رواية بين الحب والأسر الفصل السابع والعشرين 27 بقلم أمل مهدي
رائد....
كاعد احلق ومحضريلي القاط والكل ملتمه
ليث مزين سيارته محضره للزفه
ورائد وماهر ووسام وعقيل
وبراهيم جايبلي فرقه الباب المحل
وخابصين الدنيه
حتى ياسر وحسام
مخلصيه هوسات وردح
والحلاق يشتغل
حفلة العرس سويناهه بالبيت
طباخ واكل ووزعنه الكراسي بالشارع
خالي ابو ماهر جان ملتزم الاكل والعزيمه
من تكريت صلاح وعائلته وام مهدي وولده وعوائلهم اجونه واب عزام
اعتذر لان مريض
رافد....شنو ماخذ مقاوله بينه زفيتني وهسه ازف رائد
ليث ....شسوي مبتلي بيكم احبكم
رائد....
طلعت الزفه البيت ابوسامي
اخذنه ريهام ورجعنه للبيت
وصلنه البيت هوسه والعالم كاعده بره
جيران ومعارف واقارب
اخذت ريهام من ايده ودخلته البيت
كعدت اشويه وطلعت ويه المعازيم
والكل يباركلي
كعدت بصف ليث ومن الجهه الثانيه
رافد
وشقاهم الماصخ والمبطن
صدك من گال ليث
اني ورافد اصقطه للاخلاق
عجيبه صداقتهم واتفاقهم رغم ماكو قاسم مشترك بينهم
لا عمرهم ولا شهاداتهم ولا حتى طوائفهم
غيرالنيه الصافيه والمحبه
خالي ابو ماهر ما قصر مسوي عشه رفعة راس
الكل اتعشه وبعده زفوني الشباب
ماهر...
تخرجت وبديت بمشروعي معرض السيارات
والحمد لله كل الضروف من البدايه مفتوحه گدامه
بعد السقوط العدم وجودالدوله
لغو الكمرك
وهاي اول شغله استغليته
بالبدايه گمت اروح الميناء ام قصر
اشتري السياره وهيه بالباخره
من التاجر
اجيب كل ٤ ٥ سيارات سوه ونسوقه
مناك البغداد
رغم خطورة الطرق الخارجيه والسلابه جنه نطلع مجموعه
شغلت وياي رافد وعقيل
اختار
موديلات حديثه وجديده
مداخله للسوك اول مره
ومشت اموري
خلال سنه
فتحت معرض سيارات بالعرصات
بشراكه ويه رافد
رافد عجبته الشغله
وساعدته لبنى بكل العدهه من ذهب وفلوس وفات شريك ويايه
شويه اشويه
گمنه نستورد ويوصلوهه البغداد محمله ابشاحنات
سراب.....
وافقت على عرض وسام ونتقلنه
ابيت اهله
اخذنه بالطابق الثاني غرفتين كبار
وسام
نقل غرفة النوم وطخم وترك باقي الاثاث
وقفل الشقه
ارتاحيت اشويه لان بيتهم قلعه
حصينه كامرات ابكل مكان
مولده ضخمه يعني الكهرباء مستمره ابيتهم
الكل يحبني ومداريني بالاخص من عرفو حامل بالثاني
الا افتخار اذا شافتني كاعده وياهم الا اسمعني كلمه محلوه
وسام......
كلهم بالهول كاعدين الا سراب
تلكتني سيدرا تضحك وتگمز
هله باميرتي الزغيره شلته وبوسه
اشو سراب ماكو
افتخار...تلكيه بغرفته ميعجبه تكعد ويانه وعيبة بحلكه
وسام.....باوع لافتخار جر حصره
صعد الغرفته وهو حاضن سيدرا
ويبوسه
دفع الباب الغرفه ظلمه
فتح الضوه
سراب متمدده على السرير
اقترب منه
لزم ايدهه وباسه
سراب....هلو حبيبي
وسام....اشبيج ليش نايمه بالظلمه
سراب.....هزيت راسي والعبره بصدري
وسام....شبيج احس اكو حجي بعيونج
سراب....ماكو شي اشويه تعب
وسام... اتأ
انت ناسيه اني اقره عيونج
سراب.....سكتت اكتفيت اباوعله
وسام ....امي السبب مو
سراب....اليوم متاخر ليش
وسام ...تتهربين من السؤال
سراب.....لا تهتم المهم انته أخر اليوم
تجيني سالم
وسام....احبج هوايه دا انشغل عنج
يرادلنه سفره بس اني وانتي
سراب.....وعوف سدوره حبيبتي
ما اكدر
وسام ....سحبه من ايده گمت اغار من اطفالنه ماخذيج مني
وحضنته شكد احبج يا روحي
سراب...مبين تعبان
وسام...خطيه ياسر مشلوع گلبه
يوميه من بغداد الجديده للكاظميه رايح جاي
اليوم گلي اتاجرلي شقتك حتى اصير قريب على الشغل
شتگولين
سراب....انطيهيا خطيه خلي يزوج هم بيهه
وسام....هو هم هيج
حبيبي الحلو مراح يگول منو غاثه
سراب....من شفتك نسيت كلشي
الحزن عندي يصير فرح وحتى
روحي تهده وترتاح من اشوف نفسي
ابين اديك
رفعت راسي كان مركز بعيوني
وسام....ابتسم وهو يتلمس بوجهي باصابيعه
احب اتحسس ملامح وجهه ادنيت عليه وبسته وما بدرت منه اي ردة فعل
كنت خايف لا هم تلعب نفسه
لان هذا الطفل محاربني من البدايه
كملت واخذني الواهس اشم بيه
وتعيط سيدرا
ونكمز اثنينه
نعلعلا اهلچ
سراب....واني ضحكت
اجتنه تزحف وصعدت على حضن ابوه وولته راشديات
وسام....لزمه گزكز عليه لچ انت احد وازج عليه
وظل يلعب وياهه
سراب..
خلصت اجازتي وجددته سنه بدون راتب
احس روحي بردت مو مال دوام
اني هواي اساعد ام هادي بالبيت
خطيه المره چبيره ومرات رواء واسيل
يساعدوهه بس قليل
افتخار...طبت المطبخ شافتني اغسل
اماعين
...خزرتني لعد ام هادي شنو شغلهه
ميفيد المعلم علخدمه امعلم
سراب....التفتت عليه
شجاوبه
هاي ابسط ما اسمعنيا واني بطبعي
ما احب اشكه الوسام
بنتي اذا ويه الجهال تلعب لازم. ما اخذه انيمه
اذا اخذته اصير افرقه عن جهالهم
دخلت بالرابع
وحملي نحس وماريد انفعل اخاف
على طفلي
گمت اتحا شاها
بس وقت الاكل انزل أكل ووكل بنتي واصعد
رواء واسيل حتى بالبيت لبس ومكياج ومدندشات بالذهب
صالون كل اسبوع
مثل افتخار ترتيب باي وقت
اني هم هيج بس هاي الفتره
بسبب حملي هملت روحي اشويه ما اصبغ شعري ولا اضافيري
ذاك اليوم
نزلت بدشداشتي
كاعده على ميز الطعام اوكل
سيدرا
هم شافتني ونهدت بيه شنو هاي البهذله نازله بدشداشه
رواء...خاله سراب تعبانه بسبب الطفل...حقه بعدين اشبيه
افتخار....انت اسكتي محد سمحلج تحجين
سراب...
اخذت بنتي ونسحبت فوك ما اريد مشاكل
بس نفسيتي بدت تتعب واصير اعصاب
نيمت سدرا ونمت
وسام...
اجيت من الشغل وكت العشه گالو اتعشت وصعدت
اتعشيت وحدي وصعدت لكيته نايمه
مشتاقله
المحل ماخذ كل وقتي
اجيت انام حسيت عليه كاعده
.......سراب كاعده
لا نايمه
......هههه لعد اشلون جاوبتي
مديت ايدي عليهه
سراب...ارجوك عوفني اريد انام
وسام....مشتاقلج وسحبته من كتفه
سراب.....رجاءا عوفني ونترت ايده
وسام....اشبيج ليش يمته ما اجيج
الگاج اعصاب هم هاي اعراض الحمل
سراب....من صار اعصاب
اني سكتت
وسام.....سراب
سراب شتريد
وسام....اكعدي فهميني اشبيج
سراب....ما بيه شي بس عوفني
وسام....ماشي انت الطلبتي
گام معصب راح للغرفه الثانيه
فرش ونام
سراب.....انقهرت وبجيت طلعت حركتي بي
عمرنه ما متفارك افراشنه واحد ينام على ريحة الثاني
اليوم تباعدنه ونمنه ليلنه زعلانين
وسام....
ظليت اتكلب ما كدرت انام ادري امي السبب
وسراب متحب المشاكل
وتالي اشلون
كعدت دخنت جكارتين ظليت احرك
بروحي
ما شوف الا صار الفجر
رحتله كلبي ياذيني ما اتحمل زعله
دخلت بالفراش عبالي نايمه
اشو هاي اللتفتت عليه وهيه تناشغ
أخذته بثنين اديه...
كافي حبيبي كافي
جريت حصره لعد اشكد متاذايه
ومتحجي
اشلون حتى الشقه أنطيته الياسر
ولو الأوضاع موزينه وما اكدر اسكن بالاعظميه بعد... بدت تنقسم
العالم لو سنى لو شيعي
مخلفات الاحتلال والفوضي
التفرقه الاساس حتى يحقق
غايته
يعني ماكو أأمن من بيتنه
عيد ميلاد سيدرا قريب وبدينه
انحضرله
وفتخار اكثر وحده متحضره اله
بدلة سيدرا والكيك والحلويات كله توصيه من محلات
والعشه من مطعم معروف
رغم الحفله مختصره على عمامهم وعوائلهم وخالهم سعد وعائلته.وامي وشهد هم اجوني
امي قدمتله السيدرا هديه تراجي ذهب
افتخار..... بدل الشكرا لزمتهن بديه
هههه شنو ذني هم تراجي شخفاتهن
حرجت امي
اني ادري تتعمد اسيى اليه
اترخصت امي وراحت حتى
قبل العشى رغم ام اسيل زوجه
اخوهه مقبلت تطلع امي بس
شهد خابرت رائد اجه اخذهم
انقهرت احس روحي
اريد انفجر
كبدت بداخلي اهوايه خلصت الحفله وخلص العشه
وسام والولد كلهم بالاستقبال
واني من طلعت امي ما وصلت يم افتخارعفتهم كلهم بحجة
ما اشتهي الاكل
ظليت إلى أن راحو خطارهم
وبديت أرتب ويه ام هادي
شلت الكاسات والماعين كريستال
ومذهبه
تحف تستعملهن بالمناسبات افتخار
خليتهن على السنك اغسلهن
زلكت كاسه وكعت ونكسرت
أجت افتخار وكأنه متحمله
...... لج تعرفين هذني شنو
بتاريخ اهلج ما تشوفيهن لو ما داخله بيتي
انت تعمدتي تكسرين منهن
انت... انت... انت
واني احس كلبي بده ينفخ اريد انفجر
سراب...... شلت درزن من الكرستالات وكلتله هذني التحجين
عنهن... وضربتهن بالكاشي
صارن طشار
هيه اتخبلت بالزايد
رجعت على صينيه كريستال وبين كاسات آيس كريم
وهم ضربتهن بالكاع وصرخت بعلو صوتي
انت ليش تكرهينييييي
ليش اتاذينيييييي
حسبي الله عليج ياظالمه
على الهوسه اجو يركضون حسام
ووسام وسامر
وفتخار.... تغلط والسب وتخبلت على كرستالاته
وشلون اتحسب عليه
محد حجه بس سامر
سامر.... اشبيج اتخبلتي صدك مو وجه نعمه
حسام...... انت لا تدخل
سامر..... فد مره خليه تضربه لاامك وانت اتفرج
وسام...... ظل يباعلي
يقرأ الحجي البعيوني
سراب..... واني واكفه بهدة حيل
اباوعله
خلصت كل طاقتي اعذرني ما اتحمل
أخذت سيدرا وصعدت والطفله تبجي
اخترعت من شافت الهوسه
اسمع حسام يتعارك وين أمه وسامر
صار مصايح
بس وسام ما سمعت صوته ولا حجه
نزلت الجنطه وأخذت كل ملا بسي
وملابس سيدرا
صحت ام هادي ونزلناه الجنطه اني وياهه
وأخذت بنتي وطلعت بره
لكيت وسام كاعد وحده بالحديقه
يحرك جكاير
سراب..... وديني لأهلي
وسام..... ابقى ونلكه حل
سراب..... اني ماريد ادورلي على حل
دور وحدك على الحل ومن تلكى
اني يم هلي
أتقدم بتجاهي باوعلي كأنه يترجاني
ابقى
سراب... إذا متوديني اخابر رائد
وسام.... خله الجنطه بالسياره
وطلعنه
طول الطريق ساكته بس ادموعي تنزل
لا هاينه عليه نفسي
ولا وسام يهون عليه اخلي بهذا الموقف
وصلت بيت اهلي
استغربت امي من شافتني
اميره..... خير يمه العصر جنت يمكم
صاير شي
مجاوبته
سراب.....شهد اني تعبانه ديريبالج على سيدرا
وصعدت الدرج
وسام...... خاله سراب تعبانه جبته ترتاح شويه
اميره..... يمه لا يظل بالك
فوت اكعد
وسام.... لا ولله لازم اروح الوقت متاخر
اميره.... الله وياك
وسام....فيماالله
ليث..... التهيت بشغلي وتوسعت
اكثر شغل الامريكن مريح يدفعون اكثر وجربو شغلي وغير عذا احجي وياهم نكليزي بدون مترجم
وين ما اتنقل سلاحي بحزامي ووياي اثنين ولد عمومتي حمايه
اسبوع وراىد داوم هو وريهام
رائد... السلام عليكم
ليث... عليكم السلام يا اهلا بعريسنه
شو داومت
.... لعد شسوي ضجت
.... اكو واحد يضوج من العرس يابه
..... مو اشوفك ميت
ليث اسكت اشو مخلصه ابغداد
وعايف مرتك
....... صدك لو امان اجيبهم بس هلتشوف واحدنه يشتغل وشايل كلبه بيده
..... والله صحيح
كل ما جاله الوضع يصير اصعب
كثرة العصابات خطف وقتل على
شنو منعرف اختلطت الامور
علينه
وهلمره بث التفرقه هذ سني وهذا شيعي
هدف َن اهداف الاحتلال هو تفرقة
العراقيين
ابو عزام تمرض هاي الفتره ومل وهو
يحجي على ليث ويوصي
ليث....
طلعت من الشركه اني ورائد
بيدنه اوراق نحجي بيه رايدين
انقدمه على مقاوله
فتحت السياره وصعدت ورائد
ابصفي
دحام كال اعبر الشارع اجيب جكاير
واحمدبالشركه بلحمام كال جاي وراكم ذوله حمايتي
بلحظه انشغلنه
طبكت سياره بصفي ونزلو ملثمن ٤
اثنين تجهو عليه مباشر جان باب السياره مفتوح
الاول شهر سلاحه بوجهي
والثاني ورى
سحبت سلاحي ورميت اول احد
متجه عليه كان بيده مسدس وكع
اجه من ورى الثاني
صاح حسين...
ما متوقع اسبقهم وارمي
ورمه طلقه اجت برائد
اني رميته ابرجله وكع اجو دحام واحمد والحارس
كل هذا صار بلحظه ولوما مستعد ما ادري الله ستر
الاثنين البقو شحطو السياره ونهزمو
اني نزلت جريث اللثامهم عرفت
منهم حسين والثاني ما اعرفه
ركضت على رائد لازم صدره ينزف
صعدت السياره اريد انقذ رائد
وزلامي نقلو ورايه حسين والثاني
خابرت ابوي
كال دازلك ربعنه الا اخزيهم
وهججهم من ديرتنه
دير بالك على صاحبك وشتري
لو شكد ما يكلف علاجه
وصلت المستشفى وخذو مني
بالطوارئ
وورى هم اخذو حسين وصاحبه وخبرنه ذوله مسلبجيه
دخلوهم كلهم للعمليات
واني تندمت ما رجعت علي حسين
وصفيته
اجونه من تكريت عمامي وولد عمي
ولزمنه حراسه عليهم
اخاف احد يهربهم
ليث.....
خابرت على رافد وفهمته شويه
واجوي كلهم
قهرتني امه من شفته ترجف وتعيط
يمه عريس ما شفت شي
رائد لا تفجعني بيك
وتفاجات من شفت سراب لازمه امه فاقده وحامل
حتى حجابهه مخربط وشعره طالع
حسيت بذنب
وكعت بالمسكين ماتهنه صار شهر عريس
وريهام تبجي وابو سامي حاضنه
دعيت الله يطلعه الرائد ولا يصدمني
ويصدم اهله بي
واكف ويه الشرطه وسمعت عيطه
وصارت هوسه
ركضت لكيت سراب فاقده
وشالوهه رافد وعقيل للردهه
وجابوله الدكتوره
شويه واجه وسام واخو حسام وياسر
كل شويه وطلع واحد من غرفة العمليات وصاح
محتاجين دم
ويرحون اثنين يتبرعون
خفت اهوايه على رائد
جرحه بصدره ونزف اهوايه
ليث
أخخخخخ يا حسين والله وأمان الله
لطلع روحك بايدي
وخليك تتمنه الموت وما تشوفو
ثلاث ساعات وطلعو رائد
حجزتله بالخاص واهلو يمو
اصابته بطرف الرئه والكتف من جهة
اليمنه الله ستر لو اليسره جان عدل وبالقلب
حسين اصابته خطره بصف القلب
والثاني جايه بعظم الفخذ وكاسرته
خليناهم بغرفه وزالامنه تحرسهم
ابو عزام رايحين عل عشيرة حسين
وداكينهم
وذولاك امطلعين سند ان همه فاصلي من العشيره وين تلكو اكتلو
ليث..... يومين بالمستشفى لانوم ولااكل
الا صحه رائد يالله ارتاحيت
وسام......
رجعت بعد ما وصلت سراب الاهلهه
ما بودي ادخل البيت
كعدت بالحديقه سلوتي صارت الجكاره
اشلون احله امي ما نعيش وياهه
واني مجبور الوضع مو زين وين
اروح
طلع حسام شافني
حسام.... اشوكت اجيت
وسام..... قبل شويه
حسام..... شنو الوضع
وسام..... الوضع افتخار محاربته بدون متحجي اني اقره الوجوه
حسام.... وهسه اشقررت
وسام...... اني صار فتره افكر بس ما يهون عليه انطقه
بس افتخار ما خلتلي اي اختيار
اريد حصتي من تركة ابويه
حسام... ووين تروح
وسام...... ابني بيت بالحديقه
حسام.. واذا افتخار ما قبلت
وسام عوف َمسالت البناء هسه
اريد حقي من ورث ابويه قسم الفلوس والذهب
ونطوني حقي
وكمت صعدت مريت من يم امي وسامر
وعفتهم وصعدت
وره يومين اخذت فواكهه واكل جاهز ورحت
كلهم كا عدين وهيه ما قبلت تطلعلي
اول مره سراب يقسه كلبه عليه
لاعبت سدوره ضحكته كافيه تزيح
الهم
وطلعت
اخابره على تليفونات اهله متطلعلي
واصلا هيه عايفه تلفونه وذهبهه
وكلشي ابمكانه
سبوعين كل ما روح متطلعلي
وبيوم رحت لكيت بس شهد بالبيت
وتبجي باقيه يم سيدرا
وحجتلي على رائد
طلعت للمستشفى
اجيت ولكيت حالتهم حاله كمت
ادور عليه وينهه
ام رائد.... هنا تعال يوم اخذه رجعه
للبيت راح اتموت روحه
وسام..... سراب لزمت ايدهه
فتحت عيونه وكامت تبجي
وسام اخويه رائد اشلونه عفيه
وسام...... اش اش كافي انشالله زين هسه يطلعو يكلبي حضنته
ياربي شكثر مشتاقله
مسحت ادموعه بيدي
سراب كافي انت حامل لاتنسين
سراب... ما اكدر كلبي يوجعني
علي رائد
وسام كعدت يمه اتلمس بشعره شويه هدت ونامت
ساعه وطلعو رائد جان ليث يحجي ويه الطبيب رحت يمهم
كال حالته مستقره وانشلله زين بس حسين مخطرلان الطلقه بصف القلب
اجو الشرطه والامريكان وفتحو تحقيق وستجوبو الثاني الصوبته ابرجله شويه شويه ويعترف علو مصايب قتل وتسليب للسيارات
وخطف الناس ودفع فديه هو وزعيمهم حسين
والخطف الاول جان ورى حسين
من بعد يومين حسين مات راح الى لعنة الله
من بعد هاي الحادثه انكسر واهسي كليا بشغلي
رائد اتحسن وطلع للبيت
وخصصتله طبيب وممرض يتابعو
ابويه انصاب بجلطه بالدماغ
ما وعه منه ٣ اسابيع بالمستشفى
وحاولت اسفره بره
بس الطبيب اكد موته سريريا ما يفيده اي علاج
وكلت محامي يتابع شغلي ويجمع كل فلوسي
اتوفه ابو عزام ابنهاية ٢٠٠٤
رجل المواقف
الجبل الشامخ
خيمة عشيرته وهيبتهم
استمر العزاء ايام رجل بهذه المكانه
اكيد معارفه من كل المستويت
ليث..... اهلا ابو الوليد اشلونك
خالد.... البقيه بحياتك
ليث.... تسلم حياتك الباقيه
خالد.... شنو اخبارك ما تسر
ليث..... اترصدوني لان شغلي ماشي
خالد.... وهسه شنو تسوي
ليث.... اصفي كل شي واشوف شسوي
خالد.... اطلع للامارات
ليث.... اشعندي هناك
خالد..... صفي كل شي وطلع
واني وياك ناسس شركه بين عمان ودبي
ليث..... ما ادري خل الملم فلوسي
وشوف رائد اشلون يصير
والله كريم
خالد..... وهيه اشلونه
ليث ابتسم..... امبينه زينه والحلو زوجه صديقي
خالد... لا بربك اشجابك عليه اشوصلك يمه
ليث _ التفت لا على التعين
وسوه حركه بشفايفه....
يمكن فضول اريد اعرف السر شنو بي يختلف وهيج وهبت حياتها اله
خالد _ وشلون شفته
ليث.... كلش خوش انسان ويباوع على التراب التمشي عليه
حامل بالطفل الثاني
خالد.... جر حصره
الله يهنيه ويسعده تستاهل
وانت
ليث..... اني شنو
خالد..... اخاف عايش على الاطلال
ليث..... لا يمعود
اصدك ابو الوليد كرهت العراق من كد الموت الاشوفه بي
راح افكر بمشروعك وانطيك خبر
اشوكت مسافر
خالد... قريب كلش
واحنه نحجي وكفت سياره
باوعت...
نزلو منه رافد وماهر ووسام
وابو سامي
ليث _ باوعت الخالد ابن الحلال بذكره...
خالد _ عرفته هو وسام طويل ابيضاني شعره سرح دائما نازله خصلات على جبينه الفرق هسه أضعف من قبل وشعره اكثره شيب ومناظره الطبيه زايدته وسامه
تقدمو معزين الليث واخوانه
كان خالد واكف بصف ليث
وسام _
حضنت ليث اعزي البقيه بحياتك يجعلها آخر الاحزان
ليث _ حياتك الباقيه....
وسام _ ونتقلت للبصفه كل ظني اخو الخالد
... مفاجأه خالد...
مستحيل انسه هاي الملامح
هو بس ملاَمحه اكبر مد ايده اليه واكف ويه المعزين
بعده بعنفوانه وهيبته ونظراته الثاقب المغرور بالمرتبه بس
الوقت اختلف....
بس اني كل شي بيه وكف وسترجع الماضي واني اباوعله
ال١٦ سنه من عمري
وما شفت بيهن... كلهن مرن مر الكرام
الا شي بداخلي يكلي هذا الراد سرب
هذا الكان ينظرله بنفس نظرتك نظرات الحب والاعجاب
ولو ما هيه اختارتني كان ممكن
تكون له
افكار ترستني حقد وغيره وهو عينه ابعيني
ما كدرت امد ايدي واصافحه تركت
ايده وعبرته واني بقمة الراحه والانتصار
انه بيني وبينه حساب ومستحيل اسامحه
على عمري الضاع
ليث انتبه بس هوسه وما اضن احد غيره انتبه
افتريت عزيت الكل وكعدت
امامه وعيني بعينه اخزره وأعلن انتصاري
خالد....
اترخصت وطلعت من الديوان
ماتحملت نظراته
وسام الند الوكف عثره بدربي وحرمني من الوحيده التعلق گلبي بيها
وعثره...
بظميري طول هاي السنين
اليوم اعترف اني السبب
في ضياع ١٦ سنه
من عمره...
لمتابعة باقي الرواية زوروا قناتنا على التليجرام من هنا
بدل ماتدور وتبحث علي الروايات خليها علي تليفونك وحمل تطبيقنا
