رواية فصيلة دمشق الفصل السادس عشر 16 بقلم احمد
الاب.. الله يسود وجهك مثل ما سودت وجهي لك شنو من بشر انت بس فهمني ايمتى تنعدل
انس.. ما ينعدل
عيد.. يابة لازم نلكي حل للموضوع قبل ما تكبر السالفة ماطول محد يعرف لحد الان
الاب.. شوف ولك صهيب من باجر نروح اني واخوانك نخطبلك سحر وبس تخلص سنوية اخوك تتزوجها
صهيب.. يابة كل عقلك اتزوج هيج وحدة
الاب.. انجب واكل نعال فاهممممممم هاي الوحدة عرضك وشرفك وغصب عنك تصلح غلط لا تخليني اهينك كدام كل الناس
وانت (باوع لانس) من باجر تروح للواسطة الي كعدتو بالبيت وتخليه يرجع لدوامو وباوع ولك صهيب وانتبه لكلامي
ان خطيت خارج البيت باجازة دوامك بدون علمي والله ثم والله ثم والله لتشوف شي بعمرك كلو ما شفتو مني
صهيب.. يابة ترا.......
عيد.. كافي صهيب اسكت وروح لغرفتك مو وكت عنادك هسا
صهيب.. راح للغرفة وهو يدردم
الاب.. البنت شلون وضعها
انس.. عدها اسراء
الاب.. تمام بقيها يمك وقبل لا تروح للدوام جيبها
انس.. تمام يابة
الام.. لا بارك الله بيها وجه الفكر
الاب.. سمعينا سكوتج انتي مو ناقصج ترا
الام.. ليش ترجع صهيب لدوامو وانت تعرف وضع العراق مو زين بلكي انقتل
الاب.. روحة بلا رجعة يفكنا من مصايبو
اسراء.. اكلي وخلصي بعد شوية اخابر اختي تجي نتونس وياها شوية واكيد راح تحبيها
ميرا.. ليش تجي
اسراء.. مو الدكتورة موصيتني ما اشتغل بالبيت وهي تجي تساعدني
ميرا.. ما يحتاج تجي اني اساعدج
اسراء.. لا انتي بعدج ضيفة عدنا والضيف مدتو 3 ايام اذا بقيتي اكثر فتحملي الي يصيرلج
ميرا.. تحملت الاكثر الله وكيلج
اسراء.. وبعد كدامج هواي لازم تتحملين
ميرا.. الله يكون بعوني
اسراء.. اي والله الله يكون بعونج
ميرا.. خلصت غدا وكمت توضيت وصليت والحمدلله كدرت اصلي قبل ما تصير الدنيا عصر يعني ما طافني وقت الصلاة
اسراء خابرت براء وكالتلها تصلي العصر وتجي وفعلا خلصنا صلاة العصر واندك الباب وراحت فتحتو اسراء ودخلن سوا
براء.. باستصغار .. هي هاي الفصلية
اسراء.. اي هاي تعالي اعرفج عليها
براء.. وعلى شنو اتعرف عليها هي تالي فصلية
ميرا.. انصدمت من ردة فعلها واسراء هم مصدومة وتباوعلي وماتعرف شلون تلملم السالفة لان ابد ما توقعنا اني براء تحجي هيج
براء.. ههههههههههه يااااااااااي
اسراء.. وجع شبيج
براء.. طلعت لسانها لاسراء .. مو كلتلج الا افشلج اسراء.. هسا اني فشلتيني هاي المسكينة شدخلها
براء.. لا لا هاي خطية ضحية جانبية
ميرا.. اجت علي وحضنتني كل قوتها حسيت عضامي تكسرن بسببها
براء.. شتغديتي
اسراء.. شدخلج
براء.. امانة احجيلي
اسراء.. يعني شتغدا معروف غدا العزيمة لحم وتمن
براء.. بزعل .. الله يرضاها ناس تاكل لحم وناس تاكل بطاطة سلك
اسراء.. ههههههههه هاي نعمة الله
براء.. ونعم المولى
انس.. السلام عليكم
براء.. اجى المعقد .. ولك صدك وين جنت
انس.. براء كأنج مشتهية سحلة
براء.. ايباااااااه شحدك
انس.. شتسوين لا انتي ولا اهلج تكدرولي
براء.. اخلي بابا يسحب منك هالخبلة هاي وروح دورلك مرة غيرها
انس.. لا هيج الشغل. يرادلها تفاهم
براء.. ههههههههه ماكو تفاهم
انس.. لعد بكيفج حتى لو تحركين اهلي ما دخلني
براء.. عفية بالشاطر ما كلتلي وين جنت
انس.. ضربتلي فرة ورجعت شغل زلم شدخلج انتي
براء.. عادي واذا شغل زلم
انس.. شنو مسترجلة واني مادري
اسراء.. هي من يومها مسترجلة
انس.. المهم منو تسويلنا عشى ترا جوعان
براء.. ترا هسا رجعتو من اهلك ما يمداك وصل لبطنك الاكل
انس.. ما اكلت والله كلشي
براء.. يااااااا ليش عود
انس.. ما اشتهيت وهسا جعت
براء.. هسا اسويلك بطاطة سلك مثل غداي
انس.. ههههههههه نعمة الله
براء.. تدلل
انس.. ما يتدلل عليج ظالم الج علي ازوجج من حميدان
براء.. عزا العزاك على هالذوق
انس.. ههههههههههههه
براء.. يلا اكملها واجي
انس.. تمام .. تعالي ميرا انتي واسراء اريد احجي وياكن
براء.. من المطبخ .. ترا ادري بيكم عدكم سر من تخلصون حجي كلولي خونة
اسراء.. شيطان مو بنية
انس.. المهم ميرا انتبهلي كلش زين للي راح احجيه
ميرا.. شنو
انس.. صهيب راح يتزوج سحر
اسراء.. عزا العزاه هو وياها صدك دا تحجي
انس.. خليني اكمل كلامي اسراء
اسراء.. كمل
انس.. شوفي هو لمصلحتج اذا تزوجها اقل شي يفك ياخة منج وترتاحين منو لان اعرفو اذا ما تزوج راح يكرهج حياتج بتصرفاتو
ثانيا انتي من اليوم ممنوع يأذيج هو او سحر بعد ما يتزوجها كل الي عليج تكملين شغلج والي يتدخل بيج اني اتصرف وياه
ميرا.. تمام
انس.. هو راح يتزوجها بعد سنة
اسراء.. متأكد ما يحجون وياها
انس.. اي
اسراء.. لعد من مصلحتج
انس.. وشوفي ميرا اني اعرف انو كل انسان يحتاج مصرف او شي بس بالنسبة الج ماكدر اسوي شي لان هاي تجاوز على اخوي
كل الي اكدر اكلج عليه اي شي تحتاجيه كولي لاسراء ويوصلج اذا ما يجيبلج صهيب
ميرا.. اني عندي فلوس من ماما وذهبي موجود شكرا ما احتاجبس سلامتك
انس.. بالوقت الحالي ما تحتاجين بس بعدين تحتاجين واني واسراء موجودين لا تخجلين مننا واسراء مثل اختج واني مثل اخوج
ميرا.. شكرا الكم ما تقصرون
اسراء.. معليك بيها انس ختولي اني اتفاهم وياها
انس.. هههههههه تمام
براء.. شكد تحجون شبيكمممممم
انس.. اسراء وربي راح اكوم ابتلي باختج
براء.. لا والله علمود نسحب منك اسراء
انس.. افة عليج وتكدرين تسحبين اسراء من بيت الضابط انس غير اطشركم
براء.. شحدك والله اني اهججك
ميرا.. هاي دائما متعاركين هيج انتو
اسراء.. اصلا بعدج ما شفتي شي هذا لا شيء ذيج المرة اجاني انس ملابسو كلهن ماي لان براء واكفة عند الباب وترش عليه ماي
وتحلف اذا تقرب عليها تطلع خارج البيت وماكدر يحجي وياها اخير شي عافها وانهزم داخل
ميرا.. لعد الله يعينج اذا طلع ابنج عليها
براء.. ها ها ميرا شو صرتي ضدي
ميرا.. الحق ينحجي
براء.. بصراحة كلامج صح اذا طلع علي يتورطون بيه وثانيا ماكو احد يشبه الملكة براء
اسراء.. واكو ملكة تسوي بطاطة سلك
ميرا.. انس جان يشرب ماي من كالت هيج اسراء غص بالماي والا طلع من خشمو من الضحك ووجهو صار احمر
براء جانت ضحكتها تاخذ العقل شكد حلوة وضحكتها تخبل تحسها تزيدها جمال بالضحكة واني على ضحكتهم ضحكت وياهم
تمنيت اكون عايشة وياهم جان ارتاحيت من اهل انس بس ماكول غير الله يكون بعوني عليهم مبين راح يطلعون روحي
بقينا نحجي ونضحك طول اليوم ونسيت نفسي وياهم ولا كأنو الضهر صارت وياي هالمصيبة هاي وولا كأنو زوجي راح يتزوج
بس من رحت لفراشي تذكرت كلشي تذكرت منظرهم مع بعض وتذكرت منظر القران المحطوط بالغرفة وهم يسوون هالشي كدامو
واكثر شي قهرني هو انو ما صارلي اسبوع من تزوجت وفوك الضيم وحرماني من الابيض والعرس راح تجيني ضر
بدل ما يحاول يكسبني او يخليني احبو واحترمو يصغر نفسو بعيني اكثر وتزوج وحدة سلمتو نفسو قبل ما يصير زوجها
اختنكت بشهكاتي واني ابجي ماجنت ادري الخيانة مرة لهاي الدرجة رغم عدم حبي لصهيب بس الخيانة صعبة كلش
بقيت ابجي لحد ما نمت وعيوني بللن المخدة بالدموع كعدت ثاني يوم صليت الفجر ورجعت نمت وكعدت الصبح الساعة 10
براء.. ميرا دكومي خلي نتريك ما تشبعين نوم انتي
ميرا.. يلا كايمة
براء.. يلا كومي مو ترجعين تنامين ترا اجي اسحلج .. وعافتني وراحت
ميرا.. وربي هالعجية مو صاحية ابد
كمت طلعت للصالة جانن ينتظرني هي واسراء ورحت للحمام غسلت وجهي ورجعت يمهن
اسراء.. صح النوم
ميرا.. صح بدنج لعد وين اني
براء.. راح على اهلو يكول عندو شغل
اسراء.. من هناك يطلع لعمامو
براء.. هو كال على اهلو
اسراء.. اي عندو شغلة عندو اهلو يكملها ومن هناك يروح لعمامو
براء.. اها
ميرا.. جنت مو مشتهية اكل بس هيج شربت جاي وياهن ولاحظت اسراء علي بس ماتكدر تحجي وياي كدام براء فبقت ساكتة
من خلصنا ريوك اخذت المواعين براء وعلى اساس تسوي غدا دجاج شوي وصارت فرصة لاسراء انو تحجي وياي
اسرا.. ليش ما اكلتي
ميرا.. ما اريد
اسراء.. صدك تحجين انتي تريدين تحرمين نفسج من الاكل علمودهم
ميرا.. اسراء طالعة روحي ليش ما حاول يكسبني ليش كا عاملني بحنية علمود احبو ليش معتبرني حيوانة ما الها اي كرامة او احساس
اسراء.. يا عيني كلهم هيج هالعيلة بس الله نقذني منهم بانو انس يختلف ولا باقي العيلة كلهم هيج كلوبهم مليانة حقد وغل
شوفي هالمرة راح احجي وياج بطريقة مختلفة علمودج انتي مو علمود صهيب بس لازم تلتزمين بكلامي بكل حذافيرو
شوفي صهيب بعدو شباب صحيح جبير بس يبثى شباب بعدو ما شاف الحياة الزوجية والمسؤولية والالتزام فلازم انتي تعلميه
ميرا.. ما اريد لا اعلمو ولا شي
اسراء.. مجبورة لان بعد فترة راح تجي وحدة تاخذو منج وتتورطين يجوز تحرضو عليج يخليج حتى ملابسهم انتي تغسليهن فلازم تستغلين الفرصة من هسا
ميرا.. احجي خلي نشوف
اسراء.. من ترجعين للبيت اريدج ترجعين انسانة ثانية لا تفتحين وياه الموضوع مال سحر اعتبري شي ماصار نهائيا
ميرا.. ماكدر
اسراء.. دا احجي اني
ميرا.. كملي
اسراء.. اعتبري مو صاير شي وحاولي انتي تكسبيه قبل ما هو يكسبج اهتمي بنفسج وبمظهرج واسلوبج بالاخص وياه
الزلمة ترا يذوب بالكلمة الحلوة والاهتمام شكد ما يكون صعب بالاهتمام يلين وبالاخص انتي حلوة واسلوبج كلش حلو بالكلام
حتى لو يعصب تحملي وطنشي اي كلام تسمعيه بالاول والاخير هو مجرد كلام لا يقدم ولا يأخر حتى اذا تجاوز عليج لا تهتمين
والاهم من ذني تزيني الو حسسيه انو انتي زوجتو مو خدامة ترا الرجال هم حقو اذا انتي معبسة بوجهو 24 ساعة
وحاولي تتقربين الو بالطلبات البسيطة مثلا كليلو اريد حمرة كذا لون واذا سألج ليش كليلو علمود احط مكياج قبل ما تجي
هو راح يعرف لحالو ان انتي دا تهتمين بنفسج علمودو وراح يتغير ويا الوقت وكل كم يوم وصيه على فد شي حتى لو عندج منو
وكليلو اذا تريد جيب حلويات للسهرة وشوفي شلون حيتغير من صدك راح يعشق التراب الي تمشين عليه
وخصوصا ان هو بالوقت الحالي بسبب الصاير راح يبقى بالبيت فراح يكون عندج وقت تكسبيه وتخليه يحبج
ميرا.. صعبة اسراء والله مو كادرة اتذكر منو شي غير منظرو هو وسحر او هو والدكتورة
اسراء.. اعرفي يا روحي والله لو انس مسوي هيج الا اخبلو واعوفو بس انتي وين تروحين لا مسموح تروحين لاهلج ولا عندج احد يحبج هناك
مجبورة انتي تدبرين امورج بنفسج فيا اما تكسبين صهيب او تنتظرين لحد ما تجي سحر وتشوفج نجوم الليل بعز الضهر
ميرا.. والله ماعرف
براء.. شنو الي صاير وليش صهيب يريد يتزوج عليها
ميرا.. انصدمنا اني واسراء بوجودها عبالنا دا تسوي الغدا وما انتبهنا انها سمعتنا
اسراء.. مو عيب عليج تتسمعين علينا براء
براء.. ما تسمعت اجيت اسألج احط شعيرية ويا التمن لو لا وسمعتج تكولين صهيب حيتزوج سحر
اسراء.. هووووووووف تعالي تعالي
براء.. نعم
اسراء.. الحجي هذا ما اريد مخلوق يعرف بيه حتى كدام انس لا تحجين علمود ما يعرف انج سمعتي
براء.. تمام
اسراء.. حجتلها كلشي صار
براء.. وجاية تنصحيها علمود هيج حثالة
براء.. طيب خلي نكول عافتو وتزوج سحر عبالج سحر راح تعوفها بحالها والله الا تكرهها بالعيشة العايشتها
ونكول سحر عافتها وكبرت بالعمر ما تحتاج بنات يهتمن بيها او ولد يصرفون عليها والله لو تخيس محد يساعدها
هي لازم تفكر بالمستقبل ويجوز الله يهدي صهيب ويحبها ويعقل كلشي جائز بهالدنيا
براء.. والله ماعرف اني بس ماعتقد صهيب يتعدل
اسراء.. هي تسوي الي عليها والباقي على الله
براء.. ونعم بالله لعد طبقي كلامها ميرا علمود تستغلين الفرصة قبل زواجو
ميرا.. الله كريم .. بس اسراء اريد نروح لدكتورة اليوم
اسراء.. تمام العصر نروح سوا لدكتورتي
ميرا.. تمام
فكرت بكلامها جان منطقي بس بنفس الوقت مو متقبلة صهيب دا احس انو نكس وراح ينكسني وياه اذا طبقت كلامها
موقفي صعب كلش وماكو حل غير هالحلين ان اتركو واتورط او احاول اكسبو وممكن يصير هالشي وممكن ما يصير
بس مثل ما يكول المثل الي يريد شي لازم يضحي بشي اني اريد الراحة واريد اعيش حياة طبيعية لازم اضحي بشوية من كرامتي
صحيح صعب كلش بس لابد من المحاولة علمود بالمستقبل ما يأنبني ضميري بانو ما حاولت وممكن لو محاولة جان استفاديت
انس راح لاهلو جانو ابو وعيد ينتظرونو تريك وياهم وبعدها راحو لبيت عمهم علمود يحجون وياه وصهيب ماراح وياهم
السبب انو من يروح يتعاركون وياه ولد عمو فابتعادا عن المشاكل بقى بالبيت من وصلو استقبلوهم عمامهم استقبال مجرد من اي حفاوة وكعدو بالاستقبال
الاب.. خوية نعرف ان الي صار غلط واعرف ذنب صهيب ما يغتفر واني خجلان منك بسبب الي صار واجيت اصلح غلطنا
ماطول محد يدري والشغلة بيناتنا خلي نحلها بيناتنا وجايك اطلب ايد سحر بالحلال لصهيب وبعدة سنوية اخوه إن شاء الله يتزوجون
سعيد.. مع احترامي الك عمي بس ما يشرفنا ننطي لصهيب
انس.. وتبقى اختك هيج بدون زواج
سعيد.. تتحمل نتائج افعالها
انس.. خوية هي غلطت وشتسوون حقكم ومحد يكدر يمنعكم بس صغيرة ومو معصومة من الخطأ واحنا رايديها علمود يتصلح غلطها هي وصهيب
سعيد.. اذا هي صغيرة صهيب مو صغير ترا اكبر مني ومنك والي سواه عيب وخيانة للامانة احنا جيناكم ودايسين كاعكم وهيج يسوي بينا
انس.. حقك والله حقك خلي نعتبرها ساعة شيطان ونلم الموضوع قبل ما يطلع ووقتها من صدك راح نتورط كلنا لان سحر هم بنتنا وهم عرضنا
بالنسبة لزوجتي وزوجة عيد وزوجة صهيب اني اكفلهن ما يحجن بالموضوع واذا تزوجو محد راح يحجي شي لان موضوع عادي
بس اذا سحر ما تزوجت لانكم ترفضون راح تبدا تطلع اشاعات وبنفس الوقت ماتكدرون تزوجوها لان تعتبرون تغشون الزلمة اذا ما يعرف الحقيقة
وتخيل لو عرف الحقيقة باي وجه راح تقابلونو وصهيب اني اخوه ونزل من عيني فما الومكم انتو مهما حجيتو بحقو
بس اكوللكم وافقو لخاطر سمعتنا وسمعتكم وهسا بعدو الموضوع جديد واكيد شايلين بكلوبكم عليهم بس من تهدون ننتظر موافقتكم
سعيد.. الله كريم نفكر ونرجعلكم خبر
انس.. بس سعيد احلفك بالله انو بعد ما تمدون ايدكم على سحر عاقبتوها وكافي ما نريد ننجبر نزوجهم قبل سنوية اخوي عيب من الناس
سعيد.. خلص انس لخاطرك انت وعيد وعمي راح نعوفها بس اكيد تبقى عايشة بالغرفة لحد ما تتزوج
انس.. يسلم خاطرك يلا احنا نتوكل
سعيد.. تتغدون يمنا
انس.. كفو منكم ما تقصرون بس مجبورين نروح ومثل ما كلتلكم ننتظر الموافقة
سعيد وابوه .. إن شاء الله
لمتابعة باقي الرواية زوروا قناتنا على التليجرام من هنا
بدل ماتدور وتبحث علي الروايات خليها علي تليفونك وحمل تطبيقنا
