رواية عذابي الأزلي الفصل السادس 6 بقلم الزهيرية
من لم يتعلم الأدب في بيت أبيه
لاتسطيع البشر ان تربيه
ومن شب على شي شاب عليه
مينا/ صح الي گال ربك العالمين ما ينطي كل شي سبحان الله احنه دائماً نسرع وبكل امورنا اني في وقت التجهيز حسدت جوانا لان مخلو شي بنفسها وكله يجيبولها أغلى الاشياء وصح اهل مصطفى ما جابولي اشياء تذكر بس رب العالمين يعوض شي بمكان شي ومن عقدنه اني ومصطفى وتم عقد جوانا وميمو وطلبوا انه يجون يلبسونه النيشان
وبالفعل دخلوا ومصطفى وميمو بس اني ميزت مصطفى چانت لازمه ايد مصطفى وتهلهل وطش عليه چكليت لان ما معقوله ام مصطفى تلزم ايد ميمو وتهلهل وطش چكليت وأخته وراهم بيدها الكيكة بس من شفت مصطفى بصراحة انصدمت بشكله يعني إذا اريد أوصفه كلمة حلو قليل بحقه مصطفى عيونه خضر وبشرته بيضه وشعره اسود مرجعه ليوره وشواربه سود ولحيته خفيفة وجسمه حلو وطول بضخامة يجنن بحيث اختي فرح اجتي يمي وتگلي
فرح/ ولچ شوفي عريسچ يجن بس خطيه جوانا نضربت بوري معدل
ومن فرح گالت نضربت بوري جوانا التفت على عريس جوانا هذا صدگ خطية جوانا نضربت بوري لان العريس اذا الله ما مكذبني يمكن طوله متر و30 سنتم وضعيف كلش ولونه اسمر طوخ وجهه خطيه أملط حتى شوارب ما عنده وحشا خلقة الله صدگ يلعب النفس بحيث من صدمة جوانا ظلت خطيه بس صافنه
أما اني وصل يمي مصطفى ولزم ايدي وگومني ومن وگفت انطاني باقة ورد وباسني من گصتي ورجع لزم ايدي وباسها ورجعت گعدت وهو گعد يمي
وامه فتحت علبة الذهب وظلت شوفها للموجودين وهي تگول / الذهب ما يسوي ما يكبر والرجل هو اليسعد المره
ومصطفى رجع آخذ ايدي وباسها ولبسني الحلقه ورجع لبسني الگلاده وأخو ويه كل حركة يصورنه واخذ السچين وخلاها بيدي ولزم ايدي وقطعنه الكيكه واخذ بالشوكة كيك وقربه يم حلگي ونطت اخت مصطفى واسمها اعتماد من يمها تگول
اعتماد/ عيني لا تاكلين حلويات انتي سمينه شصيرين جاموسة
جاوبها مصطفى بس كلامه ويايه / اكلي حبيبتي اريدچ سمنين بعد اني ما احب ذني عبالك گصب مطيرچيه وراح اعوفلچ هاي الكيكه كلها أكليها عليچ الله
صدگ ما تحملت ضحكت ومصطفى يباوع عليه ويگلي
مصطفى/ فدوه لهاي الضحكه يله اكلي وراح انطيچ الشوكة وخلي بيها نص الكيكه وكليني ترى جوعان الصبح اجيت من الشغل وبين الحلاق وتحضير نفسي ما لحگت أتغدى
واني اكلت الكيك من ايده ورجعت هم خليت كيك بالشوكة واكل وكل ما ياكل يرجع يگلي بعد وشربني عصير واني هم شربته وانتبهت على جوانا تخبلت لان خطيبها شلون عبالك رجل آلي اخته الي تگله على الشي يله يسوي حتى الحلقه او المحبس او الگلاده كذلك إلا اخته تعلمه يسوي الشي يله يسوي وهي تتعذر انه الولد مرتبك
وبصراحه اني بالنسبه الي چانت الحفله حلوه خصوصاً خفت دم مصطفى وأنتهت الحفلة ومصطفى وما قبل أخواته ياخذن البقى من الكيكه وهو يگول تبقى الكيكه لمريتي ومن دى يطلع باس گصتي ورجع باس راس امي وانطها فلوس البدله والصالون وبوس أبويه وطلعوا وبعدها طلعوا ميمو واهله
وبس طلعوا تخبلت جوانا وگامت تلطم على وجهه وتعيط وهي تگول / ما أريده شنو هذا جايبي الي مثل القرد بالحرام مثل الشاذي
ودخل أبويه عاط بيها قيس / وجع وقزرقط شبيج شنو تردين نجيب الچ براد بت تزوجي هو هسه الشباب إذا حلو ما عنده فلوس فگر واذا ماحلو عنده فلوس انوار عقلي بنتچ وفهميها ان الشكل ما مطلوب بالزواج
وعافنه ابويه وراح ورجعت امي على جوانا تقنع بيها وتگللها / ولچ يمه إذا حلو وهو مطيح حظچ شسوين بي اقلها ما حلو عنده فلوس يدللچ وماكو وحده تباوع عليه شبيچ يا حظي انتي حلوه يدللچ
جوانا/ ادري بس گليلي شلون راح انام يمه شكله يلعب النفس ادري اني راح أنام بصف الذهب والفلوس لو راح آنام يمه الله يخليچ والله نفسي ما تتقبله أقنعي أبويه خلي نفصخ العقد
أنوار/ ولچ يمه اذا الولد زين شسوين بشكله قابل راح تحطي بمعرض يمه أهم شي مكفيچ ومدللچ
جوانا مو هاي مينا زوجها يخبل شفتي شسوه وياها يوكل بيده ويبوس بيها اني حلقة گوه لبسنيها
أنوار/ الله يسعدچن اثنينچن بناتي بس ماكو وحده قدرها يشبه قدر الثانيه گولي يا الله وتوكلي على الله يمه بعد صار العقد وأنتي تعرفين ابوچ ما يقبل اي احچي يله نزعن البدلات خلي اوديها للصالون وانطي حساب مينا
ورحت نزعت البدله ودخلت اسبح ومن طلعت من الحمام لگيت جوانا ميته بچي وهي دخلت للحمام وهم كذلك چانت تبچي وانقهرت عليها لكن الظاهر هذا قدرنه من الدنيا وكل واحد ياخذ نصيبه
بس اني من تمت الخطبه طول الوقت اكو شي شاغلني وهو الصار ويايه يم السحار احچي لمصطفى لو اسكت
بس اني أخاف شلون راح نزوج اني ومصطفى وهو راح يسوي بيه مثل ما سوه بيه السحار هاي الأفكار تضارب براسي واريد احچي بس المن احچي أخيرها قررت اسال فرح
ومر تقريباً على يوم العقد 4 ايام وفي ذلك الوقت ملتمين على العشا وابويه من يتعشى ويانه معناها سكوت لازم حتى ما نحچي ودگ موبايل ابويه ومن رد طلع مصطفى وما اعرف مصطفى شنو گال بس جواب ابويه سمعته
قيس / ابني مصطفى الله بالخير عليك انت خطبت مني بنيه امنتوا بالله بس مال طبه وطلعة وموبايل ما عندي هذا الحچي اني من البنيه صير في بيتك تريدون تطلعون تريد تجيب الها موبايل هذا بعد شي راجع الك البينه في وقتها مرتك اما هسه لا اعذرني دى أتعشى هسه
وغلق الموبايل بوجهه ومن خلصنه عشا وانتقلنه للمطبخ رجعت جوانا گالت لامي / شوفي القرد ميمو بالكذب ما يخابر يگول اطلعها مثل مصطفى
وآمي حتى شلون تخفف عنها بس اجتي تكحلها عمتها وجاوبتها
أنوار/ يمه هسه شكو طالعه ويا شو هو شاذي ضحكين الناس عليچ
وخطيه جوانا گامت تبچي وتگللها / أذا انتي امي هذا جوابچ لا عتب على الناس
وراحت للغرفه وامي تباوع عليه وتگلي / اني شلون بجوانا راح سوي عندي جلطه ولچ يمه مينا احچي وياها وباچر تجي فرح بلكي الله تحچي وياها
واني كالعاده صامته ما اجاوبها ومن دخلت للغرفة لگيت جوانا تبچي ومن شافتني گالت / مينا لا تزعلين مني لان أقارن مصطفى بالقرد ميمو والله ترى ما حاسدتج الله يهنيچ ويسعدچ بس انقهر
مينا/ اعرف جوانا احنه هنا ما النه حق نعترض ما نعرف الدنيا شنو ضامه النه لازم ندعي من الله يرحمنه ويستر علينه
وونمنه ذيچ الليله وكل وحدة براسها افكارها وعلى ثاني يوم من الصبح اجتي فرح لأن زوجها قبل ما يطلع للمحل يجيبها النه وهم على الريوگ ظلت فرح تحچي ويه جوانا وتقنع بيها وبعدها انتقلت للغرفة وصحت على فرح ومن اجتي گعدت يمي
مينا/ اگلچ فرح هو مصطفى راح يسوي ويايه مثل ما سوه السحار
فرح / مينا انتي بعدچ تفكرين بصار وياچ يم السحار
مينا/ ما مرت عليه ليله وغفت عيوني إذا ما يمر عليه شريط الصار كله ويه تقى والصار ويايه برايچ اگول لمصطفى على الصار
فرح / اياچ تحچين الصار يم السحار لمصطفى أنسي الصار مينا انتي راح تزوجين واذا گتيله وحق ربچ ينفر منچ وهو بالبداية ما راح يبين هذا الشي بس بعدين اقل مشكلة بينج وبينه راح يگوم يعايرج اما الزواج مو مثل ما سوى السحار الشباب بيوم العرس يتفننون بالعروس يله يدخل بيها لهذا لا تخافين والله يتمملچ على خير حبيبتي مينا اتمنالكم السعاده من كل گلبي اني مينا لا شوفيني هيچ ترى متحمله ظيم بس ربچ اليعلم بي والله مينا مرات تهون عليه نفسي اروح اخذ نفط واحرگ نفسي بس بعدين أتراجع ما عندي جرئة أدعيلي مينا لو الله ينطيني الصبر ولو الله ياخذني
من حچت هيچ فرح نزلت دموعي عليها گمت بوستها وحضتها وهي هم حضنتني
مينا/ فرح الله عليچ لا يخطر على بالچ بيوم تأذين نفسچ والله اموت ما كافي راحت تقى
فرح / لا تخافين عليه ودائماً خلي نكون قريبات وحده من الثانيه احنه ما عدنه بس الله واحنه
للعصر اجى زيد على فرح وأخذها وراح وابويه بلغ امي انه الاسبوع الجاي يوم الخميس عرس فرح وجوانا
واني كل ما يقرب هذا اليوم احس گلبي راح يوگف من الخوف
ريان/ اني حالي حال اي شاب يتمنى يزوج إلي يحبها ويتمنى اهله يباركون زواجه بس اهلي ما قبلوا وكسروا گلبي في حين ما عدهم سبب مقنع لرفضهم ملاذ واني رحت واخذت ويايه اختى بدور وبوقتها من دخلت لبيت اهل ملاذ وقدمت باقة ورد لام ملاذ وابو ملاذ اعترض يريد كباب
ضحكت ام ملاذ وهي تگول / ابو ملاذ يحب يشاقه
ودخلنه لبيتهم وطبعاً واحد ما يحچي على البيت ولا متفاجىء لان هي مصارحتني من البداية بوضعهم ودخلنه لصاله فارشين بسط گعدنه وبدت التعرفات من ابو ملاذ يسألني عن اسمي وعمري وظيفتي واهلي ليش ما اجوي ويايه وبعد ما جاوبت على كل الاسئلة ورديت على سؤاله عن اهلي
ريان / اني اهلي يريدون يزوجوني لبنت عمي بس آني اعتبرها مثل اختي ومن شفت كريمة حضرتك أتقدمت حتى أخطبها
ابو ملاذ / بس أني بنتي اسمها ملاذ مو كريمة انت غلطان
باوعت عليه بدور مستغربه واني جاوبته/ عمي اعرف البنيه اسمها ملاذ بس كلمة كريمة يعني بنت حضرتك
وهو ظل يهز بيده ويگلي / گول بنتك شنو بعد كريمة انت جاي تخطب لو صحفي إذا على ملاذ اگدر اگلك گبعها وآخذها بس هذا يكون حچي لسان بالواقع ماكو هيچ حچي
ريان/ تأمر امر عمي شتريد اني حاضر
ابو ملاذ / اني بنتي مهرها غالي إذا توفي الطلبات تاخذها من عيوني إذا تگول ما عندي وإمكانياتي ضعيفه من هسه اگلك توكل بالله
ريان / عمي اي طلب تطلبوا آني حاضر
بدور / بلا زحمة عمي ترى الزواج مو مسألة مادة اهم شي همه يعيشون بسعاده ومتفاهمين
ابو ملاذ / السعاده من يخطب بنيه ويخلي مهر غالي معناها يقدرها ويحبها
ريان / عمي سبق وان ذكرت اني حاضر لكل طلب
آبو ملاذ/مقدم 25 مليون والمؤخر 50 مليون والمقدم تنطي كله فلوس يعني مو تجي أختك ام السعادة تشتريلها كم قطعة ذهب وملابس تعتبروها علينه مقدم
ريان / موافق
ابو ملاذ / والعقد نريده على المذهب الجعفري
ريان / صار عمي
وقتها صاح على ام ملاذ حتى يجيبون العصير ودخلت ملاذ وامها وچانت لابسة تراكسود اسود واحمر والله بدون مبالغة تجنن وانطتني العصير ولبدور هم نطت العصير وطلعت ملاذ وبقت امها وسوالف چانت عادية وبعدها طلعنه من يمهم وبدور متخبله واول ما صعدنه بالسياره
بدور / شوف ريان آني بالبداية چنت ضد اهلي لكون معارضين زواجك بس هسه بعد ما شفتهم نصيحة لوجه الله عوفها وخطيتك برگبتي شفته يگول عليه ام السعادة وشفته عبالك مو جايين نخطب منه عبالك عنده سلعة ويبيعها عليك ما انصحك بيها ابد
ريان/ بدور ترى الرجال حقه يريد يضمن حق بنته وطلباته آني شفتها ما بيها شي
بدور / بعد انت أعرف بمصلحتك وهاي حياتك وانت حر بيها
وبذاك اليوم چنت فرحان وما أريد اي شي يعكر عليه فرحتي ومن وصلنه للبيت دخلنه وهم نفس الوضع ماكو احد صعدت فوگ واتصلت على ملاذ وظلينه نسولف ونضحك إلى ما جعت ونزلت آكل شي وامي وأخواتي وكمال بالمطبخ ودى يسوون عشا وبدور چانت سولف الهم على ملاذ واهلها
بدور / عزة لو شوفون المنطقة الساكنين بيها تحسهم حتى التبليط ما شايفي بحياتهم والبيت مالتهم شلون عبالك سرداب مال مگبرة بيتهم صبه ومحفرة والسگف ينخل علينه جص يخوف
كمال / بدور اني من اعترضت ترى مو لكون فقره ترى الفقر مو عيب بس اعترضت لان اكو اشياء البنيه من سويهن تكون مبينه شنو غايتها واني وروح ابويه اتمنى من الله يطلع توقعي غلط ويعيش ريان بسعادة وياها
ودخلت وجاوبته / كمال انت بعدك ما شفتها او عاشت وياكم حتى تحكمون عليها بعدها هي بيت اهلها عاشروها شوفها شلونها وبعدين أحكموا
كمال / ما نحتاج نعيش وياها انت راح تزوجها مو احنه وطالما أنت اختاريت واحنه اختيارك ما قابلين بي لهذا ما مضطرين نعيش وياها
ريان / العفو ما فهمت شنو قصدك يا ريت توضح
كمال/ يعني ما معقوله نجبر نفسنه ونگعد ووياها على سفره وحده وناكل او ما معقوله تعيش ويانه وتگعد ويانه بالصالة سولف وتطلع على حياتنه وامورنه الشخصيه او تستخدم غراضنه
وبعده كمال ما مخلص كلامه وكملت امي الكلام بدل كمال
إبتسام/ ريان انت الك حصة بالبيت ويانه وهذا حقك وانت عندك غرفتك وتاخذ الغرفه المقابيل غرفتك المسوينها مخزن نفرغه وانت بعد سويلك مطبخ وصحيات وطلع درج على الحديقة ويكون الك وحدك ولزوجتك
صدگ صعبت عليه نفسي ونزلت دموعي تقربت على امي وبست راسها وگتلها/ يمه تعوفين ريان تخلين حاجز بيني وبينكم يعني شنو بعد ما أشوفكم واحچي وياكم ولا اگعد اكل وياكم شلون يمه انتوا دى تعزلوني عنكم
إبتسام/ ابني حتى تاخذ راحتك واحنه ناخذ راحتنه ولا نقيدكم ولا تقيدونه
ريان / خلاص يمه طالما راحتكم بعيده عني تدللون راح اسوي كل كلامك وأنفذ طلباتكم
وعفتهم صعدت بس شنو احسن الشهگة بصدري راح تخنگني طلعت لسطح واباوع للسما وآني افكر شلون راح اگدر اعيش بنفس المكان ويه اهلي بس احنه كأنه غربة
واتصلت بملاذ وحچيت كل كلام اهلي الها
ملاذ / حبيبي بعدين من نزوج واصير امر واقع بحياتهم يتقبلوني ويحبوني مثل ما انت تحبني
وظلت ملاذ تهون عليه الموضوع ونمت واني احلم بحياتي ويه ملاذ وعلى ثاني يوم ذبيت مواد بناء وچان يوم جمعه وبدا العمال بالبناء وعلى يوم الاحد اخذت 25 مليون سحبتهن من البنگ وانطيتهن بيد ابو ملاذ واتفقنه على الخميس نعقد عقد سيد
والأيام البعدها اني بين دوامي وبين عمال البناء وبين ملاذ حبيبتي والعقد يوم الخميس هو نفسه تلبس بي ملاذ بدلة عرس لان بعد العقد اخذها ونروح لفندق ومن الفندق اخذها لأربيل 10 ايام بدل حفلة العرس وهم انطي وقت للعمال يكملون بناء
لمتابعة باقي الرواية زوروا قناتنا على التليجرام من هنا
بدل ماتدور وتبحث علي الروايات خليها علي تليفونك وحمل تطبيقنا
