رواية الشيهانه والعاصوف الفصل الأول
مساء النور والسعادة على كلوبكم
لطفا وليس امرا صوتوا عالبارت وعلقوا بين الفقرات حتى تصعد اكثر 🧡💕🧡💕 ممنونة منكم
٠
٠
يا غائبا حاضرا في النفس منزلهُ
وفي الفؤاد له عــــــرش واركانُ
وفي الغياب له طيف يــــؤرقني
وفي الحضور له شوق وتحنـــان
ارفق فانك بالهجران تقتلـــــــني
وارحم فانك يا انسانُ انســـــــانٌ
اقتباس: كيناز
وان قيل لك ما بك؟!
قل بي كسوف مؤقت
قل الكون بداخلي يتجدد
قل الشمس تزيل بعضا من رمادها
قل استراحة محارب
ولكن؟
اياك ان تقل انك متعب.
كن قويا فالحياة تميت الضعيف
قهرا
بالامس كنا نفتقد الحريه
واليوم نفتقد المحبه
اذن التخلي هو علاج ولو كان اوله مر !
٠
٠
بغداد: منطقة الشعب
طلعت من الثانوية الظهر الشمس تضرب على راسي من قوتها. ولساني يبس بلهاتي من الحر خليت الجنطة على راسي وركضنا نعبر الشارع اني وصديقتي سدرة امشي سايحة روحي من الحر وهية تسولف منطلقة بكلبي شكد الج خلك تحجين. بالي مو يمها ابد جوعانة وعطشانة معدتي كتلتني من الالم من البارحة مماكلة وعشانا جان خفايف
عبرنا الشارع والطالبات انتشرن انتشار مكثف بالشوارع من كل جهة عبرنا للجهة الثانية سالتني باستفسار
_ اكلج كنوزة ماتجين يمي باجر ندرس سوية مراجعة للامتحانات اني وياج عالواهس حبابة عاد منج معلومة ومني معلومة نحفظ المواد شتكولين؟؟
باوعتلها وهزيت ايدي كتلها
_ هاي شبيج انتي خبلة لو بيج مرض الزهايمر كلساع اعيد عليج النشيد الوطني نغنيه
قاطعتني تقنعني متاملة اوافق
_ ايي لعد شبيها يااعيني.. مو هاي اني اجيكم كل فترة ادرس يمج عوود ليش بس اني وانتي لااا
_ لان انتي ماعندج اخو مخبل مثل العندي انتن كلجن بنات بالبيت مالجن حس وهادئات ومن تجيني حظي الزفت يجيب بسام النا شوفة عينج يكوم يغرد ويلعب بينا فلك لا نكدر ندرس من وراه ولاعدنا مكان نختلي بيه غير غرفة وحدة كلساع كاسر صفحة من الباب صاير بالاسم باب
هاي من عدا زيوني وشقاوته وحركاته مانفتهم من وراه كلشي وابتسمت متذكرته....
حبيبي هسة تلكيه واكفلي بالباب متانيني
حجيتها ووكفت تذكرت مااشتريتله لطمت كصتي متصنمة
_ عزة بعيني نسيت اشتريله شي خطية رجعت للمحل ركض صار ورانا ببداية الفرع بامتار بقت هية تباوعلي وتهز ايدها اشرتلها تنتظرني ورحت ركض
وكفت بباب المحل لكيت خالة انتظار كاعدة بيه تبيع سلمت عليها واني افتح جنطتي اطلع مصروفي
دورت كتبي لكيت 500دينار بنصه الحمدلله موجودات مصمدتهن صارلهن كم يوم طلعتهن واشتريتله كيكة وعصير وطلعت باوعتلهن بالعلاكة مبتسمة هسة الكاه منتظرني شنو جايبتله
تمشيت وية سدرة رجعت سالتني
_ يعني هسة شنوو مراح تجين يمي لو اجي يمج ندرس سوية؟؟
جاوبتها وعيني على بابنا شفته كاعد مكنبص شكله منتظرني من لمحني من بعيد وكف واجه يركض بخطواته الصغيرة الي
مديت ايدي اله احضنه وكتلها
_ ماكدر اجيج زيوني راح يجلب بيه وتالي كلشي مانفتهم منه خلينا كلمن بمكانها احسن حتى لانضيع علينا المشيتين
شبكته ابوسه بخديداته وهو عينه عالعلاكة شجايبتله
ايست مني من شافتني بلحظة غرام وياه كالعادة كالتلي
_يلة عيني لعد مع السلامة نلتقي بعد يومين
_ مع السلامة حبي الله وياج
حاجاني بلسانه الينكرط واصابعه الصغار ياشرلي عليهن
_ كنو شنو اشتليتيلي
_ روح كنو وكلبها جبتلك عصير وكيكة
نزلته بالطارمة وانطيته العلاكة دخل بيهن جوة دخلت من باب المطبخ عيني عالطباخ فرحت اكو كدر منصوب عليه
_ يارحمتك ياربي مبين طبخة معدلة تقربت منه فتحته لكيته تمن عدس مطبوخ كامل اكلت منه خاشوكتين ميتة جوع من البارحة العشى ماكلت غير لكمتين
دخلت جوان تانب بيه مابطل هاي العادة لو شكد متحجي
_ نزلي ايدج من الكدر وانطي صبر اصبلنا سوية ترة عيب كبرتي وانتي نفس الحالة تركضين للكدر قبل لتسلمين
كتلها اشتكيلها واللكمة بحلكي
_ ميتة جوع والله معدتي مغصتني مغص من الالم وفوكاها حارة وعطشت الا شوية تموع روحي
جاوبتني ببرود وهية تسكب الاكل بصينية وحدة النا تختصر بيها غسل المواعين لكدام
_ اذا انتي عنودية وراسج يابس فـ هاي مشكلتج مو مشكلتنا باابا ينطيج مصرف كلما يصير عنده اشتري بيه وسكتي معدتج ماله داعي تضميه كله لزين.
تالي علمتيه على هاي العادة صار مايقنع من اكله ماعندي فلوس تشتري بيهن ويخلصها يمي بجي ونواح من وراج وورة دلالج اله
باوعتلها بدون اهتمام ورحت اغسل الخاشوكة لتانبني عليها وتنطيني قوانتها المجروخة احنا نشمر ونزبل وهية تخدم بينا عالبلاش شعارها اليومي هذا لو بيدها تطمغه بكصتها وتسوي عليه نشرة اخبارية كل ساعة بس هية تستحي من بابا ماتحجي بس يمي تتفرعن بالذات من تشوفني ادرس وهية حايسة بالبيت تنظف وتطبخ قايمة بيه من كله
بس للامانة ماتكلي تكومي وياي ساعديني مدام ادرس بس تخلصها تكرضم عليه شلون تتعب لوحدها بيه
دخلت من باب المطبخ للصالة ادور زيوني لكيته يشرب بعصيره والكيكة بحضنه كعدت يمه رفع الي العصير اشرب وياه مارفضت عزومته اخذت منه رشفتين وكتله اقنعه قبل ليفتح الكيكة وياكلها
_ زيوني حبيبي هاي الكيكة خليني اضمها الك لباجر تاكلها واشرب بس العصير شتكول؟!
خلت جوان الصينية عالارض وكالتلي تانبنيي بنفس اللهجة مالتها
_ هسة الاتفطنتي تضميها اله لباجر ماجان تندرتي من منساع قبل لتنطيها اله
باوعتله مبتسمة شلون ياكل وكتلها ماا ارمي ذلة الها
_ خلي ياكلهن عافيات منا لباجر الف حلال يحلها
وبلشت اكل واوكله وياي تذكرت بابا سالتها عنه كالتلي
_ راح يزور ماما ويتاخر بالجية البارحة جايته بالحلم وجهها مكروب يكول حجيت وياها بس هية حتى ماباوعتلي وعينها شابحة عليكم سودة عليه حتى بجى يشتكيلي يكول شبيدي عليكم وشنو البيدي وماسويته الكم بس هاي كل امكانيتي وياكم
ذبيت الخاشوكة من ايدي وكتلها متالمة عليه
_ على شنو يبجي بالضبط واصلا هو مامقصر ويانا بعد ليش يلوم روحه خطية
باوعتلي روحها طالعة وكامت من السفرة وحجت
_ يعني شنو ليش يبجي كيناز افندي متشوفينه شلون عايشين بنص النعيم الحمدلله والبيت بازبل منطقة يومية جاي ابو الايجار هاد علينا
عدا لكمة الخبز كوة مدبرها النا من سياقة السيارة لان اخوج التحفة مامخلي علينا شي ينستر نحجي بيه. فـ خليني ساكتة احسن ترة روحي واصلة لطرف خشمي
وكفت محتجة على كلامها وشلت الصينية بيدي للمطبخ اغسلها وكتلها
_ البيت الي تحجين بيه وماعاجبج اقلاها اكو سكف ملفينا ماكاعدين بالشارع احنا
واللكمة نعمة من كريم كلمن على كد حاله مو مصيبة اذا رزقنا عالكد ترة،
باوعتلي الدمعة بطرف عينها وابتسمت تستهزي بكلامي
_ حقج هيج تحجين وتبيعين علية هاي المثاليات تدرين ليش؟؟ باوعتلها تحجي بقهر وغل وكملت
_ لان انتي ماشايلة مسوؤلية احد ولا مفكرة شلون تجيج اللكمة لحد عندج او حتى المصرف الي تجمعيه بين فترة فترة ماتعرفين شلون حصله ابونا
كله يجيج عالجاهز فتحجين هيج وصايرة مثالية براسي شكو عليج عيني صغيرة ببدايات عمرج وطبة وطلعة بحجة المدرسة متونسة رايحة جاية واني هنا خدامة الج ولاخوتج
من بلشت هيج تبسمر وتحجي بالعمر تركتها ودخلت لغرفتنا بدلت عالسريع ودخلت زيوني بوسته وسديت الباب اسمعها تدردم علية وبعد ماتسكت لو يجي هبل من كبره
مرات ما الومها ابد ومقدرة حساسيتها من تحجي بعمري وعمرها بالذات من كملت الشهر الفات سن 28 ودخلت الـ29
تحس نفسها عنست وحياتها متوقفة من دون كل البنات والفرق الي بيني وبينها اكثر من عشر سنين فصاير الموضوع حساس عدها
والمشكلة ان اخر خاطب دك بابنا صارله تقريبا سنة بعدها محد دك الباب وطلبها بسبب فعايل اخوي والي سواه بروحه وبينا على اثرها تحولت حياتها لنقاط سلبية صارت تكثر يوم بعد يوم
نمت ساعتين وكعدت افرك بعيوني لكيت زيوني نايم ومتحرك مسافة عني شلته عن الحصير خده مطبوع بالنقشة بوسته ونومته مكاني وطلعت للحمام اغسل ميتة حر باوعت للصالة بابا ماهوة يعني بعده ماجاي
وجوانا متمددة عالارض تلعب بالحاسبة شطرنج اجتها نعمة من السما قبل سنتين جابها بسام وبقت يمنا ماعرفناها المن ولا شلون دفع سعرها وحتى هية اعتزت بيها من يجي بين فترة وفترة تركض تضمها عنه تخاف لا يرجع ياخذها لو يبيعها يستفاد بفلوسها يشتري بيها البلاء الاسود مخدرات لو حبوب كبسلة
عجزنا نسيطر على حالته من ورة اصدقائه السكط وتعب بابا كلش من وراه. ورغم حاول شكد يعالجه بمصحات للادمان بس جان يبقى فترة ويشرد لحد ماعجز منه بابا وتعب من محاولاته وياه يخلصه من السم الي بجسمه من بعدها الا بطل يدور وراه
من عدها صار يجي فجاة ويروح فجاة نحاول قدر الامكان بوجوده نتجفى شره لان ايده والضرب وهمين اغلب اغراض البيت الكمالية كمنا من نشوفه ياخذها بالبوكة صرنا مانحجي وياه شيريد يسوي خلي يسوي تعبنا وخلى سمعتنا بالحضيض من ورة اخلاقه بس شكول غير الله يهديه
طلعت من الحمام رجعت للغرفة ناوية افتح كتبي وادرس مابقى لامتحانات البكلوريا نمتحن ونخلص وراها اسحب نفس شوية.
انداريت لزيوني غاط بنومته دنكت عليه بوسته اشم بشعره بعد سنتين ويدخل مدرسة حبيبي واكوم اخذه بيدي وارجعه بيدي
درست مادة الفيزياء عندي صعوبة شوية بيه وملزمة نقذتني بيها سدرة انعم الله عليها رغم مشككة بس مشية اموري بيها واحاول افهم على الباقيات منا ومنا ومدبرتها بقل هو الله احد
للعصر كلش جعت تمن العدس مايلزم الكلب ابد كمت سويت جاي ناكله بخبز مثرودة نحبها اني وزيوني بالذات من نرش عليها شكر تصير مقرمشة
بعدني واكفة عالقوري اندك الباب لمحت جوانا كامت تفتحه سمعت صوت نوال صديقتها يتسالمن استغفرت ربي بصوت ناصي ورجعت اصب كوب جاي الي اخذته وتخطيت الصالة سلمت عليها عالماشي ردت ادخل استوقفتني بسؤالها
بكلبي ابد مو وقتج
_ هاي شجاج عيني مستعجلة بعدنا لاسلمنا لا حجينا وياج حتى مالحكت ارد السلام عليج وطكتها ضحكة من هاي اليحبها كلبي
كتلها روحي طالعة
_ اسفة والله ماعندي مجال للسلام والكلام وراي دروس وامتحانات شوفة عينج مابقى ونمتحن
باوعت لجوانا برفعة حاجب مثل الاشارة المشفرة بينهن مافهمتها وذيج سوت روحها ترتب الصالة ولا يمها كالتلي
_ ايي لعد الله يسهلج وتنجحين ولو اني اشوف من رايي الدراسة مابيها مستقبل اول وتالي تكابليها لاختج وتكعدين وهاي شوفة عينج اني وياها استلمناها منا علگناها منا كلشي ماحصلنا بس تعب بتعب عالفاضي
جاوبتها واني اتخطى للغرفة.
_ والله نوال الصراحة رايج مايهمني وسبق وكتلج اني احب دراستي ولوين مااوصل خلي اوصل المهم شهادتي بيدي عاد يمته ماتتسهل اتوظف بسهولة
واساعد بابا بالعيشة
قبل لاترد سديت الباب حتى تحس ومتعيد قوانتها علية كل متشوفني. وكعدت احاول وية زيوني يصحصح من شاف الچاي والخبز كعد وزن ثردنا كرصة خبز اكلناها لمن شبعنا
طلعت اني وياه اغسله ايده لمحتهن يتبسبسن وبيد جوانا ورقة وكيس صغير من شافتني ضمتها وتغير مود كلامهن للصوت العالي بمواضيع متفرقة
دخلت بدلتله ملابس عصرونية وكعدته بباب الحوش يلعب وية جهال المنطقة اكو بكده واكبر منه شوية
المنطقة متربين بيها من الصغر وقديمة باهلها وبيوتها كلها مثلنا بالعيشة وبيهم شوية احسن منا
حاول بابا كم مرة يغير سكنا لغير بيت ايجار ارخص بس جان يلكى البيوت تعبانة كلش اكثر من تعب بيتنا هذا من ايس يلكى ترك الفكرة واستقرينا بيه
عبرت الصالة اجيب كتبي ادرس قريب من باب الحوش واراقبه ليتعور صاحتلي نوال قبل لتروح
وحجت
_ اكلج حبي نسيت اكلج اذا محتاجة ملازم لو تلخيصات اسئلة لموادج اكدر ادبرلج من جماعتي
عادي ترة
وكفت استمع الها شدتني حجايتها كتلها مستغربة
_ مافهمت!! يعني منين من جماعتج؟!!
مو انتم كلكم متخرجين منين دبريني مثلا!!
ابتسمت وهية تلبس جنطتها عينها مني
_ وشنو يعني واذا متخرجين قابل ماعندي معارف ترة سهلة مو فد شي عظيم
_ مادري والله.... ياريت اذا صدك دبريلي اكون ممنونة منج لان موادي صعبة واحاول على شرح المدرسات افتهم منهن
_ هاي هية اعتبري طلبج تم قابل كم كنوزة عدنا احنا
وابتسمتلي وطلعت
طلعت وتبعتها جوانا للباب عيني وراهن كلبي مامرتاح الها ولا يوم ارتاحيت الها معقولة راح دبرلي الملخصات هيج لوجه الله لو بعدين تورطني وتكلي ادفعي فلوس
لطمت على كصتي وية دخلت جوانا كتلها خايفة
_ اكلج جوانا اني هاي صديقتج مامرتاحة الها ما اعرف شلون انسطرت على عيني وكتلها هيج ان شاء الله تطلب مني فلوس عليهن حتى اشمرهن بوجهها
نترت بيه وهية ترتب الكرويتة مرتبيها بالصالة كلساع خشبة تطك بيها وندكها ببسمار اعوج مثلها شكلها يبجي من عهد الافندي حمواربي بس احنا مغلسين عنها ومجلبين بيها بايدنا وسنونا هم
_ اكلج كيناز لاتفتين كلبي هية عرضت عليج مساعدة وانتي قبلتي لاتدورين عليها حجج بعدين تعالي.. ونصبت نفسها مخنزرة علية
_ شبيج وية البنية تحاجيها من ورة خشمج شمسويتلج حتى هيج تتصرفين وياها بقلة ادب
وصلت لباب غرفتنا وكتلها
_ من الله مااحبها وكلامها كله نغزات وصداقتها بيج احسها مونظيفة بس انتي مجلبة بيها عليمن مادري
حجت بهمس وهية ترتب مخاد الصالة
_ يمعودة قابل عندي وحدة غيرها واصادقها هية الوحيدة الي بقت وياي من ايام تخرجنا والباقيات كلهن اتزوجن ولغن صداقتنا اليكول راح نخطف زلمهه منهن
دخلت جمعت اوراقي وكتابي اريد اطلع للطارمة سمعت صوت صياح عرفته زيوني شمرت الاوراق من ايدي وطفرت للطارمة سويته كمزتين
لكيت جوان سابقتني حاضنة زيوني ترضيه وهو مفرفح اريد اشوفه شبيه ماتخليني ضامته بحضنها وهو مفرفح
_ بس خليني اشوفه مو كلبي وكع بالكاع
دفعتني تدخلني لجوة وشالته تقنعني
_ مابيه شي عثر بالصبة وتعور ادخلي جوة لتفضحينا
انداريت عليه كصته زركة مورمة وياشرلي بيده عالشارع مفرفح وجوانا تنزل بيده تحاول تسكته
اخذته للحمام تغسله ركضت وراهم كلبي يمه كتله اساله
_ منو وياك زيوني وين تعورت؟؟
وحجى وهو يشاهك ياشرلي لبعيد
_ هادا عدولة دبعني «دفعني»
هزيت راسي كلبي يغلي منهم وركضت للغرفة البس شال على راسي وجبة على دشداشتي لان مدلعة عيب اطلع هيج بالشارع طلعت من الغرفة ركضت وراي جوانا حجزت باب الحوش بيدها وحجت تقنعني
_ بروح امي اتركيهم كيناز... ولج جهال لاتفضحينا فوك فضايح اخوج
دفعتها ازيحها مانزاحت وكتلها اصيح
_ وروح امي مااتركهم اليوم افلش بيوت اهاليهم عليهم دفعتها وطلعت لكيت جهال المنطقةواكفين بخوف يباوعون لبابنا
ماحسيت غير التراب طاير وراهم خايفين مني تمشيت لبيت ام قاسم
بس شافوني اجيت عليهم سدوا الباب بوجهي وصاح يبرر
_ والكعبة مو اني هذا ابراهيم ابن ام كرار هو الدفعه
دفرت الباب برجلي وصحت بيه اهدده
_ افتح الباب حقيرر ولتجذب لا املص راسك من ركبتك يلة افتحههااااا ودفرتها مرة الثانية
اسمعه كام يطفر يبررلي خايف مني بصوته بجية
_ والكعبة مو اني..... وبيت الله مو اني هذا ابراهيم الدفعه
اسمع امه طلعت تساله وهو يمتمت من الخوف ياشر علية فتحتلي الباب مغندبة رادت تحجي رفعت اصبعي وكتلها
_ شوفي خالة ام قاسم والكعبة الحلف بيها ابنج اذا ماملصت اذانه وشلعتهن اله مااطلع كيناز
_ يااا يااا هاي عليمن ولج تهددين
على ابنج وعلى ولد المنطقة الي ياذون زيون
_ وعليمن يمة تهددين خلي ابنكم بحضنكم ولاتطلعوه شنو الدنيا تايهتلج تملصين اذاناتهم لو تايهتلج حبيبة
من شفتها تحجي معلك كتلها
_ اي تايهة واريد اشوف منو اليطلع ورى جهالجن حشى والله جلاب مخلفات مو اوادم رادت تلعلع عفتها ورحت لبيت ام كرار بس شافوني اجيت ناحيتهم ركضوا سدوا الباب
دكيته بقوة محد جاوب رجعت دكيته اقوى سمعت صوت اخوه كرار الجبير صاح منووو
تجتفت راجعة لورة بس فتحه خزرته ابتسملي وسد الباب وراه مغلس وتقدم لكدام
_ هلو كنوزة خيرج ليش ضايجة!!
جاوبته بنتر حتى يستحي على وجهه ويدنك
_اسمعني زين كرار وانتبه للراح اكوله الك هاي ثالث مرة اخوك يدفعه لزيون ويعوره تكله تكول كيناز وروح امي مانساها اله وبس اشوفه بالشارع اضربه وحدة بوحدة بلغتكم حتى لحد يلومني بعدين
جاوبني بكل هدوء وبرود بودي املخه من نار كلبي
_ صلي على محمد كنوزة واذا ابراهيم صدك معوره اني احاسبه واضربه بس لتضوجين اغاتي..... ترة همة جهال يتعورون وورة شوية يرجعون يلعبون ياعيني انتي
رفعت حاجبي لكلمته الاخيرة شنوو هالميانة الزفرة هاي صارت بيها عيني واغاتي رفعت اصبعي الزمه حده
_ احترم نفسك كرار اني لاعينك ولا اغاتك وهاي عيونك الزايغة نزلها لا افكسها الك.. وترة ادري بالمراسيل الي تدزها بيد اختك واني ارفضها وهالمرة حجيت طك بطك بوجهك مرة الثانية اطلع رسالتك واشهرك بالمنطقة موتكول ماحجيت
احتقن وجهه من الفشلة كام يمتمت تركته ورجعت للبيت عباله ماافضحه شكول شكول
لكيت جوانا لازمتلي الباب تلطم على خدها دخلت لجوة اجت وراي تصيح وتلومني
_ ليش هيج تسوين بس كليلي ارتاحيتي هسة من فضحتينا
شمرت الشال عالكرويتة وكعدت زيوني بحضني اشوف كصته بوسته وضميته لصدري كتلها ببرود
_ لا والله مارتاحيت واذا مالزمتهم واخذت حيفي منهم ماابرد... وبالنسبة للفضايح احنا مفضوحين من كاعنا.
وخلي اكلج شغلة نسد بيها سيمفونية الفضايح مالتج
المكتوب عالجبين لازم تشوفه العين
اذا مكتوب تتزوجين راح تتزوجين واذا مكتوب تبقين عانس يعني تعنسين نقطة راس سطر لا صوتي اليلعلع راح يمنع قسمتج ولا اخلاق اخوج السكط تصير حجة لعنوستج
وكفت ونزلته من حضني وكملت
وترة ادري بزيوني مو اول مرة ينضرب منهم ويتعور وتستريلهم بحجة متردين فضايح وتطلعين للجارات انتي العاقلة الفاهمة بلكت يتعطفن عليج ويزوجنج لولدهن... ترة انتي متوهمة ورايحة لبعيد ومن هسة اكلج محد راح يدك بااابنا منهم لو تنطبك السما عالارض افتهمتي لولا..
تركتها ودخلت للغرفة اجمع اوراقي حتى ادرس ماسمعت الها حس وادري بعد كلامي هذا راح تعزل نفسها بالنوم منا لايام وترجع تبجي وتندب حظها وعيشتها وحياتها ويانا
لليل الا اجه بابا هلكان تعب طريق النجف لماما هلكه
طلعت سلمت عليه وبوسته وجهه صاير اسود من التعب والقهر اول ماسالني عن بسام اجه لو بعده مختفي كتله بعده هز راسه ودخل يغسل بالحمام
سالته يريد عشى عازليله من الغدة رفض وطلب بس فراش افرشله بالصالة مكان منامه هو وبسام اذا اتواجد طبعا
واني وجوانا وزيوني بالغرفة باعتبار بنات وخصوصية النا
فرشت اله ودخلت اجيب كتبي من الغرفة وطلعت بالطارمة ادرس على ضوة الشارع ماكدر اشغل ضوة الغرفة ليكعد زيوني يسويلنا حفلة
لنص الليل واني من مادة لمادة انسطرت ردت اكوم انام فجاة ماحسيت غير بابنا اندفر نزيت متصنمة دفع الباب بقوة ودخل بسام يجر النفس كوة وملابسه مشگگة بيها طكع دم
ضليت مفهية شصاير بيه وهيج اجه اشرلي باصبعه اسكت بلا نفس دخل بدل ملابسه وشمر روحه عالكرويتة وراح بسابع نومة
٠
٠
٠
بمكان اخر...
_ دبطلي بجي ياعيوني بطلي مو عيونج عمن من كد البجي
_ لعد سوي حل لو والنبي محمد اشرب سم ومحد يلحك علية
_ ميخالف بس انطيني مجال احاجي الوالد ونشوف
باوعتله متعصبة وحجت
_ هااا واذا عمي رفض شسوي بكلامك اني وشراح تسوي ويطلع بيدك لو انت مترتاح لمن يزفني بيده لغيرك ساعتها تصدك بكلامي
_ ماكو هيج حجي وماراح اخليج لوحدج بس انطيني مجال اتفرغ من شغلي واني اروح بنفسي لعمي واحاجيه
مسحت دموعها بقهر وكلتله بخوف
_ ليش تحاجيه انته؟؟ قصدك عمي مراح يوافق علية موو هذا قصدك
ابتسملها متمني يمسح دمعتها بيده او حتى يحظن اصابعها بين اصابعه بس لا نفسه تسمح ولا المكان الهمة بيه يتقبل مواساته الها اكثر من همسات كلام ماتجيب شبهة الهم
_ لا مراح يرفض وادري بيه راح يفرح باختياري الج بس لتنسين طباعهم لعمامنا وتشددهم من ناحية تقاليدنا كلش صعب وعمي اذا عرف اكو شي بيني وبينج راح ينتهي كلشي بيناتنا غصب عنا واحنا الراح نوكع بيها موغيرنا
دنكت دموعها تلالي على خدها وكلتله بعجز
_ لعد شلون بينا شهم مو والله كلبي مقبوض وكلام امي لسة يرن باذني من حجى وياها ابوي من يومها لا ليلي ليل ولا نهاري نهار
_ انطيني مجال هالاسبوع وراها احجي وية ابوي
وان شاء الله يصير خير،
ودعها وهو يراقبها تركب تكسي وية اختها الاكبر منها طالعات من المول بعد ما انطن حجج لاتحصى ولاتعد لامهن في سبيل تلتقي بيه بالخفية وتحجيله الصاير وياها
توجه عاليمين داخل لكراج المول جان راكن سيارته
GــClass
بين صفوف السيارات شغلها عن بُعد وركب متوجه لمكان عمله رفع موبايله ونظراته مابين الاسماء وقيادة سيارته بين الزحامات.
بحث من بين الاسماء الواردة القريبة لكى الاسم المنشود اتصل عليه بدون تاخير لحظات مااخذت من وقته هواي وصل لمسامعه صوت اخوه يجاوبه
_ هاا عيني وياك اسمعك
_ اسمعني كرم الك اليوم وبس وبنهاية النهار اريد اسمع سالفة عمك الحجاها لمرته صدك لو تاليف حتى اذا صدك الا اطربك الدنيا على روسهم
_ شنو الساالفة وعلى شنو تطربك الدنيا مافهمت؟؟
_ اسمع مني الراح احجيه الك وبس وعلى اساسها تصرف ابن عمك هو وأكثم اكثر من ربع وصحبة والسنين الجمعتهم سوية هو وياه عمك راح يدك على هذا الوتر بالذات
واخوك لاناوي ولاهاوي تاليها محد يطيح حظه غيري،
صفن على كلامه لحظات وكاله
_ وياك بكل كلمة بس انطيني راس الخيط واني اعرفلك السالفة من بكر من راسها لحد جدمها
_ تمام واني انتظر منك اتصال وراها اتحرك
٠
٠
٠
"عجمان " دولة الامارات
داخل سرايا بيت الحجي حاتم
٠
٠
مثل عادته من سنين مضت يكعد الفجر على صوت الاذان من اقرب سماعة جامع تكون باطراف حدود سياج السرايا دفع مبالغ من حر امواله قبل سنين ومعاملة وتوصية لمعارفه داخل السلطة الا نطوه ترخيص يبني بهذا المكان جامع حتى يصدح صوت الماذنة للمصلين ويسمعه اهل المنطقة كلهم
خصوصا مع قلة ساكنيها صايرة شبه صحراء بسبب البيوت القليلة المنتشرة هنا وهناك نتيجة كبر مساحة الاراضي الحكومية الغير مستغلة استثماريا من قبلهم
وهذا الي خلى الحجي من سنين شغله بهذا البلد يستثمر بتجارته بالاقمشة الراقية ويشتري مساحات من الارض الصحراوية كعقار خدمه هالشي بتحصيل الجنسية والاقامة ويشتغل على دوانم ارضه بتحشيد مع ولده بتوظيف فلاليح ومهندسين زراعيين زرعوا بيها انواع الاشجار العالية اضافة للعشب الاخضر وبعض انواع اشجار الفواكه الموسمية الي تعبق رائحة اوراقها بكل وقت تنعش بيها حواس الشم بكل اريحية وبجلسة عصرونية تفتح النفس بالهواء الطلق..
وكدر بتمويل حكومي وجهد متبادل يزرع مساحات محيطة بالسرايا بالاشجار العالية يقلل منها المساحات الصحراوية الى حدا ما واستغلال المكان للمستقبل للاستثمار والمشاريع وغيرها
اما باحد زوايا الحديقة الامامية الواسعة جان كدام مراى العين بيت من الشعر (بيت بدوي ) مع كامل تاثيثه بجلسة جميلة متكاملة ودلال الكهوة والحطب داخل منقلة تحضير متوسطة المكان منطيها رونق خاص وعنوان لساكني السرايا احتفاظهم بهويتهم وعراقتهم الاصيلة منذ القدم
اما خارج السرايا فهاي جانت ملكية ابنه الاكبر الاكثم اشترى بيها ارض مساحة اقل بمرتين من مساحة ملكية والده وبنى بيها مزرعة مصغرة لتربية الحيوانات والدواجن بسبب عشق والدته للطيور والدواجن ولان الحجي حاتم من النوع النظامي والعصامي القديم رفض مسبقا تقتني حيوانات داخل السرايا وتخرب تصميمها
على اساسها لبى ابنها رغبتها وفتحلها باب خلفي عالسرايا تدخل وتطلع على طيورها تاخذلهن بقايا اكل وحبوب وتنظف بيوتهن وترجع
حبها لهاي الحيوانات جان من الصغر ولان ببدايات زواجها جانت تربي حيوانات ببيتها لحد انتقالهم من محافظة البصرة بنهاية التسعينات لعجمان نست هاي العادة او تناست بسبب مشاغل الدنيا لحد مااخذها الكبر ورجعت تحن لتربية الحيوانات بسبب فراغ وقتها
بوقتها كمل الاكثم تسييج المنطقة بالخشب الصاج صارت شبه مزرعة صغيرة وبصفها بنى كراج مغلق لسياراتهم ولسيارات ضيوفهم بالذات همة البيت الوحيد من دون بيوت اعمامه مايخلى من الزوار والضيوف لوالده باعتباره الاقدم سكنا ونشاة حياته الاغلبية صارت بهذا البلد من زمن السبعينات
اكثم
وكفت كدام مرايتي البس ساعتي وخواتمي ونظراتي على والدتي تبخرلي غترتي بالبخور رغم رفضت عدة مرات تصعد لخاطري وتتعب بس هية مصرة على هاي العادة وياي ووية الوالد الله يطول عمره ماتقبل تتركها ابد واني هم حاب وجودها الصبح يمي اتبرك بوجهها قبل الكل منورة غرفتي ترتب اغراضي بيدها
دنكت اضبط ساعتي اسمعها توصيني قبل لا انزل لجوة
_ يمة ول
