رواية انتقامك وانتقامي رد الدين الفصل السادس عشر 16 بقلم تولين جراح
تضيح ،أطلبه .لا تبني مشاعرك على ظن خاطىء أو تسحب بساط حق التبرير من تحت الأشخاص ثم تسخط عليهم"
............................................
لتين.....
شيء مثل الخيال الرمي صار علينه مثل المطر
طلع صخر مسدسه وصار يطلع ايده ويرمي من الجامه صار يدخل بطرق متعرجه بس حتى يبعدهم
جنت اصرخ برعب باوع عليه وكال
صخر : جمار اسنديني
حسيت بمسؤليه ااتجاه صخر من كال هيج ، باوعت عليه برعب وكلت
لتين: شسوي وجهني ما اعرف اسوي شيء انتَ وجهني
صخر : ما اسيطر اسوق وارمي انتِ لزمي السياقه وانه ارمي
لتين : شلون اسوق وانتَ كاعد هناه
صخر : بس لزمي المقود والكير مال السيارة وانه عليه الباقي
لتين: هزيت راسي وصرت اسوي الي يكولي عليه
خلص المخزن مالته باوع عليه وكال
صخر: جمار اخذي موبايلي من جيبي ودكي على واحد
عفت السياقه لصخر ولزمت الموبايل برجفه ادوس بالجهاز على الأسماء دكيت على اي رقم بدون ما اشوف الاسم وصرخت بفزع
لتين: راحح نموووت ساعددونه راح ننكتل
_منوووو انتِ صخرررر وووين شنووو هذا الصووووت
لتين: نااس مسلحه جاييي يرمووون عليينه الله يخليك ساعدنه
_وين العنوان ووينكمممم ، خرررب بالكواد، صخر ويين
دزييي الموقععع بساااع يللله
لتين: سديته ودزيت الموقع
وكف السياره بمكان مقطوع لزم وجهي بثنين ايدي وخلا كصتيه على كصتي وكال
صخر: لا تخافين جمارر ، باعي هسه راح ننزل اريدج تركضين وياي ولا تهدين ايدي لوو شما يصير ، باوع عليه وكمل كلامه ، وإذا صار عليه شيء تعوفيني وتروحين فهمتي ديري بالج توكفين فهمتي جماررر ديري بالج توكفين
لتين ببجي : مستحيل اعوفك وياك ما اتخلى عنك
صخر : حبيبتي انتِ لا سوين هيج بيه
لتين: مستحيل اتخلى عنك انتَ اخوي بعدني ما شبعانه منك اريد ازوجك لريم واشوف جهالك اريد ازفك بيدي لعروستك صخر اني حسيت بشعور الاخوه وياك مثل تعلقي بسائد وسادن واريان هيج تعلقت بيك
"باسني من راسي وكال "
صخر : يا روح اخوج ، يله خلي ننزل مثل ما وصيتج تمام
هزيت راسي ومسحت دموعي نزلت وصخر عبر من جهتي ونزل منها لزم ايدي وهز راسه يطمني
وركضنه واشتغل الرمي من جديد بسبب الصوت الطلع من ركضنه والكاع كلها أغصان الصوت يبين
جان صخر لازم ايدي حيل واني هم عثرت بشيء وكعت على ركبي كتمت صرختي ورجعت كمت باوع عليه صخر كتله
لتين: ما بيه شيء يله خلي نكمل
صخر : يله
صرنه نركض إلى أن خف صوت الرمي لكينه مكان بي بزل وثلاث حياطين مبين مترووك واحد الحياطين واكع نصه
كعدنه بي باوعت على صخر
لتين: دك على واحد يجي يساعدنه
صخر : هاي منطقه مقطوعه ما تجي بيها الشبكه بسهوله
لتين: اوف وهسه شلون
صخر : لا تخافين هسه يجون ونطلع منا بخير
لتين: يا رب
بقينه كاعدين ساعه كامله حسينه بصوت خطوات قريبه علينه سحبني صخر تحت جناحه وكتم نفسي بايده باوعت عليه بخوف
طمني بنضراته دقائق تحبس الأنفاس احس هاي هيه راح نموت
وفجأه اختفى الصوت
سحبنه نفس براحه وكال
صخر : لا تخافين راحو
الدنيه نص ليل واحنه بهيمه والوضع ابد ما يطمن
خايفه يطلع شيء النه
صخر: لازم نمشي منا الوضع ما يطمن وهم لازم نلكه اشاره نتصل بواحد يجينه
هزيت راسي وصرنه نمشي على ضوه الموبايل
مر وقت واحنه نمشي وكف وهوه يكول
صخر : اكوو اشاره هناه الحمدلله
لتين: يله يله دك بسرعه
صخر : هههه اي دكيت ، الووو ، احنه بخير ، تيهنه بالبساتين والدنيه ليل كلشي ما نشوف ، ما اعرف هل بستان عايد المن ، باوع الشبكه مقطوعه هناه راح ادز موقعي وابقى بنفس المجان .
لتين: هاا بشر
صخر : واصلين لمكان السياره وما لاكينه ومتخبلين
لتين: وهسه
صخر : ننطر هنا على ما يجونه ، تعاي نكعد هنا تعاي
كعدت وخليت راسي على جتفه حركتي المفضله من اكعد يم شخص ، ما حسيت غير اني غافيه ، كعدت بعد مده على صوت كلام فزيت برعب واني اشوف مجموعه زلم واكفه فوك راسنه صرخت بفزع واجاني صوت صخر يهديني
صخر: اهدي اهدي جمار هذول ولدنه
هزيت راسي واني اريد بس اوصل للبيت
كومني واني اعرج بالكوه امشي عليها رجلي
انتجيت على صخر ومشينه للسيارت شفت كل الشباب موجودين الي شايفتهم والي ما شايفتهم
كعدت بالسياره وحجى
صخر: أيسر امشينه للمستشفى رجل جمار اضنها مكسوره
لتين: لا صخر حباب رجعني للبيت اريد ماما وبابا
صخر: ورجلج ولج ما تكدرين تمشين عليها
لتين: ما بيه شيء عود ألفها بالبيت
هز راسه بقله حيله ورجعنه للبيت وصلت واني اشوف الدنيه مكلوبه عمامي وبابا واخواني كلمه بالباب
ركض بابا بلهفه فتح الباب وحضني واني صرت ابجي بصراخ طلعت كل الجنت كاتمته من خوف ووجع ورهبه
مشاني بابا تحت اجناحه دخلني جوه واني اشوف ماما متخربطه وتبجي اجتي حضنتي وكعدنه بالكاع نبجي وتد حاضنتي من جها وماما من جها خلت الكل يبجي على بجينه
اجت عمه حنان زوجه خنجر كومنتي
حنان: كومي عمه كومي حبيبه مو زين عليج البجي عدت سلامات ، كافي ام سائد كولي يا الله ، الحمدلله على السلامه
كمنه دخلنه للبيتنه رفضت اروح للبيت الجبير جنت كلش تعبانه
دخلت سبحت وطلعت واني هلكانه نمت على رجل ماما وهيه تمسح على راسي غفيت بين الصاحيه والنايمه
حسيت دخل بابا باسني من راسي وهمس لماما بشيء وبعدها ما حسيت غير ثاني يوم وتد تكعدني
وتد: لتين حبيبتي شلون صرتي اليوم
لتين: زينه احسن
وتد: كومي لعد حتى تتريكين مماكله شيء من البارحه
لتين: شبعانه ما أريد شيء
وتد: يله بدون كلام كومي الكل منتضرج حتى نتريك سوه بابا اليوم كعد الضغط مشكل عنده وماما السكر هابط ينطيج كلبج تخليهم ينتضروج وما تاكلين
لتين: كايمه بس ساعديني اروح اغسل
وتد: ليش ما قبلتي ترحين للمستشفى شوفي ركبتج شلون مورمه ومجرحه
لتين: ردت بس ارجع للبيت على الرعب الصار وياي ولج متت خوف
وتد: الله يساعدج صخر من سولف النه تخبلنه شلون انتِ بنص الموت جنتي
لتين: ما تصورين شنو صار حسيت هاي هيه راح نموت
وتد: الحمدلله على سلامتكم يمعوده تنذكر وما تنعاد
وصلنه للحمام غسلت وطلعت اتكئت على وتد وصلنه للصاله كام خالو حذيفه حضني بقوه
حذيفه: كلبي راح عليج ما لحكت البارحه كالو نمتي من رجعت شلون صرتي
لتين: زينه
كعدنه على السفره ناكل
وبعدها اجو بيت الشيخ كلهم كعدنه كلنه بالصالة والي صدمنه دخول زعبان
وهوه يسلم عليه ويتحمد اليه بالسلامة
زعبان: الحمدلله على السلامه جمار
لتين: هاا ، احمم الله يسلمك شكرا الك
زعبان: شلونك يابه ، تقدم باس راسه والكل تحت صدمه ، وتد تباوع عليه بخجل وتنزل رأسها باوع عليها وابتسم ، شلونج وريد
وتد: هلوو زعبان بخير انتَ شلونك
زعبان: بخير
الكل كاعد ويسولف ويشرب جاي وجان تدخل إيليا تتكلب بمشيتها فاتحه شعرها ولابسه شورت وكيمونه
تاكل ككو ومدمره نفسها باوعت على بابا وكالت بلغه الأطفال
إيليا: اباتي نيلني( باباتي شيلني )
ابو سائد: تعاي تعاي يا روح أبوج ، من جابلج ككو
إيليا: حالو ببان
ابو سائد: يا خالو انتَ اريان جايب الها كوو
اريان: لا بابا مو اني
إيليا: ننلي(نزلني )
نزلت وراحت ركض لزعبان حضنته والصدمه الي بينت على الكل من زعبان شالها وباسها
باوعت على غزل وكلت
لتين: عود شبيهم نصدمو من زعبان شال إيليا
غزل: موو زعبان يكره الجهال وهسه تقبل بنت وريد وباسها هم صدمه
لتين: ياا شسالفه لهل درجه
غزل: وأكثر هم شايفه الجهال شلون تبجي من شوف زعبان كلها تخاف منه
لتين: ياا ههههه طلع خبل ويه الكل
غزل: لا حباب زعبان بس هوه شوي انعزالي
لتين: امممم اي صح حباب
قطع كلامنه صخر وهوه يكول
صخر: جمار حجزت عند الدكتور العصر نروح
لتين: لالالا شكرا اني اطلع بعد التوبه
صخر : هههه ولج امان ماكو شيء
لتين: بالنسبه اليه كرهت حتى الطلعه
جراح: بس بابا لازم شوفين شبيها رجلج خوما تبقين هيج تعرجين
سكتت والكل صار يسولف ويه الثاني
صار العصر جهزت نفسي وطلعت للصاله
انتضر صخر اجه سائد يكلي انو اجه صخر طلعت اتكئ على سائد
فتح اليه الباب الخلفي كعدت وكلت
لتين: هلوو
"باوع عليه بعدم رضى وكال "
صخر: وعليكم ال هلوو
سويت حركتي المفضله عوجت حلكي بمعنى ما عاجبني باوعت على الي بصفه وهناه جانت الصدمه
زعبان جاي ويانه حجيت بقلبي
لتين: معقول اجه على مودي ، لا لا لا مستحيل ما اضن يجوز عنده شغله قريبه على الدكتور اي هذا الصح
وصلنه شو هذا نزل وياه للعيادة سكتت ساعدني صخر حتى اصعد كم درجه ببدايه العياده
دخلت كعدت على احد المقاعد باوعت عليهم واكفين كدامي حتى ما ابين همست بصوت ناصي
لتين: تره ما راح ياكلوني كعدو
زعبان: معليج
لتين: ياا شنو معليه غير اريد اشوف
"ندار عليه صخر برفعه حاجب"
صخر : ششوفين ناس كلها مكسره
لتين: ميخالف اريد اشوف
صخر : بويه استجني بعد روحي
لتين: اووف
زعبان: لا تتئففين طير الملائكه
باوعت عليه بصدمه لا لا لا ما معقول هذا زعبان الي قبل شهر لعب لعب
كعدت عاقله خايفه منه كلبي ما مرتاحله
احسه خطر على المجتمع
وصل السره النه دخلنه للدكتوره جانت شابه شوو هاي باوعت على زعبان وصخر الي دخلو وياي مثل الحمايه وهيه ضحكت وصارت تعدل بنفسها
صخر: السلام عليكم
الدكتورة: اهلا وعليكم السلام تفضلو تفصلو
همست لصخر الجان قريب مني
لتين: موو كانو تلوكت هواي
"حاول يخفي ابتسامته وكال "
صخر: سكتي لج خلي شوف شغلها
لتين: اممم سكتت
كعدت على السرير وهيه بدت تفحص برجلي باوعت عليها وكالت
الدكتورة: ركبتج كلش متاذيه والجروح الي بيها يراد الهن تضميد هسه هاي اشعه روحو سووها وبعدها نشوف اذا اكو كسر او لا بس على الأكثر عدها رضوض
طلعنه سويت اشاعه ورجعت وكل هذا وزعبان ويانه ما عافنه لحضه
دخلنه للدكتوره مره ثانيه شافت الاشعه وكالت
الدكتورة: مثل ما توقعت عندج رضوض على الإبر والعلاجات صير زينه ، هاي العلاجات
صخر : دكتوره زين هذا العلاج مو قوي على مثل حالتها
الدكتورة: حضرتك دكتور ؟
صخر : لا انه عندي مضخر ادويه
الدكتورة: حلوو ، اي لان هيه شوي متاذيه فوصفت الها هذا العلاج
طلعنه صعدنه للسياره نص الطريق حجيت
لتين: صخر شكد صار الحساب
صخر : حساب شنوو
لتين : الكشفيه والعلاج والاشاعه
صخر : شجاي تكولين انتِ موو عيب عليج
لتين: بس ميصير كله عليك وبعدين اني عندي فلوس
صخر : جمارر
لتين: هاا
صخر : انطمي
لتين : تمام
كعدت عاقله رجعت للبيت وهيج مرت الايام رجلي بدت تتحسن والجروح هم بدت تختفي بس الشيء الوحيد الي جان زاعجني الشخط الي بوجهي باقي اثره وحاجبي هم
لتين: بابا اريد اسوي تجميل لحاجبي كلش مزعوجه من شكله
ابو سائد: بس بابا اني اخاف عليج
لتين: من شنو تخاف يا بابا شغله ساعه واطلع
ابو سائد: اذا هيج اخذي واحد من اخوتج امج وروحي للدكتوره
لتين: حبيبي بابا فديت هل وجه اني
ضل يضحك بابا عفته ورحت حاجيت ماما والعصر رحنه للدكتوره وحددت موعد حتى اجي اسوي عمليه صغيره للاثر
بالرجعة شفت جبل وصخر وجراح واكفين يم سيارة
باوعت عليهم بضوجه
سادن وماما سلمو عليهم اله اني باوع عليه جراح وكال
جراح: ها بويه جمار شلونج
لتين: هلوو ، شلونك صخر
صخر: هله جمار شلون صرتي ؟
لتين: لا احسن من قبل
باوعت على جبل ودخلت لبيتنه .
اليوم جمعه والكل مجتمع بيت الشيخ حضرنه نفسنه ورحنه
الكل جان جاي وهم خوات بابا وحده جانت بايران ام شاهين وجاسر والثانيه مزوجه بالبصره
سلمت على الكل وكعدت بمكاني المفضل يم الشيخة
وره مده وصلت طياره عمتي ام شاهين راحو يستقبلوها بالمطار ولدها وجراح وزعبان
وره مده وصلت السياره والكل راح يسلم عليها اله اني كاعده احس نفسي مستحيه مدري شعجب
دخلت للصاله الي جانت كلش جبيره دخلت تسولف وتضحك مبينه كلش بشوشه
الكل صار يسأل بيها ويحجون وياها
حجت الشيخة جمار بصوت عالي
الشيخة جمار: خايبه جمار ليش ما اجيتي سلمتي على عمتج شنهي تستحين
توجهت الانضار كلها عليه باوعت عليهم بفشله
باوعت عليه بصدمه وهيه تشوفني
ام شاهين: الله مصلي على محمد وآل محمد جاي اشوف رهف كدامي
لتين: ابتسمت وتقدمت بثكل سلمت عليها ، شلونج عمه الحمد لله على السلامة
ام شاهين: يا بعد عمتج تعاي تعاي ابوسج
لزمت خدودي وصارت تشفط بيه شفط سحبتني حضنتني
ام شاهين: يمه هاي صدك جمار فدوه موش بنت تكولين فلعه كمر
الشيخة جمار: صلي على النبي يمه اكو عيون ما ترحم
تحجي وتباوع على ابتهال
جريت عيني بغرور
وره الصلاة انصب الغداء
كعدت اني بصف الشيخة وزعبان كعد من جها الشيخ
باوع شاهين وكال
شاهين: هاي شني شيخه نعرف من كعده جمار بصفج هيه المفضله عندج حالها حال زعبان
الشيخة جمار: واعز بعد هاي العزيزه بنت العزيزه وهم جيف على اسمي أحسنها تشبهني
جاسر: واحنه هذا الخايفين منه جي تشبهج
الشيخة جمار: شنهي كصدك ولك انه نقمه
جاسر: لا لا لا شيخه انتِ الخير والبركة
الشيخة جمار: جا انجب واكل
جاسر: مشكوره شيخة
الشيخة جمار: تدلل يمه
خربت ضحك عليهم شلون يستقبلون الغلط بكل رحابه صدر
وره الغداء اجت بلبل الكل سكت مبينه تحب المشاكل
كعدت وهيه تباوع علينه بحقد
كعدت بصفها ابتهال وصارن يسولفن ويباوعن علينه
وبعدها فجرت القنبله
بلبل: عمي انه رايده منك طلب وياريت ما تردني
الشيخ عكَاب: كولي بنيتي شنهي التردي
بلبل: انه اعرف عيب وزحمه احجي بهجي شيء كدامكم بس انه بنيتكم وانتم اخوتي وانتَ ابوي وانه لان عادتكم اهلي فتحت هل موضوع
الشيخ عكَاب: كولي بويه ما يردج غير لسانج
بلبل : عمي انه اريد راجح يردني على عصمته
الكل سكت بصدمه باوعت عليهم شفت بابا نصدم وماما تباوع عليه منتضره جوابه
الشيخ عكَاب: هذا الشيء ما أكدر افرضه على راجح بس اذا اله نفس بيج ويريدج فالشرع محلل اربعه
يكدر يردج لعصمته ، بويه راجح شنهو رايك
ابو سائد: يابه قبل عشرين سنه انت بنفسك طلكتها غصب عني وبدون رضانتي وانه جنت رايدها موش صح كلامي
الشيخ عكَاب: ما عليه غبار كلامك صح وانه طلكتها غيابي منك وموش برضاتج
ابو سائد: بس هسه انه عندي مره صاينه بيتي وتخاف الله بيه وانه الصراحه ام زعبان طلعت من نفسي عندي مره لو ادور بالعراق كله ما الكه مثلها صانتني وصانت بيتي وربت وريد الي هسه هيه اعز من روحها وهواي تنازلت عن أشياء انه ما قابل بيهن واولهن دراستها
هل يا بويه هيج مره تستحق انزل على رأسها مره
الشيخ عكَاب: والنعم منها ام سائد من اجت لليوم ما شفنه عليها اله كل خير بنت أصول ، اضنج سمعتي جوابه ام زعبان
بلبل: بس انه اريد اكعد على جهالي
وتد: عن أي جهال تقصدين تره اني ام وزعبان صار رجال فوك ال ٣٠ سنه عمره هسه ياله فكرتي بينه من شفتي حياتج وطلقتي كلتي خلي اكعد على جهالي
بلبل: انه ما نطيتكم راجح باكج مني ، وزعبان هوه اختار يبقه يم أهله
وتد: لوو بابا ما ماخذني منج جان هم عفتيني مثل زعبان وزوجتي يعني بالحالتين انتِ تزوجين ، رجاءً لا تخربين استقرار حياتنه وتحاولين ترجعين لبابا لانه مستحيل يبدل ماما بميه مره
صار هواي كلام واني عيوني ما فارقت زعبان الي كاعد هادء غير العاده
صار صياح بين بلبل وتد الي ما عاجبها هل شيء
والشيخة ما تقبل هم برجوع بلبل لبابا
انتهى صبر زعبان وهوه ينتفض ويكول
زعبان: كافي ما مليتي من المشاكل مووو رواحنه طلعت يوميه سالفه يوميه مشكله كافي مووو خشيتي العمرين وهسه جايه طالبين ابوي يرجعج لعصمته تردين تهدمين عايله كامله بس حتى ترجعين كرامتج وثبتين للكل ان ابوي يحبج وما ناسيج
عافهم بعد ما كمل كلامه وطلع الكل سكت وهيه طلعت تبجي عود مقهوره
باوعت على ماما الي تبجي بهدوء وبابا احسه صار يلوب يريد بس يحجي وياها باوعت عليه واني اكول لماما
لتين: اكول ماما ما تجين ويايه شوي
ام سائد: صاير شيء؟
لتين: كومي غسلي عليمن تبجين يحضي يله لا تخلين إبتهال تشمت بيج
ام سائد: لتين مو وكتج
لتين : بداعه ماما رهف كومي يله
كامت ماما واني امشي وراها باوعت على بابا وغمزت اله بضحكه هز راسه وضحك وره شوي طلع ورانه
ابو سائد: مشكوره بويه ما كصرتي روحي هسه
لتين: ديله بوسها صالحها كدامي معليكم بيه اعتبروني ما موجوده
ابو سائد: لتين روحي
لتين: شنوو تنطيني
ابو سائد: تاخذين سيارتي تفترين بيها
لتين: عجبتني رايحه باي يا حلوين
ضحكت واني اطلع واباوع عليهم من الباب واني اشوف بابا حضن ماما دعيت بكلبي يبقه هل حب بينهم
باوعت من الشباك واني اشوف زعبان كاعد بالسياره ويدخن مبين عليه القهر
طلعت بتردد واني اتجه اله من وره باوعت عليه واجيت ارجع بس وكفني صوته وهوه يكول بقهر
زعبان: ليش راجعه محتاجه شيء ........
يتــبـ؏
.
.
.
.
.
.
.
.
.
.
ملاحظه جميلاتي ما أكدر اكتب يوميه بارت حاولت بس بهل فتره اكتب يوميه بارت احس اتعب فقررت بين يوم ويوم بارت هم اني اخذ مساحه من الوقت اكتب وهم حتى ارتاح وما انضغط
قراءة ممتعة، دمتم برعاية الرحمن وحفظة
في ميزان حسناتكم
﴿إِنَّ اللهَ وَمَلَائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا﴾
«اللَّهُمَّ صَلِّ وَسَلِّمْ عَلَى نَبِيِّنَا مُحَمَّدٍ»🍃
