رواية عذابي الأزلي الفصل الرابع 4 بقلم الزهيرية
أسوء ما قد يحدث للإنسان ان
ينكسر من المكان الذي آمن به
مينا/ كل شي بالحياة يتعوض الا الانسان من يموت ماكو شي وسبحان الله البشر من يموت ما يگطع غير بس بنفسه وهذا چان حال تقى المسكينه اني لهذا اليوم اعتبر تقى شهيدة لآن راحت بذنب غير ذنبها وهي من ماتت ما قبلوا يسلموها وحولوها على الطب العدلي حتى يعرفون شنو سبب الوفاة
وابويه من اخذوها جيرانه للمستشفى مخابر على ابويه ومبلغه انه بنته تقى متخربطة وحتى مبلغه على يا مستشفى ماخذها لهذا أبويه عايف المحل وطالع بوجهه للمستشفى ومن عارف هي متوفيه متخبل وحتى متعارك ويه دكتور الطوارىء ويگله للدكتور / انت موتتها لان ما سعفتها بنفس الوقت
والدكتور يجاوبه / لا مو الي موتته همه جاوبها ميته وانت لمن اب حريص على بنتك شكو عايفها بالبيت لما صار عدها جفاف وماتت
وصايره عركة بينهم ومدخلين الشرطة الموجودة وماخذين أبويه يحجزوا بس ابو عبداللة جيرانه الي هو اخذ تقى للمستشفى بسيارته حاچي ويه الممرض الي چان ويه الدكتور وگله / اخويه الزلمة محروگ گلبه على بنته وانوب تحجزوا وين صايره
والممرض مجاوب ابو عبدالله / روح احچي ويه دكتور كمال هو انسان محترم واذا واحد يحچي ويا يسامح
وابو عبدالله رايح عليه لغرفة الدكاترة وهو موجود وطالب منه يحچي ويا وبالفعل طالع للممر
ابو عبدالله/ دكتور دخيل الله ودخيلك ترى الزلمة من حرگت گلبه على بنته هيچ حچى والا هو ما تاهمك بشي وهاي بنته الراحت وان شاء الله ما تشوف واحد من ضناك يروح من ايدك ولا تجرب هيچ لوعة
كمال / آخويه اني مقدر وضعه بس ما يتهمني يموتها وهي أصلاً جابوها ميته اني شنو دخلي هذا امر ربك وهاي سمعتي كدكتور اتاثر
وباقي ابو عبدالله يتوسل بي ويتعذر منه ورايح الدكتور كمال ومتنازل عن حقه ومطلعين أبويه لكن ما قابلين يسلمون جثة تقى لأبويه لازم يعرفون سبب الوفاة
ومبدئياً يگولون عدها نقص مناعة
وطبعاً كلش صعبة ما تدخل يم الطب العدلي لهذا أبويه راجع هو وابو عبدالله على دكتور كمال ومن شايفهم ما محاچي أبويه بس گايل لابو عبدالله / هااا عمي اكو شي تحتاج مساعده
ابو عبدالله/ والله يا عمي أحنه خجلانين منك بس هنا ابو فرح جاي يتعذر منك ويريد ويستفسر منك
قيس / اعذرني دكتور والله عقل ما ظل براسي من گالوا ماتت واني أترجاك تسامحني
كمال / اني قبلت اعتذارك
قيس / دكتور ولو اضايقك اريد افهم منك هسه بالطب العدلي يگولون بنتي بيها نقص مناعة يعني نقص المناعة فقر دم لو اني غلطان
كمال/ لا نقص المناعة ما اله علاقة بفقر الدم لكن هي صغيرة عمر الله يرحمها منين اجاها نقص المناعة خاف من زوجها
قيس / بس بنتي ما مزوجة وهو شنو مرض نقص المناعة
كمال / هي حالتين ينتقل بيها هذا المرض يا تكون مزوجة وعن طريق العلاقة الجنسية يا عن طريق الدم اما شنو مرض نقص المناعة هو مرض ( إيدز)
هنا أبوية متخبل وهو يگول لدكتور كمال / بنتي ما مزوجة اكيد من أخذناها لدكتورة وسوينالها تحليل انتقل إلها المرض والله إلا ارفع دعوة على المختبر وحتى أحقهم عشائرياً
كمال/ اصبر خلي إني اروح أشوف صحة هذا الكلام وأرجعلك
وفي وقتها دكتور كمال رايح لطب العدلي وبحكم هو دكتور داخل يمهم ومطلع على الحالة كلها وراجع لأبويه ومبلغه/ صح البنيه بيها إيدز ومنقول الها عن طريق الجهاز التناسلي
وابويه عايف الدكتور والمستشفى ورجع للبيت وبوقتها امي چان مجمعين يمنه الگرايب من اهل امي واهل ابويه والبيت خبصة ما تعرف راسك من رجلك وابويه من اجى كلها گامت تعزي بي بس هو ما جاوب احد وسأل امي / أنوار من چنتي تراجعين بتقى لدكتورة شنو چانت تگول الها
أنوار/ تيفوئيد
قيس / زين انطني التحاليل مالتها يريدوهن بالمستشفى والعلاج
وآمي في وقتها گالت / ما اعرف هنه وين
بس فرح اتبرعت وراحت جابتهن وانطتهن لابويه وهو بدوره أخذهن ورجع بيهن للمستشفى ومن شافهن دكتور
كمال/ نفس كلام الطب العدلي البنيه عدها مرض نقص المناعة وهو الإيدز وهاي التحاليل مالتها وأدويتها تثبت كلام الي گاله الطب العدلي يعني انتوا عدكم علم بحالتها شنو إلي متفاجئين منه يعني المختبر ما آله علاقة انتوا من ماخذيها للمختبر هاي تحمل هذا المرض لآن منتقل الها عن طريق الجهاز التناسلي
قيس / بس البنيه ما مزوجة شلون عن طريق الجهاز التناسلي
كمال/ اني ما اعرف هاي الإجابة على اسئلتك يمكم مو يمنه
أبويه هنا عرف هذا كله بس ما حجى شي ابد حتى الموضوع ويه آمي ما فتحه اما ليش ما فتحه ويه امي چانت اله غاية ثانيه وعلى ثاني يوم استلموا جثة تقى الله يرحمها وهذا چان أصعب موقف بحياتي جابوبها بتابوت وبعد الدگ واللطم على التابوت آخذوها وراحوا بوقتها اني وفرح واختي الاصغر مني واخواني بقينه بالبيت واكو ناس من اقاربنه بقوا يمنه وحمدلله والشكر كل واحد من اقاربنه ما همهم غير بس بطنهم ويدورون بس اكل
ومن طلعوا بتقى الله يرحمها يدفنوها چانت الساعة 11 الصبح وما رجعوا من الدفنة غير ساعة 9 بالليل ومن رجعوا أبويه اعتذر من كل گرايبنه انه ما يسوي فاتحة وانه هو راح يوزع ثواب على روحها
وأكثرهم گاموا يحچون على شنو احنه جايين شايلين بطونه والعتب مو عليك بس العتب علينه احنه جايين نوگف وياك بالشدة مالتك وهاي حدها بعد وياك
وراحوا أكثرهم واكو بيهم بقوا للصبح وراحوا وبعدها بأسبوعين من وفاة تقى رجعت ام رفعت تردد على امي وتطلب فلوس للعراف وبقت امي حتى من خالاتي تداين فلوس وتنطي لام رفعت حتى بس لا تنفضح وأستمر هذا الوضع سنة وعبرت حتى السنوية مال تقى
بيوم اجى أبويه وگال لامي/ يوم الجمعة راح يجون ناس يشوفون فرح
وامي تخبلت وتگله / شنو تريد زوج فرح اني ما اقبل تنطيها بعدها صغيرة
جاوبها ابويه / اني مقرر وموافق وما دى اخذ رأيچ بس مجرد دى ابلغ
وبهذا الوضع سد كل موضوع للنقاش ويه امي واني من بعد وفاة تقى حتى للمدرسة ما رحت على الرغم بلغوني انه نجحت لسادس ابتدائي بس الصار ويه العراف خله اثر چبير بداخلي وابويه كل اسبوعين يجيب سيد شكل حتى يقره عليه
ويوم الجمعة اجوي نسوان 3 شافن فرح وظلن يسولفن سوالف عادية وبعدها راحن ولليل رجع ابويه وبلغ امي انه باچر تطلع ويه النسوان ووياها فرح حتى تشتري نيشان فرح
طبعاً هذا كله واحنه ما نعرف شخصية العريس منو وابويه ما يقبل واحد يحچي ويا بالموضوع وامي ما ناقشت ابد وثاني يوم اشتروا بس حلقة وگلادة وتراجي وكله صار بسرعة وتحدد يوم العقد المحكمة وچان مفاجأة انه العريس صانع الي يشتغل بالمحل جوه ايد أبويه
اما فرح لا حول الها ولا قوة وما تگدر تگول لأبويه لا وبعد العقد بأسبوعين عرست فرح
ريان / أي انسان من يدخل بعلاقة يكون ملهوف يشوف البنيه الدخل وياها بعلاقه واني وما مر يومين بس على علاقتي بملاذ وعيونها سحرتني بحيث كل تفكيري يمها ومن تواعدنه واجتي ودخلنه لمخزن الصيدلية وطلبت منها تنزع النقاب تمنيت لو ما طالب منها هذا الطلب كشفت عن جمال فتان تخبل ويعني صدگ انسطرت من جمالها المو طبيعي بحيث ظليت بس صافن بوجهه
وهي تبتسم ابتسامة خفيفة/ شبيك اكيد تكول هاي چنها هامستر تخرع
ريان/ بدون مبالغة تجننين الله يحفظچ لاهلچ حقهم من بطلوچ من المدرسة اني عندي هيچ جمال غير احبسچ يمي
ملاذ/ اعذرني ريان هسه اخويه يفتقدني خلي اروح وبعدين نحچي بالموبايل
ريان/ لا ما تروحين إذا ما إخذ الچ صورة اقلها اصفن على هذا الوجه الحلو
ملاذ / لا تاخذ وعد مني الك من ارجع للبيت ادزلك صورة
ريان / وعافتني وراحت بس شنو احس اخذت گلبي وياها وخلص ذاك اليوم بس احس گلبي راح يطير من بين ضلوعي واكثر من مرة اتصلت عليها وآني بدوامي بس ما ردت عليه ورجعت للبيت وبالليل يله اتصلت وهي تعتذر مني
ملاذ / اعذرني ترى گتلك اني مو بكل وقت اگدر ارد عليك لان بيتنه صغير واخاف لا يسمعوني
ريان/ براحتچ بس أنت وعدتني ترسلين صورة إلي أريدها هسه
وبالفعل آخذت صورة لنفسها ورسلتها الي تجنن وطبعاً دائما مكالماتنه ما تجاوز النص ساعة والله يساعدهم عدهم أطفال هوايه الظاهر لان دائماً هوسه
ومن نزلت حبيت اشوف امي صورة ملاذ وهي دائماً مقرها بالمطبخ رحت يمها وهي واگفة يم الطباخ اجيت من وراها وبست شعرها
إبتسام/ احچي ريان شكو وراك
ريان / بس گليلي شلون عرفتي اني ريان مو كمال وأنتي حتى ما التفتي
إبتسام/ ريان اني أشوفكم بگلبي من بعيوني وأعرفكم
ريان رجعت سحبت ايدها وبستها / يمه البنيه الي گتلچ عليها بصراحه احس نفسي حبيتها شوفي هاي صورتها
وطلعت الموبايل وشوفت امي صورة ملاذ
إبتسام/ هاي البنيه كلش حلوه ومبينه عليها صغيره
وبعدني ما مجاوب امي دخلت نور وگالت / لا المصيبه مو لكونها صغيرة المصيبه شلون آمنت بيك ودزت صورتها ما خافت لا تنشرها
ريان/ اگلچ نور آنتي ليش دائماً تحاولين تشككين بيها
نور / لان حچيها ويه تصرفتها ما تتراهم ابد أنت لكونك معجب بيها ما تنتبه
وبعدها اجتي سحبت الموبايل من ايدي وشافت الصورة
نور / مثل ما گلت دزت صورة رگبتها طالعة ومن صدرها طالع وباوع الكنتور إلي وراها مال غرفة نوم زين هي مو تگول نتغدى ما نتعشى
ريان سحبت الموبايل من نور / اگلچ ترى هي من باب الثقة بيه رسلت الصورة أما على الكنتور فهذا مو دليل غنى أو فقر
وعافتنه نور وراحت ورجعت أمي عليه تسالني/ ريان انت هسه شنو نيتك اتجاه بنت الناس اذا قصدك لعب بمشاعرها فتذكر انه أنت عندك أخوات
ريان/ لا والله يمه نيتي وياها زواج
إبتسام/ خلاص لعد يا ابني احسم أمرك وياها ولا ظل سوالف موبايل وما اعرف شنو
ريان / بقيت مستمر ويه ملاذ يوميه احچي وياها بالموبايل مر على تعارفنه شهر ونص بالتمام واعترفتلها بحبي إلها
ملاذ/ بصراحه اني هم احبك ريان واموت عليك
ريان/ ملاذ ترى متت لا نطلع ونتشاوف ومگظيها بس موبايل الله عليچ اريد اشوفچ
ملاذ / والله ريان ما يخلوني اطلع بس اگدر عسى باچر ادبر حجة على آساس اني مريضة واجي للمستشفى واشوفك بس ويه عمتي
ريان / وليش مو ويه امچ حتى من تجي أصارحها بحبي الچ واخذ منها موعد اجي اخطبچ
ملاذ / لا يمعود يا خطوبة بعدنه ما صارلنه شهر ونص من عرفتك وعرفتني خلينه بعد فترة وامي مريضه وما تگدر تطلع لهذا كله تطلع ويانه عمتي
ريان/ ليش شبيها امچ وليش ما تعالجوها
ملاذ / اكون صريحه وياك احنه حالتنه جوه الصفر يعني ما عدنه نصرف عليها
ريان/ شوفي ملاذ انتي حبيبتي وملاذي وامچ هي امي واكيد ما آقبل امي تبقى مريضه لهذا راح اخصصلچ مصرف من يمي وتگدرين شوية تشترين بي علاج لامچ
ملاذ/ صدگ حبيبي خاف ما عندك لا تضيق على نفسك وتنطيني
ريان/ كلشي يهون لخاطر عيونچ
وكل عادة اتصالنه ما يطول وتعتذر من عندي وتروح بس شنو هاي الفتره صارت تصعد وتنزل ويه روحي والله حتى لو اتصل عليها وما ترد بس المهم تگلى اتصالات مني واحس بوجودها وتحس بوجودي وعلى ثاني يوم واني بالدوام وحدود الساعه 9 ونص الصبح اتصلت عليه وبلغتني انه هي بالمستشفى واتفقت وياها تجي يم الصيدليه مال المستشفى
ورحت بسرعة يم الصيدلية ولگيت الصيدلاني ولد صاحبي واتفقت ويا شويه ادخل للمخزن بس احچي ويه البنيه الي آحبها وهو ما رفضلي طلب
واجتي الي مالكة عقلي وگلبي وهي شافتني اني دخلت للمخزن مال الادوية التابع للصيدلية وهي دخلت ورايه ومن دخلت سديت الباب ورفعت النقاب ما آعرف كل مرة احسها احلى من المرة السابقة
وطلعت من محفظتي 350 الف وانطيتها وهي من دى تاخذ مني الفلوس أيدها طخت بيدي احس شلون عبالك صارت بية شحنة كهربائية هنا تجرأت ولمست ايدها وملمس أيدها ناعم يجنن وهي سحبت الفلوس وأيدها من ايدي وخلت الفلوس بجنطتها
ملاذ / اني آشكرك ريان من كل گلبي تدري هذا المبلغ شگد راح يساعد بعلاج امي الله يوفقك
ريان/ اني بصراحة عقلي چان مغيب وعيني عليها وعلى كل تفاصيلها اتقربت منها اكثر وهي قصيرة قربت وجهي من وجهها ظلت مركزة عيونها بعيوني ضعت كلش تجاهها قربت شفتي من شفايفها وبستها وهي خلت ايدها على رگبتي وبادلتني البوسه
وما احچي على شعوري في ذلك الوقت وبعدت شفتي من شفتها وخليت گصتي على گصتها واحچي وياها همس ملاذي حبيبي ملاذ روحي وگلبي ما اگدر بدونچ لحظة وحدة اريد اجي اخطبچ وصيرين حلالي
ملاذ / مو بيدي خلينه هسه هيچ فترة إلى ما امهد لموضوع لامي حتى من تجي تخطبني ما يرفضوك حبيبي اصبر اني اريدك صير زوجي
ريان / وابتعدت عني وعدلت نفسها ورجعت عدلت النقاب ونزلته على وجهه وراحت واني بعدها بشويه وطلعت احس اخذت روحي وراحت
وآني كل شويه اتصل بيها بس ما ترد احس روحي ما اريد أفارقها ورجعت للبيت وحسيت بعد ما عندي طاقة اتحمل اريد احد احچيله وما لگيت غير كمال وچان بغرفته دخلت لگيته دى يبدل
كمال / هاااا ريان شبيك تريد شي
ريان/ شنو راح تطلع يله بعدين احچي وياك
كمال / راح طلع شوية أغير جو تعال ويايه صار هوايه ما طالعين سوه وهم نحچي
واستأذنت منه ابدل رحت لغرفتي بدلت وطلعنه سوه ورحنه على كوفي وهو يباوع عليه بنظرات معناها شبيك وحچيت كل شي الصار والحچي الدار بينه اني وملاذ
كمال/ شوف ريان بحكم اني اخوك الاكبر منك وصحيح هي بسنة اكبر منك بس ابقى اني اخوك الچبير واجب عليه نصيحتك اولاً عيب عليك تتختل بالبنيه وتبوسها وتتقرب منها وهي ما تحل عليك مثل ما متقبلها لأختك لا تقبلها لبنات الناس اما اني الأعرفه انه البنيه تفرح إذا اجى حبيبها خطبها بس مال متقبل هذا موضوع اله بحث ثاني اما نصيحتي الك بعد لا شوفها ولا تحچي وياها إلا تگلك تعال أخطبني غير هذا الكلام ما عندي واني متعجب عليك ما فكرت خاف واحد يشوفك ويروح يبلغ مديرك وتطلع مناك انت وياها بفضيحة ريان هسه تخابر عليها وخلي تحدد موعد نروح نخطبها انت وضعيتك حرجة بشكل
ريان / وإني عجبني كلام كمال لهذا نويت اذبحها وياها على قبلة واتصلت بيها وطلع رقمها مغلق وفي وقتها گلت يمكن موبايلها خلص شحن بس الي خبلني وطير عقلي من راسي أنه الايام الي بعدها موبايلها كله
(مغلق )
لمتابعة باقي الرواية زوروا قناتنا على التليجرام من هنا
بدل ماتدور وتبحث علي الروايات خليها علي تليفونك وحمل تطبيقنا
