رواية فصيلة دمشق الفصل العاشر 10 بقلم احمد
(عذروني عالتقصير عيوني بعدهن حمر بس لان تأخرت عليكم حبيت اكتبلكم هالبارت ❤️)
ميرا.. بقيت اتابع لحد ما خلص وطلع بعدو الخوالي ومن خلص بسبب الاجواء نعست كلش فطفيت التلفزيون من الجهاز الي يمي ونمت
كعدت ثاني يوم الصبح واني ببالي اجيب سليم يسفطلي القنوات بس محتارة ماعرف راح يوافق لو لا لان اعرفو يكره هيج اشياء
كلت اذا كلش اخليه يعلمني واني اسفطهن فاجت ببالي طريقة وهي انو اهتم بيه بلكي يغزر بيه ويوافق يسفطهن
جهزت الريوك ومن اجو جنت اي شي يحبو اقربو عليه وحتى جاي انطيتو بعد بابا مباشرة وعفتو عادل ونعمان وماما
ميرا.. سليم تريد شي
سليم.. باستغراب .. لا
ميرا.. تمام
سليم.. نزل الخبزة من ايدو .. اطربيني
ميرا.. شنو
سليم.. اهتمامج هذا وراه مصلحة فاحجيلي شرايدة
ميرا.. ههههههههه شغلة صغيروووونة
سليم.. وشنو هي
ميرا.. بس تسفطلي القنوات
سليم.. انسي
ميرا.. ليش
سليم.. تدرين بي اكره هالشغلة
ميرا.. مو هواي بس قنوات الام بي سي وسوريا دراما
سارة.. سفطهن لاختك لو عدها احد غيرك يعرف جان ما طلبت منك
سليم.. تمام بس بشرط
ميرا.. شنو هو
سليم.. تسويلي دولمة اليوم
ميرا.. بس ماعندنا ورق عنب ولحم او دجاج للحشوى
سليم.. اني اجيبهن وسويها عشى اذا ما تلحكين
ميرا.. اتفقنا
خلصنا ريوك وكلتلو يحط الام بي سي كلهن بالبداية ووراهن سوريا دراما كال تمام ورحت سويت غدا ويا ماما
هو خلصهن بسرعة وراح جاب احتياجات الدولمة وبلشت بالحشوة لان هي اكثر شي يأخرني واريد اخلص منها قبل الغدا
جهزتها بين ما ماما كملت الغدا ورحت تغديت وخلصت ورجعت لفيت الدولمة وبقت بس احطها عالنار العصر واحط عليها الماي
طبعا الدولمة اني وماما متعودات نسويها بورق عنب مو سلگ (البعض يسموه سلج) لان ماما متعودة على ورق العنب من الصغر واحنا نحبو بسبب حموضتو
بين ما غسلت المواعين وخلصت صارت الدنيا عصر بس احس نفسي زومبي كوة امشي توضيت وصليت ورحت نمت
كلت لماما انتي اطبخي الدولمة ولا تكعديني لحد ما اني اكعد كالت تمام ومن نمت اخذتني النومة لاذان المغرب كعدت على صوت ماما
كالت صار الاذان كومي كلتلها تمام وكمت نزلت وياها جانت الدولمة مستوية ودا تحطها فرحت عالسريع صليت ورجعت لكيتهم بلشو بالاكل
سليم.. اكل لكمة وباوعلي .. شنو هاي
ميرا.. باستغراب .. شنو
سليم.. هي هاي هم دولمة
ميرا.. بخوف .. شبيها
سليم.. متعب نفسي وصار من الصبح انتظر تجيني اخير شي الدولمة ما تنبلع
اكلت لكمة منها ومو مديح لنفسي بس والله كلش طيبة باوعلي سليم وضحك وعرفتو سوا بي مقلب وباوعتلو بحزن
نعمان.. ضرب سليم على علباه كل قوتو
سليم.. ااااخ ابن ال........
عادل.. هوب هوب يمعود
سليم.. ابن الخوش اوادم
نعمان.. هاي علمود مرة ثانية تراعي مشاعر الي يتعب لخاطرك ولو انت ثور ما يفيد وياك
سارة.. خلص كملو اكلكم يلا ميمي تعالي اكلي يشاقيج اخوج ما تعرفيه
ميرا.. بسيطة بسيطة
خلصت عشى وغسلت المواعين ورحت على غرفتي اخذتلي دوش وطلعت مشطت شعري واني اتابع المسلسلات
الشي الحلو ان قناة سوريا دراما جانت اوقات المسلسلات كلهن بعد صلاة العشاء يعني مختارين افل وقت للمشاهدة
واني تعودت اخلص شغلي بالليل واروح اتابع وبهاي الطريقة ما يفوتني اي حلقة الا اذا اجونا ضيوف بهالحالة ماكدر اتابع
طبعا عمي جان يجينا هو وحدي وجدتي بس عيلتو ما اجو علينا ماعرف شنو السبب واحنا ما سألنا خليناهم براحتهم
قرب العيد وماما اتفقت مع بابا ياخذنا للسوك وقبل بيوم بالليل كالت تذكري شنو تريدين علمود باجر نروح للسوك ونشتريلج كلتلها تمام
بس من رحت للغرفة نسيت التفكير والتهيت بالمسلسل الى ان نمت واني مو متذكرة ولا شغلة وحدة هههههههههه
ثاني يوم بعد الريوك اخذنا بابا للسوك نزلنا وبلشنا نفتر بالسوك جانت اجواء قبل العيد كلش حلوة والسوك صاير ازدحام مو طبيعي
ميرا.. ماما ليش اجينا
سارة.. هههههههه شنو فقدتي الذاكرة
ميرا.. لا بس لا نروح على احد ولا احد يجينا شعدنا نكشخ
سارة.. ميخالف هو كل اسمو عيد
ميرا.. والله من طلعنا من سوريا ما بقى الي نفس بشي
سارة.. إن شاء الله نرجع ونرتاح بس خلينا هسا نعيش الواقع ونترك المستقبل لله هو يدبرو بمعرفتو
ميرا.. ونعم بالله بس ماما عندي طلب
سارة.. شنو هو
ميرا.. اريدج تحطيلي مكياج هالعيد
سارة.. لا مو زين عليج
ميرا.. فدوة ماما هو بس بالعيد هاليوم هذا ماراح يأثر
سارة.. هسا خلي نكمل مسواك ابوج راح يعصب
ميرا.. تمام
عرفتها راح تقتنع من تحججت ببابا فكلت من نرجع للبيت اقنعها اول شي اخذنا لماما ملابس وبعدها اجى دوري اني
اخذت فستان اصفر عجبني تصميمو كلش واخذت وياه شال نفس اللون وشوية اكسسوارات وعلى كولة ماما نواعم واحذية ورجعنا للبيت
رحت فورا لبست الفستان والشال والحذاء ورجعت عند ماما شافتهن كالت مبروكات قياسهن كلش مضبوط عليج
ميرا.. ماما حطيلي مكياج
سارة.. لج ماما شلزكتي بالمكياج والله مو زين عليج
ميرا.. ماما والله يوم واحد ماراح يأثر وانتي حطيلي بنفسج علمود ما احط ثكيل
سارة.. هفففففف امري لله بس روحي هسا بدلي ملابسج لا يخربن
ميرا.. ياااااااي
رجعت ركض عالغرفة واسمع ماما وراي تضحك على خبالي بدلت ملابسي وضميت ملابس العيد وجهزت الذهب الي راح اللبسو بالعيد
بالليل اجو اخواني كل واحد بيدو علاكتين ماخذين ملابس واحذية وراحو يلبسوهن علمود نشوفهن وننطيهم راينا
اني عبالي مشترين بنطلونات بس تفاجأت انهم مشترين دشاديش وشماغ وعكال يعني زي عربي بس ان كلش حلو
واكثر واحد طلع حلو عليه اللبس هو عادل لان اضخم منهم والدشداشة مفصلة جسمو تفصيل وطالعة تخبل عليه
ومشترين لكل واحد ساعات سود باقي بس يحلقون قبل العيد ويكونون مكملين كلشي يعني كشختهم اسهل من البنات
رجعو بدلو ملابسهم وعافو الدشاديش علمود تكويهن ماما وبابا مثل اخواني هم اخذلو دشداشة مع شماغ وعكال وحذاء
جنا بسوريا دائما نسوي حملة تنظيف للبيت اني وماما بس هالعيد ما سوينا لان قبل فترة صغيرة كعدنا بالبيت ونظفناه
حلويات راحو قبل العيد بيوم العصر ماما وبابا اشترو واجو ومن وصلو راحو اخواني علمود يحلقون ويجون
اني وماما عزلنا الحلويات الي يموعن مثل الكاكاو بالثلاجة والكرزات حطيناهن بدبابي وشلناهن بالكاونتر لان بالثلاجة تصير بيهن رطوبة
واكثر شي قهرني انو ماكدرت اكل منهن لان صايمة ههههههه المهم قبل المغرب بشوية اجو اخواني محلقين ومرتبين نفسهم
راحو سبحو عالسريع واجو علمود نحط الفطور وبين ما اذن المغرب جان كلشي جاهز فحطينا العشى وتعشينا
جنا مسوين كبة ذاك اليوم وهي من ضمن افضل الاكلات عندي واكلت اكثر من اهلي كلهم وخصوصا انو صايمة وجوعانة
سليم.. لج ميرا شو ما يبين عليج الاكل
سارة.. هي جسمها هيج شتسوي يعني
نعمان.. لا ترا سمنانة
سليم.. منين الها السمن
نعمان.. لا والله عدا الشقة سمنانة مو مثل قبل باوع حتى خدودها كبرانات
ميرا.. خاف صايرة مو حلوة
نعمان.. لا والله يلوكلج السمن وبالاخص وجهج متعدل مو يابس مثل قبل بس هم انتبهي لنفسج لا تسمنين هواي وتخربين جسمج وتصير دبة
ميرا.. ههههههههه لا كلشي ولا اصير دبة
خلصنا اكل وكلامهم انطاني حافز كلشي قوي بس جنت خايفة انو اسمن ويخرب جسمي فكلت لازم انتبه لنفسي منا ورايح
كملت شغلي كلو بالليل وجنا جايبات حنة اني وماما من رحنا للسوك وجبنا نوعين نوع للنقش ونوع لداخل الكف
اول شي حطتلي ماما داخل الكف وعلى الاصابع وبعدها حطتلي نقشات خارج الكف وغطت ايديني ورحت نمت وهي عدلتلي الغطى
كعدت ثاني يوم من صلاة الفجر بس احس اصابعي يوجعني بسبب الحنة لان يابسة فكمت اول شي سويتو رحت غسلت الحنة
جان منظرها ويا بياض ايديني يخبل ورحت صليت ورجعت عند ماما كالت اخواني وبابا رايحين لصلاة الفجر واحتمال يبقون هناك
رحت اني اخذتلي دوش ومن طلعت لبست ملابس العيد ومشطت شعري بس ما سويت تسريحة بس سرحتو
ومن نزلت لكيت اخواني وبابا راجعين وكالو مو مجهزين نفسهم من راحو لصلاة الفجر وجان باقي شوية لصلاة العيد وراحو
اني رحت على ماما خليتها تسويلي تسريحة وحطتلي مكياج بعد ما اصريت عليها وراحت تكمل الريوك قبل ما يجون بابا واخواني
جان المكياج ويا التسريحة من صدك مطلعني اخبل خفت على نفسي لا احسد نفسي من جمالي ههههههههه
وهذا مو غرور بس الحمدلله الي انطاني هالجمال هذا رغم يزعجني ببعض مواقف مثل مصطفى بس يبقى نعمة من ربي
الجهال قبل ما تخلص صلاة العيد بلشو يفترون وبابا متعود كل عيد يفتح الباب شوية ويحط وراه حجرة صغيرة
يكول مايصير الباب يتسكر بالعيد والجهال من يشوفون الباب مفتوح يدخلون فورا عالحوش واطلع اني انطيهم جكليت
اتذكر بنتين جان عمرهن تقريبا 6 سنين اذا مو متوهمة اسمعها تكول لاختها او صديقتها باوعي هاي المرة شكد حلوة
كلت بكلبي هاي اني صايرة مرة واني مادري هههههه قبل كم يوم جنت جاهلة بكدهن بسرعة ما مر الوقت وصرت جبيرة
بس كلامهمن عني عجبني وتعرفون بعد انو اي وحدة من تسمع كلام بيه مديح عنها تطير من الفرح وبالاخص من اطفال ما يعرفون المجاملة
بذاك اليوم انقهرت على بابا لان جان ضايج لا يكدر يروح يسلم على ابوه وما يصير ابوه يجي عليه لان الواجب بابا يروح
وبابا ما يريد يروح ويشوف مصطفى لان يعرف لقائهم ماراح ينتهي على خير بس الافضل انو ما يروح علمود ما يتعاركون
اتصل على جدو وعايدو وشرحلو الوضع وجدي كال مو مشكلة واني ما اعتب عليك والي يسأل عليك دا نكولو ماكدر يجي عندو ضرف
ولاول مرة بالعيد ما نشوف خوالي بس اتصلنا عليهم فيديو عايدناهم وتطمنا عليهم واستغربو انو احنا مو ببيت عمي
كالتلهم ماما انو البيت صغير وما حبينا نضايقهم واجرنا بيت وهم اقتنعو لان مو معقولة باول كم يوم نتعارك وياهم
والحلو بماما ما تحجي كلشي لاهلها مثل بعض نسوان تحب تخلي امور عمامي بعيدة عن خوالي والعكس يعني امور خوالي بعيدة عن عمامي
وبابا دائما يمدح بيها بهذا التصرف وكدام خوالي يكوللهم انتو ما تعرفون امور اهلي والفضل لله اولا ثم سارة الي ما تحب تنقل اخبار
وجان يحجي كدامهم هيج علمود يعرفون انو تربية ماما تربية صحيحة ويرفع من شأنها كدامهم وهي كلش تفرح بكلامو
اخواني مثلنا اني وماما لا راحو ولا رجعو لان ما يعرفون احد بالمنطقة بس استغربنا من اندك الباب الساعة 8 الصبح
راح عادل فتحو جانو زلم 3 سلمو عليهم واخذلهم طريق ودخلو عالاستقبال وراح بابا عليهم وسط استغرابنا منهم
اجى عادل وسألتو ماما كال ماعرفهم اول مرة اشوفهم وقمنا بواجبهم حسب الاصول ومن راحو رجع بابا عالصالة
سارة.. منو ذول
سمير.. الجيران يكولون حبينا نجي نعايدكم وهم نتعرف عليكم
سارة.. الله يبارك بيهم
سمير.. اي والله جزاهم الله خير
ميرا.. اني رايحة انام تعبت كلش
سارة.. تمام نوم العوافي
ميرا.. الله يعافيج
رحت لغرفتي باوعت لنفسي بالمراية وبكلبي كلت بالله مو حرامات تروح هالكشخة والترتيب والمكياج بدون ما احد يشوفني
وهنا ما جنت اقصد انو يشوفني رجال لا جان قصدي يشوفني صديقاتي او كرايبي النسوان لان كرهت الزلم بسبب مصطفى
يمكن من الي اعرفهم احب كم واحد وهم اخواني وجدادي ثنينهم وعمي وبابا بين الي احبو وما احبو لان كرهو الي من اني وصغيرة اثر علي
ابن خالي وايمن ابن عمي احبهم حب اخوي لان اخلاقهم حلوة وما شفت منهم شي مو زين وذول بس الي احبهم والبقية اكرههم
المهم بدلت ملابسي ومسحت المكياج وفتحت التسريحة وعفت شعري مفتوح ونمت ما الي خلك امشطو او الفو هسا
غطيت بنومة كلش حلوة ما انتهت لقبل الضهر بشوية كعدت مو شبعانة نوم كمت لفيت شعري وتوضيت لصلاة الظهر ونزلت تحت
جانت ماما مسوية غدا لحم من الاضحيات الي اجتنا من الجيران وبابا ما ضحى بهذا العيد وما سألتو عن السبب
بين ما اذن الضهر وصلينا كمل الغدا وتغديت وخلص ورجعت لغرفتي نمت مرة ثانية لحد ما صارت العصر وكعدت
هالمرة كعدت شبعانة نوم بس احس جسمي بيه خمول لان نومي متقطع ومدري شلون صاير وتعرفون بعد انتو روتين العيد
هو سبحان الله بدون كلشي من الضهر يصير ضوجة وفوكها احنا كأننا من كوكب او ديانة ثانية فصارت الضوجة بعد اكبر
اخواني قررو بالليل يطلعون للسوك يغيرون جو ويروحون يلعبون بليستيشن او بليارد ويتونسون وكلت لعادل يأجر بليستيشن
كال ماكدر لان ماعرفهم ومايكدر يأجر مثل من جنا بسوريا ومادري صدك ما يكدر لو حجة منو علمودوما يجيبها وياه
جان قبل من يجيب العب وياهم واتونس بس ما اعرف العب طوبة فيلعبون وياي سباق سيارات او لعبة توم وجيري
مر الوقت طبيعي وبالليل بعد العشى اخذو السيارة وراحو وجنت اتمنى اني هم ولد واطلع وياهم واتونس بدال هاي الضوجة
بس للاسف ماكدر اطلع بس يلا الحمدلله على كل حال اهم شي خلقتي تامة ومابي نقص او عيب هذا اهم من اي شي ثاني
رحت لغرفتي وشغلت التلفزيون وتابعت مسلسل وادي الذئاب الجزء الاول جان ببدايتو ومن كثر الكلام عنو والاعلانات صار عندي فضول اتابعو
بالبداية جنت كلش اكره شاكر بس شبعت بواجي عليه من مات كلش انقهرت عليه يمكن لو اعرفو بالحقيقة ما ابجي عليه هالكد هههههههه
جنت دا اتابع المسلسل وسمعت هوسة يم البيت وصوت بابا وياهم كمت عالسريع رحت عالغرفة الي شباك صاير عالحوش
شفت بابا سكر الباب مال البيت وطلع يركض ومن ركضتو عرفت صايرة مصيبة لان بابا مستحيل يركض اذا ماكو شي صاير
نزلت ركض على ماما جان وجهها اصفر كلتلها شصاير كالت مادري بس من دكة الباب وصوت الناس صارت بي خوفة
جبتلها ماي وبقيت انتظر وياها اي خبر من بابا واتصلت عليه ماما اكثر من مرة وما يرد اخير شي رد وصوتو كلش تعبان
لمتابعة باقي الرواية زوروا قناتنا على التليجرام من هنا
بدل ماتدور وتبحث علي الروايات خليها علي تليفونك وحمل تطبيقنا
