رواية هدية الشيخ رضا الفصل الحادي عشر 11 بقلم أوتار حزينه
ليله
ناهي بعد ماطلك رضا اخته ظل يحجي علي
وين مايكعد وهالشي وصله وصارت طلايب
ويا ووي اخوته
السالفه كبرت وصارت كعده بينه وبينهم رضا
حجه الهم الصار جد طالب الي من سمع
منه هي شمسويه وكف ويا وانطاه الحق هو وبقيه
عمامهم ومارضوا تصرفها ولا على تصرف ناهي
واخوته
زينب رجعها رضا واجت وكعت علي وهي تبجي
وتطلب منه يسامحها واني ويا رفض
وكام يصيح عليها جنت گاضته
خايفه لا هم يكتلها
عمه اشرت الها وراحت من يمه كعد يردد
وولج ليش هان عليج ابوج تكسرين فرحته
باخوج سمعتي كلام امج الحيه
ودستي عليه انه مااخفتن الله ماكلتي لااا
يمه هذا اخويه حرام ااسوي بي هيج
كافي يمه راح يصير بيك شي من القهر
سكت يهز رجلي بغضب والعيون والوجه
صارن دم
زينب حبست روحها بغرفتها بس تبجي خواتها
انكسرن من الصار ومن وره عمله امهن
الي الكل عرف بيها
وره جم يوم حياة دزت خبر راح يجون بليل حتى
يخطبون زينب لعلي اجت هي وزلمتها
وزاهد وعلي ودعاء الي
جانت حامل بشهر الثالث الحزن مبين بعيونها
ومقهورة كلش من الصار حتى جانت خجلانه مني
وماتعرف شلون تصرف تعاملت وياها عادي
لان لا هي ولا خواتها الهن
ذنب بالسوته زينب
وامهن
صارت الخطوبه واتفقو وي رضا العقد الخميس
صفيه اجت والتهت وياها اجهز الها
رضا ماقبل تطلع كال
انتن جهزنها
طول هالايام انه مو على بعضي احس روحي
لايبه ومالي خلگ كمت اذب من راسي
الصبح ومااشتهي اكل
الخميس اجه وعقدنا لزينب وجانت حفله بسيطه
لان رضا ماقبل نعزم احد لان اخت جد
طالب توفت بهل الايام
من فضت عفنها يم علي صفيه اجت وره مشوار
وهي شايله صينيه كالت
ليله زينب مابطلت بجي وعلي راد بس
يسكتها ماسكتت
ذبيت حسره وكلت
هسه يله حست على روحها هي شسوت
اي سمعتها ادگله
ندامنه لان سمعت كلام امي ومااعرف شلون
ابويه راح يسامحني كلهم يكروهوني من
وره السويته ومااعرف انت
شلون قبلت بيه
علي خوش ولد وجان يريدها من زمان ويحبها
واليحب من صدك مايشوف عيوب اليحبه
ههههه ااي حشاج يصير اعمى
ابتسمت سمعت صوت علي
تعالي زينب
انداريت طب وهي وراه وعمه وياهم كال
شيخه انه جاي واكعه عليج واريد منج تسامحين
زينب وتبريها الذمه
صفنت عليها ولا عدالك عروس العيون ورامه
وبسها تبجي قربت مني وكالت
اسفه ليله كرهي الج عماني وامي خلت ابويه
يكرهني عع
غصت من كالت اسمها وشهكت دعاء عاينت
الها بقهر كملت
عفيه ليله احجي ويا كولي اله انه ندمانه تندمت
لان جتلت اخويه وكسرت فرحتج انتي
ويا بشبل
انهارت وغطت وجهها وكامت تبجي راحت
ليم دعاء حظنتها واشوفهن يبجن اثنينهن كلت
سامحتج زينب وبريتج الذمه
لجن امج مو مبريه الذمه الى يوم الدين
علي اخذها من يمنا دعاء عاينت عليه هي وحياه
وصفيه عمه كالت
بارك الله بيج من طيب اصلج هالعفو
سكتت وكتمت دمعتي ودعيت من ربي يعوضني
عن الراح
بليل حجيت وي رضا وماقبل يسمع اي كلمه مني
كال
سدي السالفه وخلي نام
سكتت ومالحيت نمت بحظنه اعاين لعگده
مديت ايدي مرغت گصته فتح ابتسمت بوجهه
وكلت
مااريدك تظل معصب وضايج
مو ضايج ونامي ونيميني وياج
قربت وحظنته كمت امشي ايدي على ايده غفيت
مااعرف شوكت كعدت الصبح نفسي
تگلب ومزهوره ركضت للحمام
وذبيت من راسي الما
طلعت روحي
رضا طب گضني وكال
هاي شبيج بويه شصار بيج
مابيه شي
رديت كوه وغسلت وجهي وايدي طلعت هو
وياي كعدت اخذ النفس،گوه راح
جابلي مي بارد شربت شويه كعد يعاين
اليه بقلق سال
ليله بيج شي يعني خاف حامل
سكت ماردت احجي واكول هي فاتتني الا اتاكد
ماردته يفرح وبعدين يطلع ماكو شي
كلت اتاكد يله احجي
جاوبته
لا مو حامل يجوز من اكل بارحه لان جان دسم
فد مره
ارتاحي ولا تنزلين تسوين شي
لا شنهي ارتاح مابيه شي هسه انزل اسويلك
ريوك واخذ حبايه مال معده
صفن عليه ابتسمت وكملت
يله بدل وانزل حتى نتريك سوه
كام من يمي راح يغسل بدلت وعدلت الفراش
عفته بالغرفه ونزلت لجوه طبيت
المطبخ عمه بيه سلمت
صباح الخير عمه
هلا ليله صباح النور
عاينت عليه وسالت
بيج شي يمه اشوفن وجهج اصفر
لا مابيه شي
مبين عليج تعبانه روحي يمه انه اسوي الريوك
والبنوات وياي
لا عمه مااكدر مو تعرفين اليوم حياة راح تجي
حتى تجهز زينب ورضا كال روحي
وياها لان انطاني فلوس
الها ولبنات سميه
حتى اشتري الهن هدوم
اي صدك وگلي اخذ بنات حليمه غير يوم
واخذلهن ااي يريدنه لعرس اختهن
حضرنا الريوك بنات حليمه ويانا يشتغلن من
راحت امهن كلشي اختلف عدنا البيت هدؤ وصياح
ماكو من عدها عليهن وهن طبعهن عن
الاول وكامن يسمعن كلام
الواحد من يحجي
وياهن
مشوار حياه اجت هي وعلي ردت صفيه ويانا
ماقبلت كالت امي تظل وحدها ورضا جان عنده خطار وراح يظلون على الغده طلعت
وياهن هو يم المضيف بس لمحته
نزلت البوشيه بسرعه ابتسم ونزل راسه
صعدت يم زينب علي حرك وطلعنا اعاين اله
يحجي بجهازه وعيونه علينا جان ماكو احد فتنا
من يمه رفعتها وطلعت لساني
اله رفع حواجبه مذهول
من حركتي
ردت اخرب ضحك لجن گضيت روحي گوه طلعنا
للشارع جهازي دك برساله جانت منه
فتحتها وقريت
انه اعلمج ام لسان اكصه الج بس ترجعين
هههه اهون عليك
مارد كتب
ماتهونين عبنج غاليه
اموت عليك شيخي
ديربالج على روحج ولا تتاخرن والبوشيه
ماتنزع ليله
تمام شيخ بعد اكو اومر ثانيه
لااا بس ذني
دزيت بوسه دز گلب كتب
يله اروح حبيبه خطاري وحدهم
الله وياك
ضميت جهازي والتهيت بالحجي وي حياة
اعاين لعلي فرحانه وعيونه على زينب الخجلانه
وصلنا للسوك وجهزنها جهاز توب علي مابخل
عليها بشي هي ماتحجي ولا ادكول اريد اي شي
بس عمتها ماقصرت عفنها تمشي
وي علي وكالت اليه
اعرف هي سوت شي جبير ولو غيري والله
ماتقبل تاخذها لابنها لجن انه اعرف بنات اخويه
هن مو مثل امهن لا طبعهن مثل طبعنا
وگلبهن طيب وانتي شفتي
شلون من ولت العگربه امهن كلشي اختلف
عدهن
اي شفت والله كلشي تغير بس هي عافت
البيت
من لاا ردت ولا شفنا خلقتها من اخذها اخويه
وهو ماشاف الراحه
سكتت من وصلنا لمحل الذهب اخذت الها تخم
نازك هديه ابوها وبدلت تراجي بنات سميه
باكبر هي ماعجبها باقي
الذهب ورادت من الي بصفه طلعنا
عيوني اجت على عياده مال تحليل كلت لحياه
اخذ تحليل واجي
بيج شي اجي وياج
لا ماكو شي هيج حاسه عندي التهاب مجاري
واريدن اتاكد
هاا خلي نكمل زينب ونروح سوه
لا ام زاهد انه اروحن استحي من علي هسه
اسوي وارد الكم
تمام لجن لاتروحين لغير مجان
لا وين اروحن هو بس للمختبر اسوي شغلتي
واجيكم
يله ننتضرج
طبت لجوه وانه رحت للمختبر امشي خجلانه
من الاوادم لان اول مره اروحن لوحدي
طبيت شفت بنيه واكفه وولد كاعد وره ميز
رحت عليها وكتلها
اريدن اسوي تحليل مال حمل
اي اكعدي هسه اسحبلج دم واشوف
كعدت اجت سحبت دم وكالت
من اصيح اسمج تعالي اخذي
هو شكد يطول
مايطول هوايه ربع ساعه ويطلع
تمام
طلعت لبره كعدت طلعت جهازي خابرت حياة
كالت
بعدنا يم الصايغ دابدل بتوتي وراح يجيبلي غير
موديلات من يم محلهم ااثاني انتي
كملي وتعالي علينا
تمام من اكمل اجيكم
سديت الخط جنت متوتره وخايفه لا يخيب ظني
وره اقل من ربع ساعه البنيه صاحتني
ليله علوان
كمت كلبي يدك بسرعه رحت الها انطتني
الورقه وانطيتها الفلوس
سالت بلهفه
عفيه شطلع
ابتسمت وردت
مبروك حامل
ابتسمت وگضيت الورقه بقوه طلعت اضحك
وي روحي وفرحانه هوايه
شفت حياه طلعت من الصياغ ادور بعيونها
عليه رحت الها كالت
ها طلع عندج التهاب
يمه ااصعدن مو مال سوالف بالشارع
علي حجه صعدت انه وزينب وحياه يمه حرك
وطلعنا من السوك الغراض تكومن يمنا
وبالصندوق حياه ماسالت بعد من وره علي تعرفني
اخجل منه السياره مشت بينا وانه
فرحانه كلش
قبل لا نوصل لسلفنا بعدنا بالشارع العام شفنا سياره واكفه وگاطعه،،، الطريق علي وكف وكال
خير شنهي عطله هالسياره
وين اهلها اذا عاطله
امه ردت نزل يريد يفتهم شنو السالفه من
وصل يمها زلم طلعو من يم گصب وزل ملثمين
واجوي رگض علي گضوه ووكعوله دك
حياه عاطت ونزلت تركض
على ابنها
زينب صاحت ولبدت يمي صحت
وولج هذوله منوو
عصاابه ليله وراح يسلبونا وياخذوني انه
وانتي
ردت مفجوعه وتصرخ
اانزلي جووه بسرعه
احجي وياها وعيوني جامده عليهم علي يتلاوه
وياهم وحياه ادفع بيهم لجن
مايكدرون
كومت الغراض كلها عليها وكلت بصوت
يرجف
شيصير لاتطلعين
واحد ضرب حياه براسها وتكومت بالگاع علي
هد علي كضوه ونيموه بالگاع واحد
صاح
وولك لاااتبلينا بدمك احنا جايين على بنت
الشيخ
فكيت عيوني وذبيت بعد غراض عليها وكلت
صووتج ااكتمي ذوله جااين عليج
ليله
ااش ولا جلمه
مديت ايدي لجهازي جمدت من سمعت
رعد هدني ولك على جثتي تااخذ بنت خاالي
كام يفشر علي ويغلط
بلحظه الي مو متلثم طلع مسدس من وراه
وضرب علي عطت
لااااااا لاااا
ليله شصااار
زينب عاطت رادت تطلع نمت عليها صحت
لاااتطلعين وتفجعين ابوج بشرفه
وخرت منها عاينت الهم اجوي علينا صوتي
طلع يگطع
زززينب ابدا لااااتطلعين اابد
الباب انفتح بقوه رعد عتني من ايدي بقوه وجابني
علي جر لبوشيه من وجهي صفن
عليه صحت بي
هدددني يااعار الزلم
وولكم طلعت بنت الشيخ غير حلوه وشايله
حسن يخبل
تفلت علي ومااحس غير يضربني راجدي
طرش اذني سحبني للگاع انهديت بخبال
عووفني جلااااب من الله لاااينطيكم
رعد گض وجهي بقوه وعصره وكال
ااعلمج اليوم الجلب شراح يسوي بيج
جرني من ايدي اضرب بيه بدون فايده
خرمشت ايده واندار عليه هم ضربني راجدي
وكعت تصرخ
الله يكسرها لايدك ياچلب
لك انته لورجال وبيك خير سويها
كدام الشيخ
تخبل من گلت هالكلام كضني من
فجي وصاح بيه بغضب
انعل الشيخ لا ابوه
لابو اليخاف منه وولج اليوم اخذ ثاري من
ابوج وابرد گلبي بيج
كمت ادك والطم على حياة وعلي الغركانين بدمهم
واحد جتفني ورعد مااعرف شنهي
رش بوجهي روحي ماعت
وفقدت الوعي
زينب
سمعت الهوسه وانه كاتمه حلگي بايدي
وارجف مثل السعفه وره وين سمعت سياره تحركت
وصارت صنطه وخرت الغراض ورفعت راسي
عاينت
باب سيارتنا مفتوح وليله ماهيه زحفت فوك
الغراض وطلعت ابجي
نزلت عيوني راحت لعلي صحت بخبال
من شفته ممد وغاركان بدمه هو وعمتي
رگضت علي اعيط واملخ بروحي
حظنته اعاين اله ولعمتي
صرخت
علي ااكعد عمممه ااكعدي ولكم االحكو عليه
بووويه وينك الحك عليه جتلو علي
وعمتي
اخض بي ماايكعد رحت زحف لعمتي هم ماتكعد
رجعت اله فتح وون صحت
علي اانت طيب
عاين عليه وهو يفتح ويغمض وكال
خاابري
سكت ورجع فقد الوعي تخبلت كمت رگضت
لسيارتنا نثرت غراضنا ادور على جنطتي
لكيتها فتحتها بايد ترجف
طلعت جهازي خابرت ابويه جاوب صحت
رضا
كاعد بمضيفي ويمي ضيوفي وربعي جهازي
دك عاينت اله شفتها زينب
عكدت حواجبي
فتحته بسرعه
لان كلت بس
لا صار شي
سمعتها صاحت
بوويه الحكني جتلو علي وعمتي
فزيت من مچاني وصحت
ووج شكاعد تحجين اانتي
ردت بخبال
الحكني بوويه جتلوهم واخذووو ليله
فگيت عيوني من سمعت هالكلام كملت
بووويه رعد ابن عواد كتل
علي وعمتي واخذ ليله
توازني اختل حيدر گضني وكال
شيخ شصاير
صحت بخبال
وولج اانتي وين ااحجي
دلتني مشيت ااصيح
ووولكم بااطل اانه رعد يجتل اختي وولدها
وينهب حرمتي ولكم اليوم احرك السلف على
راسه وراس الوكف ويا
الولد تراكضو بين ايدي حيدر سال
شيخ بس فهمنا شصاير
اتحزمو يالربع ابن عواد كتل علي واختي
ونهب حرمتي
زاهد صاح
ياخوووويه ياعلي ولكم شلون صااار هالشي
ااطلعو بسرعه
الكل كامت تتراكض وراحت للسيارات
ماكو اقل من نص ساعه وصلنا لمكان
الحادث نزلنا نركض زينب كاعده بين اختي
وعلي الغركان بدمه وهي گاضه جرحه وترجف
جان متصوب
بطنه وحياه مضروبه
براسها الولد شالوهم وركضنا بيهم للمستشفى
علي دخلو عمليات وحياة
خيطو راسها
گضيت زينب ترجف وتبجي سالتها
مفجوع وماجاي استوعب الصار حجت الي شلون
هم جانو جايين عليها وليله ضمتها بين
الغراض واخذوها الها
عدالهم هي بنتي
صحت بخبال
اخ بوووويه وولك رعد ذااابحك انه اليوم
هديت ووياي ولدنا والحرس
…… ..
ليله
تحركت
اريدن افتح عيوني مااكدر
حجيت وانه گاضه راسي واون
شبي وليش هيج دايخه
عاينت للمكان الي انه
بيه تذكرت الصار فزيت
وعاينت لروحي بخوف
كلت خاف مسوين بيه شي
شفت وضعي هو نفسه ومابيه
شي يخوف
ركزت زين لان الدنيا ليل والغرفه
الي انه بيها كلها ابطال مال شرب
يااربي وين اانه وشراح يصير بيه
شفت الباب،،، رحت اركض علي اريدن
افتحه مقفول
خليت اذني ردت
اسمع شي ماكو صنطه كمت اردد
ابجي وارجف من خوفي
رضا الحك عليه تعال شوف حالي وشلون نهبني
هالجلب رعد
سمعت كلام وضحك رجعت ليوره الباب انفتح
بقوه طب رعد وويا واحد ضخم وولد اصغر من
عدهم بهوايه بسرعه نزلت للگاع اخذت
بطل وكسرته بالكاع خليت
الكزازه على ايدي
رعد ابتسم وكال
عوفيها ولج ولاتسويين نفسج شريفه
براسي
انه شريفه غصبن عنك وعن هلك يالساقط يل ماعندك غيره ونخوه
تقرب عليه صحت بي
والله اكتلها لروحي ولا اخليك تگض
شعره من راسي وانه حرمه الشيخ رضا
من حجيت هيج
فك عيونه وعاين للواكف اليمه
وحجه بذهول
ولك هاي شكاعد ادكول
مثل ماسمعت عدالك اخليك تاخذ بنت رضا لا
والله مااخليك وانه بنت علوان
لك رعد هاي حرمه رضا الثانيه
رعد تغيرت ملامحه وشكله صار يخوف بعد
اكثر كال بصوت مخنوك
وبنته وينها
مارديت الولد الصغير رد بخوف
ااكيد ختلت من شافتنا
وووولكم ااانتو شنو شله مال اغبياء شلون
مااشفتوها شلون محد انتبه الها
شمدرررينا احنا شفنا بس،هااي بالسياره
الضخم رد رعد عاين عليه بخزره ابتسم
گلبي راد يوكف من الخوف
رد
ماكو فرق مرت الشيخ ولا بنته اثنينهم يكسرون رگبته
تقدم عليه وعيونه كلها شر رجعت
ليوره وجريت الكزازه على ايدي الي كامت تنزف
توسلت بربي وانه اشهك بالبجي
ربي رحمتك ربي نجني منهم
ولاتفضحني بشرفي
ربي اموت ولا واحد يلمسني منهم
رعد ولك رعد موسى وينكم تعالو تعشوو
مادام الاكل حار
اندر الي اسمه موسى وصاح
جااايك ولك
ذاك الثور طلع رعد عاين عليه وكال
عبالج تخوفيني بهاي سوالفج لا بويه
حتى تموتين بين ايدي اسوي الي بالي واخلي علامتي بيج وادزج لشيخج
مكسوره ومختوم
باسمي
حسبي الله عليك الله يطلعها بشرفك يااناقص
ههههه
ضحك بصوت عالي وطلع من يمي
بقه بس الولد الي عاين عليهم وهو خايف
تقدم علي يريد يحجي بس رعد
صاح طلع بسرعه……
بس قبل لايسد الباب
كال لاتنامين ابد
نزلت للگاع ابجي اشهك خايفه من هالمصير الاسود
اردد بتوسل
رضا الحك عليه ياربي خلصني منهم يارب مااريد
اصير بين ايد ذوله الجلاب
ساعات ثكال مرت عليه احسهن اخذن من عمري سنين
سمعت الباب انفتح
كمت على حيلي شفت
الولد طب بسرعه وكال
يله امشي ذوله شربو وثكلو بالشرب واحدهم صار ازمال
طلعت وياه من شفته يريد يهزمني
منهم هو يمشيوانه وره طلعنا من الباب على جوله
مابيها بشر هاي وين انه
امشي لاتوكفين تره بس يكعدون
يگتلونا اثنينه
يحجي ويركض وانه وراه لاعبايه ولا بوشيه والجلاب تنبح احسهن يردن ينهشنه لحمنا مثل ذولاك
اركضي والله اذا صبح الصبح يلزمونا ويذبحونا انه وين جانتلي هاي
ياربي،ولك رعد النوب وي الشيخ رضا انته كده حطيت راسك براسه والله لايذبحك انته وربعك ومايرفله
جفن
يركض وانه وراه اتعثر واوكع واحس شي يتملخ من ثوبي بس مادرت بال اله المهم اطلع من هاي المصيبه
وي الفجر حسيت وصلنا لمكان بعيد كعدت بالكاع وانه اتنفس كوه واحسن بطني كامت توجعني بجيت وخفت هم لايروح مثل الي راح
رفعت راسي للسما ودعيت ربي يخلصني من هاي المحنه ويحفظ الي ببطني
ساعات مرت ثگيله يله
شفنا ضوه مالت سياره من بعيد
الولد الي اسمه منتضر وكف السياره
وراح يركض للسايق وصاح
دخيل عدكم
نزل واحد وجاوبه
وصلت
الي كال هيج عرفته هو حيدر ابن
عم رضا الي من
شافني ظل يعاين عليه بتركيز
من عرفته
فرفرحت روحي لان
شفت واحد يقرب اله
خويه حيدر انه مرت الشيخ
رضا
تفاجأ بيه وجره عباته من السياره وذبها عليه راد يكومني ماخليته كمت وركبت ويا انه ومنتضر الي كتله هذا واحد ساعدني
.............
رضا
الليل كله نفتر اندور على ليله ماكو رحنا للاماكن الي ممكن يتواجد بيها هذا الچلب رعد
ماكو فص ملح وذاب… ..هذا الشي خلاني اتخبل بالزايد
كمت اسوق سيارتي بسرعه وانه لازم الستيرن بقوه
عيوني مااشوف بيها احد يحجون ويايه
وانه ساكت
سمعت زاهد اتصلو علي وطمنو على
علي وحياه وحجيت وي روحي
بقهر
جا ياهو اليطمني انه هم على ليله
تليفوني دك اكثر من مره عفته كلت
هذوله اكيد الاهل يسالون عليها
وصلنا لبيتنا الصبح اريدن اروح ابلغ الشرطه نزلت من السياره
ومن مشيت للبوابه
سمعت صوت ندهلي رضا
اوكفت وگلبي زادت دكاته
وحجيت بتوسل
ربي لاتخيب ظني
حجيت هيج وانداريت
شفت ليله جاي عليه تمشي،بسرعه
لمتابعة باقي الرواية زوروا قناتنا على التليجرام من هنا
