها ومن سوالفها
_ ماصار شي اخذي راحتج حبيبة
تركتها دخلت يمها واني دخلت للحمام خلصت وطلعت لكيتها ترتب بنفسها كدام المراية لا محضرة دشداشتي ولا عگالي
اللهم طولج ياروح سحبت دشداشة وعگال وغترتي البيضة بدلت وتعطرت ونزلت طشت الهلاهل من عماتي وامهاتي وراي الظاهر صعدن يمها
طلعت للمضيف سلمت عالشباب وعمامي ولكيت اكو ضيوف عدهم الوالد منشغل وياهم كعدت قريب منهم ابوي مايرتاح الا يشوفني كدام عينه
صبولي گهوة شربت فنجان وهزيته اسمع الرجال يكله
_ مابيها شي ابو اكثم الرجال هيج مجلب بابنه وترة هاي مو اول مشكلة يسويها قبلها عدها سوابق فـ على شنو يجازف ببناته ونفسه من وره واحد مسربت وحتى انتم راح تدخلون باشكال وية هيج عشاير بدون لاناقة ولاجمل الكم بيها
ابوي سكت يتصنت اله حاير كتله مستغرب
_ اني اطلب الرخصة والسموحة من والوالد والكاعدين اذا يسمحولي احجي...... اشرلي ابوي براسه يعني تفضل كتله للرجال
_ ابو منوو ولاصغرا بيك
_ ابو محمد اغاتي اني من طرف عشيرة * طلبوا مني اتفاوض وياكم ونشوف نهية الموضوع وين لان الصراحة ماراغبين يتصادمون وياكم من ورة واحد ناقص مايسوى نعال بسوك النعلجية حشاكم
_ ابو محمد ولا احنا قضيتنا يم الولد حتى نقيسه بهذا المنطق الي انته تتنطق بيه
ترة ابوه رجال فقير حالته تعبانة وابنه مو بوعيه جابهم سحل مناك لهنا شارد من ضيم الدنيا وناسها ودخل عدنا طالب الحل.... وكلكم انتم الكاعدين تعرفون شنو معنى الدخيل لو جان كتال ابوك هم تضيفه وتخليه على راسك
هالمعقول نزيح الانسانية من ضمايرنا ونگله سلم ابنك للموت لان والله مانريد نتشاكل وية عشيرتكم
هذا شلون منطق منك الله يخليك حجي
_ اييي بس لاتنسى ابنه اتعدى وكتل شاب مث
لمتابعة باقي الرواية زوروا قناتنا على التليجرام من هنا
بدل ماتدور وتبحث علي الروايات خليها علي تليفونك وحمل تطبيقنا
