رواية في حجر الافعي الفصل الأول
ـ ـ نايمة عـلـىٰ ظهري وعيني تباوع السقف بُكل خوف وأشوف أبو بريص أكثر من واحد غمضت عيني والآصوات بنص أذني ، أصوات الجلاب تعوي تهاجم بشر مو بس حيوان ! وأصوأت الصراصر وفحيح الافاعي يوصل لعندي ! والخوف يأكل ويشرب وياي ، بكل ليله أخاف تدخلي حيه من الشباك او من الباب عـلـىٰ لحظه إلكاها بصفي !!
" حاولت أبعد هالافكار، كلما أخلي رأسي على المخده أفكر والف ويلاه يلة أغفي مثلهم اللي عدهم گلشي عادي ومتعودين على حياتهم أشبه بحياة بدون بشر أحس عايشين بعالم بعيد عن العالم جنت عايشته !
ودرت ظهري ناحيتة أباوعلة نايم بسابع حلم ، رفعت نفسي من المخده على كيف ، نصيت حركة الفانوس علمود ما يحس بيه أني طلعت من يمه وفارگت فراشه ، لبست نعالي وحالتي يرثىٰ لها وطلعت لـ برىٰ .
" ضوء القمر منور المكان وهدوء يقتل بس صوت الحشرات والحيايا المربيهم فحيحهم يصرع ، أخذتني رجليه وفضولي أباوعلهم ، شافني الجلاب ما تقربن ناحيتي لان يعرفني عايده الهم ومن أهل البيت .
" عثرت والجلب نبح خليت إيدي على شفتي " هصص"
خنس ورجع نام ووصلت المكان وباوعت من السيم المشبك والحيايا وحده فوك الثانيه حسن بيه وأجن ركض مسابق وحده تضرب الثانيه عزه مجوعهم وكفت بعيد عن المشبك وبلحظات المشبك تغطى من كميه الحيايا والوان اللي صارت عليه !!
رجعت ليورى خفت يصير ضغط وينفتح المشبك اصير طعم الهن تالي الليل ومحد يدري عني ، حتى الجلاب يعوفني لن الجلب يخاف من الحية .
" ابتعدت وتمشيت شفت الغنم وابتسمت وصوتهن هنا شافني رغم الظلام اجن عليه لزمت راس الطلي
ورجعت اتمشى بوسط البيت عباره عن خرايب وسرب مثل القطار، تمشيت بوسط الحوش وأباوع وناسيه نفسي وسمعت صوت فحيح لآ هو بعيد ولا هو قريب !!
" التفت وأشوف الحية اللي مربيها ومخليها ضمن الحراسة گالي عنها وحذرني بس نسيت وأني اتذكر كلامه عنها ما حسيت غير اجت عليه بسرعه فضيعة ركضت بكل ما املك من قوة واصيح بإسمه "الحكليييي" الحكلييي" راح تلدغني " ما اريد اموت هيج موته ! .
صراخي ترس المكان وتوقفت وهدأت وتجمدت بمكاني بصوت طلقة رصاص شگت طبلة أذني خليت إيدي على اذاني وغمضت عيني وصارت أصوات الحراس بكل مكان ونسوانهم طلعت من خرايبها انداريت وأشوف رأسها متفلش ضاربها بنص رأسها كبر حجمها مو طبيعي عزه ماتت والله راح يموتني وراها ..
ـ ولك إشســويت ليش ضربتها
ـ لعد أخليها تلدغها وتصير طعم إلها .
ـ أي تلدغها وتشبع بيها هم ، لعد تموتها تدري إذا حناش عرف أنتَ موتتها شيسوي بيك وبينا يفلش الخرايب عـلـىٰ رؤوسنا . !!
وبعدين هي شمطلعها بنص لليالي تفتر بنص الحوش والخرايب ، ويـــن عبالها نفسها عايشه مو تدري أي أحد غريب يفتر هي تهاجمه وتلدغه هي القوانين ونظام الحراسه وهو مدربها كُلش زين .
ـ ما رد عليه وأجه أخذني من إيدي ويجر بيه ودخلني الغرفه وكام يصيح عليه .
ـ أدري شمطلعج من الخرابه مو گتلج ظلج بظلي ما تفارگين هالخرابه ولا لحظه تغيبين عن عيني ليش ما تسمعين الكلام ، عبالج بعدج عايشه بالحضر تكعدين تشتمين هوا عـلـىٰ كيفچ .
ـ أختنكت كلت أطلع أشوف .
ـ شتشوفين ، تشوفين الموت ؟!
ـ ما رديت عليه وهو رجع نام وصوتهم ترس المكان واجه حناش يعيط على زلمه وهذا نام ولا مهتم للوضع يربي شلون وياه ، أنتَ شو نمت ترى حناش وصل شُنــــوْ ما تسمع صوته .
ـ تعالي نامي بصفي وسكتي .
ـ ما أجي انام لوحدي، خله رأسه ونام وضليت كاعده وصوت صياحه شگ طبله اذني ويصيح علينا ودك الباب كسره ما كام ولا قصص وروايات عراقية كرار صلاح أهتز من مكانه .
" صار الفجر وشوي وطلعت الشمس وما حسيت غير حية اجت ناحيتي بلحظات المكان أنترس ركضت عليه اكعد حناش دخل الحيايا مالته علينا وأنتَ نايم
ـ شُنــــوْ !!
ـ كام ينفض بيهن بالمخده قيامه دخلن وكلهن مجاعه انحصرنا بالزاويه ويدفر بيهم جرني ورىٰ ظهره ركض يفتح الباب قفله علينا وبصياح واني متت من الخوف خلص راح أصير طعم لحيايا المجاعة
ـ حناش أفتح الباب حسابك وياي وجه لوجه واسحب الحيايا مالتك هذا مو حل ، حناش بطل خبال .
ـ هذا عقابها خل يأكلنها اريدها تصير طعم إلهن وأنت وياها لن أنتَ ضربت امهن بنص رأسها مشكلتك بعد .
ـ حنـــــاش .
ـ وصلن لعنده الشباك انفتح وشمر بي صندوك كامل يمة عــزة !! جلبت بي وهو مستمر يحاول يفتح الباب وتقربت وحده لدغته من إيده اني إهنا بين فاقده وبين صاحيه من شده الخوف والعجب اللي شفته صرت ما اميز بين كلشي تمنيت تنسحب روحي من صدري ولا أموت هيج موته !.
" رواية تحبس الأنفاس 🔥 عن قريب جداً راجعة
أكملها إن شاء الله شوفوني تفاعلكم وحبكم ❤✨
في جُحر الأفعى ـ بقلم شمس العراقية ✨
#في جُحر الأفعى
#الحلقه ١
#بقلم شمس العراقية
" يا مرحبا شلونكم أخباركم مشتاقييين والله 🤍
عوده جميله وياها روايه راح تعجبكم مليانه بالاحداث قراءه ممتعه أحبتي.
أشهاب
ـ نزلوا الخرفان ؏ السريع ما اريد مهاونه بالشغل وأنتَ شوف مناف وين بعده منجطل ما يشبع من النوم .
اسماعيل ـ صار عمي ، تأمر ؏ شيء ثاني
ـ ما يأمر عليك عدو ، كمل شغلك ومن ترجع جيب وياك المواچيل
ـ صار دقائق ويمك
ـ أرتجيت؏ حافه السياره وأباو؏ الهم مر وقت وأجه
حناش أخويه الجبير وياه المواچيل خلاهن بالارض ، يلا زلمي عوفوا الشغل
حناش ـ وين وين خل نأڪل وبعدين يأڪلون أبو عرب شبيك ما تتعلم نظام الأسياد بالاول
ـ ڪلنا بَشر وقت النعمه ينعاف الشغل
ـ هسه سم
ـ سم الله عدوك ، أكول ابوي وين
ـ عنده طلابه يفضها ويرد لـ العرب
ـ يا طلابة بيهن بس لآ علمود الكاع .
ـ أي
ـ والشغل !! منو يروح لناصريه باجر الزلمه ينتظر الخرفان
ـ اني عندي شغل أنت روح لو شوف إلك واحد من زلم لو ادز إسماعيل
ـ شنو شغلك حناش
ـ شغل ! يلا الحمد لله صيح زلمك يأڪلون
الاسياد أمتلئت بطونها !!
ـ عافيات ، ؏ هونڪم يالربع ، تعالوا وعوفوا الشغل
وأسماعيل تعال عندي سالفه وياك
إسماعيل ـ أمرك عمي
ـ أني رايح لـ العرب الزغيره عندي شغل أكضي واجي ألأريدنه منك عينك على أمجد هذا خفيف ما يهجع بكاعه وابوي دوم يوصيني بي بزر الگعدة وعندك الحساب
ـ من عيوني الاثتين تأمر انت عمي ، بس شمأخذك
لـ العرب الزغيره وعمي صگبان ما يقبل نوصلها شلك بيها ابو عرب خلك بمجانك
ـ أني شغلي وأعرفه ما اليه بطلايبهم ومشاكلهم ، شغلتي سيارتي وطلعت لواحد عنده غنم ينتظرني أشتري منه الخرفان ٠٠
" وصلت العرب الصغيره بساتين وزور فاصله بينه وبينهم وصلت ناحيه البساتين حاطهن وسارح بيهن شافني ونهض مَـن مجانه ويهلي بـيہ
ـ الله بالخير حجي
صباح ـ الله بالخير ابو عرب يا هلا بيك أتفضل عدنا بالبيت نضيفك
ـ لا مشڪور ضيافتك واصله
ـ ما يصير تجي لـ عربنا ما تشرب شيء ما تكهوى
ـ لا يصير ، يصير ، خلينا بالمفيد لان عندي شغل
اريد اكضي شغلي وارجع اذا موافق خل اخليهن بالبيگم واتوگل لـ العرب ٠٠٠
ـ أبو عرب أنه ما أرفض إلك طلب
ـ أطربني شعندك
ـ لا تزعل مني ما أبيعهن غيرت رأيي والحرمه ما رضت أنبيعهن
ـ ومن يمتى ناخذ شور الحريم بهيج مواضيع أظن أنت زلمه البيت وانت الـتقرر
ـ اعذرني ما أبيــعهن
ـ زفرت نفس ، يعني هونت ، ماشيہ بس هاي أخر مره تسويها بـيہ ، وتخلف الوعد، شغلت سيارتي ورجعت
لـ العرب ولگيت أبوي معصب والوجه مغندب خيـــࢪ شُنــــوْ من طلابه
صگبان ـ شعندك مولي العرب الصغيرة أنه مو نَبهت وگلت هذيج العرب محد يگرب صوبها نهبوا كاعنا وانتوا تفترون وتجولون بيها .
أشهاب ـ عندي شغل بيها كظيتها ورجعت .
حناش ـ وشُنو شغلك
صگبان ـ حناش لأ ادخل عصك بشي ميخصك أني واشهاب محد اله شغل ، يلة كلمن يشوف شغلة ما اريد اماطل يلة حركوا .
ـ مشة وحناش يباوعلي خيـــࢪ شعندك .
حناش ـ ما عندي ، شمأخذك العرب سولف شُنــــوْ هالشغل ما يكتظي الا بيها .
ـ أني ما اليه بطلابيكم
ـ هذيج العرب متوصلها فاهــم .
ـ ذب كلامه كالعادة ومشة ، كعدت على البلوگة وصحت أسماعيل خدر قوري چاي خلي يسود أريده عاگد أصحي يافخوي وأمخخ مزاجي لن خربوا الجماعة
ـ تأمر عمي .
ـ وجاب الچاي أشرب وأباوع على الزلم تصعد الخرفان خلصوا ، عفت الآستكان وتوجهت للسيارة وأجه حناش .
حناش ـ خلك اني أوصل الخرفان لـ التاجر ، أبوي يگول خل يلحگني للكاع علمود الحنطة .
ـ خوش ، صعد السيارة وأجه مناف لاف الحية على رقبته لا تلدغك ولك شلون تأمن بيها هاي ما يتأمن بيها
مناف ـ حناش أخذ صويحبتك أستلمها ، وكثر منها
ـ شمرها على حناش وتوگل ، هاا شمسك عاليه صح النوم .
مناف ـ صخونه ما فارگتني لما صحصحت ، وأبوي داز علينا نكمل الشغل لا يلوحنا الطشار اليوم أموره موخوش مبين مستويه عـلـىٰ الإخير .
اشهاب ـ لعد حرك ، توجهنا لـ الكاع والنسوان مخمرة ويشتغلن عاينتلي سراب زوجة حناش نظراتج مالت وحده مو راحة شسويلج إذا زلمتج متزوج عليج ثلاثه
" يحصدن وبلشنا شغل نجيب ونخلي لما الشمس كامت تضرب بالرأس كمت أشوف الواحد عشرة علما خلصنا وخيطنا الگواني بالمخيط نبتت الخيط والمخيط بالگونية وشلت سلاحي ورجعنا البيت .
" دخلنا الخرابة من طين والكاع مرشوشة بالماي فتحت قبغ الحُب ومليان بگ منو عايف الحَب مفتوح ليش من تسسمون محد يقبغه وراه من تشربون سميمه اي والله .
أمجد ـ هذا حناش ، حتى مرات يشرب الحية منها يطمس رأسها بالماي يكول علمود تخلي اجسامكم مثل الحديد .
مناف ـ عـلـىٰ ساعة يموتنا من ورى سوالفه هذا هم فزگان عـلـىٰ عمرة ، حتى بالسم نأكلة يجيب وصخة
أشهاب ـ جريت المخده وتمددت على الجودليه وأجت أميمة زوجه اخوي مصلح من مشيتها عرفتها خلت الأڪل برغل وياه طماطه محموسه وخبز وراها اختي رحمه بيدها سطل اللبن اخذتها منها يفور شو هذا محمض صاير دبس جان جبتيلنا من لبنة اليوم .
منى ـ هو خثة اليوم وأمي عسلة خلت الكم انه مالي شغل
أشهاب ـ يلة أمشي هذا هو .
مصلح ـ والبرغل ليش مو مستوي يا مكموعة منجن طابخة اليوم ليش ما تصيرن مثل النسوان برأسجن خيـــࢪ بس مال نوم وعلف من الله يثبرجن مال الكصف يكصف عمارجن شو تعالي .
اشهاب ـ اميمه تصير زوجه مصلح جرها من خمارها ونبت رأسها بالكاع وجفص عليها، ورحمه اشرلتها فلتت بريشها .قصص وروايات عراقية كرار صلاح كمت فازعتهم ومصلح جفص بطنها گافـــــي وأنتِ أمشي ومرة الثانيه اللي طبخت هي تجيب الأڪل مو أنتِ كل مره تنعلسين غربي يلة .
أميمة ـ أثيلة وعمه سعاد هنا الطبخن والله .
مصلح ـ أنگلعي مالت هالوجه أذا ما كسرت خشمج واخذت عليج نسوان اثنين مو اني مصلح ابن أبوي
اشهاب ـ مشت تبجي وتعدل بخمارها ولازمه بطنها إنتوا كل عقوبتكم تزوجون عليهن .
مصلح ـ المره مو مال عيني وأغاتي مال دك بالنعل
بشرفك هذا برغل ما طاحناتها عدل وما مستويه زين ومگصرة زيت وملح احد كال ألهن احنا من المواشي والله انعل يومهن اليوم .
ـ دفع الصينيه وتوجه إلهن ومناف لحگه ويـــن أنتَ الثاني بكل عزه لطام تموت على المشاكل اعزب واحفظ ماي وجهك باجر عگبه تجي مريتك ويسودن عيشتها ياخذن ثارهن منك ويطلعنا بيها خلك بمجانك وانثبر بكاعك .
ـ أريد أشوفه شيسوي بـ سعاد .
ـ شعليك منه وسعاد شعليها عدها رجال يكظها .
ـ رجال يكظها !! ليش مصلح اولى بيها اسگت يمعود خل نأكل لكمه گبل لا يجينا ابوي وما يخلينا انام يضل يفرض قرارته وتروح علينا هالساعتين .
اشهاب ـ أكل لغفتين وانسدح ، دفعت الصينيه وشربت اللبن وطلعت ومصلح لازمها دك بالشطب وطلعت أمي عسلة تصير زوجة أبوي أخذتها منه بس بعد ما نعنع عظامها الباقيات يباعن يخافن يلوحن الطشار واجه يهف ذب شطب الخيزان وتمدد بالكوة يأخذ نفس .
مصلح ـ مال الگصف شغل عمل انثبرن واطبخن عدل
اشهاب ـ ترى الطاحونة ما تطحن عدل من امس اثيلة بلغتني وكلت لـ حناش وغلس عنها والصوج منكم ما واحد ياخذ الحنطه ويطحنها بالمطحنه وتأكلون برغل مال اوادم عليش شابعين نسوانكم ضرب يعني مالهن شغل رحت توليت حرمتك الدك عليمن بوية .
ـ وزقنبوت .
َ ـ ما جاوبته ، وأجت سعاد تجمع الجهال من الشمس وأخذتهم الخرابه كلهم وجابت الصينيه جبيره بيها الأكل وياه سطل للبن وخلته يمهم وكعدوا يأكلون ضليت صافن عليهم ومبتسم وهم كذلك يباعولي وأجت وتلفت وراها .
سعاد ـ بدربك ما تشوفلنا الطاحونة والله شبعنا دك منهم ،
بس أنتَ گلبك لين ونكدر نحجي وياك جلمه لساني صار حبل وأنه اكوله
ـ خلنها يم الباب اناملي هالساعتين واخذها وياي .
ـ كثر الله خيرك .
َ ـ راحت وطلعت سراب اعرفها من نظراتها وشافت سعاد مشت من يمي وتخصرت هاي شبيها عايشه للحظات ومصدگه نفسها .
" رجعت جريت شماغي واخذت ماي من الحب وبلتته وغطيت بي وجهي ونمت ورانا شغل للمغرب ما نفض
___________
هاجر
ـ كاعده ومخليه رأسي ع الحايط وصافنه على الديوجه متعاركات بينهن اي يا هاجر ما شبعتي من الولايه عشتي وتربيتي بالريف وشوفة الولايه بس بالاعياد اشوفنهـا شصير لو عمامي وكفوا ويه ابوي بهذاك اليوم وما خلونه بعازة احد ولا عفنا الولايه وسكنا بالعرب يم بيت جدي أهل أمي رغم ما مقصرين وابوي عايش ملك زمانه بس بعد رويحتي تحن لطفوله العشتها بدرابيين الولايه .
وتذكرت موقفهم رغم صغر عمري بس الاحداث طابعه أبالي او يمكن لن الموقف مؤلم ضل متمدد بالذكراه .
" ڪاعدين بيت عمي الجبير خلدون لآن أمي مريضه نايمه بالمستشفى ، خلوني بيت عمي وراحوا ، كمت طلعت برى واجت زوجه عمي وتعلج وما عاجبها الوضع .
إبتهال ـ گومي منا بس كاعدة وأكل ونوم فندق استراحة عندي .
ـ لا عمة بس أني ما باقيه عطول ، بس أمي تصير زينة ارجع خوما اريد اضل يمج العمر كله .
ـ بسم الله والج صوت وتعرفين تسولفين أكول كومي ولي من وجهي بين ما يجون اهلج والله يعلم شوكت يجونج لان سالفة امج مطوله .
ـ ما فهمت ليش شبيها أمي ، صاير شيء وضامينه عني ، عمه أبتهال فدوة گوليلي أمي شبيها .
ـ طفلة مو مال أكولج وأخوفج عـلـىٰ أمج بس مبيها شيء تصير زينه وترجعلج .
ـ عمة امي شبيها
ـ تحتاج عمليه وتريد فلوس يا أبو فلوس سالفة طويلة ما راح تفهمينها بعدج طفله ، المهم گومي روحي بنات عمج جاي يغسلن الفرشات عـلـىٰ السطح يلة روحي
ـ عفتها ورجعت يم جديتي لگيتها تصلي وتدعي لـ أمي كعدت بجيت على وضعنا
أسمي هاجر وأمي إسمها امل وأبوي أسمه صباح الاخ الوسطاني بين عمامي صائب وخلدون عمي الجبير
"أبوي من يومه ما حب دراسه مو مثل باقي عمامي دارسين ومتعيين ابويه ترك الدراسه وبلش يشتغل عماله ويوميه شغله لحد ما صار سائق تريلة وتعرف على أمي عن طريق صديق وياه يشتغل وتضيف يمهم بالعرب وشافها وانعجب بيها وحجه ويه عمامي صائب وخلدون وجديتي وعمتي الوحيدة أسمها وجدان .
بالأول اعترضوا لان من الريف ومن هالحجي بس أبوي ضل على قراره وما تنازل عن حب أمي وتزوجها وعاشت وياهم كم سنة بس مشاكل ويعيبون عـلـىٰ أمي ولبسها حتى حجيها وجانت تنقهر وتضوج منهم حيل وابوي ساكت ومتحمل أخر شيء طگت روحه لان أمي فقيره ما تحجي ولا تفتح حلگها وكاموا وشالوا بيت بصفهم ويشتغل والحمدلله مرتاحين ومستوره .
الحجيه ـ الله يكوم أمج بالسلامه ويرجعها الج لان البنت من دون إمها تضيع وحال الضيم حالها غير ونسوان عمامج وكاح وين يرحمن حالج أدعيلها .
هاجر ـ كلامها زاد الخوف بگلبي وأني طفلة ويني وين هلسوالف ولا أحد رحم طفولتي ويكولن إمها خطية ، ضليت ساكته وعيني عـلـىٰ الباب وكل ما يجي ابوي اسألة بس يهز برأسه جانت عمتي وجدان زينه علينا وتروح وتبات يم أمي هي وزوجه عمي صائب اسمها ليلى اجت وجايبة نمارق وياها فرحت من شفتها صديقة روحي والطفولة حضنتۿها شلونج
نمارق ـ بخير ليش تبجين لتخافين عليها خالة امل مره سباعيه وما تهم للمرض وهسه سمعت راح تدخل العمليه وان شاء الله تنحج عمليتها وترجع النا .
هاجر ـ عليج الله نمارق سولفي عمليه شُنــــوْ أمي شبيها شنو مرضها ليش مو راضين يسولفون اليه .
ـ مبيها شيء وعملية سهله ، هسه تعالي سولفي عن الحقيرات بنات عمي خلدون شلونهن وياج .
ـ كعدنا بالحديقة ما سولف شيء بس هي تسولف عن صديقاتها ودراستها واني بالي مو يمها بالي يم امي
" لـ الليل وأجتمعوا عمامي كلهم بيت عمي خلدون ونسوان عمامي واحنا بس نتسمع يم الباب وفهمت منهم أبوي محتاج فلوس العمليه والكل ڪالوا ما عدنا ومحد وگف وياه وطلع أبوي ضايج .
" نمارق ضلت يمي واني للفجر وعيني ما تغفى وانتظر خبر عن أمي ومحد راضي يحجي وأجت عمتي ليلى بوكتها مستعجله ودخلت المطبخ ركضت اتسمع الهن وأنصدمت من گالت .
ليلى ـ ولج خطيه محد ساعده وعمليتها فشلت وشالوا الرحم مالتها بعد ميصير ألها اطفال هسه لو عنده جان اخذها احسن مستشفى وبفلوسه ونجحت عمليتها خطيه هالمسكينه
أبتهال ـ شنسوي الها بعد حظها ما جان إهلها يدبرون إلها فلوس خوما بس زلمتها وبعدين كلمن على كد حاله منين نجيب خوما ابيع ذهبي وانطي الهم
ليلى ـ أي شكو بيها اني لو عندي جان بعته وانطيته والله بس شوفة عينج منين يا حصرة هنا ذهبات العرس صائب باعهن وخلاني .
ـ وشكوو عليه يمعوده شايلة همه هسه يتزوج وتخلف اله عود خوما يبقى على هاجر وبنت هم مو ولد علمود يرضى ويسكت يلة الله يعينه خطية .
هاجر ـ رجعت مقهوره وكعدت ابجي ونمارق تواسيني وتحاول وياي واني طگيت بس اريد امي وابوي محد ساعدهم وبشر ما عنده رحمه مع الاسف .
نمارق ـ خليج قوية وادعيلها گافـــــي بس تبجين شفيد البجي يا عيني .
هاجر ـ أمي وأبوي بوضع صعب شلون ما تردين أبجي بهيج موقف يبين معدن الشخص عافوا بوگت هو محتاج وكفتهم .
نمارق ـ ما اهتزت شواربهم وقلوبهم على اخوهم شنحجي بعد .
ـ فعـــلاً . ضليت كاعدة بيت عمي أسابيع وأبوي ما بين محد وياه بس عمتي وجدان وخطيه عدها جهالها ورجلها خوما تضل رايحة جايه .
" بيوم دخل أبوي وأخذني وگال لجديتي
صباح ـ مع الأسف أبوي مخلف اليه هيج أخوان بس بالاسم أخوه أصعب ظروفي عافوني ومحد دك صدره وكف وياي ، هيج خوه ماأريدها ولا أتشرف بيها قلوبكم وصخة نحسيين تحبون نفسكم وبس ما يشرفني ابقى يم ناس شايفين نفسهم هما وبس ومن يومكم تستنكفون من مرتي وتتنكسون منه ، وبس بالاسم اني ابنكم يلة بويا امشي نولي .
الحجيه ـ يمة لاتحكم عليهم وكلمن على كد حالة منين يجيبون الك والأخ ما يتعوض لاتحجي وبعدين تتندم وتعض أصابعك من الندم الأخ عزوه
صباح ـ عزوه وينهم لعد أشوفهم تخلوا عني بالجذب ما كلفوا نفسهم كالوا اخونا بوضع صعب يمه خليني ساكت ، يلة بوية أمشي نرد العرب أهلج من يومهم ما رادوا أمج لن عُروبيه ومن مستواهم العالي
الحجية ـ وين تريــــد ، وشنو هالحجي عيب من بنتك يبقون إهلها وعمامها .
ـ أهلها وعمامها ما احترموا أمها ولا قدروا حالة ابوها وكفوا وياه تردين يقدرون وجودها والله بنت اخوهم خليني أروح وامشي بعيد عنكم وأعيش بكرامتي .
هاجر ـ طلعت وياه وطلع بينا گبل للبيت خوالي بالعرب وضليت يمهم أيام خوالي ناس فقره وَ؏ گد حالهم بيوتهم كلها من طين وعيشتهم على الزراعه ما عدهم أذية على احد ما قصروا ويانا .
" أمي جانت تخليني يم بنات خوالي وتروح تكص للبن من الطين علمود يبينون بيت إلنا ونسوان خوالي يساعدونها وأبوي جان بالشغل .
" كامت امي تأخذني وياها اساعدها تكص بالقالب نكص والجو حار والشمس تضرب بالرأس وتحملنا الضيم علمود أبوي لايضوج .
لما خلصنا واجه ابوي وبلشوا بناء وسقفوا وصار بيتنا جاهز وحلو وشوي وشوي لما انتقلنا ومن هذاك اليوم لهذا اليوم إحنا بالريف وأبوي عاف التريله وأشترى كاع وكام يزرع وصارت عنده كيعان خير من الله ويزرع محاصيل وخضره والحمدلله دبر الحال .
" درست بس لحد الخامس الابتدائي وبطلت بس تعلمت أقرا وأكتب وبهذا عمري لبسوني حجاب وامي كامت تعلمني الشغل والطبخ وتوكفني يمها تخبز بالتنور علمود اتعلم واباوعلها شلون تخبز بالتنورالطين واحس داخلي ابجي دم ما تهنيت بطفولتي احس بعد وكت على هذا كله مو لعمري بس بلعت الغصه وسكتت وحال اردى من حال
وبيت جدي بس عمي صائب وعمتي ليلى يجون علينا وعمتي ليلى حنينه أكثر من عمي وتجيب بناتها نمارق ونجوى يجون وياها ونمارق تحجي عليه لان تركت دراستي وهي كملت دراستها بس انه ما جان عندي واهس وواقع مثلها ما متوفرلي نفسها بيت ودلال وغرفه مثلها هي عكسي أنه وما صارلي أخت، وبعدين فهمت أمي ما يصير ألها جهال وشكد حاولت تزوجه بس ما يرضى وبيوم كملت شغلي وقبل لا ادخل الهم أسمعهم يحجون بينهم .
أمل ـ انه ما يصيرلي جهال ليش ماازوجك وتخلف ولد يسندك بكبرتك ويكون سند لخيته حبايبي أگلن رأسي زوجج وخطيه وشُنو ذنبه يضل بدون خلفه
صباح ـ لعد شو ما يكولن شُنــــوْ ذنبج أنتِ بس شايلات همي ما أريد احد يشيل همي خل يلتهن بعيشتهن مالهن شغل بالاوادم .
ـ وتضل هيج
ـ اي أضل وراضي الحمدللة الله نطاني هاجر وگافي خيـــࢪ وبركة والحال مستور والله فتحها بوجهي وصارت عندي كيعان ونزرع ونحصد وعايشين الف الحمدلله بس تحمدي ربج يا حرمة ولا عبالج الشريجه بالسوالف ترى ماتنحمل وما وراها بس شعلان الگلب والطلايب والمكافش يوميه ، خليني أبردلي رأس ومرتاح والحمدلله .
هاجر ـ تبشرت خيـــࢪ بكلام أبوي الحمدللة مقتنع ورأضي وما يكسر گلب أمي .
وفعلاً ما گسر گلبها وضل عـلـىٰ الوعد والعهد وضلوا بس عليه والحمدلله مستوره .
" شلت الجدر على رأسي يبوو اليوم اتطوطح ما شربت أستكان چاي الصبح رأسي فارغ ، ولج نورس امشي عاد ورانا طريق شگد تلهين .
نورس ـ شبلاچ دومج مستعجله ومطيورة لاحگه على البيت يسمعج يگول ساكنه قصر الامير مو خرايب من طين ما تعولين تردين .
ـ يمعوده أمي لسانها تگول مسنيه تلزف بيه ليل نهار
ما ترضى أتأخر تخاف عليه واني وحيدتها .
ـ اي عيني حقها امج هم تفتهم ما خلفت بوسط هالجلهيمه والشلعان الگلب بس أنتِ وشالعه گلبج تركض وراج ما تخليج تتنفسين مثل خلگ الله .
ـ ضحگت والله لو تخلف جان ما سدت بطنها وتجيب وتبزر بكاع الله بهل الخلفة غير بس اني وتمرضت وشالوا رحمها وابوي يحبها واقتنع بيه ورضى وسكت على قسمته .
" مشينا سوى وكل وحده جدرها على رأسها وصلنا بيوتنا نورس بنت جوارينا وعدها اخت وحده اسمها فردوس وأخوان اثنين الجبير اسمه رياض متزوج والثاني ناجح هذا اعزب وشالع گلبي بس يتخطى وراي بس انه مالي نفس بي ما احبنه .
" خليت الجدر على التچة يمة أجيت وخلصت ملي
عندج شيء تردينه مني بعد لن رأسي مطبل مدري شبلاه فرغ وكمت اشوف الواحد عشرة يمكن ضربتني الشمس .
أمل ـ ها اجيتي .
هاجر ـ لا بعدني بالطريق مو تشوفيني گبالج .
ـ ولج خاف ضربتج الشمس ويصير بيج تيفو وانتِ بس تصكعين بهل اللبن انوب وين اوديج واحيرن بيج ، وأبوج مبين راح بيت عمج لـ ولاية ما عول يرد
ـ خاف لگه حليوة من بنات الولاية ولفته بحضنها
ضربتني على راسي اخ يمه شبلاج إيدج عبالك طابوكه تضربين بدون وجع گلب .
ـ فال الله ولا فالج بيش طالبتني ، وبعدين هو راح على عمج مرت عمج بعد ما تطلگت وتزوجت مره ثانيه تريد تأخذ نمارق يمها بعد عيني مره شگدها شگبرها وتريد تاخذها صدك نص عقل .
ـ وصراكعة تصركعها من بين النسوان وين تأخذها بين عيالها ورجلها غريب ومحرم عليها ونمارق خوما بعدها طفلة صدك تسودنت تالي وگت من ورا عمي وبعدين هي مو أخذت نجوى وياها شكو انوب تريد نمارق مو زين عمي وافق ميصير هيج .
ـ نسوان شمدريج ما لگت رجال لـ نمارق وتريدها يمها علمود تخبل عمج وتخلي يتسودن على عمره ، اخر وكت نسوان يتطلكن من زلومهن ويتزوجون والله نشوف العجايب شلون إلۿـا نفس ما ادري مالت وبلت
ـ أني ما قاهرني غير هل الـ نمارق خطيه صارت ضحيه بين إمها وأبوها كل واحد منهم يجر بصوب لاعمي يستقر ولا إمها ، الله يعينها والله أشتاقيت الها بلكي ابوي يجيبها وياه تجي تتونس يمنا وتغير جوا
ـ ما ظنتي تجي هي مو هلگت تحب الكعده يمنا وعدها دراسه وينها وويانا .
يلة اخذتنا السوالف ولهينا عن شغلنا ، انه رايحة اشوفن ام رياض تريدني اشوف الخضيضة ما
بدل ماتدور وتبحث علي الروايات خليها علي تليفونك وحمل تطبيقنا
