رواية بين الحب والأسر الفصل التاسع 9 بقلم أمل مهدي

 

رواية بين الحب والأسر الفصل التاسع 9 بقلم أمل مهدي

اين انا من حلم طالت لاجله

الليالي

وامنية ايقضت لها قناديل

حياتي

وخطوة وضعتها لالف ميل تحت اقدامي

اين انا من عقد وسنين مضت

من عمري

وصحوة تمنت لو لم تصحو قبلها

ايامي

امل

++++++++++

رجعنه وكان مبين عليه مضايقه

شكد اتونست بهاي الثلاث ايام طلعت من خشمي 

شوفة استاذ خالد رجعتني لذيج

الايام

مزوج ومخلف وعايش حياته

وظميره مرتاح

ولا اباله حطم حلم اثنين ما كان ذنبهم غير حبو يعيشون بسلام

حسيت سروه تباوعلي وعيونه تسال

شنو ممكن حجينه 

واني بعد مالي خلك لاي كلام

ثاني يوم رجعنه البيتنه 

..ودخلت 

لفراشي ما حجيت ويه اي احد

حنيت الوسام ردت اي شي اي اثر منه احضنه واشتمه كل ذكرى تركه تحفر بكلبي ما عندي شي منه حتى الهدايه الجابلياها اخذته امه ويه النيشان لزمت حلقته الباصبعي

وعيوني يبچن

ثاني يوم داومت نص الدوام وترخصت من علي 

وطلعت رحت للشقه مال وسام صار ٤ شهور ما واصله هناك الشقه السر الوحيد الاحتفظ بي الوسام

دخلت 

شغلت الستريو 

اغنية انته عمري 

كل الاغاني اليسمعه صرت حافظته لان هو يحبه

اسمع واذكر اهنا كعدنه...

وهنا ركض ورايه ورشني بالمي ...

هنا حضني بشوگ

هنا وكلني ووكلته ..

هنا ضحكنه اهنا بجينه 

اهنا تعاركنه 

ورد صالحني...

ليش ما عشنه هاي السعاده منو الاخذه من عدنه

احجي وابجي..... 

ليش مكانك بارد ما بي روح...

هاي الحيطان الشاهده على حبنه واحلامنه وامنياتنه

ليش ساكته...

صارت خرسه بعد ما

كانت اشع نور وتباشير فرح

وسامممم...

اني محتاجتك اشوكت ترجع

وسام الايام ماتنتظرنه كاعد اسافر وتمشي

وين صرت

حضنت الكيتار مالته ونمت على القنفه اسمع الاغنيه

ووبين دموعي ولوعتي غفيت...

وين يالله كعدت الشقه ظلمه بس ضوه يجي من الشباك قليل المسجل مخلص الكاسيت وطافي

كمت عدلت ملابسي وغسلت وجهي

وطلعت كانت مغربيه

اخذت تكسي البيتنه

تلكتني امي....

......وين صرتي ولج غير متنه اني وبوج

......يوم. بالشغل قابل وين

.......ولج الدنيه مغرب راد يجي للدائره ابوج

....همزين ما اجه شغل خارج الدائره

.....ديله امبين تعبانه

......ابدل واريد اكل جوعانه

.......اي يمه بدلي لبين ما احضر الاكل

احنه الان في سنة ٩٥ اسوأ السنين المرت على بلدنه الحصار دمر الناس الحاله المعيشيه بالنازل والبلد مهمل من كل النواحي 

كلشي متوقف لا نصدر ولا نستورد

البناء متوقف الاعمار

الناس كامن تكتفي بالحصه التموينيه اليصارت شريان حياة الشعب

اسرح رافد من العسكريه 

واخيرا اقتنع ابويه يسلمه السياره

يشتغل تكسي

ابويه صحته بالنازل بين فتره واخرى ننقله للمستشفى اثر نوبة 

ربو ورغم كل هاي الجكاير ما تركه بس قلل منه

اني انقلت في الطابق الرابع وصرت 

رايسة قسم بحكم شهاتي راتبي اتعدل ومكاني احسن 

رااتبي على شغل رافد بالسياره

امشين امور بيتنه وعلاج ابويه

ليث مرتين اجه الرائد وعزمه ابيتنه

صار صديق مقرب اله بس اني ولا مره طلعت وشفته

رحت للشقه ونظفته ورتبته امل يراودني فديوم يرجع وسام ونرجع نلتقي بيه ....جيراني بالعماره كان يعرفون اني خطيبته فيكتفون بالدعاء الله يرجعه وننجمع سويه الشقه

ملك باسم وسام بس اهله ميدرون

عدة مرات اقرر اسلمه لابو بس بعدين اتراجع

هذا المكان الوحيد البي ذكريات تجمعني بي وحيطان هذا المكان صابره وتنتظر مثل ما اني صابره

وانتظر

كاعده ابغرفتي وملتهيه ابشغلي 

.....السلام عليكم

........مفاجأه .... بس كنت متوقعه ابيوم اشوفه هنا لان مراجعاته يمنه وحسب ما عرفت من رائد ماخذ 

مناقصات بناء ١٠ مدارس في بغداد

وهل فتره متواجد هنا يشرف على العمل لان اكيد عنده سقف زمني ويسلمهن

.......عليكم السلام وكفت مرحبه بليث....اهلا وسهلا

........اشلونج ست سراب شخبارج

.........بخير اشلون الاهل احوالكم

.........بخير شكرا

.........تفضل اكعد...اليوم هنا..سويت روحي ما ادري

........اني يوميه اهنا شغلي بعد

.........هااا يعني عندك شغل يمنه

........اي حاليا لازم ١٠ مدارس بناء

.......زين كملتهن لو بعد

.........يحجي ويباوع لايدي...لا بعد 

......محتاج شي كول

.......ولله اريد موافقه تجهيز طابوق

من معمل ...... ومنتظر المدير طالع

كلت اشوفج اسال على الاهل

.......اهلا وسهلا والله الاهل بخير 

......رائد اسرح لو بعده لان مكانه ينتظره تره

........هلايام مابقى شي...شنو مكانه

.........ليش مكلج رائد يلزم الشركه مالتي يشتغل ويايه

........اي شكو بيه بس هو ما عنده خبره بالبناء تره

.......يتعلم يابه قابل يبني بيده

..... اي صحيح....

........ماكو خبر من خطيبج

.......دنكت ولزمت الحلقه اكثر سؤال كمت اكره من كد ما انسالت بي

لا والله ماكو

........الله كريم

.........كانه نسوهم او ميردوهم يرجعون ولا كانه عدهم اهل وزوجات واطفال عدهم مشاريع احلام واهداف يحققوهه بحياتهم

رفعت راسي لكيت مركز بوجهي يباوع

....... متعرفين شنو الاسباب جايز تكون بصالحهم

.....ايجوز 

انتهه حديثنه من الفراش دك الباب

وصاحه لان المدير اجه

سلم وراح

رجعت للبيت لكيت ابويه ويه رافد

صياحهم واصل للشارع

كعدت 

.....يابه شكو ليش اصيح مو انت مريض 

يحاجيني ويكبس البخاخ ابحلكه

.......روحي اسألي كليله اشذكره

بعمه رايحله هذا الناقص

.......رايح العمي محمد...؟؟ ليش....!!!

رافد......اي رحت وصلت كروه الذيج المنطقه كلت امر اسلم عليهم

شكو بيه انظل امكطمين ما عدنه احد

سراب........جريت رافدمن ياخته

لك انت اشبيك اظل حقير مو تدري ابوك مريض

.......ابويه يكره عمي وعمي يكره ابويه واحنه بالنص واكعين 

اشو تلكوني ابكل حيلهم وچلبو بيه على الغده 

سراب ......انت تعرف ابويه وموقفه من عمي شكو اتروح

رافد 

...وخري مني اني جاهل تريدون تسيروني ابكيفكم

سراب .....عفته رافد متمرد لا يسمع من احد ولا يمشي مثل ما يريد ابويه

ثاني يوم رحت للدوام تلكتني اريج من دخلنه 

......سراب اريد احجي وياج

.......تعالي يا بذاته صار اشكد ما شايفتج

.........اني لو انتي صرتي مدير قسم بعد تكلبينه اتشوفينه

........لا حرام عليج والله ذاك الاسبوع نزلت العلي ومالكيتج

.......دتعاي اسولفلج عوفينه من العتب

........كولي

.........مروان 

..........شبي...تزوج غيرج 

.........لا اسم الله بيش طالبتني

...........شبي فتيتي كلبي 

..........اتقدملي

........صدك والله....الف مبروك

........اخواني ما موافقين

........والى متى راح تعنسين يمعوده

اخوانج ما عدهم احساس

........شسوي راح اموت

........شنو احجي دافعي عن حقج الى متى مكعديج مو العمر يمشي

.......كوليلي شسوي

.......والله زين باقي امتانيج مروان

....... هذا حضي شسوي

خلي اروح ليروح يعاقبني علي

.....كمت بوسته الله كريم

اجاني الفراش 

....ست سراب المدير يريدج

......اي عيني جايه

صباح الخير استاذ

.......اهلا سراب هذا المشروع

اريدج ادققي زين حتى نسلمه

........اباوع الاضباره جبيره....اليوم

اتريده استاذ 

......لا الاسبوع كله الج ..وكتبيلي ملاحظات عنه حتى انسلمه ونخلص

ماشي استاذ

كعدت بمكتبي وفتحت الاضباره

المشروع بنايه من ه طوابق لاحدى الوزارات في في ديالى

مشروع ضخم بالنسبه المقاول

شركة الانفال

كلبت اسم المقاول 

ليث ناصردحام 

مفاجأ ماكانت على بالي لعد اشكد عنده مشاريع وشكد رصيده 

ما توقعت هيج شاطر ولا مبين عليه

انتهه الدوام شلت الاضباره اخذته وياي اشتغل بيه بالبيت

وطلعت

رافد....

اشتغل بسيارة ابويه على باب الله

لا اني مكمل دراسه وتأمل اتعين ولا عندي فلوس اسويلي مشروع

عاد سيارة ابويه احسن لي 

اشتغل مطلع مصرف البيت ومصرفي

والله اشو خير من الله اجتني كروه

للبياع مره ورجال اخذتهم ومشيت

ويصادف بيتهم بنفس شارع بيت عمي محمد

اني من زمان ما جاي بس اذكر منطقتهم وبيتهم اكبال المدرسه

من اخر مره اجيت ويه ابويه

من انحبس عمي وابويه كفله وطلعه

بوكته عمري ١٤ سنه 

وصلت بابهم ونزلت دكيت طلعلي عمي بلاول ما عرفني بس اشويه ركز وكال رائد عمي مو

ضحكت ....لا عمي اني رافد

.....اشلونك عمي اشلون اهلك

شخباركم

.......عمي بخير الحمد لله

......فوت جوه اتفضل ..لبنى بابا ..ض

ام لبنى تعالو شوفو منو اجانه

ورفع راسه باوعلي فرحان

اجتي مرت عمي فوزيه وتفاجأت 

بترحابه حتى باستني وتسأل على اهلي صراحه خجلوني 

وتالي اجتي لبنى سلمت وكعدت يم ابوهه

......اي عمي رافد اشعجب اليوم يمنه

.......والله عمي الصراحه صدفه 

وصلت كروه ابشارعكم وحنيت صراحه من شفت بيتكم

.......عمي اهلا بيك زارتنه البركه حتى لو صدفه وما متعنينه احطك على راسي....ابوك كلي اشلونه

......والله عمي ابويه موزين مريض ويوميه بالمستشفى

.......ها مع الاسف سلامته

.....احجي ويا عمي واباوع البنته

تطلع٢٠ حلوه وحيل امرتبه يعني هذا البيت اشكبره بس هيه وامه وابوهه

السياره بره امچودره حديثه والاثاث راقي

صدك من كال ابويه الله ذاب عليه خير وما منطي بس هلبنيه

شويه وكمت

......عمي اني اترخص

.......والله ما خليك تطلع الا تتغده

....... خليه غير وكت

فوزيه......وين غير وكت منو يكول بعد تجينه

........هههه لا خاله ليش انشالله اجي

لبنى.....دبقى ما صدكت شفت واحد من ولد عمي 

.......من حجت ما ادري اصار بي 

خجلوني بهتمامهم

ما خلوني اطلع الا اتغده وياهم 

وراهه بعد ما بيه مجال اترخصت وطلعت وعمي يتوسل بيه اعيده ما اكطع بي

طلعت واني نكلب دماغي كله ليش

منكطعين عنهم اذا همه هيج

رجعت للبيت

وغلطت من حجيت لابويه صار عصبي وتنك صدره وتعال جيب واحد يهدي

عفته وصعدت الغرفتي

سراب....

كعدت بليل واكلب بالاضباره مال المشروع ادقق بالكشوفات والصرف

مال المشروع

ولكيت شغله اذا قدمته بملاحظه للمدير يتغرم يعني ارباحه بالمقاوله كله اطير

سهرت على الملف كله مضبوط باقي على الكشف على المشروع وستلامه 

وهاي الفقره

لازم باجر اتصل عليه وافهمه

من بعد ما كملت تدقيق من تلفون بيتنه اتصلت على الشركه مال ليث

.......شركة الانفال للمقاولات

.......ردت عليه ابنيه...نعم اتفضلو

......ممكن احجي ويه استاذ ليث المدير

......والله ما موجود

.....طيب ممكن رقمه الخاص

.....اسفه ما اكدر انطي 

....زين بلغي... ست سراب اتصلت ومسأله ضروريه 

.....تمام راح ابلغه

مرن يومين...وبقت ثلاثة ايام واسلم المشروع اشلون هذا هم ما اتصل

كلت ماكو غير رائد

فهمته الموضوع وهو راحله للشركه لان صارت بينهم صداقه وميانه ويعرف كم موظف اهناك

ساعه...ورن تلفون البيت استاذ ليث 

يستفسر

فهمته ما عده غير يومين يخلص الموافقه.... جان ممنون لان دا اساعده

وفعلا ثاني يوم بليل زارنه بالبيت

وجان ابويه ورائد ورافد كاعدين

وسلمني الكتاب وراح

خلص الاسبوع ورحت للمدير سلمته الاضباره مدققه وكامل المشروع وفاجاني من كال حضري نفسج السبت طالعين نستلمه ونسلمه للوزاره

وفعلا اجه يوم السبت وطلعنه لجنه من ٥ موظفين المدير عام واني ومديرة قسم اسمه علياء وموظفين اثنين

وهناك شفت ليث وويا اثنين موظفين من شركته كان كلشي سهل

كملنه تواقيع ودزنه على غده

كاعد اكبالي على الميز يسترق النظرات ما بين انه يعرفني كان شخصيه وهيبه سيطر على الكعده بكلامه وثقافته

كملنه ورجعنه ديالى قريبه بس لمن

يكون الايفاد بعيد نتعب هوايه

رائد اسرح من العسكريه وداوم بشركة ليث كان كلش مقرب منه حتى الكل يعتقد كرايبه

وضعنه صار احسن من اشتغل رائد 

كام يساعد بالبيت

رائد هادئ من صغره يحترم كلام ابويه وامي مسالم الى ابعد حد

شغله بالشركه هواي غير من شخصيته وصار اجتماعي ويتكلم

حتى صار يطلع ويه ليث

وليث يجينه مرات يدخل البيت ومرات من الباب هوايه صار مقرب من رائد ورافد وحتى عقيل رغم مراهق عمره ١٥ سنه

رغم ماكو اي وجه مقارنه بينهم

دائما افكر بليث هو هيج متواضع لو عنده غايه من قربه من اهلي

اما السياره فصارت بيد رافد هو مسؤل عنه يشتغل وينطي مصرف للبيت

رافد....

اني اشكد وكح وما اخاف وعندي علاقات مال مراهقين ابمنطقتنه 

بس ولا وحده كدرت تسرق اهتمامي بس 

لبنى شغلت كل تفكيري

ظليت احوس اسبوع مر صار اسبوعين واني خلص ما اتحملت 

رحتلهم

هلمره لكيت عمي بيده الصونده ديغسل الرصيف مال بابهم سلمت 

وتلكاني نفس السلام والترحاب

ظليت ويا اغسل الباب بعدين دخلنه

وتلكتنه لبنى وامه سوالف وشربوني جاي جانت عصريه 

عمي كال رافد رايدك ابشغله عمي 

....

كول عمي 

.......عمي لبنى عدهه معامله بالتربيه واني مو حيل الاول واخاف عليه تروح وحدهه اذا عندك مجال

تكدر تروح وياهه

......اي عمي ليش لا

باجر اصبح اني يمكم

اكذب اذا اكول ما فرحان الله جابه 

ما كنت متوقع هيچ صدفه

اخذته للتربيه كاعده ابصفي بالصدر

......لبنى انت شمكمله

....... اني اتخرجت السنه معهد معلمات

......زين عبالي مثلي تاركه الدراسه

.....لا اريد اقدم تعين

......ها اصيرين معلمه مو

....اي انشالله

.......انتو ليش متجونه

......والله ما اعرف ابوك وبابا مشاكل

قديمه بينهم

.....بس احنه نكدر انصالحهم مو

.........ما ادري

.......من تروحين اي معامله اني اوديج

.......اي ميخالف

......كملت الاوراق ونطونه موعداسبوع ونراجع ....رجعنه للبيت

وتلكانه عمي ممنون مني

.......عمي رافد مشكور والله 

حاير شكلك اني كبرت ولبنى اخاف عليه اطلعه وحده اليوم الله جابك عمي

.......عمي شتحتاج اني اجيك لا اشيل هم

جابو الغده وكعده وسوالف اشوفهم فرحانين بيه واني هم مرتاح لبنى اكبالي

كملت اترخصت وطلعت ذاك اليوم ما مشتغل رجعت للبيت نمت

العصر طلعت للكهوه لليل رجعت

تلكتني سراب 

......اليوم ماكو وينك

......اليوم ما مشتغل عطلت السياره 

وللظهر يم الفيتر

......ها دير بالك عليه 

مر اسبوع وهم مريت على بيت عمي 

واخذت لبنى وكملنه اوراق التقديم

كالو كم يوم واحنه انخابركم

انتهزت الفرصه واخذته مطعم سولفنه هوايه

وبدت ترتاحلي حجتلي عن عن كلشي يخصه

ويخص بيت عمي

بدأ بيناتنه اهتمام مشترك ونظرات

اني بطبعي انطيه بالكصه مثل ما يكولون مباشر ما الف وادور

....لبنى اني اريدج

......صفنت ابوجهي ....ما فهمت

.......اني حبيتج واريد اتقدملج

.....ما ادري

.......شنو ما تدرين كولي اموافقه لو لا

........اي اموافقه بس اشلون و اهلنه

.كلشي اله حل احنه لازم انصالحهم بالاول

.....هسه بس لو اعرف شنو خلاهم هيج واحد ميريد الثاني

رجعت للبيت واني تفكيري كله اشلون اصالحهم

اسأل ابويه اخاف يعصب يصير بي شي....

اسال امي احسسن

......هله ام رائد هله بالوالده

......شنو هاي هذا رافد لو امبدلي

.....افه ...رافد يتبدل مو بالحيف

.......اكلك هليام وين دتسخت 

اختك تكول مدينطيني من شغل السياره

.......والله يا ام رائد تصليح هوايه هلايام والاشتغله يادوب اسوگ للبيت بي

........رافد امشي عدل ابوك مريض مو حمل مشاكلك

.......هسه اني اطلع ساكت وارجع ساكت شمسوي باليني بلوه

....اي اني دااوصيك والسياره دير بالك عليه

تره مثل ما يكولون هيه الصايه والصرمايه

......يمه متعرفين شنو سبب القطيعه بين عمي وابويه يعني همه اخوان من اب وام واحد ليش ما متصافين

شعدك تسال بس لا هم رحتلهم

....هسه واذا رحت عارضت النظام

.....انچب لا اصنف ولا تعارض ابوك....هاي آني حذرتك

.....جر حسره هسه تحچيلي لو اولي انام

........والله يمه قصه قديمه شلك بيه

.......اريد اعرفه فدوه اروحلج

.......يمه جدك عنده بس ابوك وعمك الله ما رزقه غيرهم

جدك من جان عايش جان امسجل البيت والمحلات باسم عمك

بس العرصه باقيه باسمه

وما اعرف ليش سجلهن باسم عمك محمد 

ابوك جان الزغير

وره كم سنه جدك مات

ظلت بيبيتك وابوك وعمك عايشين بالبيت

بعدين عمك ازوج فوزيه كانت اتاذي بيبيتك 

وبيبيتك فقيره ما تحچي

وابوك من يشوفه يثور ويتعارك

ومره ضربه الفوزيه وتعارك عمك ويه ابوك من وراهه 

طلع ابوك من البيت واخذ بيبيتك ويا

واجر غرفه وكام يشتغل بس شغله قليل 

تمرضت بيبيتك خله ورجع 

للبيت بس ما يحجي ويه عمك

بيبيتك ما طولت راحت الى رحمة الله

وره كم شهر كامت فوزيه ادورمشاكل ويه ابوك

ابوك كال خلص خل نقسم البيت 

ما قبل عمك

كله لعد بيع ونطيني حقي هم ما قبل اخر شي كال 

البيت والمحلات ابويه انطانياهن وانت ماالك شي

الك بس نص بالعرصه

حجه راد ابوك ما فاد 

اخر شي كله كل شي ماريد منك

ولا عرفك ولا تعرفني بعد

كام ابوك وراح للديوانيه عاش اهناك سنه اتعرف على اخواني وشتغل وياهم ومن عرفو خوش رجال انطوني اله

وصار عدنه سراب وشيماء ورجعنه

البغداد ..وصار عندي رائد وانته

جانت حالتنه موشي ابوك يشغتل ابمعمل حلويات

اجار بيت

والعيشه صعبه ما يكفي

قرر يروح العمك يطالبه ابحصته بالبيت مره ثانيه

من راح اخذ رجال سيد جان صديق جدك واخذ شخ العشيره اتوسطوله 

وما قبل لايبيع البيت ولا يقسم

وكال الخاطر جهالك راح انطيك العرصه كله واتنازل عن حقي

يعني فوكاهه هو محملنه المنيه

ثمنو الكاع ما اساوي ربع سعر البيت

بس ابوك اخذه احسن من ماكو

وكال العمك من هاي وعتبرني متت

ابوك باع نص الكاع وبنه بفلوسه النص الثاني هو هذا البيت الكاعدين بي

بعدين سمعنه عمك محمد صارت عنده ابنيه 

ووره كم سنه اجتنه فوزيه تبجي شايله بنته زغيره

تكول محمد داعمله واحد واموته ومحبوس واهله المدعوم جايين على البيت ومهددين لان محد راحلهم من العشيره

وابوك ما قصر راح الشيخنه وفضوهه ابفصل ونحبس ٦ اشهر

ابوك ما عافه الفوزيه رغم عدهه

اخوان

بس من طلع من السجن اخذله فتره زين اويانه وبعدين اشتغلت الخباثه 

مالت فوزيه 

ابوك كال هذاا ما اصيرله جاره يمشي وره مرته رجع قاطعه من جديد

هاي كل القصه

رافد.......ظليت صافن يعني ماكل حق ابويه....والله ابو رائد حقك

تحقد عليه

احجي ويه نفسي

.........ياااا اشبيك اشو صفنت ....وين رحت

اشو ساكت رافد...

.......ماكو شي اكول حقه ابويه

من يقاطعه

........اي مرت علينه ضروف بس الله يعلم بيه ما شفنا يوم دك بابنه سأل على ابوك علينه وهو خير من الله

.........اذكر يمه

.......ما يفيد الحجي الصوج بجدك

ضيع حق ابوك

             الفصل التاسع من هنا 

بدل ماتدور وتبحث علي الروايات خليها علي تليفونك وحمل تطبيقنا

تعديل المقال