رواية فصيلة دمشق الفصل الرابع عشر 14 بقلم احمد
ميرا.. من اجت ايناس سألتها كالت هذا عمو انس اصغر واحد باخوانو عمرو 25 وزوجتو اسراء 24 سنة عازلين ببيت لحالهم
طبعا الاستنتاج الي كلت عليه غباء لان نسيت انو اسراء اول ما اجيت كالت للحجية عمة فلذلك توقعتها بنتهم مو جنتهم
سويتلهم جاي واريد ايناس تجي ماعرف وين راحت اخير شي صاحت الحجية وين الجاي يالفصلية وانجبرت اوديه اني
ميرا.. السلام عليكم
انس.. عليكم السلام هلا خوية شلونج شخبارج
ميرا.. الحمدلله .. نزلت الصينية يمهم وانداريت اريد ارجع
الحجية.. وين منكلعة تعالي صبي الجاي
انس.. اخذ الصينية .. اني اصب
الحجية.. كلت هي تصب
انس.. يمة ما اجيت هنا علمود استمع لمشاكلكم روحي خيتي كملي شغلج معليج اني اصب
ميرا.. تمام .. وانداريت اريد اروح
انس.. صدك خيتي شلون صرتي إن شاء الله احسن
ميرا.. ها .. من كال هيج وجهي صار ينطي اللوان من الفشلة عبالي يعرف بتفاصيل الي صار
انس.. كالو مريضة صارلج كم يوم
ميرا.. الحمدلله احسن .. بس اسراء شبيها
انس.. مابيها شي الحمدلله طلعت حامل والدكتورة تكول يرادلها راحة لان تعبت بالعزا
ميرا.. عدها العافية
انس.. الله يعافيج
ميرا.. رجعت للمطبخ واني احس كلبي يريد يطك من دكاتو شعور رهبة غريب لان اول مرة احجي ويا شخص غريب عني
بس الي شجعني انو اطلع كدامو او احجي وياه هو اول شي انو اخو زوجي يعني يعتبر من محارمي وثانيا وجود امو وياه
واكو شغلة كلش عجبتني بيه وهي انو من يحجي وياي ما يرفع عينو علي يستمعلي وبنفس الوقت يباوع تحت او للستكانة
ممكن البعض يفكر انو ما يريد يشوفني بس اسلوبو الحلو بالكلام يوضح انو احتراما الي مدا يرفع عينو بعيني
بلشت اسوي بالعشى وقررت اسوي مقالي لان ماعرف شنو اسوي بالضبط وجان باقي تمن ومرك بطاطة من الغدا كلت حرام ينذب وحميتو
انس بقى يتعشى يمنا لان اسراء يمها اختها وهم يريد يحجي ويا اخوانو بهالاثناء اجى اخوهم عيد الجبير بس استغربت انو لابس عسكري
استقبلوه اهلو ومبين هسا نازل من الدوام بس بنفس الوقت يعرف بوفاة اخوه وبي بس شعجب ما اخذ اجازة علمود العزا
(هو جان مداوم وتوفى اخوه واجى بايام العزا وصار عندو ضرف بالدوام ورايح مكمل ايام دوامو وراجع اليوم )
الحجية.. تعالي يالفصلية
ميرا.. بصوت ناصي .. الله ياخذ هالفصلية ويخلصها من هالصوت هذا .. نعم
الحجية.. وجع حتى وجع شبيج مو عاجبج
ميرا.. ماكو شي
الحجية.. اخذي الجاي احميه وجيبي لعيد ستكانة
عيد.. لا يمة اريد اروح اسبح
الحجية.. لعد اخذي الجاي وجهزي العشى
ميرا.. تمام
اخذت الصينية وقبل ما ادخل للمطبخ طلع صهيب من المطبخ من شفتو فزيت وبقيت متصنمة بمكاني من الخوف منو
مر من يمي وغمزلي بضحكة كلها حقارة وراح عند امو ومن عبرني رحت للمطبخ ركض من وصلت المطبخ احس رجعتلي الحياة
نزلت الصينية ومسكت كلبي اووووف يمة لا هلا ولا مرحبا بهالجهرة الزفرة وفوكها يغمز كون تنفكس هالعين الخايسة
غسلت الستكانات وكملت العشى ومن اجى ابوهم حطيتو بالصينية واجت نادية زوجة عيد اخذتو لان يدرون بي ماكدر اشيل شي ثكيل
جنت حاطة الي شوية مقالي لان جوعانة وكلت على شنو اخدمهم وفوك هاي احرم نفسي من الاكل خلي اكل احسن
اول ما حطيت اللكمة الاولى بحلكي انمسكت من ركبتي وانضرب راسي بقوة بالطاولة وانرفع راسي وانضربت راشدي وكعت اني والكرسي
مسكت راسي واني ابجي ومو مفتهمة شنو صاير جانت الحجية هي الي ضربتني وانس صار كدامها منها انها تكمل علي
الحجية.. ولج حية عبالج بهاي تصرفاتج راح تكدرلي ابو ابوج احركو اذا كررتيها بنت الزمالة ولك عوفني انسسسسس
انس.. كافي يمة قابل سوت جريمة عوفي المرك لا تاكليه يجوز متوهمة
الحجية.. متوهمة مو لعد مو حاطة الها
انس.. بس تعالي هسا لا تكبرين الموضوع
ميرا.. سحبها من المطبخ واني بعدني مصدومة من الي صار وراسي ووجهي كلش يوجعني حطيت راسي بين رجليني وانفجرت بالبجي
يعني شسوي اكثر اذا اعوف الشغل ما يعجبهم واذا اشتغل ما يعجبهم والله ماكدر اتحمل هيج شنو ذنبي اريد اعرف
زين هي مو اكلت منو الضهر شو ما حجت شي هسا صار مو عاجبها والله ما سويت كلشي بس حميتو وبعدو جديد ما لحك يتغير طعمتو
بقيت ابجي وحاضنة نفسي وبكل شهكة احس حلكي يوجعني وحسيت اكو حركة يمي وخفت عبالي هي رجعت تضربني
ايناس.. لا تبجين
ميرا.. رفعت راسي .. ليش ضربتني
ايناس.. مو انتي حاطة ملح هواي بالمرك وبيبي عدها ضغط
ميرا.. باستغراب اني حطيت
ايناس.. لعد منو
نادية.. جابت المواعين .. يلا ايناس
ايناس.. تمام ماما
ميرا.. اخذت خاشوكة وضحكت المرك ملح صافي وركضت عالمغسلة تفيتو وغسلت حلكي علمود تروح طعمة الملح
هاي ليش هيج ومنين اجاه الملح معقولة احد حط عليه ملح من جنت ارش الحديقة بس منو يسويها ليش يسويها اساسا
الله لا يوفقو كائن من يكون لان اكيد الي سوا هيج يريد يتسببلي بالاذية غسلت المواعين وخلصت ورحت على غرفتي
اخيرا خلص هاليوم المشؤوم ااااخ يمة راسي ووجهي بعدهن يوجعوني رحت للجنطة طلعت المراية وباوعت على وجهي مطبوعة ايدها على خدي
الله يكسر ايدج يا عاجوز البين حتى راسي وارم مكان الضربة صارت جاكي تشان براسي شسرعها بالمعارك ما تنلحك
طلعت ملابس واخذتلي دوش واول ما طلعت تجمدت بمكاني
صهيب.. تقرب علي .. عجبج المقلب مو
ميرا.. بقيت ساكتة وخايفة
صهيب.. حط ايدو على باب الحمام وانحصرت بينو وبين الباب .. من احجي جاوبيني لا اطبعلج كم راشدي ثاني بوجهج
ميرا.. بخوف .. شش ش شنو
صهيب.. عجبج مقلب الملح مو
ميرا.. للل لل
صهيب.. باستهزاء .. لا لاتكولين ما عجبج راح ازعل هيج ههههههه
ميرا.. لليش سويت هيج
صهيب.. اممممم حبيت اشوفج تنكتلين من غيري اريد اعرف هم تحبين الكتلة لو لا
ميرا.. شنو سويتلك اني
صهيب.. اوك من هالناحية ما سويتي شي اخوج النغل تكفل بكلشي ولازم احد يتعاقب
ميرا.. روح اضرب اخوي .. وبكلبي اكول لو انت زلمة روح وجرب تضربو الا يهجم بيتك
صهيب.. حظو حلو اننا ممنوع نحجي وياهم ولا جان سحلتو مثل الطلي وجبتو يمج
ميرا.. قرب راسو على ركبتي وسحب نفس بقوة احس جسمي كلو قشعر ونفسي صارت تلعب منو
صهيب.. الشي الوحيد الي يخليني اباوع لجلبة مثلج هو انج طالعة حلوة وريحتج طيبة وتخليني اشتهي اعيد ليلة الدخلة
ميرا.. بخوف .. فدوة عوفني
صهيب.. ليش ما حبيتيني
ميرا.. عوفيني الله يخليك
صهيب.. راح اعوفج بس مو لخاطرج لخاطر الحلوة الي عالجتج بس تدرين نسيت انو احنا مديونين الها هواي
اجت عالجتج وطمطمت السالفة وفوك هاي رحت وياها لعبنا شوية لحالنا بالشقة ورجعت وين اكو دكتورة تقدم هيج خدمات
ميرا.. هي زوجتك
صهيب.. كل عقلج اتزوج ك...ة مثل هاي
ميرا.. من كال هيج صرت اتخيل موقفهم مع بعض وفوكها بالحرام كوة لحكت افتح الباب مال الحمام واستفرغ بالمغسلة الصغيرة
صهيب.. هههههههههه يلا باي يا حلوة راح اروح لحبيبتي عود ما اوصيج من تطيبين يوميا تسبحين وتكون ريحتج هيج علمود ما ازعل منج
ميرا.. استفرغت كلشي بمعدتي وعلى شوية استفرغ احشائي من بشاعة الكلام الي سمعتو وبسبب تخيلي للموقف
معقولة اكو ناس بهالنكاسة هاي وفوكها يحجيلي بكل فرخ وكأنو مسوي انجاز غسلت ورجعت كعدت عالفراش وبعدها نفسي تلعب
زتيت المشط من ايدي الله يلعنك يا حيوان ماطول تريد تنكلع لهالحيوانة مالتك ليش تجي تغثني وفوكها هو الي حاط الملح
بكد الثور ويتصرف تصرفات اطفال وهسا لو اكول لاهلو اكيد راح ينكر ويجذبوني الله لا ينطيك العافية وعسى ايدك بالكسر
باوعت عالجنط واني محتارة شنو اسوي اخير شي اجى ببالي القران رحت طلعتو وباوعت عليه كأنو شي غريب ودا اتأملو
اخذتو وكعدت عالفراش اريد اقرا بس خفت لا شعري يصير عليه ويتبلل بدون ما انتبه وفوكها لازم اغطي شعري
فاخذت المشط مشطت شعري وكملت ولبست ازار الصلاة وبلشت اقرا وسبحان الله اندمجت وياه اندماج مو طبيعي ونسيت كلشي
توقفت فجأة ولاحظت نفسي شكد مندمجة بالقران وتذكر كال علي بن ابي طالب (كرم الله وجهه) من قال
(اذا اراحك الله بذكره فاعلم انه يحبك)
((للملاحظة انا اتشكر المعنى بهذا الشكل فما اعرف اذا كان كلام هيج او بيه شوية اختلاف بس المعنى واحد))
ابتسمت بفرح لاول مرة واني موجودة بهالبيت لان الاحساس الي حسيت بيه ما يعرفو الا الي عاشو او حاس بيه
تخيلو تعيشون حالة وتعرفون ان شخص مثل علي بن ابي طالب يكولون هاي الحالة دليل على حب الله الك شلون راح يكون شعوركم
سكرت القران وحضنتو كل قوتي وارد الحمدلله الحمد والشكر الك ياربي على كلشي بحياتي الحمدلله الذي لا يحمد على مكروه سواه
بقيت على هالحالة واردد لحد ما غفيت واني بمكاني وحسيت على برد بنص الليل فزيت من النوم رجعت القران لمكانو وتغطيت ونمت
جنت نامية وحسيت احد دا يدفرني فتحت عيوني وفززني منظر الحجية يمي كالت يلا كومي جهزي الريوك
وعافتني وطلعت جنت دايخة كلش ومو شبعانة نوم كمت صليت وطلعت رحت للمطبخ عزاااااا بعدها الدنيا فجر
تخيلو لسه حتى الضو مو طالع يعني حتى لو دجاج ماراح يكعدون بهالوقت هذا واكيد راحت تكمل نومتها بعد ما زعجتني
نادية.. هاج هذا العجين اخبزيه ماطول جاية الكهرباء (جانو يخبزون عالكهرباء)
ميرا.. ماعرف اخبز
نادية.. دبري نفسج
ميرا.. شدبر والله ماعرف اخبز لا ادبر نفسي ولا شي اعوفو هيج وانتي اخبزيه من تكعدين
نادية.. عابت هالشكول بكد البقرة وماتعرفين تخبزين
ميرا.. صفنت عليها هاي شبيها تخبلت علي شنو هي كوة دا اكوللها ماعرف اتصخم على عمري واخبز والله يا الله شلون بشر
اخذت العجين وراحت تخبز واني حطيت الجاي عالنار وصاحتني نادية كالت لعد نظفي البيت ماطول ما تخبزين
بلشت بتنظيفو ومن استوى الجاي طفيت عليه بين ما صارت الدنيا صبح وكعدو العيلة نادية خلصت خبز واني خلصت تنظيف
جهزتلهم الريوك وحطيتو الهم ورجعت للمطبخ تريكت بس كل شوية اباوع عالباب اخاف لا تجيني الحجية مثل البارحة
من خلصت ريوك كمت غسلت المواعين مالت الخبز وجابت البقية نادية مر الوقت طبيعي والعصر هم طلعت ارش الحديقة
بس هالمرة اخذت كرسي وكعدت عليه وماسكة الصوندة بايدي وارش ودخلو انس واسراء جان انس ساندها ويمشي
كمت من مكان استقبلتهم وسلمت على اسراء وخليتها تكعد عالكرسي وجبت كرسيين لانس والي ورحت كلت للحجية انهم اجو وكاعدين بالحديقة
رجعت كعدت عدهم بس الحجية ما اجت لا هي ولا نادية اجت بس ايناس لان جانت هواي تحب اسراء وعمها انس
اسراء.. شلونج شخبارج
ميرا.. الحمدلله انتي شلونج
اسراء.. باوعت لانس .. تدري ماعرف اسمها لحد الان
انس.. وهو صافن ودا يفكر .. اسمها ميرا
اسراء.. وشلون عرفت
انس.. قابل اني مثلج ماعرف اجيب معلومة بعدين شنو نسيتي انو اني عندي خبر بكل تفاصيل الكعدة
اسراء.. لج تتذكرين من كلتلج اني حامل علمود تاكلين
ميرا.. اي اتذكر
اسراء.. ترا ما جنت ادري بالحمل
ميرا.. باستغراب .. شلون يعني
اسراء.. جنت اجذب وطلعت صحيح حامل
ميرا.. شلون هيج
اسراء.. لج اي والله مادري بنفسي حامل
ميرا.. مبروك
اسراء.. الله يبارك بيج
انس.. اني رايح اشوف امي ولا تتحركين من مكانج ترا املص اذانج
اسراء.. هههههههه لا لا تطمن ما اتحرك
ميرا.. ليش ما تتحركين
اسراء.. خايف علي وهذا طبعو من تزوجنا يخاف علي
ميرا.. لان يحبج
اسراء.. قصتنا حلوة وصعبة بنفس الوقت
ميرا.. ليش
اسراء.. انس تعرف علي بالجامعة جان هو مرحلة ثانية كلية عسكرية وماعرف شعندو بالجامعة بيومها وشافني ويا صديقاتي
ومن يومها بدا يراقبني ولحد الان يكول انتي ينطبق عليج الحب من اول نظرة ومن تخرج وتعين ضابط قرر يتقدملي
ميرا.. يعني هوا ضابط
اسراء.. اي تجيج السالفة
المهم حجى ويا امو بالبداية ورفضت رفض قاطع بالاثناء اني ماجنت ادري بيه يحبني وهو ما جان يحب سالفة علاقات وحب قبل الزواج
وقتها اجى للجامعة وبقى ينتظر لحد ما طلعت جان لابس عسكري ويعرف الامن مال الجامعة معرفة سطحية وكايللهم انو اني خطيبتو
من طلعت صار كدامي وتفاجأت اريد اتجاوزو كال انتي اسراء مو كلتلو اي كال اوكفي على صفحة كلتلو ليش كال مو شغلج
يمة بوقتها كلبي وكع من الخوف عبالي صاير شي طلعت بصفحة واجى هو صرت اتوسل بيه واحلف مو مسوية شي كال اعرف
انس.. شوفي راح احجيلجياها من الاخير واريد جواب واضح وصريح
اسراء.. بخوف والله مو مسوية شي اني
انس.. اسأل لو تبقين تحلفين
اسراء.. اسأل
انس.. انطيني اسم حبيبج مدري خطيبج
اسراء.. وربي وربي ماعندي لا خطيب ولا حبيب وحتى اسأل صديقاتي
انس.. زين زميل
اسراء.. ماعندي والله
انس.. يلا لعد روحي
ميرا.. ليش سوا هيج
اسراء.. جان يريد يعرف اذا احب احد يعوفني واذا ماعندي حبيب يحاول بكل الطرق علمود يقنع امو ويخطبني
بقى 10 ايام كل ما اطلع اشوفو يم الجامعة ويبقى مراقبني لحد ما اطلع ومرات اشوفو بالسنتر مال الجامعة
من الاخير صار مثل ظلي وجان يجي 10 ايام ويغيب 10 ايام بس من يجي ما بحجي وياي بس يباوعلي من بعيد لبعيد
وجان من احد من الطلب يسألني سؤال خارج القاعة ويشوفو عيونو تصير بكصتو وجنت خايفة يسويلي مشكلة وانفضح بين الناس
الى ان اجى يوم من الايام جان واحد من زملائي بالقاعة يريد يخطبني ويريد يسوي مثل المسلسلات التركية
اتفق مع صديقاتي وبالاستراحة اخذني عالحديقة وانتبهت ان انس هم موجود بس لاحظتو صار يباوع بعصبية مو طبيعية
وحدة من صديقاتي كالت باوعي وراج واني كل تفكيري عند انس ونظراتو المخيفة شلون باوعت لكيت الولد كاعد ومادلي الحلقة
الولد.. اسراء تقبلين تتزوجيني على سنة الله ورسوله
اسراء.. بصدمة .. لا
الولد.. افتشل .. ليش
اسراء.. اني ما اجيت هنا علمود تخطبني اجيت ادرس
بوقتها الولد من جهة عصب ومن جهة افتشل قرب علي وكال اني نيتي شريفة وحبيتج وقررت اخطبج بدون علاقات ومدري شنو
مد ايدو يريد يمسك ايدي ومسكو انس من ايدو كال ما سمعتها رفضتك يلا انكلع كال لانس محد ذبلك عظم روح انبح بعيد (يشبوه بالجلب)
اول ما كمل كلامو كل الي صار هو صياح الولد من ضربو انس براشدي على وجهو وانس ايدو كأنها بلوكة من كبرها وثگلها
ما احجيلج صارت ملاطم بينهم اني من الخوف طلعت ركض على ابو الخط وكلتلو هسا توديني على اهلي ويريد يفتهم السالفة ماكو
اخير شي صرت اصرخ عليه وانجبر اخذني من وصلت البيت الحمدلله بس ماما موجودة اخواني وخواتي وبابا نص بالشغل ونص بالمدارس
حجيت لماما كلشي كالت هاي هي الي صار مو ذنبج معليج بيه ويومين بقيت بدون دوام بعدين من داومت جان انس هم موجود
الولد بعدو مبين عليه اثر الضرب بس الطلاب كلهم انتبهو لوجود انس ومراقبتو الي وتعرفين بعد الكلام الي صار يطلع
الي يكول يحبها والي يكول بينهم علاقة والي يكول كرايبها وكل واحد يحجي شي عدا النظرات الي يباوعون بيها الي
ويوم بعد يوم يزيد غضبي وحقدي على انس اخير شي انتظرتو لحد ما خلصن ال 10 ايام ومن اجى رحت عليه واني معصبة
اسراء.. شعندك ملاحكني مثل ظلي ما تستحي ماعندك خوات بسببك حتى صارو. يطلعون علي اشاعات عوفني بحالي ولا تلحكتي
انس.. بعصبية .. نصي صوتج لا اكص لسانج واطلعي من كدامي لا ابتلي بيج يلاااا
من كال هيج اقسم بالله لو بابا كايلها ما اخاف منو هيج لدرجة دمعت عيوني من الخوف وانهزمت من وقبل ما ابتعد صاحني
اسراء.. شتريد ما يكفي الي صار بسببك
انس.. باوعي اني راقبتج لان حبيت اعرف اذا تحبين احد لو لا واذا تحبين احد علمود اعوفج براحتج
اسراء.. وليش تراقبني
انس.. حجيت ويا امي علمود وراح اقنعها تجي تخطبج
اسراء.. ما اريد لا اريد اتزوج ولا اريد اتصخم على عمري عوفني براحتي وهاي هي
انس.. تقرب علي وهو اطول مني ودنك علي وباوعلي بعصبية .. امي راح تجي واريد بنت ابوها الي ترفض الا اهجم بيتها
ميرا.. هههههههه هاي شلون خطوبة من بدايتها مشاكل
اسراء.. هو جان يحبني وانس من يحب ما يتفاهم
ميرا.. كملي كملي قصتكم تخبل مبين
اسراء.. المهم من يومها ماعرف ليش صرت اني اراقبو ومن يروح 10 ايام ابقى انتظرو واحس كأنو حارس شخصي الي
تخيلي من يكون موجود ما اخاف نهائيا ومن يروح اصير كأني عصفور مكسور جناحو ابقى اتلفت واخاف من ظلي
من انتهت المرحلة الدراسية اول يومين اجى فورا على اهلي وخطبني بس جان لحالو وبابا رفض لان وحدو وكال لبابا هو عايش لحالو
من سأل بابا عليه طلع ساكن ببيت لحالو وعازل من اهلو قبل كم يوم وعرف بابا انو ضابط وسمعتو بمنطقة اهلو زينة
بس جان عدم وجود اهلو بالخطبة هو العائق بموافقة بابا اخير شي كالو جيب اهلك وياك وقتها لكل حادث حديث
ماما شكت بالموضوع لان كلتلها من تعارك ويا الولد علمودي وبوقتها انجبرت احجيلها كلشي ونزلت بي رزايل للصبح
اخير شي هي صارت تحاول تقنع بابا وانس كال لبابا ترا اني راح اتزوجها مو اهلي وبعد كلام ماما واصرار انس وافق بابا
وربي من سألوني وافق من خوفي من الرفض اكثر من اقتناعي بانس لان اذا رفضت الا يتخبل علي ويشوفني نجوم الظهر
ومن خلصت جامعة فورا تزوجنا وعرفت انو امو رافضتني وكايلة هاي الله يعلم كم واحد مصادقة قبلك بس هو ما اهتم لكلامها
وهسا من يروح 10 ايام للدوام اتخبل لحد ما يجي ومن يجي تشوفينا ثنينا طايرين من الفرح وعيونا تلمع من نشوف بعض
ولولا ان الدوام مصدر رزقو جان خليتو يعوف الدوام بس علمود يبقى يمي بس شنسوي لازم اتحمل علمود يكدر يكون نفسو
حاليا دا يبني بيت بس يكملو ننتقل عليه لان الي كاعدين بيه اجار ووعدني بس يكمل البيت يخليني اني ارزح اختار الاثاث
ميرا.. الله والله قصتكم تخبل
اسراء.. مرات من اتذكر اكول يا ترا لو مو طالع بوجهي انس جان منو تزوجني وجان هسا سعيدة بحياتي لو لا
ميرا.. اهم شي ما تكونين مثل حالتي
اسراء.. والله يا عمري لو بايدي فلا اخليج تجين فصلية وبالاخص لصهيب هذا لا براسو خير ولا يكون بيت والدنيا دنيا
ميرا.. ما اريد منو شي بس يعوفني بحالي
اسراء.. ترا هو عسكري بس صوج انس دبرلو واسطة وخلاه يستلم راتب بدون دوام ولا جان هسا الله يعلم وين هو
ميرا.. وشلون يصير هيج
اسراء.. حذرو ان ممكن يفصلونو بس ما اهتم ومو معلوم يا يوم يفصلونو او يرجع لدوامو
ميرا.. اي
بكلبي كلت لعد لو تعرفين بيه هو والدكتورة شتكولين اصلا كلشي سهل عند ذيج الطامة والله يعلم منو غير الدكتورة هم
اسراء.. خلي نروح عند عمتي وانس هسا تطلعلها حجة علي
ميرا.. مو على اساس ما تحبج
اسراء.. هي ما تحبني بس كل واحد يسوي باصلو واني لازم اروحلها لان هي الجبيرة
ميرا.. تمام
اسراء.. تعالي بس اسندني كدام انس لا يملص اذاني ههههههههه
ميرا.. بابتسامة .. يلا تعالي
سندتها واخذتها عندهم ورجعت سويتلهم جاي وامو جبرتهم يبقون عالعشى من كملت الجاي اخذتو ايناس الهم واني بلشت بالعشى
طلعت دجاجة من الثلاجة قطعتها وحطيتها وقطعت طماطة وبطاطة وبصل وحطيتهن صينية الفرن والدجاجة فوكهن وخليتهن بالفرن
والدجاجة الثانية طبختها طبخ علمود الي يريد بالفرن ياكل منها تالي يريد مطبوخ ياكل من المطبوخة وبقيت ملتهية للمغرب
وبقت قصة حب اسراء وانس تدور ببالي شكد حلوة هيج قصة من تكون بيها حب بس حب نظيف وطاهرة مو مثل هالايام
واحلى شي من انتهت بزواجهم وبقى الحب مثل ما ه و مو مثل هسا يتزوجون عن حب ويتطلكون بعد سنة او اقل لان ما تفاهمو
ويمكن لان جذبت علمودي رب العالمين جازاها بالحمل على طيبتها وصار كلامها صحيح وما تحملت ذنب الجذب او يجوز صار عليها ذنب الله اعلم
من كملت العشى اجت نادية اخذتو وحطيتلي عشى لحالي واسمع صار بينهم نقاش واسراء ذكرت اسمي يس صوتهم مو واضح
اخير شي تقرب صوت اسراء للمطبخ واسمعها كالت ترا بشر حالها حالكم مو جلب وتاركيها لحالها بالمطبخ
ميرا.. شكو
اسراء.. تستقبلين خطار يمج
ميرا.. هلا بيج تفضلي
اسراء.. يلا اكلي ولا تدوخيني مالي خلكج
ميرا.. شبيج متخبلة
اسراء.. ههههههه هرمونات بعد
انس .. بصوت عالي من بعيد .. اسراء لا تعصيين لا يطلع ابني راسو مطعوج ترا اطعج راس اخوج
اسراء.. بالله هسا هذا واحد شيحجي وياه
ميرا.. ماتكدرين تحجين يملص اذانج
اسراء.. تعال انس اسمع
انس.. شكو يخايبة عوفيني اكل
اسراء.. لك حتى ميرا تكول يملص اذانج
انس.. عفية عليها هاي تفتهم مو مثل ذولاك الناس
اسراء.. ياااااا هاي علي مو
انس.. اني كلت ذولاك الناس ليش تاخذين الحجي عليج
اسراء.. خوش خوش يا انس
ميرا.. رغم ضروفي الخايسة الي عايشة بيها بس وجودهم شوية خفف عني وتونست وياهم بالاخص اسراء كلش تونست وياها
من خلصنا عشى كمت اغسل المواعين وهي كاعدة يمي اخير شي كامت وكفت عند باب المطبخ وحجت ويا نادية
اسراء.. نادية شبيج انتي وايناس ما تساعدن هالمسكينة هاي
نادية.. وليش نشتغل اذا عدنا خدامة ببلاش
اسراء.. وانت صهيب مو هاي زوجتك كل هذا ماتخاف الله بيها
صهيب.. قصدج فصليتي لان هاي تحلم حلم تصير زوجتي
اسراء.. وليش تحلم ترا ما جابها يمك الا حظها الخايس
انس.. اسراء كافي
اسراء.. انت هم صاير مثلهم وما تحجي الحق
انس.. اسراء كلتلج كافي عاد خليهم براحتهم ما دخلنا
اسراء.. اي ابقى هيج علمود حوبتها توصلك انت هم
ميرا.. كافي اسراء اني ما احتاج مساعدة
اسراء.. انجبي انتي وربي ابتلي بيج
ميرا.. من كالت هيج فشلتني كلش انداريت اكمل شغلي وحزت بنفسي كلش كلمة انجبي وهي حست بنفسها واجت تعتذر
خطية توسلت بي هواي علمود اسامحها وكل شوية تتوسل واكوللها والله مسامحتج وترجع تتوسل مرة ثانية
تدري انو الفشلة اجت منها اكبر من البقية لان مو متوقعتها نسيت الموضوع وسويت جاي وخلت انس غصب عنو يروح يجيب حلويات
اخذو العائلة حصتهم وجابت حصتنا اني وياها صرت اسولفلها عن حياتي بالمختصر وما كلتلها انو جنا عايشين بسوريا
بلشت حياتي بعد ما سكنا عند عمامي وسويت نفسي كأنو عايشين ويا بعض من البداية لان ماعرف اذا هي تعرف جنا بسوريا لو لا
اسراء.. بصوت ناصي .. احجيلج شغلة
ميرا.. شنو
اسراء.. شايفة صهيب شكد خايس
ميرا.. هههههههه اي
اسراء.. ايهم (المتوفي) اخيس منو رغم ان الميت ما يجوز عليه غير الرحمة
ميرا.. ليش
اسراء.. لا كمل دراسة ولا داوم بالعسكرية مثل اخوانو وفوك هاي لسانو طويل بشكل ويفشر (يسب) كدام الرايح والراجع
وجان انس دائما يكول انو راح يجيبلهم مصيبة لحد ما صارت المصيبة موتو وتورطتي انتي بيها بسبب طول لسانو
ميرا.. والله على حجي نعمان اخوي يكول عادل طخو بدون قصد وهو صار يسبهم وكايل كلام بس نعمان ما قبل يحجي كدامي
اسراء.. اي كل الموجودين كالو هو حجى عليهم واخوج الجبير مو متحمل وضاربو على حلكو وبسبب الاحتقان صاير عندو انقطاع بالتنفس
انس رغم قهرو على اخوه بس تخبل من اهلو طلبو فصلية لان اول شي هو دارس وواعي ويعرف هالي غلط وحرام
وثانيا يعرف صهيب وطبعو ويعرف راح تكون الفصلية اداة تسلية بايد صهيب والي سواه بيج خير دليل
ميرا.. ماكول غير حسبي الله ونعم الوكيل
اسراء.. هسا ماكو حل غير انو يصيرلج اطفال ومن يكبرون يكونون سند الج غير هيج زحمة
ميرا.. اطفال من صهيب ويعيشون وياه بنفس البيئة ما اريدهم
اسراء.. هذا الكلام يتغير من يصير الطفل بالاخص بالحمل راح يكون شعورج غير ومن يجي راح تحبيه حب مو طبيعي
ميرا.. خايفة من يكبرون اطفالي يخذلوني او اهل صهيب ياخذونهم مني
اسراء.. لا ما ياخذونهم لان ما يريدون يتحملون مسؤوليتهم فيخلونهم عندج اما الخذلان هذا انتي تتحكمين بيه من البداية
اذا هم صغار علمتيهم عالحنان والطيبة راح يحبوج واذا كنتي قاسية وياهم راح يكرهون وتكون فرصة لاهل صهيب يحرضونهم عليج
ميرا.. والله مادري على كل حال اني متوكلة على ربي وهو يدبرلي اموري كلها
اسراء.. ونعم المولى عفية عليج ايمانج بربج احسن من اي شي ثاني
ميرا.. عود من تكملون بيتكم كولي لانس يقنع صهيب اجي اشوفو
اسراء.. من عيوني ولو اكدر جان اخذتج هسا هم تتعرفين على اختي هي هم خبالات مثلي
ميرا.. إن شاء الله اتعرف عليها بعدين
انس.. اسراء ما خلصتي سوالف ما وجعج حلكج
اسراء.. ليش الي يكابل هالحلوة هاي يتعب من سوالفها الحلوة
انس.. ديلا يلا بدون لواكة زايدة شو متعلمة عاللواكة يولي
اسراء.. هههههه احسن
انس.. يلا بوية يلا اليوم احترك ابو ولدي بسببج لانام لا ارتاح
اسراء.. اي خطي
لمتابعة باقي الرواية زوروا قناتنا على التليجرام من هنا
