رواية فصيلة دمشق الفصل السادس 6 بقلم احمد
سمير.. هو ابن عمها واكبر منها وتحترمو مثل ما تحترم اخوانها عيب ينرفع صوتها ببيت عمها
سارة.. يلا صارت وما تنعاد
سمير.. تمام
ميرا.. بابا ترا مصطفى حاول يضربني
سمير.. باستغراب .. ليش
ميرا.. جنت كاعدة ويا البنات العصر نسولف ونضحك واجى هو وعادل ماعرف من وين وصار يحجي علينا يكول صوتنا عالي
وجذب حتى عادل كال لو ما دخلنا جان ما ندري بيهن وبقى يضوجني ويكول ما تحترمين الاكبر منو كلتلو انت مدخلك بي
لا ابوي ولا اخوي علمود تسوي نفسك مسؤول علينا وحاول يضربني بس عادل منعو
سمير.. متأكدة الموضوع هيج
ميرا.. اي والله بابا حتى اسأل البنات
سارة.. عوفو الموضوع مو حلوة ما صارلنا يومين هنا نبلش بالمشاكل وانتي تجنبي مصطفى وحتى اذا حجى لا تبقين تعاندين
ميرا.. والله ما اعاند ماما بس هو متقصدني بتصرفاتو
سارة.. خلص عوفو الموضوع مو مستاهل كل هالحجم
ميرا.. تمام
سكتت ووصلنا السوك وماعرف ليش بابا ما علق على كلام ماما وبصراحة الي يفكر بالموضوع يشوف كلام ماما منطقي
اني بوقتها جنت مراهقة ما افكر بطريقة واعية جان كل الي اريدو ان يمنعون مصطفى ما يضوجني بين الحين والاخير
بس الصح انو نعوف المشاكل مو حلوة نسوي مشاكل واحنا ماصار كم يوم من اجينا هنا وماطول ماصار شي مهم فالسكوت احسن
نزلنا من السيارة ومسكت ايد ماما مثل الطفلة لان السوك غريب علي وخفت لا اضيع بيه وصرنا نتمشى مع بابا
رحنا على مولات الالبسة جانت البضاعة كلش حلوة والعجبني انو البضاعة اكثرها محتشم حتى الفساتين
صحيح بسوريا اكو هواي ملابس محتشمة بس بنفس الوقت اكو هواي ملابس مكشوفة او حصر لان نسبة كلش جبيرة يلبسن حصر او مكشوف
اول شي رحنا اخذنا عبابتين الي وحدة لبستها لان ضوجتني عباية جنان والثانية حطيتها بعلاكة ويا عباية جنان وكملنا فرتنا
واخذت فساتين 3 وماما هم اخذت الاشياء الي تحتاجهن ومن كملنا المسواك رجعنا للبيت وجان عيد الاضحى قريب فكلت قبل العيد اجي ويا البنات
رجعنا للبيت واني طايرة من الفرح لو مشترين السوك كلو ما افرح هيج دا نمشي بالسيارة ومرينا من كدام محل العاب
شفت لعابة حجمها اصغر من الطفل بشوية وبدون شعور كلت الله شكد حلوووووة ماما كالت شنو كلتلتها ذيج اللعابة شوفيها
جان اكو ازدحام وبابا على كيفو يمشي وشافتها ماما كالت اي حلوة بس استغربت من بابا وكف على صفحة ونزل كلت لماما وين راح
كالت هسا يرجع وراح على محل الالعاب كدام عيوني واخذ اللعابة واجى باتجاه السيارة وما احجيلكم الشعور الي اجاني
ركب وانطانياها كال هاي هدية نجاحج لان ما اشتريتلج هدية بسوريا بس مرة ثانية لا تسوين شي بدون اذني علمود ما اخرب فرحتج
كلتلو تمام واخذتها منو وفرحانة اكثر من الجاهلة الي تحصل هدية وماما جانت تباوعلي ومبتسمة لان اني فرحانة
رغم انها لعابة مثل باقي اللعابات بس ماعرف ليش احنا البنات نحس كل لعابة تختلف عن الثانية وكأنهن بشر كل واحد يختلف عن الثاني
اتصل جدي على بابا علمود الغدا كالو بابا صرنا قريبين كال لعد ماراح نحط الاكل لحد ما تجون كال بابا تمام دقايق واحنا يمكم
الدقايق هاي صار سنة اريد بس اوصل البيت ومن وصلنا نزلت ركض اخذت العلاليك ورحت عالبنات عالمطبخ واني اركض
لا اراديا صحت جناااااااات خطية الي بالصالة فزو على صوتي عبالهم صاير شي بس من دخلو بابا وماما كالولهم هاي مخبلة ما تفكر قبل ما تتصرف
جنات.. اخ يمة كلبي
جنان.. شبيج ميرا والله عبالي انكلبت الدنيا
ميرا.. شوفي شنو جبت وياي
جنان.. ههههههههه كل هالصراخ علمود لعابة
ميرا.. هههههههههه اي لان عجبتني
جنان.. بالمبارك عليج كلش حلوة
جنات.. اي والله ذوقج كلش حلو بس روحي شيليهن وتعالي علمود تتغدين وبعد ما نخلص شغلنا نشوفهن براحتنا
ميرا.. تمام
اخذتهن لغرفتي حطيتهن بصفحة ونزلت تحت بين ما غسلت صار الغدا جاهز ورحت كعدت يم ماما وبلشت اكل
جدتي.. هاي سواية تسوينها بينا ولج ميارا
ميرا.. باستغراب .. شنو
سارة.. تقصد صراخج
ميرا.. هههههههه اسفة مو قصدي
جنان.. والله وكعت كلبي عبالي صايرلها شي
سارة.. هاي هي هيج من يومها ما تفكر بالشي قبل ما تسويه
ميرا.. يااااا هاي اني
سارة.. لا وحدة تشبهج
ميرا.. همزين عبالي اني
ايمن.. الحمدلله
جنان.. ايمن ماطول شبعت فدوة روح جيبلنا حلويات
ميرا.. ما يحتاج
جنان.. ليش
ميرا.. لان اكو ناس ما تحب تشوفنا فرحانات
سارة.. كافي ميرا
ميرا.. تمام
مصطفى يعرف نفسو مقصود بس ما حجى علمود ما يجذب الانتباه لنفسو وجدي وعمي استغربو بس ماما كالتلهم تخبص بالحجي
وقبل ما نخلص غدا دك تيلفون جدي ورد واسمو يكول اي موجود وباوع على بابا كال يلا هسا مسافة الطريق ونكون يمكم
سمير.. منو هذا
جدي.. اللشيخ ........ عندهم كعدة بعد الغدا ويريدنا نحظر وطلبوك انت
سمير.. تمام اني شبعت الحمدلله
ميرا.. خلصو غدا وقبل ما يشربون الجاي راحو وبين ما غسلنا المواعين جاب ايمن علاكة حلويات النا بس الجو حار فنطلع العصر
وجنان كالت نطلع بالحديقة الي بظهر البيت احسن علمود ما تصير مشكلة مرة ثانية كلتلها تمام ورحت جبت الغراض الي اشتريتهن
شوفتهن للبنات ولجدتي وزينب (زوجة عمي) والبنات كلش عجبهن ذوقي كلتلهن مو بس ذوقي ذوق ماما هم كالن كلش حلوات
من صارت الدنيا عصر طلعنا عالحديقة وهالمرة تونسنا بدون ما نشوف مصطفى الكروه وهو هم يمكن حس على دمو وعافنا
واعتقد لان شاف محد ايدو او وكف وياه وكلهم لاموه قرر يتركني بحالي واني هذا الشي الوحيد الي اريدو علمود ارتاح
المغرب دخلنا نسوي العشى وتفاجئنا من اجو بابا وعمي وجدي وجان جدي كلش ضايج ويلوم بابا وصوتو ترس البيت
جدي.. يعني بذمتك انت مقتنع بالي سويتو
سمير.. يابة ترا اني سألتهم سؤال ما جبرتهم
جدتي.. شنو صاير
جدي.. ابنج راحت بنت فصلية بسببو
جدتي.. فهمونا شصاير
سامر.. يمة القصة ومابيها صاير حادث واهل المتوفي رايدين فصل فوك طاقة اهل الشخص الثاني الي طلع سليم
فسمير سأل كال تكدرون تنطون فصلية فورا وافقو وكالو اي حتى ما اعترضو وابوي معصب يكول المفروض ما تجيب طاري الفصلية
جدتي.. وشبيهم هيج مستعجلين لو لاكين بنتهم بالشارع مو هيج
سامر.. والله يمة علمي علمج حتى احنا تفاجئنا بموافقتهم السريعة
جدتي.. زين يمة انت جنت متوقع يوافقون بهالسرعة
سمير.. لا والله يمة بس بالنسبة الي ماجان اكو غير حل وهاي هي البنت راحت فصلية بعد
جدتي.. الله يعين يا يمة وإن شاء الله ما تتأذى وتكسب ذنبها انت
ميرا.. جنات شنو يعني فصلية
جنات.. بعدين نحجي خلي نحطلهم العشى لا يعصبون
ميرا.. تمام
بقيت افكر بالموضوع وحطينا العشى وجنت بس اريد نخلص شغلنا علمود نصعد فوك وتحجيلي جنات لان ما حجتلي امي عن موضوع الفصلية
والي خلاني استغرب وابقى افكر انو جدي كلش ضايج على بابا بسبب هالموضوع وما خلصنا شغل الا اني كاتلني الفضول
ميرا.. يلا خلي نروح للغرفة علمود تحجيلي
جنات.. يلا
ميرا.. من وصلنا الغرفة .. يلا احجيلي
جنات.. من تصير مشكلة دائما يجتمعون الشيوخ بيناتهم ويحلوها بدون ما ينسجن الشخص الي يرتكب جريمة او يسوي شي خطأ
وبعض المشاكل اذا يكون مثل قتل اهل المقتول يطلبون فصلية من اهل القاتل بدال ابنهم الي انقتل يعني شخص بدال شخص
هاي الفصلية تتزوج واحد من اهل المقتول مثلا اخوه او ابوه ومرات تتزوج ابن عمو يعني المهم واحد من الخاصين بالمقتول
تتزوجو زواج خارجي بدون محكمة بس عقد شيخ وتكون حالها حال الخدامة عند اهل المقتول وما الها اي حقوق
وحتى اذا يضربوها او يأذوها ما الها اي حق انو تشكي ومن توصل بيتهم بعد ما تشوف اهلها وكأنها مقطوعة من شجرة
اكو بعضهم الله يوفقهن ومن يتزوجن احد من عائلة المقتول ما يحملوها ذنب الي انقتل وتعيش يمهم بسعادة وممكن حتى انها تزور اهلها
واكو بعضهم يكونن مكرودات ومن يوصلن يم اهل المقتول يعيشن بضيم حياتهن كلها وبعضهن يوصلن لدرجة انهن يموتن يمهم من الضرب والاذية
ميرا.. يممممممة شنو هالفلم الرعب هذا
جنات.. والله يا ميارا على كولة بيبي الرعب هذا حقيقة مو فلم والله لا يوكع بنت بهالموقف
ميرا.. يعني بابا جان سبب انو تروح هاي البنت فصلية اليوم
جنات.. هو سبب ومو سبب المشكلة هو سأل وهم فورا وافقو لذلك مانعرف نلومو لو لا
ميرا.. خطية الله يعينها
جنات.. اي والله بس إن شاء الله يحبها زوجها وترتاح يمو بدال ما تعيش بعذاب
ميرا.. واذا ما قبلو اهلها تروح فصلية
جنات.. هنا يكون عندهم اختيار انو ينطون فصل يكسر الظهر اقل شي 100 مليون وفوك او تصير مذبحة بين العشيرتين
لان لا ذول يسكتون عن ثارهم ولا ذول يسكتون وياما صارت نزاعات عشائرية وراح بيها ضحاية من الطرفين
بس بعض عشاير من واحد منها يكون صاحب مشاكل دائما ويقتل واحد يتبرون منو فهذا يكون دمو مهدور مسموح لاهل المقتول يقتلوه
ميرا.. هاي غابة صايرة هنا
جنات.. هاي قوانين العشاير
ميرا.. وليش الدولة ما تمنعهم
جنات.. ما تكدر لان جنوب العراق كلو قوانينو هيج مو عشيرة او عشيرتين علمود يسيطرون عليهم ويمنعوهم
والواحد يحجي الحق مرات الكعدات يصير بيهن ظلم مو دائما يحكمون بالحق لان مو معصومين عن الخطأ بس عاد اوامرهم تتنفذ
ميرا.. لو اني بمكان هاي البنية واسمع هالحجي قبل ما اروح فصلية الا اموت بمكاني يمة شلون رعب مو طبيعي
جنات.. الله يبعدناوعن هالموقف
ميرا.. آمين
جنت احجي هيج وماعرف شنو ينتظرني جنت مفكرة انو حياتي راح تستمر بهدوء او ارجع لسوريا ولدراستي وصديقاتي
اجت يمنا جنان وكملنا كلامنا عن كعدات العشاير وكالن البنات ان اكو ناس نفوسهم ضعيفة ويستغلون هالموضوع بجمع الفلوس
وبعضهم يمثلون انهم تعرضو لحادث ويزتون نفسهم كدام السيارات علمود يحصلون فلوس والي ما يدفع يسوولو مشكلة
ميرا.. صدك منين تجيبون الاجبان والگيمر
جنان.. يوميا يجينا بالسبعة تقريبا يوصل لباب البيت بس يطلع ايمن يدخلو داخل
ميرا.. ومنو يجيبلكمياه
جنان.. واحد يبيع گيمر وجبن وهاي الاشياء وجدو كالو يجي يوميا علمود ناخذ منو وصار يجي
ميرا.. اي هيج احسن يجي جديد وعلى كولتنا احنا السوريين تازة
جنان.. بالضبط
بعدها رجعت لغرفتي تمددت اريد انام وتذكرت انو مقصرة هواي بصلاتي وقرات القران من اجيت لهنا كلت ياربي سامحني على تقصيري
وثاني يوم رجعت على روتيني القديم كعدت الفجر صليت وقريت شوية قران ونمت وكعدت الصبح ساعدت البنات بالريوك
وصرت يوميا اكعد اصلي الفجر واقرا قران واكعد الصبح ابقى ويا البنات للظهر وبعد الغدا انام علمود ما ابقى دايخة
وهم عرفو انو دا انام لان اقرا قران الفجر وشجعوني على هالخطوة لان اكيد اي عائلة يسمعون ببنتهم تقرا قران يفرحون
وصرت ملتزمة بصلاة الضحى ما اعوفها مهما صار وبالنسبة لعادل فسامحتو على الي سواه وياي من اجينا لان جان لصالحي
واكثر شي عجبني بيه من مسك ايد مصطفى وكالو بنبرة حادة لا تنسى نفسك وقتها حسسني انو الي سند من بعد الله
بس بنفس الوقت من بابا ينطي قرار او يحجي علي لا هو ولا اي واحد من اخواني يكدر يحجي لان متعلمين على احترام بابا من الطفولة
مرة جنا اني والبنات بالمطبخ والولد كلهم طالعين وضوجني الشال كل شوية يوكع من راسي اخير شي عفتو على ركبتي
وكلت اذا اجو الولد ابدلو او اعدلو علمود لا يوكع بس حاليا ماكو بس البنات فما اهتميتلو وكملت شغلي ويا البنات
وقبل ما اكمل انداريت وشفت مصطفى واكف متكتف يم الباب ويباوع باستهزاء واندارت فورا ورفع الشال على راسي
مصطفى.. بعد وكت جان طالعة مشوفة شعرج للناس
ميرا.. مادري ان اكو ناس ما تعرف تطلع صوت وتبقى تراقب مثل الحرامية
مصطفى.. بعصبية .. شنو كلتي
ميرا.. الي سمعتو
مصطفى.. شو صايرة فد مرة ما تحترمين لا تخليني ادوس على راسج ترا لا ابوج ولا اخوانج يفكوج مني
ميرا.. دنكلععععع
انداريت اريد اكمل شغلي وهجم علي هو بس صارن البنات كدامو ويحاولن يدفعنو واني سحبت طاوة من المواعين
كلتلو وربي اذا تقربت اضربك بيها لو شما يصير وبهالاثناء اجن يركضن على الصوت ماما وزوجة عمي وجدتي
جدتي.. يا ستار شبيكم ولكم
مصطفى.. بصوت عالي .. قسم بالله اذا ما ربيتوها الا اسحلها كدامكم
ميرا.. شحدك علمود عادل يشحطك
سارة.. ميرا اسكتي عاد
سمير.. شبيكم شنو هالاصوات هاي
مصطفى.. اسأل بنتك الي تكول للاكبر منها انكلع
سمير.. صدك ولج حيوانة
ميرا.. الي يباوع علي واني مو لابسة شال يستاهل اكثر من هالشي
سمير.. شنو قصدج
ميرا.. جنت ويا البنات هنا بالمطبخ والشال واكع من راسي وهو اجى بدون صوت ووكف عند باب المطبخ ويباوع علي واني مادري بيه
اول ما كملت كلامي بابا فتح عيونو على وسعهن وهو مصدوم واندار على مصطفى وضربو بوكس كل قوتو حتى اني خفت من قوة الضربة
سمير.. ولك ناقص تباوع هيج على عرضك ولك عرضك هذا وما سلم منك لعد عرض العالم شراح تسوي بيه ولك ناقص
سااااااررررة انتي وبنج وولدج تتحظرون هسا دقيقة وحدة ما تبقون هنااا يلاااااا
جدي.. اهدا خلي نتفاهم وين تاخذهم تخبلت انت تريد تفضحنا بين الناس
سمير.. لعد تريدني انتظر لحد ما هالناقص هذا يهتك عرضي يلا انكلع عود جايب نسواني احافظ عليهن هنا لو تاركهن هناك اشرفلي
مصطفى.. اني مستعد اصحح خطأي واطلبها منك على سنة الله ورسوله
سمير.. تخسى تشوف ضفرها
مصطفى.. هاي كدامكم كلكم ميرا اني ناهي عليها واذا خطبها احد غيري دمها ودمو مهدور واني مو مصطفى حفيد الشيخ اسماعيل اذا بقيتهم عايشين
ميرا.. هجم عليه بابا بس وكفو بوجهو جدي وعمي وايمم ومصطفى ما بقى كمل كلامو وطلع من البيت بس بابا صار بركان من العصبية
لمتابعة باقي الرواية زوروا قناتنا على التليجرام من هنا
