رواية انتقامك وانتقامي رد الدين الفصل الرابع عشر 14 بقلم تولين جراح
لا تنسون التصويت +التعليق بين الفقرات جميلاتي
الكبرياء ليس بالتعالي وإظهار الاستعلاء على الآخرين، بل هو في أن تكون أفضل نسخة من نفسك وتسعى لتحقيق أهدافك بكل قوة وثقة.”
........................................................
لتين.....
واكفه اباوع عليه برعب باوع عليه وحجى بفحيح
زعبان: وكعتي بيد الي راح يحطمج ذكري كلامي كلش زين ياا لتين انه موتج كسرتج راح تكون على ايدي
بوكتها راح تتمنين الموت وما تحصلي
حاولت اقوي نفسي وما أبين ضعفي كدامه ، جاوبته بقوه
لتين: لا انتَ ولا الأكبر منك يكسرني اني لتين الي ما تربت على الضعف اني اكسر الي يكسرني وارجع اوكف من جديد .
زعبان: حلووة قوتج راح نسله هواي ياا بنت عمي
صار يضحك بقوه حتى نشحط ورجع يضحك صوته وخشونته ويه ضحكه الهستيري سوه عندي رعب دخلت للبيت واني اسمع صوت ضحكته
دخلت ارجف نمت بصف وتد وحضنتها
فزت باوعت عليه وحجت بنعاس
وتد: لتين بيج شيء ؟
لتين: لا بس اريد انام يمج .
وتد: شبيج لتين ليش ترجفين
لتين : بردانه وتد بردانه
رفعت ايدها تحسست كصتي وشهكت بخوف
وتد: ولجج لتين مصخنه نارر كومي اسبحج يله
لتين: وتد ما أريد شيء بس انام حبابه عوفيني
وتد: ولجج ما يصير رايحه اصيحلج ماما
سكتت ما كدرت اجاوبها لو امنعها لان جنت كلش محتاجه حضن ماما الرعب الي سببه اليه زعبان
كلش أثر عليه اول مره انحط بهيج موقف
وشخص يكون بهل قرب عليه
طول عمري عايشه بين اخواني وبابا وخالو حذيفه
احس ملمس ايده الخشنه على وجهي بعدها ما تروح
دخلت ماما بفزع صارت تسويلي كمادات وتحاول صحيني حتى اشرب العلاج
كمت شربته ورجعت نمت ، كعدت ثاني يوم جسمي متكسر كمت غسلت باوعت على وجها احمر وعيني اليسره حمره وشفايفي مفطره طلعت للصاله باوعت على غرفه بابا احس كلبي طك عليه
صحاني صوت ماما
ام سائد: ها ماما شلون صرتي
لتين: زينه احس من البارحه
ام سائد: ليش صار هيج وياج تره الجو حار اكيد سبحتي ونمتي جوه السبلت ما سمعين كلامي موتيني
لتين: هاا ، اي صح ما سمعت كلامج من تكليلي الشيء البي الج ضرر تركي اني لا ادور عليهن دوار حتى اجيب الضرر النفسي ، صدوك وتد وين
ام سائد: فوك تنضف غرف اخوتج مزبله مو غرف
لتين: اممم ، بابا شلونه
ام سائد: هذيج الغرفه وروحي شوفي
لتين: مامااا هااي شبيججج
ام سائد: ومرض المرضني ولج شلون ما تتحمدين لابوج على سلامته هاا يعني عوزج كبر حتى اعلمج
لتين: اني بعد ابتعد عن الكل حتى ما يصيبكم أذى بسببي
ام سائد: ومنو كالج هل كلام هاا انتِ غبيه لو تستغبين طول عمرنا ما فكرنه بيوم انتِ سبب أذى النه ولا راح نفكر انتِ بنتا وغصبن عليج هم
كمت بستها واني اكول
لتين: اوف اوف شهل ريحه الطيبه يمه يا الحنينه هنيال ابوي عليج يوميه نايم بحضنج شابع حنان
ام سائد: ايا ادب سزز ولجج لتين اطيح حضج لا عبالج كبرتي ، سوالف الادبسزيه ضميهن موو طلعيهن
لتين: هههه خوش خوش سكتت عمي
رحت تريكت وكعدت اتابع مسلسل تركي الرحمه
وره مده بلش الخطار يجون وهيج خلص اليوم وتوالت الأيام يوميه خطار جاينه
واليوم كل عاده عم بابا جاي يطمن على صحته
لان جان مسافر للاردن وهسه رجع
دخلو الزلم للاستقبال والنسوان جانن ثنين وحده بكد الشيخه جمار والثانيه شوي اكبر من ماما بس كلش خشنه وطويلة بملامح حاده بس حلوه عكس ماما الي جانت قصيره وملامحها ناعمه وكيوت
سلمن علينه ودخلن قدمت الهن الضيافه وكعدت يمهن عرفن عن نفسهن انو هنه زوجه عمه وبنتها
دخلت إيليا تركض على ماما وحضنتها باوعن عليها النسوان كالت المرة الكبيرة
_هاي بنيتج
ام سائد: لا هاي حفيدتي بنت بنتي
_هاا الله يخليها الج جم بت عندج
ام سائد: ثنين عندي لتين الصغيره وتد الكبيرة ام إيليا
رفعت رأسها المره بحقد وباوعت على ماما وكالت
_ كصدج وريد البكتيها مني
ام سائد: بلبل!!
بلبل: اي بلبل الاخذتي منها بتها ورجلها وهدمتي بيتي انتِ وصاحبتج
لتين: العفوو منجج خاله عن يا بيت تحجين تره انتِ الي تخليتي عن بابا
بلبل: انتِ سكتي الحجي موش وياج
ام سائد: احترمي نفسج انتِ كاعده ببيتي واجب عليج تحترمين المكان الكاعده بي
ام بلبل: بسج بلبل الشيخ شنهي محذرج موش كايلج لا تفجين حلجج بجلمه
بلبل: يمه انه اجيت حتى اشوف وريد طك كلبي عليها ضلت حسره شوفتها بكلبي
على صياحها دخل سادن باوع عليه وكال
سادن: شنو هل صوت لتين
لتين: هاي بلبل ام وتد
سادن: يا طلابه هل سالفه الما تخلص ، شتريد
لتين: ندري بيها مليت اني صاعده اكعد بغرفتك
نزلت وتد تباوع عليهم بصدمه باوعت عليه صحت بصوت اعله حتى تسمع بلبل وبقيت واكفه مستحيل اروح عليه هيج مشهد
لتين: هاااي وريد رووحي رووحي خايبه امج اجت خرب راسي صدك من الصياح
هز ايده سادن وطلع
تقدمت بلبل تحضن بوتد المصدومه وتبوس بيها وتبجي بصراحه حقها بنتها ما شايفتها انطينه الحق الها بهل شيء بس وتد جان الها رأي ثاني
دفعت بلبل بهدوء وكالت
وتد: العفو منج خاله اني امي اسمها نيفين
بلبل: ولجج انه امج وانتِ بنتي الخذاج مني ابوج ولج باكج بوك مني وحرك كلبي عليج
وتد: مجان سوه كل هذا لوو قابله ترحين وياه بس انتِ تخليتي عن بابا
بلبل: شمسسسوين لبنتي ولكم ضلام ما تخافون الله ،
الله لا يوفقكم ربي يشوفني بيكم يوووم واجي اشمت بيكم يا راجح عسى لا شوف الراحه طول حياتك والمرض مرافقك عسى الله يحرك كلبك بولدك
الدعاء الي جاي تدعي على بابا يقشعر البدن حسيت على صوت الرجال من بره يصيح عليها
_ ولجج طلعي غضب الله على راسج من مره
سحبتها امها من ايدها بقوه وطلعت وهيه تدعي
هزيت راسي واني اباوع عليهم
لتين: مبين الدراما ببيت ال عكَاب ما مخلصه بعد وراح نستمتع هواييي كلشششش
دخل بابا وجها احمر ضايج ياوع على ماما الي تبجي بهدوء ، تنهد بقهر ودخل للغرفة
خلص اليوم والبيت كائيب والكل بغرفهم
وره عده ايام وتد وماما راحن للسوك والولد يقضون اليوم كله بالمضيف يم الشيخ عكَاب وويه ولد عمامي
سمعت صوت بابا يصيح على ماما وكفت بتوتر اروح وارجع متردده اروح لو لا بس اخاف يرفضني
دخلت بتردد وكلت
لتين: ب ببا ببابا ت ترر يد شي ء
ابو سائد: وين امج ؟
لتين: احمم، راحت للسوك ويه وتد
ابو سائد: امممم ، تعاي ساعديني اكوم للحديقة اختنكت من الغرفة
مسكت ايده واتجه عليه مشينه بهدوء
طلعنه للحديقة كعدته على الكرسي وردت ادخل وقفني صوت بابا
ابو سائد: سويلي جاي
لتين: اي بابا
دخلت سويت جاي وطلعت قدمته اله ردت ارجع بس وقفني صوته ، بدون ما يباوع عليه وجها ليكدام ويشرب جاي
ابو سائد: ما ناويه تكعدين ويه ابوج لوو تحسبيني عمج .
لتين: لا لا لا بابا والله ولا يوم فكرت انتَ عمي تبقه ابوي وتاج راسي
ابو سائد: امم واضح بحيث حتى ما تحمدتي اليه على السلامه
لتين بغصه: حاولت ابتعد عنك حتى لا تنصاب بأذى بسببي
ابو سائد: بسببج يعني كل هل فتره مبتعده عني بسبب هل افكار الي بالج لتين انه من ما احجي وياج موش معناتها ما اريدنج لوو صرتي ثكل عليه بس انه رايدج تعرفين اخطائج ما أريد يكولون بنت راجح ما عرف يربيها انه لو ضايج منج من البدايه ما خليتج بأحسن مدرسه وكفت وياج بحلمج وخليتج تدخلين الجامعه الي براسج انتَ بنت اخوي وضلعي وبنت اختي رهف موو بس اخت اليه لا بير أسراري تدرين من جنت اتعارك ويه بلبل اروح احجي الها كلشي وهيه بدورها جيبلي جاي وتكعد تسمعلي وتواسيني بكلمات مثل ، هيه تحبك بس ما تعرف تصرف ، الله يريح كلبك ، ان شاء الله ترتاح
هذن الكلمات جانن بالنسبه اليه مرهم بس شكول على الي كان السبب بهل دوامه الي سووها
"مسحت دمعتي الي ما اعرف شوكت نزلت وكلت "
لتين: بابا اني تعبت من هل موضوع من جها طلعت حياتي كلها وهم ومن جها ثانيه ضغط جراح عليه يريدني اصرف كانو شيءً لم يكن واسولف وياه عادي
تدري من زعبان حجى عليه شكد نهاريت لان هوه حتى شملكم انتَ واخوتي
ابو سائد: زعبان مغتاض مني جثير بسبب الماضي كل ضنه انه عفته باراتي
لتين: تعبت من هل مشاكل اريد ارجع مثل قبل اهم شيء عندي جامعتي ولبسي واشتري سياره أحلامي
تعبت من زعلك عليه كلش كسر ضهري
ابو سائد: تعاي بويه تعاي مشتاك اشمج يا ريحه الجنه
لتين: لوو صدوك مشتاقلي مجان هنت عليك ثلاث اشهر زعلان عليه
ابو سائد: على اعصابي يا بعد ابوج تدرين من شفت وجهج مدمه شصار بيه لوو من شفت لخياط احس روحي نسلبت مني
لتين: اممم ، صحح بالعلامه دخلت طمنت على وتد وعفتني
ابو سائد: ههههههه عرفتج كاعده وعفتج حتى لا تروح هيبه الزعل
لتين: هسه اني زعلانه راضيني يله
ابو سائد: اه نوب زعلانه شريان كلبي
لتين: اي ولا تغلس صالحني يله
ابو سائد: انه اسف
لتين : على شنوو
ابو سائد: على الي سويته وياج
لتين: شوكت تعتذر من واحد انتَ
ابو سائد: ما معتذر من احد هاي اول مره اعتذر وراح سامحيني
لتين: السالفه غصب
ابو سائد : اي غصب ، لوو تحبين اسوي بيج مثل المره السابقه
رجف كلبي برعب واني اذكر الي صار وياي
كمت بسرعه وهوه كام وراي يضحك
لتين: بابا انتَ مريض ما بيك حيل تركض لا سوي هيج وتخوفني وتخليني اركض
ابو سائد: لا كلشي ما بيه بعد ابوج
لتين: باباااااا
ابو سائد: شووو تعاييي
ركضت واني اذكر قبل من جنت ازعل من بابا يجيب عليه بزونه بدون ما يعتذر مني جانت عندي فوبيا من البزازين لان مره من جنت طفله كمزت عليه المغرب وصرت ما انام وابجي كل الوكت لو احلم بيها تاكلني تعبت ياله رتاحيت من هل خوفه ، وهل شيء بابا جاي يستعمله حتى يخوفني اذا اعاند ومن ابجي لو انرعب يصالحني بفره سياره لو بطلعه على حسابه
يسحب بيه للبستان واني اصرخ بهلع وهوه يضحك
لتين: بابا بداعه الشيخة جمار لا باااباااا والله بعددد ماا ازعلللل يبوووو لحكولييي خاطفنيييي يبووووو
رااحح اموتتتت يبووووو لحكولييي
الكل طلع على صريخي وكف بابا واني مستمره اصرخ
بس وعيت وشفت الكل يسائل عن سبب صريخي
اجه سائد لزم وجهي بثنين ايدي ويحجي وياي بخوف
سائد: لتين حبيبتي شبيجج منوو وياج منوو خطفج
لتين بفشله: ها لا موو ، بابا يجاوبكم
الشيخ عكَاب: شمالج ولج صوتج طالع
ابو سائد: لا يابه ماكو شيء بس لتين شافت بزونه وخافت
سائد: شنوو حبيبتي انتَ بخير
لتين: بلعت ريكي وجاوبته واحس الهبطه بعدها بيه ، هاا لا لا ما بيه شيء اني رايحه
سادن: شوو تعاي خاف هبط عندج السكر شبيج ترجفين
تغير وجه بابا من ضحك لخوف وهيه يشوفني ارجف
ابو سائد: باباتي حبيبتي تعاي تعاي يا روحي
حضنت بابا ومشيت لداخل البيت ركض اريان جابلي جكليت
كعد كبالي أسر والشيخ يباوع علينه جانو بابا واخواني محاوطيني
من كل الجهات ويوكلون بيه جكليت وبابا يشربني مي
ابو سائد: كله بسببي بويه ما ضنيتج هيج راح تنهبطين
لتين: لا بابا لا يضل بالك ما بيه شيء
الشيخ عكَاب: شنهي شبيها بنيتك راجح
ابو سائد: ماكو شيء يابه بس نهبطت هيه تخاف من البزارين
أسر: جمار تحتاجين مستشفى كومي اخذج
لتين: لا لا لا ما بيه شيء هسه تروح الرجفه مني
هز راسه وسكت وره شوي راحو واني دخلت سبحت حتى ترتاح اعصابي
وره مده رجعن ماما وتد شافنه اني وبابا نسولف ونضحك
وكفت وتد بصفي وهيه تغمز
وتد: اييي لتين شنوو متصالحين انتِ وبابا شلون بله صالحتو
لتين: حجينه ووووو صرت اسرد الها كل الأحداث
وتد: همزين تصالحتو يمعوده ضوجه
كعدنه نتعشه بالحديقة ونسولف ونضحك نطلقنه هل مره
اريان: اييييي هاي الكعده التفتح النفس على الاكل نضل نضحك عليج
سائد: على ساس كل مره نفسك مسدوده عن الأكل
سادن: لا ولك كل ما ادخل غرفته اشوفه ياكل بس اريد اعرف وين يروح الاكل
وتد: اني لوو اكل بكده اصير بقره
لتين: ولججج اني لو اتنفس هواء زايد اسمن
اريان : بابا حاجيهم
ابو سائد: هههههه ولكم عوفو اخوكم شتردون منه
ام سائد: خايبين شتردون منه هذا حبيبي
لتين: ايييي اييي واحنه بالزبل مكانه
ام سائد : كلكم عزاز على قلبي شعندي غيركم
ابو سائد: الله يخليهم الج نيفين
وتد: ها حجي غرت
ابو سائد : عليمن اغار اني اعرف وين مكاني
غمز بنهايه كلامه الكل ضل يضحك
رفعت راسي وختفت ابتسامتي واني اشوف الي يراقبنه من بعيد والغضب باين على وجها
جان زعبان الي واكف بالضلام محد يكدر يشوفه اله يركز بالمكان زين
هز راسه وراح باوعت على الكل محد منتبه اجاهلت كلشي ورجعت اضحك واسولف
ابو سائد: يله كومو حضرو نفسكم خلي نروح نتعلعل ببيت ابوي ، لتين بدون كلام يله بويه روحي بدلي
لتين: بس بابا
ابو سائد: بدون بس يله حبيبتي
لتين: تمام هاي المره راح اروح على شرف مصالحتنه
ابو سائد: بس روحي عمي قابل
جهزنه نفسنه ورحنه لقصر ال عكَاب
سلمنه على الكل باوعت على الشيخة جمار ورحت بوستها
الشيخة جمار: الله يهديج يمه
لتين: هسه صار الي يسلم مخبل ها شيخة موو توبيني بعد ما اجي
الشيخة جمار: لا حشاج جده حشاج
لتين: راح اغلس بمزاجي اليوم كلش فرحانه
الشيخة جمار: اللهم ايامج كلها سعاده بنيتي
لتين: تسلمين شيخة
ناجح : تذكر يابه قبل عشرين سنه شنو كلنه
الكل انتبه على كلامه
الشيخ عكَاب: شنهو كلنه
ناجح: اذا صارت عد جراح بت يسميها جمار وجنت متأكده راح تطلع مثل امي وهسه شوفهن شلون متفاهمات ويسولفن
الشيخة جمار: خايب وغسل غير حفيدتي مثل باقي البنات
خنجر : اي بس بنواتنه ما تكعديهن على كوشتج الغاليه عليج
الشيخة جمار: اي انه ما اكعد عليها بس عزاز كلبي وهل جمار دخلت كلبي وصارت ويه عزيز روحي
جاسر : وهسه نكدر نكول اجه منافس لزعبان
الشيخ عكَاب: جا اذا هيج معناها الي بالي بالج موش صح يا شيخة
الشيخة جمار: طول عمرك فاهمني شيخ
خنجر: مادام الشيخة والشيخ حجو بالالغاز معناها الله اليستر
الكل صار يضحك صرت اضحك بدون ما افهم شيء
دك موبايلي رفعته واني اشوفه خالو حذيفه
طلعت للحديقة وجاوبت
لتين: ياا هلا والله بالكاطع
حذيفه: لا تحجين وياي تره كلش ضايج منج
لتين: شكوو ليش ضايج صاير شيء
حذيفه: صالج بالشهر منتقلين ما تعرفين دكين عليه شوفيني شصاير وياي لوو وكت المصلحه خلصت
لتين: ياا خالوو والله مشتاقه الك بس ما تعرف شصار وياي بهل فتره تعرف ان بابا زعلان ودخل مستشفى بسبب ابنه وووووو
سولفت اله كلشي حجى بلوم
حذيفه: يعني كل هذا صاير وما تحجين لا انتِ ولا امج ليش ما كلتو النه معقول لهل درجه احنه محسوبين غرب عليكم يعني ابوج يدخل مستشفى واحنه ما عدنه علم صدك تحجون
لتين: ياا خالوو حبيبي والله كلشي صار بسرعه يعني توقع صار ايام ما فارغين من الخطار لا تزعل حبيبي
حذيفه: اممم يله اني اروح عندي شغل
لتين: زعلت صح
حذيفه: موو جاهل وازعل
لتين: حذوفي
حذيفه: هههههه طاح حضج على هل دلع استاذ جامعي وهيبه هيج دلعي حذوفي
لتين: ههههههه اي غير انتِ اسمك مدري منين جدو جايبه شكبره ، هسه المهم ما كتلي شريد
حذيفه: شتردين
لتين: احبك لا تزعل مني
رفعت عيني واني اشوف واحد لابس زي ضباط والجنطه بيده يباوع عليه بغضب
رفعت راسي من وكف بصفي وسحب مني الموبايل
انتفضت من حركته دفعته واني احاول اخذ منه الموبايل بس هوه جان اسرع مني وخله الموبايل على اذنه ما اعرف شنوو حجى خالو الي خلا هذا الشخص
يثير من الغضب وصاح بصوت كلش عالي
_منووووووو هذذذذااااا
يتــبـ؏
.
.
.
.
.
.
.
.
.
.
قراءة ممتعة، دمتم برعاية الرحمن وحفظة
في ميزان حسناتكم
﴿إِنَّ اللهَ وَمَلَائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا﴾
«اللَّهُمَّ صَلِّ وَسَلِّمْ عَلَى نَبِيِّنَا مُحَمَّدٍ»🍃
لمتابعة باقي الرواية زوروا قناتنا على التليجرام من هنا
