رواية في حجر الافعي الفصل العاشر 10 بقلم شمس العراقيه

نمارق

ـ ما طلعت من الغرفه بقيت لحد ما اجه وصل متأخر واني بس كاعده وصافنه خلص صلاته ويباو؏ لي بتركيز

درت وجهي عنه

إشهاب ـ كومي روحي جيبلنا العشه نمارق مو احاجيج

نمارق ـ ما اروح عاد شكد يحبوني بس اروح يخلني بالجدر ويطبخني من كل عقلك ادزني الهن والله ما اخاطر بروحي

ـ هاا لعد شو الظهريات رحتي وخاطرتي بروحج علمود كرشج هسه ما تخاطرين علمودي

ـ ليش يابه علمودك هواي تستاهل تريد تروح روح اتعشى يمهم اني ادبر روحي ما الي شغل بيك ولا الك شغل بيه

ـ اللي يسمعج يكول غريب ومكابلج

ـ اي وأنت كلتلها، لعد شنوو عرف ولف اعرفك تعرفني

ـ شو ساعاتج مو واحد ورطنج مو بوزن

ـ والله هاي اني يعجبك يعجبك ما يعجبك الله ومحمد وعلي وياك خفة وراحة تخلصني منك ومن هالعيشه السم

" صفط سجادته ومشه بدون رد روح وخلصني منك شكد تلح وتسولف عاد اني هواي اطيق اسمع صوتك روحي كوه متحملتها شلون اتحملك ، خل احير بمصيبتي شلون سالفه هاي اني شبيه غبيه سمحتله يتقربلي لا والافندي كل الليله عادي عنده مصدك بروحه متزوج وزوجته وعلاقه وهل الامور يارب خلصنييييي منه ومن اهله وكل سلالته طكت مرارتي

" مر ؏ وضعي أسبو؏ وهو حس ما اريد وجوده ولا قربه يمي مبتعد عن هالفتره ملتهي بشغله والحلال مالته حيل يحب شغله وراضي ابوه دائماً يمدح منه ومن شغله بس اني مع ذلك كله ما يعجبني مخليني بالغرفه وحاطني ويباوع عليه وما فكر يساعدني ويطلعني من الوضع الزفت مينعاش ولا ينطاق حتى .

" كمت اني اروح اجيب الأكل من الباب الخارجي ومية الف سم يخلون بي النا بالاخص وحده اسمها رسل ذابحتني كلما اروح تشبعني نعل، اجه وكت العشه ولبست شالي ورحت من الباب الخارجي لكيتهن كلهن مجموعات يصبن

سعاد ـ جاية من وكت بعدنا ما صابيين للعيال رجعي وبعدين تعالي لاتصيرلج مشكله

نمارق ـ وأني اضل رايحه جايه خليني اخذ العشه واولي

عبرتها وكفت بوجهي وديان دفعتني بقوه لبرا وتصرخ مثل المخبله

وديان ـ وبكل عين صلفه ادخلين تاخذين عشاج كالتلج روحي وبعدين تعالي لو حضرت جنابج ما تتحملين الانتظار زين من عدنا سامحين الج تعيشين وتأكلين من هالبيت اللي عمج جتل عزيز الدار صدك ما عندج مستحى

امشي طلعي برا لا اطلعج بالقنادر حيوانه

سعاد ـ وديان خلص يمعوده عوفيها ختولي وامشي وكصري حسج هسه يسمعون الصوت وبالاخص عمتي

سراب ـ وديان كلامها صحيح سعاد أنتِ مدري شلون شو اشوفج هواي ادفعين الها وصافه جنبها

نمارق ـ ما اطلع والاكل هسه اخذه واني جنه بهذا البيت وحالي من حالجن شو وخري عن طريقي دفعتها وما احس الا هجمهن عليه هي وسراب وسعاد ادافعلي خطيه ملخني من شعري وكمت اصرخ لن راح اموت بين ايديهن و؏ صوتنا دخل حناش وراه مصلح شافني ورجع وحناش انطانه ظهره وكال

حناش ـ سترنها شنو هالهرج صوتجن واصل لاخر العرب من يمتى بيت صكبان صووت نسوانهم يطلع والله اربيجن اليوم والله اخلي تصيحن الغيث اشوفجن نجوم الليل بالنهار والله

نمارق ـ كلهن سكتن ويتراجفن من وجوده واميمه انهزمت أول وحده وهو يرعد وصوته شال البيت ومحد تتدخل بحكم هو المسؤول عن نسوانه باوعت عليهن شلون خايفات وهو نزل عليهن غلط وفشار ويتوعد الهن كلت هاي فرصتج يا نمارق اجت لرجليها والف هلا بيها تحممت من بعد اذنك يا اخوي تسمحلي احجي ولو قاطعتك

حناش ـ احجييي شنهيي سالفتج وكل مكان تلفينا تهرجينا بصوتج وعلمتي نسواننه على الصوت العالي

نمارق ـ شوف اني ما عندي اخ وأنت حسبة اخوي الجبير راح احجيلك السالفه وأنت احكم يعني بالله عليك تراضاها على نفسك وحده مالها ذنب واخذتوها بذنب غيرها وجنت مدللةة بيت ابوي وجبتوني غصب لاحول ولا قوة الا بالله وتالي غصب عني تقبلت مصيري وساكته ومن اجي اخذ لكمه اكلها يهجمن عليه ويطردني وما يقبلن اخذ اكل ونعمة الله يستكثرنها عليه تراضاها ياخوي وانتوا بيت صكبان بيت الخير والكرم تقبلونها على نفسكم وانت الشهم والسبع تراضاها على وحده من نسوانكم

حناش ـ لا ما ارضاها والزاد جثير والمطبخ كدامج مدي ايدج واخذي وما عليج منهن وأنتِ هم لسانج ضبي ولا تهرجين البيت بالمشاكل خليج محضر خير.

وانتن عوفن البت تأخذ لكمه وما الجن شغل بيها ويا ويلجن اسمع صوتجن على سالفة ماصخه ومطلعات صوتي وهارجات البيت بصياحهن اهري جلودجهن بالخيزرانه والله وتعرفن شغلي وياجن

كلهن ـ تامر اللي تريده يصير ويجرالك ما يكون خاطرك الا طيب

نمارق ـ والله ماكو زلمه اخو خيته غيرك انت جبرت خاطري بكلامك روح الله يعزك ويرفع من شأنك يا طيب ويا شهم هز راسه بدون ما يباوع ومشه وشوي وصاحوا الهن يصبن الاكل كامن يتراكضن وسعاد هزت راسها وكالت

سعاد ـ طلعتي حية بوكر تبن مو هينه غضب عليج

نمارق ـ ابتسمت رفعت رأسي بفخر وسراب كالت بصوت ناصي وهي ترتب الخضروات بالمصافي

سراب ـ وحده منجن تكفخني ؏ رأسي خلني اصحى على وكتي هذا اللي جان يحجي زلمتنا ولجن اكفخني

وديان ـ سكتييي كفخني بدون ما يمد ايده وهاي اول مره هيج يحجي ويعلي من شأن وحده هو دومه ايده والكفخ وساحلنا بالنعل والحزام هالبنت الحرام مسويتله شيء كولن وديان ما كالت

أثيله ـ سكتن وعوفن البنت بحالها لا يلوحنا طشارها تعرفن حناش ايده والضرب ما يرحمني ولا يرحمجن خو سمعتن شكال والكاله بعمره وحياته ما كايله لمره

نمارق ـ عفتهن يحجن ويتوعدن لي بالشر تقدمت اخذ المواعين واصب الكل وطلعن ضلت وديان ما حسيت غير هجمت عليه وخنكتني نبتت اظافرها بلحم رقبتي وسدت حلكي بكف ايديها وتكول

وديان ـ لا عبالج انه مثلهن واخافن واتراجف منج لن عرفتي شلون تتحيالين وتتمسكنين لحد تتمكنين هذن السوالف عاجنتهن وخابزتهن، طولج ما المحه حوالين حناش ولسانج ما يتلوي على لسانه والا اعرف شغلي وياج اخليج تتمنين الموت ما تنولينه

نمارق ـ ارفس بين ايديها واجت رسل لزمتني من شعري ضربتني بالحايط قوي احس دماغي انتثر بالداخل غوشت عيوني وهنا ناويات على موتي وديان ساده حلكي بقوة علمود لا اصرخ الا شفايفي نزفن والدم نزل على اصابعها ورسل تضرب ضرب موت وخلاص نهائي

رسل ـ موتيييي موتيييي موتيهاااا خل تموت ونخلص منها هاااي عمها جتل اخوي حرام تعيش حرام تأكل لكمه من هالبيت حرام

نمارق ـ لحظات واموت بين ايدهن النفس اختفى شفت اشهاب يجر بيهن وضرب رسل كف ودفع وديان وكعت بالكاع اكح واطلب النفس وهو متلاغي وياهن اجه رفعني وجابلي كلاص ماي نكع وجهي ويغسلني

أشهاب ـ نمارق اخذي نفس نمارق والله اعدمجن اليوم وتااااااالي وياجن ما تخلص هالربابه

نمارق ـ شالني طلعني لبرا اشم هوا وايديه يرجفون ردت اموت اشهاب ردت اموت حاولن يموتنيييي اخذني الغرفه ما اريد ابقى اهنا استندت عليه ومشينا الغرفه نومني وضل كاعد يمي واني صافنه بالمشهد شلون يخنكن بيه الا عيوني دمعت لو ما جاي اشهاب جنت هسه ميته باوعت عليه وبجيت وغطيت رأسي حسيت بي كام وركع الباب بقوه يمكن راح على اهله

" مر هواي وقت وهو ماكو بس أسمع اصواتهم عاليه شوي وأنفتح الباب خله صينية الاكل كدامي ويمها ماي

اشهاب ـ يلة كومي اكلي

نمارق ـ ما اريد ما جوعانه

ـ أكلي مو زين عليج تبقين بدون اكل وأنت باليوم يلة تاكلين وجبه وحده يلة مدي ايدج وسمي بسم الله يلة بويه

ـ ما اريد

ـ لخاطري عاد

ـ صرخت بي ما عندك خاطر عندي وكتلك ما اريد يعني ما اريد شلون احجيها بيا لغه علمود تفهم لخاطر الله شكد تلح عوفنيييي بحالي هالسم هم ما اريده اني جان متت وهو حايرلي بالاكل، درت ظهري ولفيت رأسي ونمت..

" صحيت رأسي ثكيل ما اعرف شكثر نايمه رفعت الغطا شفته نايم كمت على حيلي طلعت برا وفززني بصوته

إشهاب ـ وين رايحه

نمارق ـ وين قابل محصوره يحتاج اقدملك تقرير عفته وطلعت غسلت وكعدت برى صافنه بالسما والنجوم ومتضايقه حيل جنت متوقعه منه من بعد اللي صار يشوفلي حل وطلع الاخ لا ابالي الصخر يحس وهو ما يحس والوضع نفسه نامي اكلي شربي شبعي ضرب واهانه وتالي الليل يجيج بحكم رجال ومرته من انعل هيج عيشه زقنبوت .

" خلص أسبو؏ وبلش الثاني وصخيمه ما نزلت شسالفه مو عوايدها تخربط هلكد بالموعد شسوي يربي المن اروح

" اجه الليل متمدده وصافنه بمصيبتي ودخل هو راجع من برى جان يم اخوانه يتعلل وتمدد بصفي بدون ما ياخذ أذني، ماخذ راحته الأخ

إشهاب ـ شبيج وضعج اليوم ما عاجبني

نمارق ـ ما بيه شي شبيه يعني تفسر ؏ كيفك، جسمه التصق بجسمي وشفايفه تلامس أذاني وهو يكول

ـ نمارق هالاسلوب الزفت بطلي اني مو جاهل أشتغل عندج غير اسلوبج وأطباعج ترى ما يجرالج خير

ـ دخيلك أنت والخير مالتك كلتها وانسحب بدون رد توقعت يفلش الغرفه ؏ رأسي بس ما سوه شيء رفعت رأسي شفته صافن بالسقف رجعت انطيته ظهري وأثنينا ساكتين وكسر السكوت لحظة اللي كال

ـ الشهريه يمتى اخر مرة اجتج

ـ ما جاوبته

ـ أحاجيج وجاوبيني اعرفج كاعده بعدج ما نايمه

ـ شنو هالسؤال المحرج أعتقد شيء يخصني ما يخصك

ـ لا يخصني كلشي بيچ يخصني لا عبالج غبي وما ملاحظ عليج لهذا جاوبيني على كد سؤالي ورجعي نامي

ـ من كل عقلك اجاوبك ما الك شغل وعيب عليك هاي يسمونها خصوصيه ولو منين تعرفون الخصوصيه انتوا عدكم كلشي مباح وعلني

ـ نماااااااارق

ـ لاتصيح الدنيا الليل خلص اجاوبك ما اجتتني وما اعرف السبب ليش ما جاي تجيني كله منك لن تتقربلي خربطت نظامها وتخربطت الهرمونات بجسمي كلها بسببك

ـ انداري

ـ ما

ـ گتلچ انداري

ـ انداريت وجهي صار بوجهه ضل مركز بشكلي خير مضيع شيء بوجهي

ـ لاااا والمضيعه لكيته بيچ !!

ـ هممم أبتسمت مجامله تقربلي اكثر طخ خشمه بخشمي قربه حيل وترني تخربطت اوزاني بقيت ثابته كدامه باس شفايفي بهدوء ولزم وجهي

ـ ليش ما تردين قربي

ـ لن روحي ما تريدك

ـ طيب واذا خليت روحج تريدني

ـ مستحيل هالشيء اني وياك من كواكب مختلفه عقولنا ما تشبه بعض انت انسان ما مفهوم ولا اريد افهمك لن ما تهمني وياريت تفهم ما اريد تتقربلي وتخليني ؏ راحتي

ـ عايفچ ؏ راحتج ، يلة رجعي كملي نومتج

ـ عافني ونايم على ظهره وغمض عيونه سكتت شوي وسألته أشهاب

ـ ها

ـ تكدر تأخذني دكتوره علمود الشهريه مالتي

ـ الله كريم

ـ يعني توديني ما رد عليه تمام شكرا اشهاب

ـ نامي .

نمارق ـ أبتعدت من يمه ونمت وبالي كلامه ينعاد اكثر من مره والمضيعه لكيته بيچ معقوله يكون يحبني؟ لا ما اتصور وينا وين الحب وبينا ثأرات وأني ما راح اكون زوجتة مدى الحياة لازم تفرج عليه ويجي يوم واتخلص منه ومن أهله واتحرر من هالظلم والعيشه السم العايشتها

مر يومين وهو ساكت وثالث يوم اجاني حسيته عنده كلام بس ضل صافن بوجهي وحسيته بين فرحان بين قلق ما اعرف شبي

إشهاب ـ نمارق احاجيج

نمارق ـ اي أسمعك

ـ احتمال تكونين حامل !!

ـ حامل !! لااا لااا لااا مستحيل حمل شنو منو كلك شمعرفك بهيج مواضيع لاااا يمعود شتحجي انت

ـ لا حامل

ـ مستحييييييل احمل مستحيييييل احمل طفل بطني واكون امه وانت تكون ابوه ما اريد ماااا ما اريده ومتأكده مو حامل

ـ وليش ما تردين هذا رزق

ـ هيج رزقه ما اريده اني انت ما اريدك وما اطيق وجودك عاد انوب احمل بطفل منك لا كملت عليج يا نمارق والله اذب روحي من خرابيكم واموته كمت اصرخ وانفعلت وهو يحاول يهدينيييي ما اعرف منين طلعلي بهل السالفه اصلا ولا اجت ابالي كل عقلي خربطه وبس هو ما اعرف سأل منو واجه متأكد من الحمل بدون اي فحوصات واني كعدت عازله نفسي وادعي اني مو حامل ما اريده ما اريد

ـ خلصي بطلي خبال وركدي ؏ عقلج ودربالج ؏ البطنج لن هاي روح وتتحاسبين عليها

ـ شتحجي انت اكولك ما اريد ما اريد واموته والله وبعدين شمعرفك انت بدون فحوصات

ـ لن بيج طك خبال وعرفت

نمارق ـ طلع خلاني اكل بروحي تخبلت خبال روحي يوم عن يوم تذوب مثل الشمعه ومحد داري عنها وعن وضعها لا اب يسأل لا ام تفتقدني لا بيبي ولا حتى عم ..

" مر يوم كامل لا أكل ولأ حتى شرب بس كاعده وابجي ما اعرف شسوي شنو أتصرف وهو متيقن وواثق من كلامه دكتور مو مثله وأستغربت ملاحظته ما متوقعة منه يلاحظ ويخلي باله يم هيج مواضيع نسائيه وهو رجال جان اعزب شمعرفه .

" دخل جايبلي ماعون فواكهه مغسول ومرتب خلاه كدامي دفعته بدون ما أباوعله قبل لا يطلع رجع كال

إشهاب ـ نمارق اكلي وتغذي كافي عاد بطلي عناد ورعونيه مسوية روحج طفله

ـ لعد شكبرني غيرك انت وشمعرفك اني حامل لا تحجي وانت واثق من نفسك

ـ كلت حامل وخلص لاتضلين تعيدين بالموضوع وخابصه نفسج ترى ابني مو ابن حرام لو ابن حرام ما هيج تسوين

ـ كااااافي عاد عايش الدور كأب وحامل حامل اللي يسمعك يكول عليك دكتور شمعرفك انت واحد همجي ومتخلف

ـ أشكرچ كثر الله خيرج

نمارق ـ طلع وبقيت اكل بروحي تخبلت ساعه ابجي ساعه املخ بنفسي ما اريد طفل ما اريد اني بيا حال انوب احير بطفل اني بلكمتي الاكلها حايره انوب طفل

يارب خلصني من هالورطه

" ثاني يوم العصر اجه شمر عليه عباية رأس وغير ملابسه خير وين

إشهاب ـ ؏ الدكتوره مو ما تردين طفل نتأكد واذا اكو طفل أنزلنه علمود ترتاحيين حضرتج

نمارق ـ صدك تحجي لو تشاقه

ـ مو وكت شقه يلة لبسي

ـ وأهلك شتكول الهم

ـ ما عليج منهم يلة منتظرج يم الباب خلصي وتعالي

نمارق ـ راح وصفنت على بطني معقوله اكو طفل بطني وانزله وشعجب بهل السرعه وافق وأقتنع بكلامي وقرر ينزله هذا شبي

يلة بعد احسن واذا اكو طفل سامحني ما اكدر اجيبك على دنيا ظالمه امك وشابعه بيها تكفخ ولا اريد اكون ام الك لن ابوك ما اريده ولا اطيق وجوده بحياتي هما قتلوا عمي واغتصبوني لهذا سامحني وتموت احسن ما تولد لن بحالتين ما اكدر اتقبلك بحياتي ولا راح احبك الافضل تموت !!!

" عدلت شالي ولبست العبايه رغم على قياسي يمكن مالت رحمه بس ما اعرفلها لبستها شلون ماجان وطلعت لكيته يدخن وصفنته ادوخ واكف يم سياره مكسره حال الضيم حالها وصلت يمه خوما نروح بهاي

إشهاب ـ عندج غيرها

نمارق ـ لااا بس يعني والله ما راهمه تخزي

ـ صعدي

ـ ما أصعد والله باوع شكلها ودواخلها وسخه تلعب النفس مليانه قذاره اذا انت عندك عادي ومتعود اني لا ما اكدر

ـ لعد رجعي لغرفتج وروحه ماكو

ـ لا مو لهل الدرجه مشه وين تروح اشهاب

ـ عندي شغل اهم من شغلج مو فاضيلج ولا لسوالفج الماصخه

ـ اني شحجيت وفواكاها يعني، هسه بيت شكده شكبره ما عدكم سياره بيها خير بس هاي المكسره

ـ كلمن يمدد على كد لحافه يلة ولي من خلقتي لا ادفرج دفره انومج بفراشج شهر بحاله

ـ خوفتني

ـ خافي خافي

ـ شغل السياره ومشه خلص اوكف اروح وياك مشه بدون ما يسمعني اشهاب اوكف اشهااااب خرب راح والطفل راح ابتلي بي هسه اني شجاني وكت سياره بيها خير ما اعرف شبيه صايره اخربط بسوالفي رجعت وحناش طلع من المضيف وراه مصلح لفيت عبايتي ومشيت وكال

حناش ـ بلبل الفتان وين جنتوا تردون ترحون شنو نوه على العزم

نمارق ـ يا عزم

ـ يهزمج او يوديج لاهلج مثلاً

ـ لا منين كلها تساعدني وتأخذني لاهلي الا اشهاب

ـ ليش ما بي خير

ـ مشيت بدون رد

ـ لاتزعلين هو من يومه هيج فاهي وابرد من الثلج ما يحل ولا يربط

ـ هسه شتريد وين تريد توصل يهمك امري انت ساعدني ورجعني بيت ابويه

ـ بالحلم بالحلم محياج وموتج بهل الخرايب، يلى رجعي ولا تضلين تلفوين بالحوش لا يلوحج الطشار مثل نسواني

نمارق ـ عفته رجعت الغرفه مقهوره من تصرف اشهاب وكملها عليه حناش ساعاته مو واحد بي خيط خبال

" مر أسبو؏ ذابها ؏ الصامت احاجي ما يحجي اضل الغي لوحدي وهو ابرد من الثلج وهدوء قاتل يجلط والله

كاعد لوحده احمم اكدر احجي وياك

أشهاب ـ شعندج

نمارق ـ بعد ما توديني

ـ ماكو سيارة تليق بمقامج

ـ خلص راضيه اروح وياك بيها

ـ ما نروح شيلي الفكره من بالج

ـ لا عفيه والطفل واحتمال مو حامل انت مو كلت اوديج نتأكد بالاول احتمال ماكو حمل او يجوز بي مرض خبيث بالرحم ولهل السبب ما تنزل باوعلي بخووف وكلب عيونه

ـ تفلي من حلكج شنو هالحجي ما تعرفين تحجين حجايه يرأسها حظ دومج ترعدين بالشر

ـ اي يجوز مجرد أحتمال لن صايرة بينا أقصد بعائلتنا

ـ شلون يعني ما فهمت

ـ زوجة عمو صباح الله يرحمه جانت ما تنزل عليها اشهر هذا الحجي من ماما عرفته جانت تحجي هي والعمه ابتهال وسمعتهم ف شنوو ضلت اشهر تراجع عبالها اكو حمل تالي طلع اكو مرض ما اعرف ايش بالرحم شالوا الها ومن وكتها انحرمت من الاطفال وبقت بس على هاجر

ـ خوش تألفين قصص

ـ لا والله ما مألفه صدك هذا الكلام عبالك اجذب عليك

ـ لا

ـ يعني مصدكني والله صارت وبعدين شنو جابرني اكذب عليك واني وجهي مو وجه وحده تكذب وتألف

ـ أي وجهج رحماني ما شاء الله عليج

ـ تتقشمر

ـ ليش عندج شك

ـ لا

ـ خلص لعد

ـ وهسه

ـ ؏ شنو

ـ جاي تضحك بعقلي انت راح تخبلني اشهاب

ـ شمخبل منج، أنتِ خبله من يومج وعقلج صفر

ـ أشكرك

ـ العفوا يابه

ـ عفته ما حاجيته بعد طلع هم مو هين واني عبالي فقير

خوفك من السكوتي للعصر فتح الكنتور لبس افندي وكشخ ما ركزت على لبسه ولا حتى شكله باوعلي

أشهاب ـ العبايه بعدها يمج

نمارق ـ اي موجوده ليش

ـ لبسي وخل نمشي

ـ وين

ـ انتظرج

ـ ما كلتلي وين ما رد عليه وين يعني اكيد يوديني استبشرت خير ولبست وطلعت وراه لكيت اخوه مناف جاي ويحجون بينهم ما فهمت شيء منهم عبرني وصعدت السسياره شغلها وطلعنا

" ساكتين وتمشي بينا السياره بهل التراب والعجاج أنعميت لحد ما وصلنا نزل قبلي واني وراه لزمني من ايدي عوف ايدي

إشهاب ـ من أمن بيج اعوف ايدج يلة امشي لاتشلعين كلبي

نمارق ـ تجاهلته رجعت باوعت المكان وين جايبني هاي هم قريه لو شنو

ـ قريبه ؏ عربنا يلة دخلي

ـ وين مدخلني يمعود ماكو بس ولد وهذا مختبر تحليلات مو على اساس توديني ؏ دكتوره وفحوصات هي اعرف بشغلها صدك تحجي أشهاب من كل عقلك جايبني لمختبر الله يدري يجوز ما معترف بي لن بقريه

ـ لو بس تكبرين هالعقل، امشي عوفي الناس تتزرق انتي مو وجه نعمه لا والله وصوجي جبتج

ـ جرني ورجعني السياره شنو نرجع

ـ أي شتشوفين لعد

ـ خلص خل ننزل نسوي تحليل بس هاا بعدها توعدني تأخذني دكتوره

ـ ما تجنين عقل ما انزل وياج نرد لعربنا ابركلنا واشرفلنا

ـ لزمت ايده قبل لا يشغل السياره خلص موافقه وعد ما احجي حلكي اسده هممم يلة خل نسوي تحليل

ـ نزلي وفضينا ترى عليتني عل شلعتي كلبي وياج

ـ نزلنا وهو جان عصبي دخلت المختبر واجه الولد سألنا وكاله تحليل حمل واجه اخذ دم واني اقرأ ادعيه وخايفه اخذ الدم وطلعنا برة اكو قنفه شكلها تعبان كعدنا نتتظر شوي كام لمحل كبالنا وعيونه عليه يخاف انهزم وين انهزم وانت كبالي خانكيني خنك اجه وجايب ماي وعصائر ونساتل خلاهن بحضني

" بقينا كاعدين وساكتيين وصاح النا دخلنا عليه وكال

ـ الف مبروك حامل

نمارق ـ اخذ التحليل من ايده وشبه ابتسامه ولمعة فرح انرسمت على وجهه الا اني عبالك عدموني اخذوا روحي نزلت دمعتي وطلعت قبله يلة اخذني دكتوره تنزله اليه

أشهاب ـ اي مو الكدامج حمار بكيفج تمشينه صعدي صعدي لا بارك بيج ولا بعقلج الشايلته امشي امشي

نمارق ـ أي انزله وانت وعدتني شنو جنت تضحك عليه

ـ كل عقلج انزل روح الله زرعها بطنج بابا هذا الطفل ابني

لو تنكز روحج كدامي هسه هالطفل ما يموت

ـ والله مااااااا مستحيل اخلف منك اطفال ما اريد منك ما اريد ساعدونييييي يا عاااالم خلصوني منه كمت اصرخ واخربط وهو يجر بيه والناس طلعت تباوع النا صعدني وشغلها بكل سرعته طول الطريق ابجي ما اريد طفل ما اريد كمت ادفر بطني وردت افتح باب السياره اذب روحي واموته بس لزمني وكف السياره دفعت الباب وكعدت بالتراب ابجييييي ما اريده افهمني ما اريد طفل انت ودعدتني توديني دكتوره ليش جذبت عليه ليش

ـ شلووووون تردين اقتل روح والروح مني ابني ولج

وأنت امه بس يجي للدنيا راح تحبينه وتتعلقين بي متاكد

ـ بس اني ما اريد اكون ولا اصير ام لطفلك اني احتاج ام شلون اكون ام لطفل ما اريده اني طفله وتريد امها جلبت بقميصه امانه ساعدنيييي قبل طلبت منك مساعده ما ساعدتنيييي بس هسه اترجاك ساعدنيييي هالطفل ما اريده خلصني منه شتريد اسويلك بس ما اريده ما اريده

" ضليت اصرخ وابجي واتوسل بي تالي عافنييي راح بعيد وصافن عليه و؏ حاله اني تعبت ودخت فد مره اجه صعدني السياره ومشه بيها

" وصلنا كبل للغرفه تمددت وعيوني مورمه بلعومي مجروح وصوتي مطبك بقيت على نومتي لليل اسمع سعاد تحاجي

سعاد ـ شبيها صار ايام شكلها ما يعجب واليوم ما اكلتوا ولا لكمه وطلعتوا ورجعتوا كلت اشوفكم اسأل عليكم

أشهاب ـ ما بيها شي بس نفسيتها تعبانه تريد أمها

ـ اني لو بمكانها ما اسأل لا ؏ أب ولا ؏ أم

ـ قسمتها هيج شعليها هي

ـ عفيه أهلها شلون أنطاهم كلبهم يتخلون عنها ويعتبرونها ميته وابوها ينطيها الكم بكل دم بارد بحجة الثأر لا والله هذا أبوها يريد يخلص منها ولكه سالفة الثأر حجه وكربسها برأس هالطفله والا الثأر أتأخذ وعمها مات ماله داعي بعد بس ابوها حقير حسبي الله عليهم

ـ ولا تنسين ابويه وحناش ما رضوا ينطوونها بالاخص زلمتج عمها ما برد كلبه يحسس ما اتأخذ بالثأر وجلبوا بيها وشالوا خطيتها

ـ زلمتي وأنت اعرف بي يلة خيي انه رايحه وادزلكم الاكل بيد ايه اذا ما كظني حناش ومنعني خو تعرف سوالفه

ـ لا تكلفين على نفسج خيتي هي نايمه عود من تكعد الله كريم

نمارق ـ كل كلامها انحفر برأسي نزلت دموعي بخذلان وحزن عميق سكن أعماق روحي احس واحد ذبحني بنص كلبي قسمه الى اقسام يعني بابا تخلى عني واهلي معتبريني ميته طيب ليش شنوو السبب يخليكم تتخلون عن ينتكم لهل الناس ما عدهم لا رحمه ولا ذمه ولا ضمير

" دخل وشافني كاعده وتفاجئ مسحت دموعي وجاوبته إشهاب بابا باعني الكم بابا هو تخلى عني مو ...

الفصل الحادي عشر من هنا

لمتابعة باقي الرواية زوروا قناتنا على التليجرام من هنا