رواية ملكة الشيخ ضاري (كاملة جميع الفصول) بقلم ساره المجيد

رواية ملكة الشيخ ضاري الفصل الاول

مساءاً محملاً بأريج القداح ينثر شذاه ع انفاس احبتي ..🌹🌹🌹🌹🌹

شلونكم يالعمر ...

حبيت انشر اول بارت من قصتي الجديدة حتى تقروا اكثر من مره وتفهمون القصة بين ما اكمل الباقي انتظروني قريبا جدا قصة ملكة الشيخ ضاري 

تمر الحياة .. 💕

بين حُلــم ٰ୭ امنيـﮭﮧ ; 🌿✨

و لا يحدُث إلا ما ڪتَب اللّـہ لنـا 💛 🍃

.........

طبعا غبت عنكم فترة واشتاقيتلكم جثيير ورجعتلكم بقصة جديدة وحقيقية من احدى متابعاتي ..هل مرة قصتي من ارض كربلاء المقدسة ارض الحسين الشهيد عليه السلام .

قصة جيل كامل عن احفاد واب وجد تتحدث القصة عن الشيوخ ومن زمن السبعينات واني كولش احب القصص التراثية احس بيها نكهة خاصة لان زمن اهلنه وتشوفون بيها احداث تخليكم تعيشون القصة بحذافيرها ...القصة بيها احداث مشوقة تستحق القراءة 

الحفيدة سناريا هيه الي راح تقصلكم قصة حياة جدتها #ملكة وجدها الشيخ #ضاري وقصة حياة اهلها وبعدين يمشي قطار الزمن بيهم وترويلنه قصة حياتها ويه ابن خالها وابن عمها وقصة النهوة الي انفرضت عليها ...ركزوا بالتفاصيل حتى لتيه عليكم القصة لان قصة حياة كاملة وجيل كامل

سناريا بنت اسمهان بنت الشيخ ضاري مواليد 2002 طولها 155..عيونها اكبار وبني ..

شعرها طويل أسود مايل للبني رشيقه ..بشرتها حنطيه مايله لسمار ..حلكها صغير وشفايفها منفوخه وعدها شامة بخدها الايسر ..طبعا شفت صورتها الحقيقية وشبهتها بهاي الصورة 👇شي تقريبي 

ضاري شيخ اكبر عشيرة بكربلاء رجل هيبة وشخصيته قوية وعصبي جدا ..والابن الوسطاني للشيخ ذيب ولان ضاري رجل قوي وحازم وكلمته مسموعه بين العشيرة انتقلت المشيخة اله بعد وفاة والده الشيخ ذيب بدل من الاخ الاكبر 

ملكة بنت مؤدبة وحبابة وجميلة واهلها ناس ع كد حالهم تنطي شبه للي بالصورة 

نجي نعرفكم ع الجيل الجديد

ثائر ابن خالة سناريا يشبه المطرب تامر حسني بس ثائر اضخم واطول من مواليد 1995 

آدم ابن عم سناريا يشبه الي بالصورة بس آدم اسمر طوخ مواليد 1989

زينة اخت ثائر وبنت خالة سناريا مواليد 93 تشبه الممثلة العراقية سولاف

الشيخ صگر ..نقيب بالجيش وشخصيته غامضه مثل اللغز عصبي الي يشوفه يكول عليه مغرور ومتكبر من مواليد 1981

اما باقي الشخصيات راح تتعرفون عليهم بأحداث القصة الجاية 

هسه راح ارجع بيكم الى الزمن الجميل الزمن الي كله نقاء وطيبة زمن الي بس تنشد تلكي الكل ايد وحدة توكفلك وتسندك ..

زمن السبعينات تحديدا ..احكموا ربط الاحزمه ..طائرة قصتنه راح تحلق بالجو وتروح وتهبط بأرض كربلاء المقدسة ونروح لبيت الشيخ ضاري لان همه منتظرينه حتى يقصولنه احداث حياتهم المشوقة ...

سناريا ..ياهلا وغلا بيج ست سارة وبكل المتابعين ..

طبعا قصتنه راح ابدي بيها بوكت جدي ابو امي ضاري ..جدي ضاري جان شيخ عشيره جبيره معروفه بكربلاء من اكبر العشاير ..

اتزوج وحده اسمها سكينه خلفت منه 4 بس اتوفوا ..يعني كل ماتحبل توصل للولاده ويموتون اخر مره حبلت ظل 4 شهور ومات مجان يعيشون الها اطفال ومنعرف حكمة ربنه سبحانه وتعالى شنو بهل شي ..

ف جدي طلقها وراحت بحال سبيلها جدي عنده 2 اخوان واخت وحدة ..اخو الصغير اسمه فضل والكبير اسمه ضرار وجدي ضاري الوسطاني بيهم ..

بعد وفاة ابو جدي استلم جدي ضاري المشيخة وصار هو الكل بالكل وطبعا لان عصبي وكل تهابه ولان زلمة حوك ويضرب بعصا من حديد ماعنده اشكال استلم هوه المشيخة بدل اخوه الكبير ..

شكله طويل وضخم وابيض ع حمار ..عيونه بيهن لون ..

المهم بيبي أسمها ملكة هي بت ناس ع كد حالهم يعني وسط ابوها متزوج اثنين امها ميته ومرت ابوها اسمها مكية خلفت بس بنات ..وام ببيتي جابت 4 ولد حازم الجبير ومحمد وفرقد وعباس وبيبي ملكة ..

بيبي ملكة مواصفاتها قصيره ومربربه وبيضه وعيونها سود عمرها بذاك الوقت 12سنه صف اول متوسط ولان ماعدهم ابنيه تعبر المتوسطه بطلوها وانحرمت من دراستها ..

وهي تحب المدرسه حيل مو بس تحبها تعشقها وحتى جانت شاطره والكل يمدح بيها ليش ما فد يوم صارت مصبيه ...

ابو بيبي ملكة عنده كاع جبيره حييل يعني 3 دونمات 

ورثها من ابو خله بيها الملج الي يصير شريك بالارض لكن ذاك ميخاف الله سوا بي دكه ناقصة وخلاه يوقع ع ورقه تنازل وابو بيبي مايعرف لا يقراء ولا يكتب وكولشي مايعرف فا ع الثقه وقع وصدك وراحت الارض من بين ايدين ابو بيبي بين يوم وليله مرته مكية كالتله روح لشيخ ضاري هو يرجع كاعك

ابو حازم ..وهوه يدك ع راسه ..يمعوده شيرجعها الارض راحت من بين اديه راحت بعد شلون هسه

حازم اخو بيبي ..بويه اني اكول لو تروح لشيخ ضاري هو يرجعها الك والكل يمدحون بيه وناس تكول عنه شراني ومخاوي الذيب وراح يعرف شلون يكسر رجل جاسم ويرجع الك الكاع يابويه 

ابو حازم ..والله ومادري يوليدي اخاف مايكدر يرجع الارض وهذا جاسم الله لايبارك بي اكل حكنه وكدر يلعبها صح ...

حازم ..هسه ماخسرانين شي بوية دكوم نتوكل بالله عسى ولو نلكي ضالتنه يم الشيخ 

ابو حازم ..ماشي ابني كوم وانه ابوك نروح اله ..

سناريا ..راحو جدي واخو بيبي حازم للديوان مالت الشيخ ضاري لكوا عنده ضيوف ورا ماروح كالهم جدو ..السلام عليكم شيخنه 

الشيخ ضاري ..وعليكم السلام ..ها خير شعندك يابو حازم

ابو حازم ..والله ياشيخ اني اجيتك وطالب منك العون وانت شيخ العشيره وانه مظلوم ياشيخ

شيخ ضاري ..وشلون مظلوم فهمني حاجتك ..

ابو حازم ..أسمعني ياشيخ انه الله فضل علي وانطاني كاع من ورث ابوي جبيره وتعبت عليها ضليت أيام ازرع بس من أجه الموسم والدنيا مابيها لا مطر ولا شي الزرع مات والكاع جفت وانه رحت لعند جاسم وكتله يشاركني الكاع ..

هو مكال لا وصرنه شركاء بالنص بس ياشيخ كبل ثلاث تيام خلاني ابصم ع ورقه وكالي هاي ورقه تضمن حقك ومن رحت اله اليوم كالي الارض ارضي وانه المالك مالتها وانو اني مالي شي يمه انه تسودنت ..

شلون وهي ورث من ابوي الله يرحمه وكتله جا شوكت صارت ملكك وانه المالك الاصلي كالي انت كبل ثلاث تيام تنازلت عنها الي واذا ماتصدكني هاي الورقه وشوف وانه ياشيخ لا اعرف اقرا ولا اعرف اكتب وراح حلالي كله ياشيخ واجيت هسه وانه داخل ع الله ثم عليك وانت ماترد مظلوم وصيتك مذيوع بكل الديرة انك تنصف المظلومين

الشيخ ضاري ..خوش هسه انشوف ..وينك مسعووود 

مسعود ..أمر ياشيخ

الشيخ ضاري ..روح لعند جاسم ابن خضر وكله الشيخ ضاري طالبك ضروري

مسعود ..ع أمرك ياشيخ 

حازم ..هسه ياشيخ راح ترجع الكاع

الشيخ ضاري ..شني لازم شاك بيه 

حازم ..لا العفو ياشيخ بس كلت اخافن جاسم يلف السالفه علينا ..

الشيخ ضاري ..اذا عدكم حگ يمه يرجعلكم واذا لا ف عقابكم عسير عندي

ابو حازم ..لا والله ياشيخ وداعت راسك كاعي انباكت مني ..الله شاهد ع كلامي

سناريا ..المهم طلبو جاسم واجه وكعد جدو يحقق ويا وهدده 

الشيخ ضاري ...هاي سالفتك سالفة زلم يا جاسم تخون العشره والخبز الي بينكم وتبوك كاع الزلمة الي امنك ع حلاله وين كاعدين احنه ها فوك ما الضيم ياكل باهل العراق تجي انت وأمثالك تخربونه مع الاسف عليك

جاسم ..بفشلة ومدنج راسه ويتلعثم بالكلام ..ياشيخ اني 

شيخ ضاري قاطعه ..بسسسسك جذب وهسه ترجعله الكاع مالته ورجلك فوك رأسك واذا مارجتعها يكون بعلومك كلشي تملكه يصير اله وانت الممنون اله منعني العب بيك طوبه ...واخلي الحاضر يعلم الغايب بعقابك

جاسم ..ع أمرك ياشيخ وانه اعتذر منك يابو حازم مدري شلون وازاني الشيطان 

ابو حازم ...ماريد شي منك غير ترجع الكاع الي اخذتها مني

جاسم ..راجعه خوية واعتذر منك وهاي الورقة هم شكيتها 

سناريا ..طلع جاسم مقهور حيييل وحتى حمل بكلبه تجاه جدو حقد وغل وكراهيه ..

ابو حازم ..مشكور ياشيخ والله ماعرف شلون أجازيك فضلك هذا اشيله ع راسي للموت ..

شيخ ضاري ..هذا واجبي وانه خادم الكم وانتوا مظلومين والحق وياكم ...

منا ورايح يا ابو حازم لا تشارك احد بحلالك خوش

ابو حازم ..توبه ياشيخ ابقي حلالي كدام عيني ..وكاعي اني وابني نفلح بيها

شيخ ضاري ..الله يوفقكم بالحلال ابو حازم لان مال الحلال مايروح 

ابو حازم ..اي والله ياشيخ صدكت ..واني اشكرك مرة ثانية ع الي سويته ويانه 

والك مني هديه مراه ع هاي وكفتك ومشكور وماقصرت وكثر الله خيرك ..

سناريا ..جدي شيخ ضاري صفن شوي وباوع ع ابو بيبي كله هديتك مقبولة منك وكفو يا ابن الاجاويد ونعم منك

ابو حازم ..كفوك الطيب يا شيخ والنعم من اصلك اني بذيج الساعة من اناسبك يوم عيد وداعتك ..

سناريا ..وصار الاتفاق ع عطية جدي لشيخ ضاري وهيه جانت بيبي (ملكة) بدون علمها

في مكان اخر

الشيخ ضاري ..من عرض عليه ابو حازم بته هديه انه من زمان جنت ناوي اتزوج بس كل ماقدم ع الزواج اتذكر زوجتي الاولى وشلون جنت عايش وياها ..

بس انصدمت بابو حازم من هدالي بنته واحنه الشيوخ ..مايصير نرفض الهديه لان تهين كرامتنا وتمس سمعتنه قبلت وتوكلت ع الله جم يوم مره وحجيت وي العلويه امي وكتلها ..

الشيخ ضاري ..الله بالخير يمه

العلويه ..هلا يمه هلا بالسنع هلا بشيخ المراجل

الشيخ ضاري ..هلا بيج حجيه انه اليوم هدولي حرمه يايمه روحي انتي وحريم اخواني اخطبوها الي وخلي نتوكل ع الله

العلويه ..صدج يمه وراح اشوف وليداتك ..

الشيخ ضاري ..ان شاءلله يمه 

العلويه ..يا يا ولج نورييييييه ..

نوريه ..ها ها عمه

العلويه ..جيبي عباتي ويلا بينه نمش نشوف مريت اوليدي ..

ضاري ...يمه صلي ع محمد شبيج تعرفي اول مني هيه ياهي شسمها أشمالج خليني احجيلج اشو اكعدي.

العلويه ..تامر ياوليدي وهاي انه كعدت كول يوم

ضاري ..شوفي يالغالية البنت بت ابو حازم الحداد اسمها ملكة وشوفي شوكت ميعجبج تروحين تخطبيها بعد بقت يمج ..

العلويه ..اليوم اروح واشوفها ..

الشيخ ضاري ..براحتج يمه شوكت متريدين روحي انه هسه كايم عندي شغل بالديوان ..

العلوية ..هاي هيه يجرالك لعد يوم الجمعة ان شاءالله انروح وانتمم كولشي

سناريا ..كل هذا صار وبيبي متدري لان جانت فرحانه حيل انو ابوها واخيرا اقتنع انو تكمل اول متوسط وهيه راجعه من المدرسه شافت اخوها حازم واكف ويدخن

ملكة ..شكو شبيك خوية شو مو ع بعضك صاير شي

حازم بضيكت خلك ..مابيه شي خيتي

ملكة ..لا بيك شي انت ماتشرب جكاير اله بيك شي اعرفك كول خويه شصاير فدوة لتقلقني

حازم ..كلت بكلبي اوف اوف ياخيتي شكلج اكلج ابوي انطاج هديه للشيخ عبن رجعلنه كاعنه الي باكها جاسم ..بقيت ساكت وانافخ بدخان جكارتي وماعرف شكلها ..

ملكة ..خوية اشبيك ماتحجي ليش ساكت 

حازم ..جنت اباوع عليها بملابس مدرستها خطية وفرحانه بجنطتها وكتبها اوووف خيتي راح يظلموج بزواج وانتي صغيرة بعدج ..

غوركن عيوني كتلها هيج لتخلين ابالج ماكو شي بس اتعاركت وي خضر انتي روحي طبي جوه تعبانه جاية من المدرسة 

ملكة ..وليش اتعاركت ويه خضر شصاير احجي حازم 

حازم ..شلون يعني ليش تعاندين روحي طبي جوه بلا حجي زايد يله

سناريا ..وظل الموضوع مضموم عن بيبيتي ملكة تقريبا ثلاث أيام لحد اليوم الرابع وكلشي عادي ماكو شي جديد بيوم الجمعه عطله وملكة فرحانه رجعت تداوم اندك الباب ..

مكية مرت ابو بيبي ..بصرخة ملللللكة وينج ولج روحي فتحي الباب 

ملكة ..ليش اني خو خلي مريم تفتح الباب

مكية ..ليش تراددين افتحي الباب بلا لغوه شوكت تزوجين وارتاح منج

ملكة ..رايحه رايحه هففففففف

سناريا ..هنا ببيتي فتحت الباب طلعت بوجها العلويه ام الشيخ ضاري وياها زوجة فضل اخو الشيخ اسمها(خديجة) ومرت اخو الثاني ضرار اسمها(صبحة).

طبن جوه وهنا صافنات ع بيبي ملكة وشكلها صح صغير بس ماعلم الأنوثه مبينه بيها حيييل جانت تجذب الانظار من ما هلكد حلوة ..

سلمت عليهن وبقت يباوعن عليها من فوك ليجوه بنظرات تعجب 

ملكة ..حجيت ويه نفسي كلت يا هاي شبيهن ذني هيج صافنات عبلك شافن ممثله اجنبية 😕..

كتلهن اتفضلي خاله 

العلويه ..انتي ملكة

ملكة ..اي خاله

خديجة ..ماشاءلله حلوه 

ملكة ..شكرا انتي الاحلا

دخلن جوه ومرت ابوي كالتي بسرعه روحي جيبي جاي وماي رحت جبتلهن ماي وجاي ومرت ابوي بس تخوزر شصاير أشبيج عفتها ودخلت للغرفه وفضولي كتلني اريد اعرف منو ذني ..خليت أذني ع الباب واريد اسمعهن ..

مريم ..اشبيج ولج شدسوين 

ملكة ..مالج شغال وانتي شكو يمه ..

مريم ..ماشي اني الج اله اكول لامي تتسنطين ع خطار ..

راجحة ..اشبيجن ولجن 

مريم ..تعاي شوفي هاي تتسمع ع خطار الي بره

راجحة ..ملكة عيب تعاي

ملكة ..ماجي ..اششش اسكتن ..

سكتتهن .وسمعت

العلويه ..عيني ام حازم ابني الشيخ ضاري دزني اليوم اخطب بتج ملكة اله وهي هديه اله هديتوها ..

صبحة ..واحنه شفنه ملكة الي فتحت الباب مو 

مكية ..اي هيه والله جيتكم ع رأسي وكلي يقين انو ملكة توافق ع هيج زواجه 

العلويه ..جا خوش هاي الفتره العرس ورانه عمره بيت الله وكبل لا اروح لعمره اريد اشوف ملكة جنتي 

ملكة ..شنوووووووو😳😳زواج شنو زواجججججج لالا مستحيل ماتزوج ماتزوج ومدرستي ماعوفها بعدني صغيره ماعرف شي عن الزواج ..طلعت مثل المخبلة اصارخ عليهن فتحت الباب وصحت ..

ملكة ..ماتزوجججججج انتن شتحجن مستحيييييل اتتزوج مستحييييل

مكية ...ولج نصي حسج انتي شلون ترفعي

ملكة ..انتي شتحجين زواج شنو 

ام ضاري ..ام حازم شنو هذا شلون تخليها ترفع صوتها هيج

مكية ..اعذريني علويه بس هي طفله وماتفهم والله وكيلج ماتدري اصلا بهذا الموضوع.

العلويه ..احنه هسه كايمين ومن تتفقون ع الشغله كولولنه عود ..يلا صبيحة كومن

ملكة ..كلها كامت واني ارجف من العصبيه اول ماطلعت النسوان وجهن ثكيل ..رجعت مرت أبوي ضربتني راشدي وكعتني بالكاع وصاحت وصرخت صرخة رجت البيت رج

مكية ..ولج شلون تصحين هيييييج ادبسزز اليوم اطيح حظج اني الج شلت ايدي نفضتها براشدي فريت وجها فر كتلها أمشي طبييي جوه خلي يجي أبوج واني اكله ع قلت أدبج هاييي

ملكة ..😭والله ماتزوج لو تطلع نخله برأسكم ماتززززوج اريد أكمل مدرستي والله لو اموت ما اتزوج .

عفتهه تريد تضربني ركضت بره كعدت وخليت رأسي بين رجليه بجيت لحد ماطكت عيوني من البجي 

#في_مكان_اخر

شيخ ضاري ..راحت امي ومن رجعت مثل المتكدره 

جنت كاعد بالديوان واجتني امي اشوف معالم وجها مايطمن ..كتلها خير يمه

العلويه ..جا انت من هادين الك البت دريت بيها ماتكبل بعرس من ساسها بت طلعت وصوتها عالي مثل الخبله ..صرت كل كدني كدام حريم اخوانك وحرمة عمك جا والعباس ابو فاضل ماروح بعد ..

ضاري ...ييييييمه ع كيفج أشمالج حرمة ذيب يتكدر خاطرها وانه كاعد ساكت ..

كام ع حيله وصرخ ...ولك اسسسسسسسسسعد ..

أسعد ..ها شيخ تأمر ع شي

الشيخ ضاري ...روح صيحلي حازم وابو بسسرعه وكله الشيخ موش جاهل وينضحك علييي وخليهم يجون هنا كدامي بساع ..

أسعد ..تدلل شيخ ..

سناريا ..وراح اسعد يصيح ابو بيبي واخوها وانصدموا من الطارش جان معالم وجها مايطمن ظل بالهم شبي الشيخ وهيج داز علينه ..دقايق واجوي ابو حازم وحازم ..

ابو حازم ..السلام عليكم شيخ طالبني أمر 

الشيخ ضاري ..بعصبيه ..

من ششششششوكت يابو حااااازم النسوان الها جلمه بديوان الزلم شلون تسمح لنفسسسك وتخلي جاهله تغير شورك 

حازم ..ياشيخ بس فهمنه شكو شصاير

ضاري ...اليوم الشيخه الجبيره راحت هي وحريم اخوي يخطبون البت وطلعت الهم وطردتهم وتكلهم لو اموت ماتزوج شنييي ياابو حازم ماكتلي بتك ..هيج صلفه وناقصه تربيه وعرمة ..

سناريا ..ابو حازم مثل بالع الموس مايكدر يحجي شي سكت ومن رجع لازم بيبي ملكة شبعها كتل ..مردها مرد

ملكة ..ومرت أيام وابوي يكومني بكتله ويكعدني بكتله حتى اوافق وماكو بحلكه غير (ولج تفشليني وي الشيوخ ومنو جماله الشيخ ضاري والله ألعب بيج لعب يابت فخرية )

حازم اخوي خطيه كم مره ومره اتعارك وي ابوي لخاطري حتى مدرستي منعوني منها بحجة صرت مخطوبه للشيخ ضاري صرت مكأبه حيييل بس أبجي ومريم وراجحة بس يواسن بيه بس ضيمي جبير مدرستي اريد اكمل مدرسه ..ماريد أتتزوج ليش مايفهموني ..

كعدت الفجريه بجيت وردت من الله ترجع أمي الي عافتني وراحت لرب العالمين ..صرت اني وسجادتي بس أبجي عليها ومكية تكومني بكتله وتكعدني بكتله ..

مر 3 أسابيع وبس انكتل محد يحبني حسيت بذاك الوقت كمت توضيت ورحت صليت دخل حازم جان شكله تعبان ..حيل 

حازم ..ملكة تعاي

ملكة ..مسحت دموعي وكتله حازم حباب لا تخليهم يزوجوني منه هو جبير ويخوف واني صغيرة ماتوالم ويا ..

اريد اكمل دراسه ماريد غير بس دراستي عليك الله حاجيهم اذا انت تحبني حباب حباب الله يخيلك ياخوي ماعندي غيرك يوكف وياي فدوة لطولك خوية انقذني من هل زواجه الفاشلة ..اقنعهم حجيت وطكيتها بجيه

حازم ..أسمعي ملوكة حبيبتي انتي صح صغيره وانتي تحبين درأستج واكيد راح تخلين بناتج يكملن حياتج 😔 ..

شوفي حبيبتي اني ماكلج ولا اغصبج ع الزواج هذا ..بس انه اريد منج تزوجين ووافقي وابوج معند وهاي مكية نازله بيج خدمه وكتل وانتي تعرفين بعد اذا ظليتي راح تظلين خدامه الها ..

روحي ياحبيبتي وربج اذا قاسم انتي والشيخ بينكم نصيب يصير واذا لا فا عسى ان تكرهوا شيء وهو خير لكم ..

ملكة بعناد ..ماتزوج كتلك ماتزوج ليش متفهموني حسوا بالنار الي كايده بيه اريد اكمل دراستي والله مافهم شي بالزواج ياخوية 😭

حازم ..ليش ياعمري هسه انتي باجر عكبه اذا كبرتي هم راح تتزوجين ..

ملكة ..ادري ابوي مهدد حازم حتى أقبل لا اعرفه مستحيل تطلع منه اريد اوافق ضليت مصره ماقبل وهم كثرت المشاكل الي بيني وبين أبوي هواي

وحتى مكية كامت تدخل وتزن برأسي اوفق بس عندت حييل لحد مافد يوم جنت حابسه روحي بالغرفه أجه ابوي كام يصيح عليه ويغلط لازمني من شعري كتلني كتله وكالي ...

ابو حازم ..ولج الشيخ منتظر حضرت جنابج توافيقن بس ماعاشت ولا جانت الي تنزل رأسي بت فخرية ازوجج وغصب عنج افتهمتي ...

ملكة ..شمرني بالكاع وطلع صرخت وعيطت ملخت روحي اتملخ وكمت ادك والطم بس مافاد شي ثاني يوم اجوي اهل الشيخ وغصب عليه لبست وطلعت سلمت وكعدت بس أثار الضرب ثبتت الهم اني مجبوره ..

جانو جايبن المهر كله ذهب وملابس وغراض كومه بس كلها بعيني متسوى شي اريد درأستي ياربي ..

خلصت كلشي خسرت ماظل شي واصير مرت الشيخ ضاري ..

طلعو وهم شاكين اكو شي بس مكية خوش لعبت لعبتها ماخلت احد يحس اكو شي او صاير شي ثالث يوم اجت ام محمد الحفافه حفتلي وجههي وجسمي شافت اثار الضرب كالت

..

ام محمد ..ياعزه العزاكم شمسوين بالطفله

مكية ...خايبه ماتسكتين أشتغلي ومعليج لا تدخلين

ام محمد ..جا انه شغلي شغل والله يالله

مكية ..ضبي لسانج اكوم اشوف الجدور ع طباخ

ملكة ..رفعت ايدي وكعدت حف بيها وهي تدردم ..

ام محمد ...جا اهلج ماعدهم خبزه ينطوج للشيخ بس تدرين عمي هو خوش شيخ والنعم منه ..يستاهل هيج ورده ايي والله شلون ورده فدوة لهل وجه گيمر ماشاءالله 

ملكة ..خاله شيفيد اني مغصوبة ع هل زواج اني ماحبه وماريده هوه زلمة شكبرة واني توني صغيرة 😔

ام محمد ..كلشي يفيد باجر تكبرين وتفهمين من تروحين لمجالس ويكولون أجت مرت الشيخ يا كبرها عند الناس ..صدكي الكل تحسدج

ملكة ...اوف اووف ..صدك لو كال ابو المثل الرجلي بالماي مو مثل الرجلي بالنار خلصت واخذتني لحمام سبحتني ...

ضليت اليوم كله أباوع نفسي ملامح الطفوله كلها راحت كلها خربت بسبب هذا الشيخ كمت اكرها واموت منه ..

اوف ياربي حتى شكله ماشفته شلون بيج ياملوكة ...شلون راح تعيشين 

شلون ماغمضت عيني لو شويه ..الصبح سمعت صوت النسوان كمت وطلعت لكيت اهل مكية جايين عفتهم بلا سلام ورحت غسلت ورتبت روحي عشتو ...

تريكت واجت هاي الي تخيط ثوبات العرس اخذت قياساتي وكلشي وحتى البدله العرس خياط سوتها ..

كل تجهيزات العرس خلصت باسبوعين بس كل هذا مو بعيني اريد العب وي الجهال اريد اعيش ياربي طفله ماشفت شي من حياتي

طفله وحرموني من أجمل احساس هي الطفوله برائتي سلوبها مني واني بعمر الورد صرت مجرد لعبه يحركوها براحتهم صار يوم العقد لبست ثوب طويل لونه وردي ..

شعري سويته ضفيرتين من جهتين ومكية سوتلي دكه بحنجي (عاده قبل عد اهل امي المتزوجه يسوولها دكه او وشم يصير لونه اخضر)..

شعري طويل حيل لونه أسود فحمي وعيوني سود وكبار شفايفي وسط وكفت انتظر ملك الموت يجي حتى يسلب روحي مني ..

دمعتي واكفه ع شعرايه اريد اوكع من طولي ع الي صار ياربي تعبت ماريد هذا الزواج دخلت مريم وكالتي كلها أجت كومي يصيحولج ..

اخذتني خالتي اخت امي أسمها زهره وهي تبجي وياي كعدوني ع الكرسي ورا الباب وأسمع صوت السيد وهو يسألني اذا موافق او لا ..

ضليت أمتمت ماعرف شكله اي لا عقلي يريد شكل وكلبي يريد شكل خنكتني عبرتي حييييل .. حسيت صدك بنفسي يتيمه محد اهتم برأيي محد اخذ شوري بشي ..

صرت تمثال بينهم جسمي برد وكمت ارجف مادري شصار بيه جفوني ثكلت ع عيوني كمت افتح عين واغمض عين وأسمع صوت نسوان تكول اي موافقه وسيد يكول بنتي موافقه او لا ردي ومكية تهز بيه وتضرب ع كتفي بس احس بغواش ثكيل ع وجهي وخنكه ..

مدري شلون طلعت كلمة موافقه ...

وسمعت صوت الهلاهل طشت فوك رأسي الجكليت وحامض حلو بس وكفت سندتني مكية عبالك مسويلي نومي حامض مخليني مسكره ماكدر اوكف ع رجليه ..

اخذوني كعدوني ع الكرسي والنسوان اتصفك وتركص ..

النسوان ..شيخ ضاري طفي الكلوب خدها يشع جنه اكلوب ..بت الشيخ لبن الشيخ جبناها ..والف صلاة وسلام عليك ياحبيب الله محمد..كلوشششششش ...

اباوع عليهن بفوها واذكر مره من رحت لعرس جيرانه شفتها لابسه أبيض وتضحك وتبتسم وانه حتى فرحه بوجههي ماشفت كوه لازمه نفسي دوخه وخنكه لازمتني ..

جسمي يرجف من كثر البرد حسيت بي ..

شويه ودخل الشيخ ضاري سمعت صوته اخشن صوت سمعته بحياتي دخل وجان طويل وضخم وجهه ابيييييض احمر وعيونه صغار بس يخزر .ورافع حاجبه

دنكت ..وكوه لازمه روحي تمنيت ألكاع تنشك وتبلعني ولا اكعد بصفه بس صار كوه كعد بصفي وأسمع صوته هو يحجي وي امه بطريقة أمر ..

لبسني الذهب والحلقه بس الذهب حييل ثكيل كوه شلته من خلص كالو هو عقد وهو زفه اهنايه ماظل عظم صاحي بجسمي كلها تركص من الخوف ..

وكف وصاح ع وحده جابتلي ربطه خلتها فوك رأسي ورجعت خلت عبايه جسمي برد ..من الخوف سحب ايدي وأسمع يكول..

الشيخ ضاري ..ليش هيج ثلج البت شمالها

ام حيدر ..خويه من الخوف هسه تصير زينه

الشيخ ضاري ..جا وسعو الطريج خلي نمش ..

ملكة ..اخذوا ايدي اريد اشوف اخوي حازم اودعه اريد بس أبجي بحضنه بس حتى هاي ماصحتلي ركبنا بسياره يمكن هي بيت الشيوخ الوحيدين العدهم سياره ثور هههه

اي عدهم فلوس هواي ..مو مثلنه يوم ناكل وعشره لا 

صعدت بصفه وصلنا لبيت الدنيا غروب وبلشت معازيم تتعشى دخلني للغرفه مالتي كبل ..

باوعت علي اخشاب عراقي أصلي كنتور ابو بابين وجربايه ام نفرين وامرايه طويله بصفهه ميز خشب وبوفيه (مثل الكنتور بس أصغر)..لونه جوزي وتلمع لمع الفارشين ع الجربايه ديباج ثخين وابيض لونه ..

وخرت عني الربطه اختنكت من وراها وكمت أفتر بالغرفه أسمع صوت النسوان الي بره وصوت جهال باوعت لصوره جبيره أبيض وأسود هو واكف بصفه شيخ ذيب ابو يمكن لان يتشابهون بس شيخ ضاري أطول واضخم ..لازم أسلاح طويل تفكه ..

وخالها ع كتفه ومسدس ..بيده لازمه ويخزر مبين علي عصبي وين وكعتي ياملوكة وين ..

اوف اوووووف..😔..

كعدت ع طرف الجربايه وأتلمس الحرير المفروش عليها..

ضحكت ع روحي هه ..

اييي ياملوكة شوكت حلمتي تصيرين مرت الشيخ ضاري والله صرتي هههه كمت اضحك وأبجي سوه

عبالك خبله هههه ...

وهنا انفتح الباب اني بسرعه وكفت كمت ارجف واشوف الشيخ ضاري أكبالي 😨😨😨

وللحكاية بقية ..

قصة تتوالى احداثها جيل من بعد جيل لتصل الى وقتنا هذا ..احداثاً مشوقه تنتظركم 🌹 

تكملة القصة يوم الخميس ساعة ب2 الظهر وراح يكون النشر يوميه بارت واحد فقط لان القصة قيد الكتابة .... كونوا بانتظاري 

           الفصل الثاني من هنا