رواية بين الحب والأسر الفصل الثامن 8 بقلم أمل مهدي

 

رواية بين الحب والأسر الفصل الثامن 8 بقلم أمل مهدي

أتوق لحديث خاص منك........

يؤنس وحدتي المتخمة 

ويهدهد قلبي المتعب.......

ليسكب شرابا باردا على أوصالي المنهكة

***********

ضروف البلد تعبانه بسبب الحصار والناس مستواهه المعيشي صعب

وكثير من الناس لو مو الحصه التموينيه جان جاعت الشغل قل والبطاله كثرة ونقسم الشعب الى فئتين 

فئه شبعانه ما تعرف شي اسمه حصار على البلد

وفئه وصلت درجة الفقر بيه الى ان باعت اثاثه.. وابواب بيوته حتى تعيش

تأخر البلد من كل النواحي الصحيه والعلميه الصناعيه الزراعيه...

ونعكاسه كان واضح في كل مفاصل الحياة

دائما الشعوب تدفع ثمن الحروب

رافد....

يابا انطيني السياره اشتغل بيه عاد

اطلع مصرفي ....

قاسم......

انت وينك وين الشغل مخبل انطيك السياره تعبت عليه وخليته عروس اسلمه بيدك..

......دومك ما عندك ثقه بيه امطلعني صفر

هاي صرت رجال وبعدني ما عاجبك

.....الرجوله من تسمع كلام ابوك

ياما حجيت الدراسه لا تعوفه

مستقبلك بيها 

وانت اسويت يوميه متعاركلي ويه واحد 

لو تتعارك ويه المدرسين واني اللزك وراك وهاي رحت بطلت 

وسكنت على السطح انت وطيورك

.....يابه انت تدري مدرسه ما احبه

والطيور هاي صار من رحت للعسكريه لليوم ما مربي اطيور

.....بس لو مامحتار بمصرفك جان ربيت وترستلي السطح

ويوميه كش عاع 

ومتعارك ويه الجيران

.....ما ريده للسيار ..بعد حتى لو تكلي انت اشتغل بيه

والله فلا جيسه

وراح اظل امدايدي السراب والك

ارتاحيت

وكام وطلع....

اميره....اشلون بله يوميه صياح 

ويوميه مشكله

هسه مو انت مريض يا قاسم دعوفه

........شفتي لابنج يريدني انطي السياره 

......اي شكو بيه خلي يشتغل يتكل على نفسه 

لشوكت تنطي مصرف

......تدرين ابنج دروبه عوجه هذا يريد يتخم بيه

......وين يتخم يا عيني هنه يومين ينزل اجازه دخلي يلمله مصرف اله 

ومن يجي رائد هم يطلع بيه

......سكت وصفن اشويه الله كريم

هسه خل نحتار بعرس مهدي 

........اميره ليش محتار شكو

.........ذوله نسابه وابوعزام وصلاح افضالهم علينه لازم نبيض وجه شيماء يابه

......اي والله يا قاسم

سراب.....

التحق رافد وهو زعلان ويكمز 

اشلون ابويه ما ينطي السياره

واني انطيته مصرف واهدي 

يمعود دكمل عسكريه والله كريم

ابويه كان منتظر رائد يجي حتى نطلع التكريت 

لان مناطق بعيده وابويه صاير يتعب ابسرعه 

ما يكدر يسوق فتره طويله

طلعنه الصبح كان يوم خميس

رائد يسوق وابويه واني وامي وعقيل وشهد

طريق ٣ ساعات بس حلو ونتهزنه الفرصه نزلنه زرنه

مرقد السيد محمد

والامامين بسامراء

يعني دخلنالهم الظهريه

كان يوم الحنه

وكفت السياره كبال باب جبيره كلش كانت مفتوحه على الاخير يعني امبين عدهم مناسبه

نزلنه من السياره وطلعو صلاح

وابو عزام واخوانه اول المستقبلين وشباب كومه واولاد هم

كلهم وكفو على الباب 

ابو عزام ...تقدم امرحب بابويه

ياهله ومرحبه باهل بغداد يصافح ويبوس بابويه وبرائد

العيون كلهه علينه وكلهم لابسين دشاديش وشادين الحزام الجلد بجتافهم وقسم مسلحين وقسم لا كانو بغاية الاناقه الدشداشه ويه 

الغتره الحمره

رحبو بينه ودخلونه المضيف اني ورائد....

و أم رائد وسراب وشهد دخلو جوه

وبده ابو عزام يعرفنه على ولده وولد اخوانه وگرابتهم

كعدنه هوايه ناس كانت حاضره

شويه وجابو الغده صواني تمن وعليه الشعريه واللحم واشكال 

الحفاوه الكرم العاملونه بي خجلونه...

بعدين ابو عزام اخذنه البيته حتى نرتاح من الطريق

سراب.....

لما وكفت سيارتنه تفاجات بالموقف

اخوان ام مهدي وولد اهوايه ولدهم وولد ولدهم.....

ويباعولنه .....بهتمام

لان من بغداد وجوه جديده عليهم

دخلنه جوه 

تلكتنه ام مهدي وام عزام وام سالم

وبناتهم

ام مهدي.....

حضنت امي مرحبه تبوس مشتاقه

وكل ساعه ياعيني يا ام رائد

طاگ گلبي عليج شكثر مشتاقتلج يعيني

لو شيماء اجتي تركض هيه واولاده

حضنتني وشم بيه اني وامي

شكد مشتاقه الكم تضحك فرحانه 

بينه

عدهم بناتهم ما يزوجوهن الغريب 

كلهن لاولاد عمهن... من عمر زغير

ابراهيم اول واحد طلع منهم واخذ غريبه بس هوايه يحبوهه الشيماء

ويحبون ابويه ويقدرونه

الكل ملتهي ناس تطبخ وناس تركص

من دخلت عجبتني كعدتهم ماجنت اتصور بيوت وترتيب...

كبال الباب الدخلنه منه ممر على عرض الباب 

يعني سيارتين يطبن سوه

ويلاكينه المضيف غرفه طويله مفروشه بزوالي وداير مدايره 

ديوان راقي 

كبال المضيف حديقه كلش جبيره 

يمكن ١٠٠٠ متر او اكثر ثيل واشجار مرتبه وحلوه ومن وره المضيف تبدي ابيوتهم

مسوين فاصل اشجار بين البيوت والمضيف

بيت ابو عزام وبصفه بيت ابو سالم

وكبالهم بالجهه الثانيه بيت صلاح 

وام مهدي وكل بيت قصر لان همه 

عوائلهم جبيره وولدهم وياهم يسكنون

بعد البيوت يبدي البستان نخل وفاكهه مزروع بترتيب ونضيف لان عدهم فلاحين تشتغل

وحتى من جهة بيت ام مهدي هم عدهم بستان اكثر من ١٠ دونمات

من غير تربيه حيوانيه امسوي ابو عزام ابكاعهم وره البستان

سراب....

من بعدما تغدينه اخذتنه شيماء نرتاح ابغرفته كانت جناح كامل هول وغرفة نوم وملحقاته 

يعني قاط الفوك عباره عن ڜقتين وحده لبراهيم ووحده المهدي ومأثثيه من كلشي

ماعده المطبخ والاكل جوه 

لان بس ام مهدي جوه

ارتاحيت من شفت شيماء سعيده بحياته ولو احنه واثقين من ام مهدي وابراهيم

بس من انتقلت التكريت دائما

انفكر بيه ونخاف ما تتعايش ويه وضعهم لان مو مدينه عرب وبساتين 

ويربون حيوانات

والحمد لله شفنه اهتمامهم بنفسهم

وبمعيشتهم

حتى من بعد ما شافو شيماء اداوم مدرسه

غيرو فگرهم وهسه بنات ابو سالمم بالمتوسطه والاعداديه

يعني ماكو بعد بنت تترك الدراسه

عدهم الا برضاته

للعصر بدو الكل يتهأ ويلبس الحفلة الحنه

بناتهم كلهن لبسن ثياب زاهيه الوانهن

ومخشخشات بالذهب

حتى البنيه الزغيره ملبسيها ذهب 

نزلنه جوه كلساع وحده جايه املهله وطاشه الجكليت وياخذون ساعه ركص وردح

وشهد اخذه الواهس ويه بنات ابو سالم وبت صلاح مروه نفس عمرهه

تركص ولا يمه

امي كل ساع تصيحه ولج عيب 

وهيه ولا يمه

اجه غيث ابن ابو عزام كال حضرو روحكم اروح انحني العروس

وصار الركض والهوسه هاي تلبس شاله وهاي تحضر جهاله

طلعو ٣ سيارات سيارة ابراهيم ومهدي ويا احنه وسيارتين كوستر لمو بيه كل الحبايب

عمام مهدي من قضاء العلم 

وصلنه...وكله تباوع علينه يعرفون الغريب الجاي من بعيد

رحبو بينه وام العروس وخواته عرفو احنه اهل شيماء

رحبت بينه بشكل

العروس حلوه ومرتبه مدرسه

هستوهه متخرجه

دخل مهدي خجلان كعد يم عروسته

وام عزام حنتهم ركصن النسوان 

وهلاهل وقدمو الكيك والعصير

شويه و رجعنه

كانت مغربيه

صبو الاكل كله بصواني اكبار وعليه اللحم انواع

بعد الاكل بدت حفلة الزلم 

من العصر 

كانو يحضروله الشباب

سووالحفله بلحديقه جبيره كلش 

وجابو مطرب يغني مواويل واغاني جوبي ولتمت

الشباب صف واحد يلعبون جوبي

ومهدي كاعد ابنص خواله وابويه

ورائد كاعدين يم ابو عزام

اقاربهم هوايه وكله سيارات حديثه

مارسدس وسوبر وكرونه

ترست الساحه البره

شيماء ... جريت سراب وطلعنه بره

نتفرج على الجوبي والاغاني من وره القاطع مال الاشجار 

كل البنات والجهال بره يتفرجون

كانت ليله صدك تونسنه بيه

بعد الحفله اخذتنه ام مهدي وفرشتنه بالديوانيه مالتهم وابويه ورائد وعقيل نامو بالمضيف

ثاني يوم الصبح كعدنه ونفس الخبصه اليوم العرس والكل ديتحضر

التمو البنات يبدلون ويتمكيجون

اني بس سرحت شعري لان اني مو محجبه

للعصر طلعنه بالسيارات انجيب العروس

اني وامي وشهد وشيماء كال ابراهيم ابسيارتي تصعدون

وشهد تتوسل بامي تريد تروح ويه 

مروه بالكوستر

وامي ماقبلت..وكامت تبجي اخر شي كال ابراهيم بالرجعه اصعدج

ويه مروه بس اسكتي

طلعت سيارة العروس بيه مهدي 

صدك هيبه وطالع حلو

واولاد عمه وخاله على كثرتهم مينعرفون الاكثريه لابس عربي

دشداشه وغتره حمره

وصلنه بيت العروس

وشتغل الطلق الكل يرمي حركو الجو

دخل مهدي يم عروسته والردح وركص ام مهدي وعماته وام عزام وام سالم

والفرقه بره تعزف

شويه وتشكر من عمه واخوهه وطلعو اخذه بيده وصعده بالسياره

طلعت اني اتمشه السيارة ابراهيم

ملكيت احد فتحت الباب وصعدت 

اباوع الكل هوسه يتسابقون للسيارات

وانتظر... لابراهيم ولا الباقين

جان يجي ولد شاب ابيضاني بي شبه من ابراهيم لابس هم عربي

ومناضر شمسيه وبيده مسدس

بدون ما ينتبه فتح باب السياره

وامنن المسدس وحطه بالجكمجه

ومد السويج يشغل السياره

رفع راسه على المرايه....وتفاجأ

التفت وذب المناظر 

وظل امركز ابشكلي وعقد جاجبه

ليث.....

انت....انتو ....وتلعثم

سراب......

اني عبالي سيارة ابراهيم وصعدت

ليث.....

انت اخت ام ذرغام مو

سراب.......

فتحت الباب محرجه ونزلت ...اي

ليث.....

اهلا وسهلا.....تعالي اوديج

مشى واني ورى 

لكيت ابراهيم واكف يدور عليه

وامي وشيماء كاعدات بالسياره

ابراهيم....

ها وينج سراب

ليث.....

امخربطه بسيارتي ....عادي يابه

يله اطلع ... حتى لا نبتعد عنهم

راح ليث واحنه صعدنه

ابراهيم....

يمعوده جنت ادور عليج

سراب....

كلت اطلع قبل الهوسه والسياره تشبه سيارتك اشمدريني والله

شيماء ....

عادي يمعوده ابن خاله مو غريب

وصلنه البيت ودخلونه من باب ثاني لان الحديقه والمضيف كله زلم

دخلنه العروس ابيت ام مهدي 

وكعدنه وشتغل الدبج والهوسه

ساعه وجابو الاكل

والعروس صعدت للغرفه مالته

تعشينه ...

وبدت مراسيم زفت العريس ...

وجابو مهدي من المضيف البيتهم 

صفكه وهوسات ورمي ولد خاله ولد عمه وصلو الدرج

ورجعو لان البيت متروس نسوان

اشويه اشويه بدت الناس تخف

يرحون لان كلهم عدهم سيارات

وبيوتهم قريبه الكل من تكريت ما عدانه احنه من بغداد 

ابو عزام واخوانه وولدهم كاعدين بالمضيف بعد العرس

ابو رائد.....

احنه من رخصتك باجر طالعين 

الصبح

ابو عزام......

اشلون يابه اذا ما تخلص ضيافتكم 

ما خليكم ترحون

.....والله كفيتو ووفيتو انت اهل الكرم والضيافه والله يديم النعمه عليكم ويحفظكم ابو عزام

........لا هذا الحجي ما يصرف عندي 

عمي احنه مو بس نسابه احنه اهل

.....يعلم الله اعتبركم مني وبيه 

بس سراب عدهه دوام ورائد

لازم يلتحق

......اي ايخابرون واحنه ربعنه هواي

اندبره

باجر انشوفكم ديرتنه يابه

ما شفتو شي ملتهين بالعرس

ثاني يوم الصبح التمو الكل على الريوك ابيت ام مهدي

وجابو صواني الكيمر والعسل والكاهي بالاستقبال

حتى ابويه ورائد جايبهم ابو عزام

وابو سالم وصلاح وعوائلهم 

اشكد الديوانيه جبيره

انترست كانت اللمه روعه سوالف 

وضحك

نزلو العرسان والكل يسلم ويبارك

الهم

اندكت باب الديوانيه 

سمعنه صوت بره ولد شاب كال ياالله 

كالوله اتفضل ليث انت غريب؟

باوعت نفس الولد الغلطت بسيارته

ابن ابو عزام هذا الثالث لان ابو عزام ما شاء الله عند ٨ ولد

دخل سلم وبوس مهدي وباركله 

وحضن عمته ام مهدي وباس راسه

واجه كعد يم رائد 

ابو عزام...

اعرفكم هذا ابني ليث يشتغل ابغداد مقاولات

ابو رائد....

اهلا يابه ما دامك ابغداد اتفضل يمنه 

ليث .....

تسلم عمي....اني بالمناقصات اكثر شي هناك ودايما امسافر

اها

صلاح.....

التفت عليه...سراب ليث دائما ابمقر شركتكم 

يقدم على المناقصات واكثر الموظفين عرف اخاف تحتاجين شي

كلهم التفتو عليه .....

.....ها تسلم عمو اني على المشاريع الطابق الثاني .والمناقصات بالطابق الرابع

صحيح شركتنه تنطي المناقصات

صلاح....

اي مو حتى المناقصات الياخذه من تكمل انتو تشرفون عليه

سراب......اي صحيح

التفتت صدفه لكيته يباوع عليه

دنكت بسرعه

بس هو ظل طول الكعده اشما ارفع راسي اشوفه عينه عليه

يحجي ومندمج ويه رائد ويباوعلي

ضايقني بنظراته 

وزحمه اكوم والكل كاعد

ساعه وكال ابو عزام امشي ابو رائد

اروح للبستان

ابو عزام كال الغده عازمكم على كعده بالبستان

والكل يحضرون حتى العرسان

ابو عزام اخذ ابويه وطلعو..

ورائدكاعد يسولف ويه ليث وبراهيم ومهدي

بدو يشيلون صواني الريوك

واني اشرت الشيماء....نطلع من الديوانيه

.......لج شيماء اختنكت هاذا ولا شال عينه مني

عمت عينه اشكد اعوينجي

......ههههه لا ولج اصلا هذا احسن واحد ابولد ابو عزام شخصيه

وثقافه يجوز ما يقصد

.......شنو ما يقصد من البارحه ما

ارتاحيت النظراته

.......هسه يجوز معجب ...همه غير

كلهم متخبلين عليج

.......بربج شيماء يا معجب اني بيا حال.....من البارحه لليوم تعبت من 

كدما انسالت على الحلقه واكلهم مخطوبه

.......لو تدرين كم وحده خطبتج

من البارحه لليوم

......اي هو هذا حضي الكل تتمناني 

واني تمنيت بس واحد وطار والله اليعلم وين صار واشلون حاله

........بعدج اتحبي

.....ليش كولي نسيته ليله 

........بس هو وينه...ويجوز

......لا يجوز ولا شي اني قدري وسام وهاي ابقى انتظر لمن الله يفرجلنه

........كيفج بس حرامات هذا عمرچ يروح ....العمر يمشي 

ترى

والبنيه اذا كبرت تقل فرصه بالزواج

......اني مرتاحه هيج ما اريد اظلمه

فوك الدنيه ما ظلمته 

انفكت الباب شيماء يردوكم..

....كومي عيني ذكرتج وانت ما عايزه

.......لا يمعوده ليش اني ناسيه

......يله راحو كدامنه للبستان

شيماء شالت ابنه ادهام وتمشينه واني لزمت ايد ذرغام كايدته

طلعنه من البيت تلكتنه سروه بت ابو عزام وتمشينه سويه

وصلنه لكيناهم فارشين بالكاع حصران ومدات وعليه مخاد وشويه عنهم الجدوره والجمر يشون عليه السمج ومره صلاح وركاء ليغاد تخبز

امي وام مهدر كعدن والرياجيل بعدهم ما جاين

اني تمشيت يم وركاء طلع خبز واكل منه احب الخبز الحار حتى من امي تخبز اكابله واكل

اجه مهدي. كايد عروسته ويتمشه

يمنه اخذ كرصة. وقسمه بالنص هو ونهله مرته

.......سراب اشلونج

...... بخير الله يسلمك

....وين صرتي تخرجتي بعدج

.......اي السنه اتخرجت الحمد لله

.......الحمد لله ...رافد وين اشو ما وياكم

.......والله رافد ملتحق بدوامه بلكت يتسرح عن قريب

......انشالله

شويه واجوي ابو عزام وابويه ولمه الشباب كلهم ابراهيم وليث وغيث ورائد وابو سالم وولده

كامن نسوانهم تاخذ منهم وتحط بالصواني 

وسوو سفره طوله ب١٥ متر الرياجيل ابجهه ورهه كعدنه النسوان بجهه

كانت الكعده والغده اكثر من رائعه السوالف والتواضع والمحنه البينهم

والعزوه بلمتهم شي كل واحد يتمنه يعيشه

خلص الغده ونشالت السفره ورجعنه كعدنه الخضره والاشجار شي يبعث الراحه

واحنه مندمجين ونسولف كالو اجه خالد....

رفعت راسي اباوع بتجاه ما يباعون 

لان احس اهتمو ورحبو بي رغم بعده ما واصلهم

اجه اتقدم والكل كام يسالم ويصافح ايبين مهم

كان رجل مربوه وشويه متروس جسمه شعره مشيب شويه وويا

زوجته شابه طويله حلوه واثنين اولاد بين السته والخمس سنوات

ولابس عربي ونظاره شمسيه 

تسالم وياهم وعرفو على ابويه 

ورائد

ام مهدي صاحت على زوجته 

سلوى تعاي جاي

هاي سراب اخت شيماء تعاي سلمي عليه

كمت اله بوستني وسلمت وكعدت ويانه واني كلش عاديه اضحك ومندمجه وياهم الى ...ان

صاحلي صلاح....

سراب .....عرفتي ويأشر على خالد

اني باوعت متعجبه منو ممكن يكون

واعرفه 

لمن رفع المناظر 

انصعقت....مقدم خالد

ولا عرفته ابد

صلاح كال ...عميد خالد يابه

هو ضحك.....

صلاح يشاقه.... عميد ما يتحاجه

الكل ضحكو...

وابو عزام كال ...لا يابه هذا خالدنه

خوش خالد

همه يحجون ويضحكون واني 

كلشي رجعلي مثل شريط ويمشي كدامي...

صلاح لمن عيني وكال وصيت عليج كرابتي

سنه ونص ويا بالوظيفه واهتمامه 

بيه

عركته ويه وسام لان خطبني

واخره نقلة وسام المصيره المجهول وتحطيمنه اثنينه

شيماء ابصفي لزمت ايدي ...هاي شنو ليش هيچ ايدچ بارده

اصلا جامده بيچ شي سراب !!!

وين رحتي اشبيج صفنتي

واسمعه كال......اشلونج ست سراب

باوعتله ...الحمد لله استاذ انت اشلونك

......شخبارج ...بعدج بالهيئه...

......اي استاذ بعدني

يحجي وياهم كلش طبيعي ولا متفاجا

يمكن يعرف اني هنا واجه....

دنكت على شيماء شاورته

.....اكلج خالد شيصير منهم

......ياااا غير ابن عم خالي ابو عزام

ونسيبه هم ...مرة خالد سلوى بنت

ابو عزام 

......همممم هسه عرفت قرابتهم قويه.....زين ساكن اهنا

......لا بتكريت غير بيت عنده يم اهله وهو بديالى رايح جاي

.....ها زين....ضجت حيل ...دكومي نتمشه يا شيماء

اي يله اروح على الجدول يله سروه 

ويانه

كال ابراهيم وين

جاوبته شيماء رايحين للجدول نتمشه خلي ذرغام اوياك واني اخذ 

دهومي ..

روحو احنه هم راح انكوم

ابو عزام كال يله ابو رائد اراويك 

كاعنه...

راحو يتمشون

والشباب هم تقسمو وراحو بغير مكان

ومهدي اخذ عروسته وكال اني راجع للبيت

جاوبته امه وهيه تضحك

روح يا بعد امك....

وظلت هيه وامي ونسوان اخوانه 

كاعدات

اني ردت بس ابتعد شوفة خالد

فتحت الجرح القديم

تمشينه نهاية البستان جان اكو جدول مغلف جبير متروس مي صافي وطالع كبل 

و اكو صبات كعدنه عليه و شجره مال تين...كبالنه

شيماء ....تكطع وتنطينه وسروه سوالفه حلوه تحجينه عن خطوبتة البارق ابن عمه ابو سالم...

يشتغل بشركه مال نفط بالموصل

تكول هذا من راح للموصل تغير 

عليه ويوميه اماجل عرسنه بس 

لا عاشگله مصلاويه

وشيماء تضحك عليه تكله

هو هل اجلح املح منيه تكلبه 

وسروه تكله يمه غير هو الهوه

وبليا اموت

واني اضحك على حجيهن..

فززنه ...

صوت قريب 

السلام عليكم

كلنه اللتفتنه....وعليكم 

شيماء .....هله ابو وليد

كان لابس مناظره الشمسيه وبيده سبحه صفره 

ادنه علينه ومركز نظره عليه 

عرفت هو لحكنه 

وكفنه ثلاثتنه 

خالد ....من رخصتكم ردت احاجي ست سراب

مشيت خطوتين ودنيت قريبه عليه

وبتعدن اشويه عنه سروه وشيماء

يم شجرة التين ....

وسروه تباوعلنه بقلق لان خالد زوج سلوى اخته

خالد......

كتف ايدي اثنينهن وره ظهره وكان يباوعلي بهتمام وحجه

اشلونج سراب شخبارج

..........زينه......جان امبين كلامي جاف ويا

سمعت مكمله اداره واقتصاد زين

......اي كملت

.........اشوكت خطيبج اتأسر

.....باوعتله ...... يعني معقوله كل هاي السنين متدري

.......لا والله ما ادري....من يوم النقلتج ...اني وراكم قدمت نقل على ديالى ولليوم اني هناك

البارحه صلاح بالعرس حجالي وعرفت اليوم انتو هنا فقررت اجي واشوفج

سراب.........

....ليش ساكته احجي شنو الصار

......ليش تريد تعرف

.........لان اصور ماكنت اعاملج مدير وموظفته

كنا اصدقاء...

.....اي صحيح.... گلته مستهزأه

........ليش قصرت وياج بشي؟

..........استاذ الله يخليك العتب بعد كل هاي السنين ميفيد ليش تفتح مواضيع ماتت وراحت

....... هو شنو المات افتحي كلبج

اشايله عليه كل هاي السنين واني بنظرج كلب ابن كلب 

عاتبي ....احجي

بين من نبرة صوته بده يعصب

.......انت مو نقلت وسام وانت السبب بليصارله

......سكت اشويه كانه يذكر ورفع راسه يباوع

اني ما نقلته لاي مكان اني مجرد بلغت عن وجوده ابواسطه بدائرتنه

......وشنو الفرق

.......لا الفرق جبير اذا همه نقلو للجبهه اني ما مسؤل

اني مجرد ردت ابعده من كدامي

لان بعدما خطبج اتاذيت هوايه

واصور انت تعرفين كل شي

.......اني كل شي ما ادري انت ابوقته فاجئتني

...... ليش سنه ونص اللمحلج ما فهمتي...

سراب.......

ليش تسكتين احجي اني رجال ابن عشاير ....لو اريد ااذيج

ما اخاف وانت تدرين الدوله احنه

بس ما سويه

بعدتكم من كدامي والله يهني سعيد بسعيده

........الحجي ما عاد ينفع وسام اسير مدري مات واني وكف حالي

.......وانت ليش تنتظرين والعمر يمضي كل البينكم خطبه

.........البينه عهد ووعد ما اريد اخذله وهو هناك

.......دزلكم رسائل

....اي بالبدايه...٢ ونكطع

.......سكت اشويه وباوعلي اذا تحتاجين اي مساعده بعدني 

اني ما انسه بسهوله اصدقائي

......جريت حصره ابكلبي كلت بعد شحتاج

اشرتله ابراسي

كال ما عندج ثقه بيه ممكم اساعدج مو

لا بس شنو تكدر تسويله وهو هناك

نشوف اشلون اكدر اساعده

.....سلم ....وراح

            الفصل التاسع من هنا 

بدل ماتدور وتبحث علي الروايات خليها علي تليفونك وحمل تطبيقنا

تعديل المقال