رواية الشيهانة والعاصوف الفصل السادس 6 بقلم ياسمين
البارت طويل عن حلقتين تعويضا لتاخيري عليكم من 6228 كلمة
الاكثم يگول :
على حبل الجذب تتمرجح الناس
الناس
الناس اطباعها اطباع السياسي
انه بكل الدول فرتني الايام
شلت هموم دنياي على راسي
لكيت شكد بشر منتسبة للدين
ولكيت اسلامهم بس الجناسي
:
احتياطي بگلب واحد
بالك تصير ؟
لو تنسحب لو تلعب اساسي
كيناز...
نمت ذيج الليلة بصعوبة كلما اغفى وافز اتاكد منه بحضني الا اتطمن واتنفس براحة لحظات عشتها برعب لدرجة خليتهم كلهم ينامون وبجيت مغطية وجهي كله تحت المخدة
تعب وارهاق وتانيب ضمير وقلة نوم على هموم ماتعرف على منو تشيل هم وعلى منو تتسند
بابا وحالته من صفحة ماخذني خوفي عليه ليوكع ويتمرض من كد ماشايل همنا لو بسام الي مايعرف وين صفى بينا الدهر
لو على جوانا الي احسها عايشة بغير عالم ساعة تضحك وتسولف وساعة تعزل نفسها بالنوم ومرات تخلصها صفنات
بالاخير تعبت واخذني النوم لحد ما كعدني زيوني جوعان كمت وياه افرك بعيوني يسحبني من ايدي يشكيلي
هاايه ماتو عمية دوولة لوحح بلة
ياشرلي عالبيت يكلي هاية ماكو اكل راحوا برة
دخلت للبيت لكيت المطبخ خالي استغربت بالعادة الكى نور موجودة بيه دورت الغرف محد موجود
معقولة طلعوا كلهم رجعت للثلاجة لكيتها خالية بيها خبز وطماطة وحليب طلعتهن برة عاد اسويله ثريدة حليب واني احمس طماطة
صارلها فترة عمة كميلة توصي بنور من تطبخ تطبخ عالكد ماتسوي زايد سمعتها عدة مرات تكلها
موادنا تخلص وذولة كاعدين على كلوبنا ماكلين نايمين شاربين واحنا نصرف عليهم
رغم والله بابا اشوفه مرات يطلع تكسي ويجيب علاكة مسواك الهم وجوانا اشوفها تعاونهم بالبيت وبخدمة بيت الحجي وياهن... بعد شتريد مااعرف
حضرتله ثريدة واني سويت طاوة كعدنا اني وياه ناكل واسمع هوسة شباب برة يسولفون ويضحكون
وشيل الكدور والصواني اسمعهم قريب
خلصنا وهو طلع صحت بيه
_ لتطلع زيوني خلى اغسل الماعين ونروح سوية
وكف بالباب يسمع كلامي عوود... واني عين عليه وعين عالماعين خلصتهن عالسريع وطلعت وياه اقنعه
_ زيوني تعال اغسلك حتى تصير حلو ونظيف
_ لاااا كنوووو الووح يم هدولة عمووو هنااك
وياشرلي عليهم من بعيد
شلته ابوسه واخذته للمضيف الهيه بالسوالف
اخذتله ملابس وطلعت بيه لحمام البيت استغل الوضع مدام ماجايات بعدهن بس يرجعن تصير حرب البسوس عليه
دخلت غسلتله سودة عليه خاصرته وبطنه مشخطة وركباته همين متعورة كد ما مجلب بالحافة ماعرف شلون اجه بعقله هيج يجلب صدك الله قدر ولطف
كملته خليته ماخذه الواهس يطبش شوية وراها طلعته بدلتله ومشطت شعراته بوسته واخذته لبرة
كتله العب كدامي بالبستان اشرلي نروح لجهة البيت الجبير كتله لا وكمت الهيه نلعب بالتراب
ماريد اوصل لجهة البيت الجبير والصراحة ماعندي فضول اتبع البنات اشوف الوضع
وحسب الشفته اعداد الناس اليوم بكثرة عن البارحة
هاي عود بعد خمسة ايام للعرس وهيج مكلوبة الدنيا لعد بيوم العرس شيصير
قبل الغدة بساعة دخلت نور وياها رقية تركض جايبة كدر مخليته على راسها كوة تمشي خطية لان سمينة شوية مو مثل اخواتها معصعصات
من شفتها اجيت وراها مستغربة دخلنا خلته عالطباخ تجر النفس كوة كتلها
_ هاي وين رحتي اليوم كلجن خليتن البيت خالي؟؟
نزعت عبايتها وحجابها وغسلت وجهها بالسنك وحجت
_ يمة راح اموت هلكنا ولج كيناز العالم كومة وجايين كرايبهم وعماتهم ونسابتهم وكل وحدة بيهن وراها عشيرة دخيلك ربي
تالي الاكثم فدوة لطوله شلون معدل كال لامي خلي ايدج بالضيافة والتنظيف انتي وبناتج واحنا علينا الطبخ نستلمه انتن ماتدبرنه وحدجن
وهذا من زاد الغدة جبته تعالي نصب ونتغدة البنات وامي يبطن الا يجن كاعدات هناك ماتخلص بعد لما تفض
خليتها تحمي بالتشريب وراحت تصلي صفنت عليها معقولة تحب هذا الاسمه الاكثم وهيج تسولف بيه ماصدك ابد.. شكلها من برة كلش فطيرة مو مال تحب
سمعت بابا وعمي يسولفون قريب الباب على بسام يكله لاتنطيه بعد منومات لانبتلي ويصير بيه شي خلي شوية مصحصح ودخله غسله جسمه عفن من ملابسه
ركضله زيوني تاكدت منه شاله الا اطمئنيت اسمعه يسولف وياه على حادثة البارحة
من دخل سلمت عليه جاوبني بتعب
_ هلا باباتي شلونج
حجاها وكعد بالمطبخ مخليه بحضنه كتله متشجعة
_ الحمد لله بابا اني زينة بس انته شلونك
هز راسه ودنك على زين باسه تبعه عمي جان يتوضى ودخل كعد يمه التهيت اني ونور نصب الغدة اسمعهم يسولفون كاله عمي
_ مافهمت منه شيريد لو هية حجاية وسد الموبايل
_ ما گال كلشي بس اتصل بيه وحجى ذني الكلمتين عود من يجي نفتهم منه ولو اني حسيت من صوته الولد الاخبار مو زينة والظاهر السالفة چايدة
_ الله كريم لاتبقى تحسب وتصفن ابو بسام تكضي وتهون ماكو شي ماله حل
خلينا كدامهم خبز وجايبة نور وياها حتى خضروات
خلت يمهم واحنا كدامهم بالسفرة اكلنا حشو معدة بابا ما اكل شكله ماله خلك واني نفسي مسدودة التهيت بزيوني اوكله من خلصوا راح بابا للمضيف وعمي يصلي وينام شوية
تبعت بابا لكيته يصلي كعدت منتظرته علما خلص رفع راسه اتجاهي وحجى
_ القلق الانتي بيه ماله داعي باباتي.. اني موجود يمكم مااترككم لمن اطمئن عليكم.. والعالم ولد بيت الحجي اتكفلوا بالموضوع من راسه لمحرابه بعد ليش عيونج تفتر وراي
من حجى هيج برطمت ودمعت عيوني كتله
_ اخاف عليك وخايفة من الجاي شكلك تعبان وحمل بسام وحملنا يوم عن يوم يزيد ويتعبك صح لو اني غلطانة
_ غلطانة انتم مامتعبيني بالعكس احسكم نسمة مالين دنيتي بس اني شوية وضع بسام مضوجني بس احصل واسطة لو توصية ادخله باحسن مركز اعادة تاهيل حتى يتعافى من ادمانه
والباقي كله هين
شال السجادة خلاها علة صفحة وتمدد يريد ينام خليته براحته وطلعت وياي زيوني
دخلت للبيت يم نور نخلص فترة الظهرية اني وياها وهم انوم زيوني يرتاح كعدت تسولفلي عن الشافته هناك
_ولج خية اليوم اجن عماته ردحن ردح ماصاير ولج كنووز والذهب الشايلاته كل باون هاكبره يوصل للصرة ومحزمات بحزام ذهب وبناتهم مغلغشات مثلهن ذهب بس ذهبهن ناعم مو مثل امهاتهن بقينا فاكين حلوكنا عليهن خوو نهيوة ماتحملت دخلت وياهن ركصت ركص موطبيعي خلت النسوان مفهية عليها
خليت مخدة على رجليه اهزه حتى ينام وكتلها
_ والله اختج هاي مو صاحية شعرفت من العالم ودخلت بنصهم ووين امج عنها لو بس يمي تحمى حديدتها
نزلت فراش تمدد عليه وحجت
_ والله انتي بطرانة ياخية... تلكين امي هية دفعتها تسوي هيج بلكت تخطبها وحدة منهن لولدهن
كتلها متضوجرة من تفكيرهن
_ والله اني اتعجب على تفكير هاي البنات ليش مخليات الزواج شي اساسي بالحياة وحتى هاي جوانا شوفيها متحطمة تحطيم من ورة فكرة تاخير قسمتها واني الف مرة كتلها اشغلي نفسج بهوايات تحبيها لاتحصرين عقلج بس عالزواج لمن تنتكس نفسيتج بس احجي وية حايط مو بشر
صفنت علية لحظات وحجت
_ ترة جوانا او اخواتي لمن يفكرن هيج فـ لان واقعهن حنظل مر يتاملن يطلعن لحياة احسن من عيشتهن هاي بعدين احنا لا دراسة ولا طبة ولا طلعة قابل بيش ترديهن يفكرن يعني
وحتى هاي جوانا تفكر تتزوج من الصبح حتى تلتهي بمشاغل الرجال والطفل وغيره لمن يخلص العمر
بعدين مو هاي اسمها سنة الحياة لو اني متوهمة
_ لاممتوهمة بس اني اشوف الزواج والقسمة مو فرض ولا شرط واحب هيج امور تجي لحد عندي مو اني االاركض وراها
يعني هسة تردين تقنعيني اختي واخواتج ما سون افلاك اليوم حتى يجذبن انظار النسوان الهن
_ لا والله مانتبهت الهن جنا نشتغل مانلحك نرفع روسنا
هزيت ايدي وكتلها
_ لعد اختج شلون لحكت تركص بنص النسوان
_ ههههههه والله لو شايفتها بعينج جان ماحجيتي هيج الدشداشة مجلبة من صفحة وصفحة وظفيرتها
صايرة كفشة ووصلة المسح بيدها وتهف بيها
ههههههههه بس هسة خوش هزت خصر ضيعت مشهد البهذلة مالتها بركصها
ضحكت وياها اتخيلها شلون تركص سولفنا شوية لحد ماغفت المسكينة من التعب
كعدت العصرية كلش كومت زيوني من النوم وطلعنا لبرة ورة البيت اشم ريحة خبز حار
من وصلت يمها لكيتها تخبز بتنور الطين مسكفته بحديد عن الشمس وملثمة طالعة بس عيونها وتخبز
كتلها مستغربة
_ هاي يمته عجنتي ويمته خبزتي !!
_ قبل ساعة ونص عجنت وهسة اختمرت بلشت بيها
واني اراقبها شفت لمة شباب بجهة بيت الحجي بيهم 15 نفر ملتمين بكعدة ويشربون چاي ومعمرين اراكيل.. يوصلنا ضحكهم العالي كل شوية
مااندارينا جهتهم بس زيوني لان اراقبه المحهم واتغاضى
كعدت يمها على بساط الخبز انشر بيه وزيوني يجمع ورد من الحشيش مسافة عني
لحظات حسيت صوته ماهو وكفت مرعوبة لمحته ركض لجهة الرجال الي شاله البارحة تبعته اركض شفته وصل يمه شاله يسولف وياه وزيوني عينه عالخواتم بيده جذبن اهتمامه
جان لابس دشداشة بيضة ترهب من البياض وخواتم باصابعه ولابس غترة لافها على راسه مثل "الچراوية"
بداخلي خفت ليوصخه زيوني فشلة منه دشداشته يخبل بياضها ردت اتقرب حتى اخذه اشرلي من بعيد وحجى
_ راح اخذه يمنا لاتقلقين عيني عليه
ضليت مفهية شياخذ منه..... بلة شلع كلبه
رجعت يم نور لكيت عيونها تضحك كتلها مستغربة
_ شفتي زيوني شسوى.... بلة شعرف من الرجال وركضله
_ هههههه مغزر بيه الطيب وراحله بعدين الاكثم حباب راح ينتبه عليه لتخافين
انداريت المحهم شفته كاعد وياهم ومخلي زيوني بحضنه يلعب بخاتمه كتلها
_ هو قصدج هذا الاكثم الي ثبرتينا بيه وكلما تحجين بيه عيونج تلمض فرح
طلعت كرصتين خبز من التنور وحجت
_ يمعودة اعجاب من طرف من واحد لا تفضحيني
بعدين اني هم بنية وعندي مشاعر قابل وحد عنجن
كتمت ضحكتي وكتلها
_ واني شكلت هسة قصدي مبين تحبيه وكلما فضحتي روحج كدام امة لا اله الا الله رجعتي تغطين اعجابج بسالفة ثانية
_ يمعودة اخواتي مابيهن حظ مخلياتني بس للنصبة والشقى مرة وحدة حجيتها لو اكلني بكشوري
شهر كامل هنة يتمهزلن علية كرهني بالساعة الاعترفت بيه
ردت اجاوبها اجه زيوني يركض من بعيد حضني وعطر الرجال كفخني كفخ متغلغل بملابس زين شكد طيب وقوي
كتله شتريد دنك عالخبز يريد ياخذ سحبتهن منه خاف حارات كالي ياشرلي عالاكثم
_ عمووو يليد خبزة حالة
دنكت اسحب كرصة وحدة عاطت بيه نور فززتني
_ اسحبي خمس كرص وانطيه لاتفضحينا الله يخزيج
_ ههههههه شمدريني غير هو طلب خبزة
_ اييي لعد تنطين عالكد واذا اكرمت فاشبع عوبة
_ عمي صايرين وذني لحبيب الگلب احلى خبزات من نورة
بسط ايده الصغار عود يشيلهن انطيتهن اله وتمشيت وياه لازمته من ياخته ليوكع قبل ليوصل الشارع تركته......... اتلگاه هوة كالي
_ ممنون يابة زحمناكم ... حجاها مدنك وايده على صدره
اخذهن من ايده راجع يمهم وزيوني لازمه من ايده الثانية بعدني ماوصلت سمعت صوت ضحكهم
بقيت كاعدة يمها علما خلصت جمعنا الخبز ودخلنا
بقى بالي يم زيوني لحد مادخل الا تطمنت انصدمت باصبعه خاتم شكبره عود يراوينياه كتله مصدومة
_ زيوووووني لاتكول جبته من الرجال
رفعه يشوفني خزرته ومديت ايدي
_ زيوني ليييش اخذته مو عيببب تاخذ من واحد شغلة
ضمه بين اصابعه وحجى مستعز بيه
_ لاااا كنوووو هادا عمووو اشتلاه الي
_ لا ما اشتراه انته اخذته منه روح رجعه اله
وية حجايتي برطم يريد يبجي خصمتها وكتله
_ روح لعد زعلت وياك تركته ورحت اصلي المغرب
اجه وراي اريد افرش السجادة شمره عليه زعلان وحجى
_ هااااااج اخديه..... وراح يبجي لبابا يشتكيله مني
هزيت ايدي مبتسمة على سوالفه اخذته اريد اضمه علما اشوفه للرجال وانطيه اله شكد فشلة منه حتى مبين غالي من الفضة والحجر شكله غريب ركزت بيه منقوش عليه كلمات دققت بيهن مكتوب
" صّرآطِ عٌلَيَ حًقُ نِسِلَکْهّ "
تراجعت خليته عالسجادة وصليت من كملت اخذته وطلعت لكيت بابا يتصل برة وشكله اتصال مهم
تركته ودخلت اساعد نور بالعشى سالتها عن البنات وعمة تاخرن كالتلي
_ ماعتقد يجن هسة يفضن العشى وينظفن الا يرجعن
سوينا عشانا وبابا يروح ويرجع علينا كال لنور
_ عمو استعجلي بالعشى ورانا مشوار اني وابوج
ردت اساله وبطلت عزلنالهم صينية اتعشوا عالسريع وطلعوا تبعته بنظراتي لحد ماطلعوا وهالمرة كلبي قبضني كلش ليكون الاخبار ماتسر،
خلصنا عشى ونظفنا البيت للتسعة بالليل ومحد بيهم اجه لانسوان ولازلم
اذا جان القلق 50 بالمية هسة صعد الف
للعشرة ونص الا دخلن البنات وعمة كميلة بس صايرات تراب من التعب سالتهن عن بابا وعمو اجتمعوا يمهم بالبيت الجبير لولا
كالن ماندري
دخلن غسلن ونور تصفي بالاكل الجايبته وياها عمتي والبنات ماشاء الله اللحم والدجاج غدة وعشى يطبخوه. والكدور بلشت تترس المجمدة
دخلت يمهن بالغرفة اضيع وقت لكيت جوانا تمشط بشعرها
وتهمس بالحجي وياهن من شافني سكتن وغيرن الموضوع بشكل عام
بداخلي استغفرت ربي عليها خاف جان ماعاجبني وضعها قبل
هسة صايرة حزب وياهن حتى تكمل سبحتها
كالن لنور يضحكن
_ ولج نوور ماتدرين ورة مارحتي شصار وراج غير صارت مطاحن الا شوية
كعدت هية بفضول كالتلهن
_ شكوو ياستار احجلي شصار بلة
كالتلها جوانا متحمسة
_ كولي شنوو ماصار عينيي
وراج گبت عيطة بين مرة الحجي الثانية والعروس
_ ليش گبن؟؟!
رادن ياخذنها للصالون كالتلهن ماروح
رجعن دزن اختها تاخذ قياسها بنواقص لبسها وهم رفضت تروح يكللها روحي ويانا احسن.. ماتقبل قافلة
رجعن بعدين طلبن منها قياس حتى يتسوكلها ماقبلت تنطيهن
تالي مرة الحجي ام شهم ماتحملت كامت الها للغرفة وسدت الباب بالبداية ماسمعنا الهن صوت بس بعدين العروس انفجرت بجي وذاك الصياح واللطم اليكول ميت الها ميت
كالتلهن مستغربة
_ دخيلك ربي هاي شجاها هيج مجلوبة صدك لو كالوا ينطي جوز للماعنده سنون...... وتالي شصار
_ ماصار شي تركتها وطلعت بعد محد طلب منها شي
كالتلهن نهى
_ اموت واعرف ليش هيج سوت.... اموت وتبقى بنفسي شصاير وهيج مكلوبة احوالهن انتن لو شايفات اختها شسوت حتى الموبايل سحبته منها
وام الاكثم كلما تبجي تسكتها ام شهم
كالتلها نورس
_ ايي خية بس بينهن هالشوشرة من يدخل الاكثم لو باقي الشباب يهوسن ويهلهلن يضيعن عليهم الكركبة
وحتى الي تريد تبجي كدامهم عبالهم من الفرح مايدرون بالمخفي والله اعلم شبيهن
طفرت الحجاية من لساني كتلهن
_ ترة مبينة ماتريده بعد عليمن مسوياتها حزورة
باوعلي كلهن مستغربات كلامي، ماعلقت متندمة حجيت هالحجاية
كالت جوانا مستغربة
_ هية واضحة صحيح بس فضولنا من نشوف الاكثم ماناقصه شي نكول ليش ماتريده بعدين منو هذا الي احسن منه وحبته اذا نريد نفرض هية تحب واحد غيره طبعا
اجه زيوني لحضني شبكني شاركته الحضن وكتلهن
_ الحب مشاعر واحساس مرفوع عنه قلم الاختيار الذاتي اذا نزل بگلب الشخص
من تحب انسان موشرط اختيارها بمقياس ملموس مثل متشوفنه انتن
على اساس الفلوس او المكانة وحتى الشخصية احتمال الي تحبه شافت بيه اشياء ماموجودة عند الاكثم
وكفت شايلة زيوني ابوسه وكتلهن انبههن
_ واحتمال ماكو حب بالقصة كلها والبنية رافضة الزواج لاسباب شخصية ماله داعي تخلنها حديث الساعة كلما كعدتن سولفتن بيها
تركتهن وطلعت انتظر بابا تاخر كلش اسمع نورس تكل لجوانا
_ مقتنعة بكلام اختج انتي..... ردت عليها
_ اسكتن عنها هاي تمسلت وحدها
بقى بابا لنص الليل تقريبا الا رجع جانت الدنيا بوقتها گمرة زيوني مثلي ماجاه نوم بقينا كاعدين بالباب الدنيا حارة عاد برة اهون من حيطان البيت متسلطين عالبستان وبيت الحجي الداخل من البيت والطالع اكدر اشوفه من بعيد مبين ناسهم واقاربهم هواي صلوات عالنبي
بحيث يطبخون كميات جبيرة نسوانهم ماشفت وحدة منهن طلعت وحتى سياراتهم اغلبهن جامهن عاليات وغامق مايبين منها شي
ورة نص ساعة الا لمحت بابا طلع من بعيد هو وعمو
وشباب واكفه وياهم من ظمنهم هذا الاسمه الاكثم والشاب الي شفته بحديقتهم الخلفية بقوا فترة يحجون وياهم من ايست منهم يجون اخذت زيوني للمضيف انومه لان نعس
كعدت اهودله لكيت بسام كاعد يفرك بعيونه كالي منعس
_ جوعان جيبيلي اكل
_ ميخالف هسة اسويلك علما انوم زيوني دخلت جوانا تنام طلبت منها تسويله اكل قبل لتنام راحت تجيبله اكل تدردم علينا لان تعبانة من الشغل
لحظات مرت سمعت صوت عمو يحجي وية بابا قريب المضيف يكله
_ خلينا نشوف الوضع هسة احتمال بس تهديد مامنطين عنوان منطقتنا الصحيح
كاله بابا
_ واني ابقى اراقب الوضع لمن يصير اتعس ماسمعته الولد حارث شكال......
_ ادري وسمعته ياخوية واذا معممين اسمه بالسيطرات مثل ماكال نبقى ضاميه عن العين لحد مانشوف الوضع وين يصفى
_ جواد انته تحجي صدك لو تتشاقه ولشكد ابقى اني دافنه عن العيون مثلا ولشكد اريد ابقى بهذا الوضع التعبان لامسكن مستقر ولا شغل يسد اللكمة
اني اكول لو اروح الهم بنفسي واحلها واذا يريدون ياخذون روحي مكانه خلي ياخذوها وبناتي يبقن بامانتك
شهكت مدمعة اسمعه كاله
_ لاتستعجل ابو بسام وخلي نمشي بكلام الاستاذ اكثم هو كال راح يدزون عالم الها صيتها يتفاوضون وياهم اذا مارهمت ذيج الساعة نشوف غير حل....... بس مسالة تترك بناتك يمي وتروح هاي مرفوضة من هسة اكلك خوية اني يادوب معيش هالبنات العندي لاتحملني فوك حملي وخلينا ورة ولد الحجي بلكت يصفونا على حل وياهم
_ الله كريم اني هم ورطتك وياي بلا ذنب بس شسوي من قلة حيلتي اجيتك
ركضت قبل ليدخل تحججت بالنوم اسمع عمو يواسيه وساعة يقنعه بالصبر
بقى الوضع صنته لايام
لحد قبل يوم من العرس بيومها جانت عصرية جنا كاعدين اني ونور كدام البيت نسولف على وضعنا والسمعته واراقب زيوني يلعب وية رقية
فجاة وكفن كدام باب بيت الحجي اربع سيارات تويوتا مليانات زلم ضربوا طلق بالجو لدرجة اذاني اذتني كلش
من الرهبة ركضت لزيوني كام يصرخ ضميته لصدري ورقية حشرت روحها بحضني خايفة من الصوت غمضت عيني بقوة وضميتهم
لحد ما هدئ الوضع صاح واحد من المتسلحين
_ نريد ازلامكم وينها حتى نحجي وياكم كلمتين مالهن ثالث.......... وينكم اطلعوا ورمى بالجو
رفعت راسي شفت الاسمه اكثم طلعلهم متسلح بحزام جتف واخوه حارث هم متسلح وراهم شباب بيهم سبعة نفرات هم متسلحين
وطلع وياهم حجي متعكز تقدمهم... كالت نور
_ هذا الحجي حاتم طلعلهم دخيلك ربي
ولده ماحجوا بس شفت الحجي ماعرف شكاللهم رد عليه واحد منهم
_ نعرف انتم منو وندري بدخيلكم عدكم والكم خيارين مالهن ثالث لو يسلم دخيلكم ابنه النا لو نخلص عليه وعلى عائلته وانتم شاهدين على هالحجي مو تكولون ماحذرنا
راد الحارث يحجي لزمه الاكثم من ايده يمنعه واستمر الحجي حاتم يحجي وياهم لحد ما افتروا بسياراتهم وطلعوا من المنطقة يضربون بالجو طلق
وهمة دخلوا بهدوء ولا كان صاير شي
دخلنا لجوة اني ونور غسلنا للجهال وجوهم اصفرت نقنعهم يسكتون
ماكو ربع ساعة واندك الباب طلعت نور ركض واجت تعدل بحجابها مرتبكة
_ وينج كيناز الحكي هذا الاكثم اجه لهناا يكول فرغوا البيت وتعالن لبيت الحجي بسرعة
وكفت مسطورة كتلها
_ مافهمت ليش نفرغ البيت !!
لازمة عبايتها بيد واخذت ملابس لاختها بيد ثانية وحجت
_ ماعرف كيناز استعجلي واخذي ملابس لاخوج ترة مبين السالفة مليوصة
كمت ابدله وارجف مخضوضة گلبي يركض من الهبطة ردت اطلع للمضيف اطلع ملابس احتياط اله واكعد بسام هم لكيت باابا وعمو واكفين وياه كدام باب الحوش يحجيلهم الصار
بس شفته حسيت الدم رجع لوجهي صحتله بابا وبجيت من شافني اشرلي اجيه ركضت حضنته
كتله مرعوبة
_ شراح تسوي بابا والله گلبي خلص من القلق
سمعته يكله رد على حجايتي
_ ماكو شي ان شاء الله احنا للاحتياط نأمن عليكم
من نية غدرهم وجيتهم رادوا تاكيد انتم هنا وتاكدوا
الخطوة الجاية احنا نخطيها مو همة
گاله بابا
_ استاد اكثم ترة اني هسة بمصيبتين مو مصيبة وحدة هم ورطتكم وياي وهم ورطت اخوي وعائلته وياي هاي شلون نحلها بس كلي
زيوني جان مجلب برجليه صافن
شفت الاكثم يحرك بالسبحة مالته حتى يجذب انتباهه اله من ترك رجلية وراح لجهته حتى يلزمها شاله كانما منتظر هاي الفرصة حتى يباغته بوسه وانطاه السبحة ورد على بابا
_ ان شاء الله ماكو مصايب ابو بسام خلي هاي الامور كلها علينا نحلها وياهم ماله داعي تخوف اهلك ترة احنا دخلنا باشكالات اكبر من هاي وانحلت
بس اعگد الراية لعلي ابو الحسنين وانذر لوجه الله وتشوف ان شاء الله بعينك شلون تصفى
_ الله كريم الله يسمع منك
_ ابو بسام بقيتكم بهذا البيت بعد ماترهم حولوا انتم واهلكم يمنا علما نشوف راي الوالد شنوو
كاله عمو ابو علي
_ استاد اكثم احنا عائلتين ترة وانتم متزهبين لمناسبتكم وخطاركم خير من الله..... اني اكول نبقى بيتنا والي يجي من الله حياه الله
_ماترهم بعد ابو علي نسوانكم خطية وعدكم جهال همين احنا فرغنا غرفة جوة ياخذن راحتهن بيها والكم غرفة لمن الله يسهلها
اشرلي زيوني بيده حتى اشيله حسيتها زحمة شلون اتقرب منه اخذه
دنك الاكثم خلاه بالارض ومشى جم خطوة كاللهم
راح انتظركم ابو بسام وبالنسبة لابنك لاتشيل همة
جيبه وياكم خلوه بغرفتكم بيها مفروشات ترة
باوعت لبابا جان محتار يفرك بكصته منحرج وعمو ابو علي مو احسن منه بالاخير خافوا من المداهمة لاتصير كال لعمو
_ اخذهن البنات علما نشوف وين تصير واني الحككم
وفعلا اخذنا عمو اني ونور والجهال وخلينا بابا ورانا عبالي يجيب بسام ويجي
بس بعدين اكتشفت ان بابا مااجه ورانا وبقى هو وبسام ببيت عمي مجرد امن علينا هناك هو ارتاح وماجان يريد يحرج نفسه وياهم بوضع بسام المنتكس فقرر يبقون هناك احسن
واصلا البستان شددوا على حمايته اكثر مو مثل قبل وانملى زلم مسلحة على مد البصر ماعرف يمته اجو وشلون اتجمعوا بهاي الصورة
تبعت عمو اني ونور لحد مادخلنا من الباب الجبير وهاي جانت اول مرة اشوفه من الامام تركنا يم الباب واشر لنور تدخلنا لجوة وراح
الطارمة جانت كلش جبيرة بيها مساحة بيتين تقريبا
ومليانة شباب واكفين يطبخون وجم مرة وياهم
دخلنا لجوة سمعت صوت عمة كميلة تبجي وتحجي عبرنا المدخل ولغرفة ضخمة توقعتها استقبال لان متاثث
لكينا المكان بيه نسوان وبنات وعمتي متوسطة المكان فاتحة شعرها مكفش، ودشداشتها ممزگة من الصدر
تكلهن
_ والله ماعدنا كلشي اصلا عيشتنا من افضال بيت الحجي الله يعمر داره ويحفظ ولده اله لو ماهمة احنا تاكلنا الجلاب بيش طالبتنا العالم يردون يهدرون دمنا
سلمت واني مفهية ومصدومة عالمشهد معقولة اكو واحد مات واحنا ماندري من كد ماتخردلت رجعت بذاكرتي اتاكد خاف بابا لو بسام لو واحد من عدنا ميت لان شكل عمة كميلة يكول اكو مصيبة نزلت علينا
حضنت زيوني بقوة وكعدت بتخم فارغ على صفحة شفت وحدة من النسوان تطمن بيها تكللها
_ ماكو شي ام علي ان شاء الله تنحل الحجي هو تكفل بيها يعني تنحل ربج مايخلي حمل مطروح والله
رفعت عيني شفت بناتها مكابلاتها هم مسويات عزة بلا ميت وجوانا مسافة عنهن تبجي ووجهها مخرمش
معقولة اكو شي صاير اكبر من الخايفة منه !!!
حركني زيوني حتى انتبهله گالي
_ اليد مي كنووو
صفنت عليه ضايعة مامركزة شيحجي
سمعتني بنية بصفي مانتبهت الها كامت صبت اله كلاص مي وابتسمت تلعب بشعره تسولف وياي
_ لتخافين عيوني ماكو شي والله ليش هيج وجهج اصفر تعاي وياي........... لزمتني من ايدي كومتني من كد ماخاوية روحي طاوعتها اخذتني لداخل ممر وراها مطبخ كلش جبير وواسع بيه اثنين نسوان يشتغلن كعدتني على كرسي وكعدت زيوني بحضني
اجتها وحدة من النسوان كالتلها
_ ست غنى امريني محتاجة شي اسويله الج
كالتلها وهية تفتح بالثلاجة
_ لا خالة مشكورة ماريد شي بس طلعيلي المعصارة فدوة ماندلها وين بالضبط
طلعت سلة البرتقال وشغلت المعصارة كامت تسوي عصير سو
لمتابعة باقي الرواية زوروا قناتنا على التليجرام من هنا
بدل ماتدور وتبحث علي الروايات خليها علي تليفونك وحمل تطبيقنا
