رواية فصيلة دمشق الفصل الثاني عشر 12 بقلم احمد

 رواية فصيلة دمشق الفصل الثاني عشر 12 بقلم احمد 

كمت اخذت ملابس ودخلت للحمام اخذتلي دوش وطلعت مشطت شعري وقنعت نفسي انو هالشي هذا مو بس الي لعادل هم واخذت قراني وبلشت اقرا 

ماعرف شكد مر وقت واني اقرا بس الي اعرفو انو جنت ساندة جسمي عالتخت وغفيت اثناء قرائتي للقران وكعدت على صوت ماما 

جانت دا تدخل الغراض وما تدري بس نايمة فزيت وباوعتلها جانت جايبة غراض هواي ملابس وعطورات واحذية وكلشي تحتاجو البنت 

سارة.. تعالي شوفي شنو جبتلج 

ميرا.. ما يحتاج اشوفهن مقتنعة بذوقج اريد اروح اتزضى علمود اصلي 

سارة.. مو جنتي تقرين قران 

ميرا.. لا جنت غافية بدون مادري بنفسي وكعدت على صوت فتحة الباب 

سارة.. تمام لعد روحي توضي وبعدين شوفيهن 

ميرا.. تمام 

رحت للحمام توضيت وكملت وباوعت لوجهي بالمراية جان اكو شوية سواد تحت عيوني لان من يوم الحادثة ما ارتاحيت نهائيا 

كلت بكلبي شلون تقنعيني يا ماما وانتي نفسج مو مقتنعة بروحتي وتعرفين كلش زين لا الغراض يفيدني ولا فلوس الدنيا كلها تفيدني بعد 

عادل يستاهل التضحية مثل ما هو ضحى علمودي بس شلون اسيطر عالخوف الي بكلبي ومنو ينقذني اذا اذوني 

طلعت من الحمام جانت ماما نازلة صليت المغرب ونزلت تحت جانت تحط العشى الي جابوه من المطعم علمود نتعشى 

بس محد بينا اكل كلنا مالنا نفس فعفتهم وصعدت لغرفتي مرة ثانية وصرت اكلب بالغراض الي جايبتهن وياها الي 

انتبهت انو جايبتلي مكياج ومو اي مكياج هم ابتسمت وكلت مو تكولين مو زين علي هسا انتي جابتلي بنفسج 

بس صدك ذني الملابس خلي يكفني سنتين ثلاثة اربعة بس بعدها راح احتاج معقولة يجيبولي لو لا بس اكيد يجيبولي قابل ابقى بدون ملابس 

بس يا خوفي انهم ينطوني ملابسهم القديمة علمود يشترون لنفسهم جديد يووووه مجرد التفكير لعبت نفسي الله لا يكولها 

يلا المكتوب ما منو مهروب وراح اروح فصلية شئت ام ابيت فلذلك خلي اتقبل الموضوع واتوكل على الله وهو اكيد راح يحميني 

اجت ماما حطت الغراض كلهن بالجنط واني بس اراقبها ما ساعدتها ومبين عليها الحزن بس شتسوي قابل ما بيدها شي 

وبنفس الوقت ماتريدني اروح واني ناقصني شي علمود لا يعايروني هناك او احتاج واطلب منهم لان احتمال جبير ما ينطوني 

حطتلي الملابس بجنطتين كبار ترستهن ترس بحيث كوة يلا تسكرن والاحذية لان ياخذن مساحة جبيرة بجنطة لحالهن 

والجنطة الاخيرة حطت بيها العطور والمكياج والنواعم مثل الطوقات وغيرهن وجانت جايبة صندوق صغيرة 

حطت بيه الذهب الي جانت تشتريلياه بسوريا وحطت وياهن فلوس بس ماعرف شكد بالضبط وحطت الصندوق بالجنطة وسكرتها 

سارة.. شوفي ميرا هسا ذني الجنط بيهن كلشي تحتاجيه حتى ذهبج وفلوس موجودات بيهن من توصلين هناك حافظي عليهن 

كلهن بيهن قفول وامسكي ذني المفاتيح بقيهن يمج علمود محد يفتحهن بدون علمج وحطيهن بغرفتج فورا من تروحين 

ميرا.. اريد خمار 

سارة.. باستغراب .. ليش 

ميرا.. هيج اريد الخمار الي لبستو من اجينا من سوريا 

سارة.. بس فهميني ليش 

ميرا.. ماعرف بس اريدو 

سارة.. تمام تريدينو هسا 

ميرا.. لا قبل ما اروح 

سارة.. تمام باجر اجهزو الج قبل ما تروحين 

ميرا.. كولي لعادل لا يزعل لان رحت فصلية 

سارة.. والله اذا عرف الا يتخبل علينا 

ميرا.. كليلو ميرا تكول لا يزعل والي سويتو ما يوفي حقو علي وتضحياتو علمودي 

سارة.. وشلون تريدينو يقتنع بهالكلام 

ميرا.. ماعرف حتى اني مو مقتنعة 

نزلن دموعها وسحبت راسي لحضنها وحضنتها كل قوتي بس ما بجيت بقيت حاضنتها واحس دفو حضنها ينطيني امان 

ماعرف شكد مر وقت واني حاضنتها بس بالاخير بلشت تخف حضنتي الها وبديت اسلم نفسي للنوم شوية شوية الى ان نمت 

بقيت الليل كلو بين النايمة والكاعدة بسبب القلق حتى واني نايمة افكر بالي ممكن يصير من اروحلهم وشلون راح يستقبلوني 

كعدت الصبح راسي صاير طبل بس احس معدتي تحركني من الجوع وبنفس الوقت مو مشتهية اكل فصليت ونزلت بس شربت ماي 

كالت ماما راح يجي الشيخ يعقدلج اليوم ويجن جدتج وبنت عمج يودعنج كلتلها تمام كالت روحي جهزي نفسج هسا الحكج اني 

رجعت للغرفة طلعت دشداشة بناتية لونها احمر وتذكرت ان هم عندهم عزا يعني مايصير البس هيج لون فطلعتلي وحدة سودة 

ورحت للحمام اخذتلي دوش ورجعت لكيت ماما تنتظرني بالغرفة وبايدها المشط وزيت الشعر ويمها مقص علمود ترتب شعري 

ما كلت كلشي تركت امري كلو بايدها واعتقد الي مختلطة ويا البنات السوريات تعرف شغلهن بالمكياج والتسريحات شكد حلو 

يمكن لو رايحة لصالون ما ترتبني هيج قصت بس اطارف شعري ومن كدام رفعتو وبقت بس الكذلة من اليمين واليسار نازلة على خدودي 

بالنسبة للمكياج بوقتها ما جنت اعرف انواعو بس الي اعرفو حطتلي نوع واحد على وجهي علمود ما يبين السواد الي تحت عيوني 

ولان ما تكدر تحطلي حمرة حطت بس مرطب شفايف ولان المكياج خفيف حيل الي يشوفني يكول مو حاطة مكياج نهائيا 

الي عجبني لون شفايفي بالمرطب صار لونهن وردي خفيف وكلش حلوات وبين ما خلصت ماما سمعنا صوت جدتي دا تبجي وصوتها يقرب 

كالتلي ماما لا تبجين خليج قوية كلتلها تمام ودخلت جدتي وفتحتلي حضنها رحت حضنتها وخطية تبوس بي وتبجي 

وتلوم بابا لان وافق ينطيني فصلية كوة كدرنا نهديها واجن البنات وامهن هم سلمن علي وكلهن جانن يبجن علي 

اني ماعرف شلون كدرت انفذ كلام ماما واسيطر على دموعي كعدت وياهن وجنت اكوللهن اني ما يهمني بس سلامة عادل 

واذا اروح فصلية ما يهمني بس بالحقيقة بالعكس يهمني سلامة عادل بس اتمنى لو يصير اي شي وما اروح فصلية 

شوية واجت ماما كالت اجو واجى وياهم الشيخ بوية من كالت هيج اريد بس اتحرك ماكدر كأنما انشليت من الخوف والتوتر 

الله لا يعيش اي بنت الي عشتو اني لان من صدك شكد ما اوصف خوفي وتوتري ماكدر اوصفو كوة كدرت اوكف واتحرك 

ماما تعرفني خايفة ومتوترة فمسكت ايدي وصارت تطبطب عليها علمود تحسسني انو هي وياي ونزلتني وياها 

شوية وكالو والشيخ يريد يسمع موافقتها ورحت عند الباب واسمعو كال يا بنتي يا ميرا انتي موافقة عالزواج من صهيب 

اريد انطق ماكدر لاول مرة احس بشعور البنات الي جنت مو مقتنعة بسكوتهن بالمسلسلات من يريدن يحجن ومايكدرن 

جنت اباوع عالبنات وماما وجدتي وكأني اريدهن يجاوبن عني وماما تشاورني تكول كوليلو موافقة وهو يعيد بالكلام اكثر من مرة 

اخير شي ماعرف شلون كلت اي وكال تمام وبدال ما الي موجودات يفرحن بزواجي صارن يبجن وما تحملت وبجيت وياهن 

راحت ماما جابتلي الخمار ومسحت دموعي بكلينكس ولبستني الخمار ومن سألن كالت ماما هذا طلبها رغم اني مو مقتنعة بيه 

اجى سليم نزل الجنط ويمكن لو بنت جان شبع بواجي بس لان ولد ويكدر يسيطر على دموعو ما بجى بس واضح عليه الحزن 

ودعت البنات وامهن وجدتي وتركت ماما للاخير لان اريد اشبع من حضنها الي ما ينشبع منو بقيت حاضنتها وهي حاضنتني لحد ما كالو يلا يريدون يمشون 

لا اني اريد اعوف ماما ولا هي تريد تعوفني ولا الي موجودين مقتنعين بروحتي اخير شي اجى ببالي عادل وتخيلتو هسا كاعد بالسجن 

سحبت نفسي من حضن ماما وكلتلها سلميلي على عادل وهنا ماما انهارت كلش وكعت بالكاع وارتفع صوت بجيها 

شلون اوصفلكم شعوري من امشي وصوت ماما وراي ماعرف جنت احس بكل خطوة دا اكبر عمر كامل فوك عمري 

دا اتحول من بنت بربيع شبابها لعاجوز ارهقتها هاي الدنيا والضروف صار بوجهي سليم وسحبني لحضنو وحضني بكل قوتو 

جنت احس عظامي تريد تتكسر من قوة حضنتو بس رغم هاي جان اكو امان فضيع بحضنو واخير شي ما تحمل وصار يبجي 

وبعدها حضني نعمان نفس الحضن واخير واحد جان بابا ماعرف اودعو ولا اتجاهلو لان هو السبب بالي دا يصير وياي 

وكفت كدامي وجان خايف مني اي متأكدة من الي دا اكولو بابا الي بعمرو ما خاف من احد هسا خايف مني اني بنتو 

مسكت ايدو وبستها وهاي اول مرة بحياتي ابوس ايدو لان جنت اني اخاف اتقرب منو هسا صارت بالعكس وهو خاف مني 

تقربت يم باب الحوش وانداريت عليهم جانو كلهم يبجون نزلت الخمار على وجهي وكلت اللهم بك استعين وعليك توكلت 

طلعت من البيت جانو اكو زلم ثنين يم السيارة من شافوني طلعت ركبو جان واحد بيهم جبير بالعمر والثاني بحدود ال 30 سنة 

ركبت وياهم وصوت دكات كلبي واصل لاذاني واحسو دا يوجعني من قوة دكاتو خوف توتر قلق حتى انفاسي احسها انقطعت 

لمحت مصطفى من جام السيارة واكف بنهاية الفرع ويباوع للسيارة بغضب يمكن لو بايدو يفلش السيارة على الي بيها 

تقدم وصار كدامو ايمن ومنعو بس الي وياي ما شافوه لان ما يعرفوه وما منتبهين لوجودو ومن تحركت السيارة صار كدام حايط واختفى مصطفى 

الي وياي جانو ساكتين ما يحجون وجان الطريق كانو طريقي نحو الموت بقيت ساكتة بس بكلبي الاف الصرخات 

اخير شي وكفنا عند بيت يمو شوية سيارات نزلو هم واني بقيت بالسيارة وفزيت على دكة الجام واشرلي الي جان يسوق ان انزل 

نزلت ودخل كدامي وسمعت صوتو من كال دخلي داخل لا تبقين واكفة مثل الصنم تحركت بخطوات بطيئة واتجول بعيوني عالمكان من ورا الخمار 

من دخلت من الباب جان باب الاستقبال مفتوح وبيه زلم وشوية استعجلت علمود ما يشوفوني لان اخلاقي ما تسمحلي اتباطأ رغم الموقف 

دخلت من باب المطبخ جانن اكو بنات بالمطبخ دا يسون جاي وكهوة وقبل ما احجي اجى واحد من وراي وكال كملو الجاي بسرعة وطلع 

ميرا.. بصوت متقطع .. السلام عليكم 

اسراء.. عليكم السلام ورحمة الله وبركاتو هلا بيج عيني .. نادية اخذيها لغرفتها دا اسوي الجاي 

نادية.. شدخلني بيها بعدين عمتي تقرر مو احنا 

اسراء.. تعال لعد عند الجاي اني اخذها 

نادية.. تمام 

اسراء.. تعالي وياي 

ميرا.. رحت وياها اول شي دخلنا للصالة جان بيها نسوان وبالنص وحدة جبيرة بالعمر وشادة راسها بشال ومبين عليها الحزن 

اسراء.. عمة اجت البنت 

الحجية.. اخذيها من كدامي هالشيطانة لا اكوم احرك اهلها جايبينها الي مكبعة لان شيطانة مثلهم 

اسراء.. بصوت ناصي .. ارفعي الخمار 

ميرا.. رفعتو .. كوة كلت السلام عليكم 

الحجية.. دا اكول اكلعوها من كداميييييي 

اسراء.. تمام عمة .. تعالي وياي 

ميرا.. كوة حابسة دموعي من خوفي منها وتوتري من الاجواء وفوكها فشلتني وطردتني وحجت على اهلي كدام النسوان 

رحنا لغرفة فارغة مابيها بس فراش واحد حتى سلة ملابس مابيها كالت البنت ابقي هنا وانزعي الخمار بين ما نشوف شيكولون 

نزعت الخمار وكعدت عالفراش كلت بكلبي يا ساتر عيون المرة تخوف يمة هاي شلون راح ابقى عايشة وياها الا تموتني بنظراتها 

بس نظراتها هيج لعد تعاملها شلون من خوفي حتى نسيت توصيات امي هاي اذا اكوللها مرحبا ما تكول هلا تضربني راشدي 

بس ميخالف ميرا تحملي بلكي تتغير ويا الوقت ويكون تعاملها هذا لان هسا توفى ابنها اصبري ان الله مع الصابرين 

بقيت كاعدة شوية واجت اسراء جايبة وياها صينية صغيرة بيها اكل كالت تغدي وتعالي بالمطبخ علمود تشتغلين 

كلتلها تمام وما اكلت كلت هسا يكولون فوك ما قتلو ابننا جاية تاكل ببيتنا وما فكرت انو بالايام الجاية راح اكل غصب عني 

اخذت الصينية وياي ورحت للمطبخ جانن موجودات بنات يتغدن كالتلي اسراء راقبي الجاي ومبين من نظراتها انها مقهورة علي 

ماعرف اذا كان احساسي صحيح ولا لا بس هيج حسيت واستغربت انها ليش مقهورة علي ومنين تعرفني علمود تنقهر علي 

بقيت واكفة عند الجاي ومن استوى طفيت الطباخ ومن كملن غدا كومن المواعين عالمغسلة ووحدة منهن كالت اغسليهن 

بدون اي كلام عفت الطباخ ورحت للمغسلة وبلشت اغسل والمشكلة ان الاكل دسم فلازم انظفهن زين من الدهن 

وجانن اكثرهن صياني فافون ومعروف الفافون شكد يتعب بالغسيل ما خلصتهن الا اني ايديني منتهيات وملابسي تبللن 

ما لحكت افرح انو خلصتهن وانحطن كدامي جدرين كل واحد اكبر مني والي جابتهن كالت اغسليهن وافركيهن من الدخان الي صار عليهن 

جانن سود من السماد الي عليهن ولان ماكو مكان اغسلهن بيه اخذتهن على زاوية المطبخ لان اكو بالوعة قريبة وفركتهن فركة من هاي التمام 

من خلصتهن صارن يلمعن من نظفهن ومن خلصتهن جابو ستكانات وقواري الجاي وهم لازم اغسلهن اني والبقية كاعدات يحجن 

بس كل شوية وحدة منهن تجهز جاي او كهوة وترجع تكعد تحجي واني وكع براسي الغسيل الي مدا يخلص نهائيا 

قبل المغرب بلشن بالعشى وكمت كوة اتحرك منا باقية بدون اكل من ريوك البارحة ومن جهة اشتغلت الا هلكت 

لاحظت اسراء انو كلش تعبت كالت تعالي اكعدي هنا ارتاحي ردت وحدة منهن كالت عوفيها مدخلج بيها كالت ترا هم بشر على كيفكم عليها 

اخذتني من ايدي وكعدتني على كرسي وجابتلي ستكانة جاي ووياها خبزة كالت صبري نفسج بيهن بين ما يكمل العشى 

اسراء.. ايمتى اكلتي اخر مرة 

مبرا.. البارحة الصبح 

اسراء.. وشنو ناوية تعيشين بدون اكل 

ميرا.. ماعرف 

اسراء.. شوفي الي صار صار وماكو بعد رجعة فنصيحة اكلي وحاولي تبقين على حيلج لان بالوقت الحالي ما الج غير نفسج 

ميرا. تمام 

اكلت الخبزة ويا الجاي وبقيت كاعدة لحد ما كمل الغدا اول شي حطو للزلم وبعدهم النسوان واسراء كعدتني يمها علمود اكل 

بقية البنات مو عاجبهن كعدتي وياهن وكأني مخلوق ادنى منهن او فد وحدة بيها جرب ويباوعلي بنظرات احتقار 

بسبب نظراتهن وتصرفات حتى ما اشتهيت اكل بس جبرتني اسراء وكوة اكلتلي كم لكمة سندت نفسي بيهن وكمت 

بلست بغسل المواعين الي مدا يخلصن وكل ما اخلص من ماعون يجيني ثنين وكأنو دا يتعمدون يجيبون مواعين علمود يتعبوني 

بس من خلصت مواعين العشى صارن يجن بس الستكانات والصحون مالتهن والخواشيك وذني ما يتعبن عالسريع اخلصهن 

الساعة 10 خلصت بس من صدك انتهيت نهي اول مرة بحياتي اشتغل واتعب لهالدرجة هاي كالتلي اسراء روحي لغرفتج 

رحت لغرفتي لكيت الجنط موجودات بيها ومحطوطات بزاوية واكو بزاوية الغرفة الثانية باب صغير رحت اول شي فتحت الباب جان موجود حمام وتواليت مشترك 

ماعرف افرح لوجود الحمام لو اضوج لوجود التواليت لان ريحتو ممكن تعبر للغرفة وتصير ريحة الغرفة تلعب النفس 

رحت عالجنطة مالت الملابس فتحتها بالمفتاح الي انطتنياهن ماما وطلعتلي ملابس وفتحت الجنطة الثانية طلعت ليفة وصابون وشامبو 

الشامبو والبلسم والصابون ذني كلهن حطيتهن بالحمام لان ماكو فايدة من وجودهن بالجنطة واخذت الخوالي ورحت اخذتلي دوش 

طلعت من الحمام ومشطت شعري واول ما خلصت انفتح الباب ودخل الي جان يسوق السيارة وباوعلي بنظرات غضب 

جنت اريد اخذ الشال كال عوفيه وتقرب مني واني كل ذرة بجسمي ترجف من الخوف صار وراي وحط راسو بركبتي 

بعدت عنو وكلتلو عوفني مسكني بايدو الضخمة من ركبتي وكال منا ورايح انتي الخدامة مالتي واي اعتراض ادوس راسج بالقندرة 

كمل كلامو وسحبني بقوة عليه حاولت اخلص روحي بس جان اقوى مني بهواي اخير شي مسك الدشداشة وشكها على طولها 

             الفصل الثالث عشر من هنا 

لمتابعة باقي الرواية زوروا قناتنا على التليجرام من هنا 

بدل ماتدور وتبحث علي الروايات خليها علي تليفونك وحمل تطبيقنا

تعديل المقال