رواية بين الحب والأسر الفصل الخامس 5 بقلم أمل مهدي

 

رواية بين الحب والأسر الفصل الخامس 5 بقلم أمل مهدي

..يا مَن سألتَ نجوم الليل أجمعها

         سكن الفؤاد هموما طالت لياليها

هذي الذوائبُ شابتْ قبل موعدها 

        وبنار الجوى حر الصــبابه يكويها

وتهتز اغصان قلبي إليك شـــــوقًا 

        وتشـــــتاقك الــــــروح وأنت فيها

................

وسام.....

كانت عندي شقه بالاعظميه نسهر بيه اني وشله مالتي 

بس من بعد ماالتقيت ابسراب

صارت هيه كل اصحابي ...

ظلت الشقه مقفوله .....

وسام......الو سراب

.......هلو حبيبي اشلونك

......سراب مشتاقلج اريد نطلع

......خليه الجمعه

......واصبر بعد يومين؟

.....لعد شسوي .....

.....باجر اني كاعد اخذي اجازه

.........اشوف

......متشوفين باجر من الصبح اني اباب الدائره

سراب.....وسام غير عندي مدير واشوفه يوافق لو لا

وسام.... سراب مخنوك حتى لو تغيبين

سراب.... انشالله منا الأجر احاول  

طلعتلي عذر واخذت اجازه وطلعت لكيته صدك واكف يم سيارته

هلو وسام

.....هلو يا عيون وسام

......هاي شنوصدك مشتاق 

.....اني مشتاق وتعبان اريدج يمي

انت بس التنسيني تعبي

.....شبيك احجيلي

.......باوع عليه وكلي مو هسه

وكف يم عماره.....كتله شنو ليش وكفت

....لا اسالين 

وثقي بيه

لان اني اخاف عليج من هذا الهوى فمستحيل اسوي شي ااذيج بي

نزلنه من السياره 

ودخله العماره صعدنه طابق ثاني 

طلع من جيبه وسام مفتاح وفتح الباب

التفتلي مبتسم واشر بايده ادخل.... دخلت ووكفت اباوع

شقه زغيره ومؤثثه انيقه

اول ما دخل علك المفتاح بالحايط

واجه عليه حضني بقوه

ظليت اشويه متفاجاه

بعدين حاولت افك روحي منه ماكدرت

وسام......ما يجاوبني بس حسيت نفسه ابركبتي حار ونشغه

ظليت ساكته هادئه. اشويه

سراب .....شبيك وسام صاير شي

وسام.......رفع راسه يباوعلي ابحزن وعيونه مدمعه

خايف تروحين مني

.......شنو هذا الحجي 

.........مااكدر اتخيل حياتي من غيرج احضنيني ورجع حضني بقوه

كانه يريد يضمني ابداخله

حضنته

لزم وجهي وبوس عيوني وخدودي

ونزل الركبتي يشتم بيه

.....تدرين سراب من تبتعدين عني

احس روحي اختنك وكل شي بيه يوكف حتى تفكيري 

اني ما اتحمل البعد عنج اموت 

.....اسم الله عليك من الموت انت

دتفكر هوايه بحجي استاذ خالد صح؟

........هو غير لو يطلع من راسي قندره

مدا اكدر انام بكل لحظه افكر ياخذج مني

.....لا انت رايح بعيد ما اله اي داعي قلقك جان ....ما نقلني

.....اوعديني مهما صار ما تركيني

......وعد انت حبيبي وكل عمري محد يكدر ياخذني منك بس الموت

سحبني من ايدي وشغلي اغنية سيرة الحب لام كلثوم

وتمدد وفتح ايده ونيمني على ايده

وظلينه نسمع هادئين اكثر من ساعه

صدك ارتاحيت وحتى نعست

اتحركت كان يفز اثاري نايم كان

وسام نمت

اشويه ....تدرين صار يومين منايم

هاي الشويه النمته على ريحتج شكد ريحتني

كعد...باوع للساعه كال رايح اجيب اكل.. 

طلع وسد ورى الباب

فتريت بالشقه مؤثثه من كلشي

مرتبه وشويه متربه مبينه صار فتره محد كاعد بيه

شفت كيتار معلكه على الحايط ومسجل ستريو ضخم

اجه وسام وجايب كباب ولبن 

حطيت الاكل على الطبله وكعدنه على القنفه نوبه يوكلني نوبه اوكله

سراب اتصلت على اهلج من الارضي مال المطعم وكتلهم لا يضل بالكم

راح نطلع اني وسراب

ماشي 

اليوم لليل ما اهدج

اخ لو بس الموافقه تطلع اعقد محكمه جان من باجر اجيبج يمي

...اللحك حبيبي 

ظلينه بالشقه للمغرب بعدين طلعنه

لابو نؤاس اتمشينه وتعشينه ورجعني للبيت

من بعد شهر صار الي توقعنا وبلغو وسام بنقله الى الجبهه على حدود محافظة ميسان

جن اجنونه عزيز وخابر اللواء وعاتبه

لعد المن كل شهر انطي هلكد فلوس

وقنعه اللواء حتى هوه ما يعرف النقل من اي جهه كان

افتخار ......

دكت ولطمت اشلون انقل

وتلوم ابعزيز

انت السبب ما انطيت.... وما سويت

وعزيز وضعه اتعس بعدحاير المن يروح

كل اليعرفهم كالوله خلي يلتحق وهناك ينسق

وسام حاس مقدم خالد وره الموضوع ....بس شنو يكدر يسوي

مرن ٣ ايام اطلع من الدوام اروح للشقه اني اشوفه واني ما بطل بجي وما ادري هو يواسيني لو اني اواسي

باليوم الثالث لازم يلتحق للوحده 

وحضر جنتطه وودع امه واخوانه واني مر بيه 

وكف انطاني مفتاح الشقه

وودعني وصعد ويه ابو وراحو

حياتي ناقصه احجي امشي احس ضايع مني شي 

اتعودت على وسام وكلامه وحبه

اتصلت بعمو عزيز كال وصلته خلفيات ورجعوني هو راح ولهسه ماكو خبر

مرت خمس ايام افكر اشلون حاله واذكر لقاءنه بالشقه وشگال

نص الليل كعدنه على صوت رائد يصيح من الالم 

بسرعه ابويه وامي اخذو وطلعو للطوارئ مال مستشفى

طلعت الكله توجعه ضربو ابره مسكن

وكالو تعال اصبح نسويلك اشعه وتحاليل

اصبح رائد شاف نفسه زين راح للمدرسه ونسه الوجع

قاسم......

بابا غيب خلاخذك اسويلك اشعه

رائد .....يابه ميحتاج مشوفني زين

شيماء هيه وبراهيم اسعد ما يكون

ومن اول شهر حست ابروحه حامل

ام مهدي الدنيا ما شايلته من الفرح

راح يجيه حفيد

كاعده بالشعبه مالتي واباوع على التليفون اشوكت تتصل وتريح كلبي

اريج......سراب اشبيج هلايام مو على بعضج

سراب......تعبانه وسام انقل للجبهه

اريج........لا صدك هاي شوكت

.....صارفتره واخويه رائد مريض

وفكري يمهم

......الله يكون ابعونج

اليوم هم بالمدرسه متخربط رائد ويصيح من الوجع ابصفحته والمدير

امخابر الاسعاف واخذو المدينة الطب لمن بلغو ابويه راح ورى

ما قبل الطبيب يطلعه 

وكال يومين نسويله تحاليل واشعه

ونشوف اشبي

وابويه اخذ اجازه وكابله وامي. هم

والنتيجه. طلعت الكله بيه حصو 

يحتك بجدرانه ويجرحه

ولابد من عمليه

ابويه عنده رائد الهوه اليشتمه

ما يتحمل ايصير بي شي

رفض العمليه وتعارك ويه الطبيب

واخذه وطلع

وظل بالبيت ياخذله مسكنات

وضع البلد تعبان الحرب طولت 

صحيح اكو استقرار اقتصادي بس هوايه شهداء واسرى المستشفيات

ممليه جرحى

واليتخلف عن العسكريه اعدام

وغير هذاالمامسحوبه مواليدهم هم تاخذهم الفرق الحزبيه وشكل منهم جيش شعبي ينظاف الى الجبهات

يعني حرب محد يخلص منه

واليحجي الكل يعرف مصيره وين

صحيح ابويه جبير بس جيش شعبي ياخذو وهو يحاول يتهرب يحجة مرض رائد

الان احنه عام ١٩٨٦ شكد الحياة حلوه لو مو الحرب المنغصه سعادتنه

ابو عزام اليوم ابغداد اجه محمل من بساتينهم لاخته ام مهدي وطبعا 

ما ينسانه

يباوع الشيماء من تروح للدوام

يكول اشحلاته والله لخلي بنواتنه كلهن يدرسن

ماكو بنت اتبطل منا وغات

صلاح ديبني ابستانهم بتكريت يم اخوانه 

وناوي ينقل ويشيل ومحتاره ام مهدي اشلون اتفاركه

ابو عزام يكول تعالي ابنيلج بيت هناك وكعدي بنص اخوانج

وهيه تكله الله كريم

سراب.....

هذا الاسبوع الثاني ووسام ما كو خبر منه...

وبين قلقي وخوفي ملتهيه

يوميه ويه رائد يصيح من الكله مالته 

وابويه كام ما يطلع من البيت بس دوام ويرجع لان ياخذو جيش شعبي

اضطرينه اني وامي ناخذه عياده

بالحارثيه طبيب اختصاص 

وكتبنه على اشعه 

ومن شافه اتعجب ونزل علينه رزاله اشلوم عايفي 

لان احتمال الكله مضرره وتالفه

وكتبنه دخول فورا للمستشفى

لان حالته ما بيه مجال

وما كان امام ابويه غير يوافق

دخل رائد مستشفى النعمان بالاعظميه وبدو يسولله تحاليل كامله واشعه تحت اشراف الطبيب الراجعنا

رافد الصبح ويا 

والعصر ابويه يرجع من الدوام يروحله يبات يمه

خابرنه بليل رافد كال اليوم ابويه ما اجاني ليش

اميره.......عزه بعيني وين راح قاسم الحكيلي سراب ابوج ماكو

سراب.......شكو رافد

رافد......ابويه ما اجاني هو يمكم

سراب .....اصلا هو يطلع گبل عليك

رافد.......ما اجاني والطبيب بلغنه باجر عملية رائد

سراب.......التمن كلهن عليه وبس اني وامي ..المن اروح وين نسال عن ابويه

امي لبست عباته وركضت لام مهدي

دكت الباب ....طلعله 

مهدي.....تفضلي خاله ام رائد

ام رائد......فدوه ام مهدي الحكيلي

وين ابراهيم

ام مهدي ........احجي يعيني خذيتي كلبي

......ابورائد على اساس يروح للمستشفى من الظهر ولهسه ما مبين

ورائد باجر عمليته

ورافد ازغير ما يدبر 

واني محتار ه ما عندي غير سراب

شيماء كامت تبجي

ام مهدي.....على كيفج يعيني البنيه حامل 

وخوفتيه هسه مهدي يروح يمه

وابو رائد قابل ازغير يصير الصبح ونشوف

وراح مهدي يم رافد

لان ابراهيم ملتحق وصلاح ابتكريت

ما صدكنه يجي الصبح وطلعنه للمستشفى وصلت امي ورحت

اخذت اجازه ورجعت

لكيته امدخلي عمليات وامي كاعده بالكاع وفاتحه صدره واديهه ودموعه عشره عشره

اخذته غسلتله وكعدته بالغرفه

سراب .....يمه فدوه ابويه من البارحه ماكو ما عدي غيرج

لا تخليني اشيل همج فوك الهموم البيه

اصبري قوي كلبج

اميره.......ولج سراب اخوج بالعمليه

مدري يموت

شسوي

....انشالله يكوم بالسلامه ادعيله

ثلاث ساعات اعصابنه انتهت يالله طلعو رائد

دخلو بالردهه كان بعده بالبنج

ظل مهدي ويانه ما قبل يعوفنه 

للعصر رائد فتح اعيونه 

اجه اطبيب وطمنه صحته زينه بس الكله تالفه ورفعهه بعد متفيد

وهاي كانت صدمه النه كلنه.... فقد كليته بسبب خوف ابويه عليه ظل 

يرفض العمليه الى ان تلفت

الحمد لله على كل حال

امي كالت روحي ويه مهدي للبيت اخوانج وحدهم وباجر تعاي

وهيه ورافد يم رائد ظلو

وصلني مهدي وفات على بيتهم

دخلت البيتنه تلكوني عقيل وشهد

كالو اجانه ابوقحطان الحزبي هذا واحد ابمنطقتنه 

كالنه ابوكم راح جيش شعبي وسيارته تعالو اخذوهه من المنظمه

رجعت على بيت ام مهدي.

تلكاني ابراهيم نازل من الواجب 

قبل اشويه

ابراهيم......خير سراب

........ابو قحطان جاي اليوم ويكول ابويه ما خذي للجيش الشعبي ويكول السياره عدهم بالمنظمه

.......يله اني اجيبه 

.......جايه وياك

.......لا يابه وين تجين عقيل كافي

راحو للمنظمه وستلمو السياره

ما حجو اي شي لان ابراهيم بهدومه العسكريه راح

وعرف على ياقاطع اموديهم لان 

الكبار ما يودوهم الجبهات الحرب

كالونه شهر ويجيكم

رائد اتحسنت صحته وطلع للبيت

والفضل لله وللطبيب الوصى عليه بالاكل 

من بعد ١٠ ايام ركض ويه رائد رجعت الدوامي

صرت اني ابمكان ابويه اسوك واصرف واجيب دوه. الرائد

كاعده على مكتبي اشتغل 

ودك تلفون الشعبه....

.ردت اريج

....الو نعم....منو حضرتك

اني رفعت راسي اباوعله

.......التفتت اليه وبتسمت سراب خطيبج

كمت بلهفه....

.........الو وسام؟

.......اني ياروح وسام وعيونه

......خنكتني العبره...وين انت

........اني زين لا تخافين

.......اباوع اريج وعلي ويايه بالغرفه 

مااكدر احجي

اشوكت تنزل

.......بعدخمسة ايام اجازتي اشتاقيتلج

وشتاقيت المكانه يقصد الشقه

....واني هم انتظرك دير بالك على نفسك

.....الله موجود يا روحي 

سديته منه واني اخيراارتاحيت

ليالي ما نمته واني افكر

اليوم اكدر اكول اطمأنيت

باقي بس ابويه خطيه حتى ما يدري رائد سويناله عمليه

وسام.....

وصلنه مكانات ما شايفيه ولا نعرفه اني وابويه وكل اشويه ابويه يسب

ويغلط ويرجع يهده او يوصي بيه

طرق مابيه سياره مدنيه كلهه عسكريه 

الى ان وقفونه سالونه وين رايحين گلتلهم باسم وحدتي 

كالو خلص منا وترجع حجي ابنك يكمل

لاول مره احس بخوف...لان راح اكون وحدي ...ولاول مره اشوف الخوف بعيون ابويه ....وهو يباوعلي

يمكن لان عشنه مرتاحين وكلشي مهيأ انه بفلوسنه

اما هنا حتى افلوسنه متفيدنه

الضابط.....اشبيك حجي خايف على ابنك الله وكيلك بس اتعوفه ينكلب

اسد هذا قانون الحياة هههه

عزيز.......لا ابني رجال اني مربي

ما ينخاف عليه

وبتسم ابوحجهي حسيته ديشجعني

اتوادعنه اني وابويه

واخذت الجنطه مالتي وصعدت بالسياره الجبيره الكشف

كان ياهو اليريد يلتحق بالاماميات

يصعد بيه

مشت بينه السياره نص ساعه ووكفت صعدو بعد جنود ومشت

تقريب الساعه ووكفت كالو هاي الوحده.........نزلت اني واثنين كانو

مجازين وراجعين

دكيناهه مشي ربع ساعه ووصلنه المكان بي سواتر ونقاط حراسه وكرفانات وكم دبابه منتشره بعيد وهوايه جنود بحدود ال٢٠٠

اني وصلت سالت على الآمر

كالو رائد حسن هاي غرفته

طبيت علي اخذت تحيه وقدمت نفسي

اني المقاتل 

//جندي اول وسام عزيزابراهيم//

جان كاعد على السرير مالته

كال انت وسام اهلا وسهلا جنت انتظرك

اني استغربت من كلامه

كال وين كتابك

اتقدمت سلمته اله ظل صافن ابوجهي

امبين عليك ابن خير ودلال لك

ابني شمسوي

اني غرغرت الدمعه بعيني وختنكت

كتله سيدي كلشي ما مسوي

هو من شافني استهظمت

كال روح اكل ورتاح وباجر تعال

باشر

.....حاضر سيدي..

طلعت ادور على مكان ارتاح بي

دلوني الولد على الكرفان بي اسره

لكيت واحد فارغ خليت الجنطه مالتي وكعدت بدلت ملابسي

ورحت للمطبخ انطوني اكل تعشيت

ورجعت المكاني

اتمددت شكد جنت تعبان تعبت ازيد

بدت معانات الحنين تقتلع كلبي من مكانه 

الوب واتكلب لو تسألون من اشد الما

على الانسان

بدون ادنى شك

فراق المحب

احس طفل ما يكدر ينام بدون امه

اي اني ما اكدر ارتاح بدون ما اشمه

اني العمري ما بجيت حتى ما مجرب انضرب من ابويه او امي وابجي

هسه نزلن ادموعي 

وبجيت الم بروحي 

يصرخ ...يريده

ظليت مقرفص محتار بوجع روحي

ساعتين اكثر

وبده الرمي متعرف منين نيران قريبه وبعيده

راجمات على هاونات على مدافع

طلعت بره الكرفان اباوع السماء حمره من شدة القصف والدنيه ظلمه اشلون واحد يعرف الثاني ما ادري

ودخلن سيارتين مال جيش بيه جرحى ونخبصو وصارت هوسه

نزلوهم وبدو الاطباء يسعفوهم

والصياح

شي ما شايفه بس بالافلام الحربيه

ما اعرف ليش ما خفت

اكو بيهم ميتين يلفوهم بالعلم

ويصعدوه ابسيارات ثانيه

نسيت الوقت وعيني رغم التعب

مدتنام

رجعت لفراشي لكيت بعض الجنود

واحدهم رايح ابسابع نومه

واني اتوسل عيوني تغمض

ظليت اتكلب للفجر غفيت...

بعز نومتي..... فززني صوت

انت وسام......

كوم يمعود الآمر يريدك

فتحت عيني الشمس عاليه

بسرعه لبست هدومي العسكريه

ورحتله

دكيت الباب.....تفضل

دخلت اخذت تحيه 

صباح الخير سيدي

......صباح النور شنو القصه 

بشرفك اكو جندي يكعد هسه

........لا سيدي واعذرني البارحه منمت

.......يله سماح اتروح للمطبخ اجيبلي

الريوك مالتي والك هم وتجي عندي

حجي وياك

......صار سيدي

رحت للمطبخ لكيت محضرين الريوك مالته اني اخذتلي صمونه وكلاص جاي ورجعت 

.....سيدي اتفضل..

......تعال اكعد اريد اسمعك تدري انت منقول ابتوصيه

احجيلي بابا شمسوي ليش هيج امعاقبيك

.......تعامله معي بانسانيه خلاني حجيتله من اول مره شفت سراب بيه

الى يوم وصولي اهنا

.......تعجب ....چا اشكد دوني هذا الضابط ويدك

بيك وينقلك

بله هاي اخلاق ضباط

المهم 

اني راح اخليك بالمطبخ وانت مسؤل عن اكلي 

وكت ما يصير علينه تعرض انت جاهز اسلاحك وياك تره حتى اني اشيل اسلاح واطلع

....نعم سيدي

مرت ايام واني بين المطبخ وغرفة الآمر تعرفت على جنود هم مثلي

بنهار صافيه وبليل تنكلب جبهه

والجرحه والشهداء اجر افتر بيناتهم واباوع

لمن تعلمت ...كمت احط راسي على المخده افكر اشويه بسراب وانام

شبه اتعودت صالي بحدود ٢٠ يوم 

كتلني الشوك سالت اكو تلفون

كالو بس عند الآمر

رحت يمه ومستحي اطلب

.........اشبيك وسام رايد شي

........سيدي محتاج اخابر اهلي

..........هههه اهلك لو الحبيبه

خابر اني طالع للحمام

دكيت رقم الشعبه مالت سراب 

هيه انطتنيا....

الو....واجاني صوته لو العافيه كله

اجتني حجيت اشويه وياهه ادري 

وياهه موظفين متكدر تحجي براحه ويايه 

سديته منه

ودكيت على اهلي على البيت وسلمت على ابويه وامي الكسرت كلبي ابجيه وسلمت على حسام وسامر

طمنتهم عليه

رجع رائد حسن

.......وسام اشوكت اجازتك

..........سيدي بعد خمسة ايام

...........لا راح انزلك وياي بعد ثلاثة ايام

ضحكت...تسلم سيدي الله يخليك

نمت ذاك اليوم مرتاح

خلصت الثلاث ايام ونزلت ويه الرائد

هو من اهل الحله

تفاركنه بالكراج. مل العماره

صعدت البغداد ....السياره تمشي واكثره جنود كلهم نامو الا اني

التفكير ما خذني اشلون راح اشوفني سراب

آخ يا كلبي شكد مشتاك

وصلت الكراج النهضه دخلت الحمامات رتبت روحي ومشطت 

واخذت تكسي للدائره مالته

كعدت بالاستعلامات انتظره يصيحوهه كانت بالطبق الرابع

اول ما تلاكت عيونه

......ضحكت معقوله

وسام .....كمت وكفت هوايه ناس داير مدايري يعني شركه جبيره

وكفت مصبر روحي ما احضنهه وادخله بكلبي

......هلو حبيبي شنو هاي المفاجأه

بعد يومين الموعدعلى اساس

......اقترب مني يهمس وايده بجيوبه

المفتاح عندج

......شنو يامفتاح......ها ضحكت ليش

.....كوه مصبر روحي تره

.........اي فهمت

رجعت ...بلغت علي لان هو مسؤل

الشعبه واخذت الجنطه مالتي وطلعت

تفقدت المفتاح موجود

طلعنه اجر تكسي للاعظميه

كال اصعدي اجيب غده واجي

دخلت الشقه نظيفه ومرتبه قبل اسبوع اجيت ونظفته

دك الباب وسام....متاخرت فتحت على طول

دخل وسام عيونه بس معلكه بيه

حضني بلهفه وكلبه ينبض بسرعه عبالك واحد فحطان

بعدني اشويه ...ظل امركز ابملامحي

دمعت عينه

ورجع حضني

فقد

لهفته واشتياقه

نظراته ودكات كلبه 

كلهن حجن وسام اشكد يحبني وشكد مشتاقلي

ظل يبوس ابوجهي وركبتي بقوه

.......وسام كافي دتأذيني

كافي ....كافي....راح يوكف كلبك

اشبيك عبالك واحد ديركض

دفعته اشويه

لكيته مغمض عيونه

بوسته من عيونه

بعد راسه عني ....كال

بوست العيون افراك يكولون

هههههه ليش انت مو ذاك اليوم بوستني بعيوني

جنت ما ادري بست امي من عيونه وما قبلت

.....لعد

بعد خلص انعوف العيون

باوعلي ابمكر لعد وين ابوسج

اشرتله على خدي

ضحك وهو بعده قافلني بايده

انت..... اختاري شي يوازي عيونج المدوخاتني

دفعته ...كتله انت متغير

صاير اتخوف

ضحك.....

وتمشه للستريو وشغل اغنية ام كلثوم جان كلش يحب اغانيه

وكعد على القنفه

طلع جكاره يدخن....وكال

يله ناكل مجوعانه....

فرشت الاكل على الطبله...

اكلنه وسولفنه كاعده ابصفه وكل اشويه.....يعضني مره من زندي مره من ايدي 

واني اضحك....لا....حالتك اتخوف

وسام اجازته خمسة ايام

المغرب رجعني لاهلي واخذ تكسي للكاظميه لاهله

افتخار.......فتحي الباب ام هادي

خادمه تشتغل بالبيت

....اي عيني....وسام يا صلوات

افتخار .....منو وسام ماما حبيبي

ونزلت ادموعه يابعد كلب امك

........يوم اني زين ليش تبجين

.......موتتني وسام كل يوم بعيد عني ابسنه ماما

.......بوسته من راسه بست ايده

حبيبتي امي لا تفكرين بيه والله زين

.......شفت اصاربينه وبيك من يوم خطبت هاي الاسمه سراب الفكر والنحس لفانه

حتى انته فكرتك...

وسام .....جنت حاضنه وبوس بيه

رخت ايدي وعكدت حواجبي ضايج

يمه تعبان لا تفتحين مواضيع تافهه

افتخار ......ها صار حجي امك تافه

وسام......ماما احبه تعرفين شنو احبه يعني اموت بدونها

وهي خوش ابنيه وتستاهل

وتحبني

افتخار......بعد بعد كوله غثني

وسام....... ما اغثج بس الخاطري

لا تحجين عليه

واذا عرفتيه راح تحبيه والله

افتخار .....دفعت ايده ما عاجبه

لا احبه ولا تحبني

اجه عزيز.....

هذا وسام .....هله بابا اشلونك

حضني مشتاق ومتاسف لان انقلت

ابويه حازم بقراراته و سياسي بس امام اولاده حنين ويحبنه

امي عكسه هم اتحبنه بس عده المستوى والمظاهر ما تتنازل عنه

.....بوست ابويه ادري امتاني اخباري

حجيتله على الرائد وعلى مكاني

بس لا امي ولا سراب كلتلهم اني بالخط الامامي ما ريد يشيلون همي ويفكرون

خلصت الاجازه ابسرعه 

٣ ايام ما عفت سراب اريد اشبع منه

بالشقه مالتنه هاي سرنه اني وياهه

واهلي ما طلعت بره البيت حسيت

العائله والاهل نعمه ما نحس بيه 

الا لمن نشعر بغربه ونبتعد عنهم

حسام عمره ٢٠ سنه جبير ويفهم بس سامر المدلل عمره ١٠سنوات

خلصته وياهم.....

اليوم السادس

مريت ابسراب ابداية الدوام

تريكنه سوه بالكافتريا

وودعته وطلعت

         الفصل السادس من هنا 

بدل ماتدور وتبحث علي الروايات خليها علي تليفونك وحمل تطبيقنا

تعديل المقال