رواية هدية الشيخ رضا الفصل الأول
قد ترمي بينا الاقدار في اماكن ومع اشخاص لايخطرون على بالنا ابد
قد نكره ،،،،،حياتنا معهم
وقد نختار الابتعاد عنهم
ولكن تمر الايام وتثبت لنا انا كنا
خطأ وان الذي فرض علينا
من الله كان قدر جميلا
،،،،،،،،،،،،،،،
ليله
اشتغل بيت اهلي واسمع صوت ولد اخوتي يلعبون
بالحوش طلعت لبره اسگي لوح الخضره
الي زارعي كعدت انظف بالدغل
وعيوني عليهم يلعبون
بالطوبه وفرحانين
انا ليله،،،،،، بنت علوان الحارس
عمري20 سنه يكولون عليه حلوه طالعه
لامي بيضه وعيوني عسلي وشعري جوزي
طوخ هي من اهل الموصل
ابويه من جان يدوام عسكريه
وي اخوها متعرف عليهم وحبها لامي وخطبها وتزوجها،،،،،، وجابها لديرته
تحملت ضيم وفگر وعوز ووكفت
وي ابويه بالحلوه والمره
الى ان لكه شغل يم بيت الشيخ سالم ابو الشيخ رضا
عشنا يمهم وكبرت اسمع بصيتهم الطيب
بين الناس ابنه رضا تزوج مرتين
وكل خلفته بنات جنت اشوفه من انا صغيره
يجي وي ابوه للبستان يكعدون بي وي ضيوفهم
يتسامرون ويتعللون شاب طويل وجسمه
متروس اسمر وشعره اسود فاحم
اسمع من ابويه هو عصبي كلش ومايرضى
بالغلط وكلامه واحد وره سنين مات ابوه وهو صار
بمكانه ظلينا يمه لان ماقبل نمشي من يمه
ظل يروح ويجي للبستان اراقبه من وره
الاشجار يكعد ويصفن للخضره وره فتره كام
مايجي سمعت ملتهي بشغله بغداد
وهنا بالديره ومضيفهم
انا هم من كبرت كمت مااروح
لبيتهم مثل الاول شكد ينشدن علينا اهله
مانروح جانت بس امي تروح بالمناسبات وترجع
من وكت ماطول لان ابويه شويه صعب ومايقبل
المره تطلع من بيتها الا للضرورة
بطلت من سادس ابتدائي
بحكم تقاليدنا الي ادكول البنيه
مالها غير بيتها وعيب تظل رايحه وجايه
جدام
بجيت وجنت اريد بس ادوام بس ابويه ماقبل
ورفض توسلي كعدت وسكتت بس ظلت بنفسي
اكمل حالي حال البنات
عندي اخوان ثلاثه،،،اثنين يشتغلون فلح بكاع الشيخ
رضا اخويه عباس مزوج بنت عمي
زهره وعنده 3ولد
وناصر مزوج نعيمه من ديرتنا
وعنده ولد وبنيه
حسين قبلي يدرس طبيه ببغداد هذا
الي فلح بأخوتي بس همه يدرس
وابويه فرحان بي،،،،
احنا كلنا كاعدين بيت جبير وحديث
يعود للشيخ رضا
والعيشه مستوره والحمد لله
سمعت صوت ابويه صاح
«بويه عباس وينك
«هياني جايك بويه
«وينك صارلي ساعه انشد عليك
«جايك
«يله وليدي يادوبنا نلحك لان
الشيخ على وصول لبيته
ليله وينج ياليله
«نعم بويه أمر
«بنتي جيبيلي الحزام العريض
اتحزم بي اليوم عدنا دك كراب
«اي بويه تأمر
رحت ركض جبت الحزام وانطيته
اله وابتسمت من دعالي
«الله يرضى عليج بنيتي ويخليج اليه
انه وامج
« يله بويه مشينا ،،،،اخوك وين
«راح قبلنا
« تمام يله خلي نعجل ورانا شغل هوايه
اليوم
طلعو من يمنا رحت وراهم ظليت اعاين
عليهم راحو يتمشون لبيت الشيخ
الي صاير بينا وبينه سياج
فتحو باب عليهم
ودخلو له
،،،،،،،،،،
رجعت للمطبخ سمعت زهره مره ناصر
ادكول
«خايبه نعيمه ليش مانروح وياهم
لبيت الشيخ ايكولون ذابحين الذبايح ومحتفلين بجيته من العمره هو وامه
«شمالج يازهره تريدين زلمنا اطگنا
اذا نسلم من ابويه الحجي مانسلم من عدهم
«اووف خيه
هذا بس حظنا تراها الوادم كلها راحت بس احنا ضلينا وجوه البوم بالبيت
«اي والله وانتي الصادكه
امي ندهتهن
«يمه زهوره مادكومين انتي وليله تحضرن
الغده
«اي يمه كايمين
«ولج اكفي ليله،،،،،، مو خاف
يجيبلنا بويه الحجي من غداهم
«يا شبيج زهوره تريدين ابويه يجيب غده منهم وانتي تعرفي نفسه
شكد عزيزه
«اي والله انا اعرف بويه الحجي مايسويها
زهوره حجت هيج وامي ردت
«يولون كومن عاد وزهبن الغده من وكت
للجهال وانتي نعيمه شيلي العجين دانخبز
اني وياج
«اي يمه كايمه بس انتي اكعدي انا اخبز
لاتعبين حالج
«لا يمه اني وياج علمود نفض الشغل
من وكت
بيت الشيخ رضا جانت حليمه مرته تفتر وتامر وتنهي على الواكفات يشتغلن، ،، شافت بتها الجبيره
صاحت
« ولج دعاء خابري على زاهد شوفي ابوج وينه
وليش تأخروا هلكد
«يمه خابرت وانطاني رفض
يعني واصلين
«چا خوش ،،،،،،اذا واصلين
انا حليمه ام دعاء مرت
الشيخ رضا،،،وام بناته الخمسه الله ماقسملي يصير ولد منه وهاي ضلت حسره بگلبي لان جنت
عايشه بخوف لا يزوج عليه وصدك سواها
وتزوج سميه بنت شيخ انور صديق عمي
من وره طلابه صارت بينه
وبين اخويه واهلي ولان وكفت وياهم
سوه هالشي حتى بس يقهرني بي
جنت اشوفه كله يمها وحرمني من حقوقي الزوجيه
وخلاني يوميه وكل ساعه وثانيه
ودقيقه يحترك دمي
جنت اطلع قهري بسميه واستگويت عليها
لان جانت فقيره وماعدها لسان هم كامت تجيب
اله بنات وهالشي برد گلبي وتشمت
بي من جابت له الثالثه ماتت كلت خلصت منها
وراح يرجع اليه بس هو جافني
بعد اكثر وسكن غرفه لوحده
هالشي جان يقهرني
حجيت ويا مايكلف نفسه حتى يعاين عليه
ومن الح يكلي
«لاطلعيني من طوري انا مبقيج هنا لخاطر
بناتج
،،،،،،،،،
الشيخ رضا
طلعنا للساحه الي توكف بها السيارات لاحو لي من
بعيد ولد عمي وناسي وهلي و وزاهد
رجل بنتي واكفين وينتظرونا،،
اجوي بسرعه عليه
« هلا بالشيخ،،،الحمد لله على
السلامه وتقبل الله منكم اعمالكم
« امين زاهد شلونكم بويه وشخباركم
انتو واهل الديره
« الحمد لله والشكر الكل بخير ويتانون جيتك
« عساهم بخير دوم
حجيت وي ابن عمي حيدر ،،حظني
وكمل مبتسم
«الديره بلياك ماتسوه
حيدر اخويه الماجبته امي،،وسند ظهري هو وزاهد وعلي ولد اختي حياه مشيت وياهم واني اسال عن احوال سلفنا واهله
ركبت،،،،بسيارتي،،،ووراي اهلي وناسي،،،
ورديت لسلفنا،،، احجي وي حيدر وامي
وصلنا،،،وره ساعات طبيت قريتنا اخذت نفس واني اباوع على الزرع
اشتاگيت لهواها وخضرتها
اشتاگيت للمضيف مالتي ولمه هلي
حواليه
انه الشيخ رضا بن علي شيخ قبيله جبيره والها صيت معروف بكل مكان اخذت المشيخه من بعد ابويه
الي توفه قبل فتره،،،
عمري37 سنه خريجه كليه الزراعه متزوج من بنت عمي الي تكبرني ب10 سنوات وعندي منها دعاء الي مزوجه ابن اختي حياه وزينب وزهاء نور وسكينه الصغيره هاي من حليمه اما سميه الله يرحمها عندي مريم وورده ووعد
الله ماقسم الي الولد والحمد لله بناتي اموتن عليهن ذني وردات بيتي اسمع مرات،،،، من بعض
الناس الي يكرهوني كلام على الشيخ بس يخلف بنات
وهو ابو البنات هذا الشي جان يقهرني
لان اريدن ولد يحمي خواته ويصير حزام ضهر الي
والهن بس اخ، ،،،،،،
مو كل شي يتمناه الواحد
ياخذه
«يمه رضا،، شمالك
احاجيك صارلي ساعه
وماترد عليه
انتبهت لامي من حجت وجاوبتها وانه مبتسم
«ها يالحبيبه احجي شمالج
اسمعج،،،
«اكولن يمه وصلنا لسلفنا موو
«اي يم وصلنا ،، شوفي ذاك شارعنا
«الحمد لله والشكر ربي والله گلبي
موجر واريدن اشوفن بيتي وحبوبتك والبنوات
«چا بس ذوله مشتاگه الهم
حجيت وابتسمت
« شمالك تتبسم يارضا
كوول،،، احجي اعرف
وراك،،،سالفه
« ههههه اكولن مااشتاگيتي لحليمه
«بسك عاد تونا رادين من بيت الله
لاتخليني احجي واشيل ذنب
ههههههههههه ضحكت من كل
گلبي من سمعت ردها لامي
لان اعرفنها زين هي
وحرمتي مو صلح ،،،ومن زمان هي ماتحبها وتودها من وره سوالفها الشينه
سكت والضحكه راحت من تذكرت شسوت بيه هي واخوتها من وره كاع ابويه،،،ذبيت حسره
من گلبي ورجعت عكدت الحواجب
من تذكرت الطلايب الصارت
وره وفاه ابويه
افكاري طارت،،،من وصلنا لبيتنه وره ربع ساعه
وشفنا اهلنا وناسنا واكفين
ينتضرونا
نزلت،،،اشوفن ولد عمي متحزمين
وينتظروني،،،واول ماشافوني كاموا
يرمون ويهوسون الي،،،
ابتسمت من شفت عزوتي وناسي
داير مدايري،،،لاح لي ناهي
ابن عمي مطشر واكف بعيد هو واخوته
وولدهم،،،ومااجه تحمد الي بالسلامه
ابتسمت وعفته،،،لان اعرف
جاي غصب من وره حجي العالم
انتبهت لواحد من ولد عمي من حجه وحظني
«ياهلا بالشيخ هلا باخويه نور السلف من
اجيت
« تسلم اخويه وبارك الله بيك
عاينت لامي طبت كبل للبيت ظليت واكف وي عمامي وولدهم اسلم علي الناس الي تارسه بيتنا
ومزرعتنا وبعدين طبيت
للمضيف مالتي كعدت وي الناس الي جايين
يتحمدون بسلامتي
ومافكيت روحي من سلامهم الا وين
اشرت لابو عباس يجي يمي
«ها شيخ تأمر بشي
« عم علوان الغده زاهب كملتو كلشي
«اي شيخ زهبنا من زمان ووره الصلاه ان
شاء الله نصبه
«ماأريدن تقصير وي الضيوف
عم عباس،،،،
«لا شيخ،، على بختك
ان شاء الله مانقصر
كمت وترخصت من ضيوفي ومن كاموا
اشرلتهم اكعدو مشيت من يمهم
اروحن اسبح وارجع لهم
مضيفي صاير بره بمسافه عن البيت
مشيت له طبيت تلكتني ام دعاء وهي تضحك حضنتني
«هلا يبعد بيتي وهلي الحمد لله
على السلامه
وخرت منها،،،وجاوبتها
«هلا حليمه شلونج وشلون البنات
«الحمد لله كلنا بخير
« يستاهل الحمد
حجيت هيج وشفت
حبوبتي ام ابوي جايه تسند على
على عكازتها
« هلا يمه،،،،هلا بالغالي ابن الغالي
هلا بريحه سالم،،،نورت بيتك وديرتك يبعد روحيتي
سمعتها وابتسمت ورحت امشي الها ودنكت حبيت ايدها وراسها
«يمه يبعد عافيتي يبعد طولي
البيت خله عليه من رحت
وينك ييمه ليش توخرت علينا
چا مادكول هاي حبوبتي
ظلت وحيده چا مادكول خطيه
تريد واحد يكعد يمها ويهرج
وياها خذيت امك ورحت وخليتني
لوحدي، ،،ليش يايمه وشلون
انطاك گليبك،، هذا
ابتسمت من سمعت عتبها
عتبها وسوالفها ومن دكت على گلبي
جاوبتها
«رجعتلج يايمه اجيتج وها راح اكابلج
واكعد بالديره
«اي يبعد شيبتي تره روحيتي راحت
من بعدكم
«اسم الله على روحيتج يمه
عمرج طويل
« عمرك اطول،،،يبعدهم كلهم
ابتسمت ورفعت راسي
وانه ادور على بنات سميه ومن
شفتهن واكفات بعيد
اشرتلهن تعالن وهن اجني يركضن
عليه مريم عمرها11 سنه
وورد 8 ووعد 6 سنوات
ذبن روحن بحضني وهنا يبجن
حجيت وانه امسح
براسهن
«ليش البجي يبعد ابوجن هياني رديت
الجن وخرن خلي اشوفن،،
شلون طالعات بناتي الحلوات
وعد حجت وهي تأتأ
« بويه هاي دعاء رتبتن ومشطت
النا شعرنا ،،،
«عفيه بيها لدعاء هي من يومها
حنينه عليجن وتحبجن
« ليش هلبجي هسه اليشوفجن عباله حليمه طاكتجن لو مجوعتجن
حليمه حجت عاينت الها بخزره سكتت ودارت وجهها امي،، اجتي وسمعت كلامها
ماقصرت وردتها
« منو يطكهن غير اكسر ايده واعلكها
بركبته ذني بنات الشيخ رضا ومحد يكدر يمسهن
بجلمه وانا موجوده غير اشوفه
شي مو شايفه
كلت
« يالله،،،،اروح اسبح حتى اطلع للناس
البره
رحت لغرفتي ،،،طبيت لحمام گبل ذبيت
هدومي وسبحت بسرعه حتى
اطلع للضيوف الي قسم جايين
من بغداد وغير محافظات
ولازم يردون من وكت
كملت سبح وطلعت لاف المنشفه
على جسمي وتفاجات بحليمه كاعده على
الجربايه ذابه شالها وصابغه شعره اصفر
طوخ مادرت بال رحت كبل لبست دشداشتي
ووكفت كبال المرايه امشط بشعري واعدل بروحي
كامت واجت وكفت ورايه حضنتني حجيت بضوجه
«حليمه عندي وضو واريدن اصلي
وي الزلم
«ما أشتاگيت الي
عرفتها على شنو تقصد وشنوو تريد مااهتميت
لان گلبي برد من يمها من زمان من وره دكتها الناقصه هي واخوها وخرت منها
رحت شلت العبايه
ولبستها
«شمالك رضا كاعد تشوفيني مرتبه روحي الك
وصابغه شعري وانت ولا حجيت
ولا كلت كلمه
درت وجهي منها وجاوبتها بدون نفس
«حلو بالعافيه ،،،عليج
من ردت اطلع حجت
« رضا شبيك انه كاعده انتظرك ساعه ساعه وگلبي ملهوف عليك وانت ،،،،،،،،شوف شلونك
وشلون تعاملني ببروده
اندرايت عليها وحجيت بعصبيه
«شبيج ياحرمه بعدني توني طبيت
للبيت وبده العتب مالتج،،
وبعدين ليش تساليني وانتي
تعرفين البيه
حجيت هيج
وتقدمت عليها وكملت واني اعاين الها بخزره
«حليمه،،،،،،،، انتي تعرفين شبيه
فماكو داعي تعيدين بالكلام
كل فتره افتهميها،،،عاد وبسج
تلحين بشي ماراح تشوفي
طول عمرج،،،،
سكتت وكملت بغضب اشر بايدي
بوجهها
انتي اهنا ام بناتي وبس
مال ترجعين مرتي
ويجمعنا فراش واحد
لا والف لاااااا،،، لان النفس
كرهتج من وره سوايتج الشينه
حليمة
سمعت وكبت بيه نار
الدمعه نزلت
من عيوني
وجاوبته بحركه گلب
«جا هيج الحجي يارضا
هانت عليك العشره هانت عليك بنت
عمك وام بناتك ونسيت
الاصول والشرع
رضا
«اي تهون مثل ماهانت انه عليج من رحت
واشتكيتي وي اخوج عليه هانت من وكفتي ضدي وشهدتي زور وطعنتيني بظهري
اسكت لو احجي بعد
ماكلتي وين الاصول وين الشرع
من سويتي هالسالفه
الرديه
«بس انا عرفت غلطي واعتذرت
منك بدل المره الف
«بعد ايش حليمه بعد ما الگلب
مات من يمج وذبحتيني
بسوايتج هاي
نفضت عباتي بغضب طلعت للمضيف مالتي
وانا احس بگلبي موجر نار من هاي السالفه
والله لو ما عدها هالبنات وتصير سالفه بنص الديره الا اطلكها واخليها تولي لاهلها
انا الشيخ رضا من مات ابويه ابن عمي يجي يريد يأخذ كاعي عيني عينك لا وفوكها حرمتي تكف ويا باطل بباطل وتشهد لاخوها العار بس ربك
وكف وياي وطلعت الحجه يم امي ضامتها ،،،،،طلع ابويه مشتريها من عمامي وعماتي قبل سنوات لان
ماقبل كاعنا تروح للغريب او
تتقسم
وشهدو باقي عمامي وعماتي بالي صار
وذاك الجلب الي كام ينبح عليه وطلع لسانه كدام اهلي وناسي سكت
بس حجه حجايه قهرني بيها
لهسه گلبي نار من وراها
العار يكول هو خلفته
كلها بنات وراح ناخذهن لولدنا
وغصبا ماعلي تصير الكاع
والاملاك النا
بوكتها،،، ومن وره حجايته
رحت خطبت سميه بنت
شيخ انور،،، وردت بس الولد الي يرفع اسمي
ويصير حزام ضهر لخواته
بس الله راد تصير عندي
3 بنات وتوفت سميه من ولدت الثالثه
گلبي وجعني عليها لان فقيره وماأذت احد
وجنت اعرف حليمه شسوي
بيها والف مره ارزل بها
وتوصل للضرب
بس هي مايفيد
بيها السوته بيها خلتني اكرهها بعد اكثر
وهي بسوالفها الشينه وي امي وخواتي وحرمتي
الماتت خلتني اجفي منها واكره شوفتها
طبيت للديوان وصلينا
صبو غده والشباب وكفت تخدم بالضيوف وتخلي
الزاد كدامهم ظليت اعاين لعم علوان شلون واكف وويوجه بيهم ،،،،،انا بلا هالزلمه ماأسوه شي من زمن ابويه ولحد هسه هو واكف وولده ويايه رجل وقور واله سمعه طيبه وصاحب عزه نفس مو طبيعيه مايرفع عينه لا هو ولا ولده على حريمنه ولا عمري شفت حريمهم من راد يطلع من المضيف
صحته
«تعال عم علوان
اكعد ويانا وتغده انته وولدك
«لا ياشيخ اكلواا انتو بالعافيه
انا اروحن اشوفن الحرس تغدو
لو بعدهم
«لا عوفهم زاهد خذالهم الغده اكعد انت وولدك
وتغدو ويانا ،،،تفضل يله مد ايدك
للزاد
« زاد الله فضلك شيخ
صفاء
بيتنا امي تفتر علينا وادكول
«يل يابنات صبن الغده وخلي النسوان تتغده
تره بعد شويه مانلحك لان الضيوف راح تجي بس نفض الاكل
حليمه من سمعتها ردتها
«ماتصيحين بناتجن يشيلن ويانا
لو على راسهن ريشه
حياة اختي سمعتها وردت بضوجه
«شمالج ياحليمه عبالك ماعندج عيون لو كبرتي وماعاد تشوفين زين مو واكفين ونصب
الغده
« خليت الكبر الج عيني انه بعدني صغيره
وعيوني احسن منج اشوف بيهن وماشفتج
اجيتي غير هسه
«يا دهر صابج وفلك طرج كولو امين يمه انه
وصفاء من الفجر كاعدين. ماخلينا شي ماسوينا نضفنا البيت وسوينا كدور الدولمه والي طبخت
الاكل وهي بسها تفتر وتتأمر علينا
لا وتخابر الخاتون سو كليجه لاخوجن وامجن ،،،انه مااكدر
«اي وشكو بيها مسويات اليه لو
لاهلي الهم،،،،مسويها وجايبيها
« منووو يمه اهلج عوذه من سيرتهم الي ماشفنا
منهم غير بس الاذيه
«هاي عليمن هذا الحجي حياة
« سمعتيني حليمه وعرفتي عليمن
ومالها داعي اعيد
حليمة عاينت لامي ترجف من غضبها كالت
« عمه سمعتي بنتج شحجت على اهلي
« بسج عااد تره دوختيني
وانه جايه من طريق طويل وامشي اكفي وياهن وصبن الغده بلا دوخه راس ولا قال ولا قلت
«هذا انه من حجيت دختي ياعمه اعرف حظي
يمج مو كاعد ولا راح يكعد
«استغفر الله ياربي شمالج انتي تريدين اطلعين
حسنا بهل اليوم كاعد اكلج اكفي وي
بناتي وقدمي الزاد للدايسه
بيتنا ماكلت هالكلام الج ولبناتي
سكتت تعاين بضوجه لامي الي كملت
«تحركي وحركي بناتج وياج الكسل لافيج انتي
وياهن وشغلتجن كاعد تصير بشلعان
الگلب
امي عاينت عليه وكملت بهده
اامشي صيحيهن خلي يجن يكفن وياجن
مو يريدن الكبار تخدم بيهن
اي يمه هسه
مشيت هي ورايه رحت يم الدرج صحت البنات
نزلن امي تلكتهن بخزره وانهدت بيهن
ترحن للمطبخ وتكفن وي عماتجن وتزهبن الغده
للضيوف ومااربد اي تقصير يصير
لا تعرفن المن اكول والمن احجي
بنات اخويه خافن من تهديد امي وكالن
اي جده هسه نروح
راحن للمطبخ امي طبت لجدتي رحت وراها
سمعتها سألتها
«شمالج يانبعه اشوفج ضايجه وصتير نار
امي ردت بغضب
«من دهر صاب حليمه لا تسكت من احنا لحالنا
ولا هي ساكته من يجونا ضيوف الا
تفضحنا كدام النسوان بمشاكلها
وسوالفها الرديه
« شوكت جازت هي من الفضايح حتى اجوز
هسه هاي ماتفيد دواها رضا يطلكها
ويدزها لناهي مذلوله
« اخ ياعمه بعد السوته بي جان المفروض يطلكها
بس ماكسر ظهره غير هالبنات الي بركبته
وشفتي انتي هجرها ولا حاسب
عنده حرمه
زوجي يانبعه بلكي يجي الولد الي نريده
ويكسر خشمها
« ياعمه حجيت وكلت بس هو ياجل بيها
وحك الله يم بيته دعيت الله يرزقه البنت الي
تريحه ويجيب منها الولد
« يالله وين وتصير هالسالفه ويجي الولد
الي يكسر خشوم التحجي علي
وتعيره بخلفه البنات
اسمع كلام امي وجدتي واكول بگلبي يارب
يزوج ويكسر خشم حليمه الي زادت بتكبرها
علينا من سميه الله يرحمها هم جابت اله بنات
دعيت لاخويه ياخذ وحده تريحه
وتجيب اله الولد الي ظل
بنفسه واحنا ويا
رضا
«يقولون احذرو من كسر
الخواطر فانها
ليست عظاما تكسر بل هي
ارواحا تقهر»
وكفت بالمضيف انطي هدايا ضيوفي
وهم هدوني هدايه على سلامتي
تقدم ابن عمي ناهي اخو حليمه وقدملي صندوق بيه مسدس مطلي بالفضه تشكرت منه
«تسلم ياأبو علي
«انت السالم ياشيخ
ناهي سكت للحظه وبعدين باوع للاوادم الكاعده وكمل بضحكه
«انه مااضن واحد من الكاعدين
هدالك مثل هديتي الغاليه
جفص بالكلام وخله وجوه الادوام تتغير
انه متعود ،،، الا يحرجني بكلامه كدام
الناس رديت
«القيمه مو بالهديه يابو علي
القيمه بمحبه الناس واحترامهم الي
وجيتهم عليه
«صح لسانك يابو شبل
من جاوبوني الزلم،،،
انتبهت اله ضحك ودنك عليه وكال
بهمس وبيني وبينه
«چا هو وينه شبل
عكدت حواجبي وعاينت اله بقسوه
لميت ايدي بقوه ونار كبت بيه
وجان ودي الزمه وادك راسه بهل المسدس
الجابه بس سكتت لخاطر ماانفضح
بنص الاوادم الكاعده
وعدالي شبع من سمه ،،،بس لاا
تفاجات بيه من اندار على
عمي ابو عباس وكال
«يمكن بس بقى ابو عباس ماهدالك
هديه زينه
حجه وياه بأستهزأ وضحك
عيوني تتبعت عم علوان
وشفته احمر من خجله،،،، ونزل راسه
ولده صفنوا على ناهي ووجوهم
صارت دم من القهر تمشه الهم وهو يضحك
وخله ايده على جتف ابو عباس
وكمل وهو يعاين الي واله
«اشوفنك سكتت يابو عباس ماتحجي
ليش ماجبت هديه للشيخ لازم
زاده ماغزر بيك
«بسك عاد
ياناهي وتعال اشرب جايك
تراه برد
حجيت هيج اريده يسكت ويعوف الزلمه لان
العار حرجه وداس بطنه هوايه عم علوان ظل
يعاين علي بقهر وبعدين عاين عليه
كال بصوت مخنوك
«لا ابو علي انا جبت له هديه ومو اي هديه
لا هي قطعه من گلبي وغاليه
عليه هوايه
العيون صارت علي من تكلم هالكلام اجه
ليمي اعاين علي الزلمه صار فد مره والوجه
انطعن دم كمل
«شيخ رضا هديتي الك بنتي ليله الي هي
اغلى من روحي خذها حليله الك على سنه الله ورسوله
صفنت علي مذهول من الكاله
اعاين للضيوف عيونهم عليه وعلي
كسر الصمت ضحكه ناهي العار
من كال
«بنت الحارس للشيخ بويه وين
صايره هاي
غضب ترس گلبي لان كسر خاطر عم علوان
وخلاه يهدي بنته لي جدام الكل
ظليت صافن علي منزل
راسه والقهر
بين بملامحه ولده اجوي ليمه گضو
عاين الهم شفت النظرات بينهم كلت
« عم علوان هديتك مقبوله وراح اخليها على
راسي واشهدو يل الربع بعد 3 ايام تجوون
وياي ونخطب المستوره بنته
« حياك الله ياشيخ وماسويت الا الصح
عاينت لناهي مذهول من كلامي وصافن عليه
وماكدر يحجي كلمه قربت من عم علوان
وكلت مبتسم
« ارفع راسك عم ماعاش الي ينزله وانا موجود
وبنتك راح اخليها بعيوني ومااقصر
وياها بشي
اجه باس جتفي وولده معه بست راسه
الكل يعاين لي باعجاب لان جبرت خاطره ومافشلته ناهي نفض عباته وطلع من الديوان
وهو يحجي ويدردم من الجابه لروحه ولاخته
كعدت عم علوان بصفي هو وولده
وكلت
«اسمعوا ياأهلي وناسي
عمي علوان معزته جبيره عندي
وولده يشهد الله اخوتي وحزام ضهري
وما فد يوم حسيتهم يشتغلون عندي
لا والله الشاهد حسبت اهلي من اغيب عن بيتي مأمن بيهم يحامون عرضي ويفدوا،،،بأرواحهم
وهاي انه اعيدها على عمي انا الشيخ رضا
ابن الشيخ سالم جايك بعد 3 ايام اخطب
بنتك واريدها لي حليله
«هلا بيك شيخ شوكت مااجيت
بنتي لك حليله
من حجه عم علوان بصوت ناصي عرفته بعده مغثوث من سالفه ناهي بس انا جبرت بخاطره
لان انه هم بخاطري اريد اتزوج بعد ماترهم اظل بلا مره لان ام دعاء كرهت قربها من
وره السوته بيه
فضت الكعده وي الضيوف ساعه 12 بليل
ودعت الناس،،،،والي بات وصيت
الولد علي ،،،طبيت للبيت ورحت
كبل لغرفه حبوبتي وامي
كعدت يمهم وحجيت الصار الهن
من كملت كلامي شفت وجه امي تغير وضاجت
«يمه شمالج اشوفج ضجتي
«يمه شلون مااضوج وانت ادكلي راح
تزوج بنت الحارس ابو عباس انت الشيخ رضا ابن الشيخ سالم الي متزوج بنات شيوخ تزوج بنت
حارس عندك
فريت السبحه بضوجه وجاوبت
امي واني اكد على كل چلمه
«يمه انتي علويه وجايه توج من بيت الله شلون تحجين هذا الحجي شنو شيوخ وشنو فقره كلنا ولد ادم وحواء ماكو فرق بين فقير
وغني يم ربج
«استغفر الله يارب ابني مو قصدي
هيج بس خااف بعدين تتندم
«لااا يمه مااندم وبعدين بيني وبينج انا محتاج مره بحياتي بعد الي صار نفسي عافت حليمه
والگرب الها كرهته
«وانه ادري يبعد امك حاسه بيك
حبوبتي جانت تسمع وهي مبتسمه حجت
«شمالج يانبعه مو توج جنتي ادكولين اريدن
ازوجه ودعيتي يم الكعبه يزوج حتى يجي
الولد هاي اجتي ليمج وراح يزوج ويجي الولد
المفروض ياخايبه ادكومين ادبجين وتهلهين
لان ولدج راح يعرس
حبوبتي حجت هيج وكامت
تهلهل وتصفك وتهوس
«اريد اركص ركص واكسر الكاشيه احنه اهل الولد موش اهل الابنيه ...
«وعرس الزين هيل وطش بالولايه
هوساتها وهلاهلها
خلت الكل يلتم علينا
حياة طبت تضحك سالت
«خير شمالجن اسمع هلاهل جده
« اخوج راح يعرس،،،ولجن الشيخ
خطب وراح يعرس
حياه فكت عيونها وكالت
«صدك يمه رضا راح يزوج
«اي يمه صدك.
«ومنو هاي العروس ،،،وبنت منوو
«بنت عمج علوان ،،،الحارس
«عمو علوان الحارس
«اي يمه هي
«چا اذا هي اكلك الله حبك ياخوي
وانطاك على نيتك الصافيه والطيبه
«ليش ولج
امي سالتها ردت مبتسمه
«يمه ليله حلوه وگمر ذاك اليوم من اجيتكم
ورحت للبستان،،شفت
وحده كاعده تحوش خضره من الكاع
بس شنو عبالك مو بشر عبالك حوريه بيضه والعيون كبار وجوزيه لا
والرمش طاخ بالحاجب
عبالك هلال
«اي يمه والله اني جنت وياها تخبل
من الحسن الشايلته وخلتنا انه وحياه
صافنيين عليها
صفاء ايدت اختها حياه وهي تضحك
ابتسمت وكلت
« همزين ماخلقج الله ولد جان
رحتي خطبتيها الج
«ههههههه ضحكتني والله ياشيخ
«عوفج منه وعايني عليه
يعني حلوه البنت
«يا يايمه مو شايفتها انتي من جانت تسير
علينا من هي صغيره
امي صفنت للحظه وبعدين
جاوبت صفيه
«اذكرها حلوه بس يايمه من
كبرت ،،،بعد ماشفتها
«اي كبرت وزادت حلاتها
«اذا هيج ابقن يمنا خلنا
انروح بعد جم يوم نشوفها ونخطبها للشيخ
« المن تخطبون
الكل اندارت على الباب من سمعوا
صوت حليمه حياه كالت
«سلاما قولا من ربا رحيم
«شبيج عيني ام زاهد شفتي شيطان
وتتعوذين منه
«لااا والله شيطانه واعوذ بالله منها
سمعت صفيه شحجت كمت لحيلي وطلعت من
يمهن حليمه لحكتني صعدت لفوك
هي ورايه طبيت غرفتي
ذبيت العبايه سألت بخوف
« رضا صدك راح
