رواية ملكة الشيخ ضاري الفصل الخامس 5 بقلم ساره المجيد
تنويه ... بعض المتابعين طلبوا مواليد الشيخ ضاري وملكة ...طبعا ضاري من مواليد 1937 وملكة من مواليد 1961
....................
ملكة ..وبيوم حسيت بألام الطلق وحان موعد ولادتي واجتي ام اسماعيل اتجيبني وجان اجيب ولد الكل كيفوا وصلوا ع النبي والفرحة بانت ع وجه ضاري من عرف حسيته طار من فرحته ....
سميته محمد بيومها ضاري ذبح عجل ع سلامتي وجيت اول ولد اله ..
ضاري ..من ولدت ملكة الولد حمدت الله الف مرة لان استجاب دعائنه ونطانه اخ للبنات هذا راح يكون سند الي ولخواته .. طبيت ع ملكة والفرحة مسايعنتي بستها من جبينها وشلت محمد جان مكمط حسيت شلت الدنيا كلها ادري عندي قبله خلفه وماعترض ع عطية ربي للبنات بس الولد اتحسون اله معزة خاصة وحرارة بالكلب بسته واذنت باذانه ورجعته لحضن امه ..
ملكة ..من بعد ماجبت محمد بلشت الدنيا تفرح بوجهي
ومرت الايام وألسنين وصار عندي ولد ثاني وره محمد سمينا احمد ...
ومن بعدها صارت النه مصيبه وكعت فوك روسنه ..
ضاري متعود من يطلع يسكي بالليل وحده والبستان جبير والماي مايوصل لكل البستان ..
اكله شغل وياك واحد ثاني يكول بستاني واني أشتغل بي ماريد غريب ..فا بيوم طلع بالليل راح يسكي البستان
ضاري ..اخذت الفاس والمسحات (الكرك)..
طلعت الدنيا ليل الكمر مالي السماء ماكو نجوم اخذت المسحات فتحت العبره مال الماي ورحت لنهاية البستان شو ماي ماكو شني السالفة شصاير ..
رجعت للعبره شفت أثنين ..اني ختلت ورا الشجره وأسمعهم يريد يسدون الماي ..
علينه ..
اخذت الكرك وضربت واحد ع راسه فشخته ..والثاني شرد
كمت اصيح علي أشرد ياكلب والله اذا شفتكم لجسر راسكم تجسير ..ولد الكلاب قنادر ..
سحبت اقسام بالمسدس ..
سحلت هذا الزلمه امبين من ولد البساتين بس شني جابهم لعند بستاني ..
وصلت لديوان صحت ع أسعد وينك
أسعد ..ها ياشيخ طلبتني
الشيخ ..تاخذ هذا الكلب تشمره بالحضيره نشوف تاليته شني ومن تخلص روح شوف العبره وافتحها خوش
أسعد ..ع امرك ياشيخ ان شاءلله
مرت أيام واجه شيخ عشيرة ال........ اسمه محمود لديوان
الشيخ محمود ..السلام عليكم
شيخ ضاري ..وعليكم السلام
الشيخ محمود ..شلونك ابو محمد
شيخ ضاري ..الحمدالله جا شني شمسكم منين طالعه واليوم انتم عندي
شيخ محمود ..والله انه جايكم لو ادري جيتي موش وكتها
شيخ ضاري ..كول وانه حاضر من دينار ألاف
شيخ محمود ..اكو صبي لازمه بستانكم انه جاي علي
شيخ ضاري ..كصدك هذا الجاهل الي عندي جا طلع من جماعتكم ههههه والله ماهكيتها منكم ياشيخ
شيخ محمود ..أشمالك ياشيخ اخذتنه حاصل فاصل جا خلي نحجي
شيخ ضاري ..كول
شيخ محمود ..الصبي جان يسكي كاعه ولاكيك ساد عنه العبره وانت أستعجلت وضربته وهاي عليها فصل ..
شيخ ضاري ..وهسه انت شرايد ياشيخ
شيخ محمود ..تبيعلي نص البستان الي بي العبره ومايكون اله خاطرك طيب وكلشي تتطلبه انه حاضر من الدينار للالف
شيخ ضاري ..تريد مني أبيع بستاني وليشش وشني ضاكت الدنيا بيه هذا البستان باجر لو عكبه يصير سند لولدي وانه ياشيخ عندي حريم اعوفهم بلا سند كوم ياشيخ محمود جيتك غاليه وعزيز بس هاي شغلتك موش يمي ..
شيخ محمود ..وانت أشمالك استعلجت ياشيخ ضاري شوف بويه الك من بستان خير جثير انه شرايد من شي بس نص كطعه ناخذ منها العبره وهاي سالفه شني بينه
شيخ ضاري ...اممممم والله ياشيخ سالفتك مادشت عكلي كوم ياشيخ جثر الله خيرك ماكصرت بجيتك ..
كام شيخ محمود وكال ...فكر بكولي ياشيخ وشور اهل بيتك ..ملكة ..طلع ورا دخلت وكلبي لازمته بيدي واهيس ..دم ماظل عندي ..كتله ..خير ضاري شرايد منك شيخ محمود
ضاري ..هممم والله ياحرمه جن الكاع والبستان لازم ابيعهن لو نصها انه لو اظل أسكي بالكيعان مالحك وماي مايوصل
ملكة ..بس هذا خير ابوك شلون تبيعه .عمي ذيب انطا الك عبنك وكفت وي كل الناس باجر لو عكبه هاي الكاع تصير سند لجهالك وبناتك ..
ضاري ..جا انه شني الي لاوي ايدي غير هاي الحرمات محمد واحمد زلم يدبرون نفسهم بس بناتي كاسرات ظهري اووووووف
ملكة ..ضاري انه مافهم بسالفة العشاير وهاي الكول بس حك بناتي بركبتك يضاري اذا بعت الكاع ونص البستان جن ماكل حكهن ..واخوانك هم الهم حصه بالبستان الجبير مالت عمتي العلويه
ضاري ..كلامج صحيح بس شلون ياحرمه شلون وهاي انتي شايفه الماي مايوصل لكل البستان ..
ملكة ..ظلت يمك وهاي انه كتلك ..
كمت وعفته ادري هسه يفرها برأسه ويلكالها حل دخلت للصاله شفت جنان تقراء واسمهان يمها ونيران ومحمد يلعبون واحمد نايم جا هبه وأيمان وين..
كتلها جنان يمه وين اخياتج هبه وأيمان
جنان ..راحن يم أنتصار بت عمي فضل يلعبن وياها ونوال هم بت عمي ضرار تعلب وياهم .
اسمهان ..يمه شوفي كمت اعرف اكتب أسم ابوي
ملكة ..اي عفيه يمه ..راح البس عباتي واشوف اخياتجن واجي واذا ابوجن سأل عني كولن راحت بشغله ..
جنان صف سادس واسمهان خامس ونيران صف رابع ومحمد هستوه ثاني واحمد لسه ماسجلته ...رحت لبيت حماي فضل يفصل بينه بس بستان واحد ..
دخلت شفت انتصار وهبه ايمان يلعبن ..
ملكة ..شلونج خيه
خديجة ..يا هلا ميت هلا شلونج خية
ملكة ...انه موش زينه والله اجت سالفه مدري وين جانت مضمومه النه
خديجة ..خير خير شكو شصاير ..
ملكة ..سولفت كلشي الها وهيه لطمت ع صدرها وكالت ..
خديجة ..شلون مصيبه وكعت ع رأسنا جا مالكه غير بستان الجبير يبيعه جا هذا ورث عمتي لعيالها ..
ملكة ..وهسه ضاري مادري شراح يسوي خايفه يبيع الكاع وتصير مصيبه وانه ماريد هيج يصير ..
خديجة ..لا تخافين ولا تخلين ابالج انه اليوم اكول لفضل يحجي ويا وانت تعرفين ضاري يفضل فضل عبن عنده خبره بهيج مواضيع وكصص ..
ملكة ..جا شرايد أنه غير بس ناس تفك شرها عنه
خديجة ..وانتي الصادكه ناس ماتفك شرها منه من تشوفنه تحت التراب ..
ملكة ..اي وعلي ..اكلج ذاك ولد ياهو ..
خديجة ..ههههه عبنج عميه ماتعرفي هذا حيدر ابني جا غير كبر وصار بالاعداديه .ملكة ..صصصدك جا من فلك طرني اذا هيج ماعرفته بس شو كصير موش طويل ع اهله خاف ..وانتي هم كصيره طالع عليج 😂
خديجة ..جا من طولج هسه انتي ع كولت عدنان ..عمتي ملكة جنهه قلم رصاص مقطوط هههههههه
ملكة ..ههههههه خاب أسكتييي
خديجة ..اكلج ملكة لو وكت موش وكتهه بس انه طالبه طلب صغيرون.
ملكة ..كولي أمري اخيتي انتي ..
خديجة ..مشكوره شوفي خيه انه شفت بتج جنان ماشاءلله عنهه أيه من الجمال رايدتها لابني حيدر وهو ابن عمهه موش غريب شتكولين
ملكة ..انه ماكدر اشورج برأيي بس تنحل هاي السالفه اشور ضاري ونشوف شني يكول
خديجة ..مشكوره بعد جبدي .هسه اكوم اكمل الخبز
ملكة ..ماشي اني اروح اخذ البنيات وراهن دراسه
خديجة ..جا خوش ..
ملكة ..هبببببه أيمان يلا يمه اتاخرنه ع أبوجن
هبه ..جايه يمه
ملكة ..اخذت هبه وايمان ورجعت للبيت لكيت ضاري مخلي محمد ويدرس بي دخلنه طبعا ضاري شكد عصبي ومرات يطلع عصبيته بيهم بس ماشفته يوم رفع ايده ع جاهل هذا حلو البي ابد ميستعمل العنف والضرب بتربية جهاله ..
دخلت للمطبخ عزلت ورتبت وكفت اطبخ دخلت جنان تذكرت كلام خديجة عنهه صدك جنان جنهه اني من جنت صغيره هم هيج حلوه ..وعودها ريان
خايفه ابوها يوافق ينطيها وهي بعدها صغيرة ياربي ماريد تنعاد قصتي ابناتي اريدهن يكملن دراستهن ويوصلن ..اريدهن يكملن الي ماكدرت اني اكملة واوصله شني زواج وخرابيط غدي خليها تكمل وتاخذ شهادتها اي احسن
راح أسكتت وماكول لضاري واسد سالفه بيني وبين خديجة وانهي الموضوع احسن شي ..
:':
..تالي اجه فضل وتعلل عدنا حجه وي ضاري علمود هذا الموضوع بس انه كلبي لعب من هذا الموضوع حيييل وصار مثل ماتوقعت ضاري اقتنع يبيع الكاع ويخلي بس البستان ..
كتله ..ضاري شني تالي راح تبيع الكاع ..((جانت وكتها بسنة 1990))
ضاري ..اي احسن حل يامره جا شلون انظل نتكاتل ..وي الوادم
ملكة ..ضاري جا شلون هسه
جنت واكفه وهو كاعد سحبني وكعدني بحضنه وكالي ..
ضاري ..اشبيج ولج ملوووووك باجر انه اخذ بدل الكاع فلوس واخذهم ونطلع انحج انه وانتي هم شني رأيج ..
ملكة ..جا شلون اطلع انه توني حبله
ضاري ..يا ولج شنو انتي حبله 😳
ملكة ..اي والله جا انه كل سنه حبله من وراك ماتكعد راحة 😒
ضاري 😂..جا غير انتي ارنب
ملكة .. اي شسويلك الي تصير تحت ذمتك اتصير ارنب وبزونه هم غير انت مفعولك قوي 😂
..باوعت علي وكتله شني يعني انت ماتريد جاهل🤔
ضاري ..ههههههه حضنتها وكمت ابوس بيها كتلها انه لو عليه كل يوم احبلج جا الجاهل نعمه من الله علينه ..بس شكلتي هسه
ملكة ..والله مادري انت شني تريد اتسوي بس شني تضمن حك بناتي
ضاري ..لا تخافين يابت الناس حك بناتج مضمون .ان شاءلله
ملكة ..اخذني لحضنه اشكد احبه ياربي وشكد احب حنيته عليه وع جهالي بقه يضحكني ويشاقيني حتى اقبل ع بيعة الكاع وتالي اتقشمرت بحضنه وبوسة مالت علي ..وتالي سوه مثل ماراد باع الكاع وحصل منها فلوس وطلع حج ضاري وحده عبن جنت حامل جديد ماكدرت اروح ويا ..
وموضوع جنان وحيدر كله سديته ولا جن فتحته مرت أيام ورجع ضاري من الحج وسوينه وليمه بين الاهل بس حالنه كله تغير بعد بيعت الكاع ومرت الايام و ولدت ابني ال3 سمينا محمود الحمدلله صار عدنه 3 ولد و5 بنوات خير من الله ومرت الايام والاشهر ....وراها صارت الدنيا اتخوف وصارت حرب91..
وصارت حرب الخليج والدنيا انكلبت علينه وضاري راح وي الجنود للكويت وظليت انه حايره ببناتي ولدي ..جان محمود عمره سنه بحضني والباقين اكبار مادري الدنيا افترت بيه واخوي حازم وكع اتصوب وصار مشلول وفرقد اجه شارد من الحرب ..
ابوي وكع مايدري ..الدنيا اسودت بعينه خواتي كلها تزوجن وطلعت ...كلها دريت عنها اخبار اله ضاري ولا جن راح ياهو أسئله عنه كال ماشفته ...
واني بقيت مكلوب حالي واناشغ الليل بطوله وين صار الزلمة ياربي دخيلك شنو هل مصايب الي دتوكع ع راسنه ولا ارتاحينه بحياتنه ..بقيت مثل الطير المذبوح افرفح ع ضاري اريد احد ينشدلي عنه ماكو
وبيوم بالليل جنت كاعده فجريه اسبح وادعي يرجع ضاري ..
جنان يمي هم وياي تدعي جنت اقراء الدعاء ع ضوه الاله ..(مثل فانوس)..صارت الدكه قويه وصوت المطر يخوف جلبت برداني جنان ..وهي تبجي تكول ..
جنان ..يييييمه منو بالباب يدك هسه
ملكة ..لزمني كلبي كمت ارجف مدري شلون اتقويت واخذت التفكه مالت ضاري وصار الباب يندك اقوه كام محمد وهو يصيح
محمد ..ياهو ياهو جاي
ملكة ..لزمته من ياخته وكتله ولك مسودن تتطافر تعال وين اوكف
محمد ..شبيييج يمه جا غير افتح الباب
ملكة ..سمعت صوت فرقد اخوي وهو صيح مللللكة ملللللكة ولج خييتي افتحي الباب
ركضت فتحت الباب طب وجهه اصفر من الخوف
فرقد ..اشمالج جا غير انه فرقد اخوج رافعه التفكه بوجههي نزليها ..
ملكة ..دش دش ياخوي وبعدين اكلك ..
طب فرقد راحت جنان جابلته ماي واجه كعد وكتله شبيك خويه جا شارد من منو
فرقد ..جا مادريتي الكويت سقطت !!
ملكة ..يايايا عززززة العزاني وانت مو جنت وياهم
فرقد ..انه أجيت شارد منهم وهسه همه يدورن علي وع رجلج ضاري
ملكة ..شششششني شدتكول ياخوي ضاري شكو ليش يدورون علي
فرقد ..اي والله هاج هاي رساله منه وكال خلي تقراها ومحمد كاعد ...
..رسأله صحيح..100%....
الشيخ ضاري ذيب شيخ عشيره ال....
السلام عليكم ...لزوجتي وام اطفالي ملكة ام محمد اوصيك ثلاث وصايه اولها ..ان تخافي الله باطفالي ..
ثانيا ..كوني رجل البيت بعدي اهتمي بيهم جميعآ كوني ام وأب بحال لم اعود ارجو منكي ان تسامحيني وتغفري لي كم مره قد رفعت صوتي عليكي كم مره اتهمتك بأفعال لم تقومي بها انت طفله لكن اصبحتي أمراه وكنت ومازلتي طفله في نظري ..
لولدي محمد انت كبير العائله وانت الشيخ الي بعدي اوصيك بأمك ثم أمك ثم أمك ثم خواتك ... خواتك بنات في مجتمع لا يرحم كون رجل البيت وأساسه احفظ وصيتي الك واهتم بامك واخواتك واخوانك انت الكبير لا تخيب ظني بك ..
زوجتي الغالية كل مأملك لكي ولأطفالي ليوم الي يكبرون ... هناك سر قد لا تعرفي عني في الخزانه هناك صره بها ذهب ونقود تعينك وتعين أطفالي ..كوني زوجة الشيخ ضاري التي تعودت ان ارها انثى امامي وزلمة ورائي ....
مع خالص حبي لكي ..
الشيخ ضاري ......
..............
ملكة ..من اقراءت الرساله حسيت الدنيا انهدت كدام عيني مثل ضربة وفلشت راسي شنو معناتها هل رسالة يعني ضاري راح من ايدي ها فهموني يعني خسرت شيخي وحبيبي ..
ولكم يبووووووو كمت ادك والطم وعيوني نزلت بجيت بقهر وحركة وكعدت بالكاع انوحن وفرقد لازمني يحاول يهديني بس ماكدر وكعت من طولي واغمى عليه ..صرت جثه بعد ضاري ماكمت أوزن شي من شي الدنيا كلها صارت سوده بعيني ....
وللحكاية بقية ..
#عطاشه حلوك شماتي بعد #حيل
#بعدني ماطحت صاحو بعد #حيل
#انه محتاج وي حيلي بعد #حيل
#انكسر ظهري بسبب بعدك #عليه
شتتوقعون ضاري يصير عليه شي بعد رسالة الوصية 🤔🤔
