رواية بين الحب والأسر الفصل السادس 6 بقلم أمل مهدي
..انا....وانت....
لم يكن لدينا اي اختيار
جمعتنا الايام والاقدار
ولعبت في ليالينا الاسرار والاعذار
انا وانت.......
قشة في مهب اعصار
او شفق يتراقص بعد كل نهار
انا وانت....شراعان لمركب سبحت عكس التيار
سفينة عشقت تعب الاسفار
فراحت تغازل الامواج وتعانق البحار
ودون اي اختيار
هرولت خطواتنا لمجهول خلف ستار
وتشابكت ايدينا بطوق واسوار
ودون اي اشعار......
طعنت السنين خناجرها بالاعمار
فتناثرت الايام في الطرقات والامصار.....
انتظار.....
كل منا كان على موعد وانتظار
لاحلام سكنت الخواطر والانظار
واماني تتبخر مع كل طلعة نهار
والقلوب مسكينة تحتار
اي طريق لها تختار
لاننا في فلك الحياة مجرد اقمار
نسير...في خطوط وهميه رسمتها
يد الاقدار
ودون اي اختيار صارت احلامنا مجرد كلمات واشعار
انا وانت لم يكن
لدينا ادنى اختيار
//// امل مهدي ////
....................
اخذت تكسي وطلعت للكراج....
كاعد بالصدر والسايق شعل المسجل
وشلون صدفه
اغنية ام كلثوم
بعيد عنك...
حياتي عذاب.....
متبعدنيش بعيده عنك
مليش غير الدموع احباب معاهه
بعيش....بعيده عنك
غلبني الشوق ...وغلبني...غلبني
وليل البعد....يذوبني....ذوبني
ومهمه السهد...يغيرني
لطول بعدك يحيرني
ونه الايام بتبعدني بعيد
بعيده عنك
.......جريت حسره شگت گلبي
وورثت الجكاره..
السايق ....الله يعينك
وسام......الله يعينه كلنه
..... امبين عليك ملتحق راجع من اجازه
....اي والله
......الله يحرسك اوليدي
......شكرا
ظليت اسمع الغنيه ومن هسه اشتاقيت
اشلون اصبر شهر مدري ٢٥ يوم
باوعت للسماء اترجه
يارب صبرني وسهل امري واخذ سراب ....
لو ليله وحده بس ازوجه وتنكتب باسمي
ما اتحمل اصير الغيري
اباوع للسماء واحجي ويه ربي
اختنكت .....
ام كلثوم ادك على الوتر الحساس
وصلت النهضه
ودخلت الكراج
وصعدت المحافظة ميسان ...نص ساعه وقبطت السياره
وطلعنه.....
للعصر وصلت المقر الوحده مالتي
سالت على رائد حسن
كالو موجود ....رحت سلمت عليه
وباشرت
ومثل كل مره الليل يشتعل حرب
والنهار صنطه لو شي بسيط
مرن كم يوم استحي اكول للرائد
استعمل التليفون ...اكول قابل اني وحد عن ذوله الجنود
وهو الوحده يصيحلي ويكلي ما اشتاقيت الخطيبتك
خابر يابه
طمنهم.....
بالليله السابعه اني نايم ...ونكلبت علينه قصف
كعدت اباوع يصيحون هجوم علينه
الكل يشيل اسلاحه
اهنا اول مره استعمل السلاح واقاتل
انتشرنه على السواتر وفوك الابراج
رائد حسن .....كال انت ويايه وين انتقل لا تفاركني
..... ليش سيدي
........لان انت خبرتك قليله
كمنه انباوعلهم بالعين المجرده
قسم اجونه ركض وقسم على ماطورات
وعلى كثرتهم كمنه ما نميز
الليل والدخان مال القذائف
والقصف
وريحة حرك البارود .......
كام اليوكع ابصفنه محد ابحاله
اني ظليت ويه الرائد
وكعت قذيفه على كرفان وشتعلت النار
والكل كام يصيح حتى انطفي النار
يخافون تنتقل النار للعتاد
ركضت وياهم وعفت الرائد
صياح ...مي الحگو بساع
يمي كرك كمت اطفي النار بالتراب اني وثنين وياي
والنائب ابط يصيح
همتكم ولدي...
واني بنص هاي الهوسه وگعت قذيفه بالمكان المتحص بي الرائد ويرمي...
شمرت الكرك ورگضتله
وصيح سيدي ...سيدي
ما يجاوبني...
انفرج اشويه الدخان واشوفه
واكع على وجه ورجلي مصوبات
وينزف بغزاره
جبت السديه وصحت اثنين وياي
اوكلبته على السديه جان يصرخ من الالم
اباوع رجله نافوره الدم
جريت لفاف على ركبتي
وشديت رجله التنزف
بكل قوتي كطعت الدم
وشلنه السديه ردت اسحبه للخلفيات
بس ما لحكت
عشر امتار وطوقونه
احنه ثلاث جنود شايلين السديه ...وگفنه
وهم مصوبين اسلاحهم علينه
ويصيحون بلغتهم
نزلنه السديه بالگاع
.....وضطرينه نلقي اسلاحنه ونستسلم
رفعنه ادينه.....
وكفت اباوع على الرائد حسن يتلوه من الوجع
واني رافع ايدي
لمونه حوالي ١٥٠ واحد اخذونه ادفع كعدونه بالكاع وادينه على راسنه
صرت اشويه بعيد عن الرائد والجو كان بارد
اتمنيت اغطي
عيوني ظلت تراقبه من بعيد وروحي تلوب يمكن مات محد وصل يمه وهو سكت
ماكو حركه
الهوسه اليمي كلها ما مهتم الها بس الرائد كان همي
ظلينه گاعدين لمن انكشف الفجر
و جابو سيارات عسكريه كشف صعدونه بيه
ومشت بينه بتجاه الاراضي الايراني
هنا حسيت اني انتهيت كل ما نبعد عن الحدود احس روحي تنسلب مني
كلشي اتخيلت يصير بيه الا
اتاسر
چان گلبي حاس الايام ناويه تفرقنه اني وسراب
حوالي ٣ ساعات نمشي
ودخلونه ابمعسكر كبير
بي هوايه حرس ايراني عبرنه بابين ووكفت السيارات نزلنه
كل هذا واني بصدمه احس دا اعيش حلم
لو دا اشوف فلم كدامي
نزلونه سره سجلو اسماءنه وكل واحد يسجلوله تسجيل يقدم نفسه
وصل يمي السره كلت
اني الجندي الاسير
(وسام عزيز ابراهيم) من بغداد الكاظميه
وهاي حتى الاهل يسمعونه
كعدونه بره مجاميع على
الارض البارده واني نهاريت دموعي نزلت ابجي مثل طفل تايه
من اهله
اكو اثنين يمي اسرى
ابوعلي رجال يمكن ولده بكدي من الديوانيه.
.....لا يابويه ليش تبجي
كول يا الله
محمد...... بداية الثلاثين من المجر الكبير ....احمد الله جا لو مكتولين احسن
ابوعلي......جنك جديد ومالحكت تتدبغ بالجيش
محمد......عمي انت زلمه شني اتبكبك
لا اصير رجيج تره ما تعيش
مسحت عيوني
وين جنت اووين صرت
انهديت هد ....عقلي فصل ما ديصدك
كله كام يرجع مثل الشريط كدامي
من استاذ خالد وسراب الى امي وابويه واخواني
(كل ما راح تقرو حقيقي)
قدمونه اول وجبه لفة همبرگر
ومي اني ما ردت
ابو علي.......
من الصبح فارغه بطنك
اكل اوليدي
وسام.....ما اكدر ونطيت اللفه لمحمد
ما اكدر عوفوني وحدي
بعدين قسمونه
ودخلونه جملونات كبيره مقسمه من الداخل الي قاعات يسموهه (كمب)
وانطو كل واحد تنكه خاصه مالته يكتب عليه اسمه ياخذ بيه حصته من المي لان يجي دنكر يوميه ينطينه
اظاهر المعسكر مابي مي
القاعات بيه اسره ٣ طوابق وكل واحد يكتب اسمه على مكانه
انطونه بدلات لونه رصاصي ونعال نايلون هاذه كان لبسنه
تمددت بفراشي
الكل راح غسل الا اني
ظليت بفراشي ما ادري شكد.......ما
حسيت لا بجوع ولا بعطش
بس الم نفسي ذبحني ...ما دااتقبل
بعدي عن سراب
كنت منتظر يوم يوم ننجمع سويه
والله ما رادلي
كنت اغطي وجهي حتى الوياي لا يشوفون ادموعي
للفجر على نومتي
ابو علي.....
عمي وسام كوم راح يوزعون ريوك
اهز بيه ماكو فاصل
تالي وخرت الغطه من وجهه
اباوع لا حس ولا نفس
صحت.......ولك محمد الولد مات
محمد....عاف ماعونه واجاني
انه ابوك يعبيس جا ما ماكل
ابو علي.....
لزمت راسه مصخن نار
الحكلي بمي خلنسويله كمادات
جابلي المي
....وانه نزعت فانيلتي
وكعدت اسوي كمادات
راح محمد وجابلي حرس ايراني ومترجم
كلبو وشافو وراحو
وره ساعتين اكثر
...اجو اثنين فرق طبيه فحصو ونطو حبوب وكالو
لازم ياكل وراحو بعد ما شفناهم
محمد راح جاب الاكل مالته ومالتي
...مركة لبلبي اشلون تنوكل ما ادري
بس اذا ما ناكل يكتلنه الجوع
فنتقبل كلشي
لليل صحه وسام الوجه اصفر
خاوي ما يكدر يكوم...
ابوعلي ومحمد
صار وسام مسؤليتنه كعدنا ووكلنا كوه
الصخونه راحت بس گاضي
وشويه احسن اخذنا للحمام
سبحنا ورجعنا بفراشه
وسام......
ماادري بالوقت انعدم عندي كل احساس ما عندي
رافظ الحقيقه الوصلتله
ماريد احد يحاجيني انعزلت عن الكل....
محمد يجيبلي الاكل
ومحد يحاجيني....اخذت زاويه
وكاعد وحدي
اشويه اشويه كامو يسمحولنه نطلع بالساحه بيه شمس نرتاح من الحبسه
وشكد حاول ابو علي يطلعني ما قبلت
رتاحيت لوحدتي ونعزالي .... ماريد
اعيش غير ابعالم سراب واهلي
روحي ظلت اهناك يمهه .... اي اسرو جسدي.... بس
مر على اسري شهرين تقريبا واني اعيش وحدتي وبليل ابجي مثل طفل ماخذي من امه اني ليش هيج ضعيف ....مسيطره عليه هواجسي
والذكريات لازم ارضى بقدري....
واعيش المصير النكتب عليه
احاجي نفسي واقويها وبنفس الوقت
اخيب آمالها.....
زارنه الصليب الاحمر الخاص باسرى الحرب...ووزع علينه اوراق نكتب بيه رسائل لاهلنه
الرساله عباره عن خمسة اسطر لازم
نختصر
حسيت انفتحت نافذة امل كدامي
الاسطر الثلاثه الاولى خصصته كلام لاهلي والسطرين الاخيرات السراب
وطول ما اني اكتب تنزل دموعي
ومو بس اني اهواي اسره تذكرو اهلهم وبجو
ونطينه الرسائل على امل ترجع باخبار اهلنه
من بعد هذا الحدث اتغير شي بيه
صار عندي شي انتظره
امل ترجع الرسائل واعرف اخبارهم
التفكير والانتظار
كام يصير عندي ملل.....
ولاول مره طلعت اتمشه بره بالساحه
شويه اشويه كمت اقترب من اشوف لمه واسمع حجيهم
وحسيت يمكن اني احسن واحد بيهم
كل واحد عايف ورى هم شكل اليمديون وليعايف اطفال ازغار وامهم وما عدهم مصدر رزق
واشكال سمعت
نفسيتي بدت تتغير ......وبفضل ابو علي ومحمد ايطلعوني من عزلتي
بسوالف عن عوائلهم واولادهم
وفكاهة محمد وفطاريته رجعولي
جزء من حياتي والجزء الثاني كنت اعيشه مع ذكرياتي
من بعدثمانية شهور من ارسال الرسائل....رجعوهن
وكنت متأمل الكه رد سراب وبحثت بين الصطور عن شي يخصه ما لكيت
.....اشكد كنت مشتاق لاهلي بس ما اهتميت الاخبارهم
وسؤالهم.......
ابويه يعرف مقدار حبي الهه ...
ليش ما كتبلي شي عنه
ورجعت اعيش عزلتي
اطلع اتمشه اكعد لوحدي
فد يوم كنت امشي ولفت انتباهي مكان اكو أسره يدخلوله
سالت كالو مكتبه......
دخلت المكان ولكيته مكتبه متواضعه
وبيه كتب اكثره دينيه وتاريخيه
كعدت اكتل الوقت اخذت اول كتاب
ومن بعده استمرينت اقرأ
ومن هنا بدت حياتي تتغير ....
سراب......
كاعده على مكتبي وصافنه اشتاقيت الوسام ياربي شيخلص هاي الحرب ويرجعلي....
واني بوسط افكاري ....دك التليفون
مال شعبتنه
اريج.....الو نعم....اهلا وسهلا
وضحكت....التفتت عليه
وقبل متحجي عرفته وسام
كمت ابلهفه
اريج.....يمه يمه صاربيه كل الحيل
من سمعت حبيب الكلب خابر
سراب .....
اخذت التليفون منه اضحك
الو وسام ....ياعمري اشلونك
كان علي ما موجود اخذت راحتي ويا
واريج كل ساعه تغمزلي
سديت التليفون واني فرحانه طمني هو بعيد عن الهجومات ومرتاح ابمكانه
من بعد يومين كاعدين بالهول كلنه ملتمين على العشه
والتلفزيون بي طالعه اخبار....
وذكرو بالاخبار هجوم على قاطع ميسان الوحده.....
اني اسمع ورجفة صارت ابجسمي
قاسم.....
بابا سراب اشلون اتكولين وسام خلفيات
......اي هو كلي
......هذا التعرض على الوحده مالتهم
......لا يابه مستحيل هو كال اصلا مكانه مابي هجومات
......ليش ما تخابرين اهله
......ولله بابا اول بارحه خابرني واني بالدوام وكال كلش مرتاح ابمكانه
......انشالله بابا لعد شريد الله يحفظه
مر اسبوع واني عايشه بقلق معقوله وسام يكذب عليه خلص صبري مدا اتحمل
خابرت على المحل مال عمو ابو وسام..
عزيز....
سمعت بلاخبار هجوم على قاطع ميسان وخسائر وشهداء واسرى
اتبنجت ابمكاني......ما عندي غير اللواء
......الو السلام عليكم استاذ
.......عليكم السلام والرحمه يا اهلا ابو وسام اشلونك
......اني بخير ...ردت اسألك عن اخبار اليوم صحيح اكو تعرض على قاطع ميسان على الوحده البيه وسام
......والله ياابو وسام للاسف صحيح الخبر وبعد ما عدنه معلومات كامله
عن الخسائر
........ الخوف ما خلاني احجي
ما اكدر اتخيل وسام ممكن يموت
استاذ اريد منك اخبار اول ما توصلك ادكلي تليفون
......ماشي ابو وسام
سديت الخط منه واني نار ما كدرت اخفي الموضوع عن افتخار
وشتغلت لطم وبجي وسراب يا طلابة سراب
ايام الليل ما انامه وقررت اطلع للوحده مالته
وصلت للسيطره البلخلفيات ومنعوني ادخل كالو صايره مطاحن
معارك ضاريه عمي وين اتروح
تره خبر الميت يجي كبل العدل
ارجع البيتك وانشالله تهده المعارك وابنك يجيك
وره اسبوع اجاني اخويه
جليل عم وسام وكال سمعته سلم
وكال هو اسير
انكلب البيت عزه..... اخواني واقاربنه
رايحين جاين ما عافوني
واخير شي اللواء اكد على انه وسام اتاسر اثناء التعرض
وجابولي التسجيل بصوته اسمه وعنوانه ذكره
سراب ......
اتصلت على المحل مال عمو ابو وسام لان تليفون البيت ما اعرفه
سراب......
الو مرحبا
عامر......اهلا تفضلي منو
......ممكن عمو ابو وسام
........والله عدهم ضرف بالبيت
اسف منو حضرتج
......اني خطيبة وسام سراب حسيت
عليه ارتبك
.......ها اهلا وسهلا اشلونج اختي
......الحمد لله خير شنو الضرف
......ها لا ماكو شي...اذا تردين خابريهم
.......اني ما عندي رقم البيت
.......اني انطيجيا اكتبي يمج
.....ماشي ردلي الرقم وكتبته ما ادري ليش كلبي لزمني حسيت
صاير شي على وسام
.......الله عليك وسام بي شي
......ها خابريهم كلهم موجودين
وانت تعرفين...وسده
اني كمت ارجف...ايدي كوه ادوس الرقم
دك التليفون والسماعه بيدي
ابو وسام........الو
.......اجاني صوته مثل انسان مريض
مفجوع
عمو اني سراب
.....اهلا عمو
.....عمو وسام وينه صار كم يوم ماكو اخبار عنه ويكولون هجوم يمه
........جر حسره ...عمو وسام اتاسر
راح عمو وبجه...
واسمع ام وسام اتلعلع صوته عالي
كسحتي الابني عميتي عليه ارتاحي
افرحي......
اني انهاريت وسام اتاسر معقوله راح ما اشوفه..معقوله الخايفه منه صار
بجيت وصرخت بالم .....
لا وسام ....ليش عفتني
وكع التليفون من ايدي واني اصرخ وابجي
بلحظه ابويه امي اخواني التمو عليه
فقدت ضربت على وجهي
الى ان انتهيت
شالني رائد وابويه للمستشفى
صار عندي انهيار عصبي
احجي واصرخ باسمه
وساممممم.....ليش يا وساممممم
...عيوني ما بطلن البجي استذكر ايامي ويا
والله جان خايف وكل اشويه يكلي اوعديني ما تصيرين الغيري
كلبه حاس منتظره قدر يفرقنه
ويتونس على اوجاعنه
بيت ام مهدي ويانه بآلامنه ابأفراحنه وشيماء ما عافتني....حمله ودوامه وتجيني اتهون عليه مصيبتي وتمسح ادموعي
ام مهدي...التصيح
مو كتلج يعيني ام رائد طكطكي حرمل البناتج
هاي انحسدت وكعت بيه المكروده
سراب
ابويه ....
خابر على ابو وسام
وعاتبه ليش ما كايلين على اسره يعني ما حاسبين حساب بتنه خطيبته ولا امعبرينه
بس الرجال برر انه كانو مخبوصين
ورتبكو من من اليصار ونسو
ابويه يعرفهم بس عداها
شهر اني بالفراش اصحه يوم وانهار يومين
مدا اكد انسه ما متحمله بعده
الله لا ينطيك يا مقدم خالد فرقتنه وحطمتنه
الدائره يوميه اجازه مرضيه
والكل يلومني يمعوده اسير ولا شهيد احمدي ربج
واني التوقفت حياتي واحلامي
وآمالي اردد....اي الحمد لله
لمن هديت اشويه ....داومت واني
اجر بنفسي بالكوه
كلشي طفه ابعيني....الفرح ...المستقبل...ما كو شي يستاهل اتعبله واعيشله
حياتي اشوفها لوحه خاليه من الالوان
فقط بعيني اشوف اللون الرمادي
وبيوم كان جمعه كنت بالمطبخ اتريك اندكت الباب
طلع رائد فتحه....
واشوف سياره بالباب ونزلت منه....
ام وسام...... اهلك موجودين
رائد......اهلا خاله اتفضلي
يوم ....سراب ....اللتفتنه عليه ..
عمتج ام وسام بالباب
كمنه تلكيناهه
اميره.....هله ومرحبا اتفضلي
اباوع الوجه معبس وتسلم من وره
خشمه
ام وسام.....اني جايه افصخ الخطبه مالت ابني انطوني النيشان خلامشي
اميره......ليش تفصخين ليش هو ابنج وينه مو تأسر.
..
......اني من البدايه ما موافقه
وهاي نتيجته..
سراب......شنو جايه اتلوميني لان اتأسر
....لا الوم على الفكر اللفانه من يوم شافج.....انتو لا تناسبونه ولا احنه اناسبكم
بس غير هو دك رجله اني ادري شمسويتله
اميره.......شنو هذا الحجي.....انت متستحين ..المثلج محتاره ابهمه فاگده ولد ينحلف بشبابه
مو جايه عراكه
ابويه جوه من سمع حجيه طلع
ابو رائد.....عبالي حسيتو على نفسكم وكلتو مرت ابنه انشوفه نسأل
عليه.... صار شهر يوميه بمستشفى شكل
شنو من. ناس انتو اذا ادورون مقامات المن اجيتوني احد
دز عليكم خط امصخم
جايه تهينينه ابيتنه.....
ام وسام ......وكفت انطوني النيشان مال ابني ...وللتفتت عليه
وتصفك اديه وحده بلاخ ..
وانت فصخت خطبتج خلص لا تنتظرين ابني.....كسحتي وفگرتي
بعد اشتردين منه
ابو رائد.....اطلعي من بيتي واني الي حجي ويه ابو وسام
ام وسام ......اني ما اطلع منانه الا تنطوني النيشان ...ما ميته على بيتك
ابو رائد.......جيبو النيشان اني الميشرفني اناسب هيج شكولات
اني واكفه ابجي ومصدومه
وامي اركضي جيبى الذهب والملابس بالجنطه وذبته عليه هاج
دخيل الله شلون عينكم ضيكه انتي بياحال ودورين نيشان
اتقدمت ام وسام خطوتين وجرت ايدي
تريد تنزع الحلقه
اني جريت ايدي ودفعته.....محد ينزعه الا وسام هو البسه الي وهو يجي ينزعه
حجيته وابجي....
ابويه منا يصيح ....
وام وسام تلعلع وتهين بينه
طرده ابويه وكعد يسب ويغلط عليهم
ام وسام اخذي النيشان وصعدي بسيارتهم وراحت
ابويه اتصل على ابو وسام
وصيح ورزل وختمه
خرب ذاك اليوم الناسبتكم بي عبالي
ناس تعرف الاصول
بس والله حتى لو رجع ابنك خلص
مره ما الكم يمي
ام مهدي وشيماء......اجوي على صوت الصياح والعرك..
يمه شنو ذوله ما شايفين جايه مناك
تاخذ النيشان ...عوذا من هيج بشر
شيماء...تحضني وتواسيني
.....خليهم يولون ناس شايفين
روحهم
واني الكلبي انفجع ابوسام شسوي
اني مستحيل اعوفه ...اني وعدته
بينه عهد ووعد ما نصير الغيرنه
مرت الايام .....واني ورقتي ذبلت يبست .....ايامي وسام المحليه
هسه هو وين وشنو حاله
سمعت الاسرى تودي رسائل واني
اللوب وحدي ....يعني بعد الصار
حتى لو اجتي رساله من وسام
اكيد ما يكولولي
وتأملت وانتظر .....بلكت يدز على عنواني
بس ما اجت صار سنه على أسر وسام
واني تجي عليه اوقات كلبي ياكلني يريده يشتاقله ......ومو بيدي اشوف نفسي رايحه للشقه
هاي عش الحب مالتنه سرنه الشهد احلى لحظات واحلى كلام
اشغل وحده من الاغاني اليحبه
مالت ام كلثوم
واكعد اسمع واتامل ودموعي تجوي بجروحي .....
شيماء اجاهم ولد سمو ذرغام ومتحنت سادس ونجحت وقدمله ابراهيم معهد معلمات
سهر ازوجت ابن خاله ابتكريت
واخير شي قررت ام مهدي تبيع البيت وتروح تسكن يم اخوانه
ومن هسه ابو عزام بده ابناء بيت
لاخته
ام مهدي واخوانه شفت بيهم ترابط اسري عجيب
خصوصا تعاملهم مع اختهم واولاده
الحنيه والمحبه ونكران الذات
مره كان اكو موقف حجته ام مهدي
لمن راحت ابعرس سهر....
ابو عزام .....خويه امشي البيتج تشوفي واذا شي ما عجبج حتى نغيرو ...
وراحت ويا ام مهدي كان بالبستان
ولما وصلو تركه هي وابنه مهدي لان يعرف مراح اتكول كدامه اذا ما عجبه شي بالبيت تستحي منه
ولما رجع ياخذهم اخذ مهدي على جهه وسأله شنو علقت امه على البيت وسجل كل الملاحظات الكاله مهدي وغير بالبيت مثل ما رادت
حقه ام مهدي تتباهه بيهم
لان صدك اخوان ينشد بيهم الظهر
بيوم ٨/٨ /١٩٨٨ صحينه الصبح على
خبر وقف الحرب
خبر لطالما انتظرنا دعينه وبچينه وتمنينه طول فترة سنوات الحرب الثمانيه
كانت امنيه الاماني تنتهي الحرب ويعم السلام
هواي ناس فقدت احبتها
وناس تعوقت وناس تاسرت
صحيح كلنه فرحنه على الاقل يبقون يمنه الناس
الي شرار الحرب ما لاحهم....
الناس فرحانه وترمي والجكليت بالشوارع يطشونه على الجيش واني ابجي وسام لو ويايه هسه فرحنه سوه
خلصت الحرب ورجع نور الامل يشع بكلبي
راح يرجعون الاسرى اكيد
راح يرجع وسام وينور حياتي
خطوات الانتظار ثقيله وكل ما يتأخر يوم اختنق وافقد الامل الي انولد بروحي
٨ اشهور مر على توقف الحرب وما سمعنه اسير اجه
علي ويايه ابنفس الشعبه ورأيسي
المباشر.....
كال ابن عمي رائد بالحرس الجمهوري
راح احاجي بلكت يعرف احد بالصليب الاحمر
وخابره امامي
كان خارج بغداد كله من ارجع راح اجيك للدائره واشوف
وبالفعل
من بعد اسبوع اتصل على علي
وطلب يشوفني
وكعدنه بالكافتريا مال الدائره
رائد مروان وعلي واني
وفهمته واخذ معلومات كامله وراح
كان انسان خلوق ومتواضع
ومتعاون
بعد يومين اجه للدائره بيده ضرف
حطه على الميز مالتي
واخبرني وسام داز رسالتين على عنوان اهله وراجعات اله
وهاي الرساله دازه على عنواني
بس من وصلت اتوقف نشاط الصليب الاحمر مال الاسرى وتوقفت
تبادل الرسائل
لان الحرب اتوقفت اصلا
ونهملت الرسائل
طلعت الرساله لكيت تاريخه قبل ما تتوقف الحرب بشهر
ما اجرأت اقراهه امامهم وجنت محرجه
من علي وابن عمه
لان الخبر والرساله هيجو همي
وما سيطرت على دموعي
رجعت البيت واني اتحرق شوق
للرساله
فتحته......
ومن اول كلمه حسيت نفسه بيه
حسيت على صوته وهو يكتبه ويهمسه حسيت بكمية الشوك
واللهفه البيه
اي اني بس احس بيك وسام لان
كلبي وكلبك عايشين ابروح وحده
//بسم الله الرحمن الرحيم//
إليك يا زوجتي الحبيبه...
يا أغلى ما أملك في هذا الوجود ..
...إليك اشكو غربتي ووحدتي واملي الذي خذلني
يا نور عيني .. يا بهجة قلبي ..
ترددت في كتابة هذا الكلام ..واحترت كثيرا ..
وما ذلك إلا لعظيم وجودك عندي ..وكبير احترامي لك...
ولكن لابد منه ..اعلمي اني اعيش على وعدقطع بيننا وان فرقتنا الايام اكيديأتي يوم يجمعني بك واني لانتظر بل واعيش من اجل ذلك اللقاء
تحياتي للجميع
وسام
بدل ماتدور وتبحث علي الروايات خليها علي تليفونك وحمل تطبيقنا
