رواية عذابي الأزلي الفصل الحادي عشر 11 بقلم الزهيرية
الشبع في العين وليس في البطن
والغنى في النفس وليس في الجيب
والجمال في الروح وليس في الشكل
مينا/ اني ينطبق عليه الي يگول منين ما أخيطها تنفتگ يعني احنه مصطفى جاب الگلاده في سبيل عمتي وحمواتي يسكتن طلع موضوع العزومه مال آهلي وامي من عزمتني اني ومصطفى على الغده عمتي چانت واگفه اما امي ليش ما عزمت عمتي ما اعرف وبوقتها من دخلنه لصالة غير تحملت مسبه وغلط وفشار بس الله اليعلم بيها واني من صغيره ما ارد على احد
لهذا ظليت بس واگفه لا ابث ولا استلم وبس دموعي صب وبوقتها مصطفى چان يهدئ بعمتي ويبوس براسها ويگللها
مصطفى/ يمه اروحلچ فدوه اليوم اجيت وفرحان بعدني عريس جديد إذا على العزيمه اني اليوم الجمعه اخذ مينا لاهلها على الغده ومن نرجع العصر والقرآن وروح أبويه اخذچ آنتي والبنات على الكاظم (ع) وزورين واعزمچ على احسن مطعم هناك والله تعبان عبريها لخاطري
أم مصطفى/ شوف مصطفى إذا اني امك وتحبني مرتك بعد ما تروح لاهلها شلون تقبل امها لمرتك ما تقدر امك
مصطفى/ يمه دخيل الله ودخيلچ البنيه شلون ما اخذها لاهلها وين صاير هاي يمه خلي گلبچ چبير واني اكبر من هذا الشي
مينا/ والتفت عليه مصطفى شافني ابچي اجى اتقرب عليه بعد ما سحب كلينس من يم عمتي لان الباكيت الكلينس يمها ومسح دموعي وعمتي تخبلت ظلت تعيط وتلطم على وجهه
ام مصطفى/ يمه تعالي لحگيلي اني بعد ما حملت 9 شهور بأبني الچبير مصطفى تاليها كل همه يمسح دموع مرته روح يا مصطفى كون ما شوف ريحة الضنى من مرتك الحيه مينا
ومن دعت علينه مصطفى شگد چان هادئ تخبل وظل يعيط يا من يعيط ويا
مصطفى/ الله واكبر يعني شلون وحده ما عزمتچ على بيها خلي تولي گاعده تدعين على ابنچ ما يصير عنده طفل شوفوا إذا على كل شي صير مشكله اني اخذ مرتي واطلع اعزل بيها احسن من دوخة الراس
مينا / وبوقتها عمتي ظلت تدعي على امي وتگول
ام مصطفى/ان شاءالله يهجم بيت نويره ويخليها بحسرة حايط تگعد تنستر يمه وما تلگى
مينا / وحتى عگدت شالها على امي واني مصطفى سحبني من إيدي وصعدني فوگ واني كلشي ما حچيت وظليت گاعده على السرير وهو يروح ويرجع بالغرفه اخرها اجى گعد يمي وسحبني عليه بحيث راسي صار على صدره
مصطفى/ حبيبتي مينا اني اعرف صعبه عليچ يحچون على اهلچ بس هاي امي شسويلها يعني وخصوصاً انه اني الچبير مالتهم واترجاچ تتحمليهم لخاطري ادري صعب هذا الشي بس نسلم أمرنه لله وهو القادر على تغيرهم
مينا/ واني واحد يحچي حچاية حق مصطفى كلش زين ويايه وما ينطي بيه بس اهله من آول يوم هذا وضعهم ومصطفى ما عنده غير اخ واحد واسمه مرتضى وأخواته 3 الچبيره اسمها اعتماد وتجي بعد مصطفى وهاي مزوجه نوبتين وطلگت وكل زواج ما تستمر بي 6 اشهر وتطلگ والسبب أنه لسانها طويل وما تنحمل والسبب الثاني والاهم انه هي صاير بيها مرض قبل ما تزوج ومستأصلين عندها المبايض لهذا اي واحد من أزواجها من يعرف گبل يطلگها اما الوسطانية واسمها نغم مزوجه و 4 أطفال عدها والصغيره مخطوبه واسمها اطياف واكبر عاقبه بزواجي من مصطفى وحياتي في بيتهم چانت اعتماد حماتي
وآني في وقتها سالت مصطفى إذا چان راح يخليني اروح لاهلي
مصطفى/ آكيد حبيبتي معليچ بالحچي مال امي هسه تهدئ وتنسى شنو گالت لا تاخذين على حچيها يله كافي لا تبچين خشمچ وخدودچ صارن حمر
مينا/ بصراحه مصطفى اني ما دى ابچي بس لكون عمتي حچت على امي اني دى ابچي لكون جوعانه ومن الغده الى هسه كل شي ما اكلت
ومصطفى طگ من الضحك حتى عيونه دمعت من الضحك وگال مصطفى/ خرب بعقلچ شنو انتي بابا اني گلت اليوم مناحه للصبح هاي إذا رضت طلعت تبچي لكون جوعانه لا تنزلين هسه اروح اجيبلچ عشا ومن بره هم بس بين ما آروح وارجع اريد تحضرين نفسچ ملابس نوم واضافاتچ ولمساتچ زين حبيبتي
مينا/ وبدل مصطفى وراح واني كمت همزين اكو حمام فوگ اخذت ملابسي وسبحت واجيت للغرفه مكياج وعطر وملابس نوم وبعدني اباوع بخلقتي بالمرايه انفتحت الباب ودخلت اعتماد بصراحه اتفاجات بيها وظلت تفتر بالغرفه وتباوع عليه
اعتماد / حبي شو من وصلتي للبيت إلى هسه انتي معلگه بغرفتچ ونايمه بحضن رجلچ شنو طمعين بي بالفراش حبي شغل نويره يمنه لا سوي نزلي شوفي البيت شنو الشغل البي سوي عشا لو يم الماما چانت جايبتلچ طباخة
وبقيت بس ساكته واباوع عليها لان صدگ ما اعرف شنو اجاوبها وهي من شافتني بس ساكته اجتي عليه وجرتني من الروب ولكونه خفيف نشگ بيدها وهي تگلي / شنو انتي خرسه خاف عبالچ من سكتين راح نگعد عليچ فقيره لا حبي اني اعرف انتي دى تتمسكنين حتى تتمكنين
وبعدها دى تحچي ودخل مصطفى وهو شافها
مصطفى/شكو عموده جايه للغرفه ومن هسه اگلچ ما مسموح أي احد يوجه كلمة لمينا بأستثناء امي
وهي الظاهر كلام مصطفى چان غير متوقع عدها لهذا عافتنه ونزلت وبعدها بربع ساعه سمعنه عمتي تغلط على مصطفى وعليه وتدعي علينه ومصطفى فتح العلاگه ورتب الاكل وطلب مني اجي اگعد يمه وشگد حچت عمتي بس هو ما اهتم ابد
واكلنه وحتى جايبلي حلويات ويا وظلينه ناكل ونشوف مقاطع بموبايله وبعدها تقرب مني مثل اي زوجين وسبحنه ونمنه وچان صار الفجر من غفينه والساعه 9 الصبح عمتي دگت الباب من فتح الباب مصطفى طلبت منه انه خلاص بعد تنزل مينا اساعد البنات وانه هي راح تروح لسوگ ونزلت جوه
مصطفى/ گومي حبيبتي نزلي وياهم ساعديهم ومن تخلصين صعدي
ورجع هو نام واني بدلت ملابسي وغسلت وجهي ونزلت لگيت بس عمتي بالمطبخ بس ما راحت لسوگ طلعت جايه من السوگ وگعدت يمي بالمطبخ وبكربت كربه بس الله اليعلم بيها وگضتها عليه غسلي هذا ومسحي هذا لما خلصت اكثر شغل البيت وصارت حدود الساعه 1 ونص من گعدن حمواتي ومرتضى بالشغل ونغم وجهالها من الليل رايحه لبيت زوجها
اعتماد وأطياف هستوهن نزلن وعمتي طلبت مني اسوي ريوگ لان حمدلله همه كلها تنام وقت الفجر ويگعدون الظهر لهذا ريوگهم الظهر
وسويت الهن ريوگ ونزل مصطفى هم سويت الي واله ريوگ واكلنه وغسلت المواعين ومن دى اصعد صاحت عمتي عليه وين مينا منو يسوي غده
جاوبها مصطفى/ شنو وين ترى احنه مزوجين جديد واحتاج زوجتي يمي بالغرفه هاي من الصبح إلى هسه هي يمچ خلصت شغل البيت وذني نايمات شنو طالبتها بطلابه
وصعدني كدامه وبقت عمتي تحچي بس هو يغلس
مصطفى/ حبيبتي أني اجازتي خلصت ومن اليوم راح اروح لشغلي واني شغلي بالليل اطلع من الساعه 7 المغرب الى الساعه 5 الفجر يله اجي وبعد ما اوصيچ انه تكونين حذره وتاخذين بالچ من نفسچ واي احد يحچي وياچ سوي نفسچ ما سمعين واليوم ان شاءالله من اروح لشغلي اشتريلچ موبايل ويظل يمچ وحتى من اروح نبقى على تواصل
مينا/ وللمغرب راح مصطفى لشغله بس نفس الوضع مال اهله وچنت احس نفسي مخنوگه إلى ما اجى مصطفى وجابلي موبايل ومفعل بي خط ونت ومخلي رقمه ورقم امي وابويه فرحت بي كلش ومن انطى الي
مصطفى/ حبيبتي راح آنام والساعه 10 گعديني حتى اخذچ لاهلچ
ونام مصطفى واني ظليت اگلب بالموبايل وهاي چانت اول مره يصير عندي موبايل والساعه 9 سبحت وطلعت ملابس الي ولمصطفى وگعدته وهو هم سبح ونزلنه الساعه 10 ونص واحد إذا يذب الإبرة بالبيت يسمع صداها ماكو كل احد وطلعنه واخذ مصطفى تكسي وگبل لبيت اهلي ومن نزلت بالباب گلبي نشرح احس روحي مفارگتهم صار سنه والباب چان مسدود ودگيته وطلعتلي فرح
والله احس گلبي راح يطلع من صدري حضنتها وهي هم حضنتني وحده تبوس بالثانيه وبعدت عني وسلمت على مصطفى ودخلنه وچانت موجوده جوانا هم جايه وبالصاله بس أبويه وميمو وسلمت عليهم ورحت للمطبخ وامي دى تطبخ
وكالعاده الگعده كلها بالمطبخ وبدت السين والجيم والسوال الأهم شلونه مصطفى وياچ وحچيتلهم كل شي الصار وامي ظلت تحمد وتشكر ربها انه مصطفى زين ويايه
واثناء الكلام أنتبهت أنه جوانا بس ساكته وتحس القهر بوجهه وسألتها ميمو شلونه وياچ جوانا انتوا شوكت چانت الدخله مالتچ احنه بعد اسبوع من زواجنه يله صارت الدخله
جوانا/ كلها خيبتها السبت والأحد إلا جوانا خيبتها ما وردت على احد
ريان / من تكون مزوج عن طريق حب تكون تعلقك بشريك حياتك مو طبيعي تحب دائماً يكون يمك وتحب كل شي منه واني حبي لملاذ فاق حتى حبي لنفسي والله وبدون مبالغة لهذا بعد زواج 3 شهور وهي ما فارقتني صعبه عندي تبات يم اهلها وچنت اريد اي حجة في سبيل أرجعها حتى لو بنص الليل بس خربت خطتي كلها من گالت / اني حامل
بذيچ اللحظة حسيت گلبي راح يوگف هم احبها وهم حامل تخبلت عليها
ريان / والله ملاذ ما اگدر أبات الليل بدونچ خلي اجي هسه عليچ واخذچ أنوب حامل اموت ما انتظر للصبح
ملاذ / ياااا شبيك حبيبي ريان امي ما تقبل والله خليها حبيبي تعال ب 6 الصبح قبل ما تروح للدوام أخذني رجعني للبيت حتى الظهر من ترجع اني موجوده
ريان/ باچر ويه اذان الفجر اني يمچ حضري روحچ
ملاذ / اگلك حبيبي ترى اني اخذت 500 الف انطيتهن لامي لان تعرف بيها مريضه وتريد علاج واخواني يا دوب مكفين العيشة
ريان/ حبيبتي امي هي امچ انطيها بس المفروض امچ قابضه 500 إلف تگلي اخذ ملاذ وياك مو تعوفني انام وحدي وهي نايمه يم زوجها
ملاذ / عابتلك روح نام عندك دوام الصبح وابنك تعبني اريد انام
ريان / تركتها تروح تنام واني ذاك الليل ابد ما غمضلي جفن لما طلع الفجر ورحت عليهم وساعه ادگ بالباب يله طلعولي وطلعت عمتي من صار الدگ قوي على الباب وبصوت عالي
ام ملاذ / وجع وكسر بيدكم منو
ريان جاوبته / اني عمه جاي على ملاذ
وفتحت الباب وهي تگلي / ولطمه وگعت گلبي وشكو جاي بهذا الفجر شنو راح أطير ملاذ
ريان / وعمى بعينها خلتني واگف بالباب ودخلت وهي دردم عليه وره شويه طلعت ملاذ وهي تسحل بروحها ولابسه دشداشه ما اعرف مال منو سحبتها وصعدتها بالسياره وطلبت من امها تنطيني جنطتها وملابسها ودخلت جابتهن وهي تگلي خبال اي والله خبال
سلمت عليها وخليت غراض ملاذ بالسياره وصعدت شغلت سيارتي وطلعت لبيتنه
ملاذ / حبيبي انت صدگت شكو جاي بهذا الفجر ترى چنت دى اشاقه وياك
ريان / ولچ ملاذ بعد انسي لو اموت ما اخليچ تباتين يم اهلچ تنذكر وما تنعاد
وصلنه للبيت ومن دخلت السيارة للگراج ونزلنه اني ملاذ دخل كمال بسيارته هم الظاهر چان عنده خفارة بالمستشفى ونزل وفات من يمي ولا كانه يشوفني وراحت ملاذ صعدت فوگ واني رحت وره كمال وصل يم باب المطبخ من صحت عليه وگف باوع عليه وساكت
ريان / كمال اني حبيت اول شخص انت تعرف من فرحتي حبيت انت شاركني بفرحتي ملاذ حامل راح اصير اب وانت راح صير عم
كمال/ شوف ريان اني نصحتك قبل وراح ارجع انصحك مرة ثانية اخويه إذا عندك عقل اخذها وروح الي اي دكتوره ذني الما يخافن الله وخلي تنزل الطفل الحامل بي مرتك واحرص دائماً اني ما تخلي شي يربطك بملاذ ابد وهاي اني نصحتك وانت حر بس هذا الي في بطنها صدگ واعتقد بالله راح يصير نقمه عليك
ريان / وعافني ودخل وسد باب المطبخ بوجهي اتعجبت معقوله هذا كمال شنو هذا السواد البداخله يريدني اقتل ابني بيدي هنا تأكدت انه كمال حاقد عليه صعدت وره ملاذ لگيتها نايمه بستها من خدها وطلعت رحت لشغلي ولگيت احمد واني دائماً اروح لشغلي بدون ريوگ وما اگعد ملاذ سويلي ريوگ لان تسهر ويايه للفجر لهذا ما أتعبها بس احمد يجيب الريوگ ويا من البيت حتى ترمز الچاي يجيبه ورتب ريوگ وحتى صب اثنين چاي وصاحلي
ريان / الف رحمه ونور على والدك احمد والله لا عشا ولا ريوگ
احمد / ليش زوجتك وين شنو شغلها العرض واحد اني زوجتي يشهد ربي مداريتني مثل المي بالصينيه اگعد الحمام والملابس والريوك مجهزته واطلع وسد الباب ورايه وحتى ذب طاسة مي ورايه انصحك علم مرتك على طبعك لان إذا ما اخذت طبعك راح تتعب هوايه
ريان / يا ريت الدنيا كلها مثل مرتي وحچيت لأحمد كل الصار وحتى على موقف كمال
آحمد/ وامها بأي اساس تاخذ فلوس منك وانت شعليك والله اني صرت أشوف كمال على حق ريان اتمنى منك تعذرني
ريان / بس لو اعرف ليش كلكم عبالك متفقين على نفس الكلام بابا ترى ملاذ تحب أساعد امها شكو بيها
احمد / بكيفك إذا انت تحس الوضع طبيعي براحتك
ريان /وبوقتها نهيت الحديث ويه احمد وصرت اشوف الناس كلها ضدي ومن خلصت شغلي رجعت للبيت وشفت ملاذي چانت تتقيأ وهي شافتني غسلت واجتي بحضني حضنتها واني متعجب يعني الوضع طبيعي ليش الناس كلها تحرضني عليها ويشوفوها مو زينه
وللعصر آخذتها لدكتوره وبعد السونار والتحاليل ثبت انه ملاذ حامل شهر و11 يوم وكتبت الها علاج
واني تقصدت اروح للصيدليه الي تشتغل بيها اختي نور ومن دخلت ويايه ملاذ وشافتني نور واجتي عليه
نور / هلو ريان شلونك خيرك شو اليوم يمي بالصيدلية
ريان / اجيت اخذ علاج منچ لابن اخوچ
وانطيتها الوصفة شافتها
نور / مبروك حبيبي ريان يتربى بعزك ان شاء الله
وراحت نور اجيب العلاج وملاذ تخبلت من نور
ملاذ / هي منو وشلون تگلك حبيبي گدامي
ريان / هاي حبيبتي سابقاً جبتچ هنا حتى شوفچ وتعرف راح يصير عندي طفل منچ
ملاذ / ريان امشي نطلع لا هسه امسح بيها الصيدلية
ريان / وهاي المخبله ملاذ عافتني وراحت صعدت بالسياره واجتي نور انطتني العلاج اخذته منها ومن دى انطيها الحساب ما قبلت وحلفت ما تاخذ الفلوس واني طلعت ورحت صعدت بالسياره يم هاي الخبله وچانت تريد تاخذ العلاج وتذبه من جامة السياره بس اني لزمت أيدها قوي
ملاذ / جيب العلاج ما اشربه هسه أذبه گدامها بالشارع
ريان / يا خبلة هاي نور اختي اني مو گتلچ اختي صيدلانية هي هاي اختي
بس ملاذ ما صدگت وظلت وجهه ثگيل وما تحچي ويايه وعلى ثاني يوم اني وبالشغل خابرني آبوها يگلي
ابو ملاذ / شوف اني بنتي ملاذ رجعت يمي وبعد ما ترجع يمك
لمتابعة باقي الرواية زوروا قناتنا على التليجرام من هنا
بدل ماتدور وتبحث علي الروايات خليها علي تليفونك وحمل تطبيقنا
