رواية انتقامك وانتقامي رد الدين الفصل الثاني 2 بقلم تولين جراح
لا يزال قلبها بريئاً ، فالطفوله لم تفارقها يوماً
........................................................
رهف
نصدمت واني اشوف النزل من السيارة رجال رغم كبر سنه انه معتني بنفسه احس نفسي شايفته بس ما اعرف وين فززني من صفنتي وهوه يكول .
_ ها بابا خوما صار بيج شي ؟
رهف:لالا عمو ما بيه شي .
_اعتذر منج ما شفتج ، امشي اوصلج لبيتج ما تكدرين تمشين بهذا منضرج بالشارع.
رهف: لا بيتنه قريب ما أريد .
_لا شلون هل كلام اني تلفت ملابسج طين لازم اوصلج .
رهف:لا عموو ما يحتاج هياته بيتنه قريب .
_ولج بابا امشي اوصلج بدون كلام راح تتمرضين بهل جوو.
سحبني لداخل السيارة وساقها صرت اوصف طريق بيتنا ، جنت خايفه وعقلي بده يصورلي انو راح يخطفني ويبعدني عن اهلي وهواي صار اكشن بعقلي كتمت انفاسي والبيت صار كلش بعيد مدري من الخوف هيج حسيت فززني وهوه يسئلني
_اي عمو انتي يا صف ؟
رهف : ءءاني صف ثالث متوسط.
_امم ، شنو اسمج ، اني اسمي سامي
"جاوبته بتوتر"
رهف: اني اسمي رهف.
_تشرفت بيج رهوفة ، هاي الدربونه مالتكم؟
رهف _ اي
وصلت لبيتنه ياله كدرت التقط انفاسي زفرت براحه ،وكف السيارة ونزلت منها واني اكوله
_شكرا عموو على التوصيلة
_العفوو بابا تدللين واعتذر منج الغلط مني اني تلفت ملابسج
ويه نزلتي من السيارة طلع بابا من بيتنه وهوه شايل المضلة بأيده السليمة ، رحتله واني اصيحله
_بابا
ابو رهف:هاي وين رحتي ياا بابا ضل بالنه يمج ،وشبيهن ملابسج بس لا واكعه .
قطع كلامه العم سامي وهوه ينزل من سيارته يكول
_الغلط مني اني تلفت ملابسها لبنت...
قطع كلامه وهوه يكول
عمار؟
ابو رهف:سامي ما اصدك هذا انته
سلمو على بعض بحراره ،وبقو متحاضنين
سامي : واخيرا لكيتك رحت لمنطقتنه القديمه وما لكيت عنك خبرر
ابو رهف: اي والله انتقلت مناك ، ليش واكف تفضل تفضل
واني رحت اجيب مي وضيافه اله
"سئلتني ماما "
ام رهف: هاي شنوو رهف منوو سوه بيج هيجج؟
_ ماما طفر عليه الطين ومن وصلني الرجال طلع صديق بابا .
ام رهف باستغراب:صديق ابوج شسمه ؟
_ سامي .
ام رهف:شنوو سامي .
_ اي ماما ، ماما بيج شي ؟
ام رهف:لا ماما ما بيه شي بس سامي سافر اله سنين استغربت شرجعه .
سكتت وبعدها اخذت الضيافه ودخلت قدمه الهم .
العم سامي : شوف الصدفه شلون جمعتنه عن طريق هل حليوه .
ابو رهف:ههههه اي والله .
بقو يسولفون وبعدها راح وما قبل يبقى على الغده
واتفق ويه بابا انو غير يوم يجي هوه وعائلته .
دخل بابا للبيت بعد ما ودع صديقه .
"سألته بفضول"
_بابا صالك شكد تعرف العم سامي .
ابو رهف: اني وسامي أصدقاء من ايام الابتدائية وكملنا جامعه سوه بس هوه قرر يسافر وانقطعت اخباره
تذكرين ازهار شلون جنه ما نفترق .
ام رهف:اي اذكر حتى ما جانو يصادقون مكتفين بعض.
صفنت على ابوي وصداقته ويه العم سامي جان يحجي وعيونه تلمع على طاري صديقه .
رهف بفزه: هسه عرفت وين شايفته اكيد بالصورر،
تدري بابا اني شبهت عليه.
ضل بابا يسولف عن صداقتهم ومواقفهم سوه وبعد ايام اجه هوه وعائلته متكونه من ٢ ولد اكبر مني وبنيه بعمري صرنه صديقات وندمجنه بالكلام .
ولكنِ كنت غافله عن العيون الي تراقبني بخلسه .
...........................................
"إني أُحبك رغم أنف قبيلتي ومدينتي وسلاسل العادات ، لكنني أخشى إذا بعت الجميع تبيعني فأعود بالخيبات."
- محمود درويش
جراح
صافن وجكارتي بيدي على راجح وهوه مفرفح من وره حرمته بلبل
ومشاكلها بس كل هذا وهوه يعشكها وميت بيها شنهي سر هل حب الغريب ما اعرف .
جراح: على كيفك ويه رويحتك يا خويه هنه النسوان شوراهن غير حركان الكلب .
"جاوبني وهوه يطحن بنفسه "
_ميت مره احجي وياها يا بنت الناس لا تتزوركين من طلعين ما تنرد ، يابه لبسي البركع وزوركي ما ترضه وألله شنهي اختنك انه رجال دمي حار على عرضي .
جراح: يا خوي كلنه دمنه حار على عرضنا بس انتَ هم شوي رخي الحبل الها .
_جراح انه اغار عليها ما أريد احد يلمح طرف ثوبها موو عاد يشوفها، هاي عشك طفولتي وصباي انه مسودن بعشكها وهيه تحسبه تحكم أكلها يا بنت الناس انه اغار عليج تكلي لا انتَ شك بيه .
"جاوبته بحسره"
جراح: هيج اليحب يصير مسودن بعشك محبوبته .
راجح: هسه عوفك مني وكلي شنهي سالفتك ياخوي من رديت من بغداد وانت موش طيب احسنك متغير وصفناتك كثرت؟
_والله يخوي جني حبيت
راجح : افا يخوي وانتَ الجنت تكول العشك موش طريجي جنك طحت وهل طيحه طيحه .
_ما عرف اضنن موش حب انه عجبتني برأتها لجنها طفله، وانه العمر فاتني يخوي ولزوم التفت لعايلتي وبزري .
راجح : العشك موش عيب وانتَ بعدك شاب لجن ابوي زوجك وانت صغير هل تشوف نفسك كبرت .
سكتت وانه أشعل جكاره ثانيه وعيونها ما فاركت راسي اخخ يطيره بغداد طلعي من عكلي كافي .
"حجه راجح وهوه يكوم "
_انه رايح اشوف الغضب العندي يله خويه ثيمالله
رديت انه هم لحجرتي وبعد ما تطمنت على وليداتي
ورحت نمت وطيره بغداد ما فاركت راسي .
جراح: صباح الخير يالغاليه .
الشيخه جمار: هله يبعد طوايفي صباحك عافيه وخير .
"رد ناجح بضحكه "
_ شنهي يمه هذا كله لجراح جا شبقبتي النه
الشيخة جمار : كلكم نفس المعزه بس جراح فتشت عيني وجبيري .
ناجح: جا ما نعرف احنه جراح عزيز روحج .
رد راجح : جراح وولد جراح عد الشيخه جمار ويه النفس بعد عليمن تحجه .
الشيخة جمار:ياا شيخ عكَاب تسمعهم ؟
الشيخ عكَاب: بسكم عاد عوفو جمارتي لا تغثوها .
صار الكل يضحك وكعدو يتركون وبعدها كلمن راح لشغله
قبل لا يطلع جراح للمعمل حجه وياه الشيخ عكَاب
_بويه جراح مر ليه للديوان رايدك بجلمتين من ترد من المعمل .
جراح : صاير شي بويه؟
_تعال وانتَ تعرف .
جراح : صار يابه.
بقه بالي يم ابوي ، طلعت للشغل بين المعمل والعمال كملت شغلي ورجعت للبيت طبيت بوجهي للديوان أريد اعرف شنهي السالفه العند ابوي .
جراح :السلام عليكم.
_وعليكم السلام هله بيك بويه ، شلونه الشغل بالمعمل ؟
جراح: زين يبوي جيكت المكاين يراد الهن تصليح مكاين اتفقت ويه عدنان يجي يشوفهن.
_عاشت ايدك ، والحسابات
جراح: هم سويت عليهن جرد .
_ هاي هي عشت وليدي .
"سألته بفضول "
جراح:يابه شنهي الشغيله الردتني بيها.
_يا بوي اشوفنك دايمن صافن وبالك مشغول شنهي الشاغل بالك .
جراح:ماكو شي يابه لا تشغل بالك .
حجى ابوي كلام جنه يكصدني بي حسيته يوجها اليه الكلام بس بطريقه غير مباشرة
الشيخ عكَاب: شوف يا بوي جان اكو شايب من اهل الله كلشي ما يعرف لكه طاستين وحده من فضه وحده من ذهب هوه اليعرفه كلشي لونه اصفر ذهب والمعروف الفضه ينباع بغله بس الذهب اغله من الفضه هوه شختار الطاسه الصفره وراح ركض للصايغ حتى يبيعها عليه وهوه يضن هيه ذهب لجن من راح لكاها موش ذهب رد الشايب المجانه حتى ياخذ الطاسه الفضه لجن لكه واحد ثاني ماخذها راحله الشايب كله عمي هاي الطاسه مالتي وانه عفتها هنا رد عليه وكاله انه لكيتها هنا محطوطه وصحت منهو راعي هاي الطاسه محد رد وهسه هاي الطاسه ملكي أخذها الرجال وراح وخسر الشايب الاثنين لا الطاسه طلعت ذهب ولا الفضه صارت اله وفلس من الاثنين.
يا بويه المغزه من هاي القصه اذا لكيت شي ثمين لا تعوفه للغير يأخذه، اخذه وصير انته راعي ..
كلام ابوي احسه مثل الرشدني للطريق الصحيح
ما كدرت ادش للبيت طلعت اتمشى وانه اتذكر شلون زوجت حرمتي وبنت خال ابتهال
بعمر ال١٦ سنه ابوي قرر يزوجني وكع الاختيار على ابتهال جنت رغم صغر سني لكني ضغم بنيتي مال ابن ال٢٠ ازوجت ابتهال العمرها ١٤ سنه وهنا بدت المشاكل بين ابتهال وامي
جانت راعيه مشاكل تجيب حجي وتودي حجي تزرع مشاكل وتشتريها بفلوس كثرت المشاكل بينه لحد ما راحت زعلانه وره فتره اجه ابوها وجايبها وياه وكال هيه حبله ورجعت ابتهال بس قلت مشاكلها والتهت بحبالتها ولدت وليدي صخر وانه بعمر ال١٧ سنه صرت اب
ورجعت المشاكل بينه تكبر وهيج مرت السنين وهيه تحبل على الأربعين تضن هيج تكسر عودي واسكت عن طلايبها وهيج استمرت مشاكلنا وحياتنه .
رجعت من ذاكرتي وانه على طريق بغداد الدولي
هاي شجابني هني معقول عكل ما ضل برأسي من وره طيره بغداد
قررت اروح لمكان لقائنا اول مره بلكي ارجع اشوفها
وصرت اشوف اذا اكو مدرسه قريبه عسى ولعل المحها
وكفت فتره وجان المح طيره بغداد الابتسامه غابت عني واني اشوف الوياها .....
.
.
.
.
.
.
.
.
.
. يتــبـ؏
جميلاتي جدول التنزيل راح يكون بين يوم ويوم واذا ما كدرت انزل بارت ثاني يوم اكتب بارت طويل تعويض واطبك بارتين سوه
وبالأخير اكول
.
.
.
.
لا تنسون التصويت +التعليق بين الفقرات جميلاتي
قراءة ممتعة، دمتم برعاية الرحمن وحفظة
في ميزان حسناتكم
﴿إِنَّ اللهَ وَمَلَائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا﴾
«اللَّهُمَّ صَلِّ وَسَلِّمْ عَلَى نَبِيِّنَا مُحَمَّدٍ»🍃
لمتابعة باقي الرواية زوروا قناتنا على التليجرام من هنا
بدل ماتدور وتبحث علي الروايات خليها علي تليفونك وحمل تطبيقنا
