رواية عذابي الأزلي الفصل الثالث 3 بقلم الزهيرية
شكراً لكل شخص خرب مكانته بنفسه
وأراحني من تأنيب الضمير
مينا/ مرات حبنه من يكون من طرف واحد الأفضل انه الانسان ينسحب سواء كان زواج او علاقة حب لان مليون بالمية ما راح يتأذى غير اليحب اما المقابل ما راح يتأذى لان انت أصلاً مو في تفكيره وهذا چان حال امي هي تحب ابويه وتريده بس هو ما يريدها والسؤال الي في ذهن اي شخص راح يقرأ قصتنه وهي ابوچ ليش ما عاف امچ هذا الشي بعدين عرفنه ليش ما عافها
اما هي وشهادة حق سوت كل شي في سبيل بس يحبها وضحت بالغالي قبل الرخيص بس الظاهر الي يحبك من البداية يبقى يحبك طول العمر والي ما يحبك لو تعلگ اصابيعك العشرة شمع ما راح يحبك وينتظر اي فرصة في سبيل يعوفك وامي ضحت حتى ببناتها في سبيل يحبها واني ما اعرف الي يلتجىء إلى السحرة ويسوي سحر مثلاً شينتظر الله يبارك بي
وامي بعد ما رجعنه من السحار ما ادري يجملون الكلمة ويگولون عراف امي في وقتها چان انه اهم شي عدها أبويه ما يعرف بسوته بينه لهذا حتى إذا نتوجع تخلي ايدها على حلگنه حتى ما يطلع صوتنه واني نسبتاً افضل من تقى لان تقى صخنت ودرجة حرارتها ارتفعت كلش بحيت توصل انه تختض وعلى ثاني يوم اخذته امي وام رفعت وراحن وين ما نعرف وقرب العصر يله اجتي وهي جايبه وياها تقى بس الي يلاحظ تقى يشوفها كأنه شلون السكران ويتمايل وحتى حركة جسمها مو مسيطره عليها
ودخلتها امي للغرفه وهي صيح على فرح وتستفسر على أبويه اجى لو لا
فرح/ لا ما آجى وعسى لا اجى بس اريد اعرف انتي عندج عقل من سويتي هيج هذني بناتچ
انوار/ ولج مينا حالتها احسن بس تقى شلون
فرح / انتي همچ شلون طمطمين السالفه مو همچ بناتچ شنو صار بيهن وبعدين عوفي انه مينا ما بيها شي وتقى بيها شي ما فكرتي التأثير النفسي عليهن ما فكرتي شلون راح يعيشن ويه هذا العار ومن يزوجن شلون لو انتي حايرة بنفسج وبسكير قيس وما هامچ احد
أنوار/ ولج اني شلون افهمج واعرف شنو احجي ما راح تفهمين اني اخذت تقى لوحدة مضمدة تعرفها ام رفعت وفحصتها وگالت عندها جرح عميق وخيطته وگالت بعدها صغيرة منا إلى بعد سنة أو سنتين ترجع بنية ما بيها شي
فرح / اني ما اعرف انتي تعرفين اكثر مني بس المعجبتني أم رفعت شنو مصلحتها تركض وياج شنو لوجه الله
أنوار/ المريه صديقتي وسوت ويايه معروف حتى الي يسوي زين هم تحجون عليه
لكن فرح عافت امي وراحت حتى ما جاوبتها اما آني نوعا ما افضل بس تقى خطيه حالها ما يسر لا عدوا ولا حبيب وبيومها ابويه المغرب اجى وجايب ويا سيد لان يگول اني بيه مس مال جن واجى وگف في باب الغرفه وصاح مينا تعالي
واجتي فرح وآني استند عليها وطلعنه من الغرفه واخذتني لصالة لگيت أبويه واكو واحد لحيته طويلة ولابس عمامة خضرة وسبحة بيده من شفته تذكرت السحار وصرت اعيط وهو گام واجى يمي وخله ايده على راسي وهو يقرأ ايات ويگول هذا جن عاشگ ويهودي
طبعاً شلون شخصه يهودي ما آعرف المهم اني من خوفي ظليت حاضنه فرح وابويه يگول لفرح / تعالي جيبيها وانتي ابقي يمها
وجابتني فرح وگعدنه بالگاع وهي حاضنتني وهو يقرا اخرها طلع ابره چبيرة مال خياط مال لحاف واخذ ايدي وكل شويه ويه اللحم مال الأظافر يوخز بيه وبعدها سحب رجلي وهم نفس الوضع ويوخز باللحم يم إصبع أظفر رجلي الچبير وخله ايدي ورجلي يخرن دم وهو يگول لازم اكثر من جلسة يله أصير زينه مر اسبوعين على حادثة السحار
آما تقى صارت حالته أسوء لهذا اضطرت امي تگول لأبوية/ انه تقى مريضه وما اعرف شبيها الصخونة ما تفارقها وصارت عدها تقرحات بحلگها كلش قويه وضعفت بشكل مو طبيعي وصار عدها طفح جلدي
وامي ما گالت لابويه على حادثة السحار وگالت بس مريضة لهذا ابويه چان يروح ويه امي وتقى لكن ما يدخل يم الدكتورة لهذا امي چانت تگول لابويه بي حمى تيفوئيد وجيب ادوية لتقى وتنطيها بالگوه لان ما تگدر تشرب اي شي وظل هذا وضع تقى إلى شهر ونص
بعدها تخربطت لان آكلها كلش قليل وصاروا يجيبون الها المضمد للبيت يخلي الها مغذي وبقت جلد وعظم
بهذا وضعها چانت تجي ام رفعت وتتبسبس ويه امي وتگول/ أم فرح اني ادري الوقت مو مناسب بس العراف ثبر الدنيا ويگول إذا ما جابت الفلوس هسه أشهرها شهيره يم زوجها وبالمنطقة مالتها
أنوار/ ام رفعت بعد ما مرض بنتي يريد فلوس على شنو اني حايرة بنتي الي دى تموت گدام عيني وين چان عقلي من مشيت وره كلامچ
ام رفعت / لا ام فرح هاي ما مرجيه منج اني چانت غايتي مصلحتچ وهسه تگولين عليه هيچي هسه إذا نفضحتي انتي غير انفضح وياچ وبس يسمع ابو رفعت يطلگني ادفعيله الفلوس وخلي يولي إذا انفضحنه شنحصل
أنوار/ اني ما اگدر ادفع الفلوس كلهن اني مصمده جوه ايدي كم فلس من ايجار بيتي راح انطيهن اله ويريد ينتظر لما اجمع بعد وادزله
ام رفعت/ لج عيني هل موجود جوه ايدج بس خلي نسكته انتي ما محلفتني اني طول الوقت المضى گوه مسكته واگله بنتها مريضه وما عدها هسه بس هو يلح وما دى يسكت
وامي في وقتها وعدتها على باچر تروح على خالتي تجيب فلوس الضامتهن يمها وهذا چان اول خطأ ترتكبه امي وهي ثقتها الزايدة بأم رفعت
وثاني يوم خلت أبويه يروح على شغله وهي راحت على خالتي بعد ما اتصلت بيها وبلغتها تجهز كل الفلوس الي عدها بعد حدود ساعتين رجعت جابت الفلوس ودزت اختي الأصغر مني على ام رفعت ومن اجتي وامي طلبت منها انه باچر يرحن للعراف حتى تنطي الفلوس ام رفعت رفضت رفض قاطع انه أمي تروح وياها وأصرت تاخذ الفلوس وهي تروح توديهن للعراف
وبعد 3 ايام من امي دفعت الفلوس لام رفعت رب العالمين رحم تقى من عذابها بيومها اني فرح نتناوب نسوي الها كمادات وچانت فرح مخلية الكمادة الباردة على گصة تقى وهي فتحت عيونها وگالت بصوت خافت
تقى / فرح كل شي يوجعني واكو ناس يجون يمي ويرحون لا تعوفيني فرح ورجعت التفتت عليه وتگلي تعالي مينا لا تعوفيني
وبعدنه ما مجاوبيها فتحت عيونها على وسعهن وشخرت قوي وبعد ما سمعنه منها شي گمنه نعيط اني وفرح ودخلت امي واجتي تركض على تقى خلت أذنها على گلبها بس ما سمعت شي صارت تعيط بعلو صوتها والتمت الناس علينه واكو ناس جيرانه بصف بيتنه هو وزجته لفوا تقى بعباية وأخذوها وامي وياهم للمستشفى
بس من وصلوا للمستشفى اكد الدكتور الي فحصها انه البنيه متوفيه ولازم تتحول الى الطب العدلي حتى يعرفون شنو سبب الوفاة
ومن محوليها إلى الطب العدلي مبدئياً گالوا البنيه بيها نقص مناعة يعني ( أيدز)
ريان/ أني ما أكذب واگول ما سويت علاقات ولا حبيت چان الحب عابر يعني والله حتى الي اسوي وياها علاقة ما اگللها راح ازوجچ ابد لا إذا وعدتها بالزواج يعني هذا يعتبر ميثاق لهذا ما چنت انطي وعد زواج والعلاقة تنتهي بسرعة ولان اكثر وقتي بالشغل حتى موضوع الزواج مو في بالي ابد بيوم الي شفت بي ملاذ يمين أتحاسب عليه گدام رب العالمين عيونها سحرتني لهذا طلعت حجة في سبيل احچي وياها وبالفعل بس ابتعدت بيها عن الطورائ وسألتها عن اسمها وجاوبتني
ملاذ/ بلا زحمة عليك انت ليش تساليني على اسمي
ريان / بصراحة وما الف وادور عليچ انتي عجبتيني يا بنت الناس واريد تنطني فرصة اتعرف عليچ وتتعرفين عليه وألبي الخير يقدمه رب العالمين
ملاذ / يعني شلون انطيك فرصة فهمي
ريان/ انطيني رقمج واني اتواصل وياج ومن هسه اوعدچ إذا گتيلي ما عجبتني ثقي واعتقدي بالله بعد ما اتصل عليچ لو روحي صير بيج
وهي في وقتها طلعت موبايلها من جنطتها وانطتني الرقم واني اتصلت عليها وطلع رقمي يمها وهي بعدها استأذنت مني وراحت بس شنو عيونها ما فارقت مخيلتي ابد واحس نفسي فرحان واحس گلبي يدگ قوي وحتى من رجعت للبيت كلهم انتبهوا عليه أولهم
كمال/ ريان اليوم أحسك متغير شنو زاد راتبك لو دخلت فراشة جديدة بحياتك
ريان/ ادري داخل للبيت لو سونار مطار شكو
كمال/ لا مال زاد راتبك بعيده بس گول فراشة الظاهر راح نحتفل بزواج ريان قريب
إبتسام/ يمه وين عرفتها لازم قبل ما تخطي موضوع الزواج تفكر الف مرة يله تزوج هذا زواج عمر كامل مو يوم ويومين ويخلص
ريان/ يمعودين حيلكم اليوم شفتها ترى بعدني حتى ما متعرف عليها انتظروا خلي اشوف وبعدين أقرر گولوا يا الله ترى آني اعرف كل الي حچيتوا
وطبعاً الي يصير بحلگ كمال كارثة لازم يظل يدقق وامي كذلك ومن عرفوا القصة كلها اول وحدة اعترضت اختي نور/ اگلك ريان اني ما اريد أحبطك بس خلي نكون عمليين يعني اول مرة اشوف بنيه اخوها على سدية الموت وهي حايرة تنطي برقمها لواحد اول مرة شوفه
جنى / ترى عادي نور عادي شنو يعني قابل شسوت يمعودة الناس يموت عدهم ميت ما تعبر الأربعين حتى زواج يزوجون والتعارف بكل مكان ترى مو الا المستشفى
بدور / والله اني أميل لكلام نور يگلچ اخوها بالطوارئ يعني حالته مو زينة وقت تعارف انتوا شوفوا شي منطقي
كمال/ اوف من النسوان بكل شي يخلن آن بالموضوع يمعود معليك بالحچي امشي بفالك وأخوك بظهرك
إبتسام/ اني هم مثل نور ابني ريان اصرف نظر عنها خاف وراها شي
ريان/ يمعودين گولوا يا الله ترى بعدني يمكم لا خطبت ولا زوجت خلي اعرفها اشوف شنو هي بعد على شنو مستعجلين
نور / أني نصحتك وانت حر بس لكوني شفت الموضوع مو طبيعي حذرتك وانت بعد بكيفك هاي حياتك وانت حر بيها
ريان / وآني في وقتها عفتهم وصعدت لغرفتي بس شنو دماغي احسه راح ينفجر من جهة سحرتني بعيونها ومن جهة نور كلامها منطقي بس دائماً الي ينعجب والي يحب ما يشغل عقله ابداً يتبع هوى گلبه واني أتبعت هوى گلبي وبس سبحت رجعت على الموبايل واتصلت بملاذ يمكن اكثر من 5 مرات وما جاوبتني ابد
ظليت ادز الها رسائل ونفس الوضع ما جاوبت صرت ليش مترد تتقصد تجاهلني لو شنو وظليت لليل وحدود ساعة 10 بالليل يله اتصلت بيه
ملاذ / آني اسفة اعذرني مشغولة ويا اهلي ناس تزورنه هواي
ريان/ هسه لا تردين حتى لا تتأخرين على اهلچ اقلها دزيلي رسالة وفهميني وضعچ احسن ما يبقى عقلي يودي ويجيب
ملاذ / بهذا حقك واوعدك بعد ما تتكرر هسه گلي شسمك ترى اني كاتبة على رقمك دكتور وشگد عمرك
ريان / إسمي ريان وعمري 27 سنة وبعدني ما مزوج وانتي شگد عمرجچ وانتي دارسة وشنو مخلصه
ملاذ/ عمري 19 سنة وصلت لثاني متوسط وأبويه بطلني من المدرسة
ريان/ وليش شنو السبب بطلج من المدرسة
ملاذ / بصراحه أخاف احچي وما أعجبك ولا تعجبك حياتنه لأن انت مبين مستوك عالي كونك دكتور واكيد حالتك المادية زينه
ريان / إذا على المادة الانسان بأخلاقه مو بفلوسه اما من جهة دكتور ترى يوم القيامة ماكو فرق بين الدكتور وعامل النظافة لهذا احچي عادي ما يهمني
ملاذ/ احنه بصراحه من عائلة فقيره كلش يعني بالمختصر نتغدى ما نتعشى وبطلني من المدرسة لان ما عنده امكانية يصرف عليه أحنه گاعدين بالتجاوز
ريان/ حرامات چان انتي هسه بالكلية وما مفكرة تدرسين خارجي
ملاذ / لا ما عندي نية ادرس ابد وهذا الموضوع لغيته من تفكيري
ريان/ اگلچ ملاذ اخوچ بالطوارئ شبي
ملاذ/ هااا اخواني يشتغلون بالسوگ عدهم بسطية مال مخضر واكو واحد متعارك وياهم وضارب اخويه على راسه وهو من شفته بالطوارئ چان فاقد بس هسه حمدلله زين وباچر يطلعوا
ريان/ اگلچ ملاذ انتي لكون ملتزمة بالدين مبوشه
ملاذ/ إذا اگلك تصدگ لو لا
ريان/ گولي اصدگ ليش حتى ما اصدگ
ملاذ/ بصراحة اني حتى صلاة ما اصلي بس لابسه النقاب والجبة لان ما عندي ملابس الجبة لابسه جواها دشداشه يمكن إذا اگلك اغسلها بالاسبوع مره خاف لا تشگگ والحجاب مالتي هم قديم اما الشحاطة مالتي من ذني القديمات ما سمعتها شلون سوي صوت من امشي مثل قبقاب ابو قاسم الطمبوري لهذا اتبوش احسن لان بشنو اطلع هسه اكيد بعد ما تتصل ابد
ريان هنا بعد ما سيطرت على نفسي متت من الضحك وگتلها/ اسف لكوني ضحكت بس كلامچ يموت من الضحك وبالعكس عجبتني صراحتچ وحتى ما كذبتي ومو عيب الانسان إذا فقير اهم شي اخلاقه
وبعد حدود نص ساعة من السوالف اعتذرت مني وانه مو بكل وقت تگدر تسولف ويايه لانه بيتهم صغير وخاف يسمعوها وقبل تغلق الموبايل صوت اطفال يمها هرجة واعتذرت مني عن هوستهم وذولة اطفال اخوها الي بالمستشفى وبعد ما حلفتها تجي للمستشفى اريد اشوفها لان طلبت منها اشوفها بغير مكان وما قبلت لان اهلها ما يخلوها تطلع
واني بذاك الوقت حسيت بجوع ونزلت حتى أتعشى بس شنو من راحة شعرت وياها مو طبيعيه وأمي والبنات چانوا بالمطبخ وحتى كمال وياهم يحضرون بالعشى وكملوا وگعدنه ناكل ونفتح موضوعي مرة ثانيه
كمال/ هااا ريان تباحثت ويه فراشتك لو بعدك
ريان/ حچيت كل الكلام الدار بينه
إبتسام/ يمه إذا على الفقر ترى كلنه فقره لله اهم شي أخلاقها
نور / اني ما متعجبة غير عليها شنو هي اي واحد تنطي رقمها تگعد گبل تشكيله الفقر عجيبة
كمال/ ليش ما تگولين صريحة وحچت كل شي حتى بعدين لا ينصدم وتكون ما لعبت عليه اكو بنات يوهمون الولد على اساس هي من عائلة غنية بعدين يطلع كذب
نور / شوفوا اذكروا كلامي بعدين هاي الها غاية وبعدين نگعد جنب الحيطة ونسمع الزيطة
ريان / وطبعاً بعد نقاشات ويه العائلة وكل واحد رأيه شكل وبعدها كل واحد راح لغرفته وعلى ثاني يوم گعدت من الساعة 5 الفجر وسبحت واجيب واتهندس بنفسي واني احس نفسي الدنيا ما وسعتني من فرحتي وكملت وطلعت بوجهي للمستشفى وظليت كل شويه اتصل على ملاذ إلى ما ردت عليه وگالت وصلت للمستشفى واني بالطوارئ انت وين
وبوقتها اتفقت ويا ام الصيدليه تعوفلي المخزن مال الصيدلية مفتوح حتى ندخل اني وملاذ للمخزن لان اريد اشوفها بلا نقاب وصديقتي الصيدلانية وافقت
ورحت قريب على الطوارئ وهي من شافتني اجتي عليه وما اعرف شنو گالت لاخوها ورحنه اني وياها للمخزن وترجيتها ترفع النقاب ويا ريت ما رفعته ابد
وطبعاً احب اشكر صاحبة التعليق حبيبتي الغالية اني اشكرچ على مشاعرچ الحلوة
لمتابعة باقي الرواية زوروا قناتنا على التليجرام من هنا
بدل ماتدور وتبحث علي الروايات خليها علي تليفونك وحمل تطبيقنا
