رواية فصيلة دمشق الفصل الحادي عشر 11 بقلم احمد
ميرا.. جنت دا اتابع المسلسل وسمعت هوسة يم البيت وصوت بابا وياهم كمت عالسريع رحت عالغرفة الي شباك صاير عالحوش
شفت بابا سكر الباب مال البيت وطلع يركض ومن ركضتو عرفت صايرة مصيبة لان بابا مستحيل يركض اذا ماكو شي صاير
نزلت ركض على ماما جان وجهها اصفر كلتلها شصاير كالت مادري بس من دكة الباب وصوت الناس صارت بي خوفة
جبتلها ماي وبقيت انتظر وياها اي خبر من بابا واتصلت عليه ماما اكثر من مرة وما يرد اخير شي رد وصوتو كلش تعبان
سارة.. شنو صاير سمير وين انت
سمير.. شوية واجي عالبيت ما اتأخر
سارة.. طيب بس احجيلي شصاير
سمير.. هسا اجي يا عيني ما اتأخر واحجيلج
سارة.. تمام
ميرا.. ماما الباب دا يندك بقوة
سارة.. بسم الله الرحمن الرحيم
ميرا.. فدوة ماما لا تطلعين
سارة.. بس خلي اعرف منو انتي ابقي بالمطبخ لا تطلعين
ميرا.. تمام
سارة.. طلعت عالحوش .. منو
جدي.. اني بوية افتحي الباب
ميرا.. فتحت الباب ودخلو جدي وعمي ووياهم مصطفى وايمن بس الي خوفني ان مصطفى وايمن جانو شايلين اسلحة
سارة.. ليش شايلين اسلحة الولد
جدي.. هاي توصيات سمير هسا يجي ونفتهم منو
ميرا.. دخلو للصالة اني بقيت واكفة عند باب المطبخ وخايفة كلش من جهة ردة فعل بابا ومن جهة الولد واسلحتهم واخواني ماعرف وينهم
جانو يتناقشون بينهم بس من التفكير والخوف مو منتبهة لكلامهم انتبهت لمصطفى يباوعلي ومن باوعت عليه بعد عيونو عني
شوية واجى ابوي وجان يحجي مع زلم خارج البيت وبعدها دخل عالبيت وكعد بالصالة وركضت جبتلو كلاص ماي
جدي.. فهمني سمير شنو صاير وليش وصيت عالاسلحة ووين الولد
سمير.. الولد بالسجن
سارة.. بخوف .. بسم الله الرحمن الرحيم ليش بالسجن شنو صاير فدوة احجي
سمير.. متعاركين ويا شباب وواحد منهم عندو احتقان قوي بحلكو وضاربو عادل على حلكو ومتوقف عندو التنفيس ومتوفي
سارة.. يا يمة راح ولدي راح عادل
جدي.. اهدي يابوية
سارة.. يا اهدى عمي ما تسمعو يكول عادل قتل واحد
جدي.. ونعمان وسليم
سمير.. نعمان وسليم باجر يطلعون لان ما الهم دخل بالي صار ويبقى عادل لحد ما ينحكم او نسوي كعدة ونتفاهم بيناتنا
جدي.. اي نسوي كعدة ليش لا انت تعرف اهل المتوفي
سمير.. اي يابة عرفتهم ورحت للمستشفى واخذت منهم عطوة
سارة.. اذا تفاهمتو ايمتى يطلع عادل
سمير.. حتى اذا تنازلو يبقى هناك 6 شهور حق عام وبعدها يطلع
ميرا.. جنت واكفة اسمعو ودموعي يجرن مثل الشلال وماما حطت راسها على ايديها وصارت تبجي وبابا محتار شيسوي
جدي حط ايدو على ايد بابا وكال لا تشيل هم احنا وياك وما نعوفك والولد يبقون يمك اذا احد اجى لو شي يكونون موجودين هنا
ومنا ل 3 ايام إن شاء الله نروح عليهم ونسوي كعدة وشما يطلبون ما نكول لا واذا كدرنا ندبر واسطة لعادل ونطلعو بس انتو توكلو بالله
جنت اللاحظ بنظرات جدي عدم اقتناعو بكلامو بس دا يحجي هيج علمود يشجع بابا وماما ويخليهم شوية يصبرون
اني عفتهم وصعدت لغرفتي واحس روحي دا تحترك وبالاخص من شفت ماما تبجي والمشكلة عادل يبقى اقل شي 6 شهور
بقيت كاعدة عالسرير وتخيلو مادري بنفسي الا فزيت على اذان الفجر كل هالوقت هذا اني كاعدة وافكر ومادري بالدنيا
كمت توضيت وصليت الفجر ونزلت تحت ماكو احد نهائيا رجعت لغرفتي وسمعت صوت ماما تبجي بالغرفة مالتها هي وبابا
فتحت الباب وباوعت عليها جانت كاعدة عالمصلاية ورافعة ايديها وتبجي ومنظرها وهي بهالضعف هذا اكبر من طاقة تحملي
فورا نزلن دموعي وعفتها ورجعت للغرفة دفنت وجهي بالمخدة وانفجرت بالبجي واحس الشهكة تطلع من اعماق كلبي
بسبب السهر والتعب والبجي اخذتني النومة بس لو مو نايمة احسن كل شوية افز وارجع اغفى وبقيت هيج لل 11 الضهر
كعدت بال 11 راسي يوجعني ونفسيتي زفت وتعبانة اكثر من تعبي قبل النوم كمت غسلت وجهي وعدلت شالي ونزلت
جانو كاعدين بابا وماما بالصالة وصافنين عفتهم ورحت للمطبخ جان فارغ وعرفتهم لا متريكين ولا يريدون يتغدون
طلعت بطاطة وبيذنجان قطعتهن وحمستهن وقطعت خيار وطماطة بين ما اذن الضهر صار الغدا جاهز
جنت اريد اروح اصلي علمود ارجع احط الغدا ودخلو نعمان وسليم من باب الحوش وطلعت اركض واصيح اجو سليم ونعمان
بابا وماما لحكوني ورحت عليهم وحضنتهم ثنينهم مع بعض من شوقي الهم رغم ما غابو عني بس ليلة وحدة
سلمنا عليهم وتطمنا عليهم ودخلناهم داخل وجنت امنيتنا انو يكون عادل وياهم بس للاسف امنيتنا صعب تتحقق
عرفتهم جوعانين فرحت صليت الضهر عالسريع وحطيتلهم الغدا وبلشو ياكلون وكالو لبابا وماما ان عادل يسلم عليهم ويكول كلها فترة واكون يمهم
سمير.. نعمان احجيلي كلشي صار بالتفصيل
نعمان.. يابة جنا دا نلعب بليارد ودزينا سليم يجيبلنا شي نشربو (عصير او ببسي) لان تعرف الجو حار هم مشتهينو
جان اكو ولد يلعب بالبليارد الي منا مرو من يم بعض هو وعادل وبدون قصد عادل طخو بكتفو وهو عبالو عادل يتحارش بيه
صار يحجي على عادل ويتجاوز بالكلام اخير شي كال مو ذول الي جايين من سوريا وكالها باستهزاء وكال ومسوين نفسكم زلم
انتو لو بيكم خير جان حررتو بلدكم واجيتو هنا علمود ....... وسكت نعمان
سمير.. علمود شنو
نعمان.. ميرا جيبيلي الملح
ميرا.. كمل واجيبو
سارة.. كومي جيبي الملح
ميرا.. تمام
سمير.. كمل علمود شنو
نعمان.. علمود ابن عمكم ينهي على اختكم وانتو مثل النسوان مابيكم الي كدر يفك حلكو .. بس الضاهر احد حجالو علينا لان احنا مانعرفو
المهم هنا عادل تخبل وسحب الولد وضربو بوكس والولد جان يريد يبعد بس الضربة بدال ما تجي بوجهو اجت بلحكو ووكع بالكاع
بهالاثناء اجى سليم وصارت عركة بيناتنا احنا وجماعة الولد وجان اكو شرطة قريبين علينا وعلى صوت الهوسة اجو اعتقلونا
الولد طلع بيه احتقان مزمن بحلكو والا بخاخ ربو يلا يكدر يتنفس والضربة اجتو كلش قوية وتوفى بالطريق للمستشفى
سمير.. تمام
نعمان.. المهم عادل يكول لا تخافون علي والي وياه بالسجن عرفو قصتو وصارو اصدقائو وكلها كم شهر ويطلع
سمير.. ما اعوفو هناك بس اخلص من سالفة الفصل ادبر واسطة من اي مكان او انطي كفالة واطلعو
نعمان.. هاي بقت يمك
سليم.. اني اروح انام تعبان كلش
نعمان.. واني هم
سمير.. نوم العوافي
ميرا.. كلامهم عن عادل شوية ريحنا بس بابا وصى ماما تحظرلو جنطة ملابس علمود ياخذها الو واني اخذت المواعين للمطبخ
ماعرف ايمتى راحو مصطفى وايمن بس الي اعرفو من كعدت هم ماكو وبصراحة لو افكر بالموضوع هسا احس مصطفى غريبة يجي
بس بصراحة كلش حلوة منو هالحركة انو عاف الخلافات كلها واجى ويا جدي وعمي علمود يوكف ويانا بهالمحنة هاي
جنا كلنا ندعي انو عادل يطلع باقرب وقت وعشنا بتفكير وقلق قاتل بس الي نعرفو ان اهل المقتول ماراح يعتدون علينا حاليا
وماطول بابا اخذ منهم عطوة (مهلة) معناها مايصير يهجمون علينا ولا يطالبون بثارهم قبل يوم الفصل والي يكون 3 يوم بعد العطوة
خلال هالفترة بابا ما كعد بالبيت يروح من مكان لمكان واذا يكعد بالبيت تيلفونو ما يسكت وماعرف منو يتصلون عليه
ماما من تفكيرها بعادل ماتعرف شتسوي واذا تسوي شغلة تنساها عالنص وتبقى صافنة الا اني اكملها عنها واكثر من مرة يحترك الاكل بسبب تفكيرها
الى ان اجى يوم الكعدة هنا التوتر صار الف ومن الصبح تريك بابا وراح على جدي ومن هناك يروحون سوا لبيت اهل المتوفي
اخواني ما قبل ياخذهم وبقو بالبيت وتعرفون انتو الانتضار بهيج مواقف يكون قاتل والثانية تصير سنة كاملة
بقينا ننتظر ومانكدر نتصل على بابا لان مايصير نتصل وهو بالكعدة واكيد ماراح يرد علينا فلذلك بقينا ننتظر على اعصابنا
بقينا بدون غدا وورا الغدا بشوية اجو بابا وجدي بس جدي نازل على بابا برزايل اول مرة اشوف جدي هيج عصبي ويرزل بابا بهالطريقة
جدي.. بس كلي وين جان عقلك تخبلت انت رسمي عقلك صاير بكد الفصمة مو دا اشرلك واكلك اصبر بس ما يفيد
الف مرة كايلك عوف هالتصرفات الطفولية بس يبقى عقلك عقل عجي لك والله حتى العجي نا يتصرف تصرفاتك
سمير.. يابة لعد شسوي
جدي.. انجب ولا تسمعني صوتك
نعمان.. شكو جدي شصاير
جدي.. اسأل ابوك الفهيم شخبص هناك
نعمان.. احجي جدي احنا بدون كلشي كاتلنا القلق
جدي.. ابوك انطى ميرا فصلية
ميرا.. بسبب عصبية جدي جنت خايفة وشوية بعيدة عنهم وكلمتو نزلت مثل الصاعقة علينا اني وماما واخواني
اندارو كلهم علي وهم مصدومين وبابا جان كاعد ومنزل راسو واني تجمدت بمكاني وصرت اتذكر كلام جنات عن حياة الفصلية
سارة.. سمير صدك الي دا اسمعو (مو قصدها جدي جذاب بس مصدومة)
سمير.. طلبو دم عادل لو فصلية تريديني ارفض الفصلية ويبقى عادل عمرو كلو بالسجن واول ما يطلع ينقتل
جدي.. لك لو رافض جان طلبو فلوس
سمير.. يابة عرضنا عليهم فلوس كدامكم ورفضو
جدي.. اني مو كادر اتحمل غبائك وصلت حدها اروح اولي لبيتي احسن ومن هسا اكلك خطية هالطفلة هاي بركبتك ليوم الدين
ميرا.. جدي طلع للبيت واني رحت لغرفتي وعاصفة افكار تعصف براسي اريد ابجي اريد اصرخ بس ماعرف ليش ماكدر
كعدت عالسرير وصارت دموعي تجري وجسمي كلو يرجف من الخوف معقولة راح اعيش باقي عمري خدامة لناس ماعرفهم
وفوك هاي اتزوج واحد لا اعرفو ولا يعرفني واكيد حاقد علي بسبب ابنهم الي انقتل
حطيت كفوفي على عيوني وانفجرت بالبجي وحسيت بماما من اجت كعدتي يمي وحظنتني ومبين من هزة جسمها انها دا ترجف
ميرا.. ماما ما اريد اروح فصلية
سارة.. بشهكة .. يا ماما ياريتني متت ولا شفت هاليوم
ميرا.. معقولة اكون رخيصة عند بابا لهالدرجة
سارة.. شبيدي اني منا انتي ومنا اخوج
ميرا.. بقيت ابجي الى ان تعبت فوك تعبي وغفيت بحظن ماما وحسيت بيها من عدلتني وغطتني وطلعت من الغرفة
حلمت اني واكفة بمنطقة فارغة مابيها لا نبات ولا بيوت ولا اي شي والجو اصفر كأنو اكو عاصفة ترابية بس ما جان اكو هوا
اجى صوت عادل من وراي كال ميرا انداريت عليه وجان مبتسم كال ليش زعلانة اكيد بسبب مصطفى مو
ميرا.. لا بابا انطاني فصلية
عادل.. لا تروحين
ميرا.. بس كال انت تموت
عادل.. اني اتحم........
ميرا.. قبل ما يكمل كلمة اتحمل اجى صوت طلقة من وراها وصار قميصو من كدام احمر ونزل دم من حلكو ووكع بالكاع
صرخت صرخة احس روحي طلعت منها ومسكتني ماما بقوة علمود تسيطر على ردة فعلي الجنونية وجانو اخواني يم بابا الغرفة
سارة.. اهدي يا روحي اهدي كابوس كابوس
ميرا.. ماما مات مات كدامي ماما قتلوه
سارة.. ماكو شي محد مات اهدي مجرد كابوس انتي بغرفتج وهاي اني يمج اهدي
ميرا.. سحبت راسي على حضنها وصارت تهدي بي ومن اقتنعت ان ذاك مجرد كابوس هديت شوية بس بعدو الخوف بكلبي
رفعت راسي على ماما ونزلت دموعي كلتلها ماما اني موافقة اروح فصلية بس المهم ما يقتلون عادل حتى لو يقتلوني عادي
خطية ماما جانت بحالة يرثى لها لا هي التكدر تنطي بنتها ولا هي التكدر تضحي بمستقبل ابنها وبحياتو من يطلع من السجن
اني بسبب مواقف عادل وياي من انقذني من المسلح بالطريق وعركتو ويا مصطفى علمود قررت اروح بس المهم هو يبقى بخير
سمعنا صوت صياح اني وماما جاي من تحت كالتلي خلي اروح علمود اشوف شكو وعافتني وراحت واني عدلت شالي ولحكتها
لكيت مصطفى جاي علينا ودا يتعارك ويا بابا ويكول من جنت ناهي عليها صارت غالية وهسا انطيتها فصلية للغريب
حتى مربي جلبة جان حنيت عليها بس بنتك لا شنو من كلب عندك انت لو كل الاباء مثلك جان انهجمت الدنيا بسببكم
بابا جان تاركو يحجي براحتو لوهلة تحس بابا يريد يسمع هالكلام وكأنو يشوف نفسو يستاهل هالرزايل لذلك ما يريد يسكت الي يحجي عليه
وجان مانع نعمان وسليم ان يتدخلون وكوة عمي وجدي سحبو مصطفى وطلعوه خارج وكعدت اني عالدرج واباوع للبيت الي راح افقدو للابد
بعدها اجت ماما كالت تعالي خلي احجي وياج واخذتني من ايدي ورجعنا للغرفة مالتي وسكرت الباب وكعدت وياي عالسرير
سارة.. شوفي بنيتي حاليا ماكو تراجع عن الي صار بس نكدر نتحكم بالي جاي وطول ما نتوكل على الله ماكو شي يصعب علينا
انتي راح تروحين فصلية صحيح بس اعتبري نفسج رايحة عاروس الهم لان الفصلية مثل الزواج التقليدي هم العرسان ما يعرفون بعض
بالبداية راح يكونون يكرهونج وهذا طبيعي بس تكدرين انتي تكسبين محبتهم بالكلمة الحلوة والاكلة الطيبة والوجه البشوش
انتي حلوة والرجال من تكون زوجتو حلوة مهما كانت الاسباب راح يحبها ويتعلق بيها بس لازم انتي تحققين هالشي هذا
تعرفي على اطباعو ودائما لازم تكون لبستو نظيفة واكلتو حارة وفراشو جاهز واهم شي ما تعانديه او تكسرين كلامو نهائيا
اذا سويتي هالاشياء هاي راح يعرفون ان الي صار مجرد قضاء وقدر وراح يحبوج وتعيشين وياهم معززة مكرمة طول عمرج
واذا حبوج ممكن يخلوج تزورينا بين فترة وفترة كل الي مطلوب منج حاليا الصبر والتوكل على الله واكيد الله ماراح يخذلج
ميرا.. ماما واذا عذبوني
سارة.. هم ممكن يسمعوج كلام علمود تردين عليهم ويأذوج بس انتي خليج صبورة دائما ولا تردين على كلامهم نهائيا
اذا طلبو طلب نفذيه واذا امروج امر لا تعارضين الا اذا يكون بيه اذية الج او يكون حرام غير هالشي نفذي بدون نقاش
وانتي ذكية راح تعرفين شلون تكسبين محبتهم واحترامهم بس كلشي بهالدنيا يحتاج للوقت والصبر والحلو ما يجي بدون المر
(شرحتلي هم عن الحياة الزوجية وشلون اكتسب زوجي واهتم بيه وما اعصي امرو وكالت اكيد من يشوفج حلوة ومطيعة راح يحبج)
المهم هسا اني راح اروح ويا ابوج علمود نشتريلج جهاز والج علي جهاز تحلم بيه العواريس علمود ما تحتاجين منهم شي نهائيا
ميرا.. تمام
كلامها وتفائلها انطاني جرعة امل جنت بحاجة ماسة الها وفعلا صحيح اذا تصرفت مثل ما هي كالت راح اكدر اكسب محبتهم
واهم شي لازم اتوكل على الله ماطول هو اختارلي هالاختيار هذا معناها اكو بيه خير مضموم الي ولازم اتحمل
ويجوز اتزوج واحد زين ويكونون اهلو هم زينين وياي واعيش وياهم احلى عيشة بدال ما اتزوج بعدين ويجوز زوجي يكون مو زين
كمت اخذت ملابس ودخلت للحمام اخذتلي دوش وطلعت مشطت شعري وقنعت نفسي انو هالشي هذا مو بس الي لعادل هم واخذت قراني وبلشت اقرا
لمتابعة باقي الرواية زوروا قناتنا على التليجرام من هنا
