رواية جريمة قتل الفصل السابع 7 بقلم جمانه السعيدي
حسام...... أخذنا امي دفناها وسوينا فاتحه والناس انكلبت علينا كلاب
لان احنا حيل معروفين
بلفاتحه اني كاعد على الكرسي ما اكدر اوكف على حيلي
كلما اتخيل شلون احتركت
اموت الف موته
احس بلذنب اني ليش عفتها وحدها
الشغل يتاجل ويتعوض بس امي ماتتعوض ابد
خلصت الفاتحه على اعصابي
خابرني الضابط كال وصلت التحاليل من المعمل الجنائي
تعال استلمه
رحنا اني وصادق المركز الشرطه
وهنا الصدمه الجبيره
الضابط..... اسفه اكللكم الوالده ماتت قبل الحريق
حسام..... شنو يعني
الضابط يعني ماتت مخنوكه وكانت اديه مربوطه للكرسي وبعدين الحريق مفتعل حتى يغطي على الجريمه
صادق .... يعني تقصد قتلوها وبعدين حركو البيت حتى تختفي آثار الجريمه
الضابط..... بلضبط انت هسه افتهمتني انتم هم عدكم اعداء
صادق..... ابد ماعدنا اعداء كل الناس تحبنه وتحترمنه
حسام ..... منو الي سوا هيج
الضابط..... هم عدكم فلوس مجوهرات شي مهم بلبيت
حسام ..... اي عدنا فلوس ورق وذهب
الضابط..... اتاكدتو منهن موجودات
صادق ..... احنا مادخلنا للبيت من وقت الحريق ولاشفنا فاجعة موت امي نستنا كلشي
الضابط ..... ممكن ترحون تتاكدون بنفسكم ولو الحريق التهم البيت كله
لان الضاهر الحراميه راشين نفط او ماده سريعة الاشتعال على البيت كله حتى يتأكدون ماتبقى اي ادله ضدهم
حسام ..... ذوله مخططين زين بس شلون عرفو هي وحدها بلبيت
وشلون فتحتلهم الباب احنا بيتنا بي كامرات واني أكدت عليها ماتفتح الباب لاي احد اله تعرفه يله
الضابط...... يجوز شخص تعرفه ومامنه بي وفتحتله الباب
يجوز واحد من اقاربكم او احد معرفه
حسام ..... استبعد اي احد من اقاربنا لان اقاربنا ناس شبعانيين وامورهم الماديه زينه وبعدين شمعنا بهذا التوقيت
الضابط .... احنا راح نستمر بلتحقيق بلكت نلكا طرف الخيط
رحنا البيت امي يهد الحيل طبعا صادق كاعد عد اهل زوجته منا لمن يدبر مكان يكعد بي
ولو همه ماعدهم احد بيتهم بس زوجته وامها واخوها
دخلنا البيت امي الحياطين سوده
وكلشي متحول رماد الكنتور محترك بس الوجه مالته
بس مالكينا صندوك الذهب والفلوس
حتلو محتركات جان بقه منهن شي بس الضاهر الي قتل امي اخذهن قبل الحريق
رجعنا وحنا نضرب اخماس باسداس منو الي امي تعرفه
وفتحتله الباب
واذا فرضنا طفر من الباب الخارجي شلون دخل للبيت
البيبان كله سليمه ولاباب مكسور
بعدين هي لو شايفه شخص غريب جان خابرت علي
حسام .... رجعت للبيت واني احس نفسي مريض
وماليه خلك الكل شي
بس نايم واكعد اصلي واكل شي قليل وارجع انام
صورت امي ماتفارق بالي ابد
يوميه اخابر الضابط اسئله ماكو شي جديد بهذا الموضوع
ويكول لا
منى.... هااا حسام شنو الجديد مالكو الي قتل عمتي
حسام.... انشاء الله يلكونه اله اشرب من دمه
اكيد راح يطلع امي شريفه ومومنه ومستحيل حقه يضيع ابد
خلص عشر ايام وماكو اي نتيجه ولا اي دليل
صادق ....كام يلح عليه ارجع الشغلك راح تتخبل من كعدت البيت
واني رافض اطلع للعالم او احجي ويه اي احد
ومنى تتوسل بيه احلق لحيتي وشعري
مااكدر تفتهمون شنو ما اكدر الي راح مني شي غالي
ومايتعوض ابد
فات اربع اسابيع وصادق بدا يعمر بلبيت ويصبغ بلحيطان وغير البيبان
وجاب اثاث جديد
ورجع هو وزوجته سكنو بلبيت مره ثانيه
اني ابد مادخلت الهذا البيت مره ثانيه
اشوف امي بكل مكان واذكر حجيها وسوالفها الحلوووه
يايمه حسافه رحتي منا وشلون رحتي على ايد واحد نذل شاف قوته عليج
شاف قوته على مره جبيره وعاجزه وماتكدر ادافع عن نفسها
لو ماخذ الذهب والفلوس كلها ومآ قاتلج
جان كلنا فدوه اللج اهم شي انتي سالمه وعيونج بلوجود
ولله لو الزمه هذا النذل اله ادمر حياته تدمير
طلعنا الاربعين ورحنا زرنا امي
واني رجعت الشغلي بس ولله ماليه واهس ابد
كلشي مايفرحني بعد عين امي
بس هي هاي الحياة لازم تستمر
ورا تلث اشهر
وبيوم اتسوكنا بضاعه جديده جان بداية الموسم الصيفي
تعرفون سبألت ومبردات ومراوح وثلاجات ومجمدات جانت بضاعه هواي كلش
اني متعلم اخذ القائمه مالت المسواك للبيت واراجعه
راجعتها بليل طلع بيها خطء بلجمع
جان الوقت كلش متاخر كلت خليها على باجر واخابرهم
الصبح كعدت منى حضرت الريوك اتريكنا اني وياها
وكالت اريد انزل للسوك اشتري غراض محتاجتهن
كتلها ميخالف براحتج
طبعا اهلها من ماتت امي شفتهم بلفاتحه وبعد ماشفتهم ابد
همزين مايجون للبيت لان اني ماليه خلك واحس روحي بخشمي اذا اشوف مغثتهم اطردهم
ويمكن حتى منى اطردها وياهم
ولله ضايج ومكتئب بسبب وفاة امي
جمانه السعيدي
على العموم طلعت شغلت السياره شويه ماشتغلت
بعدين حاولت وياها تقريبا عشر دقايق اشتغلت
اذكرت القائمه ماجبته حتى اخابر واكلهم على الخطء بلحساب لان هيج أخطاء ماتكون بمبلغ قليل
اني عندي مفتاح دخلت اني خال القائمه على الميز بصف الجربايه
جان اسمع منى تخابر
منى.... مرتضى فدوه لاتجي ابد لان حسام يشك باضافره
ودير بالك يشوف هاي السياره الحديثه الي اشتريته
راح يشك بيك اكثر فدوه استر علينا مادام محد عرفنا
ولا الشرطه اتعرفت على القاتل خل الموضوع يمر بسلام
مو عبالك علي ابن عمك قتلته والشغله عبرت لان اهله فقره وماشكو بيك حسام غير
حسام يكول ادفع كل ما املك واعرف القاتل وعندا معارف يوميه يتصل عليهم
والمصيبه مو بس انت تلوحك اني اضيع وياك
ام حسام لوما اني مافتحت الباب
حسام واكف واحس صاعقه طاحت عليه وشكت راسي شك
اني سمعت صحيح
هاي منى الي تحجي
منى واخوها كتلو امي
اني مكعد المجرمه ابيتي
فتحت الباب
هي شافتني ونصعقت وطاح التليفون من ايدها ماكانت متاكده اني سمعتها لو لا حاولت تتلافه الموقف
وصاحت حسام يمته رجعت
اني طفرت عليها ونزلت على خدها براشدي وكمت اضرب بيها بدون وعي
بعدين اخذت تليفونها وقفلت الباب عليها
طلعت وخابرت صادق كتله جيب الشرطه وتعال لكيت قاتل امي
جمانه السعيدي
صادق.... وين اجي
حسام..... ابيتي منى واخوها هم الي قتلو امي
منى كامت تكسر بلباب بكل قوتها وتصيح انت فاهم الموضوع غلط انت مافتهمت
افتح الباب خلي افهمك
حسام افتح الباب اني منى حبيبتك
حسام ارجوك اسمعني خلي افهمك
اتصدكون من العصبيه راسي كام يوجعني حسيت راح تجيني جلطه
بطني كامت ترجف
رجليه اريد اكوم افتح الباب ما اكدر
الشرطه وصادق يدكون بلباب واني مثل الحجر كاعد ما اكدر اكوم على حيلي ابد
كمت امشي واني لازم الحايط
الصدمه اكبر من عقلي
منى حبيبتي الي حبيتها واختاريتها وماخليت شي بنفسها
تتفق هي واخوها ويكتلون امي
ولله عقلي مايقبل يصدك ابد
فتحت الباب ودخلو الشرطه واني اطيتهم مفتاح الغرفه
وكلت الصادق الزمني بعد ما اكدر اوكف ابد
صادق حضني ودخلني للبيت وكعدني على الكرسي
طلعو الشرطه وهمه ساحبينها من اديها
وهي تصرخ اني بريئه
منى.....حسام كلهم يعوفوني اني ماسويت شي انتم فاهمين الشغله غلط فدوه عوفوني
انطيت تليفونها للضابط وكتله هذا التليفون بي كل الادله الي تحتاجونه
صادق جابلي ماي شربت وغسل وجهي
بعدين ساعدني كمت
ورحنا وراهم المركز الشرطه حتى ادلي بكل اقوالي بهذا الموضوع
بس وصلنا منى جانت تبجي منهاره فد مره ورفضت تحجي اي شي طلبت محامي يدافع عنها
وكفت اكبالها تكرمون وتفلت عليه وكمت اصيح
وللج ليش ياساقطه ليش بيش قصرت وياج شنو ناقصج
شنو طلبتي انتي واهلج ومآ نفذته
ليش ياناكرت الخبز والملح اخر شي تتفقين ويه اخوج
وتكتلون امي
ليش ياعارات
امي تحبج وعاملتج معامله طببه وجانت دوم توصيني عليج
علمود الفلوس لوكايلتلي واني منطيج فلوس
اخوج يريد سياره جان اني مشتريله سياره وعايف امي
شلون تقتلينه وهي مأمنه بيج وفتحتلج الباب
الله لايرضا عليج دنيا واخره ياحقيره
هذا عذاب الدنيا وبعد عذاب الاخره
الله لايسامحج الله ينتقم منج
لمتابعة باقي الرواية زوروا قناتنا على التليجرام من هنا
بدل ماتدور وتبحث علي الروايات خليها علي تليفونك وحمل تطبيقنا
