رواية عذابي الأزلي الفصل الخامس 5 بقلم الزهيرية
لا شيء يقتل روح الانسان مثل
المكان الخطأ والأشخاص الخطأ
مينا/ حياتنه ما چانت حلوة في بيت أهلنه وسبحان الي ما عدها حظ من اول ما عدها حظ من تالي وهذا وچان وضعنه أحنه البنات في بيت أهلنه عكس أخواني وبعد حادثة تقى صرت احس أني واختي الأصغر مني وامي موضع شك عند أبوي لأن دائماً من يرجع ياخذ اخواني الصغار ويسألهم منو اجى منو راح شسون وشنو حچن
اني في وقتها عمري 12 سنة وأختي الأصغر مني جوانا عمرها 11 واخواني واحد عمره 9 سنوات والثاني عمره 8 سنوات وهمه چانوا يحچون كل شي بالتفصيل الممل لأبويه
أما اني ابد ما گدرت أتخطى موضوع السحار وابويه دائماً يجيب السادة حتى يقرون عليه وبيهم الي يزرفون ايدي ورجلي بحجة حتى يطلع الجني وهذا الوقت كله أم رفعت حلبت امي حلب آجيب وتاخذ منها فلوس وبيوم اجتي خالتي تريد دينها من آمي لأنه امي هواية أدينت فلوس منها وامي ظلت تتوسل بخالتي تريد تعرف وين صرفت الفلوس وامي حچت كل شي لخالتي بلقيس
بلقيس/ بس گليلي أنوار عندچ عقل يعني رجال ما يريد يجي يمي يطبه مرض ولا يجي يطلگني بعد احسن اخذ جهالي وعندج بيت اگعدي بي وغصبن عليه المحكمة تخصص نفقة لجهالج ولچ وين عقلچ راحت منچ بنيه بعمر الورد وبعدچ دفعين فلوس الواحد سحار گومي دليني على بيته اليوم اريد اعزي واصخمه غيرچ وحده تروح تشتكي عليه وعلى ام رفعت بعد ما ماتت بنتچ وحايرة تنطلبين فلوس كومة علمود يسكت
أنوار/ اني رحت عليه بس 3 مرات وما اذكر بيته وين
بلقيس/ لعد شلون چنتي تنطين فلوس اله وانتي ما ذكرين وين يسكن
أنوار/ اني من سوه الي گتلچ عليه بالبنات بعد ما رحت بس هو يدز تهديدات بيد ام ارفعت واني چنت أنطي لفلوس لأم رفعت وهي توصلهن اله
بلقيس/ هاااا يعني حلقة الوصل ام رفعت اگلچ أنوار عندچ دين وعقل انتي هسه تخابرين على الگواده ام رفعت تجي هسه لا اروح اخزيها وأشهرها
وامي خابرت على ام رفعت وطلبت منها تجي هسه وذيچ ام رفعت عبالها راح تجي تاخذ الفلوس حتى توصلهن للسحار لهذا خلت ويه رجليها محرك مال سيارة واجتي تركض يعني حسبتها دقايق واجتي بس من دخلت للصالة وشافت خالتي بلقيس وجهه نگلب
وبعدها ما سلمت وبدت خالتي كلامها وياها
بلقيس/ شوفي اني مو انوار ويعبر عليه كل شي هسه تجين ويايه حتى اروح اشوف هذا السحار فوگ ما موت بنتنه ياخذ فلوس
ام رفعت/ لا عيني على بختچ اذا تروحين عليه غير يشهرنه وابو رفعت يطلگني
بلقيس/ وأنتي شعليچ احنه وسحار نتفاصل ما يخصچ
ام رفعت/ اني آروح عليه وبعد ما اخلي ياخذ فلس احمر بس استري علينه هاي سمعتي ضيع بالمنطقة
وبعد مناقشات حادة بين خالة بلقيس وبين ام رفعت ظهر انه أصلاً السحار ميت ورايح لجهنم وبئس المصير وميت قبل ما تتوفى تقى الله يرحمها بشهر وهاي المدة كلها الفلوس چانت تاخذها ام رفعت ومن خالة بلقيس هددتها انه راح تبلغ الشرطة عليها
بس ام رفعت ما خافت وگالت / روحي اشتكي عليه بساعتها مو بس اني انفضح اختچ ويايه وشتريدون سوون سووا اني ما خايفه
وعلى هذا الكلام طلعت ام رفعت من يمنه وچانت خالتي بلقيس تريد تبلغ خوالي بالموضوع بس امي توسلت بيها حتى تسكت وما تنفضح هي وعدت خالتي انه من إيجار البيت سدد الدين مالتها
وأول ايام زواج فرح چانت تجينه بس اكثر الأوقات تكون عليها آثار ضرب وتجي تتوسل بأبويه انه ما ترجع على زوجها زيد بس أبويه ما يقبل ويرزلها ويگللها المره كل شي تتحمل
وبقى هذا وضعنه ما يقارب 8 شهور واني دخلت بعمر 14 واختي جوانا صار عمرها 13 وسبق ان ذكرت انه أبويه دائماً يكرر انه عليه جني لهذا اقترح على امي
قيس / شوفي أنوار هذا البيت بي جني بدليل مينا ما صارت زينه ابد بيعي انتي بيتچ واني ابيع بيتي ونشتري بيت چبير بغير منطقه احسن من هاي المنطقه والبيت اسجله بأسم واسمي يعني نص الچ ونص الي
وآمي هنا فرحت خصوصاً أبويه چان يجاهلها وظلت تتفق ويا على البيع وبالفعل ابويه خله قطعة على بيتنه للبيع وامي خوالي وخلاتي شگد گالولها ترى قيس كذاب هذا شوف شنو بدماغه
بس امي ما قبلت بكلام خوالي وخالاتي وعرضت بيتها للبيع وامي باعت بيتها وقبضت الفلوس وانطتهن لأبويه وهو بعده ما بايع البيت الي احنه ساكنين بي بحجة ما جاب سعر زين وسبحان الله من آمي باعت بيتها ونزلت الفلوس بجيب قيس طلعت مينا ما بيها شي وكل جني ماكو عليها
بيوم طلع ابويه لشغله الصبح وبعدها بساعتين رجع وبوقتها امي واني وجوان دى ننظف
قيس / أنوار راح يجون على مينا جوانا يشوفوهن اليوم العصر حضري بناتچ
وامي تخبلت وتگله / يا زواج هي مينا وجوانا مال زواج لو مثل فرح الي شبع مهانه وذل وجوع يم زوجها
قيس / أنوار ترى اول وتالي هنه يزوجن وكل وحدة تروح لبيت زوجها وتبني حياتها شسوين بيهن يمچ
وبوقتها امي شگد حچت رادت بس أبويه ولا سمع منها اي شي وخلصنه تنظيف وغدة وهي بعدها دردم على أبويه وقبل العصر طلبت من عدنه نروح نسبح ونمشط
وسوينه مثل ما گالت امي وزيد جاب فرح وعافها يمنه وراح وحدود الساعه 4 العصر اجتي وحده وياها 3 بنات
المرة الچبيرة يطلع عمرها بداية الخمسينات وهي سمينه أمر من حالي بس هي وزنها الله لا يكذبني يمكن وزنها 150 كيلو وحتى بناتها هم سمينات مثل امهن
واجتي امي عليه للمطبخ وهي تگول / مينا جيبي العصير ورايه وتعالي لصالة
وواگفه يمنه فرح بالمطبخ وچان تگول / ذني الدينصورات جايات على مينا لان امي گالت مينا ما گالت جوانا
واني هم مثل الهبشة اخذت صينية العصير ورحت وزعتلهن العصير وردات اطلع بس امي ما قبلت وگالت تعالي گعدي يمي واني گعدت يم امي وهنه ويسولفن ويه امي بالبدايه چانت سوالف عاديه بس بعدين امي سألتهن على العريس وگالن عمره 22 سنه واسمه مصطفى وهو عامل تنظيف بالعتبات المقدسة الي على الوقف الشيعي
أنوار/ عيني أم مصطفى غير يجي الولد يشوف البنيه يجوز البنيه ما تعجبه
أم مصطفى/ لا عيني هو گال يمه اني اثق بأختيارچ واني شفت البنيه وعجبني أدبها ترى إذا على الحلوات هوايه
وآمي بعد ما حچت شي وبعدهن گاعدات اجوي خطابة أختي جوانا وچانت مرة چبيرة ووياها بنيه تطلع تقريباً عمرها بثلاثينات وامي صاحت على جوانا جيب عصير وهم حالها من حال ام مصطفى بس فرق بين آم مصطفى وبين ام عريس جوانا هو أم مصطفى چانت تحچي وبناتها ساكتات وام عريس جوانا الام ساكته وبنتها تحچي وجيب وتمدح بميمو وبعدين عرفنه انه ميمو هو العريس
لان امي گالت لاخته العريس / ميمو الچلب مالتكم
وهاي اخت العريس گبل فزت وگالت / خالة ميمو اخويه محمد العريس بس احنه ندلعه ميمو
ريان/ اصعب شي بحياتك أنه تتعلق بشخص ويصير كل حياتك ويعوفك والمشكله لو تعرف السبب ما تهتم إلا ما تعرف شنو السبب ويكون مصيره مجهول وهذا اكثر شي خبلني ملاذ أختفت ما اعرف قرارها وين أراضيها المن اسال عليها ما اعرف كل آحد ومن أختفت يوميه من اختلي بالليل بنفسي اطلع صورها وابچي ودائماً ادعي من الله يبرد نار گلبي بس شلون بعقلي مو قابل ينساها احسها بكل مكان يذكرني بيها
وبعدها قررت اروح اطلع الطبله مآل اخوها من چان مريض بس بعدين اذكرت هو ما دخل ردهة حتى يفتحوله طبله هو چان بطوارئ وما طول ثاني يوم طلع ومن لوبت گلبي صرت حتى ما إختلط بأهلي ومر على اختفاء ملاذ 10 ايام من دخل يمي كمال ودخل وسد الباب ورا واجى گعد گبالي
كمال / احچي ريان كل بگلبك اسمعك
ريان/ شحچي كمال ولك وجلال الله نار بگلبي وين راحت ليش هيچ سوت بيه
كمال/ شوف ريان اني بالبداية چنت وياك ووياها وگلت حبته وحچت الصدگ ويا بس تغيرت نظرتي عنها من بستها ما اعترضت لهذا اگلك احمد ربك واشكره لان لو بيها خير چان بقت يمك ما اگلك أنساها بس الزمن كفيل يخليك تنساها
ريان نزلت دموعي وجاوبته / أنساها شنسى منها اخذت گلبي وروحي وياها
كمال/ اخويه يحتاجلك وقت حتى تشفى وترجع تتعافى من هذا الحب وهي مسالة وقت لا اكثر
طلع من كمال وبقيت وحدي وكل تفكيري بيها اريد اعرف شنو الصار بس منين أبدي ادور عليها وكل طريقه ماكو للوصول الها ورجعت أمارس حياتي طبيعيه بين شغلي وبين البيت بس صرت كل روح ما عندي وبعد مرور تحديداً 28 يوم على اختفاء ملاذ بيومها چنت عطلة ما رايح للدوام والساعة چانت الساعه 8 ونص الصبح من دگ عليه رقم غريب وچنت دى اتريگ ما جاوبت على الرقم الغريب
بس الرقم ظل يلح بالاتصال لهذا اضطريت ارد عليه ومن رديت تفاجأت بالمتصل واول ما الصوت گال / ريان عرفته
ريان/ ملاذ ولچ وينچ ورحتي توچ تذكرتي ريان صار فترة وانتي ماكو
ملاذ / ريان اني بالمستشفى الله عليك لا تلومني على شي من تعرف شصار يله تحكم
ريان / ملاذ انتي بيا مستشفى هسه اجي عليچ
وانطتني عنوان المستشفى وصعدت ركض بدلت ملابسي ونزلت اخذت سيارتي وطلعت بسرعة بحيث اسوق واني عقل ما ظل براسي معقوله ملاذ رجعت واتصلت بيه ومن وصلت للمستشفى دگيت على نفس الرقم ردت عليه ملاذ وسألتها انتي وين بردهة النسائية لو طوارئ وأكدت هي بالطوارئ
دخلت للطوارئ واكو اكثر من سرير وشفت بنيه مبوشه ومعلگين الها مغذي واكو وحدة تطلع عمرها نهاية الاربعينات وملاذ من انتبهت عليه اشرتلي بمعنى تعال تعجبت من چانت عمتها وياها چانت حريصة حتى ما شوفها ويايه ويه هاي المرية عادي عدها اجي يمها اني هم اتقربت يمها وسلمت عليهم
ملاذ / يمه هذا ريان حچيتلچ عليه
شو امها تباوع عليه ورجعت گالت لملاذ/ هو هذا اتحملتي ضرب وغلط ومعتكفة ما تاكلين على مود هذا
ريان / ليش شبي هذا خالة شنو شايفتني گدام زبال ولو حتى الزبال هم ياكل لگمته بالحلال شايفتني حرامي حتى تگولين هذا
ملاذ / الله يخليچ يمه هذا الحچي ماكو داعي اله بس اريد منچ شوية وقت تعوفينه آريد احچي ويه ريان
راحت من يمنه وهي تهز بيده وسوي حركات بحلگه
وبس ابتعدت احس صارت عندي رعشه بجسمي لان ملاذ جرت ايدي وبيدها الثانيه رفعت النقاب وظلت تبوس بيدي
ملاذ / حبيبي ريان مشتاقتلك موت چنت بدونك جسد بدون روح هسه يله ردت روحي من شفتك
ريان تبوس بيدي وتبچي گوه لزمت اعصابي حتى احسسها انه السوته غلط جريت ايدي منها وحچيت وياها بنتر / اي ست ملاذ وين چنتي مختفيه وهسه رجعتي
ملاذ/ بيوم الي شفتك آخر مرة من رجعنه عمتي گالت لابويه ملاذ چانت بالصيدلية هي والصيدلاني وابويه لازمني موتني كتل وسحب الموبايل مني بس قبل ما يفتحه امي كسرت السيم كارت وحذفت كل شي من الموبايل وحلف عليه بعد حتى موبايل ما يصير عندي
واني كل بالي يمك هذا الوقت كله وأكلي صار كلش قليل لهذا كل مرة اتخربط ويجيبوني للمستشفى يخلولي مغذي
ريان/ وليش ما اتصلتي بيه بنفس الوقت وبلغتيني مثل ما هسه إتصلتي بيه وبالمناسبه الرقم مال منو هذا
ملاذ / رقم امي بس من عرفت علاقتي بيك تخبلت لكونك بستني وما تقبل أتواصل وياك بس اليوم من جابتني للمستشفى توسلت بيها وبچيت حتى بس احچي وياك
ريان/ الغلط منچ ملاذ وصليلي خبر بالصار وشوفي إذا ما اجيب عشيرتي كلها تخطبچ الي مو تخليني مثل المخبل ما اعرف وين انتي ولا شنو صار وياچ
ملاذ/ أعذرني ريان والله أحبك واموت عليك
ريان/ بعد لا تعيديها فهمتي ولچ والله اموت الف مرة باليوم بدونچ
خلص المغذي وطلعتها ومن المستشفى وياها امها ومن ركبن بالسيارة مالتي وامها گالت / هاي سيارتك لو طالبها
ريان / بدون فخر سيارتي
واني أخذتهن على بيتنه وهن بقن گاعدات بالسياره وبس دخلت لبيتنه اخذت فلوس وطلعت ومن صعدت السيارة حچت
امها / هذا بيتكم
ريان / اي بيتنه لعد شلون دخلت إذا مو بيتنه
ام ملاذ / هذا كله بيتكم انتوا طاگين للستار
ريان / قل اعوذ برب الفلق گولي ما شاء الله
واني اخذت ملاذ على اقرب محل موبايلات ونزلت هي وامها واخذتلها احلى جهاز واخذت رصيد ابو العشرة لامها ورجعنه للسيارة وسألتهن على عنوان البيت ومن وصلنه لبيتهم وحق الله خرابة مو بيت وما اعرف شلون عايشين بي ونزلت امها ورادت تنزل ملاذ لزمت ايدها وبستها وهي باوعت عليه وبابتسامة خفيفه ومن دى تنزل انطيتها مبلغ مصرف الها ودخلت لبيتهم واني رجعت لبيتنه بس شنو الدنيا ما وسعتني من فرحتي وما مصدگ رجعت الي حبيبتي ملاذ
وطبعاً نقلت كل شي صار لكمال وهو بدوره تعجب
كمال / هسه اريد اصدگ انه كل الحچي مضبوط وصار آمنت بالله المشكله مو هنا المشكله البنيه ما عدها ردت فعل رفض انه ترفض الفلوس والموبايل والمصيبه والطامة الكبرى امها اخذت رصيد وعادي عافت بنتها يمك اگلك اني صرت اصدگ بكلام نور
ريان/ هاي شبيك كمال قابل شنو راح اسويلها البنيه تحبني وأحبها وامها عرفت بعلاقتي بيها
كمال / اگلك ريان شايفني گدامك طفل بابا امها تعرف بنتها چانت وياك بمخزن الصيدليه وابد ما گالتك تعال أخطب بنتي وبنتها كذلك ابد ما گالتلك تعال أخطبني شنو ذولة الحلال ابد مو في تفكيرهم
ريان/ شبيك البنيه مريضه وتعال اگلك وين اكو بنيه واهلها يگولون تعال أخطب غير الولد هو يطلب الخطوبه وهسه من نتواصل اني وياها اتفق ويه امها تحدد يوم حتى اروح أخطبها
كمال/ شوف ريان تريد تزوجها روح ما اگلك لا بس اني لو آموت ما آروح واعتب بيتهم وأخطبلك بنتهم وبيوم تزوج هاي البنيه لا انت اخويه ولا اعرفك
لمتابعة باقي الرواية زوروا قناتنا على التليجرام من هنا
بدل ماتدور وتبحث علي الروايات خليها علي تليفونك وحمل تطبيقنا
