رواية فصيلة دمشق الفصل الثامن 8 بقلم احمد
سمير.. ومثل ما كلتلك انت وامي وعائلة سامر كلكم مرحب بيكم هنا بس مصطفى ما اريد اشوفو
جدي.. تمام يابة مثل ما تريد .. هاي شنو لابسة ميرا
ميرا.. هههههههه تراكسود عادل ما جان عندي ملابس ولبستو
عادل.. شو كأنو عجبج الوضع
ميرا.. اي والله احلى من ملابسي ومريح خلص صار الي
عادل.. هاي حتى الدولة ما تاخذ حق الشعب مثل ما انتي اخذتي حقي
جدتي.. تدلل ميارا هو كم اخت عندك هي هالاخت الوحيدة
سارة.. روحي جيبي الجاي ميرا هسا استوى
ميرا.. تمام
رحت بدلت ملابسي ولبست دشداشة عالسريع واخذتلهم الجاي وصبيتو الهم واخذت المشط وكعدت استمعلهم وامشط شعري
ولان ماكو بس جدي وجدتي واهلي مشطت كدامهم عادي وهواي تونسنا بوجود جدي وجدتي وجودهم يحسسك باحساس كلش حلو
سبحان الله دائما البيت الي يكون بيه زلمة او مرة كبار بالعمر تحسو بيه بركة ويونس عكس الي كلهم صغار دائما بينهم مشاكل
بقو يمنا لحد وقت النوم وراحو واني غسلت المواعين ورحت لغرفتي ماصدكت على الله وصلتها فورا نمت
ثاني يوم كعدت على صوت ماما كالت يلا كومي علمود نتريك ونكمل شغلنا كلتلها تمام وكمت صليت الفجر ونزلت تحت
لكيتها تجهز الريوك ساعدتها واجو بابا واخواني تريكو وراحو للسوك يجيبون باقي الاحتياجات بس ركزو هالمرة عالاكل والخظراوات
اني وماما نظفنا الحوش والحديقة والبيتونة والترك يعني الاشياء الي ما نظفناهن البارحة وقبل الظهر كملناهن كلهن
اول ما كملنا وكفت سيارة جبيرة عند بابنا واندك الباب واستغربنا اني وماما شنو هالسيارة هاي كالت ماما لا تطلعين اني اشوف منو
وراحت تفتح الباب واني وكفت بالصالة واباوعلها من الشباك فتحت الباب ودخل جدي ماعرف شنو حجى وياها واجت عالبيت
كالت تعالي بسرعة ورحنا اني وياها لوحدة من الغرف وسمعنا صوت بابا اجى بهالاثناء وماما كالتلو احنا وين علمود لا يدخلون علينا العمال
ميرا.. شنو السيارة الي جايبها جدي
سارة.. خليها مفاجأة
ميرا.. تمام بس شو فرحانة
سارة.. لعد ابجي الحمدلله ماكو شي يضوج
ميرا.. ماعرف ايمتى نطلع واشوف الي مفرحج
سارة.. كعدتنا هنا مطولة فلا تنتظرين لان راح يضوجج الانتظار
ميرا.. تمام
جنا نسمع اصواتهم وبيهم الي يكولنا هنا او هناك او عالطابق الثاني ونسمع صوت اغراض تتنزل بس هواي تأخرو
غدا ما لحكنا نسوي ومانكدر نطلع نسوي هسا لهذا السبب جابو اكل جاهز بس تأخرو هواي لحد ما جابوه الساعة صارت 2:00 يلا جابوه
تغدينا اني وماما وبعد ما خلصنا بشوية اجى سليم كالو يلا اطلعو وطلعت واني متحمسة اشوف شنو صار بهالوقت
اول شي شفتو تخم قنفات لونو احمر واسود منظرو من صدك روعة محطوط بالصالة وجدي وبابا كاعدين يحجون
واكو غراض بالصالة بس بعلاليك كبار وصعدت فوك جانن الفرش كلهن خارج الغرف دخلت للغرف جان كل وحدة بيها غرفة نوم
بس وحدة منهن بناتية ووحدة منهن بيها سرير جبير لبابا وماما ومختارين غرف النوم بذوق رهيب جانن كلش حلوات
سمير.. يابة والله ماجان اكو داعي تكلف نفسك
جدي.. ماكو تكلفة وذني مو بس مني ذني مني ومن سامر وهو مستحي منك حتى ماقبل يجي من خجلو
سمير.. الله يلعنك يا شيطان
جدي.. هسا ما يفيد الحجي اني راح اقنعو يجي وياي اليوم بالليل او باجر
سمير.. اي والله ياريت يابة
سارة.. مشكور عمو الله يديمك النا ماقصرت
جدي.. بالعافية عليكم بنيتي اهم شي عندي اشوفكم مرتاحين
ميرا.. ماماااااا
سارة.. بسم الله الرحمن الرحيم
ميرا.. بحماس .. شفتي غرفتي
سمير.. لج ميرا ايمتى راح تعقلين وتعوفين الصراخ هذا
ميرا.. سحبت ماما من ايدها .. بس تعالي شوفيها شكد حلوة
سارة.. هههههه اول شي اشكري جدج لان هوا جابها الج
ميرا.. يااااااي
رحت ركض على جدو وحضنتو وهو اخذني بحضنو وهو يضحك وباسني على خدي وكال تدلل ميرا الحلوة كم ميرا عدنا هي بس وحدة
سارة.. يلا ميرا تعالي عاونيني خلي نشيل ذني المواعين
ميرا.. تمام
جدي.. بوية سارة باجر او بعد باجر راح يكملن البردات اخذ قياسهن الولد وراح يخيطهن ويجيبهن
سارة.. زحمناك عمو وتعبناك ويانا
جدي.. لا هيج راح ازعل اني
سارة.. لا اسفة كلشي الا زعلك
جدي.. تمام مقبول اعتذارج
ميرا.. نقلنا المواعين عالمطبخ وغسلناهن وسفطناهن بالكاونتر الالمنيوم الي جايبو تخيلو مو تارك شي ناقص نهائيا
مدقق على اصغر الاشياء حتى المكراضة (قصاصة الاضافر) مشتريها ويا المسواك والمشط والصابون والتايت والشامبو
يعني ماعرف شعددلكم من الاخير غراض بيت كاملات لدرجة تخيلو حتى صوندة مشتريها وجايبها وايمتى لحك يشتريهن ماعرف
اني وماما شلنا الاغراض وحطيناهن باماكنهن ومسحنا غرف النوم من التراب الي صاير عليهن بسبب التخزين
بس لان الغراض جانن هواي وتسفيطهن يحتاج وقت ما لحكنا نخلص لقبل المغرب بشوية وحسيت بوجع مفاجئ بايدي وصرت ماكدر احركها
ميرا.. ببجي وخوف .. ماما ماما ايدي انشلت .. وبجيت
سارة.. شو شوفيني شبيها
ميرا.. ماما توجعني كلش
على صوتي اجى عادل شافني ماسكة ايدي وابجي
عادل.. شبيها ايدج
ميرا.. انشلت مدا اكدر احركها
جان الوجع من عند مفصل المعصم واصابعي ماكدر احركهن مسك ايدي وحرك اصابعي وفورا راح الوجع ورجعت احركها
عادل.. شنو ناصبة علينا انتي
ميرا.. لا والله جانت توجعني وماكدر احركها
سارة.. ههههههه تحرك العصب من التعب وصار بيه تشنج
عادل.. والله العظيم تبقين جبانة طول عمرج
ميرا.. راح عادل وماما شبعت ضحك عالموقف والصراحة استاهل فورا فكرت بالشلل ووين اكو هيج شلل اساسا بس الغباء موهبة
رحنا اني وماما حظرنا العشى وهالمرة تعشينا بالمطبخ عالطاولة والكراسي الي جابهن جدو النا وتذكرت المدرسة انو راح تبدا
ميرا.. بابا
سمير.. ها
ميرا.. المدرسة راح تبدا بعد فترة قصيرة
سمير.. اي يابة اعرف
ميرا.. راح ادرس لو شنو
سمير.. شكد باقيلها
ميرا.. تقريبا اسبوع
سمير.. ارتاحي هالسنة هاي والسنة الجاية اذا ما رجعنا على سوريا نحاول نجيبلج نقل وتدرسين هنا
ميرا.. بس حرامات تروح سنة كاملة مني
سمير.. انتي شفتي شلون الطريق حتى لو اكو احد يريد يجي مانكدر نوصيه يجيب النقل
ميرا.. تمام
سمير.. بلكي الله يفرجها ونرجع لبيتنا هناك ونرتاح
ميرا.. إن شاء الله
خلصنا عشى وجنت دا اشيل المواعين واندك الباب وراح عادل فتحو وبابا واخواني راحو عالصالة علمود يشربون جاي
شفت جدي اجى يمشي بالحوش ورحت عالصالة من فات سلم ودخل عند ابوي واخواني وتفاجأت بمصطفى كدامي دخل للصالة
سمير.. وكف على حيلو .. يابة ليش جايبو وياك
جدي.. اهدى خلي نحجي
سمير.. يابة اني كلتلك....... قاطعو
جدي.. سميييييير كلت اهدى عاااااد
ميرا.. بابا رغم عصبيتو المو طبيعية بس من صاح عليه جدو ماكدر يحجي كلمة وحدة وهذا يدل على كمية الاحترام بين بابا وجدو
جدي.. اكعد خلي نحجي
سمير.. ميرا روحي عند امج
ميرا.. تمام .. وعفتهم ورجعت للمطبخ بس صوتهم واضح
جدي.. تعالو انتو هم كعدو (مصطفى وابوه)
سامر.. سمير اني اعرف حجم الغلط الي سواه ابني وجانت ساعة شيطان وهو معترف بغلطو واجينا عليك نعتذر منك
انت اخوي قبل ما هو يصير ابني واني خجلان منك بسبب الي صار بس انطينا فرصة نصحح الامور والي تأمر بيه احنا راضين عليه
سمير.. سامر حياك الله ايمتى ما تجي والبيت بيتك بس ابنك ماكدر اسامحو
سامر.. سمير ميرا هم بنتنا مو بس بنتك ومصطفى احسن من الغريب واحنا مو راضين على سالفة نهوتو عليها
احنا نريدها مرة الو على سنة الله ورسولو وبموافقتكم انت وياها وامها واخوانها عالقليلة مصطفى اذا زعلها تكدر تاخذ حقها منو
احسن ما تتزوج غريب وممكن اذا اذاها ماتكدر تحجي وياه لان تصير سالفة عشاير وفصول وانت تعرف هاي الاشياء اكثر مني
سمير.. سامر لو جاي طالبها لايمن انطيها الكم حتى لو هي مو راضية بس اعذرني مصطفى ما الو مرة يمي
مصطفى.. بشنو احسن مني ايمن
سمير.. هههههههه وتسأل بكل عين وقحة
مصطفى.. عمي ترا اعرف غلطت وماكو انسان معصوم من الخطأ واني جاي اصحح غلطي مو اكبر الموضوع اكثر ما هو جبير
سمير.. كلتلك مرة الك ما عندي وسالفة النهوة شايلها من بالك لان اذا حاولت تحط راسك براسي انت الخسران بالنهاية
مصطفى.. واذا ما شلت النهوة من راسي
سمير.. راح يكون هناك احتمالين وقتها الاول راح نرجع لسوريا وتتزوج هناك واحتمال جبير عند خوالها وهذا من دواعي سروري
والثاني انها تتزوج هنا ووقتها ان فكرت مجرد تفكير انك تأذيها او تتعرضلها مجرد تعرض ماراح يعجبك الي راح يصير
واذا اني اسكتلك فاخوانها ماراح يسكون الك واني ما اكدر امنعهم عن حق اختهم الوحيدة
مصطفى.. قبل ما تجون جانت بالنسبة الك عار لانها بنت ستغير هسا
سمير.. هسا عرفت انو العار انت مو هي لان هي ما تعدت على عرض عمها
مصطفى.. لعد من هسا ........ قاطعو عادل
عادل.. مصطفى قبل ما تكمل كلامك ميرا مو الك خلي عندك شوية كرامة واسحب نفسك من الموضوع علمود ما ننفضح بالبصرة كلها
مصطفى.. اني ما اتراجع عن قراري ومو خايف من اي شي وانتو تعرفون انو مجرد ينتشر خبر النهوة محد راح يكدر يجي يخطب اساسا
سمير.. ها سامر هو هذا الي اجيت تعتذر علمودو
مصطفى.. استودعناكم
سارة.. عزا بعينو هذا ما عندو احساس ماعندو كرامة شنو هو كوة
ميرا.. ماما شنو سالفة النهوة ترا دخت بيها
سارة.. النهوة يعني ممنوع تتزوجين احد غير مصطفى
ميرا.. لازم هي بكيفو
سارة.. غير هاي قوانين العشاير
ميرا.. واني تدمر حياتي واتحمل هالحيوان هذا علمود العشاير وقوانينهم
سارة.. لا تخافين لا ابوج ولا اخوانج يسمحولو يمنعج واصلا حتى اذا هم وافقو اني ما اوافق
ميرا.. وين انكلع
سارة.. شعرفني
ميرا.. روحة بلا ردة
طلع هو من البيت وبابا كال لعمي شفت كدامك شصار ولا تلومني بالي يصير اذا تعرض لبنتي وعمي خطية وكع بين نارين
من جهة ابنو الجبير ومن جهة اخوه الجبير ولا الاخ يهون عليه ولا الابن يهون وهو مايعرف شنو يسوي علمود يخلص من هالموضوع
بس هو وجدي كالو لبابا راح نحجي وياه علمود نقنعو يتراجع عن النهوة بس مصطفى عنيد وراسو يابس وما يقتنع
وهو يناقض نفسو بنفسو ما يحب احد يعاندو بس هو يعاند حتى الحجر شلون عقلية وتفكير وكأنو هو احسن من كل هالناس هاي
اني الي جان مطمني انو بابا رافض زواجو مني وما يحتاج اشيل هم الا اذا بابا غير رايو لسبب ما وقتها بس الله يعلم بحالتي
من راحو جدي وعمي رحت على غرفتي واخذتلي دوش ومن طلعت فورا نمت ماكعدت لصلاة الفجر صليت ورجعت كملت نومتي
جنت تعبانة كلش وماكدرت اقرا قران كلت بغير يوم اقراه ويجوز باجر هم يكون عندنا شغل اني وماما لان بعدو البيت جديد
هاليومين ذني وضحلي شكد متعب الرحيل من بيت لبيت مع انو احنا جبنا الغراض كلهن جدد ما نقلناهن من مكان لمكان
ثاني يوم كعدت الصبح ونزلت تريكت وورا الريوك ماجان عندي شي ورجعت لغرفتي توضيت وصليت الضحى وكعدت اقرا قران
الشباك جنت معلكة على مكان البردة بطانية علمود ما تبين الغرفة لان بدون بردة حتى نوم ماكدر انام بيها
تعرفون انتو الشباك مجرد زجاج شفاف اي شخص يكون بارتفاع الشباك او اعلى منو يكدر يشوفني واني نايمة او كاعدة
ورا الضهر بشوية اجى الولد الي يركب البردات جان مخيط البردات ومجهزهن واول وحدة ركبها بردة المطبخ
ومن كملها راح ركب مالت الاستقبال واني وماما رحنا عالمطبخ وسكرنا الباب علمود نسوي العشى لان بابا كال احتمال يتأخر للعشى
من خلص الاستقبال بلش بالطابق التحت بالغرف بس فعلا جان بطيئ او يمكن هن شغلهن يحتاج وقت ماعرف بالضبط
من كل الطابق التحت راح فوك بس اني وماما انحمسنا حمس من الحر تخيلو تخيلو مطبخ وبالصيف والباب مسكر
وجوهنا صارت حمرة من الحر واحس نفسي اختنكت اخير شي نزعت الشال لان من صدك ماكدرت اتحملو نهائيا
ماما كالت لسليم يفتح الباب مال المطبخ واذا نزل الولد يسكرو ومن فتحو شوية صار احسن اجانا هوا من مبردة الصالة
طبعا جدو جاب مبردات وسبالت علمود اذا يجي السحب (المولدة) نشغل المبردات والسبالت بعد بابا ما حطهن لان الواير ضعيف
الواير او الكيبل الي من البوري للبيت حاطين نوعية زينة بس ما تتحمل ضغط قوي من نشغل عليها سبالت واجهزة يموع النحاس
لذلك بابا جان ينتظر نكمل الاشياء المهمة وبعدها يجيب كيبل احسن من هذا ويشكل السبالت ومتفق ويا صاحب البيت ما يطلع اذا ما هو يقرر
لان ممكن البعض يكول كل هالتغييرات والمصاريف على بيت ايجار بس اكثرهن من جدو هدية وبالتالي ممكن نستقر بهالبيت
واصلا من نطلع اذا نروح لسوريا راح نرجع كلشي لجدو ويبيع الي يريد يبيعو ويبقي الي بيه فايدة الو نترك بس الكيبل
وحبيت انوه على شغلة وهي ممكن انو البعض يكولون ليش جدو ما منع مصطفى عن موضوع النهوة وعصب عليه مثل ما عصب على بابا
جدو صاحب نظرة بعيدة عن الواقع وهو يحب انو اني اتزوج عند عمامي سواء ياخذني مصطفى او ايمن المهم ما اروح للغريب
وهو يريد شوية تمر الايام بلكي يتصالحون بابا ومصطفى ووقتها راح بابا يوافق على زواجو منو بدون لا نهوة ولا غير شي
واذا اجاني احد يخطبني او هو كطع نفسو وقرر يتزوج وقتها غصب عنو يلغي موضوع النهوة لان ما يصير ابقى متعلكة بسببو
نرجع لقصتنا بقى الولد يشتغل بالطابق الثاني بالبردات وكملنا الغدا وهو ما نزل كالت ماما لسليم روح اسألهم يتغدون فوك لو تحت
وراح سألهم بابا كال جيب الغدا فوك وحطينالهم الغدا واخذوه الولد تغدو فوك ورجعولنا المواعين وتغدينا اني وماما وغسلنا المواعين
بالاخير خلص الولد وراح بس صدك كلمة واو قليل بحق البردات والوانهن الحلوة والترتيب بالفصال والخياطة
شياكة من نوع اخر وصدك يسون حقهن مهما كان (جدو ما يكول اسعار الاغراض الي جابهن) وبالنسبة الي كلش عجبني
بالليل جنا كاعدين بعد العشى وجنت صافنة عالبردة مالت الصالون واتأمل منظرها لان هي اكثر وحدة عجبتني بالبيت
اجى اتصال على بابا ما حسيت الا اندفرت الطاولة وفزيت فزة عمري وطلع بابا معصب وطبك الباب بحيث شوية وينخلع من مكانو
بدل ماتدور وتبحث علي الروايات خليها علي تليفونك وحمل تطبيقنا
