رواية في حجر الافعي الفصل الثاني عشر 12 بقلم شمس العراقيه

رواية في حجر الافعي الفصل الثاني عشر 12 بقلم شمس العراقيه

صباح الخيرات عودة متأخره اعذرونا عيد ومجموعين بيت الأهل وحقكم عليه تحياتي 

نمارق 

ـ مرت الايام عاديه واحاول أتقرب منهن اثيله هاي مالها صوت بس تخبث بينهم يعني خوفك من السكوتي العله سراب ووديان وكحات ويردن بس الهن وينحازن لعمتهم عسله أما سعاد كتله من الحنيه والطيب وحناش يحبها ويفضلها عليهن كلهن هذا اللي فهمته من خلال معرفتي 

"

جنت انشر ملابسنا واني راجعه للغرفه شفت وديان واكفه ويه أشهاب وتحجي حاول اتسمع بس ما كدرت تشوفني وصلت لعدهم وصارت بوجهي مشت متهربه وجهه مخطوف ملاحظه عليها من فتره هواي تحب تجيب طاري اشهاب وذاكره وراها شيء مو خاليه !! 

" وصلت لعنده قبل لا يدخل الغرفه منعته وديان شعدها واكفه وياك وشتريد منك 

أشهاب ـ شعدها قابل سالتني على كم شغله وراحت

نمارق ـ شنوو هذن كم شغله 

ـ شيخصچ بهل السوالف 

ـ لا يخصني ممكن تحجي عاد

ـ شو حوصلتج طاكه ؏ ما تعرفين شسالفتج تغارين 

ـ مو مسأله غيره بس ما ارتاحلها وحده مشيطنه وخفيفه 

ـ شاكه بيج حامل تكول تصرفاتها غريبه وشكلها يوحي هي حامل وكعدت تحذرني عود خايفه عليج وتحبج 

ـ اهاا بس هيج اخاف انت حجيت الها لن اني ما حاجيه لاحد عن الحمل شدراني مبين وديان قريبه منك 

ـ ليش متكولين انتي حاجيه اذبينها براسي وحذرتج وما اخذتي بحجايتي اكيد حجيتي ل سعاد وهي سمعتج 

ـ كتلك ما حجيت لاحد ليش متصدك 

ـ مصدكچ بس دربالج منهن لاتختلطين بيهن خلج بعيده 

ـ ماشي مشه وضلت أبالي ليش من شافتني وجهه انخطف ليكون !! لا ما أتصور أنه بعض الظن أثم لازم اخليها ابالي اكثر من الباقيات 

" بقيت واكفه باب غرفتي يم الشباك وهنا يكنسن الحوش والتراب يهف ويكتلك القهر لابسات خمار ويشتغلن ادري منو الغريب البينجن !! الدين عدهم عاده مو عباده'شفت سعاد ذبت مكناستها توجهت للمطبخ اليوم الطبخ عليها خل اروح يمها شكوو باقيه اتصفن بهل الغرفه مثل السجينه 

" رحت من الباب الخارجي غاسلات المطبخ ونظيف بشكل وسعاد فارشه بصاط ومخليه الخضروات وكاعده تشتغل الله يساعدج 

سعاد ـ هلا ويساعدج شملفيج من الصباحيات للمطبخ ولچ أنتِ ما تخافين كويانه شوكتچ 

نمارق ـ و؏ شنو اخاف الروح محد ياخذها غير انطاها شيسون يعني يضربن اضرب يغلط اغلط عدهم ايد وعندي ايد عدهم لسان عندي لسان كلشي بالمثل 

                                          

              

                    

ـ والله فلا تلامين بس مو الكل مثلج يلة دامچ اجيتي هاچ ساعديني كشري الشچر بين ما اكوم اطبخ اللحم واشوف الحمص استوى لو بعده 

ـ كامت وجريت المصفي كعدت اكشر واني ملتهيه بشغلي شفت خيال رفعت رأسي رسل متخصره وتباوعلي بالشر

وتوعدلي تجاهلتها 

رسل ـ سعاد هاي الشيطانه شمدخلها المطبخ لا ومنطيتها الخضره وتكشر وصايره ام المطبخ ليكون هي التطبخ الغده 

سعاد ـ رسل كسري الشر فدواتج وخلني اكمل الغده وبعدين هي اجتي تريد تعاوني وانه وافقت شكووو بيها

ـ لا بيها ونص هاي ايديها ملطخات بدم امجد ومن سابع المستحيلات اخليها تمد ايدها ؏ شغله بهل البيت يلة كومي لا اهرج البيت هرج والم عليج خلك الله تراني بالكوه واكفه على حيلي وانه اشوفج دم خنزيز كومي لا اسيح دمج بهل السجي**

نمارق ـ كاسره الشر وماشيه لن مالي خلك اتعارك وياچ نفضت إيدي وردت عليه بغضب 

رسل ـ أي ولي من مطبخنا وانكبري بخرابتج واحترمي نفسج واعرفي أنتِ شنو واحنا منو وحلكج سدي لن زين من عدنا نتحسن عليچ بلكمه اكل يا بنت المثقف !!! 

ـ قصدج ولج

ـ قصدي واضح إبوج المثقف الدارس والمتعلم وهيج يسوي لعد شيخلي لجاهل وما متعلم 

ـ ليش بابا شمسوي ؟؟ 

ـ هههه تقشمرين نفسج يا حلوة الظاهر ما عندج علم بكل سوالف أبوج المتعلم يا خطيه محد كايلچ

سعاد ـ رسل رجعنا لنفس السالفه شعليچ أنتِ متجوزين اذا متسوين سالفه وتخبصين البيت علينا يلة نمارق امشي لخرابتج وبله مشاكل ما ناقصين طلايب وبدون شيء عمتي عسله بالكوة لازمه نفسها عليچ خلج محضر خير فدووه لطولج يا حبيبه

نمارق ـ لحظه لحظه خل افهم هاي شتخربط بسوالفها مشت ولزمتها من ايديها اللي حجيتي كملي واحجي بوضوح لاتراوغين بالسالفه بابا شمسوي وهيج تحجين عنه يا شيطانه 

رسل ـ ليش ما تعرفين أبوچ عافج وراح متعمد ومحد جبره لو تغشمين بنفسج لن عجبج اخوي إشهاب ومعشمج بالحب وعاشكته هذن سوالفج ما يعبرن علينا يلة وليييي

نمارق ـ نفضت ايدها مني وطلعت باوعت على سعاد وهزت رأسها سعاد بابا هو عافني بدون محد يجبره لا حناش ولا صكبان احجيلي الصدك 

سعاد ـ سوالف زلم بينهم مالي دخل وهاي رسل تخربط بسوالفها كلبها محروك على اخييها اعذريها اللي صار مو شويه وأنتِ هم بسلامتج تتشترين الطلايب شرايه خلج بخرابتج وكسري الشر يا حبيبه ليش تخلين العين عليج ويتوعدن الچ بالشر 

نمارق ـ ماشي طلعت من يمها واعرف بيها تعرف بس ما تحجيلي السالفه من ساسها لازم احاجي رأس الجبير حناش واني طالعه شفت حناش نزل من السياره وطلعت وحده من نسوانه أستقبلته وبيدها دولكه الماي ضليت أباوعلهم شرب الماي وجه نظراته ناحيتي مشه وقبل لايوصل الطرمه وكفت بطريقه اريد احجي وياك بموضوع

            

              

                    

حناش ـ خيرچ شموضوعچ 

نمارق ـ عندك مجال هسه اذا ممكن ضروري 

ـ امشييي شنهي سالفتچ 

ـ مشه كدامي ومشيت وراه راح صوب الحلال اكو مكان مثل السيباط معزول وكف وهزلي رأسه تقربت ليمه وتلفت شفت نسوانه كلهن يباعن النا يمكن الوقت مو مناسب نسوانك يباعن علينا 

ـ مالچ دخل بيهن احجي شنهي سالفتچ 

ـ شوف اني حاسبتك مثل اخوي الجبير واريد منك تكون صادق وياي وما تكذب ولا تراوغ بالسالفه 

ـ كولي شعندچ 

ـ بابا هو عافني بدون اجبار منك او من ابوك امانه احجيلي الصدك لن دخت بزماني ما معقوله بابا يسويها ويعوفني بينكم وانت اعرف بالوضع واللي صار ، تنهد وجر نفس وياوع لنسوانه اشر الهن كلهن تبخرن من الخوف رجع باوعلي بضيق عيونه مليانات شر ورهبه تسكن المكان وسماره الحاد ورجع رد عليه 

ًـ أبوج عافچ لن الشغله شغلة شرف ما جان عنده حل ثاني غير انه يوافق على قرارتننا وغصباً عليه وهو الممنون 

ـ شغلة شرف يعني مو شغلة ثأر واني شدخلني بهل السالفة كلها من الاساس من حقكم تبقوني يمكم اني بريئه من كلشي صار وحقكم اخذتوا وعمي قتلتوا بعد شكوو 

ـ الأثنين الشرف والثأر وحده أنتِ وحده بنت عمچ 

ـ أني 

ـ أي أنتِ بقيتي يمنا ثلاث ليالي وبوسط كومة زلوم وأبوج بيوم الثالث أجه ومتوقع ومتقين مأخذينج يعني صعبه عليه و؏ رجولته يأخذج ويرجعج وياه الافضل يوافق على قرارتتنا ما ننطيج اله وهو وافق على زواجج من اشهاب وأنتِ بالواقع بين أهلج وناسج ميته حالج حال بنت عمج 

ـ شتحجي أنت 

ـ حجيت اللي ما حاجه الج زلمتج المصون أشهاب وهسه فهمتي هو ليش زين وياج والعدو اللدود والحمل المطيع وياج لن شافق عليج مو عشكاً بيچ يالمدمغه 

نمارق ـ مشه وعافني بقيت متخشبه بمكاني اجتني الجمده معقوله بابا يسويها عباله اغتصبوني بلحظتها وما رجعني وياه لن تعتبر شغلة شرف لهل الدرجه رخيصه بنظرك بابا وتخليت عني وحسبتني حالي من حال هاجر 

يعني ماكو فرق بيني وبين هاجر بس الفرق هاجر خلصت واني دفعت الثمن وكعت بيها وما راح اطلع منها للموووت

" فزيت ؏ صوته رفعت رأسي واكف بعد مسافه يباوعلي

إشهاب ـ شموكفج اهناك يلة تعالي 

نمارق ـ جايه مشيت ناحيته دخل الغرفه بقيت هادئه يباوعلي ومركز نظراته ناحيتي يحاول يفهم شبيه واني اشكال الافكار ترطن برأسسي واولهم هما مستحيل يكذبون عليه يردوني اتقبلهم واتقبل عيشتهم ناس سفله وبرقبتهم دم عمي مستحيل يتخلى عني حناش يكذب وكلهم كذابيين اكيد هدودوا ويجي يوم واحاسبهم كلهم على كل اذى سببوا اليه استغفرالله ربي واتوب اليك لعبوا بعقلي لعب. 

اهليييييييييي شلون اصدك يتخلون عنييييي ما هما تخلوت عنج وخلاص ليش باقيه تنطينهم اعذار وحجج

            

              

                    

نمارق ـ بقيت يومين هادئه حتى من الغرفه ما اطلع واكلي قليل دايخه بزماني حتى لو ارجع الهم شرجع وبطني طفل وين اودي منو يستقبلني اكيد يرجعوني لرجلي عشتوا  

إشهاب ـ كومي جيبلنا لكمه نأكلها 

نمارق ـ ما جاوبته كمت ولزمني من ايدي

ـ شبيج صارلج يومين ذابتها على الساكت شصايرلچ 

ـ عوفنيي مالي خلك الك عوف ايدي 

ـ أعوفج بس اريدچ تأكلين وتغذين نفسچ لاتنسين بطنج روح وتريد منج مدارات 

ـ لاتغصبني ﻋلى شيء مو كيفك 

ـ أنتِ شنو من بشر ما عندچ أحساس رحمه ماكو بگلبچ 

ـ خليت الأحساس والرحمه الك مو شفتك شكثر رحيم وياي عوفنيي وفكني منك لخاطر الله ، دفعته ومشيت رحت المطبخ لكيتهن مجموعات ويسولفن عبرتهن وبديت ارتب الأكل وخليت الجاي ؏ النار، صاحت بيهن عسله الحيه 

عسله ـ وينجن كلجن منخمدات بهل المطبخ أثيله امشي لحكي حمواتج للكاع ساعديهن وحدتجن بكد الثور بس للعلف والفراش مالت وجوهجن وبلت 

أثيله ـ ﻋـلى أمرج عمه تأمرين هسه اروحن للكاع سراب تجين وياي 

سراب ـ مو نوبتي انه باجرر اروحن روحي أنتِ انه ابالي سالفه خاشه بمخي اريدن اشوفن تاليها شلون. 

نمارق ـ كالت كلمتها وضلت مركزه بوجهي طلعن وهي ضلت واجت يمي قبل لا اشييل الصينيه وكفت بطريقي 

سراب ـ شعندج ويه حناش ليش هيج ماشي على مايج ولا فواكاها يسمعج ويحاجيج وأنتِ عمج جتال اخوه 

نمارق ـ شعندي قابل وياه ترى حسبة اخوي وحناش خوش زلمه واخو خيته مو مثلكم همج لسانكم متبري منكم وايدكم والضرب مشيت ولزمت ايدي 

ـ اذا صرت وياج وساعدتج تخلين حناش بس الي !! 

ـ بس الچ ليش هو مو زلمتج بعد شكوو 

ًـ زلمتي بس بالاسم مزاعلني من زمان ما يجيني لغرفتي 

ـ هااا واني شكوو 

ـ انه لاحظت حناش يحترمج ويسمعج وأنتِ حياله وتكدرين تسايسي مو مثلي اخافن منه خوفة الحيه 

ـ اي وشبسرعه امنتي بيه وحجيتلي 

ـ ما تكدرين تغدريني ما عندج احد يساندج ولا احد يصدكج واذا سويتي وياي معروف اكون من جانبج 

ـ ما اريد احد من جانبي اني لوحدي ادبر نفسي وأنتِ حيري بمشكلتج اني مو حلال مشاكل مشكلتي ما لايكتلها حل انوب احير بيچ غير بطرانه ؏ وكتج،

"عفتها وحسيتها ضاجت بعدين صفنت عليها يمكن تكون فعلاً محتاجه احد يساعدها وصعبه عليها بين ضرايرها زلمتها ما يحاجيها ولا يتقرب الها اني ليش هيج حاجيتها شبيه صايره ما انجرع وصايره انكس من اطباعهن وكلبي شوي شوي تنعدم الرحمه داخله يا خوفي ينطبق المثل عليه من عاشر قوم اربعين يوماً اصبح منهم واني هيج صرت منهم وبيهم وما اختلف عنهم وعن اطباعهم لا يا نمارق خليج نفس ما أنتِ لاتخلين الوكت وأطباع البشر تلبس بيج وتغيرج عن اصلج اوففف يا وكتي الرحت وبعد ما تعاود على نمارق 

            

              

                    

" مرت الايام وسراب ملاحكتني وتحاول وياي بس ما اعرف شبيه رفعت خشمي عليها وسعاد تكفخ بيه عرفت اساس السالفه شنو هي تجاهلتها اخاف انحط بمواقف مالي بيها شلي بيهن ضراير بينهم رجلهن واحد وهو اعرف بيهن 

" طول هالفترة المرت الحمل متعبني بس متحمله وساكته وما كايله لاحد رغم حاسه بيهن شاكات عيونهن تناظر بطني ويذبن كلام بس متجاهله مالي خلكهن على ساعه يجفصن بطني ويطلعنه من خشمي 

"ونفس الوقت اكو اكلات اشتهيها واغلس عنها منو يجيبلي هو ما يجي غير الليل يجيبه الظهر على كد الغده ويطلع شغلهم هواي بس زلم متكفلين بي نسوانهم حدهن بس للخضر والحشيش والباقي على الزلم اللي عرفته عيشتهم على الزرع والكيعان ما عدهم مصدر عيشه غير الزراعه والفلاحه والحلال يشترون ويبيعون يعني هاي حياة العرب .

"أصفن وصفنتي تطول واتمنى اكعد من حلم لن بعمري وحياتي ما جنت متوقعه اصير منهم وبيهم لا والقهر راح يصيرلي طفل منهم شلون هم شلون اجيبه لهيج واقع خايس وتعبني نفسياً وع ساعه احرك روحي واحركهم كارهتهم كلهم وكارهه كلشي يخصهم كلبي ينثر دم عليهم وبكلبي الف غصه على اهلي وخذلانهم ما اعرف الحقيقه وين منو الصادق بيهم ومن الكاذب هما لو اهلي بالحالتين كارهه الطرفين وباقيه لوحدي بهل الساحه وبطني طفل كاسرلي ظهري ومربطني وزايد الهم فوك همي وقهري تحملت بي غصب سوده بوجهك يا إشهاب الله يصخم وجهك ساعة الحبلتني بطفلك . 

" جنت كاعده باب غرفتي وصافنه وحيل ضايجه من وضعي نفسي كوه متحملتها وبس احد يحاجيني تنزل دموعي رغبه بالبجي تارستني ترس ، انفتح الباب مصلح فتح ودخل حناش بالمكينه تركتر محملين بيها حشيش ودخلوا اشهاب ومناف وراهم بيدهم الكرك طبكوهن بصف الحايط صعدوا ينزلون الحشيش بالكاع واجن نسوانهم يشيلن ويودن للحلال وصكبان وكف على رووسهم ويتأمر عليهم كلهم وحناش واكف بصفه ويكفخ بيهن وابوه يحجي عليه رفعت رأسي شفت اشهاب يأشرلي ادخل داخل تجاهلته وهو يهز برأسه عليه ايي شبيك تطلع حتى الروح بقيت على وكفتي وخلصن وعبروا من يمنا وحناش رفع ايده وسلم ومصلح يكوله 

مصلح ـ شكووو تسلم على هاي وجه البومه فد وحده سمانيه كلبي أبداً ما يرتاح الها 

حناش ـ امش امش مو وكت سوالفك خلهن غير وكت 

وبعدين الحرمه ما شايفين منها شيء احتمال تطلع بنت اوادم 

مصلح ـ ما ظنتي 

نمارق ـ عبروا وراهم اجه اشهاب اخذني للغرفه وركع الباب شبيك جايني محمل 

اشهاب ـ عاجبج أخواني كل اثنين يسولفون بيج ليش ما تركدين بكاعج وتنجبين بغرفتج واحترمي نفسج يا حرمه

ـ كااااافي عاد يسمعك يكول كاعده بالشارع ترى بنص البيت واباوعلهم اهلك واخوانك مو غربه وين اولي هااا كولي وين اولي ترة طكت روحي من الوضع ومنك ومن العيشه بس ساكته لاتخليني اكتل روحي وابليك جوز مني ما الك شغل بيه 

            

              

                    

" عفته كعدت بالزوايه بصف الشباك وبجيت تعبت محد حاس بيه محد يريدني محد طايق وجودي وانت عبالك مرتاحه شمدريك حاير بشغلك واهلك 

ـ حقج عليه خلاص انسي السالفه لاتضوجين. 

ـ ما جاوبته خله ومشه سبح وصله وراح يم اهله علني عل واحد عديم مسؤوليه راح يصيرله طفل وهو ضامه عنهم وساكت ما اعرف شمنتظر ورطني وياه وشال خطية هالطفل ما اعرف شنو منتظره من حياة الكل ناثر الشر لامه عاد هو شلون ومنو يتقبله وياهو اليحبه 

" فتحت الشباك وتالي كمت طلعت وراه لكيت حناش كاعد لوحده ولاحظت بيده حيه يمكن مريضه رفع رأسه وضل مركز بوجهي نزلت دموعي بدون سبب 

حناش ـ منو وياج ليش تبجين 

نمارق ـ محد وما بيه شي اني صايره ما اتحمل ودمعتي رخصانه ومشتاقه لاهلي واحس روحي ضايعه بوسطكم 

ـ أهلچ لو مني ومنج ذكر ما اذكرهم خيولون 

ـ مهما يكون يبقون أهل واني مكروهه بينكم منو اليه غيرهم يضلون اهلي 

ـ صيري ادامي وحفظي ماي وجهج وكصري حسج ياهو الما يحبج لاتخلين رأسج برأس احد خلج برويحتج 

ـ حناش 

ـ هاا خويه 

ـ أنت ليش تحاجيني واحسك ما حاقد عليه مثل اهلك 

ـ بس لسان فارغه شتسوين يعني 

ـ هيج تشوفني 

ـ الله يسهل الج 

ـ تسلم صدك نسوانك ليش ماتعدل بينهن خطيه والله خزرني بنظراته وعيونه حسيت سؤالي جريء مو بمحله 

ـ وأنتِ شكوو بنسواني شلچ دخل أشوفج أخذتي ميانه زايد ودستي بالسالفه لجعبها 

ـ اعتذر بس وحده منهن انقهرت عليه وحبيت اكون واسطه خير بينكم 

ـ هالخير منج ما اريدنه وتخربين عقولهن عليه هنا بدون شيء طكه ونص وبالكوه جارعهن ما ناقصج 

ـ لا اطمئن أني واسطه خير ان شاء الله ونسوانك كلهن عرفت اطباعهن وحفظتهن وحجيت هيج لن والله انقهرت عليها هي صح وكحه وما تنجرع بس تضل مرتك وانت اعرف بيهن 

ـ يلة عاودي لخرابتج الدنيا ليل 

ـ تمام مشيت وطلع أشهاب من المضيف باوعلي رجع باوع لحناش ملتهي بالحية مالته نفض ايده وراح يغسل 

دخلت الغرفه واندك الباب منو 

سراب ـ أنه جبتلج العشه شنو ما جوعانه !! 

نمارق ـ فتحت الباب جايبتلي العشه شعجب مو منچ 

ـ شبيج فواكاها يعني شفتج ما اجيتي اخذتي عشاج كلت اخذه بطريقي يلة خذي من ايدي وعليج بالف عافيه 

ـ تسلمين مشت صحت وراها شكراً سراب ابتسمت ومشت مستعجله وحناش اجه من ناحيه الحلال شافهاا من جابتلي العشه باوعلي وكال 

            

              

                    

حناش ـ هسه عرفت رباط السالفه اثاريج مو هينه 

نمارق ـ ما جاوبته ودخلت الغرفه وبديت اكل ودخل اشهاب توقعته يحجي كالعاده ويحاسبني لن حجيت ويه اخوه بس صدمني ضل ساكت يمكن مل من تعامل وياي وعرف اطباعي ماكو فايده يضل ساكت احسن اله 

" خلصت اخذت الصينيه وعفته متمدد وصلت المطبخ لكيتهن يغسلن مواعين ويصبن الجاي كعدت على صفحه غسلت مواعيني ولاحظت سراب ما موجوده ابتسمت وديان حسيتها ضايجه واني اصفط المواعين اسمعها تحجي 

وديان ـ اليوم ليلتي ليش صاح سراب وراح لغرفتها وبعدين هو مو ما يحاجيها انه اعرف منو فر عقله اخذ ليلتي 

أثيله ـ خوما تموتين اليوم، وخطيه بلكي كلبه حن عليها شبيج انكلبت خلقتج عود باجر انطيج ليلتي بس لاتنجلطين 

ـ ما قاهرني حناش بكثر ما قاهرتني فد وحده منجصه على الطرفين 

ـ احجي عدل ولاتلوصين بحجايتج خوش 

ـ وأنتِ لا ادافعين الها شو اشوفج صرتي وياها حالج من حال سعاد وسراب كمتن تخافن تتراجفن منها لن هي كريبه من حناش وتفر عقله باصابعها اهمداجهن من بين النسوان اي والله بسيطه انه اعرفن شغلي عدل وياها واخلجن تردن تمشن عدل 

ـ ما منج الرجا على كولة أشهاب 

ـ أشهاب هو ماكو ادامي بهل البيت غيره 

ـ انجبي احسن واحجي عدل، اكوم اولي لخرابتي ولا اضل مكابتلج ومكابله جهرتج الزفره 

نمارق ـ أثيله مشت ولحكتها سعاد بس وديان ضلت متخصره تباوعلي بالشر واجت رسل وكملت العصابه خلصت ومشيت واني منطيتهن ظهري ما احس الا ظفريتي راحت بين ايديهن وانسحبت بالكاع عوفنيييييي

قبل لا اكمل صرختيييييي صاحت رسل 

رسل ـ عبالج ثوله ومدمغه ما نعرفج ما نكشفج ام البلاوي حامل وساكته وضامته عنه جايبه خنزير لهل البيت والله الا اخليج تزوعينه بنت ابليس عاونيني وديان خل نموته ونفتك منه ومن امه فرد مره 

نمارق ـ يضربن بيه واحاول اخلص روحي من بينهن بس هنا ضخمات حيل وحدتهن بكد الثور وشفت امهن عسله واكفه وتفرج وتباوعلي بششماته عرفت وديان هي اللي كالت لن الوحيده جانت شاكه بيه حامل واحتمال أشهاب كال الها 

" انسحبت من ايديهن سعاد جرتني منهن وصوت حناش ترس المطبخ تقرب ضرب وديان كف وكعها بالكاع 

حناش ـ شنو هالهرج والمهزله ما تجنن عقل امشي انكلعي عن وجهي لا اشوه خلقتج السكط امشيييي 

عسله ـ وليشش محترك دمك ليكون ادافع لهل الحيه خلهن عاشت ايدهن وجعلها بالموت هي والبطنها 

نمارق ـ من كالت كلامها باوعلي عرف اني حامل خفت يجفص بطني لن مره هدد اشهاب اذا حملت يقتله لميت نفسي وحضنت بطني. بخوف باوع لسعاد وكال الها 

            

              

                    

حناش ـ اخذيها لخرابتها وعاودي بساع 

نمارق ـ كومتني من الكاع واستندت عليها لحد ما وصلتني الغرفه اشهاب نايم نومتني بفراشي 

سعاد ـ الله يهديج لو تسمعين الكلام جان ما هذا حالج 

نمارق ـ ليش ما تكولين هالحجاره النايم يتحرك ويشوفلي حل عاجبه الوضع وكاعد وساكت وفرحان ضام الطفل عن اهله كل مصايبي من هالحجاره النايم مثل الصنم 

سعاد ـ سكتييي يمعوده رجعتي على هالمسكين يسمعج يكول يملك مالية العراق هو حافي منتف عايش بينهم انكس من حالج محد يريده بس ابوه عافته امه بوسطهم ولت الله يعينه 

نامي نامي وربج يحلها تريحيي هسه وضبي لسانج وهذا شغلي الحرمه ما تكسب زلمتها طول عمرها تضل رعنه والدنيا تكفخ بيها من كل صوب وزلمتج خوش زلمه والله ذهب صافي 

ـ دخيلج على هاالذهب المزنجر تأفتت وهزت رأسها ومشت وهو انكلب على الجهه الثانيه ما يدري بالدنيا شبيها ولا يدري انكتلت والا شوي ابنه مات وخلصت منه 

بقيت صافنه عليه تالي بعدت نظري عنه وما تعمقت بنظراتي ما اريد انغوي ولا انجر اله مستحيل اتقبله 

" نايمه بفراشي بعد مسافه قليله عنه وحسيت بي ما نايم لن بس يتكلب وما مرتاح بنومته ردت اصيح بي تالي تمالكت اعصابي وهدأت ، بالكوة غفيت ما اعرف شكثر مر وقت حسيت بي يبوس بيه وحاضني ومنومني بحضنه ويمسح على وجهي وايديه خشنات احس جرح وجهي تأفتت بمللل عفيه وخر ترة جرحت وجهي 

أشهاب ـ كعدتج 

نمارق ـ لا متشوفني نايمه انطيته ظهري 

ـ ليش هيج تسوين وكل مره اتقربلج تحسسيني مغتصبج

ـ هو كذلك تغتصبني لن غصب عني وأنت ولا ابالك تقربلي رغم اني ما اريد وكوه عليه وتستلذذ يإذيتي ونفوري منك

ـ ترى أنتِ حرمتي وأخذتج بالحلال يمت تجوزين من هالطبع وتقبلين الأمر الواقع نضل هيج انه وياج ما يصير يا بويه تعذبيني وتعذبين نفسج 

ـ ما جابرتك انت عاجبك الوضع 

ـ نامي نامي 

ـ هذا الشاطر بي تتهرب من اقل حجايه احجيها وياك 

ـ شسويلج يعني 

ـ لاتسوي شيء بس خليك بعيد عني لاتتقربلي رجاءاً

ـ يجرالج 

ـ نشوف ما رد عليه ابتعد ونام بفراشه فز كلبي وحسيت روحي حقيره ليش هيج حاجيته تالي نفضت العطف عليه وكملت نومتي متهربه من كلشييي 

" مرت أشهر وبطني كبرت ولادتي قربت وعلاقتي بحناش ونسوانه تطورت وصار يجيبلي حلويات مثل ما يجيب لنسوانه مثل الاخ حنون على اخته ونسوانه كامن يحسبن اليه الف حساب واي مشكله تصير يجن عليه اني احلها الهن وهذا الشيء خلاني ارفع خشمي بالزايد واتغيير مع الوكت ومع اشهاب صار يكولي صرتي حالج حالهم ما تشبهين نمارق تجاهلت كلامه وكملت عيشتي بوسطهم نوع ما تأقلمت ويه الوضع رغم عدوات رسل اليه وتوعدلي بالشر خاصه بعد ما شافت نسوان حناش قريبات مني خفت منها تسويلي سالفه وفعلاً ما عدت على خير . 

            

              

                    

" جنت راجعه من يمهن بيدي جيس ملابس داخليات من سعاد مشتريتهن اليه فرحانه بيهن دخلت الغرفه لكيت اشهاب وجهه دم ويفتر بالغرفه اول ما دخلت كااال 

أشهاب ـ شبعتي سوالف ليل بنهار مكابله حناش ونسوانه لو ساحرتلج هم مو هيج 

نمارق ـ عفواً شقصدك 

ـ ليش الا عندي قصد شمكعدج يعز الظهريات يممهم ما تكولين عندي زلمه يريد لكمه يتسمم بيها وجع اليوجعه 

ـ ترى جنت يم نسوان أخوك مو يم الغرب عيب عليك تشك 

ـ من كايلج شاك عقلج المتبن شسويله اكو رجاااال يشك بحرمته يا دماغ سززز 

ـ والله كول لنفسك حجيك ما اعرف شلونه تحجي عامي شامي ومدري منو معبي راسك عليه واستلمتني رزايل وصوتك شايل البيت عبالك جنت بمكان مشبوهه

ـ احجيييي عدل لا اكسر سنونج واترس حلكج بيهن حجايتي مابيها شيء بس كولي أنتِ ما تتحملين تسمعين حجايه من حجايتي عبالك اصب عليج جمره مو حجايه شايفتني ناهب حلال ابوج من طركاعه طاحت على بيت الخلفوج حصره ما اجاحيج تأكليني بكشوري ميلي عن وجهي لا بارك الله بيج 

ـ دفعني بقوة وأول مره يقسى هيج وكعت وكعه قوي و؏ ظهري مباشرةً تأذيت حيل واحس ظهري انقسم نصين صرخت يمااااااااا راح أموووووت 

ـ وموتتهم 

ـ عافني ومشه واني لازمه ظهري الوجع يذبح الله لايوفقك كسر ظهري والله الله يكسرك ، بالكوة سحبت نفسي شمرت روحي على الفرش تمددت والوجع ياكل بيه ظهري طك بقيت متمدده بحاولي ساعه اون من ظهري شوي شوي صار عندي وجع بطني وزاد وزاد اكثر واكثر احس بطني راح تنفجر انفخت بشكل رهيب وصرختت لن فوك طاقتي ما عاد اتحمل 

"يمااااااا لحكيلييييييي راح اموووووووت يمااااااا وينج 

يمااااااا الوب واصرخ مثل الطفله واريد أمي وبس وينها امي وينها ماكو امج يا نمارق 

" محد وصلني والدم نزل من رجليه بجيت بقهررر موقف للموت ما انساه طفله كلشي ما اعرف واصرخ والخوف ساكن كلبي صرخت سعااااااااد مالي غيرج رااااااح امووت

" انفتح الباب واجتني خطيه تخبلت من شافتني وراها رحمه 

سعاد ـ ولج هاي تولد يا مسكينه طفلج نازل ركضي صيحي اشهااااااب بساااااع 

نمارق ـ رحمه راحت تصيحه واني الوب من الوجع لبستني ومسحتلي واجه اشهاب باوعلي جان مامصدك عصر جف ايده قوي ومشه شغل السياره سندتني سعاد صعدتني السياره واني مخليه طرف الشال بحلكي وكاتمه صوتي تمنيت سعاد تجي وياي بس محد يخليها شغلهاوطلعنا والتراب يهف ورانا واني من الوجع كمت ارافس برجليه وهو ساكت بس يسوق بسرعته وصلنا بيت من طين نزل قبلي يدك الباب طلعت اله مره جبيره شوي واجه شالني جلبت بي وكلتله اذا متت لاتسامحني 

اشهاب ـ ما تموتين عمرج أطول من عمري تموتنيني وأنتِ عايشه عمرين  

نمارق ـ دخلني الغرفه وطلع واجت المره واني من شفتها الوجع زاد وتخبلت بالزايد 

ـ كولي يالله يمه هسه تولدين دامج نزفتي ولادتج قربت اكيد بيج

                الفصل الثالث عشر من هنا 

لمتابعة باقي الرواية زوروا قناتنا على التليجرام من هنا 

بدل ماتدور وتبحث علي الروايات خليها علي تليفونك وحمل تطبيقنا

تعديل المقال