رواية طفوف الفصل الخامس 5 بقلم وسام الفراجي
مابيها بعد مجال
يوسف يمشي ويباوعلي
ويزن يمشي ويباوعلي
ومحد يدري بالثاني .. وكل واحد بجهة من الشارع
صاح يزن زلمة لابس عكال ..
وكف يزن اله ..
الف رحمة ع روحك ابو العكال خلصتني من مشكلة شكبرها بس غير يتوب يوسف ويروح مايروح
تقدم يوسف واني نظرة ع يوسف ونظرة ع يزن وعايشة بين نارين ..
صار قريب عليه ويزن بعده ويا المعگل ..
شمرلي سالفة يوسف ع سريع من باب السيارة وكمل مشيته..
كلي ..
فل كذلتج السافل!؟
انخرست ايدي صارت ترجف ظليت اباوع كدام وهو كمل مشيته وبالمراية شفته راح ليغاد بعيد ..
بس شنو ظليت مرتبكة من الموقف لا شافني يزن ويقوم قيامتي يسحلني بالشارع كدام الناس ماعنده مانع ..
باوعت ليزن شايل اثنين موطة بيده وجاي من بعيد يباوعلي نظرته حادة ..
تقرب للسيارة وكلما يتقرب يزيد توتري اني
وكف ع الباب القريب عليه كلي نزلي الجامة ..
هبطت احس ضغطي صعد فول ..
نزلته مد ايده اني كبل وخرت راسي للجهة الثانية
كلي شبيج خفتي هي موطاية مو رشاشة
نطاني موطة بس ظل مركز عليه وع عيوني ..
وكال اخذي موطتي بيدج الثاني هسة اجي بس اشوف تالي المحلات شصار بيهن ..
ظلت بيدي الموطة مالته وصارت تذوب شوي شوي فصرت اسوي بيها بلساني علمود ماتموع ع ايدي وتمسخ السيارة ..
بعيد عني شي 10 امتار واكف ويا المعكل وصاروا كم واحد ويحجون وهذولي واكفين يمه ومدري شنو يشرحوله وديفهمون بي
ومندمجين الشباب وياه وهو باوع يمين يسار محد منتبه اله ونطاني نظرة حادة و #غمزلي. !
نزلت راسي واكول بداخلي اني وين وانت وين لو تدري صورنا وين واصلة هسة مدري مدري مفضوحين مدري منتشرة الصور ع منطقة كلها ..
ليش مدري ... اكيد انتشرت هو كلها بالكروب نص المنطقة داخلين بكروب الصف الاول ..
ظليت افكر شصاير هسة ..
الله يسامحك يزن ليش ماخليتني اشيل الموبايل وياي
شنو هذا الشك شنو هذا التعصب ..
اجه وصعد كلي خوما تأخرت كتله موطتك ماعت اكلها راح تمسخ السيارة ..
لزمها وباوعلها هاي انتِ ماخذة منها ؟ كتله اي ماردت تموع ع ايدي ..
ضاكها جان يكول بيها حلاوة زايدة لان ضكتيها انتِ ..
اني كيفت بداخلي صراحة اول مرة يحجي سالفة زوينة بس ماظهرتها كتله شكرا ..
كلي لا تكيفين اجذب عليج ..
كتله هااا تمام تمام ..
مشه بالسيارة ورجع ليورة حتى يرجع لبيت اهلي ينطي السيارة لأبوية ..
فر السيارة واتجه ع بيت اهلي لمح يوسف بالفرع الثاني من محلاته ..
عبالك شايف جني ..
تصركع يزن ووكف السيارة ع جانب وكلي عينج ليكدام لتدحكين ليورة افكس عيونج. ...
كتله تمام بس شنو يزن ويوسف يتلاكون يا ويلي شيصير وشيكولون عني العالم انوب شيخلصني من يزن وسوالفه راح يلفق عليه الف سالفة ..
صارت كونة (عركة) وصياح زلم وشفت ناس تركض ليغاد وبعض اهل المحلات وكفت ع باب محلاتهم يباوعون ع المشكلة وربع ساعة هيج جان اشوف يزن جاي من هناك ..
يمشي سريع .. صعد بالسيارة شغلها وبطنش ومشه بسرعة ويضرب بالستيرن مال السيارة ويكول ..
اف لوما فجيته براسه اظل طول عمري ندمان
جان يوصل قريب ع شارع بيت ابو صالح باوع عليه وكلي انزلج تشوفين الجلب مالتهم ؟ خاف متشاكة اله ..
مارديتله لان حجاها بنترة وضوجة مابيه حيل للرزايل
وصل بيتنا نزلني وكلي فوتي هسة جاي ..
طلع بسيارته هو ..
واني عبالك توة تنفست رحت قفلت الباب البرا وطبيت لغرفتي ع موبايل لزمت الموبايل فتحت التلفون
لكيت استاذ سلام المدير 12 مكالمة فائتة
استاذ حيدر 7 مكالمات فائتة ..
فتحت نت واتساب مشتعل رسائل بي +99
يارب دخيلك
فتحته من
كروب المدرسة
المدير
استاذ حيدر
ست زينب
ست جمانة
ست هالة
و #رقم_غريب !
كبل ركضت ع محادثة المدير حتى اشوف شكاتب ..
طبعا من وكت صارت الصور ودزيتهن بالغلط مو فاتحة واتساب ..
لكيت رسايله عبارة عن ..
هلا ست شصاير ؟
وينج ؟
يلا هسة اتصرف واشوف
ست الصور موجودة للاسف وضروري افتر ع بيت بيت اتفاهم وياهم ..
ستتت وينج مو معقولة هيج مشكلة سادة نت متكليلي وينج
ست طفوف ؟
؟
؟
رديتله العفو استاذ صارلي ظرف حيل جبير ومكدرت افتح فدوة احجيلي شصاير اعتذر منك جدا والله وادري سويتلك مصيبة
المدير بسرعة فتح الرسالة عبالك ينتظرني ..
كلي ..
ـ وين جنتي يا ست طفوف كل عقلج تسولفين
ـ استاذ اسفة بس والله وضعي مو هو
ـ يا ست يرحم ابوج غير تفهمينه وتشوفين شيصير
ـ استاذ بس كلي شصار
ـ ماصار شي جاي نفتر ع بيت بيت ورقم رقم في سبيل يحذفون هالصور لان اعراض عالم
ـ استاذ خوما معلمين شافوا شي
ـ ست منو ظل ماشاف بس الي كمل كمل و الي خرج خرج وستر عليج
ـ وهسة شلون استاذ ؟
ـ الشغلة شبه خلصت وفضت تبقى يم الناس وغيرتها اني الي عليه افتريت باب باب وتعرفين المنطقة كلها عرف ومعروفين وبلغتهم وكلهم كالوا تدلل وهاي بنتنا وحذفناهن اصلا ..
ـ مشكور استاذ تعبتك وياي
ـ تدللي ست ايمت تداومين ترا الاول دايحين محد ياخذهم وانت ماخذتهم ارشاد والدرس الواحد الي يروح عليهم ترا ميتعوض لازم تكملين القراءة والاحرف الله يسامحج احد يتزوج بهيج وقت
ـ ان شاء الله الأحد الجاي ابدي استاذ
ـ ست طفوف ماريد اي عذر بعد من ماتجين اغيبج واوصلها للتربية ترا
ـ ان شاء الله اجي استاذ
ـ يلا اخذي راحتج
ـ الله وياك
.. عفت محادثة المدير رحت ع محادثة المعلمات الي وياي بالمدرسة مو حافظة اسمائهن بسبب يزن بس اعرفهن من صورهن بالحساب ..
ولكيتهن يدكن ويلطمن شجاج شسويتي شكد عيب الصور احنه شفناهن استحينه شلون يشوفوهن المعلمين ..
رديتلهن شسوي يعني صارت بالغلط
وهي صور عروسين جدد اكيد يصير هالشي صور خاصة هاي بس اثنينهم يشوفوها بس شسوي سبحان الله حظي مصخم محمحم اسود مفحم لا ياخذ ولا ينطي ..
فريت ع محادثات معلمات وخلصتهن
رحت حتى اشوف الرقم الغريب
سمعت الباب انفتح وصوت واحد فات للبيت خرجت وضميت الواتساب بسرعة وشمرت التلفون وسويت نفسي اعدل بالهدوم وارتب بيهن وصدك طلع يزن جاي ووجه متربن مليان تراب وتعبان وملابسه كلها تراب ..
شبيك يزن شمسوي بيك هيج ..
تلاطشت ويا يوسف وكتلته كتله اني والولد التمينه عليه لعبت بوجهه طوبة سويته خريطة ..
كتله عاشت ايدك يزوني ..
جان يباوعلي يكلي من رجعت شفت جلب بيت صالح وتذكرتج ..
سكتت مارديت ..
كلي خوما طلعتي موبايلج. .. كتله لا مو منعتني عنه .. كلي عفية اسمعي الكلام ..
اندك الباب طلع الهم طلعوا دورية شرطة اخذوا وياهم ..
اني كلت هاي فرصتي ...
ماحرك شعرة مني من اخذوا علواه كابرينه كبرررر
فتحت الموبايل ع واتس ع سريع ..
الرقم الغريب صار عندي فضول اعرفه شنو بالمحادثة وشداز
فتت ع سريع ع محادثة والكاه كاتب ..
جنت احلم هالصور هاي وياي !
