رواية مأوي الزهور الفصل الرابع 4 بقلم ياسه

رواية مأوي الزهور الفصل الرابع 4 بقلم ياسه

يــومــاً مــا تــأتــي ريــاح الـحـقـيـقــة 

لـــتـعـصــف رمــاد الـكـذب

 الـــذي يــغــطي وجــوهـهـم 

حــيـنـهــا يـظـهـر فــاقـدوا الــشـرف 

أمــامــك بـــلاء اقــنــعــه 

هــنا علـيـك أن تــكــن

 فــي حـذر شـديـد بـعـد

مـا كـنـت فــي أمـان مـفـرط

                 ❌❌❌

ترا أصعب شعور تعيش خسران 

والأصعب منها من تعيش مذلول 

متحطم وأشوف أحلام تنهار 

وأني شعندي بس كلمة هضيمه 

اقنع نفسي أگولن باچر تهون 

ما تبقى على حال أحسبها غيمـه

وصار أسنين أگولن باچر تهون 

لا ميت ولا فك گلبي ضيمـه 

........................ 

إمتنان :- تسلقت السياج اريد اعبر بعدني ما عابرة من عنده واجانا صوت الحارس يعيط بكُل صوت ولا الثاني 

 سرعت بحركتي ومَرح تنگز يمي وتصيح

مَرح :- استعجلي استعجلي

الحارس :- اوگفي لج اوگفي 

طفرت من السياج بكُل قوتي جان كلش عالي ومن شمرت نفسي وگعت على ركبي وتأذيت قوي ساعدت نفسي ودست على الالم وگمت من مكاني بديت اركض والحارس يركض وراي هو وست زكية لحد نهاية الشارع عثرت وگعت رجعت گمت اول ما گمت وصلوا لي ولزموني

دفعتهم عطت بچيت ضربتهم توسلت بيهم محد اهتم الحالي اخذوني سحل لحد ما دخلوني بداخل المـأوى وهنا زكــية انتقمت مني اشد انتقام نزعت حذائها وضربنتي بكُل مكان بجسمي دفعتها احاول احمي نفسي اني دفعتها لو جنت على الأخير قفلت الباب وطلعت صوندة من الدولاب وبدأت تضرب بيه بكُل قوتها مخلتني تملخ اريد احمي نفسي ما اگدر اريد ابعدها من عندي ما اگدر جانت تضرب بكُل حقد وانواع الفشار والغلط سمعتهم منها 

 اول مره بحياتي انضرب واول مره بحياتي انهان بهاي الدرجة بچيت من الالم اللي جاي احس بيه ومن القهر والذل اللي اني بيه انفاسي احسها صارت بطيئة اريد اخذ نفس ما اگدر ما تركتني لحد ما هي تعبت دفرتني برجلها على خاصرتي وطلعت من الغرفة

بقيت واگعة بـالگاع على وجهي نفسي مگطوع وجسمي احس الجلد انشال من گد الضرب

وراها اجاني صوت مَرح تعيط اكثر من العياط العيطته بچت عاطت تأذت انتهت وراها اختفى صوتها ورجعت زكيــة عليه لگتني بعدني بـالگاع على وگعتي نصت عليه ولزمتني من شعري قوي وسحبتني عليها وحجت بصوتها المُقزز 

زكـية :- اشلع سنونج سن سن واصلخ جلدج بماي حار وداعت اولادي احرگ وجهج بالتيزاب وانعل ابوج يا ابو اللي يطلع وراج اذا عدتي اللي سويته وفكرتي تنهزمين مره ثانية واليوم تنفذين كُل اللي حجينا بيه البارحة وياريت تعترضين ياريت بس تگولين لا 

كملت كلامها وضربت راسي بـالگاع دعيت ربي بگلب محروك وبدموع يتيم جارت عليه الدنيا وشمرته بين الظالمين والفاجرين وأني أگول

 ( ربي يحرك گلبها بـ أولادها وتشوفهم وهم يتعذبون وما تگدر تحميهم وتساعدهم ) 

وراها اجت شيماء وياها الحارس الكلب الشريك بهذه العصابة سحلوني من الگاع سحل لحد ما وصلوني بداخل القاعة شمروني بدون رحمة بكُل قوتهم ارتطم راسي بواحد من الاسرَّة .. تقدمن عليه البنات مرعوبات من منظري يحاولن يساعدني ومنين ما يلزمني انوجع واعيط ما گدرن يحركني من مكاني ولا گدرن يشيلني على سريري كُل اللي گدرن عليه جابن مي شربني ولمن شعري من وجهي 

دقيقة ورجعوا جابوا مَرح شنو احجي عنها قليل شلون اشرح حالتها ما اعرف حتى المجرم ما يتعاقب وينضرب بهاي الطريقة جانت بس جثة حتى روح ما بيها زرگة من كُل مكان شگد ما اني تأذيت بـالضرب هي متأذيه اضعاف اضعافي حاولت اروح عليها اني السبب بلي صار لها بس ما گدرت جسمي متكسر اعظامي متفسخه ما بقي بيه شيء سالم 

بقينا اني مشمورة بـمكان ومَرح بـمكان والبنات الباقيات يروحن منا ويجن منا حايرات بينا مرت ساعة علينا واحنا هذا وضعنا وراها انفتح الباب ودخلت زكـية وياها اعضاء الحزب الفاسق شيماء والحارس شالوني من مكاني واخذوني الوحده من الغرف جانت فارغه مابيها اي اثاث فقط دوشك ومخده نزلوني على الدوش الحارس طلع وشيماء تبتعه ثواني ورجعت بـأيدها عصارات وزيت زيتون تساعدت هي وزكيـة عليه وبدوا يدهنون بجسمي وشيماء تلوم بزكية وتگول لها 

شيماء :- شلون هيج تسوين بيها ما فكرتي اذا ايشوفها بهذا المنظر يتخبل علينا وما يستقبلها

زكيـة :- ما شفتيها شلون انهزمت تردين اصفگ لها قابل 

شيماء :- عاقبيها بس مو هيج شيشوف منها بهذا الضرب بله

زكيـة :- عاد شلون يهتم للمنظر هذا الحيوان كُل همه شيء واحد وخلص گومي جيبي ثلج بلكي يخف الورم من وجهها 

گامت شيماء تجيب ثلج وزكية استمرت تمسح على آثار الضرب ساعة كاملة حاطاتني ويدلكن بيه بلكت يخف شيء من الآثار من كُل عقلهن تخف جريمتهن بهاي العصارة اللي لازماتها .. بعدهي گومني للحمام وهاي المره استلمت المهمه سلامة الموظفة الثانية سبحتني بـ انواع مختلفة من الشامبوات والغسولات وراها نشفتني وطلعتني بنفس الغرفة جابن اكل وجبرني اكل جنت كُل لگمه احطها بحلگي ابچي دم قبلها على حال مَرح كُل اللي صار بيها بسببي وتالي اني هنا اكل وادلك وهي مشمورة بدون رحمه .. كُل هذا الدلال اللي يسووا وياي جان اله مُقابل مو بلاش وراها انطوني مسكن وغطني وطلعن بسرعة نمت

و اول ما غفيت حسيت الباب انفتح فتحت عيوني اباوع منو إجى شفت إنتصار دخلت گعدت متفاجأة جيتها شجابها وين اندلت وشلون دخلت هُنا تقربت من عندي واني اباوع لها بخوف واگول 

إمتنان :- وين جايه إنتصار لا تدخلين هُنا يكتلوج 

أنتصار :- اني وياج ما اعوفج اجيت اساعدج وادعي لج انتِ حبيبتي ما اعوفج وياج اني وياج

حجت هيج وگامت فتحت باب الغرفة صار ضوء قوي على عيوني رجعت گومتني من مكاني ساندتني طلعنا اني وياها نمشي بطيئ خايفين لا احد يشوفنا احاول امشي ما اسيطر على رجليه جانت تعبانة وجسمي يأذيني عثرت اكثر من مره وترجع تگومني وتگول 

إنتصار :- گومي لا توگعين انتِ قوية 

باوعت لها متفاجأة كلامها وتصرفاتها ابداً مو نفسها إنتصار اللي فاقدة العقل صح الشكل نفسه بس التصرفات الحركات الكلام وحدة ثانية سألتها مستغربه 

إمتنان :- هاي شلون هيج صرتِ زينه 

 أبتسمت وردت 

إنتصار :- اني هيج من زمان بس الله لا يسامح اللي جان السبب وصلني وصلج الهذا الحال 

إمتنان :- قصدج عمو اللي وصلني الهذا الحال 

إنتصار :- لا 

 اجيت اسألها لعد منو بعدني ما سأله و حسيت على احد يهز بيه قوي فتحت عيوني فازه حلم ؟؟؟ 

جنت أحلم ؟؟؟ يعني ما اجت ولا خلصتني منهم؟؟ 

عيوني ترمش ما اريد اصدگ وراها شفت ايد تروح وترجع قريب من عن عيوني باوعت لها ست زكيـة 

زكيـة :- شنو وين صافنة صار ساعة اگعد بيج يلا گومي 

إمتنان :- وين 

زكيـة :- اجى ومنتظرج 

إمتنان :- منو 

زكــية :- قاسم 

إمتنان :- يا قاسم ؟ 

زكـية :- زوجج گومي يلا غسلي واكلي هذا العلج واياج تتبكبكين يمه لو تعترضين ترى طگه ونص يحطج ويكتلج ما عنده مانع 

سحبتني من ايدي للحمام الدار ضلمه ولا صوت ولا حركة الكُل نايم الظاهر صار فترة طويلة اني نايمة وما حاسه على نفسي غسلت وراها لزمتني ومشت بيه طلعنا خارج الـمأوى بجهة الكراج جانت اكو غرفة معزولة عن الدار صايرة برى اعتقد نفسها غرفة الحارس فتحت الباب ودخلت ودخلتني بداخل الغرفة جان اكو رجال شكله لا جبير ولا صغير متوسط العمر لابس دشداشة اصلع ولازم بـأيده سبحة وشواربة تاخذ الروح وبصفة گاعد رجال لحيته من هاي اللي تصير لونها أحمر على برتقالي اللي داخل بيها الف الشيطان گام عريس الغفلة من مكانه ويباوع لي من فوگ لـيجوى وراها حجى وي زكيـة متفاجئ شكلي ويگول

قاسم :- شنو هاي منو كاتلها هيج

زكيـة :- اني 

قاسم :- ليش 

زكيـة :- انهزمت اليوم وكتلتها 

قاسم :- وليش انهزمت ست الحسن 

زكيـة :- ما تريد تزوج عشتو

تقدم عليه رجعت ليورى وگف بمكانه ويباوع لي كُل نظرة تاخذ الروح رجع اندار على الشيخ الگاعد يمه وگال وهو يضحك شكله ما مقتنع بـالشيخ وگال اله

قاسم :- يلا شيخنا نعقد 

الشيخ :- يلا اگعدوا

زكيـة :- بس هي مسيحية

الشيخ :- اي عادي المسلم يزوج مسيحية بس المسلمة ميصير تزوج مسيحي 

وگعت دموعي واني اگول الاسلام بريء منكم وكُل الاديان بريه منكم خصيمكم المسيح والنبي محمد هو بس سمعني بسرعه رد عليه  

قاسم :- شتكولين عيني 

زكيـة :- متگول فضوها خلص الليل وانتِ جب ولا صوت گعدي بمكانج

سحبنتي من إيدي قوي وگعدتني بدأ اللي يسمى روحه شيخ يعقد وكُل ما يگول موافقة اجاوبه لا مرة مرتين وثلاثه اخر شيء گام قاسم من مكانه وخنگتي قوي بـ أثنين إيديه احس روحي طلعت نفسي انگطع الشيخ وزكية سحبوا من عندي واني وگعت بـالگاع اسعل مثل الديك بكُل قوتي من گد ما أذاني 

الشيخ :- تخبلت شبيك موتتها 

قاسم :- موتت الچلاب السود فد قندرة وما تقبل خلقه اخلاق الزرگة فوگاها ما راضيه 

زكيـة :- شنو جديد على الموضوع نسيت وصال اول يوم شلون اعترضت وتخبلت علينا 

ما جاوبها رجعت هي گرصتني من زندي قوي وگالت 

زكيـة :- اني شحجيت الظاهر جسمج تعلم على الكتل شوفي لج والله وبالله اذا ما وافقتي اروح انطيج الشيماء واخليها تعيد تربيتج من جديد اختاري لو أستاذ قاسم لو شيماء 

باوعت لها بدون ما استغرب لان عرفتها شنو من بشر ما حاجه انصدم مستعدة كُل شيء تسوي اقذر الخلق وانذلهم هي

زكيـة :- لا تباوعين هيج لا اشلع عيونج 

الشيخ :- بنتي الزواج ستر وغطا على البنية وماكو احسن من أستاذ قاسم راح تنسترين وتعيشين احسن عيشه وياه وافقي وحافظي على نفسج من الحرام 

إمتنان :- ماكو حرام بهاي الدنيا غيركم انتوا لك خاف ربك رجال شگدك وشكبرك ولحيتك متغطي بيها الف شيطان وجاي تحجي بـالحرام والحلال 

الشيخ :- هاا والله والنعم من تربيتج 

إمتنان :- مترباية احسن منكم ومن امثالكم عديمي الايمان والتربية ولكم خافوا ربكم شلون عايشين بهذا جبروتكم وظلمكم 

الشيخ :- ههههه الظاهر يا قاسم جايتك ايام سودة من ورى اللسانها اني رأيي عوفها تولي وزكيـة تشوف لك غيرها 

قاسم أبتسم وهو يباوع لي ورجع گال

قاسم :- ارجع اعقد واريد اسمعها تگول لا وعرضي اذبحها على قبلة الصبه 

إمتنان :- ليش امثالك عندهم عرض لك استحي على نفسك بگد بنتك اني يا قذر والله لـفضحكم والله 

رادت زكيـة تضربني لزم ايدها ما خلاها ورجع هو سحبني من شعري قوي وهمس بـ إذاني كلام قشعر بدني منه واشمئزيت لدرجة معدتي احسها بقت تفور

قاسم :- تجبريني اخذج بالحرام من خرب عرضي واطلع ناقص عرض اذا ما كسرت عينج بـالحرام وسويتج فرجه بسيطة بسيطة ( ...... ) 

فشر بكلام اول مرة بحياتي اسمعه اول مرة يمر عليه هيج لفظ عيوني احسن صارن نار ومعدتي تفور اريد اتقيأ ما اتحمل بعد رجع ضرب راسي بالحايط وراها دفرني صارت الدفره بنص بطني وگعت بدون نفس 

گام الشيخ من مكانه سحب قاسم ورجع ردد العقد انجبرت اگول نعم موافقة لأن ماكو مفر نهايتي اليوم على إيديهم لو يموتوني لو ياخذني بـالحرام انتهى العقد والشيخ طلع ويا زكيـة عيوني صارت عليهم شفته حظنها من ظهرها وطلعوا سوى 

گام وراهم قفل الباب وتقدم عليه ما اگدر اشرح الوضع اللي عشته والساعة اللي مرت عليه اجرام بعينه كُل انواع العذاب النفسي والجسدي شفته بهاي اللحظات اشكال الكلام اشكال الضرب اشياء مُقززه ومُقرفه وصعبه اي بنت تعيشها عشتها اني بهاي الساعة لحد ما ابتعد

جنت واگعه بالگاع وسابحه بدمي بطني ذابحتني ذبح من الالم ظهري رجليه جسمي اعظامي روحي وگلبي كُل شيء بيه يوجعني كُل شيء بيه منتهي من شاف حالتي انتبه على نفسـه حاول يسندي ويگعدني ما گدرت اگعد ولا گدرت اتحرك لبس ملابسه واتصل على زكـية ما جنت اركز بكُل الكلام اللي گاله بس كم كلمة فهمتها جان يگول 

قاسم :- مو وكتكم معرسين ويا عرسي خل تجي بسرعة راح تموت هاي القندرة اللي عندي 

شوية واجت زكيـة دگت الباب فتحه دخلت والشيخ يريد يدخل وياها اسمع قاسم يگول له وين لا اطيح حظك ولي منا .. على اساس شريف يعني ويحافظ عليه من صديقة الشيخ ،، زكية بس شافت حالتي ضربت على صدرها وباوعت له ترجف 

زكـية :- اتعزيت واتصخمت شمسوي بيها مو هذا الأتفاق شلون هيج 

قاسم :- سوي لها حل خلص دمها لا نتورط بيها

زكيـة :- شـأسوي نص الليل تعزيت وتصخمت وين اخذها بهذا الليل يعدموني انتَ سوي لي حل 

قاسم :- لبسيها شيء خل اشوف شنو اسوي 

اجت على ملابسي لگتهن مشگگات ما باقي بيهم شيء سليم رجعت تحجي بعصبية 

زكيـة :- شلبسها يربي وانتَ مشگگ الهدوم 

قاسم :- روحي جيبي لها مناك بلا لغوة فضيها انطيتج مجال كلش 

طلعت تركض تجيب ملابس وهو تقدم عليه لم شعري ويحجي وياي همس 

قاسم :- حقيرة ليش هيج تعاندين شوفي عنادج وين وصلج هسه وين اوديج بـنص الليل راح تموتين واتورط بيج بس يلا تسوين الورطة بنت اللذينّ 

احس عيوني بدأت تغوش والدوخة سيطرت عليه احاول افتح ما اگدر فقدت كُل طاقتي وراها غبت عن الوعي ومن فزيت ، فزيت على وحدة گاعدة مقابيلي ما شايفتها من قبل ويمها زكيـة وهو وياهن الفراش شايلي وفارشين غيره والمغذي معلگ بـ إيدي الالم مو طبيعي ما اگدر اوصفه احس الدنيا جاي تطلع من خشمي من گد ما موجوعة بقيت ابچي بصوت عالي

زكيـة :- شلون تبقى هيج فاضحتنا ولكم انفضحت يربي انفضحت 

الممرضة :- هسه انطيها مسكن وترجع تنام لا تخافين بس بالبداية هذا الوجع لان هسه مخيطينها 

انطتني ابره بالعظله وابره حقنتها بالمغذي واني الدنيا كلها ما تگدر تخفف الالم اللي جاي احس بيه 

ما افكر بشيء غير بس يهدى ويخف هذا الوجع اللي يدك بروحي طلعت الممرضه و زكيـة رجعت تحجي وياه قاسم 

زكـية :- الاتفاق وياك ما تتقرب منها 

قاسم :- ليش عيني ما خذها اباوع الطولها

زكيـة :- لا مو هيج بس متفقين حالها حال وصال يعني مثل ما جنت تتقرب الوصال مو هيج

ما جاوبها عافها وطلع رجعت عليه گرصتني من إيدي وتگول 

زكيـة :- يا ساقطة يا دايحة شسويتي وخليته هيج يتخبل ولج سنين وصال وياه ما يوم دنت نفسه عليها بهاي الطريقة الله ياخذج يا كلبه يا بنت الكلب من الاول عرفتج مو راحة 

إمتنان :- الرب ياخذ عزيز گلبج ويحرط روحج عليه حرگ الرب ياخذ حقي وحق وصال وحق كُل بنية يتيمة بهذا الميتم منج ومن امثالج يا ظالمة يا قذرة يا كلبة اشوف يوم بيج اشوف بيكم يوم كُلكم يا مجرمين 

بقيت اعيط بصوت عالي واضرب بوجهي واملخ بشعري انهارت اخر قوى عندي وفقدت كُل اعصابي دخل قاسم على صوت عياطي جر زكية من إيدها قوي وطلعها برى الغرفة ورجع عليه شبگني وسد حلگي قوي 

قاسم :- منين جابتج بنت الكلب هاي ورطتني بيج شوفي ولج صوتج ما اسمعه لا تخليني اسوي شيء اروح بيه اعدام 

إمتنان :- الرب يكسر خاطرك وظهرك بشرفك

 يا عديم الغيرة الشرف 

ما رد عليه عافني وطلع بيومها يمكن ابواب السماء جانت مفتوحة واستجاب ربي دعائي وكُل واحد شارك بهذه الجريمة الرب جان ضام له العقوبة اللي يستحقها كُل دعوة طلعت من اللساني الربي جان مجيب لها 

بقيت اسبوع كامل اني بداخل هاي الغرفة محد يجي عليه غير بس زكية وشيماء يجيبون الاكل ويساعدوني اروح للحمام محد يعرف بحالي منو اللي يعرف ويسأل عني واني ما عندي اهل يتيمة وضايعة بنص غابة للحيوانات البشرية والحيوانات البشرية اشد خطورة من الحيوانات الحقيقية 

خلص الاسبوع و اللي اسمه قاسم ما شفته بعد ولا عرفت عنه شيء ومن تحسن وضعي وگدرت اتحركت رجعت للمأوى من بعد تحذير شديد اللهجه من زكيـة ممنوع كلمة وحدة تطلع واذا حجيت راح تسوي هيج وهيج وهيج وفعلاً مستعدة تسوي كُل الكلام اللي تحجي ، دخلت للقاعة امشي بخطوات بطيئة اجوا البنات يرگضون عليه وحدة تبوسني وحدة تسألني وحدة تلزمني من إيدي نزلت دموعي واني اشوف ترحيبهم الي شلون احميكم وما اخليكم تعيشون اللي عشته شلون نخلص اني وياكم من هذا المُستنقع القذر 

ما حجيت شيء ولا فتحت اي موضوع والغريب مَرح جانت نفس وضعي لا حاولت تسأل ولا حاولت تفتح موضوع اخذت جانب المتفرج تباوع لي بس بدون اي ردت فعل مروا الايام وبديت اتحسن اكثر و وضع البنات جان جداً طبيعي وعايشات بكُل هدوء ما عليهم اي ضغط ولا داخلين بهاي الدوامة بعيدين كُل البعد عن سوالف زكـية وجماعتها

واليوم اول يوم النا بـالمدرسة وبداية عام دراسي جديد اني جنت صف ثالث متوسط ومًرح ثاني متوسط ورنا سادس إبتدائي وسما رابع إبتدائي وبنين وزينب وياي ثالث متوسط  

گعدنا الصبح وتحظرنا وتريگنا على حسب الاصول والسيارة وگفت لنا بـالباب صعدنا بيها متوجهين المدارسنا مو كُل البنات جانوا يدامون جنا بس سته انداوم اني ومَرح ورنا وسما وزينب وبنين انداوم والباقيات مبطلات 

بدأت الدراسة وبدأت معاناة البنات مستواهم الدراسي تعبان وضعيف بشكل بسبب الاهمال من الاول ماكو اي متابعة لهن ولا اكو وقت مخصص يدرسونهن بيه وبالاخير كُله طلع عليهن اني الوحيدة اللي جنت شايلة نفسي ومسيطرة على الوضع صرنا نقرأ سوى اني وبنين وزينب لأن صف واحد و واجب واحد ومن بعد ما اخلص من دراستي اروح على سما اقريها و اراجع المواد ويا

رنا اما مرح ابد ما تقبل تقرأ ولا تسمع النصيحة مهملة بشكل مو طبيعي 

خلصت شهرين كاملات بـالمدرسة وهذول الشهرين جنت من المتفوقات وكُل مرة استلم بيها درجة نجاحي اشبع بچي اذكر ماما وبابا شگد جانوا يفرحون من يشوفون درجاتي عالية .. طول هاي المدة عمي يحيى ما سأل عني ولا حاول مرة وحدة يجي ويشوف وضعي شلونه بديت اتقبل الوضع واتعود وتعلق بـالبنات اكثر واكثر وخصوصاً

لا زكية ولا شيماء ولا اي احد من ثاني حاول يتقرب من عندي ويأذيني مشت ايامي هدوء نوعاً ما لحد ما مرت على حادث الزواج اربع اشهر دزيت عليه زكــية 

إمتنان :-نعم ست طلبتيني 

زكيــة :- اي تعالي أگعدي 

رحت گعدت مقابيلها واني القلقل والتفكير موتوني شتريد من عندي وليش دزت عليه 

زكيـة :- قاسم جان مسافر برى العراق والبارحة رجع واتصل عليه واحتمال باجر بالليل يجي حظري نفسج 

اني سمعت كلامها واني احس گلبي طلع من صدري بسرعة وگعت دموعي ما سيطرت عليهم 

گامت من مكانها وجرت الكرسي وگعدت بصفي وتگول 

زكيـة :- البچي ميفيد والعناد ميفيد عجبج ما عجبج هذا واقعج إمتنان شغلج عقلج وفكري عدل و أكسبي الج حتى ترتاحين من عيشة المأوى ويصير عندج بيت وعائله قابل تخلصين عمرج كُله هنا 

إمتنان :- لعد ما سويتوا بيت الوصال اشو جانت حالها حال الحيوان تاخذينها سحل وترجعينها سحل 

سكتت ما ردت الظاهر رادت تضحك عليه بهذا الكلام بس اني اعرفها واعرف غايتها 

إمتنان :- ست الله يخليج لا تاخذيني له وشنو تطلبين من عندي اسوي لج بس لا تاخذيني له

زكيـة :- مو بـ إيدي لازم تروحين 

إمتنان :- ليش مو بـ إيدج مو اني أمانة عندج ومو انتِ مسؤولة عني واجبج تحافظين عليه وتحميني 

زكيـة :- هذا الشي اكبر من تفكيرج واكبر من استيعابج هذا الشغل مو شغلي وحدي ومو

 بـ إيدي وحدي كُل شيء هُنا يصير مُدبر ومرتب ومخطط له من غيري اني مجرد ادير اعمالهم وبس يعني صورة بوجه المجتمع وبس اما هذا المأوى خاص بناس غيري هم مسؤولين عنه 

أمتنان :- منو هذول الناس شيماء و كريم الحارس قصدج 

زكيـة :- ههههه شوف هاي ولج يا شيماء يا كريم منو معترف بيهم هذول اصلاً لج هذول اكثر من واحد يديرون المأوى ومن بينهم قاسم يعني ماكو مفر اخذي النصيحة واشتغلي عدل بدون صوت لان محد يخسر هنا غيرج 

إمتنان :- يعني شنو ... حجيتها واني ابچي 

زكيـة :- يعني ما الج غير حل قاسم صار زوجج ومن واجبج تطيعينه وتسكتين واذا ما وافقتِ على قاسم راح تنباعين الغيره واحتمال يطلع اسوء منه اقبلي بلي عندج قبل لا تتندمين وهسه گومي الشيماء خلِ تنظف جسمج وترتبج 

خليت إيدي على وجهي وبچيت لحد ما تعبت يارب نجيني وخلصني منهم منين طلعوا لي منين اجوني شلون اخلص منهم ما عندي غيرك يخلصني منهم لا تتركني وحدي 

زكيـة :- كافي بچي گومي الشيماء يلا بـ العجل 

إمتنان :- لا 

زكية :- شنو الاااا

إمتنان :- ما اريد شيماء 

زكيـة :- لعد تردين منو عيني ست بمزاجج نشتغل شنو 

إمتنان :- مو مشكلتِ هاي مشكلتج دبري نفسج شيماء ما توصل يمي لو سلامة لو خالة حنان غير هيج ما اجي وياكم لو اعرف اموت 

زكيــة :- امشي ولي من وجهي قبل لا اخرب خلقتج لا وطلع لها اللسان وگعدت تشرط 

 گمت من مكاني ورديت عليها

-- حجيت اللي عندي وانتِ بعد بكيفج شيماء اذا وصلت يمي اخنگها بهذول إيديه و اخلص العالم من قذارتها 

 ساعة تقريباً واجت سلامة عليه رحت وياها بدأت ترتب بيه طول الوقت ابچي واتوسل بيها تساعدني جانت ساكته وسادة عيونها وإاذنها مني ما جنها تسمع ولا تشوف شيطان اخرس ساكته ومغلسة عن الموضوع لحد ما كملت احس روحي خلصت وياها اصلاً ما بقت عندي روح على گد ما بچيت

رجعت للقاعـة بوجهي على سريري تغطيت ونمت شگد حاولن البنات وياي رادوني احجي واگول شبيه ما رديت شگد حاولوا حتى اگعد اكل ما گعدت ولا تحركت من مكاني وحتى ثاني يوم ما رحت للمدرسة ونهاري كُله خلصته مسوية اضراب عن الاكل وبس دموعي تنزل لليل كلش اجت زكيـة اخذتني و اول ما طلعت حسيت على مَرح جانت گاعدة بس ما گامت ولا تدخلت لان ما

بـ أيدها شيء وبس تحجي كلمة وحدة راح تتعاقب وتنضرب وهي لحد الان تعبانه من الضرب اللي انضربته بيوم اللي هزمتني 

طول الطريق زكية تحجي وياي وتفهم بيه وتهدد بيه واني بالي مو يمها عيوني على السماء ودموعي تنزل واني اناجي الرب 

-- موجود بكُل مكان و بكُل زمان اكيد تشوف حالي وتسمع كلامي ساعدني من هذا الظلم ساعدني

وصلنا للغرفة فتحت الباب ودخلتني وراحت عيوني صارت بعينه أبتسم وفتح إيديه يأشرلي اروح عليه بقيت بمكاني وجسمي خشب من گد الرعب اللي عشته من شافني ما اجيت گام من مكانه واجى عليه ويگول 

قاسم :- اهوو راح نرجع النفس لعبان نفس ونفس العناد والوكاحة و تالي محد يطيح حظه غيرج صيري حبابة حتى اصير حباب دلليني وادللج 

سمعي الكلام تفوزين 

إمتنان :- احلفك بكُل مقدس عندك لا تتقرب من عندي وتأذيني عوفني ارجع للدار الرب يحميك

قاسم :- ساعة وترجعين 

إمتنان :- ما عندك اخت ام بنت فكر بيهم يجي يوم ويصيرون بـنفس موقفي 

قاسم :- يطبهم مرض عسى ما يشتغلن بملهى اخر همي شو بلا لغو زايده وتعاي هُـنااا  

نامت روحي مظلومة ذات يوم وأنا أردد في داخلها 

يا ظالم هل قلبك تجمدت فيـه مخافـة الله حتى أصبح يتلذذ بظلم العباد فــ لا تنسى أن دار الظالم ظلام لو بعد حيــن 💔

            الفصل الخامس من هنا 

لمتابعة باقي الرواية زوروا قناتنا على التليجرام من هنا