رواية الشيهانة والعاصوف الفصل الخامس 5 بقلم ياسمين
ومثل نار بگطن مابينت مهموم
بارد بالوجه واحترك سكتة
٠
٠
الحارث
تركتها زعلان ابيع ثگل عليها متامل تبطل خوف شوية قلقها جان بداعي وبلا داعي منطيها الانصاف من ناحية خوالي متشددين عليهن واعرفها هية بالخصوص انسانة ملتزمة وحشمتها كدامي وكدام غيري كلش محافظة عليها
اطلع مخبل وناقص اذا اكول هالشي مايعجبني بس وصلت بيها المواصيل من احجي وياها بحبي الها ماتقبل تخاف ننجرف لان ماعاقدين .. واصلا اني بالحسرات اشوفها
مقيدتني عالحرف الي انطقه كدامها واني كدام ترافتها اضعف مااتحمل بالنهاية تركتها زعلان وتوجهت لشقتي علما غسلت وجمعت ملابسي اخذتلي غفوة اكسر بيها تعبي وثاني يوم سافرت بعد مالكيت الاكثم حارك الموبايل علية انطيته خبر جاي الا طلعت
بس وصلت وتعشيت خليت تقي يسويلنا كعدة بالحديقة كرزات واركيلة وعصاير اني مسلطن وهو يكعد يسولفلي احوال الرعية بغيابي مثل مامتعود عليه
كتله انفخ الدخان لفوك
_ وهذا عمك الناقص مااستحى على وجهه يبوك من حلال اخوه
التفت منا ومنا ليسمعنا احد وحجى خايف
_ حارث هاي شبيك بلة اجوا وسمعوك تغلط شتكول كدامهم
سحبت الدخان وونفخته ببرود كتله
_ لا ابرر ولا اكول واتمنى يخلون الحجي كدامي اذا ما مسحت بيه الكاع ماااطلع من ظهر ابوي، بسسس اخخخخ منهم كله شغلهم دفن حتى ذولة اخوتك مثلهم خاف عبالك يختلفون
_ المهم ونسيت اكلك هذا آسر يحب وحدة اشوفه بليل يتصل عليه ومواعدها بزواج همين وحتى كرم حاجى امي كاللها تحجي وية ابوي بس هية ماخلته يكمل وتعاركت وياهم سكتتهم
ابتسمت اهز بيدي
_ ذولة بطرانين غير اني صارلي مصكوع 3سنين اصيح اريد اعرس محد يسمعلي جايين ذولة من تالي يدورون ارتباط كللهم اخوكم يكول خلي يلزمون سرة وياي ونرفع امرنا للرحيم الكريم يتلطف بحالنا
خلصت السهرة وكمت وصلته ورجعت نمت جفي على وجهي ماعرفت شصار وية الاكثم
ثاني يوم كعدنا عالريوك حجالي اكثم الصار مختصر عرفتها انحلت بينهم بعد
بقيت تقريبا عشرة ايام حسيت گلبي طك على حمامتي كلما اتصل على مرة خالي متامل هية تجاوبني بالغلط الكى مرة خالي تجاوبني ترس اذني وبحجة اسال عن احمد لو خالي مضيعهم
وراها غصب تستلم امي ساعتين سوالف تندمني بالساعة الخابرت بيها عليها
ورة يومين فزيت الفجر شبعان نوم سحبت موبايلي وبلحظة جزع خابرت كلت هية لو بيها لو عليها هيج وكت كاعدة تصلي هية
رن لحد اخر لحظة الا وصلني صوتها ناصي كوة تجاوب
_ بلي حارث اسمعك
كعدت اتاكد منها خاف بحلم اني كتلها
_ حمامتي؟؟
ماجاوبت عرفتها ماناسية اخر كلام شمرته بوجهها كتلها مبتسم
_ حمامتي مشتاقلج
سمعتها نشغت شكلها بجت وحجت بصوت ناصي
_ راح اغلقه حارث كطعت صلاتي من وراك خليتها نص ونص
_ تمام راح اسده علما اروح اصلي بالجامع واجي احجي وياج
جاوبتني ببرود
_ ماله داعي تتصل بس اخلص صلاتي اروح انام شوية مالي خلك
سحبت باكيت الجكارة دخنت وحدة اجيت احجي وياها اقنعها تنتظرني سدته بوجهي ضليت مبهوت
هاي شبيها... !! يعني من كل وعقلها زعلانة مني وهية تعرفني بس لسان كدامها
شمرت الموبايل وكمت متحلف بيها بس ارجع للبصرة الا الزمها ابرد نار كلبي بيها....... بس كوم اشوفها
بيومها سوة عمي ابو قيصر عزيمة ودعانا عوائل نجتمع يمه هالمرة، متعودين على هاي الفقرة كل فترة واحد بيهم يسوي عزيمة ويجمع شمل العوائل كلها
واحنا نتريك وية الوالد حركنا قيصر بالاتصالات حرك يريدنا نجي من وكت نساعده بالطبخ لان كدور كبار ماتدبره النسوان
اشرت لاكثم يحجي وية ابوي وذاك اخذله سالفة وياه واني احوص مكاني اريد اكوم لحد ماشربنا جاي وكملنا الا طلب رخصة من ابوي وراها كمنا
طلعنا بسيارته خليناهم ورانا يجون براحتهم هو وامي وغنوة علما وصلنا سلمنا على عمي وطلعنا بالحديقة الخلفية يم الولد نطبخ لكينا الگدور تفور وكدر الذبيحتين مستوي تقريبا
ماطولوا اخوتي الباقين وهم تبعونا للخلفي وراهم اجوا ولد عمي عبد المجيد قاسم واخوته خلصناها سالفة وضحكة الوحيد شهم جان ماخذ ركن يدخن ماله خلك اشرت لكرم شبيه هز راسه ماكو شي وماطول دقايق وراح يمه شاوره الا شهم اجه وكف ويانا بس ماشارك بشي
كلت بعدين اساله اشوفه شبيه
خلصنا الطبخ وبلشنا نصب بصواني مفطح
عدنا عادة الزلم وحد والنسوان وحد مانحب نحرج البنات ويانا بس بالبصرة من يجن عماتي لا يختلف الوضع يكعدن وية عمامي وابوي لان نسوان كبار اذا ماكو غريب وياهم من النسابة
بس خلصنا اكل وشلنا الاكل انصب الچاي وراه بدون تاخير....... وراها بلشت السوالف عن فلان وعلان بس هالمرة عمي ابو قيصر كلب موازينا كلنا من حجى ووجه الحجي للوالد
_ ابو الاكثم اني من رخصتك ورخصة الكاعدين اليوم حبيت على هاي اللمة افتح موضوع ولدنا وبناتنا الي بيهم استحقوا زواج مخصوص
بگلبي كلت يا الله فرجت علينا...... كمل
_ وراح احجي منطوق يجوز الحاضرين من ولدنا يعتبروه ما مالوف واول مرة يسمعوه مني شخصيا
باوعلنا وركز نظراته عالاكثم
جنا متسطرين خير من الله الشباب وحجى بابتسامة على شفته
احنا جنا بايام بداياتنا بالتجارة كعدنا بلمة مثل لمتكم هاي وتعاهدنا بيناتنا نعتبركم ولدنا كلكم مانميز بين واحدكم وواحد
نداري مصلحتكم وين نشوفها تصب نصبها حتى لو بدون من نشوركم بالتالي احنا اخبر منكم ومثلما يكول ابو المثل الاكبر منك بيوم افهم منك بسنة ..... صح لو غلط كلامي
جاوبنا كلنا
_ ما عليه زود كلامك ونعم من حالك ومنكم كلكم
هز راسه مبتسم
_ الحمدلله والنعم منكم وبيكم اني اليوم راغب اخطب بنتي رؤى لابني الاكثم اذا يرخصني ابو الاكثم واخوتي الحاضرين
هز راسه ابوي وضرب عوچيته بالارض كاله
_مرخوص ابو قيصر انته تفصل واحنا نلبس
بعدهم يسولفون شحط شهم كام يگح باوعنا جهته كام يگح بقوة ويضرب صدره حتى تعبر الشحطة ماعبرت گام كرم اله انطاه كلاص ماي دفعه بيده مخنوك و دمعت عيونه ضاع عليه الهوى كمت قلق اشوفه شبيه ووكف اكثم يمه يگله اسحب نفس ياشرلنا مايگدر بالاخير اشرلنا وگام يركض برة تبعناه اني واخوتي لكيناه يتقيئ بالحديقة شكله اتخربط من الاكل
كرم اشرلنا نرجع للمضيف فشلة من عمي كطعنا حجايته ما سمعناله قلقنا على شهم تخربط حاله
بقى مصر ندخل وحجى يقنعنا
_ شبيكم يولد والله مابيه شي هاي من الليل تخربط من معدته وبقى يلوب منها روحوا وهسة نجي وراكم
باوعنا لحالته مبين صعبة كام آسر يصبله ماي وهو يغسل وجهه كاله اكثم
_ هاا يخوي عدت لو ناخذك للمستشفى اشرله بيده ماكو شي بدون مايتلفت علينا ورجع يگح تعبان من صدره ... حجى كرم
_ ماكو شي والله هسة شوية وندخل نتبعكم روحوا جوة فشلة من عمامي تركناهم وطلعنا كلنا
من شفناه صار يسحب نفسه مرتاح الا تركناه ودخلنا خلينا قيصر واكف يمهم يتطمن
اعتذر اكثم من عمامي ورجعنا كعدنا مكمل كلامه
الاكثم مانطى رد فعل وعمي داهره كاله اذا عندك اعتراض كول ..... رد عليه
_ البركة بيكم عمي والاعتراض اذا نزل يكون الخلل بيه مو بكريمتكم اتشرف بيكم وبنسبكم
هز راسه مرتاح وكمل
وراغب اخطب بتي غنوة لابني قيصر وتصير الفرحة فرحتين عدنا وبالنسبة لجيهان هية مسماية لقاسم اذا تريد بوية هم روحك وتزوج البنية كملت تجهيز نواقصها والباقي يمك صار
باوعت لاكثم لكيته وجهه انگلب عرفته على غنوة بعدها صغيرة وينها ووين الزواج بس ماكدر يزايد على كلمة ابوي وهو يايده براسه ما كدر يعترض على كلام عمي ولا احنا
اخر شي ختمها عن شهم سال عنه وين صار كاله قيصر تخربط واخذوه الولد للبيت ووصاني اترخص منكم
گاله مو مشكلة اذا اجه نفاتحه على بت عمته رازقية الجبيرة خوش بنية عدها واهلها خوش ناس نخطبها اله
وعلى هيج فضت الجلسة بخير
ياابوية ماي بارد ونزل على گلبي وهاي خلصنا من الوجبة الاولى وبقينا احنا الوجبة الثانية ننتظر يمته يحنون علينا
عدت ايام على نهاية اجازتي بيها تركت اهلي يحضرون لزواج الاكثم واني حضرت جنطتي راجع للبصرة،
عادتي ارجع قبل بيوم من موعد دوامي علما ارتاح بشقتي واجيك ملابسي وغراضي والحك امر على خوالي اسلم عليهم واشوف حمامتي الا تنفتح نفسي للدوام
وصلت للشقة الظهر اتصل بيه احمد يسالني وين كتله وصلت استعجلني اجي اتغدة يمهم مدام مسوين سمج مسكوف ماكلت لا طفرت البس حذائي وبوجهي طلعت الهم بسيارتي مسافة الطريق الهم خمس دقايق لو عشرة وصلت يم بابهم
ركنتها على صفحة ونزلت الماي يطلع من حوشهم قبل لا ادكه انفتح الباب طلعلتلي مرة خالي بشيلتها البيضة شايلة صوندة الماي بيدها تمسح بيها
رغم هي مو ذاك الكبر بس تحب تتشيل عادة عدها
سلمت عليها وسالت عالولد وينهم كالتلي
_ خالك يصلي واحمد راح يجيب السمج ويجي
استغليت غيابهم اسالها عن درة وينها كالتلي
_ مالها خلك والله نايمة بالفراش صارلها ايام تشكي من معدتها اخذناها للدكتور يكول احتمال جرثومة
رجعت ورة يومين هم تخربطت ووجهها اصفر واخذناها لغير دكتور يكول عدها قرحة بمعدتها وتاهت علينا وين علتها
كتلها بصوت ناصي وعيني لجوة متامل المح خيالها
_ ليش ماتصلتوا بيه وهية طول هالوقت مريضة ماعرف بيها
لفت الصوندة وحجت مقهورة
_ وقابل شتسوي اذا خابرتك وشنو صفتك حتى نمون عليك
سحبت نفس وزفرته متضايق كتلها
_ هانت عمة مابقى شي وافاتح ابوي مدام بلشوا يحضرون لزواج اكثم يعني الصعب خلص
حجت مصدومة
_ يااااعيني...... يعني خطبتوله للاكثم صلوات عالنبي يستاهل اكثم وردة مال الله
كتلها احك بلحيتي عيني عالمطبخ
_ اي والله خطبوله بت عمي عبد الاله ابو قيصر
_ يااا عيني منو منهن هنة مو اثنين لو اني متوهمة
_ ايي اثنين الاكبر منها لابن عمي قاسم والصغيرة صارت لاكثم
_ الله يتمملهم على خير شايفين كل خير
جاوبتها ودخلت للاستقبال جان خالي توه مخلص صلاة سلمت عليه وطلعت اتوضى
رجعت باوعت للمطبخ من الطارمة ماهية.. سمعت خالي كال لمرته تجيبلي خاولي انشف بيه رفضت انشف استحباب بقطرات الوضوء عالجلد دخلت صليت علما اجه احمد ومدوا بساط الغدة وهية ماكو
بلش خالي بالتسمية الا بلشنا وراه لا كدرت اسال عنها لايشكون ولا بيه ابلع اللگمة ضل بالي يمها
ضليت انقش استغربني احمد كالي
_ ماتاكل موبالعادة ماتدوس بالاكل وانت تحب السمج
قويت خامة صوتي وكمت اغسل كتله متحجج
_ ماكل بالطريق والله وبقت نفسي مسدودة مااشتهي طلعت لبرة اسمع خالي يكللهم ضموله سمجة ياخذها وياه خاف يجوع من يرجع لشقته
علما خلصوا جابت مرة خالي الچاي ضيفتنا ورة ساعة الا طلعت منهم مايس تطلع واشوفها
وماكدرت امون على مرة خالي واسالها تكلها تطلع اشوفها المرة تعرف اريدها بس مولدرجة امون عليها لهاي الدرجة
رجعت للشقة خليت الليل يچل علينا لنص الليل ماتحملت بعد طلعت بسيارتي لمنطقتهم ركنتها بنهاية الفرع لمضت على غرفتها باليزر وضربت شباچها بحصوات صغار انفتحت شوية من البردة ورجعتها
ابتسمت منتشي لشوفتها واخيراا، تاخرت تقريبا نص ساعة الا طلعت واني مصگوع برة عيني بساعتي بيدها نفس دولكة المي وكلاص عالضوة البراني شفت ملامحها هالات خفيفة جوة عيونها تشرح المرض البيها
تقربت بثگل مدنكة تريد تصبلي مي وحجت
_ شونك حارث
_ من شفتج صرت بخير.. ليش هيج تكطعين بيه
_لان انته كلت خلي كلمن يروح بطريق صح لو غلطانة
_ غلطانة
رفعت عيونها العسلية تباوعلي مغندبة كتلها
_ اذا تحاسبيني على لساني شيحجي يعني هيج احنا نشبع زعل وما استفادينا
اما اذا تمشين ورة گلبي الحاكمني بحبج يعني انتي تتدلعين علية وتردين تعرفين غلاج عندي شكد
دنكت خجلانة تثبت الدولكة بين ايدها وحجت
_ احمم ترة اني نزلت احجي وياك بشغلة واذا تريد تزعل بكيفك واذا ماتزعل وتتفهمني يصير احسن ......
_ اسمعج حمامتي كلي اذان صاغية الج اني وعشيرتي كلها
ارتبكت ورعشت الدولكة بين اديها ردت الزمها منها لتوكع خزرتني ورجعت لورة ضحكت رافع ايدي لفوك
_ شجاج ابوية انتي ترة موقصدي شي منا منا
_ احمم...... اييي ردت اكلك هاي اخر مرة انزل بيها الك واحجي وياك احس نفسي مامرتاحة وهمين اخوي احمد ذاك اليوم شافني واني داخلة من الباب همزين تحججت اسد البيبان وصدكني بدون شك
دمعت عيونها وكملت مهضومة
_ هم يعرفون بيه ما اجذب وبسببك صايرة اجذب وجنت مااعرف لدروب الحب وغيرها وبسببك احس اخلاقي خربت افتهمت علية لولا
_ ابتسمت وكتمتها لوين واصلة بالتفكير
_ فمن هسة ابلغك لقاءات بالسر بعد ماكو تريد تعال اخطبني وخلي شوفتنا تصير بصيغة شرعية وكدام الكل بالحلال اترجاك لاتحرجني بعد
_ صار راح انفذ كلامج بس بشرط واحد
مسحت دموعها بجف الجادر وحجت
_ شنوو؟؟
كلما اجي تطلعين تقدميلي ماي من ايدج الحلوة ورفعت ايدي اهددها
_ شاهد الله شهادة بيوم الي اجيكم وماتطلعين كدامي واشوفج اجي بنصاص الليالي افضحج فضيحة ولو اعرف مو بس اهلج يعرفون حتى المنطقة اخليها تشوف بعينها شسوي بيج فهمتي عليه لو اعيد بعد
_ فهمت عليك بس انته لتحرجني حباب اني هم اخاف من ابوي واحمد اذا كشفوني حتى زواج مايخلونا نتزوج خلينا من بعيد لبعيد احسن
ابتسمت وهزيت ايدي مقهور
_ وعيونج هية اصلا من بعيد لبعيد قابل شمحصل منج وتتشرطين علية دصبيلي ماي خلي اروح انخمد مرمرتي گلبي من ورة شوفتج ترة
ابتسمت متغاضية عتابي بحقها وصبتلي مي مدت ايدها اخذه
اخذته مثبت اصابعي على اصابعها متعمد رادت توكع الكلاص من ايدها مرتبكة ثبت اصابعي بقوة ورفعته لشفتي شربت الماي لاخر قطرة بيه
وهية صافنة عليه متخردلة
مسحت الماي عن شواربي وابتسمت اغازلها
_اطيب مي شربته بحياتي
دنكت شاردة من نظراتي كلتلي بعتب
_ هااي عود هسة اتفقنا وانطيتني كلمة والله العظيم ماتصريلك جارة
_ههههه يابة انتي ما تخلين الواحد يتوب كل مرة اشوفج تطلعين احلى من القبلها عمي اني دائما اسال رب العالمين اگله لو ما خالقهن للنسوان احنا شيصير بيناا
طلعت ضحكة من مبسمها مكتومة خايفة لتنسمع وحجت بصوت ناصي
_ كااافي اليوم زودتها كلللش يلة روح خلي ادخل قبل لننفضح
ركبت السيارة عيني عليها كتلها اداهرها
مدام ضحكتي ونوينا اتفاق جديد خليني اكحلها فردنوب ونخربها عالاخر
_ شنوو؟؟
دنكت لجهتها كتلها
_هاي الشاعر يكول
بياضج حاد موفاهي
وشمسنة كبال وجهج گمرة تتحول
ومابين الگمر والغيم والنجمات
لونچ ماخذ الاول
صفنت علية ثواني وحجت متذكرة
_ لا اليووم انت كلش طوختها اشعار وغزل الليلة مانام وراي كومة استغفار روح حارث روح ترة ضوجتني
بس اني شسوي لگلبي مالي سلطان عليه مطيح حظي
شغلت المحرك اضحك عليها كامت تدردم حيل شفتها دخلت الا طلعت من الفرع والحلو بالسالفة لاسالتها عن مرضها ومعدتها ولا كتلها شلونج اخذتني السوالف وياها لمن سهيت حتى سبب هالات عيونها
رجعت بعدين لدوامي وحياتي واذا اكدر كل اسبوع او اكثر ابادل وية جماعتي انزل نهار اخطف زيارة سريعة الهم اشوفها لو بلمحة وارجع المهم عيوني اكحلها بشوفتها
دوامي بالجيش اجه عن رغبة مني اصريت على والدي ابقى مابين البصرة وعجمان ضارب عصفورين بحجر واحد هم قريب لدوامي وهم اشوف حمامتي
وبكل الحالات اني متعلق بالبصرة واهلها اذا اتاخر عنها اعطش، فـ مقسوم نصين مابين اهلي وعشق البصرة وحتى اهلي مايفاركوها
الوالد بين فترة وفترة يجون لعدة قضايا وهم لخاطر عماتي امانة اجدادي عدهم ماينسوهم بطاري كل جية او مناسبة يذكروهن بيها
ورة ايام صادفت بيها نزولي من الجيش خابرني الاكثم انطاني مستجدات وضعهم
كالي مابقى شي ويعقدون وسالني يمته انزل كتله هاليومين انزل وصاني استعجل بالجية وطلب امر عالبيت الجبير اوصي ابو علي يدز اهله ينظفوه ويحضرون النواقص علساس صاير اقتراح وتصويت الاغلبية يصير الزواج بالبصرة لان اغلب معارفنا هنا وهم عماتي مايتعنن بتكاليف سفر وجية لهناك
ويسوون عشى مسبق هناك بعد العقد يفضون بيه معارفهم بعجمان.. كتله مابيها شي وفعلا على كلامه نزلت للبيت الجبير اتصلت بابو علي حاجيته ماتاخر وهو يدز اهله ينظفون البيت بوقتها حجالي رؤوس اقلام عن زيارة اخوه وعياله مانطيت اهتمام للموضوع
سالني شمحتاج من السوك كتله سلامتك وشفت الرجال اخوه رفع ايده بالسلام رديتله السلام وراحوا
انصدمت ثاني يوم من غنوة الاكثم عقد على رؤى بت عمي يابة شلون هيج صار فجاة تحجيلي مختصر ومبين بصوتها بجية
_ ماعرف حارث ابوي طلب هيج لو شايفه شلون گلب الامة علينا من راد يناقشه الاكثم وحتى ضغطه صعد تالي طاوعه مجبور وهسة قدم حتة موعد العشى يكول وراها نزفهم بالبصرة يمكم
سديته منها ورجعت اتصلت بالاكثم مايجاوب حسيت القلق صعد لراسي.. ثاني يوم نويت اسافر لعجمان اشوف الاوضاع، فجاة اتصل بيه الوالد كالي لاتنزل وابقى اشرف عالبيت وجهز اغراض العرس
اضطريت اكعد مكاني بس القلق صعد للستار لحد ماكدرت احصل الاكثم
خابرني وجان صوته ماله خلك كالي تاجل الزواج كوة قنعت الوالد، شهم متخربط عليهم ومايعرفون علته وين بالضبط وحايرين بيه من دكتور لدكتور
سالته قلق عليه شبيه وليش لسة ماتحسن
جاوبني دايخ
_ مااعرف حارث لتسالني اي شي... ابوك دوخني فوك قلقي على اخوك قبل اسبوع راح لبيتهم علساس الدور يمهم ورجع ثاني يوم مكلوبه احواله ومن يومها ماوصل بيت امي فاطمة لا يقبل يحجي شصار ولا يريد اوصل هناك
_ ليش شصاير غير نفتهم شكو. !!!
_ اكله مايقبل يحجي شي خابرت امي فاطمة اسالها شكو بس تبجي احاجي اخوتك يكلولي كلشي ماكو والامور طبيعية اهلك يعضمون المواضيع وهذا شهم مثل الحصان يرافس
تالي ماتحملت رحت ثاني يوم الهم بالخفية انصدمت اخوك بالمستشفى ومحد بيهم منطي خبر وبس امي فاطمة موجودة تالي تعاركت وياها ليش ماحجوا وطلعت تبعتهم
لكيت شهم نايم بغرفة خاصة وكرم واسر يمه من شافوني انخطف لونهم حسسوني اكو خلل بيه
ورثت جكارة وكتله
_ وتالي شصار سالتهم ليش هيج مكلوبة احوالهم لو شسويت بالضبط
_ وغلاتك عندي لاسالت ولاكلت الوجوه شرحت مابيه الكفاية كعدت يمهم سالت عنه كالوله غاسلين معدته وشوية خربطة صايرة عنده من ورة التدخين وقلة الاكل وهيج انتكست حالته تحمدتله بالسلامة وطلعت كتلهم حسابكم يمي بعدين بس خلي يصير زين
_ وابوك ماعرفت شبيه
_ كلشي ماعرفت اصر نعقد واخوك بالمستشفى حالته حالة وكتله تم بس اريده يهدئ هاج علينا ماعرفت شبيه واستقبلت العالم واني عقلي بغير دنيا من وراهم
لحد ماطلع شهم من المستشفى اني روحي خلصانة
دور ابوي شرط عليه تعال نسوي العرس هاليومين
كتله لهنا ومااكدر بعد انته من صفحة وشهم من صفحة لو تگلي شبيك زعلان وية امي والولد لو ماتزوج بدون حضورهم
من شافني قفلت الا سكت عني وتحجج مشكلة بينه وبين امي فاطمة وبعد مافتح الموضوع وياي
_ وهسة شناوي عليه
_ ناوي اروح لاخوتك اشوف شبيهم واتطمن على شهم واحاول وية امي فاطمة تفهمني شصار بينهم اذا ماوصلت لنتيجة اروح لعمامي يحلوها بينهم لان احس روحي كلش تعبت ودخنت من وراهم
_ هههههه اكلك چن هذا العرس راح يطلع عليك عرس الاگشر هههه
سحب نفس وزفره متضايق وحجى
_ يمعود اني ماجنت راغب ولا هاوي بس شسوي لعمك احرجني وماترهم ارد طلبه تعتبر عيبة بحقي وبحقه وهية صارت بعد وراي وراي عاد اخلصك افندي حارث بلكت يجيك الدور وتتزوج حمامتك
_ اييي والله ادعيلي وياك اكثم ووصي الوالدة هم ياابة اذا صار واخذتها تدري شسوي
_ شتسوي بلة
_ وعلي ابن ابي طالب شرط افرغ شاجورين مو شاجور واحد وخلي السما تهلهل طراكيع
_ الله كريم ان شاء الله تصير باسمك وتخلف منها درزن جهال..... يلة اودعناك
_ في امان الله
سديته منه واتصلت بشهم اتطمن عليه جاوبني ماله خلك بس صوته احسن تشاقيت وياه وضحك وراها سديته منه ودزيت مسج لاسر كتبتله
_ الاكثم متحلف بيكم عود حضروا اجوبة لاسئلته منتظر بس شهم يصحصح وراها يكعدلكم ركبة ونص
كتبلي مصدوم
_ لا بربك... هسة هذا شيخلصنا منه واني عبالي تهديد عالماشي
_ يا تهديد وهو العرس اجله من وراكم حضروا نفسكم للتحقيق وكول لامي فاطمة اول مانزل غداي يمها اريد اسمع القصة من عدها
_ والله انته بطران هية لو تتسولف جان تسولفت
_ اهااا هية شنية بالضبط سولفلي وانا اخوك
_ هاي شبيك شسولفلك طلابة بين ابوي وامي عود من تنزل تعال وهية اذا تريد تحجيها الك واذا فهمت احجيلنا وياك ترة كلشي مافاهمين احنا.... يلة اودعناك
خلاني مسطور كلشي مافهمت منه بعدين حسبتها وجيكتها ببالي ااجل نزولي لعجمان وانتظرهم وين يصفون وراها اتحرك بالتجهيزات وجان ماباقي لاجازتي اسبوع وتخلص ماتسوى بعد انزل... خلصتها الايام بالبيت الجبير منتظر موعد دوامي
بوقتها صادفت بنية هية وطفل عبروا لحديقتنا واني احجي وية ابو علي الي استغربته شمرة شالها على شعرها مو بالعادة اشوف بنية بجبة مخصرة عالجسم وشعر مكشوف من الشال تبعتها هية والطفل لكيتها متمددة بنص الحشيش واخوها يلكط نبك من الكاع سالتها شعدج لو لسان باشط اكلتني بيه
انهزمت مني وية الطفل ومن حاججتها على دخلتها للحديقة جاوبت بجسارة مليانة ثقة وضربت الطفل خلته يشيط كمت اغلي منها والطفل فرفح بجي
ضل بالي يمه من وراها
ثاني يوم الصبح رحت للحديقة جمعت بعلاكة نبگ وانطيتهن لعلاوي ابن الحجي جواد كتله عدكم طفل صغير انطيهن اله ماحجى الولد اخذهن اله بعد ماعرفت وصلهن اله لولا الله العالم
قبل يوم من التحاقي بليل جنت كاعد برة واحمد واخوته جايين سهرة يمي لمة شباب عزمتهم على سهرة اندك الباب كام مصطفى اصغر ولد خالي يفتحه واجه گال
_ حارث هذا الرجال ابو علي اجه عليك وياه زلمة ثاني
باوعت للولد وگمت مستغرب شعنده حييت الرجال وخطاره.... عرفته اخوه حجالي عنه مسبقا
كعدتهم بالمضيف وين كاعدين احنا واشرت لمصطفى بيدي يسويلنا جاي........ بعد السلام والكلام
بادر بالحجي ابو علي كال
_ والله يابة احنا اجينا بعد ماضاعت علينا دروب الحل والحيلة وكلت لابو بسام مالها غير اهلها
نتوجه لبيت الحجي هو وولده من خيرة الناس يشوفولنا دبرة لمشكلتنا
_ وصلت ابو علي وان شاء الله اعتبرها مكضية
_ الله يسلمك ورحمة الله عالام النگلتك
احنا يوليدي اخوي ابو بسام مثل ماتعرف هو من سكنة بغداد وكاعد وية عويله ببيت ايجار من سنين عيشتهم عالگد بس المهم لگمتهم بالحلال
ورب العالمين ابتلاه بشاب عاق شالع گلب ابوه صاحبله شلة تعبانة وخربوه ماخلي دهيرية وراه ماسواها لا من شرب لا ادمان
لحد اخر فصل سواه ضربولهم واحد حد الموت ودخل ذاك بغيبوبة ماعرفنا لمن اجوا اهله هدادة على بيته
باوعت للرجال مدنك ووجهه اسود بس تبزه يبجي من قلة حيلته كتله اساله
_ مكطوع كلامك بالخير عمي بس الولد شكد عمره تقريبا قاصر لو بالغ لان حد ذاكرتي اني ماشفته لسة
جاوبني ابوه خجلان
_ عمره بالثلاثين بالغ اكبر خلفتي هوة
هزيت راسي اسمعه گال
_ اهله ماطلبوا لا عطوة ولا دية ولا فصل وكالوا منتظرين ابنه بس يصحى نتفاصل وياكم واذا مات مابينا غير الدم....... حاولت وياهم بالكلام والطيب اهديهم ماهدو وتدخلت ناس جوارينا خيرة بس همة راسهم والف سيف عالدم من شفت الحجي ضايع اخذت بناتي وولدي وشردت بليلة ضلمة لهنا عد اخوي
لحد امس رجعت نزلت لبغداد مضطر عندي اوراق باقية اكملها وابو الايجار خابرني متورط كاتبين على باب بيته مطلوب دم كايللهم اني رجال مؤجر مالي دخل ماقابلين يسمعوه شارطين عليه لو يدبرون عنواني لو يطيح بيها ابو البيت
كتله ماخذ الزبدة من لسانه
_ على هيج حجي الولد متوفي صح كلامي لو متوهم
هز راسه متحسف وحجى
_ متوفي ورة اسبوع من نقلتنا للبصرة وجايين هادين عالمنطقة ورامين عالبيت عدة مرات كايليلهم ما همة شال يم اخوه بالبصرة ....... منفعلين وصاير الرمي ماله والي منطين انذار لاهل المنطقة لو يجيبون عنوان اخوي هنا لو مايخلو
لمتابعة باقي الرواية زوروا قناتنا على التليجرام من هنا
