رواية فصيلة دمشق الفصل الخامس 5 بقلم احمد
ميرا.. كنت يادوب امشي وبحس الدنيا عم تسود بعيوني وحسيت حدا مسكني التفتت عليه كان محمد ودفعتو وققلت بصوت عالي بعد عني
تفاجئ هو بردة فعلي والي موجودين كلهم انتبهو علينا ومشيت خطوة ووقعت على ركبي ولما ركضو علي فقدت الوعي
خليني اعرفكم على عائلة عمي وجدي وجدتي قبل ما نبلش بالبارت ومن هذا البارت راح تتغير اللهجة عالعراقي بالكامل
نبدا بجدي الي اسمو اسماعيل شيخ العشيرة والجببر بين اخوانو عمرو 71 سنة وجدتي بُشرة بضم الباء عمرها 68 سنة
عمي اصغر من بابا بالترتيب اسمو سامر عمرو 49 سنة وزوجتو زينب عمرها 46 سنة وعندكم ولدين وبنتين
الاولاد مصطفى 26 سنة وايمن 25 سنة والبنات جنان وجنات اعمارهم جنان 20 و جنات 19 والهن دور كبير بالقصة
كعدت بعد شوية جنت نايمة على قنفة وماما حاطة راسي بحضنها وكاعدة بس من كعدت ما فتحت عيوني بقيت مغمضة
جدتي.. لو رايحة نايمة وماخذتها وياج
سارة.. راح اخذها هسا
جدتي.. اي ترتاحون مبين عليها تعبت
سارة.. اي والله تعبت وعادل الله يصلحو عيشها برعب
جدتي.. يااااا ليش شسوا عادل
سارة.. جنا دا نمشي ووكفنا داعشي وعادل جان يريد يخلص منو ونصب عليه عرض عليه انو ياخذ ميرا ويعوفنا
وسوا نفسو دا ينزل ويسحب ميرا والداعشي صدك واجى يريد يسحب ميرا ويا عادل وعادل دفعها داخل السيارة وضرب الداعشي
هاي من الخوف اغمى عليها وعادل اخذ السلاح من الداعشي وضربو طلقة اجت براسو وانهزمنا وعفناه ومانعرف شصار وياه بعد
جدتي.. يعني عادل قتلو
سارة.. اي والله بس ماجان بيدو حل ثاني لازم يسوي هالشي رغم هو غلط
مصطفى.. ماكو اي غلط بالموضوع شخص شايل سلاح ويريد يقتلكم مو زين ما قتل احد منكم بس المفروض عادل ينطي خبر لميرا مو هيج يخوفها
سارة.. هو يكول تعمد ما يحجيلها علمود تكون ردة فعلها حقيقية وحتى اني ما جنت ادري بيه لو ما حجالي بعد ما كملنا طريقنا
مصطفى.. المهم هسا نامو وارتاحو ومن تكعدون نحجي إن شاء الله
سارة.. وهو هيج يمة نعمان تعال شيل اختك للغرفة
نعمان .. تمام
ميرا.. رغم جنت كاعدة بس مستحية من السلام فكملت تمثيلية النوم واجى نعمان اخذني للغرفة حطني عالفراش وطلع
واجت ماما نامت على سرير قريب مني وبقيت مغمضة لحد ما اخدتني النومة وما كعدت لليل فتحت عيوني جانت الغرفة فارغة
رجعت غمضت لحد ما نمت مرة ثانية وما كعدت للصبح على صوت ماما
سارة.. يا بنيتي كومي صارلج يوم كامل نايمة
ميرا.. اتركيني نايمة يمة ميتة من التعب
سارة.. كومي اكلي سلمي على عمامج تعرفي عالبنات
ميرا.. بعدين مو هسا اريد اكمل نومتي
سارة.. يلا ميرا بدون دلال زايد
ميرا.. بزعل .. تمام
كمت اخذت ملابس ودخلت للحمام اخذتلي دوش علمود اصحصح ورجعت مشطت شعري عالسريع ولبست شالي ونزلت
جانو كلهم متجمعين عالسفرة سلمت على جدي وجدتي وعمي وزوجتو والبنات ومن بعد سلم عالولد وجدي عددلي اسمائهم
كعدت وياهم عالريوك جان ريوكهم ملكي گيمر وكاهي وجبن وقشطة وزبدة غنم يعني من صدك ماتعرف شنو تاكل وشنو تعوف
صحيح بسوريا جان الريوك هم قريب من هالشي هذا بس نفتقد الگيمر والكاهي وزبدة الغنم واكثر شي متوفر زيت وزعتر ودبس وراشي ومربى
من خلصت ريوك صاحتني جنان كالت تعالي ويانا كلتلها تمام واخذت صحنين وياي واخذتهن من ايدي كالت عوفيهن انت ضيفة
كلتلها ماكو فرق كالت لا اكو انتي حاليا ضيفة لازم نضيفج 3 ايام بعدها شدي حزامج عالشغل كلتلها بابتسامة لعد خليني ضيفة احسن
جنات.. احجيلنا عن حياتج بسوريا
ميرا.. طبيعية مكضيتها دراسة وشغل البيت ويا ماما
جنات.. مبين على لهجتج مو عراقية بس تعرفين كل الكلمات
ميرا.. اي صحيح لان متعودة هناك احجي ويا ماما وصديقاتي وخوالي سوري بس بابا واخواني يحجون عراقي فصرت افهم اللهجتين
جنات.. حلو انج تفهمين لهجتيت وتحجينهن بطلاقة
ميرا.. اي صح
جنان.. ودراستج شلونها
ميرا.. مو زينة مدا انجح
جنان.. ياااا ليش
ميرا.. مدا افهم للشرح وادرس بدون فايدة
جنان.. حرامات
ميرا.. شسوي حاولت هواي بس ما نجحت نجاح عادي دائما الاولى عالمدرسة
جنان.. هاا
ميرا.. ههههههههههه اتشاقة وياج طلعت الاولى عالمدرسة هالسنة
جنان.. وفوكها مقهورة عليج اني
ميرا.. ههههههههه
جنان.. بس والله عفية من طلعتي الاولى اكيد اهلج طارو من الفرح
ميرا.. باستهزاء .. ههه اي
جنات.. شبيج
ميرا.. ماكو شي
جنات.. امانة احجي
ميرا.. بابا بيوم الي استلمت النتيجة ضربني راشدي
جنات.. ياااااا ليش عود
ميرا.. لان رحت للمدرسة وجنت كايلة لماما وماما نست تنطيه خبر ومن رجع وما لكاني دز سليم اجى اخذني ومن رجعني ضربني راشدي
جنات.. يااااا حرام عليه خرب حتى فرحتج
ميرا.. عادي اصلا متعودة فرحتي ما تكمل
جنات.. احنا بالعكس ابونا كلش يحبنا بس مصطفى متحكم بينا مانكدر نسوي شي بدون ما هو يوافق
ميرا.. اي
جنات.. بس سؤال شلون تكدرين تحجين وتضحكين وانتي عشتي اسوء ايام حياتج من اجيتي
ميرا.. ماعرف والله يمكن دا اسوي هيج علمود اغطي عالخوف الي بداخلي لان مدا انسى احداث ذيج الرحلة التعيسة
جنات.. ما الومج والله
مصطفى.. السلام عليكم
البنات.. عليكم السلام
مصطفى.. شكد باقي للغدا
جنان.. مو باقي هواي
مصطفى.. لا تخلن ميرا تشتغل
ميرا.. ليش
مصطفى.. لان انتي ضيفة
ميرا.. ما احب الرسميات ترا حالي حال البنات
مصطفى.. كلت ما تشتغلين وهاي هي
ميرا.. انا اقرر هالشي
مصطفى.. شنو كلتي
جنان.. مصطفى عوفها تشوف اعصابها تلفت من الخوف لا تزودها عليها
ميرا.. عافنا وطلع وجنان كالت عوفيه لا تعانديه ترا ما يحب العناد ولان هو الجبير بابا ما يحجي وياه ودائما يكون هو على حق
كلتلها مدخلني بيه ماطول هو ما يتدخل بي وصارن ينصحني هي وجنات انو ابتعد عنو وما ابقى اتعاند وياه
كلت بكلبي شنو هو نبي لو رسول علمود ما اخالف كلامو والله يا الله اني بدون كلشي طالعة روحي من كره بابا الي اجي هنا الكي هذا كدامي
حطينا الغدا وهو عود عصبي واني مطنشتو ولا كأنو موجود بس الشغلة الحبيتها بيهم هي جمعتهم على الاكل
تشوفهم كلهم كاعدين على سفرة وحدة ومو متقيدين بوجودنا يعني اني اكل عادل كدام ولدهم والبنات ياكلن عادي كدام اخواني
اكو هواي عمام يكونون مو متعودين على بعض فالبنات يتقيدن بوجود ولد عمهن بس الحمدلله احنا ما واجهنا هذا الشي
خلصنا الغدا ورجعنا اني والبنات للمطبخ وتعمدت اشتغل وياهن عناد بمصطفى وكلش تونست وياهن وحبيت معاملتهن الحلوة وياي
ماما من شافتني مندمجة وياهن فرحت الي لان تعرفني قبل اضوج لحالي وهم وجودهن ينسيني الاحداث الي صارت
من صارت الدنيا عصر راحت جنان خابرت على ايمن وطلبت منو يجيب حلويات وكرزات علمود نطلع بالحديقة نسولف
وتقريبا نص ساعة وجابهن واخذناهن وطلعنا بالحديقة وصرنا نذكر مواقف صارت ويانا قبل ونضحك على بعضنا
بس اكثر وحدة جنت اضحك على مواقفها هي جنات تحجي الموقف بطريقة تخلي الواحد يضحك حتى لو الموقف ما يضحك
قبل المغرب بشوية اجو عادل ومصطفى وشافونا كاعدات نحجي واجو علينا وسكتن البنات لان عادل ويا مصطفى
مصطفى.. شبيكن تتمضحكن وصوتكن واصل لسابع جار
عادل.. على كيفك ابو الصوف ترا لو مو داخلين ماندري بيهن
جنان.. نعتذر اخذنا الواهس
ميرا.. ترا صوتنا ناصي
مصطفى.. لعد اني سمعت صوت منو
ميرا.. اسأل نفسك هالسؤال
عادل.. كافي ميرا
ميرا.. لعد كلو لا يتهمنا مو كل ما شافنا متونسات يخرب ونستنا
مصطفى.. شو انتي ما تحترمين الاكبر منج
ميرا.. بعصبية .. بكيفي اني ما احترم انت شنو دخلك لا ابوي ولا اخوي كل شوية جاي مدخل بيناتنا ومسوي نفسك مسؤول علينا
رفع ايدو يريد يضربني ومسك ايدو عادل
عادل.. مصطفى لا تنسى نفسك
مصطفى.. ادب اختك عادل لان هواي تجاوزت
ميرا.. دطييير انعل ابو الساعة الي جابتني هنا
عفتهم ومشيت وهو عيوني صارن بكصتو من العصبية وبوقتها ماعرف شلون انفجرت هيج عليه بس مابقى عندي طاقة اتحمل
فوك ما خرب ونستنا يتهمنا ويجذب عينك عينك شكد مكروه مدري على شنو شايف نفسو رحت كعدت عند ماما واني طالعة روحي
جدتي.. شبيج ميارا (تدلعني)
ميرا.. ماكو شي مصطفى ضوجني
جدتي.. شبيه صوفي
ميرا.. يتدخل بي ويجذب ويخرب ونستنا اني والبنات
جدتي.. وينك مصطففففى
مصطفى.. ها بيبي
جدتي.. شبيك ويا بنت عمك
مصطفى.. ماكو شي بيبي صوتهن طالع وكلتلهن يكصرن صوتهن
ميرا.. والله جذاب...... وسكرت حلكي امي
سارة.. كافي ميرا
مصطفى..جزاج الله خير
جدتي.. كافي ماصار شي سكرو عالموضوع
ميرا.. ويريد يضربني هم بس عادل منعو
جدتي.. هاي صدك
مصطفى.. لا بيبي ضوجتني وبس ردت اخوفها لان ماتحترم الاكبر منها
جدتي.. اي دير بالك تمد ايدك عليها عدها اخوان وابو هم يحجون وياها اذا تجاوزت احجيلهم وهم يتصرفون
مصطفى.. صار بيبي ما يكون خاطرج الا طيب
جدتي.. ها هيج كافي ميارا
ميرا.. اي
سارة.. هسا ارتاحيتي من اول يوم سويتي مشكلة ماكدرتي تتحملين
ميرا.. تلفت اعصابي عالاخر وبجيت .. ماما والله ما دخلني يعني يجي هو يتدخل بي ويضوجني ومن احجي الحقيقة اطلع غلطانة
سارة.. هههههههههه دكافي كافي ام دميعة شحجينا وياج
جدتي.. عوفيها سارة اعصابها تعبانة ومصطفى الله يصلحو ما يحب احد يعاندو
سارة.. تمام يلا روحي غسلي وجهج وابقي ويا البنات تونسي
ميرا.. تمام
جانت اكو مغسلة صغيرة تحت الدرج يم الحمام والتواليت الداخلي غسلت بيها وسمعت صوت وراي انداريت جان مصطفى
مصطفى.. عاندي بعد عاندي ما يكون اسمي مصطفى اذا ما ندمتج
ميرا.. استغفر الله ياربي
تجاهلتو وكملت غسيل وهو ماعرف وين انكلع ورجعت عالمطبخ لكيت البنات موجودات وضايجات بسبب الي صار
المشكلة هن خطية مابيدهن شي غصب عنهن يحترمن اخوهن الجبير والله انطاهن اخو حتى الجحش ما يتحمل نفسيتو
بس جنت فرحانة لان بردت كلبي بيه وماكدر يسوي شي علمود مرة ثانية ما يحط نفسو بمواقف بايخة ما الو دخل بيها
مر ذاك اليوم طبيعي بس كل ما نتواجد اني ومصطفى بمكان يخزرني بعيونو واني اطنشو ما اريد انطيه اكبر من حجمو
بالليل ماما راحت على غرفة خاصة الها هي وابوي واني بقيت لحالي بالغرفة ورغم حبي لماما بس ارتاح بالغرفة اكثر اذا اكون لحالي
من صارت الساعة 8 بالليل خلصنا شغلنا اني والبنات ورحنا على غرفتهن جانت كلش حلوة ولطيفة لان الوانها كلها بناتية
صارن يشوفني ملابسهن وذهبهن وجان ذوقهن بالملابس كلش حلو كلتلهن اني ما جبت هواي ملابس كلهن عفتهن بسوريا
جنات.. اذا تريدين اخذي من ملابسنا
ميرا.. لا ما اريد شكرا راح اخلي ماما تكول لبابا نشتري من السوك علمود تشوفن ذوقي وهم ذني كبار علي
جنات.. عادي يتصغرن
ميرا.. لا ما يحتاج نخربهن اشتري من السوك وهاي هي
جنات.. براحتج بعد
جنان.. هناك هم تلبسين بنطلون وتطلعين بدون شال
ميرا.. علمود بابا يسحلني سحل
جنان.. ههههه احسن الستر احلى للبنت
ميرا.. اي اكيد
جنات.. بس هناك ماكو شباب يتحرشون بالبنات مثل هنا لان متعودين يشوفون بنات لابسات قصير او بنطلونات او حصر
ميرا.. لا اكو بالاخص ولد المسؤولين محد يكدر يحجي وياهم واحد منهم يوكف يم مدرستنا هو وجماعتو وشحد اليحجي وياه
جنات.. عوووووع شكد اكره هيج اشخاص
ميرا.. كلنا نكرههم
جنان.. خوما تعرضلج انتي
ميرا.. لا جنت اروح اني وصديقتي على محل قريب من المدرسة ونبقى بيه لحد ما يروح
جنان.. اي احسن هيج
ميرا.. بس لا تحجن كدام احد ترا بابا ما يعرف واذا عرف هسا اتورط
جنات.. خوش مستمسك هههههههههه
جنان.. اي والله
ايمن.. من ورا الباب .. جنوووو
جنان.. ادخل ايمن
ايمن.. السلام عليكم
الكل.. عليكم السلام
ايمن.. بروح ابوج جنان سويلي اكل جوعان ولا كأني متعشي
ميرا.. بشرط
ايمن.. شنو هو
ميرا.. تعلم اخوك يصير حباب مثلك
ايمن.. هههههههه لا ترا مصطفى حباب بس عصبي
ميرا.. لا هسا لازم احد يسويك حباب
ايمن.. ههههههههههه معليج بيه
جنان.. اروح احط عشى لهالفقير وارجع
ميرا.. جايات وياج
جنان.. تمام
ميرا.. رحنا حطينا عشى لايمن ومن تعشى غسلت المواعين جنات وكملنا سوالفنا بالمطبخ ومن صارت الساعة 11 توجهنا لغرفنا
ثاني يوم الصبح كعدت زغزغة العصافير فتحت الشباك وباوعت جانت اكو شجرة قريبة على الشباك ومليانة عصافير
جان منظرهن كلش حلو وصوتهن يوصلني من الشباك ورحت توضيت وصليت الفجر ونزلت تحت لكيت البنات دا يجهزن الريوك
راحت جنات كعدت العيلة وكملنا الريوك وتريكنا ومن طلعو الزلم والولد رحت على ماما كلتلها ايمتى نروح للسوك
جدتي.. شنو تريدين من السوك يمة
ميرا.. اريد اشتري ملابس
جدتي.. هسا اتصل على مصطفى يجي ياخذج انتي وامج
ميرا.. لا بابا او عادل ياخذنا
جدتي.. ههههههههه بعدج ضايجة منو خلص اكلو ينطي خبر لعمو او عادل يجون ياخذونكن
ميرا.. تمام
سارة.. روحي جهزي نفسج
ميرا.. تمام
سارة.. اخذي عباية من البنات
ميرا.. البس جبة
سارة.. مايصير هنا
ميرا.. بس ماعرف البس عباية
سارة.. تعلمي
ميرا.. هووووف تمام
رحت اخذت عباية من جنات وصارت شكبرها علي اني منا اصغر من جنات وفوها هي شوية بيها ضخامة فصارت شكبرها
وجنان هم جبيرة عبايتها لذلك اخذت عباية من جنات نزلت للصالة لكيت مصطفى كاعد من شافني كام كال يلا
ميرا.. شنو
مصطفى.. مو تريدين السوك ست ميرا
ميرا.. اي بابا يجي ياخذنا او عادل
مصطفى.. دمشي مو ناقص سوالفج
ميرا.. ما اروح ونزعت العباية
مصطفى.. الصبر ياربي الصبر ترا ما اشتغل عند اهلج اني
ميرا.. محد طلب منك تاخذني اني اريد بابا ياخذني او اخوي
سمير.. ميراااااا شبيج رافعة صوتج على ابن عمج
ميرا.. بخوف بابا اريدو يكولك تاخذنا على السوك اني وماما وهو يعاند
مصطفى.. ماكو شي عمي اريد اخذهن وهي مو راضية فوك ما اريد اسوي زين
سمير.. اي روحي وياه عادل ما يندل هنا
ميرا.. هاي هي بابا ما يحتاج غير مرة نروح
جدتي.. اخذها انت سمير وهم امها تريد تروح وياكم
سمير.. يلا لعد
سارة.. يلا
ميرا.. كلت بكلبي والله تستاهلين بوسة على هالتدخل يا جدة همزين بابا ما رفض جان انجبرت اروح ويا هالمكروه
لبست العباية ولحكتهم ركض وركبت وياهم بالسيارة ومشينا كالت امي مصطفى كالك انو نريد نروح للسوك
سمير.. لا بس عادي مو غريب هو والولد جان يريد يسوي خير
سارة.. حتى لو المفروض ينطيك خبر يجوز احنا نريد ناخذك علمود موضوع خاص وهم نشتري براحتنا
سمير.. ماصار شي بس ميرا ليش رافعة صوتج عليه
سارة.. الصراحة هو هواي ضوجها من اول ما احينا
سمير.. هو ابن عمها واكبر منها وتحترمو مثل ما تحترم اخوانها عيب ينرفع صوتها ببيت عمها
سارة.. يلا صارت وما تنعاد
سمير.. تمام
لمتابعة باقي الرواية زوروا قناتنا على التليجرام من هنا
بدل ماتدور وتبحث علي الروايات خليها علي تليفونك وحمل تطبيقنا
