رواية سمرة الفصل العاشر 10 والأخير بقلم وسام الفراجي
ابوي كاعد وعمي ابو رشا يسمع وعمتي تسمعين وهاي البنات
اني رايد سهام ع سنة الله ورسوله !
و اني والله ويشهد عليه ربي ابوي ما يدري ب الي حجيته ولا يدري ب الي نطقته هسة بس جنت متيقن هو غالية عليه سهام وما يرفض الي حجيته والشور شوركم بعد وانتم اهلها وبكيفكم ..
اني حسيت بنغزة بكلبي جنت متوقعة اي شي يحجي الا هالسالفة احس عيوني صارت قلب الحب شوي واطير من الفرح ..
كلبي يدك بسرعة وحاولت اظم فرحتي قدر الامكان ماريد ينتبهون عليه ..
عمو رباح انخطف لونه مصدوم يباوع لخالد ولأبوية
امي الحايط يحجي وهي ماتحجي ..
متكدر ترفض كدام ابوية ماتريد تبين كرها خصوصا ابوية يدري خالد شنو ما يتعيب
البنات عيونهن مايرمشن
لحظة صمت رهيبة .. جان يكول خالد شبيكم شو ساكتين..
عمو رباح : شو ماكلتلي بهالموضوع قبل ما نجي
طبعا عمو رباح مايوم شفته يحاجي خالد بهالطريقة
خالد : اعرفك موافق يابه لا تنسى سهام هاي عزيزة كلبك
امي : جان المفروض تحاجي ابوك وتاخذ رأيه
خالد : من ردتي تزوجين سهام اخذتي رأي عمي ؟
امي : ماكو ربط بين الموضوعين والراي راي ابوها اذا يوافق
"..طبعا امي مو موافقة بس ماتريد تكولها مباشرة خصوصا ابوية يسمع فتريد ترفض بس بشكل ما يخلي ابوية يزعل .."
اني من شفت ردة فعل عمو رباح كلت عمو مايريدني جنة ببيتهم انقهرت هواي ..
ابوية كال .. ساعة المباركة والله يجي ابن اخوي ياخذ بنتي مانلاكي احسن منه خلقة واخلاق وسمعة زينة يكبعها وياخذها ..
شو امي ماعجبها كلام ابوية جان تكول
بس سمرة اجتها خطابة قبل يومين واحنه موافقين عليه وظل بس ابوها نكول اله اجوا عليها بيت ام مؤيد
" امي ما جانت تريد تنطيني لمؤيد ابن ام مؤيد بس رضت هسة بس حتى ما تنطيني لخالد ..
اني جنت راضية ب مؤيد اذا خالد عرفته مايريدني هم خوش انسان ومحترم وامه محترمة بس من تقدملي خالد لا خالد وبس وهو الحب الاولي بس جنت متيقنة ميحبني من اسلوبه
امي هسة اي شخص تقبل بي بس مو خالد هيج عناد حتى ما اصير احسن من اخواتي الباقيات تحسسني اني داخلة بمعركة وياهن واني والله مافكر ابد بهالشي ..
كل هالوقت عمو رباح صافن وماتدخل ابد بالنقاش جاي يفكر بشي بس ما اعرفه ..
ابوي كال لامي و انتِ راضية بمؤيد ومو راضية بخالد ؟
ـ لا مو هيج بس نطيناهم كلمة ..
ابوية كال لخالد مفروض تبلغ ابوك لان شو احسه مو راضي على هالنصيب وتغير لونه ..
اخذ موافقة ابوك واني موافق ..
امي : والعالم الي نطيناهم كلمة ترا ميصير
ابوية :اسكتي هسة مابية اكثر كلام صدري يوجعني
خالد : ها يابه شبيك احجيلي شنو الي مضوجك ..
عمو رباح : ماكو شي شو راسي صار يوجعني اترخص اني
عمو طلع بس ضايج كلش ولحكه خالد ومن طلعوا امي وكفت بباب الغرفة جان تكول لابوية
ـ قسما عظما ماتصير لخالد لو ع جثتي اني احترمتك جدام اخوك حتى مايكولون تمشي كلمتها عليك
ـ ابوية : يصير خير يصير خير ..
سمعنا صوت عمو رباح وخالد وهم بالباب
وسمعت بإذني يكول لخالد ماريدك تاااخذ سهام
اووو احسها سهم بكلبي سمعتها من امي واخواتي كلهم بس ماتوقعتها ولا يوم من عمو رباح اسمعها
هزت كياني والله حسيت الدنيا انسدت بوجهي معقولة عمو رباح يكولها ومايريدني !
فتحت الباب بدون وعي لكيتهم واكفين بعدهم وخالد يكله اريد وعمو رباح يكله ماريد ..
فتحت الباب وعمو يكله لخالد اختار غير سهام
باوعت بوجهه وباوعلي انصدم مني سمعته كلي عمو رباح ليش طلعتي ؟
ـ سمعت شكلت عمو شتختلف عن الي اذوني ؟
ـ بنتي انتِ مو فاهمة شي هالنصيب ماريده
ـ هههه تجذب عليه كل هالسنين غالية وغالية وحنينة والغزل ومن صارت صدك هسة تبريت
ـ خالد : فوتي سهام اني اتفاهم ويا ابوية
ـ ميحتاج كلهم نفس الشي ونفس التفكير روح عيش حياتك شوف وحدة احسن مني واحسن واحلى ليش تورط نفسك ويا بنية محد يريدها حتى ابوك
امي : شو طالعة عالباب وبعدهم ذولي فوتي جوة امشي انت يا خالد انسى سهام ماننطيها
خالد : القرار قرار ابوها وهي من ترفضني وقتها اسحب نفسي اما هسة محد يمنعني
اجه عباس من وكت ولكانه بالشارع متصايحين جان يطب شكو شنو القصة صوتكم لراس الشارع ..
خالد : سلامتك اخواتك ينخطبن ويتزوجن وانت ولا تدري شنو من اخ انتَ
عباس : احترم نفسك مو ابوية انت حتى تحاسبني
عمو رباح : كااافي كااافي تعالوا فوتوا جوة اريد احجيلكم شغلة جنت ظامها من اكثر من عشرين سنة ..
فاتوا الجميع وامي جانت مو راضية تسمع اصلا بس الفضول قاتل شنو هالشي الي صارله عشرين سنة ..
عمو وكف ع باب الغرفة وكاللهم فوتوا جوة ..
فاتت امي واخواتي وظل عباس ميقبل يطب لزمه من كتفه وكله طب اكلك وطبب خالد
اكعدوا كعدنا كلنا .. كعد هو بنص الغرفة صرت اشوف ايناس واكفة تباوع من الباب ..
كال هذا النصيب مايصير انسوه كلمن يفكر بنصيب ثاني يلوك اله ..
كاطعه خالد كاله يابه ماتلوكلي غير سهام
عباس وكف ع رجليه وكال اذا ماسكتت هسة اخليك كطعة كطعة صير ادمي وسولف زين
عمو رباح كال اسسسسكتوووا كااافي ..
عباس : شنو يمة خالد يريد سمرة ؟
امي : اسكت عباس مو وكتك هسة خلي نشوف تالي عمك شيكول
ابوية : احجي ابو خالد شنو مضوجك ليش ماتريد هالنصيب
عمو رباح : الغلط يظل غلط للموت وغلطت غلطة ماتوقعت يجي يوم والله يظهرها لكن سبحانك ربي
ابوية : ابو خالد ما افتهمت عليك شي تكدر تسولف ترا دوختني واني صحتي ع كدي والله احس نفسي دخت سولف وفضها
عمو رباح : هالنصيب مايصير لان سهام اخت خالد 💔
كتله شنو ؟ شنو اخته شجابني اخته لا اخته ولا شي
خالد انت اخوي ؟ مو اخوي خالد ليش اخوي احجي عمو شنو اخته ..
رشا : اكعدي سمرة اكعدي انتِ #مو_اخته ما خفي كان اعظم اني واعية من ابوية راح يجيب من الگن مال الدجاج بيضات
ابوية : رشاااا انلصمي حرف ماريد اسمع تدرين شيصير اذا حجيتي شي
امي : رشا اسكتي اني وياج منكدر نحجي واني مرمي عليه يمين الطلاك اذا يطلع مني حرف خلي ابوج يسولف
ـ شنو شبيكم شو كلكم تحجون الغاز شصاير مافهمت شي شنو گن دجاج شنو قصة شنو اخت خالد احجي يابه شنو السالفة شنو خافين عني ليش محد كلي
ابوية : ماكو شي بنتي المهم هالنصيب مدري ليش عمج رافضه وشنو علاقته بخالد القصة اليمي مالها علاقة بنصيب خالد
عمو رباح : الها علاقة لان مو كل القصة تعرفونها تعرفون انتم جزء بس منها
ابوية: رباح احجي الي تريد تحجي ترا كلبي احسه راح يوكف شبيك
عمو رباح : احجي انتَ الي تعرفه واني وراك
ـ يعني نظل تباوعلكم ومنعرف شنو القصة احجوووا رحمة لأهاليكم
ابوية : قبل عشرين سنة واكثر جان البيت بدون سياج و عندي گن مال دجاج واطلع كل يوم الصبح الملم البيضات بطاسة صغيرة ونتريك بيهن فمرة من المرات طلعت اخذ بيض بس اسمع صوت طفل مشيت عالصوت ولكيت طفل رضيع محطوط بفي الگن
شمرت الطاسة وشلت الرضيع وانتظرت يجوز امه رايحة بشي شغلة وهسة تجي وانتظرت حدما طلعت ام رشا تدورلي لأن تأخرت وشافتني شايل طفل وسألت عنه وحجيتلها بوقتها رشا تقريبا عمرها 10 سنين ..
ام رشا رادت مني اخلي الطفل بمكانه واني رفضت وكلت الها خطية الشمس راح توصله شنو ذنبه ..
كالتلي وين اودي ناقصنا ظيم شمعرفنا شنو قصته جانت تخاف يطلع ولد لان عدها رشا والثانية منى عمرها سنتين وجانوا يكولولها خلفتها بس بنات
خافت يطلع ولد ويصير هو الاهم عندي وطلع تفكيرنا غلط وطلعت بنوتة سمرة عيونها سودة سمارها يجنن ..
رادت اكثر من مرة اتركها وحردت عند اهلها علمود البنت ورجعت والبنت ماعفتها وكلت الها طلاكج يصير عليها اذا تمسيها بشي قسما بالله ..
البنت هاي هي #سمرة هسة !
ـ هههه جاي تشاقة صحيح ؟ كلي جاي اتشاقة وكل هالكلام جذب ؟ عيوني غوشت دموعي ساحت بخدودي كلت اله كوووول جاي اشاقة يعني اني مو بنتك ؟ مستحيل ما اصدك
امي : ترا واضحة انتِ وين شكلج ووين رشا ومنى
خالد : اشش لتحجين شي كدامي عن سهام
عباس : لتعلي صوتك ع امي ولك
ـ عمو رباح ماتريدني لخالد لان ابوي وامي مجهولين ؟ بس حقك اني يجوز بنت حرام ههههه
احجي واني بحالة صدمة من الي يصير مجاي استوعب كل حياتي عايشة بكذبة معقققووولة
كمت لزمت ايد عمو رباح وكتله حقك والله عمو خالد ابن حلال وعايش بعز واني ما ينعرف ابوي وامي منو ..
بنت شهوة ونزوة ماعندي اصل وفصل اصفكلك تخاف ع ابنك وارفعلك القبعة واني لو بمكانك اسوي نفس الشي
ديحجي ابوية كتله انتَ مو ابوية هسة مو ؟ معليكم بية اني مخبلة هسة وتخبلت لحد يحجي وياي وصديت ع عمو رباح كتله انتَ مو عمو انت رباح بس
كافي خليتوني كلشي ما اعرف عن حياتي ونفسي وعيشتوني بكذبة وكذبة وكذبة وعشت بين مأساتي من تفرقة امي ها صدك مو امي انتِ لذلك جنتي تفرقين بينه وبين خواتي رشا ومنى
هااا مو خواتي هذني هم ههههههه
شكلكم ؟ شنو يبرد نار كلبي ؟ شنو يبرد كلب بنت كبرت ووعت وهي ماتدري الي كاعدة يمهم مو اهلها
امي : ليش تحجين علينا فوك ما ربيناج ولفيناج ونعلف بيج كل هالسنين مثلج مثل البنات
ـ مثل البنات ؟ انتِ خصوصا لتحجين بهالشي انت جرح روحي الي ما يخلص جنت عايشة بذل ومهانة لان سمرة ومحلوة وجنت تعامليني ك حيوانة بدون مشاعر واذا اعددلك شسويتي بية ما اخلص
اكو ام ولو صدك مو امي انتِ بس لتكولين مثل رشا ومنى
اكو وحدة تزوج وحدة لمنغولي ؟ ترضيها ع بناتج.؟ لا بس اني لان بلا اصل ترضين
الشغل كله عليه وانظفلهن البنات حتى غرفهن
لج فستان الي جابوه اليه وكشخت بي استحسفتي افرح بي لزمتي شككتي
عمو رباح : كاااافي سهام
ـ لتصيح انت مو عمي حتى تصيح عليه عايفتلكم البيت واخلص منكم
عمو رباح : مو عمج اني ابوج !
ـ لتخبلني انتَ الثاني لازم ماسمعت الي ع اساس ابوية شحجه عني و شلون لكاني
عمو رباح : سمعت ولهسة اكلج اني ابوج لان اني الي حطيتج يم الگن !
ام رشا : شنو ؟ شلون ايمت ليش اصلا ام خالد جانت عدها خالد وماجانت حامل ليش تلفق بالكلام
رباح : اي صحيح هي مو بنت ام خالد هي بنت الزوجة الثانية جنت متزوجها بالسر وحملت بيها وماتت من جابتها وامها مكطوعة من شجرة مالها احد وماتت بالحمل واحتاريت بزماني ابجي عليها لو ع البنت الي اجت واخذتها دبرتلي عذر كلت الها ارضعي هالطفل امه بالمستشفى ورضعتها 3 ايام بعدين صارحت ام خالد بالحقيقة كالت ماريدها ولا ارضعها ولا اربيها حير بيها هسة من وكعت ايدك ع الحديدة حجيت لا والله ..
واني ماردت تبعد هواي واعرف كلب ابو رشا رجيج وجنت متأكد اذا شافها ياخذها يربيها بس حرت شلون اوصلها يمهم ..
فكرت بي هو كل اليوم الصبح يطلع يلملم البيض مال الدجاج فكلت خلي اخليها عند الگن واكيد يشوفها ..
هذا الشي محد يعرفه حتى هو وهسة بلا عرفه و انتِ بنتي وكلبي يظل ناطف عليج واموت عليج بس مكدرت اكلج الحقيقة خصوصا كبرتي والقصة صارللها سنين جنت ازور بيتكم بس اطفي شوك كلبي بشوفتج ..
ام رشا : مستحيل الي يصير مستحيييل انتَ ابوها
عباس : اني انثولت اني هسة ابوية منو ؟
رشا : اسكت انت سكوتك افضل
رباح : اسألوا ام خالد تعرف هالقصة اذا مو مصدكين اصلا من وقتها حلفت يمين ما اقربها ونظل محافظين ع خالد بس ولذلك صرت اتجه لطرق ثانية حرام
ـ انتَ ابوية !
- والله ابوج والخلق هالسمار هذا الي كله طالع ع امج الله يرحمها
ـ انتم تعرفون اني بشر مو حايط ؟ بشر بشر ميتحمل هيج صدمات عوفوني كلكم عووووفوووني ..
رحت للغرفة قفلتها ع نفسي وبجي بجي بجي حدما احس خلص ماي عيني ..
صوت رباح يدك بالباب يكلي افتحي بنتي اني مقصو وياج بس وحق رب العالمين اعوضج عن كل ساعة مرت بدوني
ـ عوفني رباح عوفني
ـ مو رباح والله ابوج افهميني اكو فحص اكدر نفحص وراح تشوفين انتِ بنتي فحص DNA يبين كلشي
ـ رباااح عوفني
خالد : افتحي الباب بس الي احجيلج 5 دقايق واطلع والله ماخلي احد يطب عليج ابد ..
فتحت الباب وركضت حطيت راسي ع مخدة ابجي ماريد اشوفه
فات راد يقفل الباب جان ام رشا تكول ويين تقفل وين كاللها خالد اختيييي هاي وقفل الباب ..
كلي
ـ كومي اكعدي
ـ احجي شعندك
ـ كومي احجي وياج باوعيلي
ـ ماريد
ـ سهام اخوج اكبر منج ديحاجيج !
- و انتَ مصدك
ـ مو خسرانين شي اذا نتأكد واذا صدك يعني ابوي هو ابوج واني اخوج تعرفين شنو اخوج يعني ورب الكفيل الي يمسج بوردة اشعل شوارب ابوه
ـ خااالد روح
ـ ماروح عندي ملابس اغسليها الي ولكيت واحد ياكل وياي بتالي الليل .. فكري زين ما الومج ع صدمتج بس فكري انتِ اخت خاالد وحنية خالد وكلام خالد وتصرفات خالد واني محروم من الاخوات هواي جنت اتمنى عدنا اخت وجنت دائما اكول لابوية يكلي الله كريم طلعت امي مخاويته هههه
ـ مالي خلك اضحك روح خالد
ـ سهاااام
ـ خلصت الخمس دقايق يلا اطلع
ـ ماشي رايح
ـ لااااا ظل
ـ مارايح اجذب عليج يلا امسحي دموعج وامشي بطولج انتِ بنت رباح
ـ خالد شسوي ساعدني والله من الصدمات مااعرف شسوي
ـ امشي نروح للبيت وودعي هالبيت كله وتعالي اعيشج حياة جديدة وعد اعوضج كلشي وانا اخوج
ـ انتَ واعي مصيبتي اني بالعشرينات من عمري وماجنت اعرف اهلي الاصليين والام الي ع اساس جانت امي تعاملني معاملة قاسية كل هالسنين طلعت مو بنتها
ـ يبعد ماي عيوني كتلج اني اخوج تعرفين شنو يعني خالد اخوج واوعدج اعوضج شني كل شوي اعيدها ثقي بية هالمرة بس ..
بهاللحظة اندك الباب .. صوت منى تكول بابا يصيحكم ..
خالد كال يلا كتله ماروح
سمعت صياح ام رشا عالي طلعنا اني وخالد ع الغرفة لكينه ام رشا تكول لرباح انتَ ضاحك علينا صار سنين ما استحيت ع نفسك وحاط هالبنت بركبتي واني الثولة عبالي مشمورة منعرف اهلها انتَ مو بس ضاحك ع بنتك لانها متعرفك ابوها انت ضاحك علينه وخليتنا نربي بنتك واحنه نحسبها لقيطة بالشارع ..
منى مومصدكة لان جانت صغيرة عمرها سنة يمكن او اكثر بشوي متعرف السالفة عباس مصدوم لان بالاصل اني اكبر منه ..
رشا جانت تعرف لقيطة بس وخافية هالحقيقة وجانت تعاملني مثلما امها تعاملني ..
تدخل خالد وكاللها لتعلين صوتج ع ابوية وهاي بنتنا هسة والفحص راح يثبت هالشي ومن يثبت خلص تنسوها
ام رشا كالت علواه قبل عشر سنين مو هسة درب يسد ما يرد
منى تبجي وعباس بعده بصدمته ..
اني شعوري مختلط جنت احب خالد طلع اخوي
زين افرح لان عندي سند مثل خالد لو احزن لان ماكدرنا نخطب ..
الله لا يعيش مسلم ذيج الصدمة ..
ابو رشا بنص الصياح تخربط .. ركضت كتلهم بابا تخربط بدون وعي كلت بابا ..
صاحت ام رشا ولبابة مو ابوج هذا ..
اخذنا عالمستشفى كلنا .. وحطوله اوكسجين وكعدنا كلنا برا ..
اجت رشا كالتلي ارجعي للبيت ايناس تخاف ومتكدر تنظف البيت وحدها ..
خالد : هاي اخت خالد الي يسمعها هيج حجي انوب ارجعه لظهر ابوه يلعب محيبس ويا العامود الفقري
لزم ايدي وكلي تعالي .. سحبت ايدي .. بعدني متوترة من قربه اليه .. نزلنا جوة صعدني بالسيارة اخذني لمحل شاورما #كص اكلنا ورجعني وكاعدة وياه من كدام نزل ايده ع ايدي ومسح عليه اني كبل سحبتها
ـ خاااالد شبيك
ـ اخوج ترا
ـ بعد ماصدك بشي
ـ ترا مبينة اني وياج نفس خشة ابوية
رجعت نتمشى وشفناهم كلهم كاعدين بالانتظار ينتظرون ابو رشا ..
رباح شافنه سوة وابتسم ويباوعلنا مانزل عينه حدما تعديناه
امي من وكفنا قريبين عليها .. كالت هذا المو شايف وشاف
تطمنا ع ابو رشا ..
وكلي رباح امشي نسوي فحص DNA باوعتله بعيني كلي امشي رحت اني وياه وخالد ..
سووولنا وكالوا الفحص يطول نهار او نهارين ..
وكلي خالد لملمي بس غراضج المهمات والباقي اني اشتريلج اياه ..
بديت اشعر بالحقيقة بديت احس هذا احسن قدر ربي قدره اليه
صرت احس شكد ربي يحبني وانطاني هيج عائلة تحبني وما تميز بالبشرة ولو هذا عذر عند الي جانت امي بس لان مو بنتها
اجه ببالي سؤال كلت لازم اسأل رباح بيها كتله رباح ؟ كال شو لا عمو ولا ابوية رباح كبل
غلست ع سالفته وكتله رباح عمتي تعرفني اني بنت ضرتها ليش تحبني هسة ؟
كلي اصلا متندمة وغالية عليها وكل مرة تكلي لو مخليتها وراضعته ومربيتها ولا عايشة يم هالحية ام رشا ..
بس هي ظلت ماتخليني اتقرب منها وهاجرين بعض لان متزوج عليها بالسر وكالت مالي اي شغل بيك روح تزوج الف لان هنت عليك وكسرت كلبي وهالكسر ماينجبر ..
رباح ورا شوي كاللهم اترخص منكم رايحين للبيت ..
ام رشا : سمرة تظل هنا ليش ماخذها
كتلها اولا اسمي سهام وثانيا مو بنتج شعندي اظل هسة صرت غالية ؟ واني رايحة ويا رباح ..
رباح كلش فرح وخالد ومشينا بالسيارة جان رباح يكلي بس كوليلي بابا وريحي كلبي صار سنين انتظر هاللحظة واحلم بيها ..
باوعت ع الجامة ومكدرت اكله وألفظها ..
وهو يباوعلي ويكلي سمار امج جان سمارها يجنن ..
مارديتله ..
فتنا للبيت وهو يحاول يرضيني ويغيرلي جو واني بعدني مو متجاوزة الصدمة هاي والتغيير القوي من ام قاسية
الى عائلة تحبني واب واخ يريدون بس يرضوني ..
بس بعد بداخلي صدمة وعصبية من الي سواه ابوية ومن هالاسرار الي قلبت حياتي ..
ثاني يوم اجه خالد محمل غراض نسائية وجاي اشكال الوان من الابرة لأكبر شي ..
يكلي هاي حاجاتج وغرفتي راح تصير غرفتج وتعالي اشوفج شنو حاط بالجرار ..
رحت وياه فتح قفل الجرار وطلع صورة بيها رسمة بالقلم الرصاص لعين وحدة من عيوني ..
كلي هاي معتز بيها هواي وظامها ماردت احد يشوفها
كتله
ـ خالد!
ـ شامات خالد
ـ خااالد
ـ جبد خالد
ـ يمعود خالد كول ها
ـ هاا مو مال غزل
ـ انتَ صدك اخوية وراح تدافع عني بكلشي ؟
ـ روحي ترخص الج يبعد الخنصر والبنصر
ـ ههههه مجاي اصدك انتَ مصدك ؟
ـ ورب عيونج الحلوة فرحت انتِ اختي اكثر مافرحت واني تقدمت ع اساس اخذج لان اني ناقصني اخت.. شعور وحدي بالبيت مولود شعور قاسي احلى نعمة بالحياة هي الاخت ماكو شي يعوض الاخت ابد
ـ يجي يوم وتقل غلاوتك اليه
ـ اذا تقل احلق لحيتي صفر وهي اعز ما املك
ـ ههههه اوعدني
ـ لتحسسيني اني بفلم تركي اوعدني واوعدني جاي اكلج بصوت عراقي مملوح #روحي_ترخصلج_يابعد_ماي_عيني !
اجه رباح وكال مجتمعين ويلادي وهاي نتيجة الفحوصات طلعت السيدة سهام بنت السيد رباح
كتله اي مبارك
كلي شو مبولزة عليه بنيتي اطلبي الي تريدي والله ماردلج طلب ..
كتله ماريد بعدني بالصدمة تريد بيوم وليلة اغير من اب لاب ثاني ..
كلي انتظر اليوم الي تكولين بي بابا ع احر من الجمر
رحت لام خالد كتلها خالة انتِ تحبيني ؟
ليش ماحبج بنيتي انتِ شنو ذنبج مالج ذنب ارتاحي ما زعلانة عليج زعلانة ع ابوج الي تركت اهلي علموده ووكفت وياه بالحلوة والمرة وبالتالي طلع متزوج ومن ذيج الايام صحتي كلما زال تصير مو زينة حدما صرت هسة مشمورة بالكاع ..
قهرتني كلش لان تحجي وعيونها غورجت ..
اخذتها ع صدري وباستني وكالت الي عيشي هنا خالد جان هواي بنفسه اخت ويظل يحجيلي بالاخت وجنت مستذنبة لما هجرت ابوه وظليت من يجيب طاري الاخت انقهر عليه واحس بالذنب بس مكدر اتخطى خدعته اليه محد يعرف شكد ضحيت علموده لذلك زواجه جان اله مردود جدا سلبي عليه ..
جاي تحجي واندك الباب ..
كمت حتى اطلع افتح الباب جان اصير وجه بوجه اني وخالد كلي ويين ؟ ارجعي قوانين القديمة ماكو!
الباب يتكسر متفتحي ماريد احد يشوف سمورتي
طلع عالباب بعد دقيقة صاحني سهام سهااام تعالي اجوا نسوان عالباب ..
راح هو صعد للغرفة ورحتلهن لكيتها ام مؤيد ونسوان 3 وياها ..
بصراحة ارتبكت حيل واستحيت وهليت بيهن وطببتهن ع غرفة خالتي ام خالد لان متكدر تكوم ..
وطبيت وزعتلهن مي بارد يشربن .. جان تكلي ام مؤيد اني زعلانة عليج تفاجئت بصراحة ليش تزعل ايمت صار بينه شي حتى تزعل كلت الها ليش خالة كالت ..
نركض وراج من بيت لبيت رحت ع بيت اهلج طلعتلي امج كالت طردناها لبيت عمها ابو خالد واني ما اندلكم والله من واحد لواحد يلا كالونه ع بيتكم ..
ـ ههه الله ينطيج الصحة والعافية بس ذولي مو اهلي اني اهلي هذولي جنت هناك زيارة وقتية اني بنت رباح العلي
ـ والنعم منج ومن اصلج بصراحة لو بطارف المحافظة هم اتعنى عليج
خالتي : شو اني مو فاهمة شي
ام مؤيد : والله رايدة بنتج بالحلال لإبني مؤيد وعادي انتظركم تسألون علينه تريدون تفكرون او تريدون ننتظركم شهر شهرين سنة عادي احنه مشترين بنتكم
خالتي : والله مابيها شي نتشرف بيكم وع راسي بس الها اب واخ تعرفين الهم كلمة لازم نشيرهم
ام مؤيد : اي حقج من اللوازم هاي انتظركم ع راحتكم تشاوروا واذا تريدون تسألون ع ابني اني مجاورة
للمدرسة **** حايط ع حايط
خالتي : الله يقدم الي بي خير ان شاء الله
شربوا جاي وراحوا وخالتي صاحتني كالتلي بنتي هاي الزواج عمر مو يوم ويومين اختاري وفكري صح حتى حياتج تمشي صح اي غلطة ب اختيار شريك الحياة طول عمرج تتندمي ..
رحت لغرفتي وصرت اقارن بين كلام خالتي وبين كلام الي جانت امي ع اساس فرق من السما للكاع ..
جنت مرتبكة من خالد لا يروح يسوي شي مايعجب اذا سمع مؤيد تقدملي ..
اجوا وخالتي مافتحت الموضوع حدما تعشوا
وكالتلهم بصراحة انحرجت احراج مو طبيعي وجنت هيج ما ادري شنو يتصرف خالد ..
كالتلهم خالتي اجت خطابة ع سهام
رباح كال ساعة المباركة اسالوا عليهم وشوفوهم والراي الاول والاخير لسهام
خالد ظل ساكت احسه ضاج ..
كتله ها خالد احسك مو راضي ..
كال لا بس بعدني ماحسيت احساس عندي اخت وناكل سوة ونلعب واشاقيها بالبيت جنت كلش محتاج هالشعور بس الحمد لله يمكن الله مو قاسملي اعيش شعور الاخت
كتله عادي اذا مو حاب هالنصيب اتركه كلي لا خوش ولد هذا اعرفه شخصيا ..
ردينالهم الخبر ورا 3 ايام موافقين ..
وصارت الخطبة والعرس بشكل سريع وعزمنا بالعرس بيت ابو رشا ومحد اجه بيهم بس منى
وتزوجت مؤيد الحمد لله وهو اسمر مملوح مثلي انسان يحترمني ويقدرني هواي وبليلة عرسي قبل ما طلعت من بيتنا باوعت لرباح وكتله
#يابه
ثقوا بالله صار يبجي من سمع هالكلمة كأنما جانت حلم من احلامه
وعشت وياه ايام من اكلكم عوض عن كل المآسي الي شفتها متصدكون يعني انسان يخاف الله بية يخاف عليه خوف ابوي ميخاف عليه وعمتي انسان ام مو عمة والله تطبخ وياي وتغسل مواعين ومدللتني دلال ..
رشا صار عمرها 39 حاليا وماتزوجت وعباس ظلت ايناس تدك براسه حدما عزل عن اهله وخلاهم وحدهم ومن طلعت منهم ماطبيت بيتهم ابد ..
وهسة عايشة ملكة ببيت عيالي وملكة ببيت اهلي وعندي اخ يسوة الدنيا ومابيها
الى هنا جانت نهاية قصتي اني سهام واخوي خالد و اشكر الاستاذ وسام الفراجي ع قبوله نشر قصتي
النهايه
لمتابعة باقي الرواية زوروا قناتنا على التليجرام من هنا
