رواية فصيله لاخو حبيبي الفصل الثاني 2 بقلم ارسلان الجاف
داده بارت جفيان شر المهم نزلت ههههههه تستاهلون يا احلى متابعيني
طلع كيان غسل وجهه بماي بارد لأن نعسان البارحة مانايم..مسح وجهه بالمنشفة والتفت...شاف ملاك..او هو بعيونه ملاك..وارتبكت بس شافته..جانت بالحديقة..وماعرفت تدخل لو تبقه...هي تعمدت طلعت رادت تشوفه وتحققت امنيتها...بس لابسة حجابها وملابسها محتشمة..
بقه كيان واكف بمكانه ويكول بنفسه:اويييللي كبرانة وصايرة كمر
ملاك ظلت مفهية:ياربي يجنن..لحيته طولانة تمووت عليه...كيان حس على نفسه جاي يباوعلها..استغفر ربه ودار وجهه وتحم حم...
ملاك صارت حمرة من الخجل...دخل الديوانية بسرعة وكلبه يدك حيل...
صلاح شاف كيان دخل وصافن:يالحبيب وين رحت
كيان:ها شكلت
سلام:هههههه شكله شايف شبح لو جني
كيان:يمعود شفت جثث كبال عيني اخاف من جني لو شبح
صلاح:يالله نظف بندقيته خلينه نمشي مواعد فهد بشغلة
كيان اخذ البنقدية وشمر المخزن على سلام:اخذ المخزن..وبده ينظفها...
سلام : كيان شوكت ترجع للحشد
كيان:يمكن هل الاسبوع اشوف صحت امي اول
سلام:اي لعد نروح سوه هل مرة(همه نفس الفوج)
كيان:اي نروح سوه احسن...
بعد مانظف البندقية نطاها لسلام...
سلام ركب المخزن....
كيان:سلام دير بالك خاف مو فارغ
سلام:لا فارغ لا تخاف....
ملاك دخلت وحست بندم طلعت بالرغم هي جانت تريد تشوفه...وتكول هسة شيكول عني طالعة بالحوش واصدقاء اخوها هنا اكيد يظن بيه وحدة بايعة الحياء ومو زينة...
اجه ابوها:ملاك يابه روحي صبيلي كهوة
ملاك:تدلل بابا...
ملاك ماعدها خوان بس سلام وعدها 4 خوات 3 مزوجات وكلهن اكبر من ملاك وبس هي وريفان مامزوجات..ريفان هم حلوة تجنن..وهي اصغر من ملاك عمرها 15 بس لتكول عمرها 20 اطول من ملاك
حطت الكهوة على النار وفجأة سمعت صوت طلقة وكلش قوي صوتها لأن بنص البيت...سمعت صياح حيلها راح وتريد تطلع من المطبخ مابيها...طلعت بخوف وشافت ابوها ركض وسمعت صوت شخص يصرخ بأسم صلاح...وجها انخطف لونه وراحت وره ابوها...تسمع صياح ومو فاهمه شي...
كيان يهز صلاح بعنف:صلاح اخوي
سلام لا عقل ظل بيه ولا حيل:ماقصد والله ماقصد جنت امازحه والمخزن فارغ متأكد
كيان لزم ياخة سلام بغضب:قتلت اخوي..سلام قتلت اخوي..ويهزه بعنف وهستريا...
ابو سلام مايعرف شيسوي:خلينه ناخذه المستشفى....
سلام جان متأكد المخزن فارغ لذلك جان يمزح ويه صلاح ويضحك عليه وهو يكله لا تمازحني بالبندقية ابن عمي مات بهيج مزح سلام يضحك عليه ويكله جبان وضغط الزناد حتى يخوفه بس انصدم طلع بالمخزن طلقة واجت بعين صلاح...كيان جن جنونه وهو يشوف دم اخوه ينزل بغزارة...شالوه واخذوه المستشفى...
ملاك وريفان كطعو نفسهم بجي وامهم بس تندعي الله يعديها على خير مايدرون شصاير بس شافو الولد غركان بدمه من شالوه وطلعوه...ومو فاهمات شي...
بالمستشفى...
الدكتور:للأسف الولد مات
كيان : ماصدك وظل يصيح حيل:لا اخوي ما مات لا مو صدك..ودخل على صلاح ويصيح عليه والممرضين لازمينه يردون يوخرونه عن اخوه وهو يصرخ عليهم ويبجي بحركه(صارت هواي بالحقيقة بسبب المزح ماتو هواي ناس بالبندقية بظنهم المخزن فارغ..لازم العاقل مايمزح بالسلاح هالشي خطر حتى لو مخزنه فارغ ماتعرف القدر شضاملك..)
كيان : مو مصدك ابدا اخوه مات ولزم سلام وطاح بيه ضرب حتى دمم وجهه ويصيح عليه بغضب ويكله قتلت اخوي ليش...اجت الشرطة وبالكوة موخرين كيان عن سيلام ..وسلام يبجي بحركة على صلاح ماجان متقصد يقتله هو يحب صلاح ويعزه وجان يمزح..بس انقلب المزح الى بجي ونوح ومصيبة...
الكل عرف واهله انفجعو والنسوان يصرخون ويبجون والشيخ فهد انفجع سمع اخوه مات مقتول...امه خطية حالتها حالة وكل شوي اتطيح ووتكعد تصرخ وتنوح على ابنها وشبابه الماتهنه بيه...
بيت ابو سلام مفجوعين وعايشين برعب والبنات موتن نفسهن بجي والأم ارتفع ظغطها وسكرها وطاحت...سلام اخذوه الشرطة وانحجز للتحقيق...ابوه خطية محتار شيسوي ومو مصدك الي صار ابدا كأنه حلم مو واقع...الدنيا نخبصت فوك وحدر...وصار الليل ومحد هجع او ارتاح...
الناس كلها اجت بيت الشيخ فهد وشيوخ العشائر كلها تجمعت من خارج المحافظة والي داخل المحافظة...
بيت ابو سلام...
بناتهم جايات وباقين يم امهم وخطية بس يبجن على اخوهم..
ملاك تبجي:ماما شراح يصير لسلام
ام سلام لازمة راسها:ماعرف يمه ماعرف..عساني اموت ولا اشوف سلام يصير بيه شي
ملاك والبنات:اسم الله عليج يمه
ريفان:سلام رماه مو متعمد وجان يعتقد المخزن فارغ يعني قتل غير متعمد ماراح يبقه بالسجن بس اهل الولد مانعرف شراح يصير عدهم
دانة اخت سلام:اكيد راح ياخذون فصل ابنه ماقتل ابنهم متعمد لذلك راح ياخذون فصل بس
ريفان:الله كريم..ان شاء الله يكون فصل مو دم بدم...
مرت هل الايام ومحد ارتاح بيها ابدا لا بيت ابو سلام ولا أهل صلاح...
العشائر التمو يردون يحلوها...فهد من غضب كلبه طلب قصاص ونفس بنفس..يعني يريد بمكان دم اخوه دم الي قتله...والشيوخ رفضو وكالو يفصلونهم بفلوس..وفهد رفض كال ما ناقص فلوس اني...
وبعد مناقشة طويلة قررو ياخذون منهم فصلية...عمامهم رفضو ويكولون زمن الفصليات راح...فهد كال لو فصلية لو دم...
كيان انصدم يعرف وحدة من خوات سلام راح تكون فصلية...ويندعي ماتكون ملاك مايكدر يتحمل فقد صديقه وهسة فقد اخوه ومايكدر يفقد حبه هم..ولا يريد يفقد سلام هو مامتعمد يقتل اخوه بس هسة كلش مقهور منه بس مايريده يموت بس هو عند اهله ومايريد اهله ينفجعون بيه مثل ما انفجعو بأبنهم ولو صارت بالدم بعد ماتوكف ابد...
سلام مازال بالسجن...وكل دقيقة يكضيها هناك جحيم ويفكر بأهله...
رجع ابو سلام البيت ودمعته بعينه...
ريفان شافته واخترعت:بابا شبيك تبجي..سلام صارله شي
ابوها:لا يبه مابيه شي
ريفان بجت:لعد ليش تبجي..فدوة بابا احلفك بغلاتنه عندك لا تنزل دموعك تره يعز علينه نشوف دموعك..ان شاء الله تنحل
ام سلام اجت بخوف:ها شصار بالكعدة شقررو
ابو ملاك بقهر:يردون فصلية..
ريفان لزمت حلكها منصدمة..
ام سلام لطمت وجها:شنو..لا تكولها
ابو ملاك بحزن:لو فصلية لو يردون قصاص دم بدم..يعني لازم ملاك تروح فصلية لو يموت سلام وتصير دم بلا نهاية
ام سلام ظلت تلطم وجها بقوة:يمه بنتي تصير فصلية..ابو سلام شوف حل والله اموت ولا يصير بيهم شي..ملاك شلون تروح فصلية...
لمتابعة باقي الرواية زوروا قناتنا على التليجرام من هنا
بدل ماتدور وتبحث علي الروايات خليها علي تليفونك وحمل تطبيقنا
